☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...
☆REBEK☆- 1 By Dingdi Pachuau
"Miss, homework min pêk kha ka hre thiam lo va, ka zâwt chiang thei che ang em?"
"Aw le, lo kal la."
Dàwra ka kal haw lam chu kan sikul naupang, pâwl 9 zirlai, an class-ah pawh a thiam thei pâwl tak chuan min lo ko ding a, ka in luahah chuan ka inzui lût ta a.
Mi hming hi ka hre thei ve viau a; mahse, kumin kan zirlaite hi an hming a inang hlawm lutuk a, ka hriat pawlh hlawm tlat. Tuna min zuitu pawh hi a hming ka hre chiang leh tawh lo, 'Ruat' tih chu a tel tih erawh ka hre thung.
"Engtin nge an koh che kha?"
"Miss, 'Ruatdik' tiin min ko țhìn."
"Nih leh, in pâwla Ruatdika tih tho awm ve kha engtin nge in koh?"
"Ani kha chu 'Dika' kan ti a."
"A nih tak chu. Khawi le, i hriat thiam loh lai chu en ang hmiang."
*************
Ka hming chu Rebek Lalrengpuii a ni a, mite chuan 'Bekte' tiin min ko țhìn. Min kohna ang deuh hian ka lian lo va; mahse, kei aia liante hi ka awt bîk chuang lo. Ka pianah hian ka lung a awi tâwk a, hei ai hian sàn belh ila ka ti chuang hek lo. Lungawi lo pawh lo ni ta teh réng ila, engtin nge ka tih vak chuan ang? Engkima lungawi theite hi mi vànnei an ni mai. Mi dangte, nu leh pa chàwma inla parh deuh deuhte angin chàwm hlàwm ka ni lo va,keima thawh chhuah ngeia ka khawsa thei hi ka inchhuanna a ni. Mite angin ka hmelțha kher lo pawh a ni maithei, ka lian lo pawh a ni ang; mahse, Pathianin a duh taka a siam ka ni a, ka lung a awi ve tlat.
RMSA Secondary School, Zotuiah Mathematics zirtîrtu hna ka thawk mêk a, kumin hi kum 3 ka thawhna a lo ni ve ta. Ka len loh avàng hian chhaih ka hlawh țhìn hle a; mahse, ka ngai haw ngai lo, thu dik a ni miau si a. Min chhaihtute hian min hmuhsit vànga min chhaih an ni lo tih ka hre ve tho a, chhaih tâwk leka tê ka nih vàng a ni mai.
Ka kum phû lova ka hmêl a lan naupan vàng hian min zuam sual fo. Ka hmai hi a bial a, ka sam lah ka beng hnuai chen vêlah ka tan rual hmarh a, chal sam ka nei hlek bawk. Hmeichhe naupang ang min ti tâwk an awm a, ka lo lian fahran lo bawk nèn; mahse, feet 5 chu ka chuang ve tho asin. Hmeichhe naupang chu ka ni tawh bîk lo, nula kum 26 lai ka ni tawh.
Ka vun a ngo hle a, a châng chuan hrehawm ka ti lek lek fo. A hma chuan khua a lum hle lai pawhin thawmhnaw tê deuh leh bùl deuh ka ha ngam ngai lo; mahse, tunah hi chuan ka ngam vek tawh. Pathian min siam dàna lungawi mai tùr kan nihzia hi ka pawm thiam lutuk tawh a, ka duh zâwng apiang ka inbel hmiah hmiah tawh.
Thawhțanni a ni a, vawiin chu sikulah devotion ka hman hun a ni. Insiam pah chuan ka hun hman dàn tùr chu ka ngaihtuah pah rauh rauh a, inbuatsaih lâwk vak hi ka thiam lo va, a tla chawpa thil tih hi ka thiam zâwk țhìn. Ka nu khân min hau fo țhìn a; mahse, ka zàwm thei chuang lo.
Sikul pan chuan muangchângin ka kal a, sikul awmna hi tlâng deuh a nih avàngin ka hmanhmawh chuan ka hah thei lutuk a, chubâkah, thlan a tlà a, inbual pawhin awmzia a nei lo țhìn. Puan ven nî a ni bawk si a, kawng a nuam fahran lo nèn, ka muang viau a ni.
Ka kal hmâ ve riauin ka hria a; mahse, ka chhak lamah chuan sikul naupang pathum vêl chu ka hmu tho nia.
Ka ke dinglam rahna tùr step-ah tak chuan rûl hring ka hmu thut mai a, ka au chhuak thei lo. Second 10 vêl chu ka khawng tih ka hria! A lei a chhuah zak zak a, ka lam rawn hawi thla ngei chuan. Ka rilruin nambar ka chhiar a, pathum ka chhiar zo chiah tihah chuan ka inher thut a, ka kal tawhna lamah chuan chak zetin ka tlân thla leh ta a. Mi ka la su chawrh zui! Ka hlau lutuk a, nâ pawh ka hre lo!
"Engtizia nge?"
"Rûl... min ûm!"
Ka hlauh lutuk avàng chuan ka thâ a khùr nasa a, ka țawng pawh a khùr dar dar mai. Ka mi sutpa chu ka hriat mi a nih pawh ka hre chuang lo nain a kawr chu nghet zetin ka țhâm tlat a, ka ding țha hlei thei lo, ka thaw kâwk kâwk mai.
"A lian em?"
"Aw... min seh a tum a."
"Seh a tum che maw!!"
"Aw, a lei a chhuah nasa mai."
Rûl ka hmuhna lai chu ka kawhhmuh a, ani a kal hmasa a, keiin a kawrah pawtin a hnung chêtah ka zui bawk a, ka tha khùr a la reh loh avàng chuan ka țang țo mai a, ka thlan a tla bawrh bawrh bawk a.
"A awm lo."
"A va mak! Tah hian a awm ngei sia."
"I tlãn rî kha a hlau a ni ang?"
