☆MIN EN LA☆ - 27 By Dingdi Pachuau

 ☆MIN EN LA☆ - 27 By Dingdi Pachuau

"Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla  a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt.

A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng atân nge min neih ang? A duh zâwng lah ka ni hek lo va, a level-pui lah ka ni hek lo, ka hmel țha lo va, ka fel hran lêm lo bawk, a hre chiang ber a ni hial ang chu. Chuti si, engati nge? Min la mutpui loh vàngin maw?!! Hei pawh hi thil ni thei tak a ni; mahse, țum hnih zet chu min mutpui theih teuh êm kha! Zêp thu chêng lo, ani chu a zei tawh bâkah kei chu ka la dai tlëm a, mi chawh phùr dàn pawh a thiam a ni ang chu, a lakah ka inpêk teuh êm kha maw.

Hmmm, ka rilru a tibuai, ka ngaihtuah nasat poh leh ka thluak a nâ ni maiin ka hria, ngaihtuah loh tum lahin a har si. Min duh tak tak teuh lo tih lah chu bialnu a neih reng ațang lahin a chiang êm êm mai a, ka lakah hian phubâ lâkte hi a tum a ni zâwk mai lo maw ka ti ta hial. Ka nu emaw ka pa emaw, ka pi leh ka pute, thlahtute ațangin eng emaw thilah inhmuh thiam lohnate hi an lo nei reng ang a, chumi atân chuan phuba lâk tumin min neih a duh te hi a ni lo maw le...

Ka nu sawi ang takin palai chu an rawn kal tak tak a nih chu!! Krismas hunpui a nih teuh tawh nèn.  Dâwt emaw fiamthu emaw a lo ni miah lo. Eng thil nge a hriat ni? Ka hre thiam thlâwt lo, amah lah hi a reh vung vung a, nupuia min neih tum ve meuh si chuan ka phalna lâk hmasak emaw min ràwn derna pawh neih ve àwm tak, ka hre thiam lo tak zet. Nunhlima ka hre chhuak zawk zui a, ani khãn inlêng ka nei a ni tih a lo hria ang em? A hriat loh hrâm ka beisei. 

Jakob-a chu ka va phone ta nge nge a," Hi, Honey?" tia min rawn chhàn chuan ka hre sual emaw ka ti hial a; mahse, min chhaih fiam a ni tih ngaihtuah chhuak vatin," Eng thil nge i rawn tih hi, ka pu?" a ngei tùr tak chuan ka han ti a. Ka rin ang ngeiin a rúm nghut a," Hremna vawi khat chu," a rawn ti sup phawt a, chutah," Eng thil nge ka tih a?" a rawn ti leh a.

"Eng atân nge palai i rawn tirh?" ka tih chuan," Mipain hmeichhe hnêna palai a tirh hian eng vàng nge ni țhìn le?" a rawn ti dam duai a, chutiang țawngka dam duai chuan a țawng ka la hre ngai si lo va, a inhmeh loh êm avàng chuan ka nuih pawh a tiza viau; mahse, nuihna hun a ni meuh si lo.

"Nupui atâna ka duh thu che pawh i nu, ni lo, ka mother-in-law-to-be hnênah pawh khân ka sawi vek tawh a, a thu tlüknaah ka innghat tawp mai," mahni inring tâwk zet hian a rawn ti leh a, a thil han sawi vêl dàn chu ka ngei lek lek a ni. 

