☆13TH MAY☆ 1 - 8 By Dingdi Pachuau

 

☆13TH MAY☆ - 1  By Dingdi Pachuau

Ka ti ang, ka ti ngei ang. Thu tiama ding nghet lo mi nih ka duh ngai lo, huphurh teh mah ila, ka tih ngei a ngai a ni. Ka thih phah dáwn pawh a ni lo va, bâkah, ka tân a ni lo, ka nau tân a ni, a thih leh dam inkâr a nih hi.

"Pa, ka thil tihah hian min dem lo ang tiraw? Min dem ka ring bîk lo, tih dàn ka hriat chhun a ni tlat si a ni. La dam la chuan hetiang hi ka ti bîk miah lo ang, ka tih pawh i phal hek lo ang. Min hre thiam ang tiraw? Pa, min ngaidam rawh aw," tiin ka pa thlànah chuan țhuin ka pa thlarau chu ka be mawlh mawlh a.

"Pa, ka lo tlawh thei lawk thei tawh dáwn lo che, ka lo haw veleh ka lo tlawh leh vat ang che aw. Ka nau chu lo ngaihtuah miah suh, a dam țha chho zêl ang, a u ka awm a, ka thlahthlam ngai miah lo ang tih ka tiam a che."

A tàwp nân ka pa thlànlunga a hming inziak chu ka chûl a, ka thlîr leh reng phawt a, ka kalsan ta a.

***********

Ka pa boral hian kum 19 ka ni tawh a, ka nau Sangpuia erawh kum 13 mi chauh a la ni. Ka pa hi thing mistiri niin inhlawhna a hmu thei ém ém a, inhlawh bâkah in lamah siam tùr a nei nual țhìn bawk a, ka nu erawh chuan thawmhnaw a țhui țhìn. Sawrkar hnathawk lo vêkah chuan harsa lo ve pâwl tak chu kan ni vein ka hria. Aizâwlah college ka kal a, final sem ka zir laiin ka pa chu a boral a nih chu.

Ka haw a, kum tìr lam a nih vàngin khua a la vâwt khawp. Ka kawm ber țhin Angaihi'n min zui haw ve a, ka lâwm khawp mai. Ani awm lo phei se chuan zirna pawh ka chawlhsan hialin ka ring; mahse, min fuih a, thla li vêl bâk zir a ngaih tawh loh thu min hrilh char char a, ka nu pawhin chawlh a lo phal loh phah a, ka kal tluan thei ta a ni.

Kan vêngah kum khat chhûng ka awm a, Angaihi chuan min rawn phone sek reng țhìn. A chhan chu kan vênga awm reng lova hna eng emaw zawng tùrin min ti țhìn, a dik ka ti reng. Thingtlângah chuan huan leh thlai hmun neiin ni tin a sûr a sa hnuaiah hna kan thawk a, thawh chhuah ve chhun kan hmang ral nghal zêl a, chu chu Angaihi chuan ngai ngam lovin," Lo chhuk rawh, dàwr nghâkin emaw school-a inhlawh tùrin emaw lo chhuk ngei ngei rawh, chuan tlêm tlêmin pawisa pawh i khâwl thei ang a, i chhûngte pawh i châwm thei zâwk ang," min ti ziah a, ka nu chuan a phal vak lo nain țha ka ti a, ka chhuk ve ta rêng a.

An inah ka innghat a, ani chuan dàwr a nghâk a, hna thawh tùr chu min zawnpui ve a. A vâng phian, kan hmuh ve chhun ho pawh a hlawh a tlêm lulai deuh a, min duhpui lo.

"E, ngawi teh, dàwr nghah lam char char kan buaipui a, school lam kan mangnghilh daih alawm. Khawi maw, Ralvêngtu kha min lo pe teh," tiin ka bula newspaper chu a kâwk a, ka pe ve mai bawk a.

"Um, kan try țeuh ang, hna ruak awm apiang chu."

Angaihi zârah liau liau private school-ah inhlawhna ka hmu ve ta a, a hlawh lah chu private school dang aiin a tam zak mai. Mathematics subj ka zirtîr a, nuam ka ti phian.

A tìrah hostel warden-ah ka ţang pah bawk a, ka thawk rim tak zet a ni. A hnu deuhah in luah tùr tlâwm deuh ka hmuh hnuah warden chu ka bànsan a, zirtirtuah ka insâwrbing ta. IGNOU hnuaiah M.Com ka zir leh a, țha takin ka pass ve mai bawk. NIOS hnuaiah D.El.Ed ka exam a, ka pass ve leh mai bawk a, ka vànnei khawp.

Sangpuia kal lehlam a țhat loh avàngin zai a ngai thut mai a, pawisa ka khâwl ve zawng, a tlêm lulai lutuk. Ka nuin pûk tùr a hmu dáwn lo tih ka hria a, keimahin ka zawng. Angaihi'n min zawnpui ve bawk a, kan beidawn hnuah ka thawhna school principal hnênah kan dîl ta rãwih mai a. Ka nau damna tùr a nih chuan zah ka sawi thei lo va, a tân ka tih theih tâwk chu tih zêl ka duh.

Ka duh zât ka sawi chu min pûktîr ta rêng a, chumi hmang chuan Sangpuia chu hlawhtling takin an zai a, kâr khat chawlh ka la ve hial; mahse, ka hawsan. School chawlh rei lutuk ka inthlahrung, pawisa ka lo pûk tawh bawk nèn.

Ka thawhna Summer Hill School chu miin an lei chhãwng tih ka lo hre miah lo va, thla hnih vêl hnuah ka hre ve chauh, bengvàr loh theih khawp mai. Chu pawh zànah kan thawhpui Zâra'n min rawn text a, ka hre ve chauh.

*Tete, naktûkah Boss thar a rawn kal dáwn kha, i tlai hlauh ang e.*

Ka tlai ngai lo hrim hrim. Ka ei hmuhna, pawisa ka hmuh ve theih țêk țêkna ber a nih vàngin tlai ka duh ngai lo, ka duty a nia, tlai a thiang lo.

"Tu Boss thar maw?!! Principal fapa maw?" tiin ka call lêt nghal a.

"Ni lo, Boss thar hlak. Kan school hi mi dangin an enkawl daih tawh alawm, i la hre ve nange?"

Hre nâng. Boss thar hlak. Kan Boss thar chu eng ang nge ni ve ang le? A hlui ang thova fel a ni ang em? Chuti ni ta se, Principal kha, a pawisa ka bat kha engtin nge ni ta ang le? Ka biak vat a ngai a nih chu.

Principal hlui ka phone chuan a lo nèlawm leh hle mai. Thil awmzia chu ka zâwt a, a hrisèlna lamin a tlin țhat loh vàng nia sawiin a lunglèn thu a rawn sawi ve luam a.

"Sir, ka rawn phone chhan che chu pawisa ka pûk chungchâng kha a nia, i awm tawh lo tih ka lo hre miah lo va."

Ka mut hmuna ka inngaihtuah nasatzia chu. Pawisa ka pûk kha mimal pawisa ni lovin school pawisa lo niin, chuti a nih chuan tuna kan Boss thar tùr kutah hian engkim a lo awm vek tawh tihna a ni a. Chu chu ka rulh a ngai dáwn tihna a lo ni ta. Boss thar hi a sual hlauh chuan ka hmakhua chu a êng fahran lo tawp ang, naktûkahte hian rùl tùrin min ti ta thut se, ka buai chhe teh ang chu.

Ka rilru a nuam thei miah lo. Ka muhìl thei lo va, ka tãl ka tãl, naktûk khawvâr tùr chu ka nghâkhlel mawlh lo a ni.

School ka thlêng hma viau. Ka rilruin ka țawngțai mawlh mawlh, Boss thar chu mi sual tak ni lo hrâm tùrin ka dîl. Hei hi ka tih theih tâwk ni maiin ka hria.

Assembly Hall-ah kan lût khâwm vek. Boss thar chu a lo thleng ta ngei e, a va sâng deng deng ve leh!! Ka lo rin dàn chuan putar lam a nih loh pawhin upa lam deuh tak a nih ka ring a nia, a ni miah lo, kum 30 chu a pèl ngei tawh chuan ka ring, kum 30- 35 inkâr vêl a ni ngei ang. A tâwk chiah, 'mipa' ka lo suangtuah ang chi a ni. A chhe lo tak zet, a pian, a hmel, a inthuamna, a vaiin a dik thlap.

Mahse, ka hlauh chi.

Dawhsànah dingin thu a sawi a, a awki hniam chhek chhawk leh a thawmhnaw hâk dum vek chu a inhmeh khawp mai, nèlawm loh tak a ni ringawt. A nui miah lo lehnghal. Ka țawngțaina kha chhànin a awm dáwn lo a nih hmel, ka hnual rawih rawih.

A hming chu Liansanga a ni. A pu zo khawp e.

Chawhma chu routine pângngaiin kan kal, chawhnu lam erawh Boss tharin meeting neih a rêl. Țîk pawh kan ti lo, kan inmelh relh hlawm ringawt.

Meeting chu dâr 1 chiahah kan țan. Hotu nih tling tak chu a nih ka ring; mahse, a nèlawm lo a ni. Introduction kan nei diat diat a, chiang zet zetin min lo en kar zêl. Ka nervous pek khawp a; mahse, ka buai nuai bîk lo ve.

A tûk ațangin thil thar kan hmu. Keini a thawkate ngei pawhin a hnu kâr ațangin kan practice nghal. Lesson plan siam vekin record book kan nei vek a, kan hun neih dàn leh kan hman dàn zawng zawng kan ziak lût nghal vek. A sual a ni lo vang, a strict a ni.

Zirtàwp chawhnuah a office-ah min ko lût, ka zãm tak zet a ni. A nèlawm loh ropui si a, ka huphurh lutuk. Ka kut hmâwr a hik a, a thlan dep dep bawkin ka hria.

A office-a ka luh chuan a chair-a țhuin lehkha a lo ziak a, țhu tùra min tih hma chuan ka țhu ngam lo, ka ding reng.

A rawn hawi chhuak a, ngun zetin ka chhîp ațangin min en chhuk a, nuam lo ka ti kher mai; mahse, zãm deuh angin ka awm duh bîk lo.

"Miss Rinpui, School pawisa i pûk a ni maw?"

Kha maw...ka hlauhthàwn thil a thleng ta.

"Aw, Sir."

"Engtikah nge i rulh dáwn? Engtia rulh nge i tum?"

Ka hre lo, ka hre hlawl lo. Ka hlawh tlêm tê ațanga cut zêl a nih mai loh chuan tihngaihna ka hre miah lo. Min en kar bawk si a, ka chhâng thei lawk lo.

"Sir, ka thla tin hlawh ațangin a ni mai ang."

"Eng vànga pûk nge i nih?"

Boss hlui mimal pawisa pûka ka inhriat vàng vek, a zahthlâk ka ti. Rùl thei lo tùrah min ngai a ni ngei ngei ang.

"Ka nau zai a ngaih thut vàng a nia."

Ngun zetin a mitmeng fin hmèl zet chuan min en reng a, chutah, ka pawnfèn fual dalh mai chu en thlain," Eng tikah nge rulh zawh i tum ang?" a ti leh ta sup a.

Ka rilruin ka chhût a, a hnu deuhah chuan," Thla 4 hnuah, Sir," ka ti a, ani chuan," Tûn hnaia hman duh ta ila?" a ti leh a. Hrehawm ka ti lutuk chu ka thlan a tla nghal barh barhin ka hria.

Tihngaihna ka hre lo, ka hre hlawl lo. Pûk leh chuan tùr ka hre tawh lo va, ka nu lama kan chhûngte lah keini aia harsa an ni a, ka pa chhûngte lah hmun hranah an awm daih si.

A room ațanga ka chhuah chuan ka țap lo chauh tak tak a ni. Ka thawhpuite hian pawisa ka pûk tih kha an hre miah lo ang, anni hian an lo nei mial ang em le? Mahse, an nei bîk ngûtin ka ring si lo. An neih pawhin bank-ah an dah emaw a ni ang a, an tân lâk chhuah a uiawm dáwn asin.

Zàna Rinawma lo lêng ka hmuh chuan ka rilru hahna chu chhèm bo ang duak a ni, a zin kual loh lai tak a nih ve vàngin tûnlai tak chu kan inhmu ngun ve deuh. A birthday a hnai tawh a, a birthday gift tùr pawh ka hual khiau tawh.

"Hey..."

"Hey..."

Min rawn kuah pahin ka hmuiah a fâwp zoh a, kei pawhin nui chungin ka lo fâwp lêt a.

"Min lo ngai em?"

"Aw."

"Ka ngaihzia che chu, hmu lo chea awm hi harsa ka ti tak zet tawh a ni."

"Kei pawh, i bulah chuan ka hahdam huai zêl. Chuan, i birthday thleng vat vat tawh se ka ti," nuih sen sen chung hian ka ti a.

Nui chung vêkin," Engati maw?" a lo ti var a.

"Gift tùr țha tâwk ka hual khiau tawh a."

"A cash-in min pe zâwk la?"

"Tihchi nâng!"

Insi rialin țhutthlêngah chuan kan țhu a, an zinna chungchâng ka zâwt mai mai a.

"Motor i khalh a, i zin nasa bawk sia, nula i hmu nasa dáwn bawk nèn, ka dinhmun hi a derthâwng deuh datin ka ring."

"Teh ngawt a. Nula chu hmu teh reng mai; mahse, nang tluk chu ka la hmu lo chu a nih hi."

"Tak tak?"

"I ring lo deuh em ni?" tih pahin min rawn en a, a nui miah lo.

"Ring lo deuh hlek, kei aia țha hi i hmu țeuh dáwn si a..."

"Tete, ka duhin ka hmangaih che ka tih tawh kha. Nang lo chu ka hawi lo hrim hrim," tih pahin a rawn kûn hniam a, kei pawh lo dâk sângin duh thawh takin kan infâwp a, a kut pawh a hlei țan.

"Tete, ka duh tak zet che a ni," min fawh kâr lakah chuan a ti sap a.

"Kei pawh."

Ka kawr hnuaiah a kut zen lûtin ka taksa lâwng chu a chûl zai zai a, ka lo thaw hak mai.

"Tete, ka mamawh che."

Virgin hi ka ngaisang a, ka ngaihsàn anga awm ka tum tlat țhìn. Ka nun pawh ka theih ang tâwk tâwk chuan ka vawng uluk ve a, Rinawma ka tawn hnu hian harsa ka ti. Kan la chesual miah lo va, pasal neih hmaa chêtsual ka duh lohzia pawh a hria, ani pawh hi ka lakah chuan a insûm ve viau țhìn chuan ka hria.

Mahse, tuna a chêt dàn hi chu a dang deuh tlat. Min fawh dàn a ril a, min mamawh ve tak zet a ni ang, ka kawr hâk chu rang zetin min hlihsak a.

"Rinawm, kan ti thei lo."

Min fâwp leh nghal zat a, ka hnungzâng ruak kâng chu chûlin tàwp mai chu a tum hmel lo, dang tùr ka nih laiin kei ngei pawh chuan ka lo dang chuang lo. Țawngkain ka hnial a, ka taksa erawh chuan a hnial chuang miah si lo.

"Tete, ka mamawh lutuk che."

Ka taksaa a thil tih lai mêk hnathawh vàngin eng thil dang mah ka ngaihtuah thei lo, ka hnial thei lo va, ka lo țang thei hek lo. Țan ahnêkin ka lo pui sauh sauh zâwk maw le.

Ka phone rawn nghawr dat dat ri-ah chuan kan tàwp chiang kher mai. Dawhkàn chungah ka dah si a, a ring kher bawk si nèn, tàwp loh theih pawh a ni lo.

Mut hmunah kan chêtsual teuhzia ka ngaihtuah a, ka zak hnuhnawh kher mai. Ka thianghlimna tlêma tlêmah ka hloh lo chauh a ni, ka țan thar a ngai, Rinawma pawh ka intawhtîr lutuk tawh tùr a ni lo. Kan taksa a intawk lo a nih chuan chêtsual pawh a har deuh ang chu. Kum heti chen ka lo invawng ve tawh a, ka invawng zêl tùr a ni ang.

School kal ka phûr fahran tawh lo, pawisa kha ka la rùl kim thei rih si lo va, hrehawm ka ti a ni. Phûr lo zetin ka insiam a, ka incheina kawngah ka nu leh pa an strict theih ém avàngin chu chu ka la chhawm zêl. Kekawr hi ka ha khât khawp mai a, ka pain ' Hmeichhia chuan hmeichhe thawmhnaw a inbel tùr a ni ' a tih deuh tlat avàngin pawnfèn ka fêng leh. Pawnfèn hi ka ngaina zo tawh, ka inbel ber a nih vàng a niang.

Angaihi'n min hau ziah. "Nun nih i tum em ni? Kekawr ha va tawh teh, i hnawk thei lutuk," a ti țhìn a; mahse, ka nui mai mai zêl. Ka pa a boral hnu phei hi chuan a hma aiin ka uar sauh. Ka pa ka hriat rengna a ni ve mai a, puan pângngai tak ni lo, wrap-around an tih ang chi deuh nèn hian ka uar thei tawp.

School ka thlen chhoha Boss car lo awm vang tawh ka hmuh chuan ka phu zawk mai. He pa hi a va hma ém ém ve! Class a nei ve ngai pawh a ni si lo. A over deuh hlek chu a ni, a nèlawm loh ropui si. Min hmu ang tih ka hlau, hmuh hlauh chuan biak ngei a ngai àwm si, ka tàwi deuh hrat hrat a.

"Morning, Miss Rinpui."

Ka va phu chiang ém!! Min lo hmu reng tawh zâwk a lo nih àwm hi. Ka âwm ka dawm vang vang hnuah ka inher ve chauh.

"Good morning, sir."

"Khawngaihin, ka office-ah min lo zui nghal teh."

A va mak leh zêl dáwn ve, pawisa chungchâng leh bawk kha a ni ngei ang, ka huphurh lâwk.

A hnungah ka zui dat dat a, a ke pên lah chu a sâwt bîk si, ûmpha tùr chuan ka tlân titih deuh.

A office chu a hmaa ka luh lai nèn kha chuan a lo inang leh tawh lo, a lo tidanglam nasa hle tawh mai. A nuam tawp, sum chu a sêng nasa ngawt ang.

"Țhu rawh," tiin amah hmachhawn zâwnga sofa nalh zet inhûng chu a kâwk a, làwmthu sawi sap pahin, ți dai hian muangchângin ka țhu, ka va bet lo teh lul ém!

"Hahdam takin awm rawh, ka seh dáwn miah lo che."

Min seh dáwn chu ka ti miah lo; mahse, hahdam tak chuan ka awm thei lo. Principal a ni a, a nèlawm loh bâkah kan school pawisa ka la bâ, rilru a nuam thei mawlh lo.

Ka ep chiaha țhut pah chuan," Pawisa chungchângah khân inremsiamna siampui che ka duh a," a ti ta sup a.

Engti kawng zawngin nge niang? A țha ngawt ang chu, ka rulh kher a ngai dáwn lo tihna a ni ang maw?

"Engti kawngin?"

"Ka nu bulah ka bialnu angin awm rawh."

