RUATSANGA - 20

RUATSANGA - 20  By Dingdi Pachuau

Thu tlúkna siam mai dan tur ka va hre lo tak em! Ka pu, min duhsak em em tu, a damlo ka enkawl duha mamawhtu hi ka kalsan leh ang em? A bula awm turin min duh a,a hrehawm tawrh lai hian ka kalsan thei ang em?

Ka kalsan thei lo ang.

Mahse, Rsa bulah ka chéng leh dawn tihna em ni? Ințhenna tifel tura kal lai laia han awmchilh leh daih chu, thil ni thei a ni lo. Mahse, ka va hrethiam ta si lo em!

Mi nunrawng tak leh khawngaihna tlachham ang rilru pu mi nih si loh chuan ka thil tawn hi thil khirh tak chu a ni ve chiang alawm.

"Ka pu, lungngai miah suh. Ka enkawl ang che a, i dam sawt sawt mai ang" tia ka thlah tâk kha. Ani damlo châu kha ka hnial thei ngang lo. Rsa nen kan inneiin kan chéngho leh kher dawn tihna pawh a ni lova, ka pu damlo châu takin min ngenna kha ka tihhlawhtlinsak loh  chuan mi khawngaihna nei lo ka ni mai dawn asin.

Room atanga kan chhuah hnuah chuan sitting room-ah kan țhu leh a, chutah nula pakhat zawk chuan in tur leh dessert min rawn chhawp a, chaw ei kham khan ka pu room-a kan kal nghal avangin engmah kan ei hman lo a ni.

"Ka pu hnena i sawi kha i ti tak tak em?"

"Eng ber kha?"

"I enkawl ang tih i hrilh kha"

"Dáwt ka hrilh i ring tihna em ni?"

"Min zawt lét lovin min chhâng mai la"

"I tih ziah dan alawm. Ka chhún zo tawh che a nih hi"

A nui suk a, A hmél tha leh sawt mai. Nui tam ve deuh hlek turin ka duh țhin, a chhan chu a nuih hian  mihring pângngai a ang ve tlat. A nuih loh hi chuan Greek-ho pathian lim, duhtawka an ker mawi hi a ang ka ti a, milim chuan nunna an nei si lova, nunna nei lo chu ka duh si lo.

"I thu tlúkna chu sawi tawh la"

A ngawi vang vang phawt a, chutah chiang zeta min en pahin," Ka țhen thei lo ang che" a ti ta sup a.

"Engvangin maw?"

"Ințhen ka duh loh vangin mawle"

"Engvangin nge heti hian i awm tlat a?"

"Engtin nge ka awm a?"

A ti leh ta. Thil hi zâwt ila,zawhna hian min chhâng lét leh ziah.

"Min duh lo va,min hmangaih lo tih hi pawm ve mai ta che" Ka au chhuak vak țhelh a ni,Ka insúm hrâm hrâm rih.

"Ka duh che" muang charh maiin a ti sup a, min melh rùn mai a.

"Ka taksa chiah i duh"

"I tidik lo"

"Dik e, i pawm duh lo mai mai a nih kha"

"Ka rilru i hria mi?"

"Hria.... mi pàngngai rilru pu ve teh"

A rawn tho thut a, min hnaih nghal ruak mai. Chét sawnna hun pawh a awm lo. Ka bânah nghet zetin a rawn hmer a.

"Eng maw i sawi kha?" A țawng ring lo. Mahse, a țawng sehchilh nak leh a mitmeng ațang chuan a thinrim tih ka hre thei nghal.

Ka hlâu pah deuh nen, ka bân a hmerna na bawk nen, ka khúr deuh dar dar a.

"A na ania, min thlah teh"

Ka thusawi eng ber kha nge a huat ang? Ka hre thei mai lo.

Min thlah a, bang lam hawia dingin thâwk a la hawk hawk a, a thinrimna chu tih-reh a tum niin a lang.

Ka bân chu ka chùl hauh hauh a,a duk ngei ang naktuk lamah chuan.

Kan ngawi dun reng a, a thinrim chuan ka hlau ve tho bawk si a,sawi tur ka hre lo a ni. Ka thil sawi a thinrimpui leh chuan a lak atangin zalênna ka hmu dawn si lo.

