☆LUHLULPA☆ - 1 & 2 By Dingdi Pachuau

☆LUHLULPA☆ - 1 By Dingdi Pachuau




Ka fanu tui taka a muhìl sâk sâk chu ka thlîr reng a, ani lah chuan hmangaih takin ka thlîr a ni tih hre hauh lo hian kàwi sàwi zeta a teddy bear kuaha mu hian a thaw sâk sâk a, a biang tài deuh têkin a hmêl a han tihțhatzia chuh..ka thlîr ning thei mawlh lo. Mahni rîla rah fate hi chu mi fâte ai chuan kan duatin kan lo hmangaih deuh chu a ni, hmangaihna mita kan thlìr vàng pawh a ni ang chu, mi fate aia an chhiatna kan hriat theih miah loh ni.



Rei tâwk fang ka thlìr hnuah chuan kûn hniamin a biang tài têkah chuan ka fawhsak zauh a, thàwm dìm takin room ațang chuan ka chhuak ta țhem țhem a, kawng erawh ka khâr lo. A lo harh veleh min ko leh vak emaw a ni ang a, ka hriat thuai loh chuan a lo țap leh palh thei si a, chuvàngin ka khâr duh lo. Choka zîm zetah chuan lût pheiin kan nufa ei tùr chu siam tùrin ka buatsaih țan ta nghâl a.



Kan in chhûngah hian bungraw changkâng tak tak awm lêm lo mah se kan mamawh hi chu a awm kim ve viau, mamawh kan neih tam lêm loh vàng pawh a ni maithei. Kan nufa tê hi kan ni mai a, kan ei a tam lo va, ni tina kan ei khawp kan neih chuan kan lung a âwi ve mai țhin. Bawihtei phei hi chu a barbie leh a teddy bear a bula an awm phawt chuan a lung a awi êm êm zêl, khawvêl nunphung tak tak, dam khawchhuak tùra tih takzeta beih a ngaihzia a la hriat loh vàng pawh a ni mahna le.



Fb lama ei tùr siam dàn group ka join hi ka hmang țangkai thei hle mai, ka tuina lam tak a lo ni bawk nèn, kan nufa ei tùr na nâ nâ hi chu ka siam 'cial' thei khawp mai. A pate nèn kan awmho lai pawh khân ka siam tui țhìn tho a; mahse, min awm lohsan tâk hnuah hian ka uluk zual ta sauh. Ei tùr hrisêl hi ka ngaina a, tui tih vàng ringawtin taksa tâna hrisêl lo tùr hi chu ka ei khât, ka insûm thei ve viau.



Ka phone a rawn rì a, rang zetin kut berh pawh pawisa lo chuan ka ban vat, a rîk rei chuan Bawihtei a lo harh hlauh palh ang.



Saiha lama min dàwr țhintu Muanpuii a lo ni a, a thil rawn order chu a rawn sawi fiah țha leh a lo ni a.



"Muanpui, ka theihnghilh ang chu ka ti miah lo va; mahse, Whatsapp lama a zât i rawn ziah dik phawt chuan a awm vek tùrah ka ngai," ka ti a.



"A làwmawm ngawt ang. An nghâkhlel thei sia, kârleh Monday khian a lo thleng thei ang tiraw?" a rawn ti a.



"Aw, kan dama ka rawn thawnna sumo a tluan bawk chuan," nui chung hian ka ti a.



Cosmetics Wholesale Group ka siam a, WhatsApp-ah. A tihchi reuh a nia aw, Mizoram hmun hrang hrang leh Mizoram pâwn thlengin dàwrtu ka nei ve nual a, thawnna tùr a tam țhin avàngin ka buai thei hle a; mahse, buai nak nak hi a nuam ka ti ve tlat. Min dàwrtute hi an fel a, an lâkna pawisa hi account lamah a bo a bàng awm lovin an rawn thun țhap țhìn. Vawi khata min dàwr țawktute hi làwmmnan ka siam ve țhin bawk a, ka ti to lo hlawm bawk nèn, ka rin aiin ka hralh tam țhìn, chuvàngin tûn thleng hian ka bànsan phal lo.



Sana chu ka melh zauh a, dâr 2 a lo pèl tawh. Bawihtei pawh a lo harh țêp tawh ang chu, a lo harh veleh kan ei thei nghâl ang.



Ka phone chu khawihin order chu ka en chhin a, order chu a tam leh khawp mai. Tûn țum chu Mamit lamin làwmman an dawng ve tawh dâwn thung a nih hmel.



Bawihtei'n min rawn ko ta lauh lauh mai. Ka phone chu dahin room lam chu ka pan ta nghâl a, khumah a lo țhu ràn tawh mai!



"Hi, Bawihte...i lo harh tawh maw? I mumangah min lo hmu leh em?" tiin ka pawm tho nghâl vat. A bân chum biang chuan ka nghâwngah min kuah lêt ve nghâl.



"I ril a țâm tawh em? Ei tùr tui tâwk ka lo sìam leh che a."



A biang tài têkah chuan ka fawhsak leh zoh. Plastic chair-ah chuan țhuttîr nghâlin,"Lal fanu tân hian Bawnghnute ka lâksak ang a, a hmeh tùr tui 'cial' lutuk Âmâ-in a tân chauha a siamsak ka rawn chhawp nghâl bawk ang," tiin ka thawhsan a, no tung deuh tak chu lain bâwnghnute chu ka thlitsak ta nghâl a.



"Âmâ, Âpa hnênah lêng ang."



Bawihtei hian he thu hi a sawi ta zauh zauh, chhùna a mut thawh hian a ni tlângpui bawk. A mumangah a pa hi a hmu țhìn a nih ka ring.



"Bawihte, ei tùr ei phawt la aw. Ei tùr i ei zawhah kan sawi ţha dâwn nia," tiin bâwnghnute no chu dawhkànah hûngin pasta plate chu ka hûng hnai bawk a.



"Âpa chu phone rawh aw."



A pa hi a ngai thei a nia, a pa lah hian a lo duat ve bawk a, a àwm ve tho mai. Pa la ngai rual lek a ni a, a pa rawn kal țhìn pawh hi ka sawisèlsak duh ngai lo. Phal loh ringawt theih a ni si lo, a hringtupa dik tak, a pa a ni miau mai si a.



"Um, pasta leh bâwnghnute kha eiin in zo vek phawt la aw?"



"Aw le."



Ka lam hawiin min rawn nuih sak phawt a, chutah, a bâwnghnute chu a in ta nghâl a.



A pa nèn hian kan ințhen tawh tih hi a la hre thiam ve miah lo va, hre thiam tùr pawhin ka beisei lo va, han hrilh fiah viau pawh ka tum chuang lo, a kum a tam hunah a la hre thiam ve mai ang. Thil thleng zawng zawng hre thiam tùrin a kum hian a la pha thlâwt si lo va, hun a kal zêl ang a, a hriat thiam hun àwmah ka la hrilh vek ang chu.