A thil sawiin min barakhaihzia chu a hre lo tawp ang. A bialnu. Ka hre sual em?!! Engtin maw? Kei hi a bialnu angin maw? A ti deuh mah mah lo maw? Makti meng phâwk zet hian ka en reng a.

"Kei...keimah..hi..."

"Aw, ka bialnu lemah chang rawh. Chuan, i pawisa pûk kha chu rulh tlâk nghalah i ngai thei bawk ang a."

Pawisa rulh aiah keiin a bialnu lem ka chang ang a, kan inrùl tâwk chiah dáwn maw? A țha viau ang chu; mahse...

"Engtin nge ka theih teh lul ang? Inhre țhìn pawh kan ni lo va, i nu chuan min hre chhuak nghal ang."

"Khalam kha chu ka kutah dah rawh."

He pa hian a nu a bum duh tihna a ni a, kei pawh min sâwm ve a ni. A nu chu dâwt ka hrilh thei dáwn em ni? Zahin nel lo viau mah ila, hriat chian ka châk tlat.

"Eng vànga i nu chu bum duh nge i nih?"

A țhen sak a. Nia, a lo dawngsawngtu tân chuan ngaihthlâk a nuam lo maithei a; mahse, ka dìlchhûtna hian a hre châk miau si a.

"I rilru tinuam lo duh suh, ka nu hi ka hmangaih a, a rilru tihnat ka duh reng reng lo."

"Mahse?"

"Kan ințanpui tawn dáwn tihna a ni mai a, a tâwk mai lo em ni?"

Zàn ka mutnaa ka ngaihtuah chuan hrehawm ka ti. Hei lo hi kawng dang awm se ka ti ngawih ngawih, a nu bum zâwng kher ni lo thei se, bumtu nih chu ka duh miah lo asin le.

Ka pa kha la dam se engtin nge min ngaih ang? Ka harsatna tawh mêk hi a hre thiam ang em? A fanuin ka nu rual zet ka han bum dáwn a ni si a, nuam lo ka va han ti tak. Kawng dang lah ka hre dèr bawk si lo, han hnial tùrin pawisa ba zâwktu ka ni si a.

Kârleh Thawhțanni holiday a nih vàngin Inrinniah ka haw a, kan vênga rilru hahna han tihthawven ka duh a ni. Ka pa thlàn tlawha han biak pawh ka duh, ngaihdam dìl pah pawh ka duh duh reng reng.

Sangpuia hlim hmel ka hmuh chuan ka rilru hahna pawh a kiang hneh kher mai. Ka thil tih tùr hi mi chuan hria se min dem viau maithei; mahse, ka tân chuan ka chhûngte an pawimawh hmasa ber. An bulah awm thei lo mah ila harsatna an tawh chuan ka harsatna a ni ve tho, ka nu leh ka nau an ni a, he thil huphurhawm tak hi an hriat ve ka duh hek lo, tuma hriat ka duh lo, an hlim chuan a tâwk.

Lungleia ka chhuk chuan chawhmeh ka hàwn thla nual a, a zia thei khawp mai. Chawhmeh hi chu mamawh reng reng a ni si a, lei ngai lova hawn tùr ka nei chu ka lâwm hle a ni.

Zànah kawngka a rawn ri a, Rinawma ka ngaihtuah chhuak a; mahse, ani chu a zin leh tawh si. Tu nge niang le? Angaihi, Zâra, Zonuna, Ruatpuia, Muanzuala, ka hmelhriatho ka mitthla zut zut a, an rawn lèn dáwn chuan min rawn hrilh hmasak ka ring si a.

Kawngka chu ka hawng a, ka rin loh lutuk Liansanga hmél ka hmuh chuan makti zet hian ka melh chho hau mai a, eng nge lo tih a tum reng reng? Engtin nge ka in luah a rawn hriat chat le?

"Ka lo lût thei ang em?"

Ka harh chhuak chiah, ding sawnin," Lo lût rawh, sir," tiin ka meng khup ta zàl zál a, a va zahthlâk tak! 'Lo léng rawh, lo lût rawh' tih nachâng pawh ka hre lo a nia, polite lo chu min ti ve khawp ang.

"School campus-ah lo chuan ka hmingin min ko la ka duh a ni, kan thil tih tùr ngaihtuah phei chuan."

Kan thil tih tùr. A nu kan bum dáwn.

"Khawngaihin țhu rawh, eng nge i duh tâk?"

"Ka bialnu chènna ka hriat loh chuan ka nuin min ringhlel dáwn asin," tiin a nui ta suk a.

A nui ve!! Thla khat dáwn a hnuaiah ka lo thawk ve ta a, zaninah chiah a nui ka la hmu. Ka vawi khat hmuhna. A inhmeh hle si.

*MIHRING TUMAH HI TLU THEI LO LEH PETEK THEI LO KHAWPA DING NGHET KAN AWM LO - Mafâa*

I LO TLU A, I LO PETEK A NIH PAWHIN DING LEH THEI TÙRIN I CHAK TÂWK A NI TIH INHRIA ANG CHE - Dingdi Pachuau

☆13TH MAY☆ - 2 By Dingdi Pachuau

"I in luah chu a nawm reuh hi le!"

Engtin nge ka awmna hi a hriat le? Mi dang a zâwt tihna a ni a, a zawha ber chuan min rinhlelh loh hrâm ka beisei. Mi dang lo lêng ve lah ka țhiante niin, Rinawma a ni leh tawp si a.

"Ka lâwm e, sir."

"Naktip hian ka nu Aizâwl ațangin a rawn phei tawh dáwn a."

A ni maw!!! Chuvàng chu a ni ngei ang, min țhàwn lutuk a duh bík lo a ni ngei ang.

"Ka rilru a nuam thei lo."

"Rinpui, min ring rawh. Ka nu chuan thil harsa deuh deuh a zâwt lo ang che; mahse, hmuh ngei che chu a duh dáwn sa a, i chanchin pawh hi ka hrilh nual tawh a ni."

A ni maw?!! Eng ka chanchin nge a hrilh tawh ang le? Tu hnên ațangin nge a hriat ang aw? Hnial lo tum ta pawh ni ila a theih tawh miah loh a lo nih hi.

"I nu duhzâwng ka ni lo tawp ang, sir?"

"Lungngai suh. Ka hmuh țantirh ațang che khân ka nu duhzâwng i ni tih ka hria. Chuan, School campus ni loah chuan tûn ațangin 'LS' tiin min ko thei ang."

LS. 'Liansang' tih deuh tâwng ai chuan a zia alawm, ka thei mai ang.

"Thingpui i duh em...LS?" Kha, ka thei mai alawm.

"Țha lutuk, a sen hângin aw."

Kan pahnih chauh kan ni bawk si a, nuam lo ka ti tak zet. Țawng tùr a vâng si, ani lah țawng bawrh bawrh chi a nih loh hmel si.

"I duh duh min zâwt rawh. I duh dànte sawi ve bawk la."

"I nu awm lai chauhin lem kan chang ang tiraw?"

"Aw."

"Engtia rei nge a chàm ang?"

"Ni hnih thum bâk a ni lo ang."

Ka thaw huai a, a rei lutuk dáwn loh chu. Vawi khat bâk hmuh a ngai tawp nâng, ka huphurh aiin a huphurhawm lo tùrah ngai ang.

"Bialpa i nei em?"

"Engati nge i bialnu lema chang tùra min tih? Bialnu i nei reng àwm si a."

Ka sawi zo tawh, ka inthiam lo leh deuh a, nuam lo ka ti hnuhnawh; mahse, a zo vek tawh si.

"Eng emaw buaina, ho tê a awm a."

Eng buaina nge ni ang? A bialnu chu a lêrh tihna em ni? Nge a lo hre reng tawh zâwk? A nu chuan a bialnu chu a duhpui lo em ni le, ka hre chiang châk sauh; mahse, a sawi zawm loh dànah zawh zêl a duh lo tih ka hre ve tho.

"I bialpa nèn in inkâr a tibuai lo tùrah ngai ang, ka nu lo phei châng chauhin a ni mai."

Rinawma ngaihtuahin ka nui sak a. Ka lem chan mai mai hian a tibuai lo tawp ang, bâkah hriat pawh a hre kher nâng, hrilh ka tum hran lo. A hriat chhuah chuan a lung a awi lo palh zâwk ang.

"School-a thawhpuite'n an hre tùr a ni lo."

Staff office-ah chuan kan infiam nak nak hlawm a, kan inrual hlawm viau nain kei hi a naupang ber ka ni. Kei aiin an lo thawk rei vek tawh bawk. Middle section leh primary section hi zirtîrtu kan ințhen ve a, panga ve ve kan awm. Middle section lam hi kei lo hmeichhia an awm lo va, primary-ah erawh hmeichhe pathum an awm thung.

Zara chuan," Nakin zànah ka rawn lêng dáwn, i bialpa awm lai a ni em?" a rawn ti sar sar a.

"Lo lêng rawh. A awm lai pawh ni se a lo lèn theih tho alawm."

"A, min thîk ang, in inkâr ka tichhe palh ang," tiin a nui hak hak a. Zara hi ka thawhpuite zîngah chuan ka nêl ber, ka inah pawh a lo lêng nasa ber bawk. Bialnu Rahsivênga mi a nei a, a chhe lo reuh lutuk. Vawi khat chu min lo thîk ve ngei a ni àwm e, ka nuih a za angreng.

"Rahsivêngah i lêng dáwn lo em ni? Min lo thîk leh ang e."

"Zan tin maia lèn tlut tlut te chu ka duh bîk hlei nem, min ngai hman nâng."

Kan nui dùn hak hak a.

School naupang hi kan ngah a, a zia khawp. Liansanga pawh hian a hlâwkzia hriain a lei a nih ka ring. Aizawl ațang daiha helaia school rawn lei vang vang mai chu, rin dàn ka thiam mai.

Chawhnu bàn dâr 2:30-ah chuan haw tùrin kan insiam sang sang a, chutih lai chuan ka phone a rawn nghawr dar dar a, Rinawma a ni ngei ang. Nui sak chungin ka chhâng nghal a.

"Hey..."

"Miss Rinpui, min lo nghâk lawk mai ta che."

Liansanga a ni!! Mi dang chu ka melh zak zak ringawt a, min lo melh hlawm lêm hlei lo va.

"Khawiah maw?"

"Gate pâwn lamah ni mai se, mi min hmuh i duh àwm si lo va."

Duh teh nâng aw. Min hmuh duh ka duh loh mai bâkah min ringhlel chhin tùr pawhin ka duh lo.

Car-a ka luh hnu chuan," Khawiah nge kan kal dáwn?" ka ti sap a.

"Ka inah le. Ka bialnu ve meuhin ka in la hmuh loh chu thil ni thei a ni lo a ni. Ka nuin min ringhlel mai dáwn asin. Ka nu lo kal huna i chêt buai loh nân i lo hmuh lâwk a ngai a ni."

A lo ngaihtuah thui bîk hle mai.

Pûkpui lamah daih a ni in a lo luah ni. Kan tlân zel a, motor kawngpui ațangin dinglamah kan pêng a, thui vak lo kan tlàn hnuah veilamah pêng lehin tláng zâwl deuhah kan tlân chho a, gate pawh a lo awm nghe nghe.

Chhukin gate chu a va hawng a, a rawn lût leh a, motor chu a khalh lût ta a.

Motor ațanga kan chhuah chuan ka hawi kual vêl a, hmun nuam tak chu a nih reuh hi. A in lah chu a fâl deuh raih a, a skirting chen chu brick rem niin a dang chu tile veka sak a ni. Pâwn lam ațanga en ngawt pawhin a nuam ang tih ka hre thei mai.

"Lo lût la?"

Ka rin dàn chiah, nuam reuh lutuk. In tak tak a ang, ka sawi thiam chiah lo, in nuam tak a ni chiang. In ropui tak a ni miah lo; mahse, ka lo dream dàn țhin 'in' a ni.

"A nuam hle mai."

"Ka lâwm e."

A in chhûng chu min enpui zel a, a room bâkah room dang pahnih a la awm. Sitting room, choka, bathroom leh study room. Study room a nei thlap nia, bang zawng zawng chu lehkhabu hlîr a ni mai, lehkhabu chhiar a hrât ve a nih dáwn hi.

Choka chu te fel rèn ràwn niin, engkim a awm kim ve biai. Amahin eirawng a inbàwl chawp mai țhìn tihna a ni ngei ang, choka lian lo têa a che vêl tùr chu ka mitthla a, ka nui sak a.

"Kitchen hi a lian lêm nain mamawh engkim a kim ve tho a nia."

Fridge lian zet chu hawngin," I ril a țâm em? In tùr lamte?" a ti a.

"Tui vawt a awm chuan ka lo in ang e."

Cupboard ațangin no a rawn la chhuak a, filter tui chu dawhin fridge ațangin ice cube a la chhuak leh a, no chhûnga tuiah chuan a thlâk a, min pe nghâl a.

"Inthlahrung miah suh, ka nu rinhlelh loh theih ang bera awm a ngai a nia."

Sitting room zau nuam deuhah chuan țhuin a chanchin, a thil duhzâwng chu a sawi mawlh mawlh a.

"Thingpui thlum ka in ngai lo. A sen hâng chauh ka in țhìn. Vawksa ka ei ngai lo va, zîkhlum leh mai ka ei ngai lo bawk. Chakai ka allergy avàngin ka ei thei lo va, Uih lam chi réng réng ka ei ngai lo bawk. Ka nuin a lo zawh palh hlauh tâkah che, i lo hre dáwn nia. Chuan, thawmhnaw dum lam deuh hlîr ka inbel țhìn."

Hei vàng hi a lo nih chiah hi thawmhnaw dum a lo hâk ziah. Kamis vâr erawh vawi khat chu a rawn ha ve tawh.

Ka duhzâwng min zâwt a, ka hrilh ve tho. Ka rin aiin a lo țawng ve duh a, ka thil sawi pawh a ngaithla ngun viau.

Min thlah haw chuan a la tlai lutuk lo ve. Serkawnah pawh a kàwn deuh laiah tak in ka luah avàngin kàwn thlen hma deuhin ka dintîr a, kein ka in luah chu ka pan ta mai. Miin min hmuh tam ka hlau a ni.

Zànah Rinawma ka phone a, Champhaiah a la awm. Rihdîlah an kal dáwn a ni àwm e. Hmânah ka kal tawh a, lawngah pawh ka chuang ve ngam lo. Thla erawh ka la nasa ve viau, kan kalpui mipate chu an rùi ve deuh hlek a, hmeichhe rùi erawh ka hmu lo.

"Eng nge ka lo hawn ang che?"

"Nangmah kha a ni tawp mai."

A rawn nui hak hak a. "I lo kal ve châk em? I hman hunah kan kal leh dáwn nia tiraw?" a rawn ti leh a.

"Um, school chawlh hunah aw. Ka kal leh châk reuh asin."

"Khawbung lamah pawh kan kal dáwn, Mizo hmun hlui kan fang dáwn a."

A nuam ngawt ang, ka kal châk ve e.

"Fârkàwn lamah pawh kal ula?"

"Nia, kan kal ang chu. Kan thang rei phian dáwn a nih hmel, ka hmu lo rei dáwn hle mai che tiraw?"

"Ka ngai tawh che asin!" Kâr khat vel lai an thang theiin ka ring, ka hmu lo rei dáwn hle mai.

"Ka birthday chu kan hmang dùn hman ngeiin ka ring."

"Ngei ngei a ngai, lo haw hman tum ngei ngei rawh aw."

Zànah lesson plan ka siam zawhah mu pahin story ka chhiar a, mahni chauha awm ni mah ila, a hlauhawm loh. Ka in luah ep chiahah hian in luah an awm ve tho a, in chung chiah hi in neitute'n an luah thung. A zàu vak loh avàng hian luah man pawh a to lo rêng a ni.

Sikul panin kein ka kal hnak hnak a, tukin chu tlêmin ka tlai deuh. Ka hnunga bike-in horn a rawn pêk chuan ka phu deuh zawk a, ka'n en chuan Zara lek lo niin.

"I va sual tak. Min tiphu alawm."

"Lo bet ve mai mai la?"

"Ka tla ang, pawnfèn ka fêng si."

"Ka tlân chak dáwn lo."

Ka chuang ve ta poh a, a tlân chak lo. Bike-a chuan hi kekawr hâk chuan a zia ve mai ka ti a, pawnfèn nèn chuan ka hlau deuh țhìn.

Vawiin chu staff office-ah Liansanga a rawn lût tlat mai. A rawn țhu ve deuh reng a, ka lo en țha duh vak lo. Mi dang bula a titi chuan a nèlawm hmèl hle si a; mahse, ka nêl lo, ka zah tlat. Bâkah, ka bialpa tùr anga ka ngaihtuahin nuam ka ti lo, a zei hmel si, ka hlau.

Tlaiah amah nghâk tùrin min lo call leh. A nu lo thlen ni a ni tawh a, a nuin min hmuh a duh nghal a ni ngei ngei ang, hna huphurhawm tak chu ka țan dáwn ta a nih hmèl.

A in pana kan tlàn lai chuan," Zanin chu chaw i ei nghal ngei a ngai ang. Huphurh suh ka tih kha, i bulah ka awm dáwn, engmah hlauhthàwn tùr a awm lo," a ti sup sup a. A thil sawi chuan tlêm tê pawhin min hnèm lo, ka huphurh tù tú mai, ka kut hmawr pawh a hit leh vek tawh.

A nu chu a lo thleng tawh tak tak a. Nula tleirawl pakhat pawh a lo awm ve, a nu rawn hruai a ni ngei ang.

A nu chu nu lian tak a ni, a hmel chhe lo hle a, a sam chu a kir a, a tâwi deuh bawk. A ngo hle mai a, a inthuamna pawh a infit at mai.

"Nu, in lo thleng tluang a, a làwmawm e. Hei hi Rinpuii a nia, a chanchin chu i hriat tawh kha. Puii, hei hi ka nu a nih hi."

Puii. Tumahin hetiang hian min la ko ngai lo. A mawi danglam zak ka ti.

Ngun zetin min en phawt a, chutah nui sâng hian," I nih ka ring rêng a," tiin min chibai a, ka kut vâwt thlar hmer reng chung chuan," Zak duh mah ta che, ka fapa duhlai chu ka fanu ang tho alawm i nih, i nu ang chiahin min en rawh," a ti nghal siam siam a.

"Nu, i chelh rei lutuk tawh, țhuttîr ve tawh la?"

"Aw, a ni maw? Ka hmu thei che hi ka lâwm lutuk a ni. Țhu ang le, i ril a țâm ém?"

"Țâm lo ve, kei pawh ka hmu thei che hi ka lâwm tak zet a ni," ka ti ve sap a, a bul chiahah min țhuttîr a, ka țhutna sofa bânah chuan Liansanga chu a rawn țhu ve bawk a, intineitu tih hriat zet hian min rawn kuah a. Ka îp zawk mai, a nu hmuh lai chuan min duh ber anga awm chu a thiam hle mai maw.

"Bawiha, ka awm chhûng tal hi chuan min pumpêk rih la?"

"Ni lo ve, nu. I bulah chuan a nervous rih viau tih ka hria a nia, ka kalsan zawngin a khawng vek mai ang," nui suk chung hian a ti a, a kut chuan ka kut chu lain a hûm rauh rauh a, ka țang deuh nain engah mah min ngaih loh hmel khawp mai.