Muangchângin a rawn inher a, awki hniam chhek chhawk  hian," Ka țhen che hi ring ngai suh ang che" a ti sup a.

"Keimahin ka țhen che chuan a tâwk, i remtihna ka mamawh lo. Court-ah ka kal mai ang" Ka thinrim êm avang chuan ka insùm peih tawh lo, a samah sawn keh bawrh bawrh ania ka duh ni.

"Ka ring lo"

"I rin leh rin lohah ka buai love. Ka nun ațang hian chhuak mai teh"

"Duh lo ta ila?"

"Ka hua che"

Ka insúm theihna zawng zawng a kehchhe zo tawh. Ka thinlung natna zawng zawngte, kum tam tak ka lo up tawh chu zanin hian ka phawrhfái vek dawn.

"Ka haw lutuk che. Ka thianghlimna hial hlânin pasalah ka nei che a. Min hmangaih lét turin ka phút thei lo che tih ka hria, mahse kan nupa room-ah ngei khatiang thil tenawm a thlen kha ka ring pha ngai lo. Engtin nge khati khawpa tlâwm khan min siam theih zawk? Rilru na thei leh zak thei ka nih ve tho hi. Mahse,... keima thiam loh a ni. Lo ring miah lo tur che hi ka ni a..."

Ka mittui avângin ka thil hmuh a phé ruai a, ka aw lah a khúr nasa bawk. Khatih hunlaia ka rilru putdan zawng zawngte kha ka  chhui lét a, rilru natnain min rawn tuam thar leh a.

"Khatianga awm leh mai tur siin engvanga min nei nge i nih? Mawhphurhna la i inti maw? Kei chuan ka ti ve lo che. Min hmusit a ni. Kan rethei a, college pawh rap lo leh mi mâwl, bum nuam tak leh nu kalsan, fahrah mai ka nih vang a ni tiraw? Ka duh vang a ni bík lo asin"

Ka aw chu a zuihral tial tial. Ka țahchhuah lohna turin ka hmui chu ka kutin nghet zetin ka hup a, ka mittui erawh a tla zawih zawih thung.

Min rawn din hnaih pahin," Engtiklaimahin ka hmusit ngai lo che" a ti sup a, a aw zâidam zet chu ka hresual emaw ka ti hial mai, nichin lawka a hlauhawm tehlul nen.

"Ințhen lam kha chu sawi tawh suh, ka nupui i ni a, i ni reng bawk ang"

"Pasal rinawm lo ka duh lo"

"Thil awmzia hriat hmasak tum phawt la?"

"Eng nge thil awmzia hriat tur awm a? Ka mit-in ka hmu a, a chiang tâwk viau a ni"

Ka mittui hru tãwkin ," Ka haw tawh ang e, i thutlúkna ka hrechiang tawh bawk a" tiin ka tho vat a.

Ka bânah a rawn hmer leh chat mai.

"Ka thlah ang che, hmeichhia mahnia haw nan chuan zân a rei tawh"

Hnial eng ang mah ila min thlah dawn tih ka hre ve tlat. Chuvang chuan, a thu awihin ka zui ta a.

Car pawh a thar a lo nei tawh. Ani ang tân chuan harsa mawlh hek lo.

Kan tlânchhuah hnu thlengin kan inbe tawh rih lo. Kan rilrua thil kan ngaihtuah erawh a inhlat tehchiam lo maithei.

"Khawiah nge ka fanu a awm?"

A zawhna chu min zâwt har ka ti tawh lutuk. Mahse min han zâwt chiah chu ka phu zawk tho nia, chhân ka va huphurh tehlul em!

"Khawnge a awm?"

"Ka pâi puitling lo a ni"

"I titla maw?!!!!" A au tuar mai. Ka phu nasa lutuk a, ani pawh kawng sirah break chík țhawt khawpin a ding nghal chut mai.

Hlâu zetin ka melh phei a,ani chuan steering chu nghet zetin a húm a, a  kutchángte chu a vâr lek lek mai,a húm na thawkhat a ni tih a hriat.

