RUATSANGA - 49 (LAST)

RUATSANGA - 49 By Dingdi Pachuau

(Khawchhia, thli tleh hian net signal a lén bo a ni ang, thupha ka chawi e, edit loh aw)

Bawihtei chu a khua a har thei takzet mai, chuvang chuan kei pawhin a hma aia nasain ka ngaihsak a. Kawm tur a neih tawh loh miau avangin Junior nen pawh chuan kan infiampui nasa a, a pa pawhin a ngaihsak lehzual, a hunáwl neih chhun pawh a fanu bulah chuan a hmang nasa reng a ni.

Âmpuii nen chuan kan inbe reng a, tluang taka thleng chhoin a lung lèn thu a rawn sawi kùr dup a, a ngaihawm hnùp hnùp viau a ni. Bawihtei nen pawh an inphone áwl lo va, Bawihtei lah chuan 'lo haw thuai thuai rawh, ka ngai tawh che' a ti ve ziah bawk.

Ni khat chu Bawihteite sikul an cháwl a, inah kan nufa leh ka pu nen kan awm a, ka bualfai ve ve tawh a, Junior chu tihmut ka duh viau nain a intitlangval ve tawh a, puak a duh tawh bìk lo.

Chhunah ei tur keimahin ka siam a, Bawihtei hian min chhùn a, pasta a duh em em a, chuvangin pasta 'cial' deuhin ka siam a.

Kan ei țan deuh chauh tihah chuan kawngkaah Rsa chu parcel lian deuh pawm chungin a rawn lut hlawl mai a, Junior chuan a lo hmu hmasa ber a,'Âaapa' a țawng thiam ve chhun chuan a rák nawk nawk a, Bawihtei chuan lo ko vatin," Âpa, i lo haw tawh ami? Kan inbualfai tawh a, lunch kan ei mek, lo ei ve rawh" a lo ti vat a.

"Ka ei ve tur a awm ami?"

"Aw, a tam mai. Engtizia nge ni ta? Tun ang hunah i lo haw ngai si lo?"ka lo ti a, plate la turin ka tho chhuak nghal a.

"Nia, thil ka lo háwn a, Bawihtei tán"

Plate ka la a dawhkan an kìlna ka va thlen chuan Bawihtei chuan parcel chu a lo hawng dawn mèk a. Eng tak chu ni ang maw ti rilru chungin Rsa pasta ei tur chu ka suahsak a.

Bawihtei hlim lutuk țe ri-ah chuan ka en vat a, parcel ațang chuan ui tè, vár thianghlim zet mai hi a pawmchhuak a, ui tè lah chuan a mei chu a vai vat vat a.

"Ânu, âpa thil lo hawn hi, ui tè vár, ka duh lutuk, âpa, ka lawm e" țawng pawh a țawng țha hlei thei lo, a hlim lutuk chu a zuang tawr tawr pah bawk a.

"Aw, a va duhawm tak em!!! A hmingah eng nge i phuah ang?"

"Moana a nih hi"

"Bawihte, a pá a nih kha"

"A pawi lo, Moana mipa a ni ve mai"

Rsa chuan a tifuh ka ti khawp mai. Bawihtei chuan a duh takzet si a, in chhungah an inzui kual reng a, ui tè lah chuan a nél bawk si, zánah mutpui a tum ziah a, a țantìrah chuan ka phal lo, mahse a room pangngai, Saron room kha, khatah khan amaha riah min dìl ta daih mai. Kan bula a mut chuan Moana a mutpui thei dawn lo va, Rsa chuan a duh anga awmtìr turin min ti a, room hrana a mut pawh a hun ve tawh tih min hrilh bawk a. Rem ka ti lutuk lo nain han riak hran ve reng reng se ka ti a, Saron room-ah chuan Moana nen chuan an insawn lùt ta a.

Junior pawhin ui tè chu a duh khawp mai. In chhunga chéng tur a nih avangin nitin deuhthaw kan bualfai a, a rim a thâng ang tih ka hlau țhin. Vaccine lák sa a ni a, ka faten an ngainat em avangin ka ulukpui a ngai a ni.

Bawihtei tán chuan a țha takzet mai. A ní a ngaih pawh a sawi lang ngai ta mang lo, sikul a kal hma zawng Moana chu chhaihin 'thil ka zirtir' a ti a, a sikul bán veleh, ina a lo luh veleh ''Moanaaa...?"a ti chùl a,a ko nghal vat țhin.

