☆RUATDIKA☆- 11

☆RUATDIKA☆- 11 By Dingdi Pachuau


"Hetiang hi ti suh."


"Hmeichhe luhlul tukzal hi nuam ka tih zâwng tak a ni."


A kut lut ham hamin ka taksa a chùl chuan ka mûr uai uai thei. Chutah a rawn chûl chhak deuh deuh a, ka kawrhnuai a rawn thleng ta, ni lo, ka tâl nasa sauh a.


"Khawngaihin, ti suh?"


"Ka thu i awih tawh ang em?"


"Aw, ka fâwp ang che." Hetia ka tih loh chuan ka hneh lo ropui si a, bâkah,  nuam ka ti dáwn tlat, thil 'pawi' zâwk a thleng thei. Ani fawh ringawt chu a pawi hran lo ang chu maw, ka râi thei bawk hek lo ang.


"Țang buai tawh suh ang che."


A rawn kûn hniam nghal zat a, ka hmui, na zeta min fawh bawrh bawrh avànga na țân tawh chu dîm ang reng deuh hian a rawn fâwp a, ka rin loh dàn deuh a nih avàngin ka lo chhâng lêt lawk lo lehnghal a.


"Daw peih lutuk!"


A che sawn tùr chu ka lu kànin ka han fâwp a, ka thlah duh lo. Min fâwp lêt duh bîk țhak lo nia; mahse, ka tàwpsan chuang lo ang.


A hnuah chuan min fâwp lêt ta, min dîm tawh miah lo. Ka hmui na hlar tawh pawh chu naktûkah chuan a vûng ngeiin ka ring, zanin chu min fâwp mai mai teh se, phuba a lâk ve dàn a ni mai, a hek lo ém mai.


A lei chu zei zet hian ka ka chhûng thûk zâwkah rawn luhtîrin duhthawh takin min fâwp a, hei zet chuan ka thluak a tibuai hneh kher mai. Maimichhîng chialin ka thiam dàn dànin ka lo chhâng lêt a, nuam ka ti kher mai. Hetiang rêng rêng hian infawh hi a lo nuam thei ang tih ka ring pha lo rêng rêng.


Ka thâwk a dik lo țan, zauthauna țha lo takin ka chhûng rilah hna a thawk țan a, ka lungphu  a dik lovin ka marphute chu a rang ut utin ka hria.


Ka hmuia fawh mai duh tâwk lo chuan ka nghâwngah a fâwp a, thaw hak hak chungin nuamti zet hian ka lo dawh hârh hârh a, ka beng kâwmah fâwpin ka hmuiah bawk a rawn fâwp leh a, duhthawh takin ka lo fâwp lêt tâwn tâwn a, tunah tak hi chuan kei tluka zei tùr hi ka hre bîk lo.


"I zei tak zet."


Kha maw, ka tih rêng kha. Kan pahnih chuan kan thâwk dàn a mumal tawh lo va, infawh mai ni lo, a aia thui thlen kan châk ve ve a ni ngei ang.


Ruatdika phone a rawn ri ta. Ka phu zawk a, Ruatdika ka fawh pawh chu ka tàwp chat mai, a phone anchhia a lawh sup chu ka hria. Muang chângin a tho a, kei pawh ka zalèn veleh rang zetin ka țhu chhuak a, ka sam ka huih țha sawt sawt a, tlêma tlêmah kawngpuiah ka zahawmna ka hloh țêp a lo ni.


Rei inbe lovin a phone chu a dah nghal a, ka en duh lo, ka zak. A lakah chuan hmeichhe hurherh tak chu ka ang ngawtin ka ring, ka awm dàn khân a lantîr miau a ni.


"Ka thil sawi kha ngaihtuah ang che."


Eng ber kha maw? Ka room-a rawn riah kha maw? Ni lo, thil theih loh a ni, hmeichhe room-a mipa a riah chuan an tih tùr a hriat sa vek. Chutah, ka pi a awm ve lehnghal a, tihchi loh lutuk. A chi loh a ni tawp.


"A tlai tawh a nia."


"Inngaihtuah nân zanin hun i nei."


