LALHLIMPUIA - 11

LALHLIMPUIA - 11 By Dingdi Pachuau

Ka mu tui thei lo ang, a lum si. Bâkah min kuah nghet bawk si. Hei ha, a va nuam lém lo tak èm!

"Hlauthâwng suh, hahdam takin awm rawh."

Ka thei lo, a lum lutuk. Tunah chuan ka buaina ber chu a lum lutuk hi a ni.

"Bathroom-ah kal lawk ka duh."

"Ka lak ațanga kal hranna zawng kher lo la."

"Chutiang a ni lo."

"Nih leh, eng nge ni? Min hrilh hma chu ka thlah dawn lo che."

A ti leh duh tak tak ang, tunah pawh lum ka ti tawh nasa mai si a, ka hrilh mai a țha ang.

"Ka intleuh lawk duh."

"Kalpui i ngai em?"

"Ngai lo." Ka chhâng rang mah mah a ni.

A nui kar kar a.

"A lum i ti chu a ni lo ti raw?"tiin min kuahna kut chu a la sawn a, ka tho rang kher mai.

Tui vawta ka intleuh chuan ka harh sawng sawng bâkah ka nuam suai suaiin ka hria. Kawr leh kekawr ka hâk kha chu ka ha leh tawh lovang, a hrehawm lutuk.

Thawmhnaw puan deh nuam ber nia ka hriat chu ka inbel a, ka mut chuan min lo kuah leh nghal vat a.

"Hm, rimtui hlé mai."

Min rawn kuahna kut chuan ka kut lehlam chu a rawn bawhthuahtìr a, chutah ka nghâwngah fáwp zohin," Mut tui sûk sûk le, Sarah darling,"a ti sap a.

"Nang pawh le."

Ka mu tui hlé tak tak a nih ka ring, ka harh leh meuh chuan khua a éng uar tawh a,mumang pawh ka nei lo. Keimah chauhin ka lo mu leh tawh, a hmèl hmuh tùr a awm lo.

Bathroom-ah lùtin ka intifai a. Choka lama ka lût phei chu a lo rimtui ram ram khawp mai, ril a tițâm nghal raih raih mai.

Min lo hmuh veleh,"Morning, in tùr i duh em?"a lo ti vat a.

"Duh lo mai. Puih i ngai em?"

"Ngai lo ve. Lo țhu mai mai rawh."

Hmeichhia zâwk tho tlâiah ka țang ziah mai, thatchhia leh tladah min ti ngawt ang chu. Kan inah leh hmun dangah chuan hetiang hi ka ni ngai bîk lo asin le. Mahlima bulah ber kher, thil nuam tak a ni hran lo.

"Tukin ka chawhmeh siam hi a 'cial' teh mai ania, tu tân mah ka la siamsak ngai lo, i vânnei hlé a ni."

"A ei theih meuh ang maw?"

"Ei theih e, a tui viau ang."

Choka vèla chêt rak rak chu a inhmeh fahran lo alawm. A tih duh loh hmèl lutuk a, ei tùr lah a siam tui thei phian bawk sì.

Chaw kan ei lai chuan,"Vawiin chu ka chhuak dâwn a, i lo kal ve duh em?"tiin min zâwt a.

Eng nge a tih dâwn le?

"Aih."

"Lo kal la,nangmah chauh chuan i khua a har dâwn asin."

"Ina awm ka duh zâwk."

"Hrehawm i ti lo vang maw?"

"Aw."

"I tih tlat chuan le, ka lo haw har lo vang."

Chaw ei khamah muang marin a insiam a, keiin in ka tifel thung. In ațanga a chhuah dâwn chuan," I khua a har lo tak tak ang maw?"a ti leh a.

"Aw, ka ngaihtuahawm lo vang."

"Lo haw thuai ka tum ang, gate thleng min thlah la?"

Hm, a nupui ang chiahin min cheibâwl țan a tum chiang, a naupang chhia ka ti bawk si, ka zak deuh hlek a.

"Va naupang chhia tak."

"Tunah chuan ka chhuah dâwn pawha min thlahtu tùr ka nei tawh tlat che alawm, ka lo haw huna min lo chhâwntu tùr nèn."

"Hah, i nupui hmasa pawh khán a ti țhìn reng ang chu?"

Țawng lo chuan min melh ta reng a, a ding tlat bawk. Ka tithinrim leh ta pek em ni?

"A ti țhìn lo em ni?"

"Ani kha chu sawi lan kher a ngai lo vang aw."

"Eng vângin maw?"

"A ngai lo a ni mai."

A thinrimna lah hi a ho thei sì.

"Lo kal ve mai la?"

"In ka lo tifái zâwk ang e."

"I hah lutuk ang e."

Pasal, min ngaihtuah tak taktu pawh a ang ve e.