Tlaiah tualah exer a lákpui țhin a,mahse ruah a sùr erawh chuan a pa Gym room-ah an awm ţhin, mihring biakin a be vek a, a be bawrh bawrh a, engkim a zirtir vek bawk.

Zantin a muthilh hnuah a pa hian a room chu a va check ziah a, a nì awm loh hnu hian Bawihtei hi a  felin a puitling sawtin ka hria. A thiam ang angin a puansin a thlep vek a, a thawmhnaw pawh a dah nuaih ngai lo, naupang fel tak chu a ni chiang e.

Zan khat chu Rsa chuan min rawn hùi a, Junior a mut tawh avang chuan tháwm dìm deuh chuan khum ațangin ka tho chhuak a, Bawihtei room lam chu ka pan phei țham țham a, khuma Moana nen an lo mut dan ka hmuh chuan ka nuih a za kher mai.

Bawihtei chuan a ban chu Moana kham theih tur chuan a pharchhuak ve ngei a, Moana mangchhiatzia chuh....A mu dawrh nasa lutuk a,a nuihzatthlak takzet. Bawihtei chuan puan a sin thlap a, Moana erawh chu Bawihtei nghénga mu siin a bawp pali chu a kák thei ang berin a dah a, an la mutui dun em em zui.

Rsa chuan camera a la a, thla chu a láksak char char a, an duhawm dun lutuk chu an lawmawm tawp.

Room-a kan lét hnu chuan," Ui i rawn hawnsak hi chu a țha ngawt mai, a puitlin phah sawtin ka hria"ka ti a.

"A lunglèn hnem nan ka ti ber a, hetiang khawp hian a duh ang tih hi ka hre lo zawk"

"A duat em asin, Moana lah hi a lo fel bawk a"

"Hun remchang neih apianga training tir a țha, nang pawhin i ti thei ve tho ania"

"Junior enkawl pah chuan a har"

"Har chuang nang, engtin vaka train nge i tum reng reng a?"

"Ka hre chuang nang"

"Bawihtei hian a zirtir ve nasa tho a, mahse keimahin ka la pui ve ang e. Țawng hi chu a hre viau tho chuan ka hria"

"Hria e, Bawihtei țawng hi a hre lehzualin ka hria"

          *****************

Ni khat chu Ãmpuii'n min rawn phone a, a rawn țap țuau mai.

"Âpain Delhi-ah ânuteite bula min awmtir a tum a, ka duh lo va"

"Engtikah maw?"

"Kárleh lamah. U D, ka mang a ang e, engtin nge ka tih ang? Ka tlánbo daih mai dawn"

"Karleh lam a la nih tho chu. Ka pu ka lo hrilh dawn em ni ang? Țanpui dan che a hre mial maithei a?"

"Ka hre lo le, âpa chu a thinrim lutuk, U Mâma khan palai a lo tìr leh a. A hma pawh khan min chah chhoh chhan chu hmundanga min awmtir a tum vang tho ania. U Máma'n palai a lo tìr nawn leh bawk sia, chu chuan a tum tawh sa chu a tum nghehtir leh a"

"A nih tak chu. Tihtheih ka va nei lo tehlul em!"

"Tuna ka phone rawn hman pawh hi anu tá,a rùka ka rawn hman a nih hi, ka phone min laksak daih a"

Ka va khawngaih reuh tak. A rilru a hrehawm dawn tehlul nen, a phone an laksak zui ania.

Rsa bulah  chuan ka sawi a,ani lah chuan engmah a sawi lo, a rindan sa pawh a ni maithei a ni.

"Ka khawngaih e, tihtheih nei ila ka ti ngawt mai"

"Tihtheih i nei miah lo"

"Nei ila ka ti reng alawm le, ka pu hian a pa hi kaltir lo turin han ngèn ta se?"

"Honey, ni lo ve. Han hrilh ta chiah se, a zualkái ang a, Âmpuii chungah a țuan mai ang"

"I hrechiang hle mai tiraw?"

"Aw"

Hriatchian zel ka chák. A thuruk zèp reng, tam tak min la hrilh loh hi zawhchhuah ka duh.

"In inkár thilthleng hi hriatchian ka chák ngawt mai"

"Hriatreng tlák a awm lo"

"Mahse, i theihnghilh thei si lo a ni tiraw? "

A ngawi vang vang a, chutah," Theihnghilh theih nan hian tuna ka sum neih zawng zawng pawh hi ngai se, ka thleng duh hial ang"a ti sup a.