"Bawiha'n 'Puii' a ti che sia, engtin nge ka koh ve ang che?"

"Nu, 'Puii' tiin i ko ve thei lo ang, kha chu ka koh dàn bîk a nia. 'Tete' tiin i ko thei ang."

"Ni lo, 'Bawihi' tiin ka ko zâwk ang. Bawihi, heta chaw ei i hreh em?" nui sâng chungin a ti a, rilru ipik țûn leh chhûngril lama țang țùng chuan awm lo ila chuan țha takin ka titipui thei ve ngei ang.

"Hreh lo ve."

"A țha lutuk, zak miah suh. Chuan, School ațangin in lo pêng nghal sia, i ril a țâm ngei ngei ang. Lucy, ei tùr kha lo chhawp teh le."

Liansanga chu a țhu sawn chuang miah lo. Lucy tia Liansanga nuin a koh chuan ei tùr a rawn chhawp a, a nu chu a țawng siam siam reng a. Kei erawh chuan ka rilru ka pe tak tak thei lo, Liansanga pangti lumin min nèkna chuan min tibuai tlat, ani lah chuan min la hnaih tak sauh sauh a. Ka hmai chu a sen ap ap ang chu, ka beng pawh a sa vût thei a nia.

"Bawiha nèn hian in inhriatna a la rei si lo va, in induh tawn ém ém bawk si a, a eng lai ber hian nge hîp che le?"

Lalpa leh! Ka rin loh lam daih!

"Nu, i tizak a nia. A zakzum ka tih tawh kha, khatiang leh lutuk kha chu a fair lo," tiin Liansanga chuan min lo chhan a.

"Ka hre châk alawm, in inhmeh nasa mai si a, rei tak min nghahtîr loh ka beisei."

"Kan inhre rei lo nain kan pahnih inkâr hi chu 'love at first sight' an tih ang kha a nia," ka ti ve a, ka kut vâwt zet chu Liansanga chuan nghet zetin a hûm tlat a.

A nu chu a lo nui var var a," Ka rin dàn chiah a ni. Bawiha mitmeng ațang hian ka hre thei a ni, nang erawh chu...tlêmin...tlêm tlêmin i la zak rih a, i la tilang ngam lo deuhin ka hria a," a ti sauh sauh a.

*HMANGAIHNA HI PÂWNA KAL CHHUAHA VA ZAWN HMUH CHI A NI LO. HMANGAIHNA CHUAN A RAWN ZAWNG HMU ZÂWK ANG CHE*

☆13TH MAY☆ - 3 By Dingdi Pachuau

"In inhmeh ka ti tak zet a ni."

A nu chu a țawng duh hle a, a nèlawm tak tak a ni. Hemi kawngah kher hi chuan an inchhùn lo hlein ka hria, ani ve hi zawng, a hnuaiah thla khat lai kan thawk tawh nain kan hming leh kan hmelte hi a hriat hran pawh ka ring chiah lo.

"Puii, ka'n intleuh lawk ang e aw, ka rei lo ang," tiin a rawn kûn hniam a, ka samah chuan a fâwp zoh a, kei chu ka lo khawng titih dèr mai. A chêt dàn hian min barakhaih tak zet, a nu bulah chuan min duh tak tak leh min thlahlel zet anga awm chu a thiam hle a ni, lemchan thiam tak a ni ka ti lo thei lo.

"Nu, ka awm loh hlànin lo tizak miah suh ang che."

"Hlauthâwng suh, ka sual viau hlei nem," nui chungin a ti a, an nufa hi an inhre chiang viau a nih dáwn hi, nufa inkàwmngeih tak pawh an ni ngei ang.

Liansanga kal hnu chuan," A pa tel lova ka enkawl a ni a, ka ngaihtuah thei ém ém a ni. Nupui nei tawh se, chhûngkua nei tawh se ka duh a. A fahrahna leh a nun ruak tak hi a nupui leh fanaute'n luah khahsak se ka ti țhìn a," a ti sap sap a.

Chutiang nun nei chuan a lo seilian maw? A va inhmeh lo ve. Inhmeh lo ti ila a inhmeh tho, a chhan chu mi kawm deuh leh han nuihpui a nei ngai lo va, amah hian a tlei hmel viau si a. Nun khawharna thûk tak a lo neih vàng pawh chu a ni maithei, amah chauha a office-a a inkhung reng țhin ni.

"Ka lo hre miah lo va," ka ti ta ringawt, hre lo miau hek i.

"Hre lo tawp ang, a sawi ngai lo. A nui khât viau bawk a; mahse, i bulah chuan a hlim tih ka hre thei tlat a ni."

A awihawm loh, hei kher hi chu. A fapa lemchan thiamzia hi, ani pawh hi a bum chiang hle mai. Kei ngei pawh min barakhaih tak zet a, a nuin a ring tak tak pawh hi a mawh lo ve.

"Ka fapa hian a thlang thiam che ka ti tak zet, ka hmeichhe duhzâwng tak i ni."

"Ka lâwm e."

Ka sen nasa ngawt ang, hmaichhana hetianga infakna hi ka la tawng ngai si lo, awmngaihna pawh ka hre lo lek lek, ka lài hú mai.

"Ka làwmpui tak tak a ni, ka rilru pawh a zâng huai tawh mai."

Sawi ve tùr ka hre lo. Ka hriat chian ém ém thung chu a nu hi ka khawngaih tih hi. Kan bum tih hre si lovin inngaizâwng tak tak anga min ngai hi ka khawngaih a ni. Bum a ni tih a inhre miah si lo va, kei tak pawh ka inthiam lo.

A nu fel ém avàng chuan kei pawh ka țawng ve barh barh a. Ka chhûngte chanchin min zâwt chiang a, kei pawhin phûr deuhin ka hrilh ve sârh sârh a. Țawng loh theih pawh a ni lo, min tawng tír dàn a thiam tawp.

Pâwn lama pangpâr chu min enpui a, kei pawhin pangpâr hi chu ka ngaina; mahse, ka kut a hmui lo lutuk a, ka phun nung ve ngai lo. Kan in bula awm ve pawh ka nu phun vek a ni.

Zanriah kan kîl lai pawh chuan a nu chu a titi siam siam reng a, Liansanga erawh a țawng tam lo khawp mai. Țawng vak lo mah se, min care-zia a tilang reng a, a nu tân chuan rinhlelhna tùr chu a vâng ngawt ang.

Zàna ka haw tùr chu veranda thleng min thlah a.

"Lo lêng leh vat rawh aw, thil hrilh tùr che ka la ngah a nia."

"Aw le, ka lo lêng leh vat ang."

Haw kawngah erawh kan inbe lo khawp mai. A țawng lo va, kei ka țawng bîk lo, kan ngaihtuahna kan kàwm ve ve a nih ka ring.

Ka in luah bul kan thlen dáwn chuan," Ka nu chuan a ngaina nghal hle che a nih dáwn kha," a ti sup a.

"Nu ngainatawm tak a ni, ka ngaihtuah cheuh cheuh phei chuan ka khawngaih hle a ni."

Mut hmunah ka ngaihtuah neuh neuh a. Liansanga hian bialnu a nei ve nual tawhin ka ring a, engtizia nge a nu duhzâwng hi an ni ngai lo em ni le? 'Buaina ho tê awm' a tih kha eng nge ni ang le? Ka hre châk ngawt mai.

Liansânga nu awm chhûng chu lemchanga ka buai tâk avàng chuan Rinawma pawh ka ngai hman vak lo va, a zia phian. Zànah min rawn call loh chuan keimah zâwkin ka call a, kârleh lamah chuan an lo haw thei dáwn e.

A nu haw dáwn zànah zanriah eiin kan chhuak a, chanmari-a Elite hotel-ah kan ei a, a nuam reuh khawp mai.

Chawhmeh chi hrang hrang an rawn chhawp a, vawksa telna leh zîkhlum kan chu Liansanga hma ațang chuan ka la sawn a.

"I ei duh chuang si lo va, awmzia a awm lo. Ka nute nèn kan lo ei zâwk ang e."

Liansanga nu chuan min en reng tih ka hria, ka melh duh lo lui ve tlat a. Nui chungin,"An bai siam hi a tui hmel sia, ei țeuh zâwk rawh," tiin Liansanga chu ka en a.

"Min duhsak thiam hle mai."

"I ei duh si lo alawm, i ei duhzâwng chu hei, bean leh artui a awm a. Bai nèn khân, a tui dáwn lutuk."

"Ka nute phei hnuah ei chhuak leh ila tiraw? Hmun romantic zet ka hria a nia, nuam i ti ngawt ang, ka hruai châk tawh che."

Ka mit la sawnin," Ka nu awm laiin hmun nuam dang sawi rih lo la, a fair lo a ti palh ang," ka lo ti thung a.

"Ka nuin min thîk i hlau a ni maw?"

Liansanga nu chuan lungàwi hmel fé hian," Tunah zawng hlim takin ka awm thei tawh dáwn a nih hi. Tete, Bawiha, min tihlim tak zet a ni," a ti sar sar a, a mitmeng ațang chuan a hlim tih a hriat ngawih ngawih.

Rilruah inthiam lohna nei lo ila chuan tui titakin ka ei theiin ka ring, ei an siam thiam viau tih ka hria a ni. Rinawma birthday-a eipui ka tumna kha a ni hrim hrim bawk a, a fuh viau ang.

Haw kawngah chuan Liansanga nu chuan," Tete, ka rawn phei leh hunah eng nge ka lo hawn ang che? Eng nge i duh ber?" tiin min zâwt a.

Nui chung hian," Nangmah kha dam takin rawn phei leh la, chu chu ka duh ber mai," ka ti a, ka kutah chuan chelhin," I va fel tak ém! Bawiha hian min hrilh har deuh zâwk a ni, i bula awm hi ka kham lo rêng rêng. Tûnlai nulaah chuan i fel ka ti ém mai," a ti sap sap a.

"Nu, kha vàng khân alawm ka thlan chat rêng le!"

"I vànnei tak zet a ni, Bawiha. Tûnlai khawvêlin a tihbuai phâk loh bialnu i hmu chat mai a, mi fel, nungchang țha bawk si, ani ang hi chu i hmu tawh kher lo ang."

"Nu, i bulah a nungchang tak tak a thup pawh a ni thei tho a."

Hei hi chu a rilru dik tak a rawn sawi chhuak chiang a ni.

Rang zet hian," Nia," ka lo ti vat a. Liansanga nu nuih a za ngang a niang, a nui khùr dat dat a.

"Ka ti tak tak alawm; mahse, ka ngaina khawp mai che. Nu fel tak i ni, ka nu ka ngaihna pawh a reh sawt tak tak a." Kei pawhin ka rilru tak tak ka sawi chhuak ve tho.

"Tete, ngaina lo che an awm thei dáwn em ni le? I nungchang hi hloh miah suh aw," tiin ka kut chu a bêng thap thap a.

A nu haw hnuah erawh chuan kan inhmu ngai mang lo, biak te chu khawilam. Staff room-a vawi khat a rawn luhin ka hmu leh țâwk, inhmuh tam loh hi pawi ka ti lo khawp.

Inrinni zànah Rinawma a lo haw a, ka phone a. A chàu a ni ang, a aw chhuak pawh a zâng vah lo tlat.

"Hey..."

"Tete, ka chàu hle mai."

"Chuti, zanin pawh i lo lêng peih dâwn nange?"

"Min lo hre thiam mai la? Hmun dangah hei, bungrua sem darh a la ngai bawk si."

"A țha alawm, naktûkah inkhâwm ila?"

"Nilênga mut ka lo tum asin."

Ka rilru a hnual deuh rawih mai. Ka ngaih teh lul nèn, ka hmuh lohna a rei tawh bawk si a.

"Aw le, Thawhțan zàn erawh chu i birthday a nih angin zanriah ei chhuahpui che ka tum a nia. I chàu tawh lo ang chu tiraw?"

"A ni maw? A va nuam dáwn ve, ka chauhna pawh a reh deuh nghal sawng sawngin ka hria, khawiah nge min chhuahpui i tum a?"

"Sawi chi loh, ka la thup rih dáwn."

Rinawma hi ka duh, ka rilru zawng zawngin ka duh a, a tân pawh hian ui ka nei lo. A birthday puala pawisa ka vawn țhat khiau chu zanriah treat nân ka hmang ang, zanriah ka treat hunah chuan a làwm ve ngei ka ring bawk.

********

"Ka chawhmeh duh ang apiang ka lam thei ang em?"

"Teh rêng mai, i birthday a nia."

A hlim hmel chu hmuh a nuam ka ti khawp mai. Kei aiin upa hret mah se, ka duat ve theihna zâwnah chuan ka duat ve viau. Ka lakah pawh hian a pangchang ve țhìn a; mahse, nuam ka ti zâwk mah.

Birthday present atân T-shirt dum, puan țha zet, to ve deuh mai ka pe a, a lâwm thiam viau. Ka birthday-ah ani pawhin chapal bun nuam tak min leisak ve bawk a, tûn thlengin ka la bun ber a ni.

Zanriah ei khamah chuan a scooty chuan kan lêng kual a,ina min thlah meuh chuan a lo tlai duai tawh. Dâr 9 a pèl tawh; mahse, lesson plan siam ka ngai tawh lo va, ka rilru a hahdam ve thei deuh.

"Tete, thil hrilh tùr che ka nei a."

Eng nge niang? Innei tùrin min sâwm dáwn em ni le? Kum 24 lai ka ni ve tawh a, pasal neih pawh a àwm lo chuang miah lo.

"Eng nge ni ta le? Thil țha lam a nih ka beisei." Ka phùrzia chu ka thup hrâm hrâm a ni, harsa ka ti zâwk.

"Kan inkâr hi titàwp ang."

Eng thil nge ni ta?!! A birthday hlim rakin kan làwm zo chauh a, ințhen a sawi maw?!

"Eng...thi..thil maw?!!!"

"Break nei lawk ang, inngaihtuah rih ka duh a ni. Kan in-break rih ang a, kan rilru dik tak kan hre dùn thei dáwn a ni. Kan induh tak tak em tih leh kan inkâr hi a tak tak a ni tih ka hre chiang duh a."

"Kei chuan ka duh che, Rinawm."

"Ka hria alawm, keimah tak hi ka chiang lo va. Hun thâwl ka mamawh rih a ni."

Kal lo tùr leh min țhen lo tùrin ka ngen lo ang, ka duh thu ka hrilh a, a tâwk e. Min duh tùrin ka tilui thei hlei nem. Khati chen kan lo inzui ve tawh a, inngaihtuah a mamawh a nih chuan min duh tak tak lo tihna.

A chhuah hnuah pawh ka awm ngai rengin ka awm. A birthday a nih vangin zanriah tuihnai tak ka treat a, ani chuan min țhen hi a lo tum lâwk daih tawh a lo ni, a rilru a lo siam fel vek tawh zâwk a lo nih hi, ka va vànduai tak ém!! Pawisa neih loh nâk laiin, ka pawisa kha ka va ui tak. Ka bialpate thil leisak nân chéng khat tê mah ka hmang tawh lo chiang khawp ang.

Ka rilru a hrehawm ém avàngin a tûk school ka chàwl ringawt, ka damloh ka chhuanlam. A dik ve tho, zàn ka mut loh avàngin ka lu a na bûr a, ka mit a kham vek bawk.

Țah chu ka duh miah lo, țah a phû lo. A rilru a hriat chian loh chuan min duh lo tihna a ni mai a, min duh lotu ngaia țah ka tum hek lo. Ka rilru erawh a na lo ka tih chuan dâwt ka sawi chiang khawp ang. Khati chen ka lo zui tawh a ni a, kei chuan ka duh miau si a, heti maia min kalsan thei hi nâ ka ti lo thei lo.

Angaihi ka phone a, kan chanchin chu ka hrilh ve a. A thin a rim khawp mai a, lo chhoh a duh viau nain dàwr a kalsan ringawt thei bîk lo, mi hnuaia inhlawh a ni ve miau si a. Min hnèm malh malh pahin zàna rawn lèn a tum thu chu min hrilh a.

Tlaiah Zara'n min rawn tlawh haw a, ani hi chu ka kawm ber a ni miau a, min rawn tlawh haw ka ring hrim hrim bawk.

"Eng nge i an? Vawiin chu i awm lo va, a reh rawihin ka hria."

Ka nui sak ringawt a.

"Boss pawhin i chanchin min zâwt a."

Nia, ka theih loh thu kha hrilh ka tum a, a phone switch-off a ti tlat a nih kha. Zara ka hrilh ta tawp a, a lo hre thiam ve mai tùrah ka ngai.

"Ka phone tlang thei lo a nih kha. Naktûkah chuan ka kal thei tawh ang, ka zia tawh e."

"In pain a rawn kan che em?"

'In pa'. Ka rilru a na zak mai. Tunah chuan min kalsan tawh si a, ka lo innghahna ve ber leh ka duh ém ém khân min kalsan tawh a ni.

"In intithiam lo em ni a?"

"Min kalsan tawh a."

"Engtin a?!!!"

"Break neih a mamawh thu min hrilh a ni."

"Chupa mai mai chuh. Inngaihzàwn hi infiamna ang lekah a ngai a ni ngei ang, chuvàng em ni school i lo kal loh?"

Ani hi chuan Rinawma nèn kan inkâr hi a hre ve vek a, Angaihi tih lohah chuan ka mi rin ber a ni.

"Nizànah ka mut theih loh vàngin ka lu a na lutuk a."

A bu nghat a," Mit hian a tuar duh alawm, mitin a tuar chuan lu a na duh a," min ngaihtuah zet hian a ti leh a.

"Dik tak chuan ka rilru a tina ve ém a ni, Zar. Khati chen kan lo inkawp ve a, min duh ve ém émin ka hre ve bawk sia; mahse, heti mai hi a lo ni bawk nèn, ka lo hriat chian lohzia ka hre chhuak a, keimah ka indem hial zâwk a ni."

"Indem lo ve, tunah chuan a hlimchhàwn lai a nia, i tuar na ngei ang. I rilru siam la, mipa pakhat vàng mai maia rilru na taka awm tum miah suh, ani aia țha i hmu ngei ngei ang. In tâna țha zâwk tùr pawh a ni maithei asin."

Zànah Angaihi chu a rawn lêng ta ngei a, in a rawn luh veleh min kuah vang vang phawt a, țhian țha neih man hi chu a awm teh a nia.

"Nang kalsan theitu che chuan a chàn nasatzia a la hre chhuak khawp ang, a màwlzia a la têl ngei ang. Rawn lêt a tum pawhin lo pawm tawh miah suh, ka ngei a nia."

Leh bàwng bàwng țhìn hian.

"A lu bial bial nèn, ball a ang si, pèt chawrh chawrh ka châk."

Țhiani nge nge, a nuih loh theih loh.