A inkhualtelem laiin a pa chu a rawn kal a, kei chuan zanriah tùr ka lo buaipui a.



Țê chùl chung hian a pa lam pan chuan a tlân vat a, ani pawhin bân lo pharin a fanuin a va kuah chuan a lo pawm kãng lawp a, Bawihtei hlim chu a țë rai rai a.



An pafa hi an inchhùn fuh asin. A pa fanu a ni tih rinhlelh theih a ni lo, an hmel, pianhmang leh chezia thlengin an inchhùn vêl vek. An nuih zâwnga an han maimichhîng deuhthaw thlengte hian an inang nia maw le! Kei chu ka vun ngo lamah chauh min chhùn thung.



"Thingpui i duh em?"



Min rawn en zawkin," Duh lo mai ang, Bawihtei rawh tlawhin ka rawn pêng lawk tak tak, tih tùr ka nei a," tiin Bawihtei chu a chhaih leh nghâl zat a.



Ka thaw huai. A fanu a rawn tlawh tal a, a țha. A pa a ni a, a rawn ngaihsak loh chuan tuin nge rawn ngaihsak tehlul ang? A pi leh pute lah an awmna a hlat bâkah an rawn kan ngai si lo, a pa bâk hi rawn tlawhtu a nei lo. A ngai viau pawh hi àwm ka tihpui, kan pahnih tê mai chauh kan ni si a.



Zanriah ei hmain exer ka la leh rih a, Bawihtei'n music a hre chiah chu room ațangin a rawn tlân chhuak nghâl. Exer lâk nân hian music ka play țhin a, hei hi fa ka neih hnua exer ka lâk dàn chu a ni ta. Tlàn a rem tawh si lo va, in chhûnga zuan țawk țawk lah a tihchi tawh si lo nèn, Bawihtei nèn kan lâm dùn thei a, a zia viau.



Ka nulât lai kha chuan ka țhiannute Gym-ah kan kal țhin a, kan hman țhìn bawk a, hun âwl kan neih phawt chuan kan ina kan làm loh leh Gym-ah kan kal a, kan nui thlêr nasa țhìn a nih kha. Pasal ka neih hnuah kha chuan Gym kal kha a lo harsa ta a, mahni thu thuin a awm theih tawh loh nèn, ka kal lohna pawh kum 5 chuang zet a lo ni ve dâwn ta; mahse, ka la lâm thei tal a, a zia ti tawh mai ang.



Mut hmunah IG lam ka check a, message a lo awm leh nual tawh niin. Ka hmel hriat ni lêm lote DM hi chu ka chhiar ngai hauh lo, mipa an nih hlauh phei chuan.



Ka check zar zar a, ngaihtuah vak lova message ka chhiar thlâk zêlah chuan mipa ka hriat ngai pawh ni lo message ka'n chhiar palh hlauh tâk chu!



*Mizo hmeichhe zïngah chuan i hmelțha ka ti ber*



A làwmawm thei a nia! Za vak lo chuan ka țhen sak. Ka hriat ngai ni lo mah se min sawisêltu thu ziak ai chuan chhiar a nuamin pài a hahdam deuh ni mai teh se.



Phone chu lukham hnuaia dahin light ka off a, Bawihtei muhìl sâk sâk tawh chu kuahin muthilh chu ka tum ve ta a; mahse, ka muhìl thei lawk lo, a chhuak thei lo a ni ber mai.



Chutia ka muthilh theih tâk lohah chuan ka chunga thil hrang hrang thleng tawhte chu ka ngaihtuah lêt a, theihnghilh daih duh țhìn mah ila nimin lawka thil thleng ang maiin rilruah a lo thar leh ta uar uar mai.



******



"Kumin Chapchàr Kût chu kal ve tawh ang u aw?"



Dàwr ka nghahnaah Laltei leh Nutei chu an rawn kal ve a, inthlahrung hauh lo chuan an titi par par reng a. Kei erawh chuan an titi ka lo ngaithla a ni zâwk mah, thil min zâwta ka chhâng a nih loh chuan ka țawng ve mang lo, thil lei tùr rawn kal ka lo ngaihven zâwk.



"Loh theih loh! Nikumah lah kan kal tawh lo va, kumin chu kan vul hle ang!" Laltei chuan a lo ti vat a.



Ka lo nui ringawt.



Nia, nikum khân Nutei dam loh vàngin kan kal lo. Țhian 3 lek kâra pakhat kal theih loh chuan a kal bîk nih kha Laltei nèn kan duh lo ve ve a nih kha.



"Dâwn chiang, kan vul tûk ang! Kan thawmhnaw hâk tùr pawh ka lo ngaihtuah lâwk vek tawh! Nikum lamah ka thei lo vei a, kumin zet chu lâr hlê ila a ni mai," Nutei chuan uar zet hian a lo ti ve leh a.



Nikuma kan thawmhnaw hâk tura kan tih ve pawh kha hâkna hun awm thei tawh hek lo le, kan la dah țha reng hlawm tak ang chu. Kuminah kan ha chhuak thei chiah ang, kawr thar a ngai lo tihna.



"Nikuma kan hâk tâk loh kha ka la dah țha reng," Laltei chuan a lo ti a.



"Kei pawh."



"A țhat hlauh chu. Kan chei thar ang a, a mawi viau ang. Chuan, keima'n ka chei ve ve ang che u," Nutei chuan phûr fahran hian a lo ti leh sauh sauh a.



Kan țhian 3 zîngah hian Nuteite hi an hausa ber a, fanu mal a ni bawk. A duh apiang hi chu a nei thei niin ka hria, incheina lamah pawh a awh apiang a nei thei mai, Gym changtlung tak an nei bawk, chutah chuan kan kal ziah țhin. A awmthei ber a nih vàng chuan ui pawh a nei ngai lo va, ei leh in lamah phei chuan Laltei nèn min kêp ziah; Laltei nèn erawh hi chuan chhûngkaw pângngai ve mai kan ni.. Laltei pa hi zirtîrtu a nia, kei ka nu zirtîrtu a ni thung. College kan chhuak țêp tawh a, kumin hian kan chhuak ve ang chu.



Ka țhiante pahnih hi nula tê tak ni lo mah se ka bulah chuan an lang hniam deuh, a chhan chu ka sàn deuh bîk vàng a ni. 5'4 ve ve an ni a, kei erawh 5'7 deuhthaw ka ni. Kan pian kum erawh a inang vek, Nutei hi May thlaah piangin Kei July, Laltei erawh August thlaah a piang thung.



Ka sàn vàng hian College-ah house aiawhin Miss-ah min teltîr an tum ve ziah a, ka hnial ziah bawk. Miss nih hi ka duh ngai lo, ka tlin pawh ka ring bawk hek lo. Ka sàn deuh vànga Miss-a tel tùra intih ziah mai chuh!Ka hnial fithla ziah, duh lo na nâ nâ chu min tilui bîk chuang lo.