"Theihnghilh theihtìr che ka va duh tehlul em!!! Thil țha lo hi chu hriatreng tlák a ni si lo va, thinlunga kan pái reng chuan tùr hlauhawm tak nen danglamna a awm hauh si lo"

A rapthlak ka ti. Ka pa kha ka haw ţhin hle a, mahse tun hnuah hi chuan huatna ka nei tawh lo, huatnain ka thinlungah hmun a chang tawh lo. A chhan chu ka  hmangaih em emte, ka pasal leh fate ka nei tawh a,huatna neih hi ka tán a țul tawh lo, ka thinlung ei chhiattir ka duh tawh lo a ni.

"Min hringtu nu leh pate duh loh leh thiltih sual rah ka ni"

Makti zetin ka en  a, ka hresual emaw ka ti hial.

"Engtin nge ? Ni lo, i ni lo. I ni thei lo..."

"Ka ni miau si a.  An sawi ka hria alawm"

Engtin nge chutiang thil chu a hriat laiin an sawi theih? Mihring pangngaiin engtin nge an fate bulah an sawi ngam zawk le? An inháu thinrim laiin an sawi a hre tal a ni ngei ang.

"Chutiang chu i ni ngai lovang"

"Min hringtute tan chuan ka ni tlat si a ni, an duh loh, an thiltih sual váng liau liaua  lo awm ve, hlutna reng reng nei lo mihring ka ni"

Nghet takin ka kuah a, hetiang rilru hi a lo pu reng țhin a nih chuan a va rápthlak tehlul em! Ka pasal hian a nu leh pa thil tihsual rah nia a inhriat tlat chuan chu aia rapthlak chu a awm thei dawn em ni ang?

"Ka tán chuan i ni lo, khawvela pasal țha ber leh kan fate tána pa țha ber i ni"

"Chuan, ka pu tán pawh tupa țha ber, innghahna tlák i ni.  Ka tán phei chuan i hlu em em asin, ka engkim i ni a, ka innghahna i ni bawk"

Nghet takin min kuah lèt ve a, a rilru lo nat țhin turzia leh hrehawm a tihdan tur ka ngaihtuah a, hlutna reng reng nei lo mihring anga a inngái tlat maite chu tihbosak vek ka duh, a rilru hliam nasa lutuk, amah hringtu nu leh pate'n a rilrua dik lo an tuh tlat hi sáwițhiahsak vek ka duh bawk.

"I tána hlutna tlèm nei ve nia ka inhriatna aváng leh min hmangaih nia Lily min hrilh avang chauha la nunga kalchho ve bek bek zel ka ni asin"

A aw chu ka hre thei chang chang.

"Honey, engkim min hrilh hrám ta che, i sawichhuah chuan i rilru pawh a tháwlin engkim ka tuarpui thei ang che a, i ritphurh a záng sawtin ka ring" min koh dan chiahin ka ko ve, ka tìm deuh hlek nain ka duatzia hre ve se ka duh.

A ngáwi vang vang a, kei pawhin rilru dang ka lo pu leh hman. Ka nawr mah mah a ni ang, țùl a tih hunah chuan min hrilh ve mai ang a, ka hriat kher țùl a ti lo pawh a ni thei a.

Rei deuh hnuah chuan," Unau pianpui leh țhian ka neih loh avángin ka khua a har hlè țhin a, chuvang chuan min hringtu nu leh pate hi ka ngái a, an bula awm ka thlahlel ngawih ngawih țhin. Mahse anni lakah chuan engmah ka ni lo. Hmangaihna ațanga piangchhuak ka ni lova, duh loh ațanga chhuak ka ni. Hlutna pakhatmah ka nei hek lo"a ti dap dap a.

Rilru hrehawm zetin ka lo ngaithla a, a țawngka chhuak, kha zet ațang chuan a nu leh pa a huatzia chu a hriat theih chiang hle.

