LALHLIMPUIA - 33

LALHLIMPUIA - 33 By Dingdi Pachuau


"Mama, tui."


Ka lo chhawp theihnghilh leh tawh a nih hi. Tho vatin, a no duh ém ém Minions lem chuanna  ngat chuan filter-a tui chu ka lâksak a, a thlêng bulah chuan ka dahsak a.


A thil ei chu a tep chap chap a, tui chu a in ta nghal a.

"Thil eiin engtia ei tùr nge kha?"

"Mui tîpin ( hmùi chîpin)."

"Dik chiah. A nih leh, eng nge tih loh tùr kha?"

"Tawng tawng loh tùi (țawng țawng loh tùr)."

"Aw, a dik chiah. Ka naute hi chuan a va hre thei tak! Vawiinah tuin nge awm leh dáwn che kha?"

"À û-in."


Ka thawhna sikul bul lawkah Angawadi a awm avàngin chutah chuan nî tin a u Mawii'n a hruai țhìn. Mawii hi ka thawhna  khuaa ka belh ber, kan in luah neitupa Pa Finga fanu a ni. Sikul a kal tawh lo va, a kal loh chhan erawh ka hre miah lo. A fel ve tawh a, tleirawl kum 15 niin, a len lêm loh avàngin a lang naupang lehnghal. A bulah chuan Nonoi pawh hi ngaihtuah miah lovin ka kalsan thei a ni.


Kan in luah hi Pa Fingate in hnuai a ni a, kan nufa tân chuan a tâwk reuh tawp. Kan mamawh engkim a awm ve biai tho, a zau hran lo nain. Nonoi tân hlauhawm deuh lai tùr, hmun awih deuh a awm bawk si lo va, luah man lah a to hran si lo.


Chaw ei kham sikul kai tùra ka insiam lai chuan Mawii chuan Nonoi chu a rawn ko lang lang a, ani lah chuan phûr fahran hian a lo chhàwn vat bawk a. Sikul kan hlat hran lo va, ka hmanhmawh vak ngai lo. Mawii pawh chu a rawn chhuk a, ka hman hnuah chuan kan pathum chuan kan chhuak a.


Râlvàwng P/S-ah kum hnih ka thawhna a ni ve ta. Nuam ka ti ve tawh hle a, a khua hi in tam lêm lo mah se, Lunglei khawpui ațangin a hla lo va, dârkâr hnih khat lek tlân a nih vàng hian thingtlâng kaw changkãng tak a niin ka hria. A mi chêngte an taima a, kut hnathawh an uar viau.


Sikul bul lawkah Anganwadi a awm avàngin Nonoi chu kan office-ah ka hruai rih phawt a, a chhan chu keini chu dâr 8:30-ah sikul kan țan a, Nonoi erawh chu dâr 9:30 daihah an țan avàngin ka bulah awm rih se ka duh a ni.


Office chu chowkidar-in a lo hawng tawh a, tukverh ațanga thli lo thaw lût heuh heuh chu a nuam kher mai. Nonoi chu ka chair-ah chuan ka țhuttîr a, chowkidar chuan an thil zir țhin a lo zâwt a.


Thawhpuite an rawn thleng ve țak țak a, Nonoi chu an rawn be nghal zel mai. A țawng a fiah loh avàng hian biak hi nuam an ti a; ani lah hian chhàn a lo phûr thei si a, kan nui nasa țhìn hle a ni.


Ka thawhpuite zîngah hian tlangvâl pakhat, senior lam deuh,fiamthu duh deuh mai Siama hi a awm a, chu pa chuan a chhaih peih lehzual a, thil eng eng emaw a zâwt kual vak zel a, nuih loh pawh tum mah ila a nuih loh theih loh țhìn. He sikulah hian ka thawk lo ang tih ka hlau țhìn, a chhan chu ka nuih tam phah a, ka rilru a hrisèl phah ka ti tlat. Siama ka hmuh apiang hian tu emaw ang tih ka nei a, ka hre chhuak zo chuang miah lo.

"Nono, Màmâ hming kha ka hre leh tawh lo, eng nge ni kha?"

"Talah."

"Nih leh, Pàpâ hming ve thung?"

"Âpa Tâma." A pa Siama hming hi a lam fiah thiam si lo va, hei hi an làwm ém ém a ni.

"Zànah tunge lo lêng țhìn kha?"