Ka pian a lo inkhâithli mawi ve bawk a ni mahna, mipaho hian min fiam ziah bawk. A màwl chi nih chuan, min han fiama rum zeta melhin ka han tàwng lêt ta țhìn a, ka nu thil sawi țhin 'I rilru i țhansan a ni' a tih ve ziah kha a dik pawh a lo ni maithei a ni.



Chapchàr Kût nî chuan Țhuamluaia Mualah kan kal ve ta. Nuteite inah kan kal hmasa phawt. A duhthusàm zânin min han chei a, a hnuah kan thawmhnaw hák pawh chu a'n tidanglam leh a, makeup artist bâkah fashion designer a ni pah nghâl zat bawk a, a tihchi tak tak a ni.



Hemi nî hi ka dam chhûng hian ka theihnghilh thei tawh ngai lo ang, ka nuna ka thil duh loh ber ka tawn nî a nih vàngin. Chanchinbu lamah ka thla a'n lan tâk kha! Chapchàr Kût Miss-a thlan ka ni miau a!



Miss ka nih tâk hnuah chuan ka awm dàn ngai reng, ka khawsak dàn phung ngai rengin ka awm a, chu chu sawisêl tâwk an lo awm, social media lamah min faksêl a, a țhenin min țan ve bawk. Kei lah social media lam uar chi ka lo ni bawk nèn, min sawisèlna ka hmu fuh thei bawk si a, hrehawm ka va ti thei tak! Social media lama làr hi hamțhatna(?) ka hmuh chhun chu a nih mai hmel.



Mahse, a lo ni bîk vek lo. College ka chhuah hnua Aizawl lama zirna ka va zawm chuan Bawihtei pa nèn hian kan inhmêl hriat phah ta, chu mai a ni lo, ads shooting nei tura sàwm ka ni chho leh ta bawk. Khawpui lam nge nge, pawisa tlêm azâwng ka la lût ve thei ta hlek e. Gym-ah lah a free vekin kalna ka hmu bawk, tihchi lutuk!



Eng ka nih loh tehlul nèn, mi duhsakna ka dawng hle; mahse, University ka chhuah hma deuh chiahin Bawihtei pa(Victor-a) nèn kan inru ve ringawt kha a nia! Tûn hnua ka ngaihtuah lêt hian a ngaihtuah thui loh thlâk ka ti, ka lo țang na tâwk lo deuh chu a ni, ka zir chhuah teuh tawh nèn.



Min thlèm tlut tlut reng. Min hĕltu an awm ve nual avàng khân min neih thuai thuai kha a duh a, ka hnial ve țàng țáng nain min thlèm a bâng duh lo.



University ka chhuah hun min nghâk tùrin ka ti a, min hnial nasa.



"Kan inneih hnuah pawh i duh phawt chuan i zawm leh thei tho."



"Pasal neih tawh hnua class kal leh te chu a..."


Kei chu chhûngkaw hausa ațanga chhuak ka ni ve lo va, 'vànneih thil thua' Miss ni ve chauh mai kha ka ni. Zir chhuah phawt kha a țha alawm, hmalam hun tùr kan hre hauh si lo. Ani erawh hi chu mi hausa fapa a ni a, a hma hun ngaihtuah vak a ngai ve lo. Master degree a zawh hnuah an dàwr lian pui chu a kutah a awm tawp a, chu chu a hna a ni mai. Chu lah chu a nu leh pa an la dam avàngin ani chuan a nghâk ve teh chiam lo va, a hman thei viau rêng a ni.



Zan khat chu a țhiante birthday-ah kan kal a, ka hmel hriat an awm ve mang dâwn loh vàngin nuam ka ti dâwn lo tih ka hre sa a; mahse, min sàwmna hnar hrehawm ka tih vàng chauha kal ve hrâm hrâm ka ni.



Nuam ka ti lutuk lo nain amahin min ngaihsak êm avàng chuan hlim lo hmel dah țhain, hlim hmel takin hun chu ka hmang ve, kan haw țêp tawh tihah chuan rin loh deuhin buaina a rawn chhuak ta tlat. Chu pawh chu keimah vàng a ni.



"Vic, in nu chu a va chhe lo ve!"



Chu pa rawn țawng dàn ațang chuan a rùi a nih hmel, a lam chu kan hawi dùn nghâl, kei chuan a țhiante zînga a ngamtlâk fâl deuhin an rawn fiam emaw ka ti.



"Zanin chu ka lo làmpui ve teh ang, hauh hlur bîk lo la?" tiin a rawn nui huah huah a.



Victor-a bân chu ka chelh vat, a rûkin ka hlau deuh hlek bawk. Chubâkah, buaina a chhuak ang tih ka hlau pah bawk a.



"Haw kan tum tawh a." Vic-a chuan tlêm a lem ve sek nain ka rin aiin a țawng dam, a bâna ka chelh vàng nge, a insûm thei phian ka ti bawk. A tèr at ka ring a nia.



"Kalpui chhe lo bîk êm mai, vawi khat tal chu min lo khilai ve zauh la?"



A hnu lam chu buaina hlîr. Kan haw theih meuh chuan a tlai viau tawh a ni, Victor-a hmai pawh a vûng țan tawh a, a pem ve nung bawk. An insualna lamah khân an inhnek nasa dùn êm a, a àwm ve tho mai.



An inah min kalpui phawt. A pemte chu damdawi kan hnawih a, a vûng nasa tùr dan nân vûrin  kan dep bawk. Keimah vànga buaina chhuak a nih vàngin an ina kal phawt a tih pawhin ka hnial ngam lo rêng a ni, a hliamte damdawi hnawihsak a ngaih dâwn avàngin.



"A thîp viau a ni maw?" a ner deuh nâng nâng ka hmuh chuan ka ti a.



"Ka rin aiin insual a ti thei zêk mai!" a lo ti daih.



"A zia lo tak tak a ni," tiin a room banga sana intâr chu enin,"E khai! A va tlai tawh ve..! Hawh, min thlah tawh rawh, mak min lo ti tawh viau ang," ka ti ta a.



Che lo chàng lo chuan min en reng a, a mit pawh a khap lo. A mitko vûng vàngin a meng bui deuh châr tawh a, a rûk tak chuan a hmel chuan nuih a tizâ ka ti a; mahse, chutih rualin ka khawngaih rilru roh khawp thung.



"Haw lo mai rawh."



A țawng ring lo nain a thil sawi chu ka hre chiang ngang mai.



"Vic-"



"Min khawngaih lo em ni?" a ti leh zat.



Khawngaih tehrêng mai. Ka bialpa a nia, ka khawngaih a, an inah, a room-ah hial ka zui luh hi.



"Ka haw tlai lutuk chuan chhúngte an ngaih a țha lo ang. Ka khawngaih lutuk na chein insangmar la, min thlah hrâm mai la?" tiin ka ngèn ve thung.