Amah ngawr ngawr hi ka duh lo a ni lo, ka duh, ka duh vàngin ka hawsan réng a, ka nat tak tak hmain, mipa ka duh hmasak ber lah amah ngei hi a ni bawk; mahse, kan inngaizâwng lo va, bialnu kawp lai nei rengin nupuia min neih a tum a nia, awmzia a awm lo. Kawp lai nei lo se chuan tlêmin ka hre thiam ang, chuan, in lam hi a ti thei ve zauh zauh bawk si a, ka nu ka zah bâkah a hriat chuan a rilru hi a na dâwn, a duh lo ang, chutiangin kei pawhin ka duh ngam lo, ka nu rilru ka tihnatsak dâwn si a. Zu in țhìn mi chu an ruih tawh chuan insùm theihna leh chhia leh țha hriatna an hloh tawh țhìn si a, zu hian thil țha a thlen lam aiin thil țha lo lam a thlen char char tih ka nu pawhin a sawi țhìn. Chuan, inkhâwm ngai pawimawh êm êm țhìn ka nu hian inkhâwm ngai lo chu ka pasal ni tùra a duh ka ring lo, min zilhnaah pawh mi rethei an ni emaw mi hausa an ni emaw, an hmêl țha emaw an hmêl chhia emaw an theih tâwka Pathian tâna inhmang leh mi piangthar țha ngei ngaihzàwng atân pawh zawng ve hrâm hrâm tùrin min tì țhìn, a theih hrâm chuan kan khawsak mil tâwk ang zawng tùrin min hrilh ve țhìn bawk, kan ngaihzâwng tùr atân pawh chutiang mi chu min duhpui laia ani, khawsak sâng leh inkhâwm ngai lo chu a duh thei dâwn em ni? Kristian chhûngkaw dinpui thei tùr min duhpui laia inkhàwm ngai lo han neih tlat chu, risk a sâng mah mah.

Pasala nei tùr êm chuan ka la hre chiang tâwk lo ka ti a, bâkah, kan inkârah hian inngaihzàwnna boruak ang kha awm ve phawt se ka ti, chutiang boruak pawh tem chhin hauh lova han inneih ngawt chu ka ui, hlim taka han lèn duna han titia han infawhte pawh ka châk ve alawm. Chutiang chu kan inkârah awm ve se, ka bialpa niin a lakah ka thîkthu pawh ka tilang ve ngam bawk ang a, tunah hi chuan eng mah ka sawi ve ngam hleinem, sawi ngam tùr pawh ka ni lo rêng, kan inngaizâwng miau lo tlat a.

Khawpui ni lo ngang ta chu, inlëng ka nei tih chu kan khuaa mite chuan an lo hre thuai a, min sawi duh leh khawp mai a, Krismas boruak nuam taka inkhâwm pawh nuam lo ka ti deuh hial mai. Pitei'n mi min sawi dàn chu min hrilh ve zêl bawk si a, hre lo tawp ila ka ti zâwk hial! 

"An rethei ve sia, tar deuh tawh mah se an tân chuan a țha khawp ang chu."

"A ruak tawh lo a ni ngei ang."

"An remin ka ring, a mipa hi upa viau tawh mah se a hausa tlat a."

"Rêngpuii a la upa vak si lo va, putar han neih ringawt pawh chu nakinah a khawngaihthlâk àwm; mahse, sum hian thil a ti thei êm a, an innei ngeiin ka ring."

Min sawina a tam lutuk a, ka hre sêng lo. Mêna thlâk ka duh a; mahse, benga a luh ve reng si chuan rilruah chám tâwk a lo awm lo thei bîk lo va, a rûkin hrehawm ka ti ţhìn, ka nu erawh chuan min zilhin min fuih reng a, Pitei hnênah pawh chuan a thil hriat zawng zawng chu kan bula sawi chhuak vek tawh lo tùrin a hrilh tawp nghe nghe a, chuti lo chu a țawng duh ve si a, mi min sawina a hre thei bawk sia, a hahthlâk ka ti.

Mami'n min rawn bia a, a tih dàn ngai têin Adonis-a nèn an chanchin min hrilh leh phawt a, a sawi laklawh deuh lai chuan," En teh, J-a hian nupui neih a tum hnai em maw ni ka ti a, palai tirh a tum thu kha a sawi ri tlatin ka hria! A ina lo lêng țhìn kha a nih ngei ka ring," a rawn ti teh daih a!

"Keimah alawm, i unaua ngei khân palai a rawn tîr a nih chu!" han tih chu ka duh chiah si lo va, kan pahnih hian chanchin han sawi chiam tùr kan nei bawk si lo nèn, mak ka tih ang tho hian ani pawh hian mak a ti ve dâwn tho si a, han tihphut zawk chu ka châk viau nain ka țhulh leh ta zâwk a ni; mahse, a hriat hunah chuan min dem ngawt ang chu.