"Ka chunga i thinrim vangin i titla a maw?!!"

"Ka titla lo. Thi sá-in a lo piang a ni zâwk" Sawi chhuah ka duh loh thil a ni. Mahse, a pa a ni a, hriat a phu si a ni.

Ka nunhlui, ka hun lo tawn tawh zawng zawng chu ka mitthlaah a lo lang leh ta uar uar mai. Khatih laia ka thih teuhzia kha,ka fa thi sa-in a lo piang tih ka hriat tirh lai khan thih mai pawh ka duh a nih kha. Nun réng thlakhlelhna ka nei lo kha a ni a, Ka rilru a na thar leh kher mai.

"Ka tihpalh"

Ka ngâwi reng, 'tihpalh' tih thu hian engkim siam țha leh thei se ka ti khawp mai. Mahse tunah chuan thumal pakhat ve mai a ni.

Ka chhukna turah ding tura ka tih bâk ka be tawh lo, lawmthu pawh ka hrilh lo. Ani pawh a țawng bík lo, ka harsatna leh buaina lo paltlang tawh zawng zawngte kha hre ta se, 'tihpalh' tih kha sawi pawh a sawi ngam lo ang.

Mut hmunah ka meng kar mai. Ka rilru ngaihtuahna,suangtuahna mitthlaah erawh  damdawi in khuma ka mu bém lai kha ka inhmu a. Naute hmêltha leh min chhun em em tu hmuha kuah ka beisei tehlul nen, thi sa-in a lo piang tih  min hrilh ta a. Thei leh thei lovin ka țap vawng vawng a ni. Ka theihtâwp chuan ka inenkawl uluk ve hle a, ka hlawh leh ka pu pawisa min pék váng khan ka rethei lutuk lo. Ka in-check up ngun ve hle bawk asin, mahse ka naute chu ka chân tho si. Rsa haw viau mah ila, naute erawh chu ka thisen, thla tam ka pum chhunga awm a ni a, chutah ka biak ngun ber leh ka nun tihlim bertu, fahrah vâkvái ka nih min theihnghilhtirtu a lo ni bawk nen, ka hmangaih asin. Ka neih hma deuha ka inentir hnuhnun ber pawhin a la țha reng si.

Mit thial ûrh-in zingah ka tho a, ka harh vâk lo kher mai. Vawiin chu Lily tlawh ila, rilru tâwt leh ipik pawh a zia deuh ang chu.

Ka pu ka rilruah a rawn lang leh a, enkawl ka tiam tak kha mawle. Ka tiam tawh chu ka bawhchhe thei lovang, ka pu chungah hlauh phei chuan.

Phúr lo zetin ka insiam a,ka chhuak ve tawp. Lily number ka nei si lova, pan chilh tawp mai ang.

Ka han thlen chhoh chuan an lo awm lo va, dawr, kan lenluhna thinah chuan lùtin ka zawt a, min hmu chu a phùl ve hlut a.

Lily chu school-ah a lo thawk ve tho niin. A school thawhna pawh a hla vak lo, mahse ka kalchilh duh teuh lo. Min hmuh veleh a a awmdan tur ka ngaihtuahin mi zingah hmuh ka duh lo.

Tlâi an bân hun angah ka kal leh a,a lo awm tawh e. Kawngkhâr a inkalh tawh lo. Doorbell ka hmet a, ka nghak ta vang vang a.

Kawng a rawn hawng a min hmu chiah chu a meng bial nasa mai, chutah a țé ta chùl a, min rawn kuah nawk nawk, a tha a khúr tih ka hre thei bawk, hei chu phúr lutuk vang a ni chiang. Min hmu thut, mak ti leh lawm bawk si inchawhpawlh kual vel a ni.

"Mi sualnu, ka ring thei lo hial mai. Eng nge i chanchin? Awii, ka hmu che hi a mak, ngatinge min phone duh miah loh?"Sawi tur leh min zawh tur a va ngah tak em!

A thlenna a la rei lo a nih hmel. Thawmhnaw pawh a la inthlâk lo.