Tuna ka awmna ka chhûngte hi ka pateate an ni a, min duat viau, fa 2 mipa ve ve neiin an la lian vak lo va. Zanina ka chhuak tùr kha an phalna la thlapa chhuak ni mah ila tlai deuha haw chuan an zahawm ka ti ngawt ang!



"Tihian ka rù che a ni mai!"



Ka hnial nasa, ani pawhin min hnial ve nasa. A tàwpah erawh min hneh ta a nih kha, tum loh deuhin kan awm dùn chu a ni ta mai. Dâwt sawia a tûka pateate ina hãw leh mai thei ka nih tehlul nèn, awm sual tawh hnua dâwt han sawi thar leh kha ka thei lo, pateate ka zah.



Kan innei ta thuai. Class chu kal zawm tùrin min ti nain ka duh lo, pasalte inah kan awm tawh a, duh dàn anga awm kha a thiang tawh lo. Kâr khat chhûng chu inah kan inawm  heuh heuh a, inthlahrunna tùr ber a chhûngte inah an awm ngai si lo va, kan room chu kan chhuahsan ngai lo tluk a ni!



Dàwr kan kal hnuah chuan țhahnem ngai takin ka nghâk ve țhin, kei phei hi chu University pawh chhuak zo ta lova pasal nei ka nih vàngin Vic-a nu leh pate mit tlun ka duh, an mit tlung lo mo nih ka hlau.



Vic-a pawh a fel viau, a tlangvàl lai ai khân a felin ka hria. Min ngaihsak êm êm a, ka inthlahrung ang tih a hlau niin ka hria, pasal țha tak chu a ni e.



Ka rai mai lo, fa neih chungchâng kan pahniha kan sawi dun pawhin rai rih loh chu a thu tlûkna a ni. Ka indang pawh a ni chuang lo, ka rai rih lo ve tawp, ka duh rih zâwk, a chhan chu fa neih kha a duh rih si lo va.



Mahse, kum khat vêl zet kan inneih hnu pawha ka la rai thei si lo chuan min tihlauthâwng ta deuh.  Kei hi ka rai thei dâwn lo a niang, ka pa lah chuan rai tùrin min duh tawh êm êm mai a; ka nu ve thung chuan eng a sawi ngai lo, a țawng tam loh mai bâkah ani hi chuan pawisa hlîr a ngaihtuah ni berin ka hria.



Zîng khat chu tûkțhuan ei laiin ka nu chuan Vic-a hnênah chuan bungraw laa zin tùrin a hrilh a, Vic-a chuan a lo hnial deuh a.



"A nih loh chuan min zu hruai tal rawh," a ti leh a.



"Anmahniin an rawn dah thei lo em ni?" Vic-a'n a tih leh chuan ka nu chu a lung a awi ta lo hle a niang, a âng chhuak ta.



"Nupui i neih tâk hnu hian mi hnial i hrât thar ta riau. Ka duh hauh lo, ni tina kan ei tùrte hi thawh chhuah a ngai asin, nuamsa takin dàwr in nghâk a, ei tùr a tui hlîr in duh leh a," a ti ta duah mai.



Ka pa chuan," E khai, bawrh bawrh țhìn a. Insûm ve deuh la, chaw kha ei phawt mai teh," a lo ti dam duai a.



"Chaw ei pawh a tui nek lo ve!" tiin a tho ta daih, nuam lo ka ti kher asin.



Chuta țang chuan ka nu chu meinei tak hian a âng ta zauh zauh, min tih chhan deuh hlek si, min ti dawt chuang si lo hian țawng a thiam a, nuam lo ka ti thei lutuk. Ka nu ina a awm ve tawh chuan ka ți dâk mai a, a rûkin ka inthlahrung dui tawh.



Ka period ta lo. Ka ruak lo ta a nih chu ka ring nghâl nain ka ring ngam lo deuh, a rûk tak chuan ka hlim kher asin. Vic-a chuan a duh vak lo maithei a ni, fa neih kha a la duh tlat si lo va; mahse, kei chu ka lâwm, ka rai thei lo riakah ka inngai tawh si a.



Doctor hnêna ka kal chuan ka lo rai ngei, ka hlimzia mai chuh! Tunah chuan ka pum chhûngah ka pasal Vic-a nèn kan inhmangaihna rah ngei chuan pàr a rawn chhuang țan ta si a.



Naute ka pai tih ka sawi chuan Vic-a leh ka nu chu an hlim ve vak lo; ka pa erawh a hlim hle. Tu hmêl a hmu thei dâwn ta si a, nui vur vur chungin a hlim thu chu a sawi mawlh mawlh a.



"Engati nge i hlim vak loh a? Kan pahniha inhmangaihna rah ka pum chhúngah a lo nung ve țan a nia, i hmu châk tawh zâwk lo em ni?" tiin mut hmunah chuan ka zâwt a.



"Ani aiin min duatin min ngaihsak thei tawh dâwn hleinem,"a lo ti daih.



Ka en deuh hâ! Ani aia kan fa lo piang tùr chu ka duat leh ngaihsak zâwk a rin vàngin a lo hlim lo a nih àwm chu! Ka nuih a va tiza tak!



"I va cute tak!"



Nûr zetin min rawn melh a, a hmui pawh a tipawrh nasa. 'Cute' ka ti kher kha a lungawi lo tih ka hria, a duh lo tih ka hre reng a, ka ti lui kual vêl a ni.



A bianga piaisakin,"Khatia i awm khân i cute lehzual," ka ti leh.



A ni lah tak a, ka pasal hi a chhe lo êm asin, ka hmangaihin ani pawhin min hmangaih a, tunah phei chu chu kan inhmangaihna rah chu ka pum chhûngah a țhang chho ve mêk a ni. Ka nu hi han âng deuh țhìn mah se thil ni ve rêng tùrah ka ngai tawh. Ka hlimna hi a tih chhiat ka phal lo, ka hlim veng veng tawh mai si a.



"Ka insùm a ngai tawh tihna a ni tiraw?"



Nui sak chung hian a hmuiah ka fâwp zauh a,"Mutpui tùr dang i zawn mai a ngaih tawh hmel viau mai," ka ti a, a âwmah chuan ka bei nghâl chial a.



"I ti tak tak thei lo ang!"



Ka nui hak. A âwih tak tak emaw ni le. Han zawng nâ se, a mawngah ka pêt țawk ang!



"Fîmkhur takin kan ti thei alawm."





*MI TU EMAW DINHMUN PHET CHU NUIHZAT MAI SUH, I HMALAM HUN TÙR I HRE HAUH SI LO. ENGTIK NIAH EMAW I NUIHZAT DINHMUNAH KHÂN I LA DING VE THEI SI A*






☆LUHLULPA☆ - 2 By Dingdi Pachuau





Bawihtei nèn rimawi rema kan sûk nghawng nghawng lai chuan ka nuin min rawn call ta hlauh, kan rimawi play a tàwp chiang kher mai.