In kan thlen hnuah pawh chuan kan inbe tawh lo, en pawh ka en ngam tawh lo. Ka awm dàn kha a zahthlâk ka ti, ka pi hma chhawn leh pawh min tizak zo vek tawh e a.


Mut hmunah chuan ka ngaihtuah nasa mai a, ka hnial phawt ang. Ka theih chin chu ka hnial ang, Angel-i hnuh luh loh hrâm ka duh bawk si, ani tel lovin engtin nge kei teh lul hi ka khawsak theih ang? Ruatdika reng reng pawh bialnu a nei reng alawm, heti zâwng kher hi chu a tihchi loh rêng rêng.


Mi fawh erawh a va zei teh lul ém! Ka hmui chu ka han khawih a, a lo vûng deuh țan tawh tak tak! Ka tawh zâwng pawh chuan a nâin a thîp deuh hlar mai. Min dîm lo teh lam lutuk a, a thinrim chuan a tawrhhlelhawm thei khawp ang le.



Ruatdika
~~~~~~~

Ani anga hmeichhe luhlul hi ka la hre miah lo! A naupan nèn, a huaisen ka ti viau bawk. Ka bialnute leh hmeichhe dang bula ka awm dàn ni miah lovin a bulah hian ka awm ve ziah lehnghal, ka insûm thei țhìn lo. A duh loh zâwng thil ka sawi vàngin ka hmaiah min bêng ngam nia!! Min bêng ngamtu ka vawi khat tawnna!! Hmeichhe kutthlâk hi mipa tih tùr nia ka ngaih loh vàng chiahin a him a ni, hmeichhe mak tak chu a ni.


Khumah muin ka ngaihtuah vang vang a, he nu hi ka tukzal châk a ni! Sakawr tuai tìr tê, la sawizawi loh, ngampa ru riau, ți deuh tho bawk si leh kawlhsen ru phian bawk si hi ka tehkhin a ni. Chuan, a sawizawitu nih ka duh, ka sawizawi hmin fê hnuah chuan...


Ka cousin tak tak Angel-i chu eng mize pu tak ni ang maw? Ama remruatna ringawt chuan a țhiannu Zorini hian a ai a  rawn awh dáwn lo chiang sa, an pahniha remruatna a ni. Tu rawt chhuah hmasak nge ni ang? Angel-i hi a rawn inlan ngam loh dànah ama rawt chhuah a ni ang a, Zorini hi a thlêm a ni ngei ang. Chuan, Angel-i hian ka pi te leh a nu leh pa inkâr zawng zawng a hre ngei ang.


Zorini chuan chhûngte a nei lo. Fahrah niin Mizoramah a awm peih lo a ni si, Chennai-ah chuan engtia Angel-i nèn inchhar nge an nih ang? Zawhna a va tam ém! Pawimawh ber chu Angel-i tak tak zâwk hmuh hi a ni, engtin nge ka hmuh theih ang aw? Hotel-ah hna a thawk a nih chuan a inchâwm zo khawp ang a, pawisa tlêm tham chuan thlèm a har deuh ang, thlèm chhuah dàn ka ngaihtuah a ngai.


Zorini thung hi chu, ka la ngaihtuah țha ang, ka mit hmuh ata hi ka kal botîr lo ang, ka sawizawi duh tlat. He a lem channaa Angel-i hnuh luh ve a duh lo tlat mai hi eng nge a chhan ni ang? Sum eng zâta tamin nge an lo inchhawr hrep ni? Hetiang a nih chuan Zorini hi ka ngaih ang kha a lo ni lo maithei, pawisa a nei lutuk lo tihna a ni ngei ang. Ka lo puh chhe lutuk deuh a ni maithei.


Zîngah morning walk ka nei leh a, ka ngaihtuahnaah chuan Zorini hlîr mai a lang zut zut. A nui hmel leh a thinur hmel te, mitmeng ling hlar maia min melh kar mai te, a hmui sexy zet mai a sexy-zia hre map lova a'n seh kual vel te, huish, he nu hian min ti â zo dáwn! A hmui ringawt pawh ka ngaihtuah ta tluk tluk chu a nih tâk hi! Kum 30 dáwn vâl tân chuan a âtthlâk deuh chu a ni.