Ka thlìr reng a,Motor-ah a lût a, a tlân chhuak țép tihah chuan rawn hawiin,"Ka lo haw thuai ang, bye,"a ti sap a, ka chhân ve hma chuan a tlân chhuak ta nghal a.

Ka en zui reng a, ka hmuh theih tâk loh hnu chuan muangchângin  ka lût a, in chu a ruak deuh huaiin ka hre ve ringawt.

Ina ka tih țhin dàn ang chiahin TV ka on a, zâi ngaithla pahin hmun ka tifel a, chhuat ka nâwt bawk a. Darthlalang ka nâwt a, furniture ka hrufái bawk. Mahse, a bâl hran lo va, a hahthlák lém lo.

In chung chhohna step ka tihfâi laiin doorbell a rawn ri ta ral ral a. Hmm, he pa hi min tihder a peih khawp mai, mahse 'ka rei lo vang' a tih tak kha. A rawn lût thei reng, lo buaipui chûk ka duh teuh lo, lo lût ve mai mai teh se, ka buai ve tho.

A rawn ri nawn leh a, ka dawhtheihna fiah a tum a ni ang. Kawngkhâr hawnsak a phût ve pawh a ni thei tho, a pangchan ve theihna laiah chuan a pangchan thiam viau țhin kha maw.

TV ka off a,kawngkhâr hawn pahin," Lo lût ve mai la, ka hman lo ve tho asin,"ka ti chhuak a, pâwna lo ding ka hmuh erawh chuan ka ding chat mai.

Mahlima emaw ka ti a, chuvãnga khatia țawng kha ka ni, Mahlima a lo ni si lo va, ka zak lek lek, ka inthiam lo viau bawk a.

Nu pakhat, hmêlțha zet mai hian mipa naupang sam kir chiat mai hi a lo pawm a, a fa pawh a ni maithei. An hmelțha dùn hle mai a, an hmél erawh a inang lo kher mai.

"Lo lùt rawh u, eng nge in duh tâk?"

Ka inthiam lo viau, ka lo chhawn dan kha a máwi lo hle si. In chhûngah chuan ka hruai lût a, țhutna ka kawhhmuh a.

"Mahlima a awm em le?"

A hmèlțhat ang bawkin a aw pawh a máwi ka ti.

"Awm lo, a chhuak a."

"A lo haw har ang em le?"

"Ka hre lo le, haw thuai tùr ang chuan a insawi kha maw."

Ka thlan a tla nasa bawk sia, ka chhe ngawt ang, ani lah chu a chhe lo ropui sì. A vun leh a hmél chu a inhmeh ngawih ngawih, an awmtheih hmèl ka ti bawk.

Mipa naupang chuan,"Â-mâ, ka zun a chhuak,"a ti sap a, a țawng a fiah lo reuh sia, a lawmawm reuh tawp mai.

Toilet awmna ka hrilhah chuan a nu chuan a hruai a, keiin step ka tihfáina hmanrua chu ka lo dah fel zung zung bawk a.

"Kan tibuai che niin a lang, Mahlima chu hmu tùrin kan lo la kal leh zâwk ang e, kalna tùr dang kan nei bawk sia, a hmanhmawhthlâk lutuk chuang lo bawk nèn, kan kal mai ang."

"Aw, nghâk rih ula, a lo haw țép tawh ang chu."

Nui chungin," Kan tibuai rei lutuk palh ang che,"tiin min en vang vang a, ka lái lutuk nia. Ka chhe chip chep bawk nèn, tè rawih rawihin ka inhria. A chhe lo lutuk a, a țawngka chhuak a fel sì nèn, ka inhmuhniam ngawih ngawih.

"Bawihte, ka lo pawm leh mai dâwn che em ni?"

"Ka kal ve duh tawh, Â-mâ."

"Aw le, rei lo té chauh aw, i hah lutuk palh ang."

Pâwn thleng ka zui chhuak a.

"Mahlima bulah chuan in lo kal thu ka lo sawi dâwn nia."

"Aw le, engtikah emaw, hun remchâng hmasa berah hmu tùrin kan lo kal leh dâwn nia."

An nufa kal chu ka thlîr reng a, an hmélțha dùn tak tak a ni. Mipa naupang erawh a dawldâng a, a chér deuh bawk a, a hrisêl lutuk lo pawh a ni maithei. A nu ve thung kha chu hmêlah phei chuan sawisêlna tùr ka hre lo, a hmêlțha a ni tawp mai.

An hming ka lo zâwt miah lo nia, engtin nge Mahlima bulah chuan ka sawi tâk ang? A va mâwl theih tak, an hming chu lo zawh ve tùr asin.

In ka tihfel zawh hnu chuan ka inbual a, rei tâwk tak ka inbual hnu chuan chhûn ei tùr ka buatsaih ve chauh a, dár 1 a pèl âwrh chauh alawm.