"Um, Nu, eng nge ni ta?" thaw hap pah hian ka ti a, ka beka thlan rawn luang chu ka kut chuan ka hru pah nghâl a.



"Eng ni lo ve, Bawihtei ka be khât ta êm a, ka be châk a."



Bawihtei chu ka nu nèn chuan an inbe ta làwng lâwng a, chumi hlàn chuan ka lo 'squat' thung a. Hetia ka tih vàng hi a ni ang chu, nau ka paina ka dul pawh tunah chuan nula pângngai dul ang mai a ni leh tawh, ka nulât lai ai mahin ka nalh ta zâwkin ka hre hial! Ka nulât lai kha chuan tih tak takna tel lo khân Gym-ah khân ka kal ve mai mai țhìn kha a ni si a.



"Àpi, lo zin rawh," ka fanuin a tih chuan ka nui sak. Ka fanu hi ka hre thiam lutuk, kan pahnih tê chauh hi chuan a khua a har țhìn alawm, kei lahin țhian ka kàwm tam vak si lo. A pa lo kal pawh hian a lo lawm theih êm hi, amah ngaihsaktu, kawm tùr a duh ve a ni. Pâwna chhuahpui hi nuam a ti thei hle a, țûl tàwpah lo chuan ka chhuahpui ngai loh avàngin ka chhuahpui châng hian nuam a ti hle țhìn. A pain an in lama a hruai ve châng phei chuan nuam a ti lutuk ringawt; mahse, ka remti vak lo. Kan enkawl dàn a inang dáwn si lo, a duh duh an lo pe ringawt ang a, a duh apiang an tihtîr ang, chu chu ka duh lo.



"Yes, Àpi a lo zin dâwn!" inti thei zet hian a rawn ti a, an lo inbe zo tawh niin.



"Wow! A va nuam dâwn ve! Lalàpi chuan eng nge min rawn hawn ang aw?" ka lo ti vang vang a.



"Tet min lo hawn dâwn." Ka fanu hian 'Pelh' hi a lam thiam țhìn lo va,'Tet' a ti tlat zêl, ka hrilh chian hnuah pawh a ti 'Tet' zêl tho, ka hrilh peih ta lo, hriat chian hun a la nei ve tho ang chu ka ti ta ngawt.



"Chu lo chu?" ka tih leh chuan a ngawi ta vang vang a, ka en reng a, a hnu deuhah chuan," Lalàpu," a ti ta daih a.



Ka nuih hak mai.



"Lalàpu a lo kal ve dâwn maw?" tiin ka tho a, ka han zi mar kual vêl a.



"A lo kal ve loh chuan Àpi chuan min lènpui duh lo ang,"vui deuh hmêl pu chung leh hmui tipawrh târh hian a ti nang nang a.



"Nakin tlaiah ka chhuahpui dâwn che alawm."



"Yesss, yesss.." tiin hlim takin a zuang tar tar a, a hlim hmêl leh phûr taka a zuang tar tar hmuh chuan kei pawh ka hlim lo thei lo, ka fanu hlim hmel hian hlimna min siam ve tho si a.



Tlaiah chuan kan chhuak a, bungraw lo thleng ka buaipui a ni. Bungraw lo thlen ni hi chuan ka buai thei tawp a ni mai, zànah pawh ka meng rei țhin, hmun hrang hranga thawn darh tùr ka nih miau avàngin; mahse, hei hi ka buaipui loh chuan kan nufa eibêl ber a ni si a, kan tân chuan a pawimawh lutuk tlat si a ni.



Sumo driver hi ka hmel hriat a nih vàngin bungrua chu in thlengin min phurhsak țhìn ta zâwk a, chuti ni lo se chuan taxi lain ka phar buai țhìn ngawt ang chu!



"Kârlehah chuan mi dangin motor an rawn khalh tawh dáwn aw," driver Rodinga chuan a ti a.



"Ni maw? Tuin nge rawn khalh ta ang? Nang angin ka nêl ve àwm si lo va, a va huphurhawm ve?!" ka lo ti a.



"Huphurh chuang suh, thil awm dàn ka lo hrilh dâwn nia," a tih chuan ka thaw deuh huai a.



"I hman tawh lo tihna em ni? Eng nge i tih dâwn a?" tiin ka zâwt a.



"Nupui ka nei dâwn a, inbuatsaih ve a ngai alawm."



Meng phar âwk hian," A ni maw?" ka ti deuh hluai a, chutah," A va țha ve! Ka lawmpui lutuk che," ka ti leh ta zâwk a.



Zànah chuan bungrua, hmun hrang hranga thawn kual dàn tùr chu ka buaipui leh ta a, Bawihtei pawhin min lo tibuai hran lo, a barbie leh teddy bear chu a lo khàl ve mai mai a.



Ka buaipui rei dâwn êm avàng chuan Bawihtei chu ka mutpui leh phawt, chuti lo chu a awm hmunah a lo muhìl mai mai ang tih ka hlau, thil dang ka buaipui avànga ani ngaihsak loh ka duh lo.



A mut hnuah chuan ka buaipui ngai bawk chu ka buaipui leh ta a, min tiharh tùrin coffee ka in hlek bawk. Ka duh chiah lo nain min tiharh tùr ka mamawh, buaipui rei a ngai si a.



Zînglam dâr 2 rîk hma hretin ka zo thei ta țâwk. Naktûkah ka thawn chhuak leh dâwn, zîng dâr 6 hmain ngei ngeiin ka thawh a ngai. Two wheeler tal hi chu ka va nei châk tak!



Buai tak ka ni; mahse, zia deuh mai chu driver hi ka hre tam ve tawh a, district tina thawn kual țhin ka nih avàngin ka tân chuan hmel hriat neih hi a pawimawh lutuk a ni tawp.



In kan thlen chuan ka chau hnawk mai; mahse, ka chàwl hman chuang lo, dâr 10 vêlah thil thawn chhuah tùr ka la nei. Rawng ka bâwl char char, a hautak lo va, a zia khawp mai.



Serchhip leh Lunglei chauh ka bâk ta. Bawihtei nèn chuan kan inhruai chhuak leh ta hnâwp hnâwp, ina Bawihtei lo awmpui tùr tal hi chu nei ila chuan a zia deuh tùr.



"Âma, âpate inah lêng ang?"



"Bawihte, vawiin atân chuan lêng rih lo mai ang hmiang, ni dangah kan lêng zâwk mai ang a?" ka ti thung. A tilui tlat ang tih chu ka hlau angreng.



"Âpa phone tal ila?" a ti leh. Hei hi chu ka hnialsak duh lo.



"Aw le, in kan thlen hunah aw."



Kea kan kal avàngin a thlan a tla hliam mai, zanin chu a mu tui khawp ang le, tihian exer kan là a ni leh mai, a țha lutuk.