"Chanchin engkim min hrilh rawh aw, biakpawhna tur che ka hre si lova, ka mangan theihzia chu aw"

A hriat duh ang zawng zawng chu ka hrilh a,dawhthei takin a lo ngaithla kar a,ka sawi lai chuan ka mittui a tla leh țhin a,ani pawh a insúm viau nain a țap lek lek tih ka hre thei tho.

Ka sawi zawh hnuah chuan min kuah vang vang a, ka hnungah min bèng thep thep a, ka țhiannu bulah hi chuan ka thla hi a muang veng veng țhin.

Khua a lo thim ruai tawh, ei rawng ka bâwlpui a,chaw ka ei ve nghal dawn. Hotel-a ka lét a phal tawh lova, ka thawmhnaw pawh nakinah kan zuk la dawn.

A nu leh pate Aizawl lamah an phei lai a lo ni a, U Sam-a lah chaw a ei chhuak daih bawk si. Kan pahnih chuan kan bengchheng dunin kan hlim dún leh khawp mai.

Rsa chungchâng kan sawi chho ta a.

"I la hmangaih reng em?"

"Ka thin a tirim"

"I la hmangaih tihna a nih chu"

"Ka thin a tihrim vang chuan ka hmangaih tihna a ni maw?!!!"

Ani lah chuan," Kan hmangaihte hi chuan kan thin an tirim fo a, mahse kan inngaidam tawn leh fo alawm. Inngaihdamna tel lo chuan inremna a awm thei hlei nem" a ti barh barh a.

"Chu, ngaidam turin min ti tihna em ni? Ințhenna tifel tura rawn kal lai laia"

"I thu alawm. Kei chuan sawi theih ka nei ve miah lo"

"Kalsan vang vang ka duh, mahse ka pu hian ka rilru a tibuai"

"E, ni dawn tak. Rsa pawhin min hrilh tak kha"

"Chu, in lo inbe țhin elo?!!"

"I chhuah țantirh vel laia min biak bâk be lo ve"

Mahse ka awih chiah lo deuh. Ka pu damloh thu pawh a hrilh chuan,....anni hi an lo inkâwm ri reng ang a..

"Nih leh, engtikin nge ka pu damloh thu chu a hrilh che a?"

"A, ka va hre ta mai lo ve, khawiah emaw kan inhmuhnaah pawh a ni maithei a ni" a ti kual ta mai mai a,min hrilh țha duh lo chiang.

"I pu chu....engtin nge ni dawn?"

"Engtin nge ni ang? Ka kalsan thei lo a ni, min duata min duhsak em emtu a ni si a, ani lo pu dang ka nei si lo"

"Chuti, i enkawl ngei a ngai a nih chu"

"Ka duh alawm, mahse a buaithlak. Rsa bula awm hi ka duh lo a ni, ka rilru a buai"

"Rsa ngaihtuah miah lovin i pu chauh ngaihtuah la"

Ka theih ka ring lo. Ka bulah ka hmuh theih renga a awm chuan keimah záwk hi ka ném leh rang dawn lutuk.

"A harsa ngawt ang chu"

"I pu i tiam tawh si chuan, i pu i ngaihtuah hmasak ber a ngai tawh a nih si chu"

"Nia, ka thutlúkna siam hi a dik ve reng tiraw? Ka tisual lo tiraw?"

"Tisual nang. I tițha lutuk. Ka theihna apiangah ka lo pui ve zel ang che, lungngai miah suh"

Lily phone chu a rawn ri ta rang rang a, a chhâng chu ngaihven lém lovin ka kalsan a, ka hmai ka phihsan ta daih a.

Ka hmai ka hrúk lai chuan," I puin  a lam a lam che a ni áwm e. Rsa a nia, 'Khawngaihin ka pu hmu turin lo kal hrâm rawh se' a ti che a" a rawn ti nghal a.

"Engtin nge a awm a tih?" Hlauhthâwnna ka nei nghal a, vawiinah tlawh âwm tak ka nih tehlul nen, keima buaina hlír ka lo ngaihsak atin a ni.

"Chutiang engmah a sawi lo. Kal rawh, ka kalpui ang che"

Kan thlen veleh chuan Rsa hnenah chuan," Engtin nge a awm ka pu chu?"ka ti nghal vat a.