Doorbell a rawn ri leh ta. Mahlima rawn hmuh tumte kha an lo kal leh a ni ang, tun țum chu polite takin ka lo chhâwn tawh tùr a ni.

Kawngkhâr ka va hawng a, ka nui pah sâng a. Mahse, Mahlima lo ding ka hmuh tâkah chuan ka nui hmél chu a reh riai riai ang chu. Min en reng a, ka lâi lehpek. Mahse, lâi lo thei ang bera awmin ka hamhaih tak tak hma chuan ka be ta zâwk a.

"Mi dang emaw ka ti che a."

"Uai, mi dang i lo beisei maw? A va mak dâwn ve!"

"Ka beisei lo."

"I chiang chiah maw?"

Chhâng tawh lo chuan ka lût ta daih, ei tùr ka siam kha, a lo ût hman ang em? Ût lo hrâm teh se.

Chokaah ka tlân lût vat a,a lo ût lek lek alawm, ka chawk thuai thuai a, tlêma tlêmah in ka tikâng țêp a nih hi. Mahlima vâng vek, pâwnah min be rei lutuk a.

"Mi dang i beisei ka tih pawh chu i va duh âwm lo ve?"

"Ka beisei lo ka tih kha."

"Nih leh, 'ngati nge mi dang emaw min tih a?"

"Ka ti ve mai mai."

Ka ei siam chu rawn en hnâiin,"A va tui dâwn ve, lunch ka la ei bîk lo ania,"a ti a, thâwk lain ei tùr rim chu a hnîm vang vang a.

"A tam alawm."

"A tui dâwn sì, ka ril a tițâm."

"I inthlâk phawt dâwn lo'm ni?"

"Ei zawh lamah zâwk le."

Ka rin aiin ka ei tui daih mai. Mahlima pawh chuan a ei țeuhin ka hria, tui a ti ve viau a nih dâwn hi.

"A tui hle mai."

"Ka lâwm e."

"Kei aiin ei tùr siam i thiam zâwk daih a nih hi."

"Hmeichhia ka nih hi."

"Hmeichhia nih vâng ringawtin maw?"

"Hmeichhia chuan kan thiam vek ang chu?"

"Teuh lo, thiam lo ka hre țeuh."

"Kan thiam vek tùrah ka lo ngai mai asin."

"A tui tak tak a ni. Ina hawa ei tùr tui tak nèn min lo hmuah hi ka ring pha miah lo."

"Vawiinah nangmah hmuh tum che an lo kal a."

"A ni maw? An chhe lo lehpek em?"

"Chhe lo tak an ni."

"Luck lutuk pawh hi a buaithlak. In lamah lehzèl min hmuh an tum țhin a."

"A lo nih tak chu."

"I lo thîk loh hrâm ka beisei."

"Thîk nâng. Thîkna chhan tùr ka hre lo."

"A lâwmawm nasa a nih chu. Ka phone-ah min rawn hrilh hmasa ziah țhin sia, a mak hle mai."

"An theihnghilh palh a ni ang."

"A ni ngei ang."

Kan thil eina ka seng fel a, ani pawh room lamah a lût ta nghal a. Eng nge pâwn lamah a tih a sawi lo va, kei pawhin ka hrilh chiang bîk lo tawp ang. Hrilh chiang tùr pawhin an hming ka hre lo bawk. Nép min ti viau ang chu.

A inbual zawhah sofa ka țhutna bula rawn țhuin,"Kha, i tâ tùr,"tiin paper bag a khâi chu ka kutah a rawn nghat a.

"Eng nge ni a?"

"En la."

Makti rilru deuh hian ka en a, paper bag chhûngah chuan eng tak awm ang maw?

Ka rei! Ka neih châk em èm țhin, mahse ka neih phâk ngai loh tùra ka rin iphone a lo ni!!!

"Hei hi ka tâ tùr a ni tak tak em?!!"

"Ni tak tak."

"Ka lâwm e, mahse ka la thei lo vang."

"Eng vângin maw?"

"A man zât tùr ka hisâp thiam ve tho."

"Chuan?"

"A to."

"Ka leisak che a."

"I thil phal vângin ka lâwm e, mahse, a man a sâng mah mah a ni."

"I hmang duh lo maw?"

"A to em mai."

"Ka nupui hian  a pasal thilpék a dawng duh lo tihna em ni?"

"Chutiang zâwngin ka sawi lo tih i hria."

"Sawi kual duah lovin hmang duh mai la?"

Phone chu ka en vang vang a, ka duh chiang alawm. Kei ve hian engtikahmah ka neih phâk loh tùr thil a nih avângin ka hnial mai a ni zâwk, ka duh lutuk a, a man a sâng sì a, engmah thawk chhuak lo tâna hmanah chuan a sâng êm a ni.