Mi kan kal pelhho chuan min en zui leh vung vung țhin tih ka hria, dik tak chuan ka pa ka chhun avàng hian ka sâng ve deuh a, hei vàng hian min en duh țhìn a ni.



Bawihtei pate țhenawm nula senior U Hma-i kan hmu fuh ta tlat, hmuh loh pawi ka ti lo viau asin le aw.



"E, Zoni,(Zonuni tihna)in dam țha maw? Inhmuh a va khât ve?" tiin min be luam a.



"Um, dam alawm. Nia, tiraw? Nangni in dam maw?"



Bawihtei chu enin,"Mimàwii  chu a va lian tawh ve?" a ti leh a, Bawihtei chuan U Hma-i en vang vang pah chuan," Min hria maw?" a lo ti a.



"Aw, Âpate in bulah khân an awm ve alawm," tiin ka hrilh a.



"Âpa chu ka ngai asin le," a lo ti daih thung.



Hma-i chu a nui sak a, chutah," Âpa chu a lo lêng ngai em?" tiin a zâwt a.



"Lêng ve tho, phone-ah ka be țhìn a," tiin Mimàwii  chuan a chhâng. Ka lo hlauhthàwn tehlul nèn, ka rin aiin a chhâng thiam ve tlat, thu dik tak a sawi bawk si.



U Hma-i chuan min rawn enin," Khawnge in kal a?" a ti leh a.



"Lunglei lamah bungrua kan thawn a."



Inbiak rei loh ka duh, Victor-a nu nèn an inkàwmngeih si a, tuna min hmuh thu pawh hi a hrilh leh vek ngei dâwn si a.



In kan thlen hnuah chuan a pa chu kan phone leh ta nge nge, a duh tihhlawhtlinsak loh kha chu ka duh bîk lo. Ka thu chu ni se chuan kan be ngai lo ang; mahse, ka thu ang ringawtin ka kal thei lo, a lo len hunah min dem lutuk palh ang, bâkah, ințhen tawh mah ila a pa a nihna a bo thei chuang si lo.



Zànah chuan bungrua ka thawnte  chuan bungrua an hmuh thu an rawn report sap sap, a țha e. Tluang takin an lo hmu thei a, bungraw hmêlhem awm lote hi a vànneihthlâk êm asin.



Pu Liana intiin min rawn be nawlh mai. An dàwr faksak tùrin min duh a ni àwm e, a zahthlâk viau nain a làwmawm ka ti. Kei akâr min rawn bia chu, ka hnial duh lo, ka hnial phal lo a ni mah zâwk. Fa ka neih hnuah hian hetiang zâwnga min rawn bia hi an vâng tawh êm asin.



Bawihtei hruaiin ka kal a, an dàwr chu a lo changkãng hrep lehnghâl. An han duh uluk khawp mai bawk a, thawmhnaw dàwr a nih vàng erawh chuan a harsa lêm lo. Mipa sâng zet leh la naupan hmel zet nèn kan han fak tâk zuai zuai kha, ka theihtâwp chu ka chhuah ve, a chhan chu kei akâr min rawn be ve duh a ni si a. An duhthusàm ang zâna faksak chu ka duh ve a ni; mahse, ka duh aiin chu pa nèn chuan kan inhnaih mah mah, min en duh nasa bawk si.



Kan chawlh lawk laiin Bawihtei chuan a zun a chhuah thu min hrilh a, ka han hruai leh rih lâwp lâwp a. Bawihtei chuan," Âma, i hmelțha tawp," toilet chhûnga a awm lai chuan a ti sârh sârh a.



Ka nui sak, min fak hi a hreh lo va, ka inchei ve deuha makeup ka hman ve deuh hlek hi chuan 'hmelțha' hi min lo ti hman ziah!



"Ka va lâwm tak! Nangmah ka chhùn che a, chuvàng chu a niang," ka lo ti ve a.



A lo chhuah chuan," Chuan, i kawr pawh a mawi," a ti leh a.



"I nulât hunah hetiang hi kan lei ve ang aw?"



"Yesss...!!" tiin a zuang tar tar a.



Thla pawh kan lâk nasat kha. Bawihtei nèn pawh mawi takin min lâksak, phone-a min pêk chu Bawihtei chuan a en zing kher mai.



"Âma, kan mawi tiraw?"



"Mawi chiang e, i mawi ber."



Zànah chuan Bawihtei a mu hma viau a, kei pawh chuan mu chungin phone ka khawih a.



Nutei'n min rawn text a, IG lama thlalâk upload ni àwm tak a rawn screenshot bawk.



*Ka hmu leh nawlh che a, nu i nih hnu hian i chhe lo zualin ka hria* a rawn ti.



Vawiin lama dàwr kan fakna thlalâk kha a lo ni, engtin nge a lo hmuh daih theih ni?



*Ka lâwm e; mahse, he thlalâk hi engtin nge i lo hmuh theih a?* tiin ka zâwt lêt zat a.



*Mipa kha en la, kan pa nau tleirâwl tê hian a âtchilh a😀* tiin min rawn chhâng.



Thlalâk chu ka en chiang a. Sâng tak; mahse, la naupan hmel zet pa kha maw ni? A hmel chu a lo chhiat vak loh hi. Vawiin lamah khân ka lo en chiang hauh lo, ka en liam ve mai mai a nih kha.



*A nih tak chu, i țhiannu hi ka lâr leh dâwn teh mai a nia😀* tiin fiamthuin ka chhâng leh a.



*A țha, Victor-a inchhîr ngawih ngawih tùrin aw ni ang* a rawn ti.



Ni e, Nutei hian Victor-a hi a ngei thlâwt. Kan ințhen dàn kha a fuh lo ve êm bawk a, kei pawhin thiam lohna tam tak chu ka nei tih ka hria; mahse, pumpelh theih loh thil leh dan theih loh kha a awm miau si a.



*Inchhîr tùrin ka duh lo, hlim takin a hma hun hmang rawh se* ka ti. Ka rilru tak tak a ni, Bawihtei pa a ni tlat a, hlim se ka duh, a hlim chuan Bawihtei tân a țha si a, ka fanu tân hi chuan thil țha ber zêl hi ka duh.


*******



"I va thinchhe tak aw!!" tiin thawmhnaw sûk ka thlep tàu sawk sawk chu min nuih a.



"Nang pawh a chhe ve tho."



"I puar len hnua i chêt țhat theih loh hunah phei chuan, ka va reyhei dâwn tak!" a ti leh vang vang.



Ka rai no chu ka thinchhia alawm, a ti dik chiah. Ka nu lah ina a awm ve tawh chuan ànna tùr a hre thei si, awmze nei zet zetin min àn khum a, kei lah ka lo rai no, dam lo zawi ve bawk si chu min zah zo tawh lo a ni ber ang chu. Ka chhûngte eng mah ka hrilh ngam lo va, ka țhiante bulah chauh ka hrilh. Ka rilru hrehawmna ka hrilh hian tlêmin ka rilru tâwt a zia ve tlat si a, an awm lo ang tih ka hlau thei.