"Naupang té ka nih avangin engmah ka la hrethiam lo. An bulah ka mu ngai lo hrim hrim a, ka hriat theih tirh ațangin ka pi leh pu bulah ka mu țhin. Room hran chu ka nei ve tho nain, ka piin keimaha ka riah a phal ngai lo. Tun hnua ka ngaihtuah hian room hrana riah a phal lo kha ka nu leh pate inháu thawm ka hriat a duh loh vang a nih ka ring ta, an room leh ka room chu a inhnaih hle si a"

"Zan khat chu ka room-ah chuan lehkhabu chhiarin ka mu mai mai a, ka muhìl țèp tihah chuan ka nu leh pa inháu thawm ka hre ta a. A tìrah chuan mak ka ti lutuk, an inhau ka la hre ngai miah si lova, khùr zawih zawihin ka khum bula dawhkan hnuaiah chuan ka biru a"

"Ka nu chuan in a nin tawh thu leh ințhen a duh thu a sawi a, ka pa chuan engtiklai pawha a chhuah theih thu a hrilh a, a chhuak a nih erawh chuan kei min hruai tel ngei turin a ti a, ka nu ve thung chuan 'ka hmangaih miah loh fa,ka tána hlutna reng reng nei lo leh ka duhthu renga ka neih pawh ni lo hi ka hruai lovang' a ti tlat a"

"Ka pa chuan' titla rawh ka tih mawlh mawlh pawhin min hrèn nan i pawm lui a nih kha, hetiang fa lubáwk ka mamawh lo, in pahnihin thlâwk bo rawh u' a ti a nih chu"

A taksa inkengkhawng tlat chu nghet zetin ka kuah ran a,a kut nghet zeta a hùm tlat chu ka hrereng, ka kuahna chu zawimuanga thlahin a kut chu ka laksak a,nghet takin ka chelhsak ta thung, naupang tè a nih laia a thu hriat chu a rapthlak em a ni. Engmah la hrethiam kìlh kélh lo mahse engemaw chen chu a hrethiam ngei dawn, a puitling telh telh ang a, a hrethiam telh telh ang tih chu a hriatsa vek bawk.

"Ka pu leh ka pi hi ka tan chuan ka nu leh pa dik tak an ni. Hmangaih takin min enkawl chho a, ka tleirawl tirh phei chuan enkawl ka harsa hle tih ka hria. Mahse mihring ni ve si, hlutna leh nu leh pa hringtute duh loh nih chu rapthlak tak a ni. Mi zinga awm kan inkiltawih a,nu leh pa berin min duh loh chuan tuin nge min duhin min hmangaih tehlul ang? Țhian ka nei lo va, kawm pawh ka káwm khát, maltlat nuam ka ti a, mi zinga inkiltawih tlatna kha mahnia awm chuan a awm lo a, a zia țhin"

"Nitin ka nu leh pa inháu ri chu la bengah a chám reng a, kan in hi nuam ka ti thei ngai lo, ka thlakhlelh em emte chuan ka thinlung chu an tina ngawih ngawih a, khami zan ațang khan ka thinlung ațang hian ka paihchhuak ve ve a, tun thleng hian ka thinlunga hmun an neih ve chhun chu huatna a ni"

"Ka nu chhuah hnuah ka pa chuan zu a in tam lehzual a, a thinrimin min sawisa țhin. A duh loh ka ni sa bawk nen, ka pi leh pu hriat loh hian min tihrehawm thei ania, naupang tè, a rila rah ngei khati khawpa min tina duh a nih ngai chuan Âmpuii chungah pawh hian tharum a thawh duh ngeiin ka ring"

"Engtin nge khatiang em ema a ráwnga a fapa chunga a chèt theih le? A duh lohzawnga ka awm a nih chuan nilèngin min phuarbet a, dawhkan hnuaiah min țhuttìr țhin. Ka pi hian min chhan țhin a, ka pu bulah erawh kan sawi ngam ngai lo. A chhan chu keima tuar leh tur tho a nih avangin, ka pi bulah chuan zèp turin ka ti țhin. Ka pu inah a awm tlém bawk si a, ka pa lah chuan ka lu hnung chu a zui peih der lo, inah zu a in a, ka pu sumdawnna lama a zin hlanin inah hian nulate nen an party țhin a, chutah chuan nuihza siam nan min hmang țhin. Ka rilru ka siam sauh sauh a, ka len hunah chuan 'ka tirethei ve khawp ang che'tiin chhia ka chham țhin. Chutiang rilru min puttir theitu chu min hringtu pa ngei hi a ni si, a nih loh hi ka ring țhin asin. Khatianga nun hrehawm lutuk ang kha chu ka fate hian hmang ve lo se ka duh takzet a ni, chuan ka nu leh pate nun hman ang kha paltlang ve lo ang aw"

Ka khawngaih lutuk chu ka mittui a parawl kuang mai a, a va hrehawm dawn tak em! Ka tet lai khan hrehawm ka ti ve viau țhin a, kei aiin a tuar hi a lo hrehawm daih si, a tuar chanve pawh ka tuar ve dawn em ni? Ani phei chu a rilru zawng zawng an tihkhawlohsak vek lehnghal a.