A kawr ka pawhna chu thlahin ka hawi kual vak vak a, hmuh tùr a awm tawh miah lo. Ka va ngei tak ém! Min hlau tùr tho si chu ka tlàn lêt hma khân kal bo daih mai tùr a nia, ka thlan a tla leh tawh a, inbual lo ang mai ka ni leh tawh!
"Seh che a tum chiah maw?"
"Aw, a lei a chhuah ka tih chu."
A insûm viau nain a nuih a zâ tih ka hmu thei mai. Eng lai chu nge nuihzatthlâk? Ka hlauh teh rêng nèn!
"Ka hlau chu min nuihzat a ni maw?"
Min chhâng lo, min hnungchhawn zâwngin a ding a, min la nuih reng tih ka hre tho.
"Nui zêl rawh, a nuihzatthlâkna ka hre ve lo ve."
Hmanhmawh zetin, ka puan ven châwi chhîngin step-ah chuan ka pên chho hmawk hmawk a, mipa ve si, hmeichhe hlau thlabâr nuihzat tlat ka hre ngai lo ve. A chiangkuang vak lo a ni ang.
Sikul ka thlen chuan lût duh lawk lovin thing hlimah thlifîm ka dawng leh rih a, ka tha khùr pawh a reh tawh a; ka thin erawh a ur deuh țùng thung.
Mi dang an lo kal hnuah chuan rûl ka hmuh thu chu ka hrilh ve hlawm a; mahse, thil thleng dang kha chu ka sawi lo. Kan pu ber Pu Hriata chuan,"A nih tak chu. Kalkawng hi sàm a ngai leh țan tawh rêng a ni, rannung dang pawh an rawn kal ang tih a hlauhawm tlat, hna thawh ni hmasa berah DDT pawh phul pah ila,"a lo ti charh charh a.
Sir Rova chuan,"A chuk hman lo che maw?"nui chung hian a ti a, kei pawh chuan nui chung vêk hian,"Min hlau lutuk a, a tlãn bo nghal daih,"ka ti ve a, mi dangte pawh chu an lo nui țhâ hlawm a. Fiamthute thawha kan nuih dar dar tâkah chuan ka thinur deuh țùng pawh chu a reh deuh huaiin ka hria.
Nilêng chuan hlim tak chuan hun ka hmang ve leh thei mai a, rûl pawh kha ka hre chhuak leh tawh lo. Kan hàw lamah erawh țhiante chu ka hmuhna lai chu ka kawhhmuh a, a len zâwngte min zâwt leh hnuhnawh a.
"Han rap fuh ngat ila chuan min seh chiang ngawt ang."
Miss Apuii a nui hak a, mi dangte pawh chu an lo nui ve zêl a, Sir Rova chuan," Seh chhin che se aw,"a ti vang vang a.
"I sual mai mai e a."
"Miss Bektei tak hi chu aw...! Rûlin mi a seh ngai lo, a chuk țhìn alawm."
Ka dang lek lek mai. Nichina an nuih pawh kha hei hi a lo nih chiah àwm hi. A nih chuan, tukina ka sutpa pawhin min nuih char char tak kha, 'seh' ka tih vàng chiah a lo nih dáwn tho hi. Ho e, ka hman pawlh a ni ve mai.
"Chu pawh ni se, chuk leh seh chu a inang deuh tho alawm."
"A nih chuan, ka lo seh chhin dáwn che em ni ang? Chuan, ka chuk bawk ang che a, a danglamna i hre thei ang."
Pu ber chuan,"Rova chu i khaw hawi a zîm deuh zâwk a nih ka ring. Bektei chuan rûlin mi a seh a hmu tawh a ni maithei asin,"a lo ti a.
Madam Nui chuan,"A ni ngei ngei ang, kei chu seh tih a hmang pawh kha a tân chuan a dik lo ka tihsak miah lo a nia,"a lo ti ve a, an nuih deuh țhû dànah 'seh' tih chu an la nuih tih ka hre thei tho.
Nilaini chawhnuah hnà kan thawk a, sikul kawng chu kan sãm fai a, rûl kha ka hmuh leh ka rin deuh avàngin kei chu ka ți hle. Pahnih chu an that ta ngei a, pakhat zâwk chu ka hmuh kha a ni ngei ngei ang.
Sikul bula forget-me-not tlar tuar pawh chu kan sât a, mawi takin kan sât a, pangpâr kan phunte pawh a lo pâr ve tawh a,hawi vêl pawh a nuam tawh lutuk. Chawlh laiin naupang țhenkhat nèn football kan khèl a, ka nui nasa ngei mai.
Zànah chuan ka rawl lutuk a, ka mu hmâ ve e ka ti a, mu pah chuan ka tih dàn ngai tê Fb-a story chu ka chhiar leh phawt a, ka meng rei leh ta phian.
Zîngah peih lo tâwkin ka tho a, ka rawl chu a zual telh telh ni maiin ka hria. Kan sikul kawng a chho bawk si a, hàw kawng lam rilruin a ngaihtuah a, ka huphurh nghal țûng mai.
Chawhnuah PTA Meeting kan nei dáwn a, naupang chu kan hàwtîr vek a. Ka rawl lutuk avàng chuan ka damlo deuh niin ka hre lehnghal a, a zia lo tak tak.
Kan office hi a tê deuh a, chuvàng chuan devotion hall-ah meeting chu kan nei ang. Apuii nèn hian nula kan ni a, tlangvâl pahnih Rova leh Hminga an awm bawk. Chuan, Pu ber hi nupui fanau nei tawh niin, madam Nui pawh pasal fanau nei tawh tho a ni.
Apuii nèn chuan toilet-ah kan tawikhawmuan avàng chuan devotion hall-a kan luh chuan an lo țhu țhap tawh a, a zahthlâk ve det. Ka kal hmasa zâwk a, țhutna lo awm remchâng ber, mi dang pawh an lo țhut tawhnaah chuan kan țhu ve ta ringawt a.