*HMANGAIHNAIN A RAWN ZAWN HMUH HUNAH CHE CHUAN I INRING EMAW RING LO EMAW I NUNA THIL LO THLENG ȚHA BER A NI NGEI ANG*

☆13TH MAY☆ - 4 By Dingdi Pachuau

Dik tak chuan ka khawvêl hi a thim vek maiin ka hria. Ka thinlung a nâ a, hei aia nat leh chuan ngaihna a awm lo. A rilru kha min lo pe ve miah lo tihna em ni ang? Kei chuan tih tak takin ka duh asin, ni tin min be lova a awm theih loh laite kha. Khatih hun lai kha chuan ka la duh lutuk bîk lo asin. Ni tin zan tin min rawn bia a, min biak loh leh min text bawk a, kan inkawp ta chêng a, min kalsan ta si, min ning tawh a ni ngei ngei ang.

"Min ning tawh a niang tiraw?"

"Ni lo ang, ani hian a lo kawp reu reu che a niang ka ti zâwk. Ka hre chhuak a nih hlauh chuan a châk lo ve khawp ang."

Min kawp ang maw? Min kawp duh ém dáwn em ni? Hmeichhe dang vàngin min kalsan ang maw? Chutiang tùr ém chuan ka ngai phal lo.

"Hetiang mai mai, a aia țha nei hmak ang che. E, taka, a birthday-ah zanriah kha i treat ta em?"

"Um..."

"I hman ral zawng zawng kha kan dîl lêt leh mai dáwn em niang? Ka ngaih dàn a ni lo lutuk a, dìl lêt leh vek a nia ka duh ni."

E khai! Chu ém ém chu thleng lul suh se.

"Lu biala chu, hmuh ka châk ngawt mai, a lu bial zet kha hrual mùm belha, lirh bo daih a nia ka duh ni. A nih loh vêk pawhin, ka nauteho football khelh peih deuhte pèt tùra pêk ka châk!"

A haw hnuah chuan a thil sawi chu ka ngaihtuah lêt a, ka nui sak sak mai. Rinawma lu mûm zet ka mitthla a, ball chu a nih duh hmèl ém bawk a ni.

"I rilru tina duh suh ka ti lo ang, a nat miau avàngin. I rilru a nat avàng khân i chak lo ta viau tihna a ni lo. Mi lo tawn ang țhin kha i tawng ve a, mi rilru nat ang țhin khân i rilru pawh a na ve a ni mai, hei hi 'nun' chu a ni. Hringnun zin kawng chhuk chhoah hian engkim i thunun vek thei lo, a châng chuan chawlh rih pawh i mamawh ngei ang, thil țha zâwk i tân a rawn inher ngei ang tih beisei tlat la, ring tlat ang che."

He thu min hrilh erawh hi chu dik ka ti lutuk a, ka theihnghilh phal lo ang. Han fiamthu hlut țhìn mah se, thu țha tak tak hi a sawi ve fo țhìn a nia, ka țhiannu hi chu ka chhuang ve fo țhìn rêng a ni.

A tûkah chuan phûr fahran lo chuan school chu ka kal a, ka hlim lohna hi naupang hmaah ka tihlan a thiang lo va, ka thawhpuite hriat ka duh bawk hek lo. Mipa ka duh ém ém leh a kum têla ka lo zui tawhin min kalsan tih hi ka cheziaah lantîr ka tum kher lo.

Ka rilru ngaihtuahnaa a awm loh nân thil dang ka ngaihtuah zêl a, break lai pawhin ka phone-a games ka neihchhun Candy crush ka khèl char char a, tlêm chuan a zia ve deuh chuan ka hria.

Zànah erawh ka inngaihtuah nasa leh ta a ni. Min mutpui theih loh vang hi em niang le hetia min kalsan zâwk le? Chetsual ka duh lohzia ka hrilh fo sia, mipa a ni a, tlàwmthlâk a ti ta deuh zâwk em ni ang? Thil țûl lo pui pui ka ngaihtuah a, ka muhìl thei dèr bawk si lo.

Zàwi tê têin 'Don't let me go' hla ka play a, ka mittui a tla zawih zawih mai. Ka tân he pa tê hian a lo phuah a nih ka ring ta hial, ka tawn ang hi a lo tawng ve hial a ni ngei ang.

Ka duh a, ka hmangaih alawm. Ka tân Pathian min ruatsak a nih hial ka ring țhìn a nih kha, Pathian min ruatsak ni se heti mai hian kan inkâr a tàwp dáwn em ni? Min ruatsak lo pawh ni mah se, ka rilru a na tho si a ni. Khuareiin min hnèm mai ang, chu chu ka inhnem theihna awmchhun a ni ta. Ka thinlung hi a tina ém a, tuamdam leh tùr chuan hun a duh rei deuh ang.

*********

"Tete, ka thin a rim lutuk! Vawiinah Rinawmlova leh a bialnu ni ngei tùr an inphur ka hmu, a kawp che a ni chiang alawm," Angaihi chuan a ti bawrh bawrh a.

Kâr hnih a liam a, tlêm chuan ka rilru pawh a zia tawh. Tuna Angaihi thil sawi pawh hian ka beng a verh ém ém rualin ka rilru a tihnat belh tawh hran chuang lo. Thil erawh ka ei thei lo va, zàn ka mu țha lo bawk nèn, ka rihna pawh a tla hniam zawt mai.

"Min țhen tawh a, a free tawh alawm."

"Free mah se, ka thin a tirim tho alawm. 'Hey, Rinawmlo, lêrha' tiin ka ko vak țêp a ni."

Min țan thei a nia... ka țhiannu a ni miau a.

"Hawh, insiam la, kan in lamah lo lêng thla ve rawh. Chaw i ei nghal ang a, zanah ka thlah chho dáwn che nia."

"Zànah inkhâwm ka duh asin."

"A, zanin chu absent ve rih mai teh."

Ka insiam a, kan inzui chhuak ta nge nge. Ka peih loh deuh țum pawh hian min sâwm tlut tlut zêl a, min nghah tlat chuan a tàwp a tàwpah ka zui leh nge nge zel.

A scooty chuan kan inphur thla lâwp lâwp a, a scooty neihna hi a rei ve tawh a, a khalh thiam ve khawp. Kei pawh hi min phur ve dâwrh dâwrh zêl, ka hlau bîk lo.

Chanmari-ah an awm a, an in an sak mêk avàngin mi in an luah rih. Kawngpui hnuai zâwk àn chiah niin building chhâwng thum nei chung ber an luah a, a nuam reuh hle a ni.

Thingpui in pahin kawnga kalte chu kan thlîr pah a. Thlìr a remchâng a, a fuh vel vek.

"Ih, in in luah hi hâwkdâk a awl tiraw? A remchâng bawk sia."

A nui kar kar a," Tlangvâl hmelțha ka lo thlîr țhìn alawm, lêrh pawh a awl lutuk," a ti sar sar a. Mitko sàn ák hian," Vêl a che!" ka ti a, kan nui dùn a.

"In hnuainu chu khawiah nge maw a kal dáwn le? An pa awm loh hi chuan a chhuak ve ziah, a chhuahpuipa lah hi a chhe lo thei tawp."

Ka en ve vat a, chu nu chu a chhiat loh hmel kher mai, a sam chu a eng buang deuh thar a, a sexy tâwk vel chiahin a tikir bawk. A kekawr hâk mar zet ațang chuan a nalh thlerh thlawrh viau tih a hriat theih a, hetiang nalh deuh hi hmuh an hrehawm lo ka ti țhìn.

A mipa zâwk ka hmuh chuan ka phu zawk mai!!!

Ka mit chu ka khap deuh sak sak a, ka hmu sual a nih ka ring deuh ringawt a; mahse, amah a ni, Liansanga ngei chu.

A nu bulah khân a hmel hriattîr loh chhan chu pasal nei lai a lo nih vàng hi a ni ngei ang! 'Buaina ho tê' a tih kha a lo ho miah lo, a ho lo lutuk zâwk. A va râpthlâk ém! Mi nupui ngaizâwng duh tùr ém chuan ka dah hniam lo asin, Angaihi'n 'an pa awm loh hi chuan..' a tih kha. Pasal pawmlai nei ngei a ni a zui hi. Ka thil hmuhin min țhàwnzia chuh...

"An pa a zin hlek hi chuan chhuahna tùr hi a hre thei a nia, ka hriat țantirh phei chuan a pasal hi a pa emaw ka ti. A pasal chu a upa tawh sia, ani khu a la nula si a. An inàwm lo ka ti lutuk, a pasal chu hmu ve mah la, a pa emaw i ti tho ang; mahse, a hausa a, kan in luah pawh hi a pasal in vek chu a nia."

"A va mak ve!!!"

"Mak hlei nem. Tûnlaiah chuan a neinung nung hi nulate duh an nia, sum ngah ngah hi an hmelțha ber tawh alawm. Kei pawh putar hausa deuh, barakhaih thuta boral thei nghal mai zawn ka duh asin," a ti a, a nui hak hak a.

'A mak' ka tih chu a hre thiam pha ve teuh lo.

"Mahse, mi nun a nia, kan va sawi phâk a awm ve teuh lo. Kan chàwm an ni lo va, sawisèl theihna dàn kan nei lo, an duh duh dànin an nung thei miau alawm le. Hei hi khawvêl nun chu a ni, sum neih miau chuan engkim hi tih theih loh awm hek lo le!"

Liansanga car-a an tlân liam chu ka thlîr a, Liansanga inah an chho dáwn a ni ngei ang. Mi nu kawp pawh pawisa lotu leh 'mi nu ka nih hi' tih pawh pawisa lotute thil tih dun duh tùr chu ka hmu lâwk thiam kuar mai. A va râpthlâk tak, râpthlâk tak hi a ni ringawt. Rinawmlova thil tih ai pawhin a thil tih duh dàn hi ka duh loh chi a ni.

School ka kal pawh chuan Liansanga chu ka hmu ang tih ka hlau zek zek, mak ka ti. Ka mit ngei chuan hmu lo ila chuan ka awih thei kherin ka ring lo. He khawvêl nun lo tenawmzia hi, mipa hi rintlâk pawh an lo awm lo a nih hi. Ti ila, hmeichhia pawh kan ni ve tho, mi nu pawhin 'mi nu ka nih hi' tih pawh a tum chuang si lo, a va hahthlâk tak!

*******

"Ka nuin hmuh che a duh a."

He pa laka ka intâtlût hi ka inchhîr ngawih ngawih. Ka tâl chhuak thei tawh si lo, ka theih dan tùr ber chu pawisa faia rulh kha a ni, pawisa fai lah pûk tùr ka hre dér si lo.

Ka hmuh dàn a dik tawh loh tlat avàngin ka țih a, ka nêl lo zual sauh bawk. A bulah ka inthlahdul thei lo va, ka țang ru reng mai.

"Inthlahdul teh, ka seh dáwn lo che!"

Ka thei lo, ka rin loh dàn lutukin a awm si a, mak ka ti ém a ni.

A nu chuan min lo làwm thiam leh hle a, nimin tlaiah a rawn thleng tawh a ni àwm e.

"Bag ka lo hawn che a, i inhmeh ngawt ang."

Room-ah lûtin a rawn la chhuak a, a mawi khawp mai. Hetiang hi chu ka awt phâk lo zâwk, a man a to dáwn si.

"A mawi hle mai; mahse, ka la thei lo ang."

"Engati maw, Tete? Ka fapa bialnu i nia, ka fanu ang i ni alawm. Inthlahrung miah suh, fanu leisak tùr ka neihchhun i nih hi."

A fanu tùr dik tak zâwk chu pasal pawmlai nei a ni si a, Liansanga nu hi ka khawngaih a ni, ka khawngaih ngawih ngawih. A fapa hian mi nu a ngaizâwng tih a hria ang em? Hre lo ang, hria se chuan a rilru nat dan tùrzia hi. Tu nu nge rilru na lo awm thei ang?

"Ka lo kal hmasak ai khân i chêr deuh tlatin ka hria. Rilru hahna i nei Thil i ei țha lo a ni ngei ngei ang, Bawiha hian a ngaihtuah tâwk lo deuh che em ni? Ngawi tak rawh, tûn țum chu ka awm rei deuh dawn alawm, ei tùr ka siamsak țhìn che ang a, i thau kâng kâng mai ang."

"Nu, bialnu thau deuh ka duh hlei nem."

Ni e, nalh zeih zawih lo chu a duh teuh nâng. Mi nu a ngaihzàwn pawh a nalh ém kha.

"Mahse, Tetei hi han en teh, a chêr mah mah a nih hi. I enkawl țha tâwk lo a nih hmel viau mai."

A nu bula ka awm hi chuan pângngai takin ka awm thei mai. A nèlawm bâkah min be seuh seuh reng a, a nui sâng reng bawk si, ka nêl tak zet.

Phone-a mi a biak hlànin min rawn hnaih sauh a," A bialnu hmasa ber hian a boralsan a, chutih lai chuan a tlangvâl ve tawh. A tawrhna kha tihlan chi a ni si lo va, ka hriat thiampui reng mai si a, a room-ah tawmin ngawi rengin a țhu țhìn. Pâwnah, kawngkhàr bulah hian ka lo ding ve reng țhìn. Chumi hnuah chuan pakhat a nei leh a; mahse, chu nu chu ka hmu ve lo, a hming 'Cindy' a ni tih chiah ka hria, ani nèna an ințhen dàn chu ka hre lo. Tihian, bialnu nei lo hian a awm chho mawp mawp ta a nih ka ring, nang a lo tawng leh hlauh che a, a vànneihna tùr i nih ka ring," a ti sar sar a.

"A ni maw? A nunhlui hi pakhat mah hriat ka nei lo, a sawi ngai lo va."

"A sawi lo ang, a nunhlui hi kei tih loh chuan an hriatpui mang lo ang, kei chu a nu ka ni tlat a, thil min hrilh kîlh kêlh lo mah se ka hre ve thei tho a ni."

A lo nih chiah chu. Tuna a bialnu pasal pawmlai nei pawh hi Lunglei lam daih a nih vàngin a rawn hre lo a nih dáwn hi.

"Hlim takin inkawp zél ula ka ti. A chanchin tam tak ka hrilh chhan che pawh hi ka fapa hian hun harsa tak tak a lo paltlang tawh a, hre thiam hrâm hrâm țhìn tùra ka duh vàng che a nia. A duh si che a, a chân ang che tih ka hlau a ni."

Ni lo, min duh teuh lo. Kan induh lo ve ve, lemchang ve ve kan ni. Pawisa ka bat vàng chauhin a bialnu lem ka chang a, ani ve thungin a bialnu tak tak thup nân min hmang thung. A nu rilru tihnatsak hi chu a duh bîk lo tihna chu a ni phawt, a nu tân chuan fapa țha tak a ni ngei mai; mahse...

Zànah min thlah haw a, kawnga kan tlàn lai chuan," I dam țha tiraw? Thil i ei țha lo em ni?" tiin min zâwt ve tlat a nih chu!

"Dam e, ka țha."

"I chêr tak tak a nia."

"A pawi lo."

"I râi a ni lo maw?"

"Eng a?!!!!" ka ti tuarh a. A va zak lo tak ém!! Pasal nei hawt si lova râi duh tùrah min hmu tihna a ni. Min hmu hniam hle mai.

"Tûnlai dàn lo pawh a ni hlei nem. Nangmah chauhin in i luah a, bialpa pawh i nei ngei ang a, hun fâl in nei thei dáwn si."

"Min ngai hniam hle mai." Ka aw chhuaka lungawi lohna chu a hre ngei ang.

A nui hawk a. "Ka ngaih hniam vàng che a ni lo, thil awm thei ve tho a nia," a ti a, ka ngei lutuk. A thil sawi chu dikna lai awm mah se min ngai hniam ka ti tho.

"I bialnu tak tak kha engah nge i nu hnênah i hmel hriattîr mai loh?"

A ngawi ta vang vang a.

"Bialnu ka nei lo."

Daw peih lutuk. A va daw peih chiang, mî nu a nih avàngin nei lo angin a insawi tih hriat reng reng.

"Gay em ni i nih?"

A nui ta hawk hawk mai, makti zetin ka en phei a, a hmêl ațang leh a nuih dàn ațang chuan a nuih a za tak zet tih a hriat hle mai.

"Gay ka nih leh nih loh chu kan test dáwn em niang?"

Teuh lo lutuk, fiamthu pawhin sawi lo teh se.

"I nau chu a dam țha zel maw?"

Teh daih chuan. Engtin nge a hriat le? E, ni dáwn tak, pawisa pûk chhan min zawh khân ka sawi tak e.

"Aw."

Ka in luahna thlen hma deuhah dintîr ka tum nain a ding duh lo va, ka kawt ànah tak chuan a ding a.

Ka chhuah dáwnah chuan," Inenkawl țha rawh," a ti sup a, ka en zawk a, min lo en reng tih ka hmuh chuan ka mit la lêt nghalin ka chhuak sawk sawk a.

*******

A nu chu kâr khat lai a awm ta. Min hmuh a duh țhin avàngin Liansanga inah chuan ka kal fo a, ka nêl hle tawh a, inpawh tak takin kan titi țhìn. Kan bula Liansanga a awm ve erawh chuan min titîm tlat a, ka duh angin ka awm thei lo.

Zàn mutnaa ka ngaihtuah cheuh cheuh chuan keimah ka indem. Heti khawp hian min ngaina tawh a, kei lah lemchang mai ka ni si. Hriat chhuah hun a awm lo thei dáwn lo, a hriat chhuah hun tùr mawlh chu ka huphurh, ka khawngaih sa ngawih ngawih.

"I nu hi bum tawh lo ang, i bialnu kha hmuhtîr tawh mai rawh," hrehawm ka tih ém avàng leh inthiam lohnaa ka khah tlat avàngin a bulah ka sawi chhuak a ni.

"A theih loh!"

"Eng nge a theih lohna? Pawmlai nei a nih vàng maw?" Ka hre chhuak ta chiah, ka sawi miah loh tùr a ni; mahse, ka sawi zo vek tawh si.

"Eng thil nge i hriat?!!"

Ka hlau leh hnuhnawh lutuk; mahse, ka sawi chhuak vek tawh si.

"I ngaihzâwng kha mî nupui a ni lo'm ni? Ka rin i ang lo hle mai."

A ngawi reng a, min en hek lo. Che lovin a ding reng a, tukverh lam a hawi tlat bawk a.

"Ka nau a nih kha."

Nau a nei maw? Engtin nge a neih theih? A nu pawhin a sawi lo hrim hrim, min bum a tum a niang.

"Unau i neih loh kha."

"Engmah i hre lo, ka nu pawhin a hre hek lo."

Eng thil nge a sawi hi? Min tibuai. A nu pawhin a hriat hauh lovin unaunu a lo nei a nia, a va mak dáwn ve!

"I hre nial a, i hre tak tak lo. Cindy kha ka nau a nih kha, ka pa fanu a ni."

Cindy. A nu khân a bialnu hlui hming a sawi kha Cindy tih a ni ngei mai. A pa fanu a ni bawk si, a bialnu hlui a ni bawk si, a va buaichuar ve.

"I bialnu a ni bawk sia?"

"Thil hlui a nih kha. Hun kal tawha mi a ni alawm."

Vawiin tlai zet chu a va inpuang nasa ém! A inhmeh lo tawp. Thil hlui, hun kal tawha mi a nih chuan eng nge a awmzia? Tunah pawh pasal nei mah se a la hmu tho bawk si. A nau, a farnu ni bawk chu a bialnu a ni bawk si, thil mak tak chu a ni.

"Tunah pawh i la hmu reng tho si a?"

Ka dilchhût mah mah em aw, a thin ka tirim ang em?