"Honey, ka tiam a che, kei chuan chutiang nun chu ka tempui ve hauh lovang che. Pasal țha ber i ni ka tih tawh kha, chuan, kan fate tan pawh pa țha theihtawp i ni"

Ka kuah leh a, a hnung chu ka chùl hliau hliau a, a mangchhia hi reh se, tâwpsan tawh se ka ti. A thinlunga huatna inbun nghet lutuk tawh hi engtin nge a zung chawpin ka  phawichhuahsak theih ang le?

"D, min hmangaih tih ka hriat tirha ka lawmzia kha. He khawvela hlu ve miah lo nia ka inngaihna kha hmangaihtu ka nei tih ka inhriat chiah khan a lo dik bìk lo tih ka hre ta a, ka thinlunga ka lo vawn ngheh em em 'hlutna nei lo, hmangaihna tel lo, sual thiltih rahchhuah' ka nihna chu nang hian min țhiahsak ta hlek hlek a, nang hi ka lo tawng lo ang che tih ka hlau takzet a ni"

A thusawi chuan min tihláwm em avang chuan a biang tawn tawnah ka kut pahniha dawmin a hmuiah chuan dìm tè hian ka fâwp a, ka pasal hian duat a phu a, a thil lo paltlang zawng zawngte ngaihtuah lèt phei chuan  pasal țha lutuk leh fate tana pa țha lutuk a han ni theite hi a mak zawk.

"Ka hmangaih che, kan tán chuan i hlu ber a, nang aia pasal țha leh pa țha an awm lo, he khawvelah hian ka tân leh ka fate tan chuan i hlu ber, i lo piangchhuak hi kan tân hlimna leh malsawmna i ni"

"Ka lawm e"

"Ka tán leh kan fate tán, pasal țha ber leh pa țha ber i ni hi ka lawm a, ni chhunzawm zel bawk rawh aw"

"Min puihna chauhin ka ti thei a ni"

"Ka pui zel ang che, ka damchhungin"

     *******************

Kum 3 hnuah chuan,

"Ânu, hmanhmawh teh, kan tlai dawn ania" Bawihtei chuan in hnuai ațangin min rawn au vau vau a.

"Aw le, aw le, ka hman a ni mai"

Ka make-up hman chu darthlalangah inenin ka check leh a, ka hmui chu ka hnawih țha leh sawk sawk a, ka pum puar ve leh tawh tak chu ka kawr hák mar zetah chuan a lang chiang hle mai. Ka ha duh lo ngial dawn a, Lily leh Âmpuii'n ha tura min tihluih tlat avangin ka hnial ngam lo, inhmeh erawh ka inhmeh phian.

In hnuaiah chuan an pafa za chuan min lo nghâk țhap tawh a, Junior chuan min lo hmuh veleh," Ânu, i mawi lutuk"a lo ti chul a.

"Ka lawm e, sweetie, nang pawh i mawi lutuk tlat"

Rsa thawmhnaw hak chu ka enfel leh a, a bowtie chu ka siamsak a, a hmuiah chuan ka chuk zoh a, ani pawh chuan," I mawi leh ber dawn a nih hi"tiin min fiam leh zoh bawk a.

Vawiin hian Âmpuii leh Máma an innei dawn a, khati chen hrehawm tam tak tuara hlawhtlinna hmel an hmu dun hi a lawmawm em em a, ka lawmpui ngawih ngawih a ni.

Scorpio chuan kan kal a, Bawihtei chuan Moana chu țha taka lo awm turin a ti a, a lo lèt thuai ang tih a hrilh bawk a.

Âmpuii chu an cheimawi kher asin. Biak Inah chuan Rsa'n a kai lut a, an unau hmelțhatzia chu. Mittla lek lekin ka lo thlir a.