Kan meeting vawi khatna a nih vàngin self-introduction kan nei vek a, han rèl tùr pawimawh ém ém awm lo mah se, Pu ber chuan PTA pawimawhna leh a awmziate a sawi fiah a, nu leh pa lam ațang pawhin sawi duh hrim hrim neite tân hun a hawng a. Apuii nèn chuan ei tùr siam tùrin kan chhuak ta daih a.
Khua a lum avàngin squash tui vâwt leh chhang kan sem a, làwmthu an lo sawi tliar tliar a, sawi ve miah lo pakhat a awm!
Makti rilru deuhin ka en leh zawk țhìn a, chu pa chu a che ve sek lo va, a hawi kual ve sek bawk lo. A țhut ngaiin a țhu deuh reng a,a țawng ve miah lo bawk. Mahni induhtâwk tak chu a nih ve dáwn hi, tu pa tak ni ve ang maw? A nih loh pawhin, tu guardian tak ni ang maw? Self-introduction kan neih lai khan tlar hmâ bera kan țhut avàngin ka hawi lêt vak ngam lo va, ka hriat loh phah.
Hàw kawng chu ka huphurh ngei mai. Kawng chhuk kal hi rawl tân chuan a ngeiawm ka ti, mi hriat ve si loh hian 'aiah' tuar tuar a awl a, a zahthlâk duh.
Zàwi muangin ka kal a, kal chak thei hek lo î. Chuti chung pawh chuan ka țhen sak sak, Apuii chuan,"Nang hi i khawi lai nge nâ a?"a ti nghe nghe a.
"Nimin khân football ka khelh ve kha, ka rawl lutuk."
Ka kal sawih sawih ni maiin ka hria, mi dang chuan min kal pêl sup sup mai. A hmaa rûl ka hmuhna hmun kha ka thlen chuan ka hawi kual leh nasa mai, hmuh leh ka inring deuh emaw ni.
"A seh lo vang che."
Ka phu deuh zawk lehnghal!! Min betu lam chu ka hawi vat a, ka ner sak bawk. Ka mal rawl lutuk ka her dan a dik lo deuh a, a na zawk mai.
"Engin maw?"
"I hre zâwk ang chu."
He pa hi induhtâwk zet kha a nih hi, țawng ve mang lo kha, inla ngêng ve chi. Ka ei lo ropui, eng vak ni lova inla eng emaw ve ringawt.
Ka kalsan nghal, ka kal chak thei lo mai pawh a. Ka pén leh tùr chiah chu ka kãng ta nawlh mai, eng vàng nge, engtin nge , second rei vak lo chu ka che lo; mahse, min pawmtu chu amah a ni tih ka hriat hnu chuan ka tãl nghal a.
"Min thlah nghal rawh, i zak chai lo'm ni?"
Min thlah nghal, zak lo hi ka va ti tak. Kan hmaah leh kan hnungah pawh mi dang kal an awm a, ka hmêl hriat leh țhian pawh a ni lo va, zak lo ka ti lutuk. Chuan, keimah pawh ka zak. Min tizak hle a ni.
Thinrim zet hian a kûn hniam chu ka melh a, chutah, a kuta a thil rawn ken chhuah ka hmuh tâkah chuan ka kut chuan ka hmui ka hup vat. Rûl a ni lehpek!!! Ka hmui chu hup vat lo ila chuan ka țê nasa ngawt ang chu.
Rûl âng chap chap chu enin min rawn en leh a,"A seh lovang che ka tih kha,"a ti nghut a, chutah, rûl chu en lehin,"Zàn i mut dáwnah zo-artui hel hîpin damdawi ei ang che,"a ti leh nghut a, chak deuh hian step-ah chuan a chhuk thla ta nghal a.
Ka che thei lo, ka hlau lutuk! Kha pa khân rûl ka rah tùr kha a lo hmu a ni chiang, min chhan nân min pawm a ni ngei mai. Kei lah chuan thinrimin ka la àn khum zui. A va zahthlâk tak. Ka thu sawi lah kha ka la lêt thei tawh miah lo, àn khum ahnêka làwmthu hrilh hial tùr ka ni asin.
A hming ka hre miah lo. Chubâkah, a hmêl kha ka hmuh ngai a ni pawhin ka hre lo, kei ai chuan a upa phawt ang a, pa a ni tawh ngei bawk ang. Ka zak e, ka àn khum ber mai kha ka zak, thil hre chiang hmasa lova àn bawrh bawrh ka chìn hi ka sim a ngai tawh.
Làwmthu ka sawi ngei a ngai ang. Mahse, engtin nge a hming ka hriat tâk ang? A hmêl lah ka hre chiang teh chiam lo bawk; mahse, hmu leh ta ngat ila chuan ka hre thei mai chuan ka ring.
Zàn mutnaah chuan vawiina thil thleng kha ka ngaihtuah leh a, kha pa kha a che rang tak zet a ni. Min rawn pawm kãng lo se chuan rûl kha ka rap ngei ang a,min seh ngei ang. Ni lo, min chuk ngei ang tih zâwk tùr a ni tak e. A aw kha ka hriat hnu a ang deuh riauin ka hria, khawiah nge ni ang? Ka ngaihtuah nasat poh leh ka hre chhuak zo lo ni maiin ka hria. E, mut dáwnah artui leh damdawi ei tùrin min hrilh tak kha, eng atân nge ni ang le? Rawl tân hian a țha tihna em ni ang?
Apuii zâwt teh ang, a lo hre phian thei asin.
Um, a lo nih chiah hi. Kha pa khân ka kal dan ațang khân ka rawl tih a hria a ni chiang, a mak e. Mi dangin an hre ve miah si lo, thil chîk mi tak a nih àwm kha. Ka hmuh leh hunah chuan làwmthu ka hrilh ngei a ngai.