"À u."

"Tlangvâl lo lêng țhìn kha?"

"Âpa Tâma."


Mi dang chu an lo nui char char a, kei ve thung chuan Siama chu rum fê-in ka lo melh thung a. Kan innêl tawh a, min fiam nasa thei hle. Siama phei chu tlangvâl a nih vàng hian fiam chîkah an neih a, ani lah hian huat a tum lo. Thil ni baksak lo pawhin fiam țhìn mah se, chu aia nasa fê chuan a phuah belh țhìn a, a hlimawm thei tawp.


Mathematics ka zirtir țhìn a, ka subject nuam tih ber a nih vàng hian zirtîr pawh nuam ka ti. Naupangin an lo man thiam phei chuan nuam ka ti a, naupang pawh an phûr thei viauin ka hria.


Noon break-ah  chuan  kan Head chuan,"Sarah, zawh àwm che a nih lohna lai ka hre lo bawk a, Nonoi pa  chanchin hi ka hre chiang châk a ni. Mi sawi hriat ai chuan nangmah ngei zawh che hi a țhain ka hre bawk a. Siama erawh chuan a beng lo chhu ngawng mai se, ani lakah hi chuan nula virgin ngat i la ni tho thoin ka ring,"a ti charh charh a.


Siama chuan,"A, sir, keima lam chauh hi min ti bîk țhìn lo ula, ani lamah pawh engti angin nge ka tlâk nat in hre ngawt lo a nia,"nui chung hian a lo ti a, kan nui leh vek mai.


Madam Nuni chuan,"A dik thei ang. Zan tin a birh tlut tlut a,a birha tân pawh rilru danglamna hun chu a ni ve tawh. Eng mah hi kan hre chiang miah lo,"a lo ti ve a. Siama lah chuan,"Hre nâng aw. Engtia thui nge kan kal tawh tih pawh in hre teuh lo,"tiin a lo belh a, dâwt chiang bal ni mah se a tizahthlâk thei a nia. Za lo zetin ka nui ka nui ringawt mai.


Sir Làwma chuan,"A puan hmâwr i deh pawh ka la ring lo ve,"a lo ti vat a, ani lah chuan,"Amah kha zâwt mai ula ti nia; mahse, hmeichheho hi chu an fing a, an zêp leh țêt zel. Ani pawhin a zêp tho ang,"a lo ti leh zung zung a.


"Puan hmâwr chu sawi loh, an parda pawh a la dek lovin ka ring,"Madam Nuni chuan a lo ti leh a, Siama chu za zet hian a nui chhuak ta hawk hawk a, a nui chu keini chuan kan lo nuih ve leh chhâwng a.


"Nui tawh s'u, tunah chuan a changtunuin a changtupa lo deuh zâwk chanchin a lo sawi tawh ang. One, two, three, start!"


Eng mah ka sawi thei lo, ka nuih a za lutuk a, mi dang pawh chu an nui nasa lutuk.


"Sawi thuai teh. Hei, chawhnu țan a hun leh mai dâwn, nge ka lo sawisak mai dâwn che em ni? Min hrilh vek tawh tho kha, ka hre ve vek tawh tho alawm."


"I hriat châk ém kha aw, Siama. Lo inrawlh ve ziah lo teh, ka hre châk tawh a nia."


A ni lah tak a, kan nuih nasat avàngin hun chu a kal duak duak a lo ni. Țan nân minit 10 chiah a awm tawh.


"Um, sawi  dan tùr ka hre thiam chiah lo va, Nonoi pa hi chu Lalhlimpuia a nia, kum 4 kal ta khán a boral tawh a."


"A nih chu, a va zia lo ve aw. A pawi ka ti hle mai, ka zâwt kher bawk si che a."


"A pawi lo, sawi chhuah chângte  chu a awm ve bawk ang chu." A rilru nawm nân ka sawi mai mai, he thu hi ka sawi ngai lo. Min zâwt miau si a, thu dik chu ka sawi mai a ni.


"Engtia boral nge  a nih le, ka hre châk zel a nia, pawi i tih loh chuan?"


"Kha, kum 4 kal taa AMRI Hospital, Kolkatta-a kângmei chhuak thut kha in hria em? Khatah khân kâng hlum an awm nual kha, vànduaithlâk deuhin chûng zîngah chuan a tel palh hlauh mai a."