"Ka duh alawm."

A duh hle a ni tak ang, pasal a neih hnuah pawh a la nêp phal loh bâkah a la hmu duh zel a nia, a zùnah a uai nghet hle a nih dáwn hi, khawngaihthlâk zâwk hian.

"Delhi-a lehkha zira ka awm laiin ani pawh a awm ve a, ani erawh chu naupang tê a la ni. Mizo awm ta chu kan inbiain kan inkàwm a, kan innêl a, kan inngaina telh telh a. A tàwpah chuan kan induh ta a, kan inzui rei viau. Mizorama kan haw chhoh hnuah pawh kan inbe pawh reng."

"Ka pa chanchin hi ka hre ngai lo, a pa hming leh ka pa hming chu a inang chiah a. Delhi-a ka chhuk leh hnuah a pa boral thu min rawn hrilh a, an thlalâkte min rawn thawn bawk. Chutah chiah chuan a pa chu ka pa ngei a ni tih ka hre chhuak, haw pawh haw chho duh lovin Delhi-ah chuan ka awm ta reng. Ka unaunu, ka farnu ngei ka lo ngaihzàwn avàng a hrehawm ka tihzia chu."

Makti deuh, ngaihnawm ti tak siin ka lo ngaithla a, tunah chuan ka dem viauna rilru kha a mawih țan.

"In ințhen dàn chu?"

"Ka pa hian ka nu nèn an inneih laiin nupui dang a ûmsan a, ka nu chuan pa tel lovin min enkawl chho a, ka pa chanchin erawh a hre zui reng. Kei erawh min hrilh ngai lo thung; mahse, ka nu hian a thlalâk a kawl reng țhin avàngin ka pa hmel hi chu ka hria."

"Cindy'n a pa thih thu a rawn sawi laiin ka nu pawhin min rawn hrilh ve tho. Ka pa tak tak boral thu min rawn hrilh, a thlalâk nèn lam. Mi pakhat ngei a ni tih a hriat loh theih loh. Ka nu vàng talin Cindy chu ka hlat a ngai tih ka hria, ka pa fanu ka ti tak nain thisenah inzawmna an nei miah lo. Ka nu hrehawm tawrhna zawng zawng leh min enkawlna zawng zawng kha ka ngaihtuah lêtin Cindy chu ka țhen a ngai tih ka hria a, ka be ta lo a ni."

"A hnu lawkah pasal hausa tak a nei tih ka hria a, kei chu ka hausa lo va, ka lawmpui hle. Cindy hi lo be chhunzawm zel ila chuan ka nu rilru hi a na dáwn tih ka hre si a, ka nu tuar ai chuan tiin ka țhen ta a ni. Tunah hian la duh viau mah ila, mî nu a ni tawh a, min la thlâkhlelh ve tho avànga hmu chauh ka ni."

*I HRIAT CHIAN HMA HAUHIN MI DANG CHUNGCHÂNGAH NGAIH DÀN SIAM NGAWT SUH*

☆13TH MAY☆ - 5 By Dingdi Pachuau

A nu vàng liau liauin a duh ngawih ngawih chu a kalsan a ni si a, kei lahin thil hre chiang hmasa lovin ka lo dem ém ém a. A dinhmun khirhzia leh hrehawm tùrzia chu ka chhût thiam lo zâwk, a tuar tam viau a lo nih hi.

"I unaunu tak tak a ni lo tih i hriat hnuah chuan?"

"Ka rilru ka siam fel tawh a, kal tlangpui hmiah ka tum hrim hrim a. Bâkah, pasal a neih hnuah ka pa fanu tak tak a ni lo tih ka hre chauh, a tlai tawh."

"Ka pain ka nu a kalsan laia ka nu tawrhzia leh a hnu zêl pawha a tawrh natzia ka hmuh khân ka nu hi rilru natna tuartîr ka duh tawh lo a ni, a tân fapa țha nih kha ka tum chho ngar ngar a. Pawisa hian hlimna leisak thei dáwn ila chuan ka neih zawng zawng hian ka leisak ngei ang, hlim hi a phû ve tawh ka ti a ni."

"Pawisa vànga kan inremsiam kha ka inchhîr miah lo, ka tifuh hle tih ka inhre tlat a ni. A chhan chu ka nu hi a hlim a ni tih ka hria, bum angin lang mah ila hlimna a neih hi a hlu ka ti ém asin."

Heti khawp hian a nu hlimna chu a lo duhsak a maw? Kei lahin a nu chu thu dik hrilhah ka lo tur ve chhên bawk si a, hrehawm a lo ti țhìn ngawt ang.

"Thu dik hi hre chhuak ta se?"

"I hrilh a nih loh chuan a hre miah lo ang, kei chuan ka hrilh dáwn lo a."

Hrilh lo tùrin min duh tihna, sawi dawt lo mah se a hriat mai. Hrilh a duh loh chuan ka hrilh bîk lo ang, a nu hlimna tihchhiat ka duh bîk lo.

Rawn inher thutin ngun zeta min rawn enin," Hetia lem i chan avàng hian i bialpa nèn in inkâr a țhat loh phah em?" a ti ta thut a. A zawhna chu ka rin loh lam thil daih a nih vàngin ka chhâng lawk lo, min ti hamhaih tlat.

"Buaina i tâwk a nih hmèl."

"Ni lo, kan ințhen tawh. Lem ka chan vàng ni lovin thil dang vàng zâwk a nia." Awlsam taka ka sawi chhuak thei chu ka lâwm rilru kher mai.

"A va â ve!"

A thil sawi chuan ka nuih a tiza thut a, ka nui hak a. Tlangvâl kum heti chen zet tawhin a sawi atân chuan a nuihzatthlâk lam deuh chu a ni.

"Nang anga nula fel chu a hmu tawh miah lo ang, a vanneihzia a hre chiang lo tawp. A â let dêr a ni."

Min fak ve ngei tihna. Zak rilru viau mah ila,ka rilru chu a hlim hle thung. Ani ang țawng tlêm leh nèlawm lo hian min fak ve a ni si a, a lâwmawm hranpa riau asin.

*******

Rinawmlova chu a bialnu nèn ka hmu tawh. A bialnu chu ka hmu tawh țhìn, chhe lo type ang chi hi a nia, a chhe lo mah mah ka ti. An induh thiam hmel khawp mai, ka làwmpui e.

A number ka la neih avàngin a dp a thlâk kual fo chu ka hmu ziah, thlalâk a làwm thar riau a nih dáwn hi. A status lah a update peih viau bawk, ka ensak vak ngai lo nain a chânga mi dang status update ka en hian a lo in-load tel zauh țhìn a, ka back vat zêl. Fb lamah lah an thlalâk thar ber ber a upload zut a, a țha e, hlim hi a țha a ni.

Thla thum thla li a ral meuh chuan ka rilru nâ pawh a zia tak zet tawh. Ka inngaihtuah ngut ngut pawh kha a zia tawh a, Angaihi a hman châng apiangin a rawn lawr bawk a, a rawn riak thùl. Ka tân chuan vitamin A-Z dik tak a ni.

Inrinni zàn a ni a, ka inkhâwm lo. A chhan chu vawiin lamah ka nuam lo lutuk a, ka period tùr ințham chho vêl vàngin nilêng deuhthawin ka tai a nuam lo a ni.

Liansanga a rawn lang teh khiah. Min rawn phone lâwk lo va, message-in min rawn hrilh hek lo, mak ka ti ru angreng.

A inthuamna zawng zawng chu a nalh vêl vek. A kekawr hâk sei zet, a mal phuar deuh hlek chu a inhmeh zual, he pa hi chuan a thawmhnaw hâk engkim hi mawipui tùr a ni tlat a ni. A pian a dik a, a sâng viau na hian a chêr hran bawk si lo va, a inthuamna reng reng mawipui tham a ni tlat.

"Min en zo tawh em?"

Ka zahzia mai chuh...ka lo thlêk veng veng lo niin, ka sen awp awp ang, ka beng leh ka hmai a sa hut hut mai.

"Lo țhu rawh, eng nge i duh a?"

"Tlangvâl, nula ina a lènin eng nge a duh țhin?"

Min tilai leh ta. Ka lài tak zet tawh, sawi leh tùr pawh ka hre tawh lo.

"Zanin chu ka lung a lêng deuh nge, kawm tùr ka duh tlat a, ka rilruah i lo lang hmasa ber a."

A va mak! Lunglèn kher chu, a inhmeh lo viau. A rilrua ka lang hmasa ber tih a sawi chuan min tihlàwm rualin min tilai laklawh tawh a, awm dan thiam a har. Min chhaih deuh tlat bawk si a.

"Mahse, i awm a nuam vak lo a nih hmel. Ka tibuai che em?"

"Buai lo ve." Sawi tùr ka va hre lo tak! Thingpui han lumsak ringawt dáwn ila a la hma si.

"Țhian inkàwm angin inkàwm ang, kan chanchinte kan inhrilh tawn ang a."

"A țha alawm."

"Mahse, ka nu bulah chuan țhian kan nih theih loh kha aw, ka bialnu i ni tih theihnghilh miah suh."

"Aw le, ka hria e."

Thatchhiat hmel zet hian chair-ah chuan a țhu âwn deuh a, a mal sei zet chu a thluang zuar mai a, nuihzatthlâk lama en chuan a nuihzatthlâk lutuk.

"Eng nge min nuih a?"

Mi lah hi a en chîk thei si, dîlchhût thei bawk si.

"I sei ziar zuar lutuk a."

"Ka pa ka chhùn a. Nang tu nge i chhun zâwk?"

Ka ngaihtuah vang vang a, ka hmêlah ka nu ka chhùn a, pian lamah chuan ka pa.

"Ka chhùn ve ve. Hmêlah ka nu ka chhùn a, pian leh vun rawngah ka pa ka chhùn."

"I nu chu a hmelțha a ni maw?"

Min chhaih pah zeuh zeuh, a rûkin ka lai ngawih ngawih. A chhan chu a nungchang leh a chanchin ka hre nual tawh a, ka khawngaihna leh puih ka duhna hi a nasa mah mah tawh a ni.

"Ka nu nèn khân kan inang ve em?"

A hmel chu ka en zawk a, min lo en reng si avàngin ka hawi sawn lehnghal vat a.

"Ang lutuk lo, i pa i ang zâwk a nih ka ring. Mipa hi chuan an pa hi an chhùn zâwk tlangpui țhìnin ka hria."

A phone phawrhin a thai zeuh zeuh a, min rawn hnaihin," Hei hi ka pa chu a nia," tiin a phone chu min entîr a, ka'n en chuan," In inang tawp, hei hi engtik kuma mi nge niang? A la țha hle si a," ka ti a, ngun zetin thlalâk chu ka bih a.

"Ka hre lo, a rei deuh tawh ang. Ka nu min pêk a nia, ka roh teh asin. Hei chauh hi ka pa thlalâk ka neih a nih hi. Ka nu nèn min kalsanin nupui dang min neihsan mah se ka pa a nihna a bo chuang si lo va."

"A dik chiah."

"I chanchin min hrilh ve tawh teh le."

En vatin," Chanchin sawi tùr ka nei vak lo, nau mipa ka nei a, ka pain kum 5 kalta khân min boralsan tawh a, ka nu nèn kan pathumin kan ni mai," ka ti thuai a.

"Chuan?"

"College ka chhuah hnuah zirtîrtuah țangin tihian ka inhlawh chho zêl a."

"Chuan, i bialpa kha?"

"Break neih a duh a, tihian, kan awm ta a."

Kan ngawi vang vang a, en pawh ka en ngam tawh rih lo. Ka en chuan ka mitmenga ka rilru natna a hmu thei ngei dáwn si a, a hmuh ka duh lo.

Thingpui ka lumsak a, khua a vawh ve deuh țan tawh avàngin kei pawhin thingpui sen hâng chu ka in ve a.

Zirtîrtu hna chungchâng kan sawi a, thil a hre zauin a fing hle tih ka hre mai. Min titipui dàn tâwk a thiam hle a, nêl takin ka titi thei a, a bula awm chu a lo hrehawm miah loh!

*******

Liansanga chu ka kàwm tam telh telh a, a lakah ka rilru puthmang a danglam telh telh tih reng ka hre lo. Chhùnah office-ah a lo kal ngai lo nain Assembly-ah kan inhmu ziah a. Min be lêm lo mah se min hmu a ni tih min rawn hriattîr ngei ngei. Zànah a lo lêng zoh zoh a, Cindy chanchin erawh a sawi ngai lo.

Zàna a rawn lèn loh chuan ka khua a har țan ta deuh tlat. Min ngaihsak thiam a, a nuin ngaihsak tâwk lo min tih kha a rilruin a vawng reng a nih ka ring deuh ringawt. Chanchin ho tê tê min zâwt peih a, thil ho têa ka ngaih pawh hi min zâwt fiah kêlh zel.

A nu rawn phei chuan," Tete, ka fapa hi i kutah ka dah hmak tawh a nia, in in-care tawn hle tih ka hre tawh a, ka ngaihtuah vak tawh lo a ni," a ti a.

"Nia, kan inkàwmngeih viau tawh asin."

"A melh dàn che ațang hian a duh tak zet che a, ka nawr lui dáwn miah lo nain tu neih pawh hi ka châk tawh tho a nia."

E khai! Hei zet hi chu kan inremsiamnaah khân a tel hauh lo.

"Nu, Puii hi nawr chiam ka duh lo ka tih kha, khatiang kha chu a hriatah sawi ri lo rih teh," kan lam pana rawn kalin a ti sup a. Ka bulah chuan rawn țhuin a rawn kûn hnai a, ka beng bulah chuan," Engah mah lo ngai suh aw," a ti sar sar a.

"Bawiha, in induh tawna in inhmangaih chuan nghah rei hi a țha lêm lo asin. In inpeih hun erawh ka hre lo va."

Kei chu sawi tùr ka hre lo, a chhan chu a nu chuan kan inkâr hi a lo la thutak nasa si a, kan pahnih inkârah lah engmah a awm si lo.

A nu nèn chawhmeh kan siam dùn a, pâwn ațangin Liansanga chu a rawn lût a.

"Puii, lo kal lawk teh. I kut kha sil fai nghal la."

Amah en lêm lo chuan ka kut chu ka sil a, a bula ka phei chuan," Ka mit hi lo en lawk teh," a ti a. Ka hnaih nghal a, a mit chu ka ensak a.

"Eng nge awm a i hriat?"

"Ka hre lo, bawlhhlawh a awm lo em ni?"

Ka en kual a, ka hmu e.

"Aw, ka hmu e, a awm sîr reuh lutuk a nih khi."

Kan inhnaih kher mai. Kan hmai a insi lo chauh a ni, a thaw lum ham ham pawh ka hre thei, min tibuai pha tlat. Ka lungphu a ri ring sawtin ka hria a, ka marphu pawh a rang sawtin ka hria.

"Lâk a harsa ang em?" a ti sup a, kan inhnaihchilh ém avàngin a țawng ring lo kher mai.

"Aih."

Ka thaw lâk a ring dáwn si a, muangchângin thâwk ka la a, tlêm tê têin ka thaw chhuak leh, a rûkin ka țang țûng mai.

Ka lâk chhuah hnuah chuan min la chhaih zauh zui.

"Mit timìm zauh zauh ila a țhat dáwn hi."

Ka sen awp awp ang chu, nia, kan inhnaihchilh lutuk a, a lungphu ri thlengin ka hre thei a nia.

"Nangni pahnih kha, eirawng bàwl lai ém ém chuan induat rih lo teh u. Induatna hun te chu in ngah kha," Liansanga nu chuan a rawn ti lar lar a, ka tho chhuak nghal a.

A mit mìm ka ensak a min fiam vàng khân ka zah thar ta tlat a nih chu. A naupan chhiatthlâk ka ti, be paha en pawh ka zak thar, ka lài leh țût tawh.

"Nu, Puii thlah pahin ka lêng nghal dáwn a nia, ka rei lo ang."

Kawnga kan tlàn lai pawh chuan ka en țha ngam tlat lo, ka laka effect a neihzia kha a hria ang em? Kan inkàwm a, a bialnu der mai ka ni. Ka rilru a dik lo țan tlat, he pa hi ka duh tihna em ni ang? Amah ka tawha ka taksaa effect a neih dàn kha a dik tlat lo.

"Eng nge i ngaihtuah?"

"Eng maw?!!!"

"I awm dàn a dik miah lo a nia, khawi maw, lo hawi teh."

Ka in luah kawtah kan lo ding reng tawh. Ka ngaihtuahna ka lo kàwm nasa àwm hle mai, tihchi loh lutuk.

"Chhuak ang," tih leh chhuah ka rual nghal a, amah pawh nghâk lo chuan in pan chuan step-ah chuan ka chhuk nghal a. Thli lo thaw chuan min chhêm nghal a, a vâwt var mai.

"Thil dik lo a awm em ni?"

"Aih." Ka la en chuang lo.

"Puii..." Engtik laiin nge ka hnungah a lo din hman ka hre lo rêng rêng, a thâwm ka hre miah lo. 'Puii' ti hi chuan kan pahniha kan awm lai chuan min ko lul suh se, kan pahniha kan awm chuan lemchan kher a ngai lo.

"Thil dik lo chu a awm a ni, ka nu thil sawi vàng kha a ni em?"

"Aih."

"A nih, eng vàng nge?"

Ka sawi ngam teuh lo, sawi chi pawh a ni hek lo.

"Engmah a ni lo. Thingpui in rawh aw," tiin electric ketli chu ka ban a.

Ani chuan ka bânah rawn manin a lam hawiin min kuai her nghal a,a kuta min tawhna chu ka taksa chuan a hre khawp mai.

"Engati nge min en duh tlat loh? I pawi ka sawi em ni?"

Sawi lo, ni lo, sawi leh si. Nangmah duh tùr hian min siam suh; mahse, ka tlai hret tawh a nih zâwk hi.

"Aih."

"Puii, khawngaihin?"

Amah en thei tùr chuan a kut chuan ka khabeah a dawm kâng a, ka en lo thei lo. Chiang zetin kan inen ta rân mai.

"LS..."

"Puii..."

Kan țawng rual ve ve, a hmêl țha lutuk en loh hi ka tân chuan a him ber asin le. Ka mitmeng ațangin ka rilru a hre thei ngei ngei ang, ka tihngaihna hre lo chuan ka mit ka chhîng ta ringawt a.

Ka hmui a rawn deh chiah chuan ka meng nghal kâwk mai. Ka rin loh dan lutuka a chêt avàngin lo hnial nachâng pawh ka hre lo, ka dawh tawp ringawt.

A hnuah erawh ka fâwp lêt chiang. Ka ngaihtuahna a tibuai vek a, a mi fawhnain ka thluak a tihbuai dan chu mak tak a ni ringawt. Eng dang mah ka ngaihtuah thei lo, fâwp lêt lo thei lovin min siam tlat.

A mi fawhna chuan min fan chiai chiai a, phûrna mak tak min siam a, ka thinphute chu a su dulh dulh maiin ka hria. Nawmna nasa takin min vûr hlawp hlawp a, a fawhna zùnzâmah ka thâm ral zo vek a ni ber mai.

"Puii, thlêmtu dik tak i ni."