Zîngah chuan ka rawl chu a zia tak tak! Mak ka ti lutuk. Ka lãwm bawk si a, kha pa kha ka mitthla rauh rauh mai.
Inrinni YMA hnatlànnah ka hmu fuh ta. Zah pawh sawi lovin ka pan hnai a.
"Rûl laka min chhan vàng khân ka lãwm e, ka pu."
Min en zawk a, hmun dang a en leh nghal daih. A va polite lo chiang! Kei chuan ka tih tùr ka tlâk ta, min chhàn kher pawh a ngai chuang hlei nem le, ka hrilh duh ka hrilh a, a tâwk viau.
Apuii nèn kan inhmu a, min ko vat a.
"U Nunhlua bulah ka hmu tlat chein ka hria, in inhria a ni maw?"
Nunhlua maw a hming chu, a hming a mawi teh lul nèn, a polite lo ém a, a mawi tùr angin a mawi lo.
"Hre chuang nâng."
"I lo thawh ve pawh ka ring lo va."
"Mai mai a, YMA member ka ni ve tho alawm le."
Thlànmual kawng kan sât fai a, thlànmual kan tifai bawk. Nilênga thawh tùr a nih vàngin thingpui leh a hmeh an siam a, ka hah ve viau. A chhan chu heti ang hnà hi ka thawk ngai lo va, in chhûng chêt erawh ka thiamin ka thawk nasa. Hlo thlawh leh hlo sàm kher kher hi chu ka ti ngai lo va, ka hah hma hle a ni. Mahse, a hnu deuhah hmeichhiain mipa hnim thlawh fai sâ kan paih a,a zia ta phian. Ni a sa si a, thlan a luang zawih zawih mai. Hnatlângah hian ka thawk ve fo tawh a, ka in-fit thei thlâwt lo, ka hah ém ém ziah.
Rova leh Hminga pawh an lo thawk ve a, thingpui in chawlh kan neih laiin kan bulah an rawn țhu a, min rawn fiam leh ta a.
"Rûl i hmu leh em?"
"Hmu lo. 'Tinge a?"
"I hmu thei ém a."
"Awihawm loh, vawi khat chiah a nih kha ka hmuh."
"Rûl khân seh che a tum em ni kha?"
"I sual."
Rova țawng hre pha chin chu an lo nui dar dar a, ngei zet hian Rova chu ka va melh hrâ a, chùm pha ngat ila chuan ka chùm hnang chiang ngawt ang.
Apuii chuan,"A ho lutuk, i hmuh leh hunah Rova hi kan sehtîr tawh ang, seh tawt rawh se,"a lo ti ve a, chu chuan ka nuih a tiza a, ka nui bãwk bãwk a.
Thingpui no chu sengin kan tihfaipui ve a, mipa lamin kan sàm zawh loh tlêm la awm chu an sãm leh a. Hmeichhe țhenkhatte'n an lo pui a, no kan sil zawhah keini chuan tui kan sem leh thung a.
Tlangvâl an tam a, tui kan sem chu min lo fiam leh zauh țhìn a, senior ve viau tawh mah ila, a rûk chuan ka zak ve tho. Mipa ka hriat chian lohte phei hi chu ka melh vak ngai lo, biak pawh ka be khât, min biak erawh chuan țha takin ka chhâng mai. 'A induh reuh e' min tih țhin pawh ka ring, ka induh vàng a ni lo, mipa laka ka inthiarfihlìm duh vàng a ni.
Kan khuaah(ka ti ve tawh mai)hian mi pângngai pha chiah lo deuh tlângval pakhat, Làwma hi a awm a, tlangvâl dangte chuan a bulah chuan,"Kan vêng nulaah hian tunge chhe lo i tih ber?"tiin an lo zâwt a.
Ani chuan,"Bektei hi a ngo ber,"a ti deuh tlat a, ka nuih a za ang reng. A bul chiaha thawk Duha chuan,"U Làwm, ngo chu chhe lo i tihna a ni em?"a lo ti zauh a. Ani chuan,"Aw, ngo chu a țha alawm, hàng ai chuan. Bektei hi chuan min duh chiahin ka ring si lo va aw..."a ti deuh vang vang a, mi dang chu an lo nui țhâ hlawm a.
Apuii chuan,"U Làwma hi, bêm tawp mai la, i pà viau emaw ka lo ti a,"min rawn melh ralh pah chuan a ti a, ka nui nain ka ngei lek lek. A chhan chu heti ang hi ka be ve thiam lo, a hlei phian maithei bawk asin.
"Sawrkar hnathawk a ni bawk sia?"
"A lo duh che chuan sawrkar hnathawk bialpa i ni mai dáwn alawm."
Nui sak sak pah chuan tui chu ka sem zel a, Làwma chu an titipui zel bawk a. A tàwp ber ka pe dáwn chiah a, eng emaw hi ka pal khut a, ka petek dâwrh tùr chu kut tha chak zet hian min rawn man hman a, ka tlu lo chiah chiah!
"Ka lãwm e."
"Rûl i hmu leh chu a ni ém lo maw?"
Ka hria, he pa hi ka hria. Sikul kawnga ka sutpa kha a ni chiang lutuk. A țawng chu mi dang chuan an rawn hre kher lo maithei, ka tlu tùr inpal pawh kha mi dang chuan hmuh pawh min hmu kher lo ang, a sîr deuh hlek a.
A nungchang polite lo zet hi ka ngei. A ngeiawm thiam dàn ațang hian khawi lam nula mah a chhai thlu hian ka ring lo. Tlangvâl senior a ni ngei ngei ang, tlangvâl senior, eng mah ni chuang si lova duh uluk ém ém ringawt ang chi. Induhtâwk, inla ngêng, inla țawng duh lo vêl kha. Huh, ka ei hlawl lo.
Tui chu ka pe a, ka be tawh lo hrim hrim, ka pêk lai pawhin ka melh lo. Ka duhnaah chuan ka sual thiam ve thei ém!