Tûk khat chu ka nu chuan,"Vawiinah Zonuni'n dàwr nghâk se, Bawiha'n bungraw la ho kan kual rawh se," a ti a.



Victor-a'n," Nu, i ti mak thei e, a rai no dam țhat loh lai a nia, inah awm hahdam mai mai zâwk rawh se," a lo tih chuan," A ngai lo, ka kal thei alawm, ka dam reng," ka lo ti vat a.



"A ngai lo, kal lo ang, ni dangah ka kan kual thei," a lo ti leh a.



"In duh duhin he inah hian in awm thei lo ang! Ka sawi anga in awm duh lo a nih chuan chhuak rawh u," a ti ta phiar phiar mai! Ka thin a lo phu nasa lutuk, chhûngril lamah ka khùr.



"A mak thei bawrh bawrh êm mai-" tia ka pa a lo țawng lai chuan,"He in hi ka in a ni, hrehawm ti  leh ka thu zàwm lo chu chhuah mai tùr," ka nu vêk chuan a lo ti leh ta.



Khami tûk ațanga tûk thumnaah tuna ka in luah mékah hian kan insawn ta a nih kha. Victor-a a nu chungah a lungawi thei tlat lo, ka hnial ve fê chung pawhin a nu thu sawi kha a pai dam thei tlat lo a ni. Kan chhuah hnuah chuan ka nu chuan hmingchhe theihtawpin a fapa an lak ațanga kuai hranga in danpuiah min lo chhuah a ni àwm e. Ka thin a rim ve viau a; mahse, eng mah ka sawi chhuak duh lo.



Kan pahnih chuan kan han awm ve rèn ráwn a; mahse, Victor-a'n min ngaihtuah êm avàngin hrehawm ka ti vak lo. Kan hlim dun viau tho, ni tin a chhuak țhìn. Pawisaah chuan kan la buai lo nain nakinah naute kan nei ve ang a, amaha innghah ringawt chu dik theiin ka hre thei ngang lo, pawisa hmuh dàn ka dap ve a ngai.



Ka vànneih asiamin tuna cosmetics ka lâkna nula nèn hian fb ațangin kan inhria a, ka dinhmun leh ka harsatna ka sawi chuan kan indàwr thiam ta khawp mai a, ka peiha ka taimâk phawt chuan min puih a inhuam thu a lo sawi a, min pui ta rêng a, tûn thlengin. Ani hi awm lo ta se chuan kan nufa hian eng dinhmunah nge ka din ang aw ka ti țhìn.



Ka theih ang angin cosmetics chu ka zuar kual ve ta a, chûng lai chuan ka la zakzum deuh bawk a, tlêm tê tê bâk ka hlêp ngai lo, min dàwrtu pawh ka hmu ngai mang lo; mahse, ka beidawng duh bîk lo va, tlêm tlêmin min dàwrtu ka hmu chho ve hret hret.



Ka puar lian chho zêl a, exer ka la vak tawh si lo chu ka taksa a rit zual kher mai, ka dul puar kawh lah chu dârthlalangah ka inen țhin, ka va han chhe tak!



"I mawi lohzia kha, kawr ha vat rawh," min rawn hmuh chuan a ti a.



"Rai puar laiin a nalh theih loh," ka lo ti mai a.



"I nulât lai nèn chuan inthlàu tak i ni tawh. Tunah chuan vainu dul kiar zet nèn in danglamna a awm tawh lo," a ti leh a.



Chutiang teh fahrana min han ti chu ka ngei deuh hlek a," Rai laia dul puar lo i hria em ni?" ka ti ve ta ngat a.



"I îtawm tawh hlawl lo."



Ka thaw hak, ka rai hma khân ka îtawm a tih vàng chauhin em ni min lo neih le? Rai puar lai chuan ka lang îtawm dáwn hlawl lo tih ka hre ve tho va, kei ngei pawhin chhe pèr pùr chu ka inti ve tho.



"Kan fa lo piang tùr vàng a nih hi," ka tih chuan," Kha vàng khân alawm naute neih ka duh loh," a ti ta.



Ka en vat.



"Mahse, nupa nih te chuan fa kan nei ve ang chu," ka ti leh a.



"Îtâwm taka awm reng tùr khân ka duh che alawm," a ti leh thung.



Ka sawi zawm duh ta lo. Îtawm min tih loh vàng a lo nih chiah hi zànah pawh nupa nun min hmanpui ngai tâk loh. Ka rai len hma kha chuan nupa nun pawh hlim takin kan hmang dùn țhìn kha a ni a, thla hnih thum kalta ațang khân a zia a dang rêng a ni. Min ît ta lo a ni ve mai, ka chhiat pèr pùr êm hi.



Zànah chuan a lêng chhuak ta deuh ziah a, dàwrah a kal lawk dâwn niin a sawi țhìn, kei pawhin chutiang chuan ka ngaihsak mai a, ngaihțhat loh phah nân ka hmang ngai lo.



Mahse, Bawihtei pian ațanga chawlhkâr hnihnaah min chhuahsan ta daih mai, kan nufa bula awm a ning ve tawh a ni ang e. Bawihtei zànah a suakbâk țhìn a, mutmu kan tuah țhat theih loh vàng khân a ning ve a niang ka ti mai. A nu khân lêt tùr khân min ti fo tih kha a sawi țhìn a; mahse, kan chhuah tâk hnu kha chuan lêt tumna ka nei ngai lo, Victor-a pawhin min thlêm ve țhìn. A thinrim a reh tawh vàng  pawh a ni maithei; mahse, kei chuan ka tum bau lo, hmingchhe takin kan chhuak tawh a, kan chhuak tawh a nih chuan lêt leh kha ka tum lo bur.



Ka nu(min hringtu)in min awmpui hman rei loh avàngin ka nutei fanuin min awmpui deuh reng a, ka chêt tak tak theih hma chu. Ka chêt theih veleh Lungleia phei turin ka nute chuan min duh; mahse, phei ka tum lêm lo. Fa pakhat na nâ nâ chu keimah chauh pawhin ka enkawl puitlin theih ka inring a, mahni ina va lêt leh kha ka tum hran lo.



Bawihtei nèn chuan kan han khawsa ve nãw nâw a, ka nuin min ngaihtuah theih êm avàngin pawisa min rawn thawn fo va, min rawn tlawh fo bawk. An bula phei mai tùrin min rawn tlawh azâtin min thlêm a; mahse, ka chhâng ngai lo.