Ka harh chhuak chiah. Bangah min lo nawr bet tawh a, kan insi chial. A kâwngah kuahin aniin ka khabeah a kut pahnihin a lo dawm thung.

Ka che sawn ta nghal vat. Ka zak lutuk ringawt, khûk chem chema khûk ral daih ka va châk tak ém!

*HMANGAIHNA DIK TAK CHUAN MI RETHEI LEH MI HAUSA A THLIAR LO*

☆13TH MAY☆ - 6 By Dingdi Pachuau

Hei hi chu kan inremsiamnaah khân a tel ve miah lo.

"Hetiang hian kan awm thei lo."

"Ka tihpalh, Puii. A thleng tawh lo ang."

Ka zahzia chu, ka hmai a sa hat hat mai. Engtin nge ka infawhtîr theih? Fâwp lêt tùr pawh kha ka ni lo asin, eng thil nge ka thluakah hian lût? Ka thluak hi tibuaitu a awm a ni. Min fâwp pawh lo ni ta teh rêng se, fâwp lêt ve lo tùr hi ka nia.

"Tûn lawka thil thleng kha theihnghilh daih rawh aw, kan inkâr tihchhiat phah lo hrâm rawh se."

Engtin maw? Theihnghilh tùrin min ti maw?!! Ka theihnghilh thei tawh ngai lo ang, ka tân chuan 'first real kiss' dik tak a ni.

A haw hnu chuan ka biang sa hat hat chu ka dawm tlawk tlawk a, maimichhîng chungin nichina ka thluak tibuai vektu thil thleng kha ka ngaihtuah lêt a.

Ka ngaihtuah lêt zawng ringawt pawhin ka la mûr chiai chiai thei. Ka va tenawm tak! LSa, mi zei lutuk min fawhna ngaihtuah lét pawha la mûr chiai chiai thei chu...ka rilru a tidik lo zo dáwn. A thu hrimah, ka bialpa ni miah lo ka infawhtîr thei a nia, nikhua lo tak ka ni.

Hmuh ka hreh zo vek. Kan inkàwm a, kan innêl chho viau tawh asin le. Ani chu mipa a nia, a tân chuan engmah a ni ve lo ang. Min hmuh dàn tùr ka ngaihtuah a, ka hmai ka hup tlawk tlawk.

A fawh kha chu a nuam; mahse, ka nunkhua a nuam lo zo vek. School kal ka hreh phah a, min hmu ang tih ka hlau zek zek. A nu rawn phei hun tùr ka ngaihtuah phei chuan ka bîng deuh chûk chûkin ka hre hial mai.

*******

LIANSANGA

~~~~~~~~~~

Cindy ka farnu a ni tih ka hriat ațangin ka khawvêl hi a inletling thawk a ni ber. Kum 2 zên zâwn chu kan inzui hman a, kan induh tawn viau. Ka nu bulah Cindy chanchin chu ka hrilh ve, a chhan chu ka nupui ni ngei tùra ka rin tlat vàng a ni. A pa boral thu min rawn hrilhin thlalâk min rawn thawn a, ka nuin ka pa boral thu min rawn hrilh ve tho. Chuan, thlalâk min rawn thawn bawk, Cindy pa leh ka pa hi thuhmun an lo ni reng a!!

Ka nu min enkawlna zawng zawng leh a tawrhna zawng zawng ka ngaihtuahin ka nu rilru hi tihnat ve ka duh lo. Ka pa tel lovin min enkawl seilian a, Cindy ka pa fanu tih ka hriat ațang chiahin ka khawvêl hi a chhe țan tih ka hria, ka tih tùr dik tak ka hriat sa nghal avàngin.

Harsa ka ti, a chhan chu Cindy chu khawvêl hriata ka nupui ni lo mah se, ka nupui tia ka chhàl ngam a ni tlat a ni. Kan chêng dùn lo nain nupa ang tho kan ni, engkim kan ti dùn a, ka duh leh ka hmangaih a ni bawk. Ani hi chuan ka farnu a ni tih a hre hauh lo, thisenah inzawm lo mah ila, ka tân chuan ka farnu a ni tho; mahse, ka hrilh hre ngai hauh lo ang.

Delhi-a a rawn chhuk theih tâk lohah chuan kan inhmu thei ta lo va, kei lahin haw chhoh ka tum hek lo. Farnu ngaizawng nih ka duh lo a, engmah hrilh lo leh chhuanlam nei miah lova țhen erawh hrehawm ka ti.

Chhuanlam tùr ka zawn buai laiin pasal a nei dáwn tih min rawn hrilh ta thut mai a, mak ka ti kher asin. A pa thihna a la rei loh bâkah kan la ințhen chiah lo bawk. Bâkah, pasal nei tùr ém chuan a la naupang deuhin ka hria; innghah rih kha țha kan ti sia.

A nuin a tîr lui niin a sawi a; mahse, duh lo chung chu a tîr lui thei dáwn em ni tih ka ngaihtuah. A hnuah a pasal tùr chu mi hausa tak a ni tih ka hria a, ka làwmpui. Kei chu ka hausa lo, ka nu ro zawng zawng hi ka khâwm tùr ni mah se, ka thawh chhuah a awm ve tlat lo va, ka la rethei ém a ni.

Company-ah inhlawhin foreign-ahte ka kal dâwrh dâwrh a, hlawh pawh ka khâwl ta zel. Ka nu erawh chuan Mizorama haw chho tùrin min rawn phone apiangin min ti ziah, ka pi leh ka pu an tar tawh a, a tidik reng; mahse, hlawhtlin ka tum. Hrehawm ka tuar hmasa phawt ang.

Ngaihzawng lama ka tluan loh avàngin ka intibuai peih ta lo law law. Ka pi leh pute sumdàwnna ka enkawl a, sumdàwn hi dik tak chuan ka tui lo. School din ka châk țhìn, ka ngaihven ru reng bawk.

Lunglei lamah ka hmu a, ka bawhpelh lo. Ka pi leh pu an boral vàng erawh chuan ka phei nghal vat thei lo. Ka nu ka awmpui rèn ràwn phawt a, ka pi leh pu sumdàwnna erawh ka cousin (ka nu u hmeichhe fapa) Kima kutah ka dah tawp. Tihfel ngai neuh neuh ka buaipui a, Pukpuiah in ka lei nghal.

Motor-a ka lèn kualnaah Cindy ka hmu thut mai chu, ka phu ve țêp a ni. A țhat ngai rengin a lo la țha a, a lo lianin a lo puitlin hmel ve ta. A pasal ni ngei tùr nèn car-ah an lût, a pasal chu a upat hmèl viau.

Mi kawm thiam tak leh țhian ngaina tak ka nih loh vàngin school staff-te pawh ka be pawh lo viau. Ka thawh hma ațangin staff zawng zawng chu an chanchin ka hre sa vek, an thlalâk nèn lam maw le.

Hmeichhe pakhat chuan ka mit a la nghal nalh. Cindy nèn kan ințhen hnua nula ka mit la leh hmasa bertu a ni. Biakpawh dàn ka duh khawp mai, file pawimawh ka hâina lamah ka hmu e.

Ka room-ah ka ko lût a, a hlauthâwng hmel chu ka hmu ru khiau, in-control tum hle mah se, ka hre thei tho. Chhaih ka châk tlat pek a, chhaihna hun a ni mawlh si lo. A inthuamna mawlh chuan ka mit a la, tûnlaiah chuan hmeichhe pawhfèn fêng hmuh tùr an awm tawh lo tluk a ni a, ani hi zawng a hmeichhia hnâp mai, ka nu ka hre chhuak, hmuhnawm a ti dáwn em a ni.

A nau zai a ngaih vàngin school pawisa tam tham tak a pûk tih a sawi chuan a rûkin ka nui var var. Idea țha tak ka nei. Chimawm ka chhuah ve hlak, chimawm tak ka ni ngai lo asin maw le.

Engtin nge Cindy hi a lo hriat ka hre miah lo, zawh erawh ka tum lo. Cindy hian pasal a neih ațang hian ka tâ tùr a ni lo tih ka hriat bâkah a lam hawi tumna ka nei tawh lo hrim hrim. Pasal nei lai lo bawhbuai chu ka tum lo, hmel hriat hlui leh bial hlui a lo nihna laiah erawh biak chhiat ka tum chuang lo. Bâkah, tûn hnaia mi pakhat sawi ka hriat dàn chuan pasal a neih dáwn lai khân a rai a, a rûkin a titla a ni àwm e. Ka fa a nih ka ring, chuti a nih loh chuan mi damg nèn min lo kawp tihna a ni dáwn si a.

Ka bialnu lem Rinpuii hi hmeichhia ka lo hriat țhinte lakah chuan a dang zak. Ani hi chu chhaih ka châk zek zek zêl a, a zakzum tih hre mah ila ka bialnu lema chang a nih miau avàng ka nu bulah chuan kuah der thuak thuak a ngai fo. Hrehawm a tih theihzia ka hria; mahse, nuam ka ti tlat.

Ka kawm deuh tâk hnuah chuan nula fel tak a ni tih ka hria, ka nu lahin a hmuh țantirh ațangin a duh nghal ém ém ringawt, kan awm dun tawh chuan Rinpuii chanchin lo chu sawi tùr a hre miah lo, ka nu duhzâwng a ni tih ka hriat vanga ka bialnu lema chang tùra sâwm chat kha ka ni miau bawk.

Hmeichhia ka ngaihsak peih lohna leh ngaihzawng neih peih lohna laka ka indaidanna bang chu ka hmuh ngun poh leh a țhiat chak a, a bialpa nèn an ințhen tih ka hriat phei chuan ka lâwm viau ringawt, ka rilru chu htia se min ngei ve khawp ang chu.

Ka mit mìm min lâksak kha kan inhnaihchilh ber a la ni hial ang, a kut nêl thapin ka hmai a'n khawih a min han rinchhan titih deuh kha chu mipa ka ni tih ka inhre chiang ngang mai. Ka inthiam lo miah lo, Pathian min siam dàn a ni miau si a, ka laka effect a neih dàn hi hria se chuan a tlân haw dàwr dáwr duh hial ang.

Mahse, tlêmin a hre deuh em ni aw ka ti, a inla hrang deuh tlat. Ka nuin tu neih a châk tawh thu a sawi vàng kha em ni zâwk? A inla hrangin a țawng țhat duh loh bâkah melh pawh min melh duh tawh lo, a rûkin ka nu thil sawi kha anchhia ka lawh mawlh mawlh, kan inkâr a tihchhiat ka hlau tak zet si a.

Inhma tawna kan ding dùn zet zawng, thlêmna ka do zo lo, ka fâwp chawt. Ka fâwp lo thei lo, min hniala min ben chawrh ka rin laiin min chhâng lêt ta zâwk. Ka duhthawh ta lutuk a, bangah ka nawr bet a, chin tâwk nei lêk lova ka'n fawh tâk kha.

Kan inkâr ka tichhe zual ta sauh mai. Ka hlauthâwng leh si, thil thleng chu thleng lo anga ngai tùr leh a thlen tawh ngai loh tùr thu ka hrilh ve ringawt, hei hi ka tih theih chhun nia ka ngaih vàng a ni. A fâwp hmasatu ka ni si a, a bialpa hluiah khân a rilruin min ngai a ni ngei ngei ang, chuti ni lo se, mitmei vawi khat pawh min hmuh lotu hian min fâwp lêt lul lo ang.

Mipa mah ni ila, hmuh leh ka huphurh. Kan inremsiamna kha duh lovin, lemchang chhunzawm duh tawh lova pawisa faia min rulh lêt ka hlau rum rum mai, chutianga a tih hlauh chuan ka nu rilru a na dáwn, kan ințhen tih ka hrilh a ngai ringawt dáwn si a.

School-ah a rûkin a lo kal hun ka thlîr reng, min hua ang em? Pawisa fai kengin a lo kal mai ang em? Nge school ațang hian engmah sawi lovin a bâng tawp ang? Ngaihtuah tùr a tam lutuk. Ka rilruin ka țawngțai hial, ka tih ngài a ni miah lo.

Pawnfèn fual hnalh fênga a rawn kal ka hmuh chuan ka thaw huai mai. Ka ngaihbel nge maw ni, ni dang aiin a phùr loh hmelin ka hria, keimah vàng vek. Pawisa chu a rawn ak mai lo ang maw? A rawn kal avàng ringawtin ngaihțha takin ka awm thei lo ang.

Assembly-ah pawh ka mitsìr reng a, ka lam a lo hawi lo hrim hrim. Kei hian thil lian tak ka tisual a ni, a hma anga awm leh kha ka duh a nih chuan ka biak ngei ngei a ngai, ngaihdam dìl ka duh a ni.

Phone ta ringawt ila, min chhâng duh ang em? Ka phone chu ka tuai ka tuai ringawt a, zànah a inah lêng leh ta zâwk ila, a fuh ang em? Nge lêng lo char char rih ila, ka nu lo phei leh hunah chauh be leh taken zâwk ila? Ka ngaihtuahna a va tibuai tak.

Chawhma zawng ka office-ah ka inkhung a, noon break-ah staff office-ah ka lût phei. Rinpuii chuan min lo en zawk nain a phone a bih leh nghal daih. Eng nge a tih le? A bialpa hlui khân a lo text leh tawh em ni ang? Nge an thlalâk hluite a lo thlîr leh zâwk?

He nu hian min tibuai tak zet. A rilru thlákin kan inkâr hi a titàwp duh mai ang em? A phone a ri ta ral ral mai, chhuanlam siamin pâwnah a va chhâng ta daih, ka ngaih a tițha lo, a bialpa hlui emaw tu emaw tak chu a ni chiang mai. Suangtuahna dik lo pui pui ka nei a, rawn betu chu ka thîk hluah hluah.

*******

Staff Office-a a rawn luh chuan ka en zawk nain ka hawi sawn leh nghal vat. Ka mitmeng ațangin amah ka duhna hi a man thei mai ang tih ka hlau ngawih ngawih, ka rilru ka thup thei țhìn si lo. Ka tân chuan duh phâk a nih loh bâkah hetiang zâwng hian min en ve lo hrim hrim, bâkah Cindy a la duh reng a, a thinlungah hmun ka chang ve teuh lo.

Ka nuin min rawn call ve tlat mai, min rawn call khât asin, thil dik lo a awm a ni ngei ngei ang. Pâwnah chhuakin ka be ta vat.

"Nu, eng nge ni ta?"

"Ka rawn phone khât che sia, ka rawn tibuai che em?"

"Tibuai lo ve, chawlh kan neih lai a nia."

"E, a nih chu. I nau nèn kan rawn zin ve dáwn emaw ni kan tia, min lo thleng thei ang em?" Nui kar kar chung hian a rawn ti a.

Ka rin loh lam daih!! An pahniha an rawn kal chuan, a nuam ngawt ang. Nuin eirawng a lo bâwl ang a, kei hman deuhin ka insu thei ang a, bâkah hlim deuhin ka awm thei bawk ang.

"Lo kal r'u, a nuam ngawt ang. Sangpuia chu a țha chiang tawh tiraw? Hna kha a thawk nasa lutuk ang e."

"Hei, a țha zêl chu a nih hi, i hrilh bâkah kei pawhin ka hrilh mawlh mawlh a, a indîm thiam vak lo nain insawisèlna chu a la nei lo chu a nia."

"A zia chu. Chuan, engtikah nge in lo chhuk ang?" Ka phûr khawp mai.

"Ka hre lo le, naktûkah chuan kan hman lo rih phawt ang, chawhmeh rawn ken tùrte ka zawng phawt ang a, a tûk leh lamah ti ta ila?"

"A țha lutuk, ka lo inbuatsaih nasa ngawt ang."

Ka nu hi vawi khat mah a lo la kal ve loh avàngin ka phûr zual a ni, ka in luah hi tê mah se, ka nu nèn khumah kan mu thei ang a, Sangpuia țhutthlengah a nih loh leh chhuatah a mu mai ang a, a nuam ngawt ang, ka châk tawh lutuk.

Office-a ka luh chuan Zara chuan," A va pawimawh àwm ve!" a lo ti var a, nuih sen sen pahin," Nia, pawimawh lutuk," ka ti ve a.

"Chanchin làwmawm lam a ni ang maw?"

"Teh rêng mai!"

"I hmel ațangin a hriat tlat."

"A țha ém alawm."

Liansanga chu en lo mah ila, ka ngaihven reng tho. A phone a rawn ri ve chiah a, a phone chu phawrhin a en vang vang a. Tho vutin," Cindy?" tiin kawngkaah chuan a chhuak ta nghal a.

Kha maw, a tân chuan nizàna min fawh kha chu engmah a ni ve teuh lo. Cindy emaw min tih thut vangin min fâwp mai mai a ni, an la inbe reng țhìn a lo nih dáwn hi. Kei hian ka rilru ka pe tùr a ni lo, rilru nâ leh hrehawmin ka awm rei mai mai dáwn asin.

An inhmu leh dáwn a niang, a pasal kha a zin bo leh tawh a ni maithei asin. Tlaiah an ina lêngah min sâwm loh a, zànina a rawn lêng lo a nih chuan an inhmu dáwn tihna a ni ngei ang, ka rin dàn hi a dik ngei ngei pawh ka ring. Dem ru viau mah ila, duh rêng vànga ințhen an ni lo va, hriat thiamna thûk tak ka nei. Kawng lehlama ngaihtuah phei chuan an khawngaihthlâk dùn ka ti tho.

Ka rin dan chu a dik chiah. Tlai bànah a tlân chhuak hma ber a, min call hek lo. Zànah pawh min rawn call lo va, a rawn lang miah lo. Thaw huai tùr zâwk ka ni sia, engati nge ka rilruah thîkna tenau a rawn awm tlat? Rawn lêng tùrin ka duh rêng em? En pawh en ngam lo ka ni a, chuti chung chuan a rawn lèn ka ring tho si. Nizàna ka țawng dànah khân a inthiam lo pawh a ni ve maithei asin. Ni lo, Cindy nèn khân an fawr ngei ang.

A tûkah pawh min be lo va, min text hek lo. Ka thinlung a na ve deuh ringawt mai hi ka indem khawp mai, a eng nge ka nih a a bialnu hlui a hmuh avànga nuam lo lo ti ringawt nge ka nih? A pawisa ka bat vànga a bialnu lema chang mai mai ka nih hi. Ani min text loh leh call loh avànga thinlung na tùr ka ni thlâwt lo.

Ka nute rawn chhuk chu nuam ka ti kher mai. Sangpuia pawh a pângngai thlap tawh a, a hmêl ațang chuan hna a thawk nasa tih ka hre mai. Lehkha lam a tih theih thlâwt loh avàngin ka pa bungraw hlui chhawmin mistiri kha a chhunzawm chho ve a,a chemkalna tak a ni. A thiam reuh a, tuna ka ina furniture tam zâwk hi a siam a ni.

Pathum chauh ni mah ila, kan thâwm a ring reuh phian. Chawhmeh an rawn keng nual a, ka nuin ka thawmhnaw tùr a țhuiho a rawn kengthla tel bawk a, a nuam tawp. Kawr thar ka ngah leh ta, puanthân man to lo tê tê hian simple tak takin min țhuisak țhìn a, thawmhnawah pawisa ka insêng tam ngai lo.

Zànah chhuata mut vek ka rawt nain Sangpuia'n a phal lo va, ka nu nèn khumah kan mu. Ani chu țhutthlêngah a mu a, mu pahin kan titi a, kan nui leh dar dar țhìn, chhûngkuaa awmho hi a lo nuam ber mai. Liansanga vànga ka thinlung na det pawh ka theihnghilh hial mai.

*HMEICHHIA CHU PHÊNGPHEHLEP ANG A NI TÙR A NI, EN(HMUH)A MAWI TAK; MAHSE, MAN HAR TAK A NI TÙR A NI*

☆13TH MAY☆ - 7 By Dingdi Pachuau

Zîngah ka nu chu a ri rak rak a, ka tho peih rih lo. Àwl tùr zâwk ka ni tih chu ka hre tho nain tukin chiah chu, ka mu châk rih tlat.

Maimichhîng chung chuan Liansanga ka ngaihtuah a, ka ngai chu ka ti dawt lo nain eng emaw ni deuh veng veng chu a awm, zàn hnih a rawn lêng ta lo va, hmaichhana inbiak chu sawi loh phone call takngial pawh ka dawng lo chu a ni si a, min mamawh loh lai chuan min theihnghilh ve thei țhak țhak khawp mai.

Tûkțhuan kan kîl lai chuan Sangpuia chuan," Bialpa i nei ve lo em ni? Nizàn khân a rawn lèn ka ring a nia, nge lo lêng lo tùrin i ti zâwk?" a ti a.

"Ka nei lo."

"Zêp kher a ngai hlei nem, neih loh a hlauhawm daih zâwk. I senior mai dáwn asin."

"Ka zêp teuh lo, ka nei lo tak tak."

Ka nu chuan," Bawihte, in school-ah chuan tlangvâlte an awm ve lo em ni? Pasal tùr țha tak hual lâwk la, thingtlânga pasal neih ringawt hi chu, hnà tùr hi a hriat nghal lutuk a," a lo ti thung a.

"Țha deuh a hual tawh ngei ngei ang."

Nui chung hian," Mahni engmah nih loh chuan țha deuh a neih theih loh," ka lo ti a, ka nu chuan," I fel tal alawm, i hmel pawh a chhe hran lo va. Pasal tùr țha deuh i hmuh theih nân ka lo țawngțaipui reng țhìn che a nia. Hausa leh neinung ringawt hi a ni ber lo, Pathian hre mi leh ruihtheih thil ti lo hi tûnlaiah chuan an țha ber," a ti duah a, ka nu hi chu a fel thei a nia. Kan unau hming lam meuh hian ni tin min țawngțaisak țhin asin, ani aia nu fel hi chu kan tân chuan an awm thei tawh kher lo ang.

School thlen hmasak ber ka hreh avàngin ka muang deuh hlek a, Zara rawn tlânin min phur leh a. School kan thlen chuan Liansanga car chu a lo awm leh vang tawh, he pa hi chu self-discipline hi a nei țha ngawtin ka ring, a tlai ngai miah si lo. Mi dang zawng zawng ai hian a thleng hmasa ber ziah.

"Ka nau leh ka nu an rawn chhuk a."

"A ni maw? Chuti, zanin chu rawn lêng ila a țhat dáwn chu."

"A ho mai mai, ka bialpa emaw an ti palh ang che."

"I bialpa hmuh an inring dáwn si a, i hawihàitîr lutuk dáwn asin. I bialpa lemah ka lo țang rih mai ang."

Nui hawk hawk chungin kan lût a, Zara bula awm hi chu a nuam a nia, a rilru a zauin fiamthu a duh a, ka ngaina hle reng a ni.

Liansanga chu a office-ah a inkhung thei tlak tlak khawp mai, break lai pawhin a lo lût miah lo. Hmu duh lo viau siin ka zawng rùin ka beng ka chhi ru reng a, a rawn luh mai ringin kawngka lam chu ka hawi deuh reng, ka awm dàn hi ka hre thiam bîk lo. Ka duh țan tawh tih chu ka hai miah lo; mahse, pawm ka duh lo rih mai niin ka hria.

Rilru khingbâi deuh hú leh helhkham nei rùnin class ka la a, ka dik lo tak zet a ni. Hetiang chuan engtin nge naupang attention ka lâk theih ang le? Insiam țhat vat ka ngai.

Cindy a rawn lang hlawl mai, staff office-ah a rawn lût. Cindy tih ka lo hre nghal a, mi dang erawh chuan hmuhnawm tih hmel deuhin an lo thlîr a, polite ber Zara'n a lo chhàwn vat a.

"Lo léng rawh, miss. Lo țhu rawh, eng nge i duh tâk?"

Cindy chu hmun leh hmunah chuan a hmelțha tak zet. A hmui chu lipstick sen duk lam deuh a hnawih a, a mit hnawih pawh a dum mawi khawp mai. A inthuamna pawh a inhmeh lutuk, a mitmeng lian kel kawl chu a lang zahawm kuau mai lehnghal a, kekawr erawh a tight mah mah ka ti, a inhmeh lutuk tho.

"Principal office hi khawiah nge a awm le?"

Hmm, ka rin dàn chiah. He pa hian a la hmu reng a, mite hmuh pawh an sawi thei tawh lo a nih dáwn hi, a pasalah hian khamkhawp a hmu lo em ni le? Pasal nei reng chunga bialpa hlui la hmuh reng mai chuh...a mawi lo tawp, a zak lo ve hrim hrim a nih dáwn hi.

Ka nu thu sawi țhin ka hre chhuak zawk. 'I hriat chian hma hauhin mi dang chungchângah ngaih dàn siam ngawt suh.' Nia, Cindy hi ka hre chiang miah lo, hre chiang tùr pawhin kan la inkàwm hek lo, a chunga ngaih dàn ka lo neih chu a dik miah lo. Thil țûl leh pawimawh tak sawi dun tùr an nei pawh a ni maithei asin.

A kal hnu chuan mipaho chuan a chhiat lohzia chu an sawi sap sap a.

"Principal chu a awm mulh mulh emaw tih laiin chhas a lo nei chhe lo kher mai'".

"A sexy-zia kha!"

"Tawrh a va har ve!"

"Kan thawhpui hmeichheho chu a dah 'nîl' hle mai," tih vêl mai maiin an pâwt a, hmeichhe dang pawh chuan chhe lo an tih thu chu an sawi sap sap a.

Kei chuan engmah ka sawi ve lo, rilru dik lo put loh hrâm ka tum ngar ngar a; mahse, har tak a ni. Eng nge an tih ang tih mawlh mai ka ngaihtuah pek a, Dini thu rawn sawi chuan ka beng a verh zar mai.

"Cindy a ni tlatin ka hria, pasal a nei tawh nghe nghe."

Zara chuan," Inhmel hriat țha tak an ni a ni mai, hmeichhe chhe lo deuh a lo lan tâk avànga lo buai chûk te chu, ani ai khân ka bialnu ka duh daih zâwk!" a ti a, Dini chuan," I bialnu chu i duh daih zâwk ang chu, principal ni hek lo che maw le!" a lo ti a, kan nui tat tat hlawm a.

"Khatianga in sêp peih a nih chuan ka bialnu ka la rawn kaltîr ve ang e. Tak tak chuan, kan thawhpui hmeichheho hi in chhe lo fé zâwk, in fel hlawm si."

Kan bâng a, office kan chhuahsan sang sang lai pawh chuan Liansanga car chu a la awm reng. A inlêngnu chu a la awm reng tihna, eng tak ti ang maw?

Zànah Angaihi a lo lêng a, a lo luh hnu rei vak loah Zara a lo lêng ve bawk. Kan titi lai lai a, Angaihi pekin Rinawmlova chanchin a rawn sawi chhuak leh chut pek.

"In pa hlui kha vawiin chu ka'n zilh deuh nak kha. A bialnu a rawn hruai vei a, zak thei a nih chuan a zak ve maithei a ni."

A va buaithlâk thei tak! Awmze nei fé hian ka melh hrâwk a, ani lah chuan a lo man thiam duh miah lo.

"Ka ngei ve a ni mai a, ka duh dàn tak phei chuan kha aia na deuh taka tih kha ka la duh asin aw."

Ka nu leh Sangpuia chu ka melh duh lo, an hre thiam nasa dáwn si a, mut hmunah min zâwt chiang khawp ang.

*******

LIANSANGA