Krismas chu nuam ti pawhin ka hmang mai mai lo. Kumthar lamah pawh chuan min sawi a bâng tak tak chuang lo nain a zia deuh chuan ka hria a, intihlim luiin ka inkhâwm hrâm hrâm bawk. Hrehawm ka ti tih hriain ka nuin ka lu chungah kut nghatin min țawngțaisak hial a, ka nu min ngaihtuahzia leh min hmangaihzia ka hriat hian ani ang nu ka nei hi vànnei ka inti ngawih ngawih a, Pathian hnênah pawh làwmthu ka sawi fo rêng a ni.

Ka chhûngteho chu an inrâwn khâwm ve ngei chuan ka hria, ka ngaihven duh vak lo va; mahse, an thu tlûkna erawh ka hre châk deuh tho. Ka nuin ka thu tlûkna min zawh loh dànah thil eng emaw tak a awm deuh ka ring ngawt a, Jakob-a nèna kan chanchin kha ka hrilh vek tawh kha a ni a, an thu tlûkna han zawh deuh dawt lah chu ka hreh ve deuh a, ka nu lahin min hrilh bawk si lo.

January ni 3 zànah palai an rawn kal leh ta ngei a, room-ah ka awm a, an thil sawi chu ka lo ngaithla ve kar a, Zotei'n thingpui a lo lumsak thung. Ka pu, putea leh ka nu an awm a; mahse, ka pu leh putea chu an țawng tam vak lo, an lo inrawlh ve vak lo chu mak ka ti ru viau mai.

Ka nuin," Keini fanu ve tehlul nupui atân min rawn dîl hi a làwmawm kan ti a, a a innei tùrate an induh phawt chuan keini lo remtih loh rual lah a ni hek lo; mahse, ka'n ti teh ang, inneihna hi dam chhûng daih tùr a ni a, lo innei dâwn ta se, ka fanuin a dam chhûnga a pasala a vawn tawh mai tùr(ti mai teh ang) Jakob-a hi ka duh angin ka la hre chiang ve tlat lo mai a, ka fanuin pasala a vawn tùr, ka mâkpa ni tawh mai tùr chu han belhchian ve tê tê ka duh a ni, thil nih loh dàn leh awmphung lo viauah min ngaihsak lo ula, kum khat tal amah hriat chian nân hun ka duh a ni. Dam chhûnga ka fanuin a vawn tawh tùr belhchian nân kum khat chauh chu rei luaah min ngaihsak lo hrâm ula, anni pawhin an nghâk thei tùrah ngai bawk ila. An inhmangaiha an induh tak zet a nih chuan kum khat chauh mai nghah chhûng chu a rei lo a ni. Ka fate hi an pa khân a boralsan hma viau a, harsa takin ka chawi lian hlawm a ni a, an kawppui tùrte ka duh uluksak hi nu ber tân chuan a àwm lo viau ni pawhin ka hre lo, kei, an nui ngeiin ka duh ulukpui loh leh ka fîmkhurpui loh chuan tuin nge chutiang chuan ti tehlul ang? Ka hmangaih vàng leh an hma lam hun tùr ka dàwn thuipuiah min ngaihsak hrâm ula ka ti hle mai, ka beisei hle bawk a ni," a tih dap dap chuan ka deuh hau leh mit pawh khap ngam lo chuan ka nu thil sawi chu ka lo ngaithla a, ka nu min ngaihtuahzia leh a dàwn thuizia chu ka ngaihtuah tel bawk, palaite ka nuin a chhàn anga chhâng ve tawh hi awm tawh tak ang maw ka ti rilru vang vang a, a rûk tak chuan ka lo chhuang viau a ni.

Chutiang chu kan boruak chu a ni ta a, Jakob-a chuan a lo ngai thiam lo viau maithei a ni. Ni e, keini ve mai chuan kan lo hnial lo tùrah pawh a ngai ngei ang, mi zawng zawng ngaih dàn tùr pawh a ni; mahse, ka nu thu tlûkna chu ka sawisêl hauh lo va, ngaih loh lamah pawh ka ngai hek lo. A fanu hi min ngaihtuah ëm êm tih ka hre chiang a, ka phù ngai hauh loh tùr  leh a ngaihtuah chhin ngai loh Officer palai hmêl a han hmu a nia, mâkpa officer neih pawh a châk ru ve ngei ang, ka nu dinhmunah hian nu dang tam tak chu ding se chuan remthu an sawi chung maithei asin; mahse, ka nu hi chu a dang ve tlat, nu dang ang a ni lo, ka nu dik tak a ni.