Ka vawi khat sawi chhuahna a ni a, ka inhûm ruh nasa ngawt ang, ka thlan a sa hat hatin ka hria. Mahse, ka tân pawh a țha zâwk ang, ka lo up rei ve tawh ém mai a. Ka thâwl ve hawk maithei zâwk asin.


Ka thu sawi chu an ngaithla kar hlawm a ni ang, a reh dak mai a. Head chuan,"News-ah ka en tak asin, a zia lo tak tak a ni. Mahse, thil țha kher hi kan tawng vek thei bîk lo a nia, thil țha kan tawng ang a; thil țha lo pawh kan tawng bawk ang. Pathian hian a phal vek a ni, a chhan chu buaina khawvêlah kan la chêng miau si a. Thihnate hi kan la tawh vek tùr a ni a, a hun laiin harsain hrehawm ti hle țhìn mah ila, Pathianin min awmpui a, kan tawrh theih bâk hi min tuartîr phal bîk miah lo a nia. Vànduaina ringawt ngaihtuah lova a êng lam thlîr țhìnte hi khawvêla mi awhawm ber an ni. Nang pawh i chhel ka ti khawp mai che, naute lawmawm lutuk i nei bawk a. A tihlim thei viau chein ka ring a ni,"a ti dap dap a.


"Nia, enkawl tùr naute ka nei a. Thil dang hi chu ka mamawh tawh tehchiam pawhin ka hre lo."

"A theih loh!"

"Siama, i va vànduai tak ém! Ka tawrhpui che."


Kan nui zo leh vek. Ka thawhpuite bulah hi chuan thutak rùnin a awm theih loh, thu rêng rêng tak deuhin a sawi rei theih loh, fiamthuin a zui nghal zel a ni.

Dâr a ri zui ta bawk a, class la tùr chuan kan inbuatsaih ta nghal a.


In ka luh hmain in chungah ka lût leh phawt a, Nonoi pawh a lo țawng leh lar lar tawh. A țawng fiah lo hi an làwm a, an chhawnchhaih reng mai a ni.

"Nono, haw tawh ila?"


"Mama..." a rawn tlãn vat a, ka lo pawm vat a. Ka biangah a fâwp zoh a, min duat a ni tih a tih-lan ve dàn a nia.

"Aw, thingpui in rih la, Sarah?"


"Ka lãwm e; mahse, kan haw thla zâwk mai ang. Nonoi hi bual thuak thuak ka la duh dâwn si a."


Kan inah chuan kan nufa chuan kan lût thla a, khua a lum ém avàngin Nonoi biang chu a tài têk a, a hrisêl  lo viau nain a biang hi a tài leh tlat zel.

"A lum i ti em?"

"Aw."

"Inbual rawh aw. Chuan, i muhìl ang a, kei pawh ka inbual ve  thei ang."


A hrisèl loh reuh ém avàng hian a chêr mah mah a, tlâng hrilêng a man hma ém ém bawk. Ka neih ni  tùr aia hmaa ka neih vàng kha a ni ngei ang, doctor kan panpui ngun viau bawk. Tunah hi chuan a zia ve ta deuh a, damdawi erawh ka inchhawp tam khawp mai.


A muhìl chu ka thlîr reng a, ka fanu hi chuan min chhùn ve thlâwt a ni. Hmêlah kher kher chuan min chhùn fuh ve a, a ke leh a kutah erawh min chhùn lo khawp thung.


"I pa chuan hmuh che a châk ve ngawt ang. Fanu kha a duh a, i hming tùr nèn lam a hual sa vek tawh a nia; mahse, kan hma lam hun tùr hi kan va hre lo ém! A thlarau chuan a awmna ațangin a rawn thlîr ve țhìn ngei chein ka ring. I pa i hmu hman lo erawh a pawi ka ti, i tân pa țha theihtàwp tùr a ni asin."


Zànah chuan Siama a rawn lêng a, an inchhaih nui leh nasa khawp mai. Siama hi min beiseia lo lêng a ni hran lo va, dik tak chuan lênna tùr a hre bîk lo a ni. An khaw nula hi an chhe hran lo tih ka hre ve tho va; mahse, ngaihzâwng a neih hran loh avàng hian nula inah a lêng ngai lo ni berin ka hria. Ka awm hma pawhin in chungte in hi a lènna ber a ni hrim hrim a, Nonoi hi a làwm ve a, chubãkah, a thawhpui ka lo ni bawk nèn, a rawn lêng ve țhìn a ni.