~~~~~~~~~~

Cindy'n min rawn phone khân tlai bànah rawn lèn a duh a, a rem leh rem loh min rawn zâwt a lo ni. Ka bialnu hlui ni mah se, pasal nei tawh a nih vàng hian a fâla inhmuhpui hi ka duh vak lo, a hmingchhe mai ang tih ka hlau.

An inah ka zu kalchilh ta zâwk a, an pain a lo zinsan leh tawh a. Ka ril țàm leh țàm loh min zâwtin ei tùr min rawn chhawp a, Delhi-a kan awm lai khân beer kan in nasa țhìn a, ka duhzâwng lah a hre hneh tawh bawk. Ka duh ber chi min rawn pe nghal chat rêng bawk a, hnial ka duh viau nain Rinpuii hmêl ka mitthla zawk a, hei hian tlêm têin min tizia deuh mahna.

Ka duh aiin ka in tam, ka kâi chu ka ti chiah lo nain ka thluakah hna thawh chu a nei chiang. Chu chu remchângah lain Cindy chuan min nêk tâlh tâlh a, a bân nãl han mai chuan ka nghâwngah a kuah a, ka beng bul sêtah chuan min hrilhru sar sar a, a thil duh ka hria. Kei pawh ka thil in hnathawh avàngin ka ngaih a sam sâwt viau. A hmeichhia zâwkin min chûl ta hliau hliau reng mai chu, thîr hlûma siam ni lovin châkna nei mipa țhalai ka ni miau si a, thlêmna chuan min buanthlu nawk nawk mai.

Zàna riak ve nghal tùrin min thlêm a; mahse, ka tih tùr ka hai lo. Ka hnial ngei ang, school ka kài a ngai, riak thei ka ni lo.

"School ka kal a ngai, ka riak thei lo."

"Heta țangin i kal thei tho alawm."

Hnial chu har ka ti. Hmâna ka duh leh ka hmangaih țhin Cindy kha a la ni reng a, a vun nãl han deh nawmzia leh ka thlâkhlelh țhinzia pawh tunah hian ka la hre reng, a la ngai reng. Tunah phei chuan hmeichhe puitling dik tak niin a hma aiin a zei tawh lehnghal.

"Ka riak lo phawt ang e."

Engkim ka duh dàn lo hre tawhtu a ni bawk a, pangchan dàn leh min tihlàwm dàn pawh a hre hneh kher asin. Nichin lawka kan thil tih kha a dik miah lo; mahse, ka tlànsan thei lo chu a nih kha. Pathianin châkna neia min lo siam leh mipa, châkna chhuak hma thei lutuk bîka min siam hi ka haw deuh ringawt.

Rinpuii lakah ka inthiam lo deuh ringawt, ka bialnu tak tak pawh a ni tawp si lo va. Min ngei tlat avàngin biakpawh ka hreh a, zàna lèn pawh ka duh; mahse, min ngei tlat chuan eng thil nge ka tih chuan ang? A rûka thlìr ruk ruk chauh ka chantâwk a ni rih, melh pawh min melh duh lotu nula hi ka tawn vawi khatna a ni hial ang!!

Zànah lèn ka tum deuh thut thut a, a in luah step-ah ka chhuk tawh; mahse, a in ațang ngeia mipa țawng ri ka hriat avàngin ka ding chawt, Rinpuii nui ri nèn a inpawlh nak mai. A bialpa hlui nèn khân an renew leh a nih chiah hi, phone-ah pawh an inbiak tak kha. Mi țawng ngaihthlâk rûk hi thil mawi a ni lo. Thâwm dìm zetin ka inher a, car-ah lûtin ka tlân chhuak ta nghal a, ka hriat chhuah meuh chuan Cindy-te in bulah ka lo awm reng tawh. Zanin zet chu ka awm dàn a mak hle mai.

Zàn ka riak a, zîngah ka haw. Ka thil tih chu ka va chhuang lo tak, ka duh dàn leh ka chêt ngai miah loh dànin hmeichhe pakhat vàngin tunah hian ka che mêk a ni, ka tàwp ngei a ngai. Ka nu duh loh dàn a nih bâkah kei ngei pawhin ka duh lo. Pasal nei tawh ka mutpui a ni a, vawi khat mai ni lo, hei hi chu a lutuk tawh tlat.

School-a rawn kal ve chhin a châk thu a sawi a, a lo kal ka duh lo. Ka tàwpsan a ngai, min bànsan a tum lo a nih pawhin keimahin ka bànsan a ngai, beiseina petu ka ni tlat alawm. Beiseina țha lo ka pêk kha ka hmehmih ngei a ngai.

School-a rawn kal a tum ta tlat mai, staff dang hmuh lohva ka office luh theih dàn ka hrilh. Mi dangin, Rinpuii tiamin, an lo hmuh hlauh chuan rin dàn țha lo pui pui an zêldin palh ang, a bîkin Rinpuii. Ani chuan a hre sa lehnghal, a tihchi miah loh.

Kan inkâr ka tihhnawk then fài dàn tùr ka ngaihtuah rauh rauh laiin țawng ri ka hria. Parda keuin pâwn ka en chuan Cindy leh teacher Zara an rawn inzui, he nu hi ka hrilh mawlh mawlh sia, staff office-ah a lût lui țâlh a ni chiang.

A rawn luh chuan ngun zeta enin," Staff office-ah i lût tih min hrilh miah suh," ka lo ti nghal tâwng a.

Nui har harin," Lût ve bawk ang chu, ka hmu ve châk alawm. I school chu a nuam hle mai, a hmun hi a remchâng reuh bawk si," tiin min rawn hnaih a, a perfume rim tui zet chu ka hîp lût nghal vang vang a.

"Min lo lawm dàn hi a mak e, hetiang hian i tih ka lo ring a nia," tiin ka bengah a rawn fâwp a, a ha rual zet chuan a seh nghal nar nar a.

Ka chak lohna hre chiangtu a ni.

"Hetiang hian awm suh, mi dang an lo lût thei a nia."

"A ho e, lo lût se eng nge pawi? Hei aia nasa pawhin min hmu mah se, pawi ka ti lo."

Ka duh lo, tu pawh lo lût thei an ni. Ka rilru ka siam ru sauh sauh a, a vun deh nuam leh thlâkhlelhawm tak hi thlahlel viau mah ila, ka tâ a ni lo, a pasal tâ a ni. Pasal nei tawh a ni, chu chu ka hre chiang hle tawh tùr a ni. Ka bialnu 'țhìn' a ni, 'mêk' ni lovin. Nula a ni tawh lo, kan thil tih kha thil țha lo tàwpkhâwk a ni.

"Kan awm dàn hi a dik lo."

"A pawi lo."

"Cindy! Kan tàwp tùr a ni!"

"Ka pasal hi ka țhen mai ang."

Ni lo, ka duh aiin a kal thui duh dáwn tlat. Hei zet hi chu thil theih loh a ni, ani hi ka kawp miah loh tùr a ni asin, ka farnu tak tak ni lo mah se, khawvêl hmaah chuan ka farnu a ni tho.

"Bialnu ka nei." Ka tih ngei a ngai, hei hi ka tih loh chuan mi inkâr tichhetu ka ni dáwn tlat. Tunah pawh ka insùm theih loh avàngin ka tichhe mêk a ni a, tihchhiat belh ka duh tawh lo.

"Dâwt i sawi."

"Ka nu pawh ka hmel hriattîr vek tawh."

A mitmeng lian kel kawl chuan min en ràn a, thu dik ka sawi nge sawi lo hriat chhuah tum ni àwm fahranin.

"Kan awm dàn hi a hria em?"

"Tuin maw?"

"I bialnu chuan."

"Hre maithei."

"Eng vàngin nge min rawn pan si?"

"A chunga ka lungàwi loh det lai a nih vàng a nia."

"I va tenawm ve!"

Nia, ka chêt dàn hi a chhuanawm loh thlâwt e. A sawi dik chiah, sawi theih rêng ka nei lo.

"I bialnu chuan a ngaidam thei meuh ang che maw?"

"Thei ang, a chhan chu min hmangaihin min duh miau a, chutiangin kei pawhin."

"Ka hmuh hma chu ka awih lo tawp mai."

"I la hmu khawp ang!"

"Kei ang hian a zei ve em? I duhthâla nuamin khumah a chêtpui ve che em?"

Makti rilru zetin ka en reng ringawt. Hetiang tak hian tawngkam a duhtui lo thei ang tih ka ngaihtuah phâk lo.

"Ani chu nula thianghlim a la ni."

A nui ta hawr hawr a.

"Kei ve kha? Nangmah hi a ni lo em ni min thlêm hmasatu kha? Ka thianghlimna ka hlan hmasak ber kha i ni lo em ni?"

A dik, khatih lai kha chuan kan induh tawnin kan inngaizawng miau a, hun thâwl kan neih kha kan bawhpelh ngai lo a nih kha. Duh ve ve intawng kan ni a, duh lo se ka mutpui bîk tawp nâng.

"Min nêp theih ngai miah loh kha, a chhan chu ka hre chiang ve che. Ka taksa min ît țhìn tih ka hai lo, i duhtâwka ka taksa chen nuam i tih theih ém kha. Tunah pawh i la ngai reng, pasal nei mah ila, ka taksa hi chu i la duh tho. Min hnial thei ngai lo, min hnial tùrin chakna i nei hek lo."

Hmun dang ațangin a țawng chu an lo hre thei ang tih ka hlau ru hial mai. A zahthlâk ngawt ang. A sawi lah hi a dik vek bawk si, ka thiam loh a ni, pan miah lo tùr ka ni asin.

"Ka tihphùr theih ang che hian tumahin an tiphûr thei lo che. Ka hre chiang che ka tih tawh kha, ka pasal țhen lo chung pawh hian ka țawngkam khat lek pawhin uitê ang maiin min zui dat dat thei tih ka hre chiang e."

"Chu chu min hmuh dàn maw lo ni a?"

A taksa ka nêp thei lo tih chu ka hria, kan intihthiam loh ve deuh țhin lai pawhin a taksa hmanga min thlèm chuan ka âwn nghal ziah; mahse, heti ém hi chu ka ni bîk lo, uitê ang lekah min chhuah a nia!

"Liansang, ka hriat chian khawp che hi maw! I bialnu aiin a lêt tam takin ka hre chiang che, ka'n prove dáwn em ni ang?"

Ka hmaah dingin, meng sawr sawrin chungin a kut chuan ka âwm a chûl a, a kut chu chêtin a chûl thla zêl a, a bânrêkah ka mansak ta chat.

"Duhtâwk rawh, uitê anga zui kual dat dat reng tùrah che min ngai ngai suh. I rin ang kha ka ni lo ang."

A mitko lehlam sàn âkin, ngun zetin min en vang vang a. Chutah, a nui ta sak a.

"Ok, a țha e. Min hnial thei nge thei lo chu kan hria ang chu."

Ka office ațang chuan a chhuak ta nghal a, kei ve thung chu ka chair-ah ka țhu thla hnawk a, ka thin a rim țûn mai. Cindy kha ka haw hran lo, keimah leh keimah ka inhua, ka chak loh avàngin.