"A hmu duh che a ni"

"Ka lut nghal mai dawn" tih leh ka pu room luh chu ka rual a.

Khumah chuan a lo mu diai a, a lo meng kiau a, rin ai chuan ka hmu țha phian si.

"Ka pu, ka lo kal ania"

"Ka bulah hian lo țhu teh le"

A kut chér tak chu ka hmersak vang vang a.

"Vawiinah ngatinge min hmu tura i lo kal loh?"

Chhuanlam siam tur ka hre lo va, Dawt hrilh ringawt ka duh bawk si lo.

"Ka pu, ka tihpalh a ni, min ngaidam rawh"

"Ka ngai em em che a, ka bula awm turin ka duh bawk che. A chhan chu  nang lo chu fanu ka nei si lo va"

A thusawiin min hnehzia chu a hre kher lo vang. Ka pu hian duat tak leh hmangaih taka enkawltu a mamawh a, tumah chutianga enkawltu tur chu a nei lo, a tupa lah mipa,pâ ve tâwk tak mai a ni a, kei a tupa nupui hi a tupa nupui anga min en lovin a fanu angin min en tih ka hriat hian ka rilru a tawk lo thei lo a ni.

"Ka enkawl ang che, ka pu. I bulah ka awm tawh ang" Min ngai a, ka enkawl a thlahlel tih ka hriat hian ka lawm a, ka khawngaih bawk si. Min thlahlel ve hle tih ka hriat phah bawk a, ka kalsan tawh lo vang.

"Ka lâwm e"

A kut chèr zet chuan min hmer ve vang vang a. Kei pawhin ka hmer lét ve a, a nui lui sak a.

"Khawngaihin, puan lum kha min lo bansak mai ta che, ka lo sin ang a, ka muhil tawh ang e"

Puan lum chu ka sintír a, kalsawn lo chuan ka țhu leh rih a. Ka pu hian enkawltu a mamawh hle si a, ngatinge Rsa reng reng pawh hi nurse pakhat tal emaw a rawihsak  loh reng reng ni? Putar, damlo, mahni pawha chét harsat em em hi a ngaihthah deuh chu a ni.

A muhíl tih ka chian hnuah a room chu ka chhuahsan  ve chiah a, sitting room-ah Rsa leh Lily chu lo țhuin an lo titi a,ka chhuak chu min lo en nghal vatin Lily chuan," A muhil ta em ni?"a lo ti vat a.

"Aw"tiin ka chhang a, chutah Rsa lam enin," I pu enkawl tur hian nurse pakhat tal i rawih ka lo ring a" ka ti nghal tâwng a.

"Ka ruai țhin alawm. Amahin a hnial zel a"

"Pakhat tal, vil reng turin a awm a ngài asin"

"I lo lét leh a ring tlat a, midang ruai țhin mah ila tumah a tír duh ngai lo. Ka mi rawihte an inthlahrung záwk țhin a"

"Chutiang ringawt a ni thei lo. Ka enkawl pawhin kei chuan nurse pakhat ka bula min awmpui reng tur ka duh, eng emaw pawh lo thleng thut se, engmah thiam ka nei dawn si lo"

"Naktuk atangin rawih leh nghal a ni ang"

Lily chuan meng sawr sawr chung hian,"Zanin ațangin hetah riak nghal mai la"a lo ti a.

Ni lo, zanin chu.. ka inring lo.

"Thawmhnaw inthlâkna ka keng hleinem"

Rsa chuan," I thawmhnaw bâkah a dang pawh a awm țeuh" a lo ti ve thuai a.

"Hmeichhe dang thawmhnaw ka ha duh lo"

"I thawmhnaw ni lo he inah hian hmeichhe dang thawmhnaw a awm lo"

"A va ropui ve!"

"I pu riahpui a ngaih kha, ka hawsan mai ang che aw. Zanlaiahte lo harhin inthiarte duh ta se, i awm loh chuan a lam âwm si che a, riak mai rawh aw"

He nu lah hi...tinge Rsa lamah a țang ta mai em ni? Ka la zâwtin ka la hre khawp ang.