An thuchham lai chuan Ámpuii chu a mittui a tla a, kei pawh ka lo men pùr mai. Rsa chuan ka beng bulah chuan," Honey, insùm ve deuh la, naupangin mak an ti che ania"a ti sup a, ka han hawichhuak chu Bawihtei leh Junior chuan min lo en reng a, ka mittui chu ka rawmawla hru pah chuan ka nuihsak ve ve a.

Thlalaknaah chuan Bawihtei chuan nuam a ti khawp mai, Junior erawh a zak deuh a, ka bulah a awm deuh reng thung. Ãmpuii nen chuan kan inkuah vang vang a, ka lawmpuizia hi a hrethiam ve chiang alawm.

Hlim takin hun chu kan hmang a, zana kan haw meuh chuan a tlai ve ruih mai, Bawihtei chu a la meng a, Junior erawh a muhil tawh  thung.

Bawihtei bulah Junior a mu tawh a, thla hnih vel zet a mu tawh. Moana an mutpui theih avangin kan bula mut an duh tawh lo ve ve.

Mut dawnah kan inbual thuak thuak a, vawiin lamah mipui an tam avangin rin aiin chauh a awl.

Rsa'n min malis a, ka dar chu a hmet nauh nauh a, chutah ka cháwn lamah a hmet thla leh a, vawiin lamah pheikhawk sang ve deuh ka bun a, chu chuan ka ke a tikham lutuk a ni.

"Duhtawk tawh rawh, mu ang. Nang pawh i cháu viau ang chu"

"Cháu lèm nang, ka nupui bulah ka cháu thei hleinem"

"Haha, a va lawmawm ve"

"Vawiina i lan sexy zia kha"

Rsa hi chuan ka raipuar hian sexy min ti tlat zel.

"Ka chhe pèr pùr ngawt zawk lo maw?"

"Engtiklai mahin i chhe ngai lo hrim hrim, chuan, zanin hian thil tihchák ka nei a"

Ka dul puar ve lah tawh chu duat zetin a rawn chùl hliau hliau a, um, a tihchák chu ka hria. Hnial pawh ka tum lo, ka lo inphal em em zawk.

Nupa nun hlimawm zet kan chen hnu chuan min rawn kuah a, ka nghawnga fawp zohin,"Ka hmangaih che" a ti sup a.

Ka hresual em ni?!!! Min hmangaih maw?!!! Kum kha leh chen chhung khan he thu hi a la sawi ngai lo hrim hrim.

"Eng maw?!!!!!"

"I hriat reng kha"

"Nih leh, ka hre leh duh ti ta ila?"

"KA HMANGAIH CHE"

A lam hawi chuan harsa zetin ka inlet a, ka mittui chu a luang ngiai ngiai mai. Ka mittui tla hma lutuk hi ka zak țhin a, tuna ka mittui tla erawh hi chu ka zak lo, a lawmawm em a ni, khawvela ka thil hriat châk ber a ni si a.

"Ka lawm e, kei pawhin ka thinlung zawng zawngin ka hmangaih che"

"Ka hria e"

"Kha thu kha i sawi hun ka nghah reizia hi"

"Sawi kher lo pawhin i hre tho lo mi?"

"Hre nang, min hmangaih hi ka ring ngam lova, min duh tih chu ka hria. Min hmangaih thu sawi kher lo mah la keimahin ka hmangaih em che avang hian ka inhném țhin a"

"Ka chetziaah ka tihlan ţhin avang hian sawi kher ngaiah ka lo ruat hleinem. Sawichhuah kher i duh chuan ka hrilh nawn reng mai ang che, ka hmangaih che, ka hmangaih em em che, mi ang pangngai, hlutna nei leh hmangaih ka nih min hriattirtu i nih avang leh ka fate nu i nih avangin ka hmangaih che, engtiklai pawhin ka hmangaih reng ang che, chatuan thleng pawhin".


    ******** F I N ***********

(Phuailuai deuhin  RUATSANGA chu a lo tawp ta. Chhiartu zawng zawngte chungah lawmthu ka sawi takmeuh meuh e. Chuan, PITARTEI, MAMI CHHAKCHHUAK leh  BOSS NGAIA chungah ka lawm em em, ka tihbuai ber berte an ni a, an tel lovin he story tláwm tak hi  a kal thei lo tih ka hria, ka lawmzia hi sawi ngaihna pawh ka hre lo. Lawmthu ka sawi mawlh mawlh e.
        Chuan, Story thar ' true story based' nen ka rawn lét vat ang, min lo chhiarsak leh țheuh dawn nia.)