"Ka duh alawm, mahse..."

"Mahse, mahse tih a ngai lo."

Ka țawng leh chuan inhnialna a tam leh mai mai dâwn, chuan, Mahlima a thinrim leh ngei bawk ang.

"Ina ka awm loh châng pawha ka biak theihna tùr che leh i khawhar hnemna tùr a nih kha."

"Ka lâwm e."

"Lâwmthu sawi kher a ngai lo."

Zanriah kan ei lai chuan," Vawiin chhûn khân nangmah hmuh tum an lo kal tak tak ania,"ka ti leh a.

"Tute nge ni a?"

"An hming ka zâwt lo."

A nui hak mai.

"An chhiat loh lutuk avângin an hming i zawh theihnghilh ta a?"

"Teuh lo mai, ka theihnghilh ve tawp a ni zâwk."

"Aw, an hming i zâwt lo va, chuan?"

"Nufa an nia, a fapa kha kum 4 mi vél a ni maithei. Sam kir chiat mai, hmélțha deuh reuh ania."

A ngâwi vang vang  phawt a, chutah," Eng nge an duh an sawi em?"a ti a.

"Chutiang engmah an sawi lo, awm pawh an awm rei lo."

A puar a ni ang, a tho ta daih a. Mak ka ti rilru deuh a, ka thil sawi vâng kha chu a ni êm lo vang chu maw?

Ka phone thar chu hman dân ka zir a, ka phone lo neih ve tawhte nén a inan loh ém avângin ka bo leh deuh țhìn a, Mahlima zawh lah ka duh bîk si lo va, ka bo leh châk châk țhín.

Zân kan mutnaah chuan min rawn kuah miah lo. A zangthal zâwngin a mu a, thil ngaihtuah nei tih hriat zetin a melh ngai a melh char char a, vawiina a chhuahna lamah ngaihtuah tùr a rawn nei haw pawh a ni maithei a, zawh kher a țùl pawhin ka hre lo.

Phone chu ka khawih malh malh reng a, kan indek lo va, kan inbe bawk hek lo.

"I phone kha dah tawh teh, min ngaihtuah loh phah nân i hman dâwn chuan ka duh miah lo."

"Hman dân ka zir alawm."

"Hun i ngah lutuk."

Khum sìra dawhkán téah chuan ka dah a, sír lam hawi chuan ka mu țha nghal a.

"Lo tawlh teh."

Ka che sawn lo.

"Ka kuah duh che ania."

Min kuah duh chuan lo tawlh phei ve mai tùr ania, inla-ngêng leh inti-thú lutuk mai.

"Lo tawlh mai la."

A lamah min pawt ta dâwrh a, a âwmah ka lu ka tauh dat mai.

"Ka thu âwih ve mai la."

A âwm ruak kâng mai chu ka nghéng rân mai a, a thinphu dap dap pawh ka hre chiang thei khawp mai. Ka che ngam tawh lo, kan inhnaih lutuk a, a mal chuan min khan rùn bawk si.

"Min hnial hian min tiphûr tawlh tawlh țhîn."

A kut chuan ka hnung a chûl zai zai a, a zâ ka ti, ka mur chuai chuaiin ka hria. Tu mipa mahin hetiang hian min la khawih loh bâkah tumah ka la mutpui ngai lo bawk a, ka țang țûng maiin ka hria.

"Țang țûng lo khan hahdam teh."

Engtin nge ka hahdam theih tehlul ang? Eng nge thleng zèl dâwn pawh ka hre si lo.

"Ka thei lo."

A nui ri hak a, a thaw lum hiam chuan  ka chhîp a ur lum ham ham maiin ka hria. A nuam phian lawi si, ka rilru hi a dik lo țan tlat.

"Kuah chung chea mut nawmzia hi ka hre har mah mah a ni."

Ka thaw țha ngam hleinem. Mipa hnaih over-in ka awm ngai si lo va, ka thâwk a dik thei lo. Kan inngaihzâwn lai kha chuan kan inkuahin kan infâwp ve ngei mai. Mahse, tunah chuan kan puitling ve ve tawh a, kan ni lo rei tawh a, kan infawh leh inkuahna pawh a rei tawh e. Chuvâng chuan, awmdan tùr pawh ka hrethiam tawh lo, a dik lo vek tawh.

"Zanin chu fawh ngei che ka duh, ka tum tlat bawk."

A thusawiin min tihhlauhthâwnzia chu a hre tawp nâng. Min tiphûr lo, ka hlautháwng a ni. Chu aia thui chu kal a duh hlauh chuan...

"Țang țûng suh ka tih che kha. Lo dawh tawp rawh, a aia thui ka kalpui dâwn lo che."