A tho thuai a, kei lah ka awmdan ka lâi kual tawh a, riah mai loh chuan ka pu hi enkawl ka lo tiam ve tawh si a.

Veranda thleng kan chhuakho a, chutah, Lily chuan," Lut tawh ru, ka kal nghal a ni mai. Ka pu kha a lo harh palh ang e" a ti a, rang deuhin a scooty hùnna lam chu a pan ta dâwr dâwr a. Inmangțhana hun pawh a awm lo.

A tlânchhuah hnuah chuan kan inmelh tawn ve ve a. Ka lâi tlat, khawiah nge ka mut ang le? Sitting room-ah a ni mai.

"Lut ila?"

Ka lut hmasa zawk. Chhuanlam tur ka va duh tak. He pa bulah hian a fál chuan awm ka duh lo. Fridge lam panin ka kal nghal a,ani pawhin min rawn zui zel a.

Inher thutin," Min zui suh"ka ti a, a ding chawt mai.

"Tui in ka tum a"

Kan tum a inang chiah mai.

Fridge chu hawngin tui bottle ka la a, ka pe nghal a.

"Ka lawm e"

Polite thar hle mai. A lâi ve a ni hial lo maw?

"Khawiah nge ka mut dawn?"

"Khawiah nge i mut duh?"

Zawhna hmang bawkin maw?

"Sitting room-ah"

Inchunga ka mut chuan  ka pu thâwm ka hre thei lo palh ang. Chubâkah Rsa bul hnaihah ka mu duh lo.

"I duh a thu le"

Sin tur room ami a han la a, lukham nen. Min rawn dahsak thlap a.

"Mut hmaa titi i duh em?"

"Eng nge sawi tur awm?"

"Tam tak a awm ang chu"

"Sawi tur ka nei  tawh lo"

"Keiin ka nei alawm"

"Insawithiamna ka ngaithla peih lo"

A thaw hak a. Min en reng pah chuan," Insawithiam ka tum lo, thudik a ni sawi ka tum"a ti sup a.

"Thudik chu ka hre ve bawk"

"Min ngaithla la"

"Dâwt ka ngaithla peih lo" Ka luhlul ve tho. A hmaa mi ang kha ka ni tawh lo, a duh duhin dâwt min hrilh tawh lovang.

"Mut tui le" A tho vut a, min melh leh vang vang hnuah chuan room lamah a chho ta a.

He pa mai mai hi...a pu a damlo a, a room-ah pawh riahpui ve mai âwm. Eng emaw pawh tâwk thut se, emaw zanlaiah buai thut se,inchung lam atangin thâwm a hre thei âwm der si lo. A pu hi a hmangaih tak tak lo tawp a nih hi. Mahni chauh a inhmangaih a nih hi.

Thil ka ngaihtuah kual nasa lutuk a,Ka muhil thei lo tawp mai. Ka let ka let a, ka pu room-ah ka va lut thul, mahse a mu tui khawpin ka hria. A puansinte ka va siamsak leh țhin a, ka muhil  thei dawn ngang lo va ka hriat hnuah thoin Tv ka on a, Tv en chuan muthmun ka rem ta zawk a.

Ka muthilh lai ka hre miah lo, ka țhangharh chuan Tv chu a lo in-off tawh a, ka puan pawh țha takin ka lo sin bawk. Rsa a rawn chhuk tihna em ni ang? Ani pawh a muhil thei lo tihna em ni ang?

Tui ka va in leh a, ka pu room-ah kalin ka va check leh a, ka pu khum bula sofa-a mu ka hmuh chuan ka țé chhuak țép a ni.

Ka en chiang a, Rsa a ni tih ka hriat chuan ka thaw huai huai mai. Ka lo ring dik lo hret chu a nih âwm hi.

Ka chhuah hnu chuan ka ngaihtuah kual leh a, ka chhuahsan hnua damlo chho țan a nih chuan  a enkawl rei tawh khawp alawm. A theihtâwp chhuahin nurse, amah enkawltu tur a rawihsak ve a, mahse ka pu chuan a lo duh lém lo a ni âwm a. Rsa tân pawh a khirhin a manganthlâk ngawt ang chu. Ani lah nitin chhuah a ngai ve bawk dawn si.