*ȚAWNG TLÊM LA, NGAITHLA TAM RAWH*

☆13TH MAY☆ - 8 By Dingdi Pachuau

Mut hmunah ka nu chuan ka bialpa hlui chanchin chu min zâwt tak tak a, zêp leh sawi hrehna tùr a awm lo bawk a, ka hrilh vek. Ka tân tak a lo țha, ka rilru a thàwl huai bâkah chhûngte hriatpui thlap a lo țha ber zâwk dáwn a lo nih hi ka ti. A chhan chu ka nu chuan min hnèmin, ka tâna țha tùr chu Pathianin a hre ber a ti tlat a, Pathian ruat ni miah lo, mahni duhzâwng a nih vànga Pathian ruata puh tlat a awm theih thute a sawi nual mai.

Nia, Pathianin min ruatsak hi lo hriat mai hi a har ve bawk a, ka țawngțainaah hian ka thlen ve ta fo. Pasal țha, innghahna tlâk leh Ama'n min ruatsak ngei tawng thei tùrin leh min hmangaih tak taktu ngei nei thei tùrin. Pathian hnêna thil thlen hian te lua a awm lo tih ka hria a, ka hna thleng pawh hian ka thlen fâi vek mai zêl.

Ka nute chàm chhûng zawng chuan Liansanga nèn chuan kan inbe ta lo char char, lèn lah a lo lêng hek lo. A țha, ka tân hian a țha zâwk. Assembly-ah ka hmu țhìn a, min melh ngai lo, kei pawhin ka melh ngai bîk hek lo. Ka pawisa bat kha ka rùl zo tawh a niang.

Ka nute chu kâr khat vêl zet an chàm hnuah an haw a, ka mal leh ta rih; mahse, vawiin Dec 12 a ni tawh a, Dec 15 thleng chiah class kan kal dáwn a, ka haw thei țêp tawh e. Chutah, Dec 15 chu Inrinni a la ni zui, Dec 14 thleng chauh tihna a nih chu.

Tlai bàn hmain min rawn phone ta tlat! A nu a lo phei leh tawh em ni? Ka bâ kha ka rùl zo tawh emaw ka ti asin le.

"Ka office-ah min lo hmu lawk teh."

Țhiante bulah chuan Principal hmuh lawk ka ngaih thu chu hrilhin ka kal ta nghal a, a rûk tak chuan ka phûr a; mahse, ka huphurh tho bawk.

"Eng nge ni ta, sir?"

"Lo țhu rawh," tiin amah hmachhawn zawnga chair inhûng chu a melh zoh a, tîm angreng deuh chuan ka țhu a, kan inhnaih ém avàng chuan ka en țha ngam lo va.

A thil ziah chu ziak zovin dawhkàn sîrah chuan a dah phei a, min rawn enin," Tûnlai kan inkâr hi eng nge a awmzia? Kan infawh vàng mai khân kan inremsiamna kha a tàwp miah lo a nia," a ti ta nghut a.

A thil sawiin min tihzah ém avàng chuan ka hmai chu a sa hat hat phawt a, ka rin loh daih a rawn sawi chhuak bawk si a, chhàn ngaihna pawh ka hre lo.

"Inngaihzàwn lem pawhin infawh châng pawh a awm ve thei tho ang chu, a tak a ang leh zual dáwn asin. Ka nu bulah phei chuan han kuah thuak thuak che emaw taksa inhnaih deuh hlek emaw a awm a la ngai fo ang."

"Kan inremsiamna kha titàwp tawh ang."

"Rinpui, ka tân he thil hi ti ka ni lo, ka nu tân a ni. Nang pawhin ka nu tân liau liau, titàwp lo hrâm rawh. Mi fel tak i ni tih ka hria, chuti maia ka nu rilru hrehawm taka dah hi i duh ka ring thei lo."

A dik a ni. A nu kha ka ngaina, a nèlawm a, a fel bawk, duhsak pawh min duhsak viau kha. Ka rilru tak chuan bànsan ka duh; mahse, a nu rilru nattîr erawh ka duh hauh lo.

"Nang ka thlan chat chhan che pawh i fel a, ka nu duhzãwng tak i ni tih ka hriat vàng a ni. Ka nu chuan a ngainain a duh ta ém ém bawk che a, a hmangaih tel bawk che tih ka hria. Naktûkah a rawn phei leh dáwn a, khawngaihin, kan inremsiamna kha ka nu vàng tal pawhin titàwp suh. I remtihna tel lo chuan ka fâwp tawh miah lo ang che, ka tiam a che."

A va zahthlâk tak! Mahse, a sawi hi a țha ka ti bawk si.

"Mahse, inngaizâwng ang tak taka kan lan a ngai si a, han fawh zoh che chu a pawi viau dáwn em ni?"

"Hmuiah maw?"

"Aw, hmuiah kher ni lovin a dangah pawh a niang chu."

"Hmuiah chuan ni lovin hmun dangah min fâwp thei ang, hmui kher kher hi chu ka bialpa tak tak tân chauh ka duh a ni." Ka kutphah thlan dep dep chu ka nuai ka nuai a, a hit vek tawh. Tuna kan thil sawi hi, a bîk takin ka sawiho hi mi bulah ka sawi ang tih ka ngaihtuah pha ngai lo; mahse, hei ka sawi ve ta mai chu a nih hi. Ka nu leh Sangpuia'n hre ta se...

Min en vang vang reng a, a thil ngaihtuah erawh ka hre thei lo hul hual.

"Aw le, i remtihna tel lo chuan i hmuiah chuan ka fâwp tawh lo ang. Chuan, tunah chuan kan inkâr a pângngai leh tawh tiraw?"

Ka bu nghat ringawt.

"Infawh hi a hlauhawm hlei nem. Inngaizawngte kâra thil thleng țhìn a nia, i ngai serious lutuk a nih kha. Induh tawnna leh inhmangaih tawnna chu infawh hian lantír a ni thìn, sex phei chu a hlat lutuk ringawt."

A thil sawi chu ani chuan awlsam takin a sawi thei mai a, a tân chuan 'inchibai' ang lek a ni ta ve ang; ka tân erawh zawng lo ngaihthlâk pawh chu thil nuam tak a ni miah lo, nuam lo ka ti ru vang vang.

"E, chuan, i bul hnaia ka awmin lo țang țûng tawh lo la, hahdam takin lo awm țhìn tawh rawh, thil pawi a thleng dáwn hauh lo. Kut invawnsak, sama fawh, dàra kuah leh kâwnga kuah tih vêl pawh kan practice tam deuh chu a ngai ang. Ka nu hian min ringhlel lek lek țhìn a nia, kan inthlahlel tâwk lovah a ngai mai ang."

"I nu leh Sangpuia vàng chauha he thil hi ti ka ni tih i hria tiraw?" ka ti ve hrâm a, amah ka duh vànga he thil hi titàwp lo anga min ngaih ka duh lo.

"I nau i hmangaihzia ka hria, i tițha ka ti hle che asin. U chhuanawm tak leh fanu fel tak i ni. Chuan, he i thil tih hi ka nu leh i nau tân liau liau i ti tih ka hria e. Tumahin an hre hauh lo ang. Țanpui i ngaih hunah min hrilh hreh hauh suh, ka tlânchhe miah lo ang."

A ţha alawm. Ni e, ka theih chin chin chu ka ti leh ang, ka pawisa pûk hlutzia kha, Sangpuia nunna atân a hlutzia tehkhin chuan tuna ka thil tih mai mai hi chu engmah a ni lo ve. Hetiang rilru hi ka put a ngai, Sangpuia hi ka ngaihtuah chhuak ziah tùr a ni. A țanpui erawh zawng ka ngai kherin ka ring chiah lo, ngai pawh ni ila, ka pùr lo tawp ang.

"A țha alawm, sir."

Țhen sak chung hian," Kan pahnih chauha kan awm chuan ka hmingin min ko rawh," a ti sup a.

"Mahse, school campus a la ni tlat."

Office ațanga ka chhuah dáwn chuan," Thlah i duh em? Ka lo thlah dáwn che em ni?" tiin min zâwt a.

Thlah maw? Ka bialpa tak tak chu ni se ka duh nasa; mahse, lemchang chauh kan ni si a, ka phût ngam teuh lo.

"A ngai lo ve, ka lâwm e, sir."

A ngei leh teh ang chu, ka'n tilui leh deuh ngat a ni.

*******

Zirtàwp chawhnuah advanced- christmas kan hmang a, a nuam ve reuh lutuk. Inrinnia haw tum ka ni a; mahse, Liansanga nu chuan a phal tlat lo. Inrinniah bazar dun a sawi a, bâkah, 'Kan inhmu lo rei dáwn sia, zan khat tal ka bulah riak rawh' a ti mauh mai si. Hnial ka duh viau laiin Liansanga ngei pawh chuan," A tihchi viau ang chu," a lo ti ve sup a, ka rilru a tibuai zo vek.

Liansanga nu hian puan mawi zet leh pheikhawk sâng, changkâng zet min rawn hawn a. Lâksak loh ka duh dáwn dáwn a, a lung ka tiawi loh ka hlau si.

"Ka nu, thil min leisak ziah a, nuam ka ti miah lo a nia. Chapo thil ni lo se, hlawh tlêm tê ka nei ve a, ka mamawh chu ka lei ve thei tho a nia," ka ti ringawt a.

"Mai mai a, nang bâk leisak tùr ka nei hlei nem. I thawh chhuah chu a hlu khawp mai, chhûngkaw mamawh i thawk chhuak a, i fel reuh ka ti a nia. Nang anga fel ka fapain a han hmu chat che hi ka lâwm khawp mai."

"Bawiha hian thil a leisak tawh che em? Kha maw, hre thiam hrâm rawh aw, ka fapa hian a bialnu ngei pawh a tilâwm thiam lo a nia. Bawiha, hmeichhe làwmna siam hi a har lo asin maw le," tiin a chek tlak tlak a.

"Nu, min tizak a nia!"

"I zei ve riau emaw ka tia! Bialnu i nei a, eng emaw leisak zeuh zeuh hi chu i tih tùr a ni alawm. Pawisa nei lo i ni lo va, làwmna hi thil ho tê têa ngaih, inpêk emaw intihsak emaw hian a lo awm thei țhìn ngai e," a ti leh dap dap a.

"Mahse, ka nu, kan induh tawn tho a, chutiang tih kher a ngai chuang hlei nem, a ngai lo kan ti ve ve a," ka lo ti ve a, Liansanga chu ka lo chhan ve deuh a ni.

"Ni lo ve, Tete, i la dai tlêm hle a ni, a ngai asin, a ngai lutuk zâwk. Kan induh tawnna leh kan inhmangaihnate hi inngaihsakna leh induhsaknain kan tilang ve țhìn tùr a ni. Thil to ber ber leh țha ber ber pawh a ngai lo, kan inngaipawimawh a ni tih lantîr nân thil ho tê, tlâwm tê pawh a tâwk ém ém a ni," a ti leh dap dap a.

A ni ve lah tak a, khatiang lam kha kan lo la sawi dùn miah lo mai a. A nuin min han zawh thut khân sawi tùr ka haihchham ta tlat a, ka hmel ațangin a lo man thiam vat bawk si.

"Inrinniah kan bazâr ang a, zànah i lo riak nghal bawk ang a. Pathianniah inkhâwm i duh chuan Bawiha'n a dah phei mai dáwn che nia, a țha tiraw?"

Hnial ngaihna pawh ka hre lo. Zanin erawh Angaihite an lo lêng dáwn a, ka chhuak bo thei lo. Ka haw hma ngeia khawlai chei fan kual kan tum ve a, chhuanlam siam chu a fuh bîk lo ang.

Zanriah ei kham veleh min thlah haw a, kawnga kan tlàn lai chuan," Tute nèn nge hun in hman dáwn a?" pangngai tak hian min zâwt a, Cindy nèn an inhmu țhìn tih chu hre lo ila chuan lungawi lo, thîkna tel zawhnaah ka ngai ngei ang.

"Ka țhiante, Angaihite nèn a nia."

"Hmeichheho chauh maw?"

"Ni bîk lo ang, mi dang an rawn hruai maithei a, ka hre bîk chiah lo."

"In chhûngah maw hun in hman ang?"

"Aw." Khawlai chei kan fan tùr thu kha chu hrilh kher a ngaih ka hre lo, a tih tùr leh eng nge a tih engmah ka zâwt ngai bîk lo. A thil tih tùr min hrilh lo va, keiin ka hrilh bîkna tùr ka hre lo ve.

"Fîmkhur ula, hmeichhia phei chu hmingchhiat a awl si."

Ve ngei chuan. Inhmeh lo lutuk.

Ka in zâwn kan thlen chuan a ding ta a, chhuk tuma ka chêt lai chuan," Ngawi lawk aw," tiin a hnung seat lama a thil dah chu a ban a, puan lum thip thep, deh nuam zet mai hi ka nghâwngah chuan min bahtîr a.

"Ka nu thil sawi vàng kha a ni hran lo a nia, kei aia i mamawh zâwk nia ka hriat vàng a nih kha," a ti sup a. Chutah, rawn kûn hnaiin ka chalah a rawn fâwp leh a, chêt nachâng ka hre lo, a thil tih dàn chu ka lo en liam tawp, a tih ang angin ka awm tawp.

"Practice tam kan ngai ka tih tawh kha. Ka nu hmuh laia ka tih a, i khawng awt zêl hian a ti ang lo tlat zêl, kan practice tam loh vàng a ni."

"Chuan, lài viau zêl suh."

"A har ve alawm."

A nui hak a," Kan practice tam loh vàng mai mai alawm, i thei tih ka hria, chu chu i lo hre reng dáwn nia," a ti leh sup a.

"Ka chhuk tawh dáwn, i lo lût ve dáwn em?"

"I thiantehovin min hmuh dun i duh chiah ka ring lo."

Dik chiah, ka duh lo.

*******

Ina hun rei vak lo kan hman hnuah khawlai chei fang tùr chuan kan chhuak ta țhâm țhâm a, kan vaiin 6 kan ni. Liansanga scarf lum thip thep min pêk kha ka awrh a, he thil tê reuh hi ka ngaina hle dáwn tih ka hre mai.

Zara'n a bialnu a phur a, keu chu Angaihi'n min phur a, Angaihi bialpa leh a țhianpa an inphur thung. An tih dàn takah chuan Angaihi bialpa thianpa hian min phur tùr a nia; mahse, ka duh tlat lo va.

Lunglàwnah tlân chhovin, chanmari, Rahsiveng, Venglai, Bazar, Zohnuai, Serkawn leh Pûkpuiah kan tlân kual a, thla kan la chuai chuai bawk a. Khawi lai maiah pawh chuan mi an lo awm ve lat lat zêl a, a nuam reuh khawp. Angaihi a phûr nasaah a țang pek a, kan va nuih nasa tak!

Ka mut meuh chuan dâr 11 a ni thuak tawh, kan thlalâkho chu ka thlîr mai mai a, whatsapp message tone a lo ri a.

*Zanin kha chu nuam in tih hmel khawp mai.*

He pa hi, min lo hmu reng em ni?!! Kan bengchheng ropui sia, a va zahthlâk tak! Chhàn pawh ka chhâng lêt lo.

Message dang. Hei chu Rinawmlova hnên ațangin a ni tlat!

*Break neih hi awmzia a awm lo, ka awm dàn hre vek mah la, ka rilru chhûngril i hre lo. Ka lungawina ber chu nangmah hi i lo ni.*

He pa zah lohzia hi!! Engtin nge hetiang message pawh hi min lo la thawn ngam zâwk ni? Zak lo lutuk. A number hi lo delete ila țha zâwk tùr.

A dang pawh a rawn send leh zat a, en pawh ka en duh tawh lo. Hetia a tih kual mai mai tùr hi ka ni bîk lo, a duh huna a kawp, a duh loh huna a kalsan leh mai mai tùr ka ni hek lo. Chapona ka nei ve tho, ka lo pawm tawh bîk lo tawp ang.

Chawhma dâr 10-ah min rawn lam a, a nu chuan car-a ka luh veleh chuan," Min lo nghâk rei em?" a lo ti nghal a.

"Rei lo ve, ka lo hman ve chiah a ni."

"I nu tân eng nge kan lei ang?"

"Ka leisak vek tawh alawm, a ngai lo ve," ka ti a, dâwt ka sawi lo. Vawiina haw ka tum lâwk vàng khân a hmain ka lo lei lâwk a, ka nu pawhin puan pheikhawk a lei tawh bawk.

"Keima'n leisak ve ka duh alawm."

Bazârah pawh mi an lo tam ve tawh khawp mai a, kal pawh a nuam vak tawh bîk lo. Lei tùr ka hre miah lo, han awh ém ém ka nei bawk si lo.

Liansanga pawhin kan hnungah min zui ve ruk ruk a, a nuihzatthlâk phian. A sâng si a, mi dang zîngah pawh chuan a hriat hran nalh theih.

Ka nu tân kawrlum a leisak a, ka tân leh Liansanga tân couple jumper min leisak lui tlat. Ka hnial nasa a; mahse, a tilui tlat. Liansanga lahin a lo hnial ve mang si lo, 'ka duh lo' tia han hnial luih vak lah a zahthlâk bawk si.

Kan vâk nasa ve bawk a, a ril a țâm a niang, restaurant-a chawlh a rawt a. Kan bazar zo thawkhat tawh bawk a, Classic-ah chàwl tùrin kan chhuak chho ta a.

Mi pawh an lo chàwl ve nual mai, a âwl laiah kan țhu ve a. Liansanga chu min si chêt hian a rawn țhu hnai a, a nu hmuh lai hi chuan min va duh hmèl țhìn tak ém!

Ei tùr order tùr chu Liansanga chuan a ziak a, dawhkàn chunga ka kut dah chu a kut pakhat chuan a rawn bawhthuah nghal zat a. Ka phu zawk duh tawh bîk lo, ka hre lo der hmiah.

"I kut a va vawt ve!"

A vawt lah tak a, a kut lum vang vang tawh chu a nuam kher mai. A kut pahnih chuan ka kut chu a hum sauh sauh a, a hmui bulah la kãngin a fâwp zoh a.

"Ka hùm lum phâk loha i awm tùr chu ka ngaihtuah hle mai che, kutkawr ka pe ang che aw. Zànah i mu lum thei em?"

"Min ngaihtuah suh, tuilum ip ka nei țha alawm."

"In khua a vâwt tawh em?"

"Aw, vâwt tawh ang ka ring. Kan awmna chu a ruam a, nipuiah a lum lutuk a, thlasikah a vâwt leh viau țhìn bawk."

"Ka ngaihtuah hle mai che."

"Ka tuar thei lutuk!"

Ka kut chu a hûm vang vang a, chiang zeta min enin," Vûr lalnu ni àwm tak i ni," a ti sup a.

"LS..," tiin ka hawi kual a, mi chuan min en lêm lo mah se, a nu kan bulah a awm ve reng bawk sia, a hmuhah inngaizâwng anga lang tùr ni mah ila, mi dang bulah chuan a nuam lo. A nu erawh chuan min en lo der ve tlat, a zei thei a nia.

"Zakzum thei reuh lutuk!"

*SAWITU-AH ȚANG TLÊM LA, LEHKHABU CHHIAR TAM RAWH*