Min rawn biak ka rin loh tehlul nèn, min rawn bia a, zin tùrin min la rawn sâwm zui, min tih vêl dàn hi a bialnu ka nih duh hmel deuh te pawhin ka hria!  A kiangah tih tùr ka neih loh thu leh in lamah tih tùr ka ngahzia ka lo fah hrep a, ani erawh chuan," Kan inhmuh a ngai a ni, thil awmzia sawi dùn tùrin," a rawn ti ve thung a, kei lah chuan," Buhin âr a pan ngai lo," ka lo ti khauh a.

"Âr awmna lamah buh kan theh fo alawm," a rawn ti ve thung a, chhàn mai dàn tùr ka haihchham ta deuh a, dik ka ti ve pah bawk nèn, ka ngawih deuh reng avàng chuan a rawn nui hawk a," I dang ve a ni maw? I hmêl ka hmu chák hle mai," a rawn ti leh a.

"I thin a rim em?" tiin ka zâwt ta daih a, ka nu chhànna vàng khân a thin a rim ka ring deuh ngawt a, thinrim pawh ni se a àwm ve tho ang, mahni indah sâng deuh tân hlauh phei chuan lungawi loh thlâk deuh tùr asin.

"Ka nghâk mai ang, kum khat te zawng, dam chuan a ral thuai mai dâwn a."

Ka thil zawh dàn ki chu a lo man rang khawp mai a lo ni, min beidawnsan chu a tum loh hmèl viau mai ka ti, min duh ve tak tak te hi a ni lo maw? Mipa tán phei chuan kum khat chu rei duh deuh mai tùr asin.

"Mother-in-law-to-be-i thu tlûkna kha nang ka neih duh miau che chuan zahsak a ngai tlat si a ni, ka thin a rim lo, hmuh che erawh ka duh viau thung," a rawn tih chuan," Ka sawi tawh kha, ka buai lutuk a, ka zin ve mai mai hman lo," ka ti salh a.

"Rawn zin ka duh a; mahse, a zahthlâk ve deuh bâkah in inah kha chuan i chhûngte an awm ve zêl a, ka duh ang pawhin thupui hlapui ka vai thei lo," a rawn tih leh chuan ka nui hak ringawt, eng thupui hlapui nge maw vai vak a tum ni? 

"Ka chhûngte an awm lohin tu dang nge awm chuang ang?" Hnial hi ka châk ve hrim hrim a ni ang, a bulah hi chuan sawi loh tùr hi ka sawi ka sawi mai, hnial hrât deuh lah ka ang ropui.

A tûk zàna chaw kan ei kham hnu lawk chuan dawhkàna ka phone dah chu a rawn ri a, ka han ban thuai a, amah a lo ni.

"Kawngpuiah rawn chho lawk teh." Phâwk zetin ka meng ngei ang chu! A rawn kal tihna em ni? Eng nge a rawn tih dáwn? Kan inah rawn chhuk ve mai àwm, a zak deuh a ni tak ang.

Helai thleng thleng lo kal ta chu tiin ka chho ve mai a, car chhûngah chuan a lo la țhu a, min hûi zauh avàng chuan ka pan phei a, ka luh theih nãn a kawngkhàr chu a lo hawng zui nghâl a, boruak vawt  tak avang chuan luh ve mai pawh chu ka hnial lo, a rawn kal vang vang tawh a, a duh dàn zahsak ang. Car chhûng chu a lo lum nuam khawp mai a, 

"Eng nge i lo tih?" tia ka zawh chuan ani chuan," Hmu tùr chein ka rawn kal vang vang," tiin min chhâng a, âwih chiah lo, âwih deuh tho si hian ka melh phei a, chutah," Heti hian phur haw daih che ila a țha ang, kum khat zet nghah i ngai lo ang a," a tih zawm leh a.

Ka melh hrâ a, ani chuan," Hremna ka pêk tùr che kha," ti leh supin ka lamah chuan a rawn ãwn phei a, lo hawi sawn nachâng pawh ka hre lo, a mit tla deuh dâk leh tlëma a lu buk ta deun chuan a hun hman dàn tùr min ngaihtuahtír uai uai mai. A hmuiin ka hmui a rawn deh chiah chuan ka harh chhuak zawk a; mahse, hremna chu ka pumpelh lo. Ka hmui hnuai lam chu a seh tel zauh a, ka țê țhat mai.