"Miss, homework min pêk kha ka hre thiam lo va, ka zâwt chiang thei che ang em?"
"Aw le, lo kal la."
Dàwra ka kal haw lam chu kan sikul naupang, pâwl 9 zirlai, an class-ah pawh a thiam thei pâwl tak chuan min lo ko ding a, ka in luahah chuan ka inzui lût ta a.
Mi hming hi ka hre thei ve viau a; mahse, kumin kan zirlaite hi an hming a inang hlawm lutuk a, ka hriat pawlh hlawm tlat. Tuna min zuitu pawh hi a hming ka hre chiang leh tawh lo, 'Ruat' tih chu a tel tih erawh ka hre thung.
"Engtin nge an koh che kha?"
"Miss, 'Ruatdik' tiin min ko țhìn."
"Nih leh, in pâwla Ruatdika tih tho awm ve kha engtin nge in koh?"
"Ani kha chu 'Dika' kan ti a."
"A nih tak chu. Khawi le, i hriat thiam loh lai chu en ang hmiang."
*************
Ka hming chu Rebek Lalrengpuii a ni a, mite chuan 'Bekte' tiin min ko țhìn. Min kohna ang deuh hian ka lian lo va; mahse, kei aia liante hi ka awt bîk chuang lo. Ka pianah hian ka lung a awi tâwk a, hei ai hian sàn belh ila ka ti chuang hek lo. Lungawi lo pawh lo ni ta teh réng ila, engtin nge ka tih vak chuan ang? Engkima lungawi theite hi mi vànnei an ni mai. Mi dangte, nu leh pa chàwma inla parh deuh deuhte angin chàwm hlàwm ka ni lo va,keima thawh chhuah ngeia ka khawsa thei hi ka inchhuanna a ni. Mite angin ka hmelțha kher lo pawh a ni maithei, ka lian lo pawh a ni ang; mahse, Pathianin a duh taka a siam ka ni a, ka lung a awi ve tlat.
RMSA Secondary School, Zotuiah Mathematics zirtîrtu hna ka thawk mêk a, kumin hi kum 3 ka thawhna a lo ni ve ta. Ka len loh avàng hian chhaih ka hlawh țhìn hle a; mahse, ka ngai haw ngai lo, thu dik a ni miau si a. Min chhaihtute hian min hmuhsit vànga min chhaih an ni lo tih ka hre ve tho a, chhaih tâwk leka tê ka nih vàng a ni mai.
Ka kum phû lova ka hmêl a lan naupan vàng hian min zuam sual fo. Ka hmai hi a bial a, ka sam lah ka beng hnuai chen vêlah ka tan rual hmarh a, chal sam ka nei hlek bawk. Hmeichhe naupang ang min ti tâwk an awm a, ka lo lian fahran lo bawk nèn; mahse, feet 5 chu ka chuang ve tho asin. Hmeichhe naupang chu ka ni tawh bîk lo, nula kum 26 lai ka ni tawh.
Ka vun a ngo hle a, a châng chuan hrehawm ka ti lek lek fo. A hma chuan khua a lum hle lai pawhin thawmhnaw tê deuh leh bùl deuh ka ha ngam ngai lo; mahse, tunah hi chuan ka ngam vek tawh. Pathian min siam dàna lungawi mai tùr kan nihzia hi ka pawm thiam lutuk tawh a, ka duh zâwng apiang ka inbel hmiah hmiah tawh.
Thawhțanni a ni a, vawiin chu sikulah devotion ka hman hun a ni. Insiam pah chuan ka hun hman dàn tùr chu ka ngaihtuah pah rauh rauh a, inbuatsaih lâwk vak hi ka thiam lo va, a tla chawpa thil tih hi ka thiam zâwk țhìn. Ka nu khân min hau fo țhìn a; mahse, ka zàwm thei chuang lo.
Sikul pan chuan muangchângin ka kal a, sikul awmna hi tlâng deuh a nih avàngin ka hmanhmawh chuan ka hah thei lutuk a, chubâkah, thlan a tlà a, inbual pawhin awmzia a nei lo țhìn. Puan ven nî a ni bawk si a, kawng a nuam fahran lo nèn, ka muang viau a ni.
Ka kal hmâ ve riauin ka hria a; mahse, ka chhak lamah chuan sikul naupang pathum vêl chu ka hmu tho nia.
Ka ke dinglam rahna tùr step-ah tak chuan rûl hring ka hmu thut mai a, ka au chhuak thei lo. Second 10 vêl chu ka khawng tih ka hria! A lei a chhuah zak zak a, ka lam rawn hawi thla ngei chuan. Ka rilruin nambar ka chhiar a, pathum ka chhiar zo chiah tihah chuan ka inher thut a, ka kal tawhna lamah chuan chak zetin ka tlân thla leh ta a. Mi ka la su chawrh zui! Ka hlau lutuk a, nâ pawh ka hre lo!
"Engtizia nge?"
"Rûl... min ûm!"
Ka hlauh lutuk avàng chuan ka thâ a khùr nasa a, ka țawng pawh a khùr dar dar mai. Ka mi sutpa chu ka hriat mi a nih pawh ka hre chuang lo nain a kawr chu nghet zetin ka țhâm tlat a, ka ding țha hlei thei lo, ka thaw kâwk kâwk mai.
"A lian em?"
"Aw... min seh a tum a."
"Seh a tum che maw!!"
"Aw, a lei a chhuah nasa mai."
Rûl ka hmuhna lai chu ka kawhhmuh a, ani a kal hmasa a, keiin a kawrah pawtin a hnung chêtah ka zui bawk a, ka tha khùr a la reh loh avàng chuan ka țang țo mai a, ka thlan a tla bawrh bawrh bawk a.
"A awm lo."
"A va mak! Tah hian a awm ngei sia."
"I tlãn rî kha a hlau a ni ang?"