Victor-a chuan bialnu a nei chho tih ka hria, a nu duhzâwng tak ni pawhin an sawi nghe nghe, a țha khawp mai. Min chhuahsan tawh avàngin engah mah ka ngai lo. Min chhuahsan  țantîrhah khân ka la na ve hle a, min kalsan duhna rilru a pu thei kha mak ka ti hle bawk a nih kha. Tunah erawh chuan a dinhmun chu ka hriat thiampui ta mai, min ît avàng leh min duh avàng chauhin nupuiah min nei a, ka taksa a lo nalh loha ka rai avànga ka ìtawm  tawh loh hnuah chu chu ka hre chhuak ta chauh si a nih hi. Nia, a ît leh a duh chu va nei se, a hlim viau thei tawh ang chu. Ka fanu pa a nih avàng erawh chuan a fanu rawn hmuh a duh chuan ka lo dangin ka lo phal lo ngai chuang lo.



*******



"Âpite an lo thleng!" tiin Bawihtei chu a au țhat a, kawngka lamah a tlân nghâl, kawngkaa ka nu leh pa lo inzui lût ka hmuh chuan kei pawh lo ding vatin ka lo nui sâng a, kan lâm zo deuh chauh a ni, kan la inbual hman lo.



"Bawihtei rawn barakhaih ka tum nèn aw, min lo hmu khiau sia," tiin ka pa chuan Bawihtei chu a pawm kãng vat a.



"Âma aiin ka hmu hmasa zâwk che u tiraw, Âpu?" ani chuan a lo ti lar lar a.



"Hmasa daih zâwk! I lo nula tawh lutuk a, i mit pawh a lo vâr sawt a nih dâwn hi," ka pa vêk chuan a ti leh a.



Chawhmeh min rawn ken țeuh mai. A țhen chu kawng laka an rawn lei phei a nia, an chàm chhúng pawhin kan ei zo hman ngût lo ang, a tam êm mai.



Zanriah chu hlim takin kan kîlho a, Bawihtei mawlh mai chu a hlim, a țawng lar lar reng a, ka khap duh lo. A hlim ve a ni mai a, ani a hlim chuan kei pawh ka hlim.



"In rawn kal hlauh chu a tihzia takzet, naktûkah chhuah ka ngai si a, Bawihtei in lo awmpui thei hlauh dâwn a," ka ti a.



"E, chhuak rawh, i duhna apiangah i kal dâwn nia. Bawihtei chu a pi nèn kan lo awm ang a, a nuam viau ang," ka pa chuan a ti a.



Rang zet hian Bawihtei chuan," Làm kan zir ang a, chuan, kan zai bawk ang a," a lo ti vat a.



"Ka va châk tawh tak! Bawihtei lâm lai ka hmu châk tawh a, a zai pawh ka ngaithla châk tawh bawk," ka nu chuan a lo ti ve bawk a.



An tunu hi an chhawnchhaih thiam a, an duat viau bawk nèn, naktûkah pawh ngaihțha takin ka chhuak thei dâwn a ni.



Zànah ka nute chu khumah ka muttîr a, an hnial viau nain an rawn kal chhunah chuan duat viau ka duh si a, ka tihluih tlat avàngin a tàwp atàwpah chuan an mu ve ta hrâm. Bawihtei nèn chhuatah kan mu a, nuam a ti viau lehnghâl, a muthilh hma zawng a titi char char nia.



Bungraw lam tùra ka chhuak tùr chu ka pain damdawi lei tùr min chah nghâl zat a, ka kalna lam tùr nèn inkàrkî viau mah se ka sawi chhuak lo.



A hmasa berin bungrua ka lam phawt. Ka hmel hriat sa Rodinga kha a nih tawh loh vàngin ka nêl lo va, bungrua erawh min rawn phurhsak vek tho. Rodinga kha chu ni se chuan in thleng min thlah leh thei maiin ka ring a; mahse, tunah chuan ka ngam tawh lo. Ka hmel hriat taxi driver ka hmu hlauh mai a, chu chu ka hmang a, damdawi dàwr remchâng laiah ka chhuksan leh rih bawk.



Damdawi ka lei lai chuan,"Zon, eng nge i tih ve a?" tiin mipa aw hian ka hnunglam ațang chuan min rawn bia a.



Inherin ka en vat, ani chuan min lo en reng tawh a niang, nui hmel a pu deuh a; mahse, a zak leh deuh a ni maithei, a hawi sawn ta daih a.



"Ka pa damdawi tùr ka lei a," tiin ka chhâng ringawt.



Tu nge le? Min hre bawk si, ka va hre chhuak thei mai lo ve aw! Hriat chhuah tumin ka en deuh ràn reng a, ka mit chu ka khap miah lo.



"Muansang, hei aw damdawi chu," tiin nula dàwr nghâk pakhat chu a lo țawng chhuak ta,min betu tlangvâl chuan," E, aw, ka lãwm e," tiin chu nulain damdawi a pêk chu a ban vat a.



Muansanga. A hming hi chu ka hre tawh chuan ka hria. Khawiah nge le?



"Min hre chhuak thei nange?"



"Hria che chuan ka hria."



Ka nêpzia chu mak ka inti zâwk. Min hriaa min betu ka hre chhuak thei lo chu a ni si a, a hming Muansanga a ni tih ka hriat hnuah pawh ka hriatna tùr ka hre chhuak thei chuang lo.



Zànah ka online a, IG lam ka check pah bawk a, DM ka en pah bawk.



*Vawiin kha chu ka zak ve țêp, min hre ve tawh emaw ka tih vang a nia* tih message chu ka chhiar fuh ta. Min rawn thawntu Account chu ka check chiang a, min lo follow reng mai! Chuan, vawiina ka hmuhpa Muansanga kha a lo ni! Message pawh min lo thawn nual tawh a nih hi, ka lo chhiar ngai loh vàngin ka lo hre  a nih àwm hi.



He pa hi khawiah emaw ka hmu tawh alawm; mahse, ka ngaihtuah chhuak thei tlat lo a nih pek hi.



*Engtin nge kan inhriat le?* tiin ka zâwt ta nge nge. Hre bawk si lo, hria anga lan ka duh lo, ani lahin min hre chiang bawk si.



Min rawn chhànna ka chhiar chuan ka hre chhuak ve ta chiah. Ka va nêp tak aw...Pu Lianate dàwr fakna kan shoot dùn tak alawm le! Ka hriatna hi a va țha lo tawh tak êm!



*Ka hre ngam chiah lo che a* tiin ka chhâng vêl ta mai mai, ka zak ve țêp.



*Mimàwii a dam țha em? Vawiin khân min hriat chian loh hmel êm avàng khân ka zâwt duh ta lo che a* a rawn ti leh.



A la naupan roh nèn, thil lah chu a hre rei phian roh mai ka ti.






*ZAHDER PHÛ MIAH LOTE HNÊNAH PAWH ZAHDERNA LANTÎR FO RAWH, A CHHAN CHU ZAHDERNA LANTÎR HI NUN DÀN LEH MIZIA I LAN CHHUAHTÎRNA BER A NI SI A.