"Han hrem zauh zauh che hi a țha; thil hrehawm lah a ni hauh si lo," a han ti zui a, mi min hmuh ka hlau tawp maw le! Zak deuh leh hmui hup pah chuan ka hawi kual a, he laiah hian tu mahin motor an dah ngai lo a, a hmaa a lo kal pawh khân hriat loh theih lohin a awm tlat a, tûn țum phei chu, miin min hmuh palh hlauh chuan min sawi duh leh ngawt ang chu. A thim deuh laiah ding mah se min hmu thei tho ang, dâwt an han phuah belh bawk ang a.

"Khawiah nge i innghah?" ka tih chuan," Khawiah mah ka innghat lo, ka rawn kal tawp a nih ber hi," tiin min lo chhâng a, kei chuan," Chuan, i haw leh ang a?" ka lo ti vat a, ani pawh chuan," Nih mai loh nâkah, riak tùrin min sâwm duh leh tawp nâng," a lo ti deuh kher a.

"I duh phawt chuan i riak thei ang."

"Tak tak?!!"

Ka lu ka bu nghat a, mi khawngaihna nei lo lutuk ka ni lo, khua a vâwt si, tlàn haw leh ringawt kha chu thil dik pawh a ni lo. Min rawn hnaih thuta ka khabea a kut pakhata a rawn dawm tâkah chuan hnai zetah chuan kan inen dùn ta a," Rëngpui, ka duh che tih i hria tiraw?" a rawn tih sup chuan dâwt a sawi nge sawi lo  chian tumin a mit chu ka en ràn a, a duh duh sawi chhuak phawng phawng ang chi a nih loh avàngin a dik ngei ka ring.

"Ka duh che, nang pawhin ka duh ang che hian min duh ve tho tiraw?" 

A mitin min aikaih tlat tawh avàng chuan dáwt ka sawi thei lo, țawngkaa chhâng lovin ka bu nghat ringawt a, a nui suk mai. Car chhûng hi êng fahran lo mah se a inhmuh theih tho a, ka hmu chiang thei tho a ni.

"Ka duh vàng chein alawm palai ka rawn tirh ni, min haw bîk lo tih ka hre bawk a ni, i țawngkain sawi lo mah la i mitmengah ka hmu thei a," a ti leh sup a, a mit de sar mai chuan chîk zetin min en a, ka lài viau nain hmun dang ka melh sawn duh bîk lo.

"Ka chhûngte'n rei tawh min ti--" ka hmui chu rawn hupin," Shhh... zanin chauh chu i hun min pe rawh," a ti leh sup a, a hnu deuhah a kut chu muangchânga la sawnin," Min hawsan hnu khân ka ngai reuh che asin aw," a ti leh sup a, a rawn kûn hniam zui bawk a.

Tunah tak hi chuan a thil sawi hi ring tak mai ka ni, dâwt a nih ka ring lo hulhual, ka rilru chu a hlim veng veng a, ka rilru hahna leh min uai rit tlattu thil chu lâksak hmiah ang mai ka ni.

"Kei pawhin ka ngai che," zàwi sap hian ka ti ve a, duhthawh takin min fâwp leh vang vang a, hei ngei hi ka lo suangtuah fo țhin chu a ni, thinlung leh tih tak takin min fâwp se, hlim takin keiin ka lo chhàwn ang a, hetiang hi induhte inkârah chuan a thleng ve tùr rêng a ni.

A duhthawh telh telh a, tunah chuan car seat-ah pawh ka țhu tawh lo, min pawm pheiin a mal chungah ka țhu tawh!! Engtik laiin nge min pawm phei ka hre miah lo nia! Ka thluak a tiza chiai chiai a, mumalin thil ka ngaihtuah thei lo.

*HMASÂWNNA RAHBI HAN RAP CHAT CHATA HLAWHTLING TÙR HI CHUAN HARSATNA LEH HREHAWMNA TAM TAK PALTLANG HI A LO NGAI A, A NUAM LAM A AWM HAUH LO LEHNGHÂL*