A kawr ka pawhna chu thlahin ka hawi kual vak vak a, hmuh tùr a awm tawh miah lo. Ka va ngei tak ém! Min hlau tùr tho si chu ka tlàn lêt hma khân kal bo daih mai tùr a nia, ka thlan a tla leh tawh a, inbual lo ang mai ka ni leh tawh!
"Seh che a tum chiah maw?"
"Aw, a lei a chhuah ka tih chu."
A insûm viau nain a nuih a zâ tih ka hmu thei mai. Eng lai chu nge nuihzatthlâk? Ka hlauh teh rêng nèn!
"Ka hlau chu min nuihzat a ni maw?"
Min chhâng lo, min hnungchhawn zâwngin a ding a, min la nuih reng tih ka hre tho.
"Nui zêl rawh, a nuihzatthlâkna ka hre ve lo ve."
Hmanhmawh zetin, ka puan ven châwi chhîngin step-ah chuan ka pên chho hmawk hmawk a, mipa ve si, hmeichhe hlau thlabâr nuihzat tlat ka hre ngai lo ve. A chiangkuang vak lo a ni ang.
Sikul ka thlen chuan lût duh lawk lovin thing hlimah thlifîm ka dawng leh rih a, ka tha khùr pawh a reh tawh a; ka thin erawh a ur deuh țùng thung.
Mi dang an lo kal hnuah chuan rûl ka hmuh thu chu ka hrilh ve hlawm a; mahse, thil thleng dang kha chu ka sawi lo. Kan pu ber Pu Hriata chuan,"A nih tak chu. Kalkawng hi sàm a ngai leh țan tawh rêng a ni, rannung dang pawh an rawn kal ang tih a hlauhawm tlat, hna thawh ni hmasa berah DDT pawh phul pah ila,"a lo ti charh charh a.
Sir Rova chuan,"A chuk hman lo che maw?"nui chung hian a ti a, kei pawh chuan nui chung vêk hian,"Min hlau lutuk a, a tlãn bo nghal daih,"ka ti ve a, mi dangte pawh chu an lo nui țhâ hlawm a. Fiamthute thawha kan nuih dar dar tâkah chuan ka thinur deuh țùng pawh chu a reh deuh huaiin ka hria.
Nilêng chuan hlim tak chuan hun ka hmang ve leh thei mai a, rûl pawh kha ka hre chhuak leh tawh lo. Kan hàw lamah erawh țhiante chu ka hmuhna lai chu ka kawhhmuh a, a len zâwngte min zâwt leh hnuhnawh a.
"Han rap fuh ngat ila chuan min seh chiang ngawt ang."
Miss Apuii a nui hak a, mi dangte pawh chu an lo nui ve zêl a, Sir Rova chuan," Seh chhin che se aw,"a ti vang vang a.
"I sual mai mai e a."
"Miss Bektei tak hi chu aw...! Rûlin mi a seh ngai lo, a chuk țhìn alawm."
Ka dang lek lek mai. Nichina an nuih pawh kha hei hi a lo nih chiah àwm hi. A nih chuan, tukina ka sutpa pawhin min nuih char char tak kha, 'seh' ka tih vàng chiah a lo nih dáwn tho hi. Ho e, ka hman pawlh a ni ve mai.
"Chu pawh ni se, chuk leh seh chu a inang deuh tho alawm."
"A nih chuan, ka lo seh chhin dáwn che em ni ang? Chuan, ka chuk bawk ang che a, a danglamna i hre thei ang."
Pu ber chuan,"Rova chu i khaw hawi a zîm deuh zâwk a nih ka ring. Bektei chuan rûlin mi a seh a hmu tawh a ni maithei asin,"a lo ti a.
Madam Nui chuan,"A ni ngei ngei ang, kei chu seh tih a hmang pawh kha a tân chuan a dik lo ka tihsak miah lo a nia,"a lo ti ve a, an nuih deuh țhû dànah 'seh' tih chu an la nuih tih ka hre thei tho.
Nilaini chawhnuah hnà kan thawk a, sikul kawng chu kan sãm fai a, rûl kha ka hmuh leh ka rin deuh avàngin kei chu ka ți hle. Pahnih chu an that ta ngei a, pakhat zâwk chu ka hmuh kha a ni ngei ngei ang.
Sikul bula forget-me-not tlar tuar pawh chu kan sât a, mawi takin kan sât a, pangpâr kan phunte pawh a lo pâr ve tawh a,hawi vêl pawh a nuam tawh lutuk. Chawlh laiin naupang țhenkhat nèn football kan khèl a, ka nui nasa ngei mai.
Zànah chuan ka rawl lutuk a, ka mu hmâ ve e ka ti a, mu pah chuan ka tih dàn ngai tê Fb-a story chu ka chhiar leh phawt a, ka meng rei leh ta phian.
Zîngah peih lo tâwkin ka tho a, ka rawl chu a zual telh telh ni maiin ka hria. Kan sikul kawng a chho bawk si a, hàw kawng lam rilruin a ngaihtuah a, ka huphurh nghal țûng mai.
Chawhnuah PTA Meeting kan nei dáwn a, naupang chu kan hàwtîr vek a. Ka rawl lutuk avàng chuan ka damlo deuh niin ka hre lehnghal a, a zia lo tak tak.
Kan office hi a tê deuh a, chuvàng chuan devotion hall-ah meeting chu kan nei ang. Apuii nèn hian nula kan ni a, tlangvâl pahnih Rova leh Hminga an awm bawk. Chuan, Pu ber hi nupui fanau nei tawh niin, madam Nui pawh pasal fanau nei tawh tho a ni.
Apuii nèn chuan toilet-ah kan tawikhawmuan avàng chuan devotion hall-a kan luh chuan an lo țhu țhap tawh a, a zahthlâk ve det. Ka kal hmasa zâwk a, țhutna lo awm remchâng ber, mi dang pawh an lo țhut tawhnaah chuan kan țhu ve ta ringawt a.