"Sarah, in pa kha Pângzâwl khua a ni ve tho em?"

"Ni lo ve, Lunglei lam mi a nia."

"Lunglei eng vêng maw?"

"Farm vêng."

"A ni maw?! Chuti, ka hria a nih chu."

"Engtin maw?!"

"Ka cousin Ramhluna țhianpa a nih kha."


Ramhluna kha  a cousin maw?!! A sawi tâkah chuan an inang deuh tak alawm. Tu emaw ang  ka tih ka hriat chhuah theih si loh kha Ramhluna chu a lo nih ngei dâwn hi.

"A țhianpa chu Ramhluna a ni ngei mai."


"Mahse, kan inbe ngai lutuk tawh lo. Aizâwl lamah an awm daih tawh a, an rawn phei khât sia, keiniin kan va tlawh thei bîk si lo va."


"A nih tak chu. Nia, hna han neih chuan duh duhna lamah a thên theih tawh loh chu a nih hi."


"Thingtlânga awm phei chuan maw, khawpui kalna hun hi kan nei lo lehzual. Hun ãwlah lah huan lamah hna kan lo thawk duh ve bawk sia, hun kan nei thei lo rêng rêng."


"Ramhluna chuan hmân deuh khân a sawi tawh tak alawm, in pa boral dan chu. A sawi lai khân ka  lo ngaihven lutuk lo nàngin i sawi khân ka hre chhuak leh a."

"A țhian țha ber a ni alawm."

A haw har lo. Kan nufa khua a tihar lo va, a lo lêng hi ka lãwm țhìn khawp mai. Tlangvâl țawng duh tak ni mah se, mi a rêl ngai lo va. Thil țûl lo a sawi mai mai lo, fiamthu atân a sawi a nih ngawt loh chuan. A nungchang hi a ngainatawm riau, țhenrual kawm a thiam tlat.

Ka muhìl țêp tawh tihah chuan ka phone a rawn ri ve tlat mai! Ka nu a ni maithei, ka pick vat loh chuan Nonoi a harh mai ang.

Hei chu, number ringawt a nih hi!

"Hello?!"

"Sarah? I ni ti raw?!"

Rohlua aw a ni tlat mai! Kan inbiak lohna rei tawhzia leh kan inhmuhna rei tawhzia ka hre chhuak uar uar mai.

"Rohlu, teh tlat che chuan!"

"Sarah, i number neih tuma ka zawn nasatzia i hria em? A hmaa i number-ah khân ka rawn try nasa thei lutuk. Ngati nge i buak theih miah loh a?"

"Engtin nge ka number chu i neih a?"

"Ka sawi peih lo. Tunah khawiah nge i awm a?"

"Ka sawi chuan i hre dáwn asin."

"Sarah, i țhian ka ni lo em ni a?"

"Ni e, min țanpuitu i ni alawm. Ka la theihnghilh lo ve."

"Chuti, i awmna min hrilh teh."

"Ni lo ve, khawvêl tharah nun thar nèn bul ka țan mêk, ka naute nèn."

"Naute chu a țha em? Ka hmu châk hle mai."

"Aw, țha e. A nula ve tawh lutuk."

"Sarah, ngun deuhin min lo ngaithla teh. I hmelma ka nih loh hi, engkim min hrilh ve mai la, Mahlima nèn khàn a boral hma khân in ințhen em ni? Engkim ka hre duh a nia."

Ni lo, he pa hian eng thil nge a rawn sawi chhuah hi? Rilru natna tam tak ka lo pal tlang tawh, hriat chhuah leh ka duh tawh lo asin. Tunah nun tharin bul ka țan chho mêk a, chu pawh hmel hriat miah loh awmnaah. Nuam ka ti ve țan dáwn chiah a, nunhlui, theihnghilh ka duh ém ém, ngaihtuah chhuah pawh ka duh tawh loh rilru natna, hrehawm tinrêng ai pawha hrehawm zâwk chu ka hmaah a rawn lang leh ta.

"Sarah?"

Ka mitthlaah chuan kan nunhlui liam tawh hnu chu nimin ang maiin a rawn inlâr zut zut a, kan room kawngkhàr ka hawn lai ațang chuan a rawn ințan leh riai riai a.