Kan meeting vawi khatna a nih vàngin self-introduction kan nei vek a, han rèl tùr pawimawh ém ém awm lo mah se, Pu ber chuan PTA pawimawhna leh a awmziate a sawi fiah a, nu leh pa lam ațang pawhin sawi duh hrim hrim neite tân hun a hawng a. Apuii nèn chuan ei tùr siam tùrin kan chhuak ta daih a.
Khua a lum avàngin squash tui vâwt leh chhang kan sem a, làwmthu an lo sawi tliar tliar a, sawi ve miah lo pakhat a awm!
Makti rilru deuhin ka en leh zawk țhìn a, chu pa chu a che ve sek lo va, a hawi kual ve sek bawk lo. A țhut ngaiin a țhu deuh reng a,a țawng ve miah lo bawk. Mahni induhtâwk tak chu a nih ve dáwn hi, tu pa tak ni ve ang maw? A nih loh pawhin, tu guardian tak ni ang maw? Self-introduction kan neih lai khan tlar hmâ bera kan țhut avàngin ka hawi lêt vak ngam lo va, ka hriat loh phah.
Hàw kawng chu ka huphurh ngei mai. Kawng chhuk kal hi rawl tân chuan a ngeiawm ka ti, mi hriat ve si loh hian 'aiah' tuar tuar a awl a, a zahthlâk duh.
Zàwi muangin ka kal a, kal chak thei hek lo î. Chuti chung pawh chuan ka țhen sak sak, Apuii chuan,"Nang hi i khawi lai nge nâ a?"a ti nghe nghe a.
"Nimin khân football ka khelh ve kha, ka rawl lutuk."
Ka kal sawih sawih ni maiin ka hria, mi dang chuan min kal pêl sup sup mai. A hmaa rûl ka hmuhna hmun kha ka thlen chuan ka hawi kual leh nasa mai, hmuh leh ka inring deuh emaw ni.
"A seh lo vang che."
Ka phu deuh zawk lehnghal!! Min betu lam chu ka hawi vat a, ka ner sak bawk. Ka mal rawl lutuk ka her dan a dik lo deuh a, a na zawk mai.
"Engin maw?"
"I hre zâwk ang chu."
He pa hi induhtâwk zet kha a nih hi, țawng ve mang lo kha, inla ngêng ve chi. Ka ei lo ropui, eng vak ni lova inla eng emaw ve ringawt.
Ka kalsan nghal, ka kal chak thei lo mai pawh a. Ka pén leh tùr chiah chu ka kãng ta nawlh mai, eng vàng nge, engtin nge , second rei vak lo chu ka che lo; mahse, min pawmtu chu amah a ni tih ka hriat hnu chuan ka tãl nghal a.
"Min thlah nghal rawh, i zak chai lo'm ni?"
Min thlah nghal, zak lo hi ka va ti tak. Kan hmaah leh kan hnungah pawh mi dang kal an awm a, ka hmêl hriat leh țhian pawh a ni lo va, zak lo ka ti lutuk. Chuan, keimah pawh ka zak. Min tizak hle a ni.
Thinrim zet hian a kûn hniam chu ka melh a, chutah, a kuta a thil rawn ken chhuah ka hmuh tâkah chuan ka kut chuan ka hmui ka hup vat. Rûl a ni lehpek!!! Ka hmui chu hup vat lo ila chuan ka țê nasa ngawt ang chu.
Rûl âng chap chap chu enin min rawn en leh a,"A seh lovang che ka tih kha,"a ti nghut a, chutah, rûl chu en lehin,"Zàn i mut dáwnah zo-artui hel hîpin damdawi ei ang che,"a ti leh nghut a, chak deuh hian step-ah chuan a chhuk thla ta nghal a.
Ka che thei lo, ka hlau lutuk! Kha pa khân rûl ka rah tùr kha a lo hmu a ni chiang, min chhan nân min pawm a ni ngei mai. Kei lah chuan thinrimin ka la àn khum zui. A va zahthlâk tak. Ka thu sawi lah kha ka la lêt thei tawh miah lo, àn khum ahnêka làwmthu hrilh hial tùr ka ni asin.
A hming ka hre miah lo. Chubâkah, a hmêl kha ka hmuh ngai a ni pawhin ka hre lo, kei ai chuan a upa phawt ang a, pa a ni tawh ngei bawk ang. Ka zak e, ka àn khum ber mai kha ka zak, thil hre chiang hmasa lova àn bawrh bawrh ka chìn hi ka sim a ngai tawh.
Làwmthu ka sawi ngei a ngai ang. Mahse, engtin nge a hming ka hriat tâk ang? A hmêl lah ka hre chiang teh chiam lo bawk; mahse, hmu leh ta ngat ila chuan ka hre thei mai chuan ka ring.
Zàn mutnaah chuan vawiina thil thleng kha ka ngaihtuah leh a, kha pa kha a che rang tak zet a ni. Min rawn pawm kãng lo se chuan rûl kha ka rap ngei ang a,min seh ngei ang. Ni lo, min chuk ngei ang tih zâwk tùr a ni tak e. A aw kha ka hriat hnu a ang deuh riauin ka hria, khawiah nge ni ang? Ka ngaihtuah nasat poh leh ka hre chhuak zo lo ni maiin ka hria. E, mut dáwnah artui leh damdawi ei tùrin min hrilh tak kha, eng atân nge ni ang le? Rawl tân hian a țha tihna em ni ang?
Apuii zâwt teh ang, a lo hre phian thei asin.
Um, a lo nih chiah hi. Kha pa khân ka kal dan ațang khân ka rawl tih a hria a ni chiang, a mak e. Mi dangin an hre ve miah si lo, thil chîk mi tak a nih àwm kha. Ka hmuh leh hunah chuan làwmthu ka hrilh ngei a ngai.
Zîngah chuan ka rawl chu a zia tak tak! Mak ka ti lutuk. Ka lãwm bawk si a, kha pa kha ka mitthla rauh rauh mai.
Inrinni YMA hnatlànnah ka hmu fuh ta. Zah pawh sawi lovin ka pan hnai a.
"Rûl laka min chhan vàng khân ka lãwm e, ka pu."
Min en zawk a, hmun dang a en leh nghal daih. A va polite lo chiang! Kei chuan ka tih tùr ka tlâk ta, min chhàn kher pawh a ngai chuang hlei nem le, ka hrilh duh ka hrilh a, a tâwk viau.
Apuii nèn kan inhmu a, min ko vat a.
"U Nunhlua bulah ka hmu tlat chein ka hria, in inhria a ni maw?"
Nunhlua maw a hming chu, a hming a mawi teh lul nèn, a polite lo ém a, a mawi tùr angin a mawi lo.
"Hre chuang nâng."
"I lo thawh ve pawh ka ring lo va."
"Mai mai a, YMA member ka ni ve tho alawm le."
Thlànmual kawng kan sât fai a, thlànmual kan tifai bawk. Nilênga thawh tùr a nih vàngin thingpui leh a hmeh an siam a, ka hah ve viau. A chhan chu heti ang hnà hi ka thawk ngai lo va, in chhûng chêt erawh ka thiamin ka thawk nasa. Hlo thlawh leh hlo sàm kher kher hi chu ka ti ngai lo va, ka hah hma hle a ni. Mahse, a hnu deuhah hmeichhiain mipa hnim thlawh fai sâ kan paih a,a zia ta phian. Ni a sa si a, thlan a luang zawih zawih mai. Hnatlângah hian ka thawk ve fo tawh a, ka in-fit thei thlâwt lo, ka hah ém ém ziah.
Rova leh Hminga pawh an lo thawk ve a, thingpui in chawlh kan neih laiin kan bulah an rawn țhu a, min rawn fiam leh ta a.
"Rûl i hmu leh em?"
"Hmu lo. 'Tinge a?"
"I hmu thei ém a."
"Awihawm loh, vawi khat chiah a nih kha ka hmuh."
"Rûl khân seh che a tum em ni kha?"
"I sual."
Rova țawng hre pha chin chu an lo nui dar dar a, ngei zet hian Rova chu ka va melh hrâ a, chùm pha ngat ila chuan ka chùm hnang chiang ngawt ang.
Apuii chuan,"A ho lutuk, i hmuh leh hunah Rova hi kan sehtîr tawh ang, seh tawt rawh se,"a lo ti ve a, chu chuan ka nuih a tiza a, ka nui bãwk bãwk a.
Thingpui no chu sengin kan tihfaipui ve a, mipa lamin kan sàm zawh loh tlêm la awm chu an sãm leh a. Hmeichhe țhenkhatte'n an lo pui a, no kan sil zawhah keini chuan tui kan sem leh thung a.
Tlangvâl an tam a, tui kan sem chu min lo fiam leh zauh țhìn a, senior ve viau tawh mah ila, a rûk chuan ka zak ve tho. Mipa ka hriat chian lohte phei hi chu ka melh vak ngai lo, biak pawh ka be khât, min biak erawh chuan țha takin ka chhâng mai. 'A induh reuh e' min tih țhin pawh ka ring, ka induh vàng a ni lo, mipa laka ka inthiarfihlìm duh vàng a ni.
Kan khuaah(ka ti ve tawh mai)hian mi pângngai pha chiah lo deuh tlângval pakhat, Làwma hi a awm a, tlangvâl dangte chuan a bulah chuan,"Kan vêng nulaah hian tunge chhe lo i tih ber?"tiin an lo zâwt a.
Ani chuan,"Bektei hi a ngo ber,"a ti deuh tlat a, ka nuih a za ang reng. A bul chiaha thawk Duha chuan,"U Làwm, ngo chu chhe lo i tihna a ni em?"a lo ti zauh a. Ani chuan,"Aw, ngo chu a țha alawm, hàng ai chuan. Bektei hi chuan min duh chiahin ka ring si lo va aw..."a ti deuh vang vang a, mi dang chu an lo nui țhâ hlawm a.
Apuii chuan,"U Làwma hi, bêm tawp mai la, i pà viau emaw ka lo ti a,"min rawn melh ralh pah chuan a ti a, ka nui nain ka ngei lek lek. A chhan chu heti ang hi ka be ve thiam lo, a hlei phian maithei bawk asin.
"Sawrkar hnathawk a ni bawk sia?"
"A lo duh che chuan sawrkar hnathawk bialpa i ni mai dáwn alawm."
Nui sak sak pah chuan tui chu ka sem zel a, Làwma chu an titipui zel bawk a. A tàwp ber ka pe dáwn chiah a, eng emaw hi ka pal khut a, ka petek dâwrh tùr chu kut tha chak zet hian min rawn man hman a, ka tlu lo chiah chiah!
"Ka lãwm e."
"Rûl i hmu leh chu a ni ém lo maw?"
Ka hria, he pa hi ka hria. Sikul kawnga ka sutpa kha a ni chiang lutuk. A țawng chu mi dang chuan an rawn hre kher lo maithei, ka tlu tùr inpal pawh kha mi dang chuan hmuh pawh min hmu kher lo ang, a sîr deuh hlek a.
A nungchang polite lo zet hi ka ngei. A ngeiawm thiam dàn ațang hian khawi lam nula mah a chhai thlu hian ka ring lo. Tlangvâl senior a ni ngei ngei ang, tlangvâl senior, eng mah ni chuang si lova duh uluk ém ém ringawt ang chi. Induhtâwk, inla ngêng, inla țawng duh lo vêl kha. Huh, ka ei hlawl lo.
Tui chu ka pe a, ka be tawh lo hrim hrim, ka pêk lai pawhin ka melh lo. Ka duhnaah chuan ka sual thiam ve thei ém!
Comments
Post a Comment