Ina ka haw chuan ka pi chu a lo tho tawh, sexy-doll chu a la tho lo em ni le? Tui ka in a, room-ah ka chho, step-ah kan intâwk. A thawhna a la rei vak lo a ni maithei, a hmui a  vûng kawh lah mai!! Engtizia nge le? Khuaiin a zûk êm ni? Chu khuai chuh!!


A hmui kawh pah chuan,"Engtizia nge?"ka ti ringawt a, rum zeta min melhin," I hriat a ngai lo, i sual vàng a nih hi,"a ti nghauh a, chak zetin a tlân chhuk ta nghal a.


Ka sual vàng. Eng nge a awmzia? Ka sual vàngin a hmui a vûng daih maw?! Nizànah ka bêng lo, min bêng zâwk a nih kha. Min ben man ka fâwp a, ka fâwp bawrh bawrh a nih kha.


Shower hnuaiah chuan ka nui suk suk mai. Nizàna ka fawhna a nih chiah kha, ka sehsak lo va, a la vànnei zâwk te chu ka ti deuh. Hm, mahse, ka insùm deuh chu a ngai a nih dáwn hi, ka la fâwp leh duh dáwn si a, dìm deuh taka ka tih loh chuan nâ a tih chuan ka tân pawh a nuam dáwn miah lo.


Chaw kan ei laiin ka piin," Angel Bawihte, i hmui chu engtizia nge ni, kha a va vûng nasa ve?"tiin a zâwt chùl a. Ka en zauh a, a chhànna ka hre châk khawp, engtiangin nge dâwt a sawi tâk ang?


"Khuai nghal deuhin nizànah a zûk a."


Khuai nghal deuh. Ka nui suk, a sawi mawi thiam khawp mai.


"A va zia lo ve!! I that em?"


"That ila ka ti khawp mai, ka rap pêr vek ang!"uar zet hian a ti tân tân a, mit ko sàn âk hian ka en phei a, ani erawh chuan rum deuh hian min lo en thung a. A thinrim a hrîkthlâk vena chu rum deuha min melh hi a ni mai, ka engah mah a thawk chhe tê lo.


"Vûrin dep rawh."


"Bawiha, tuin nge maw khuai seh vûra dep ngai le?"


"Vûng tân a nia ka tih,"tiin ka tho nghal a.


Ka pi chuan Zorini chu enin," A pawi ém mai. Vawiin chu i u hi zui ve la ka ti asin le,  kâr hnih vêl bâk zuina hun i nei dáwn chuang lo va; mahse, vawiin chu zui lo phawt mai rawh,"a ti barh barh a.


Zorini ka bulah a lo kal ve tawh dáwn, a nuam viau ang chu!


Nizàna hun lo zeta min lo call avàngin Khatlaah ka kal phawt. Ka bialnu ni lai mêk MSi hi chhe lo tak a ni, ka la kawp rei ber nghe nghe. Ka duh dàna awm a thiam reuh a, a lian lêm lo na hian mi a dâwl zo reuh khawp!! Ka lakah hian a pangchang thiam reuh a, bâkah, a nù zâm reuh a, ka țhen theih lohna chhan ber chu min ti huam huam ve lo hi a ni. Hmeichhia min ti huam huam hi ka ngai thei lo, ka ten deuh tlat zel nia.


"Nizàn khân i rui lo tiraw?"


"Ka rui ngai em ni?"


"Ka rawn phone hun kha a dik lo a nih ka ring deuh a; mahse, ka dam țha lo hian ka ngai che a."


"A zia lo hle mai, eng nge i an tawh?"


"I lo thleng tawh a..."


"Dàwr tlawh hmain ka lo tlawh hmasa ber che."


"Englo a nia, ka ruak lo emaw ni aw ka tia."


"Eng maw?!!!"


"Ka la test lo nain ka awm dàn hi ang ka inti a."


Ni lo, Lalpa, a ni thei lo ang!! Ka fîmkhur ve hle țhìn a nih kha, sex kan hman dáwn pawhin condom ka hmang ziah, ka fîmkhur ve viau asin.


"Mahse, engtin nge a nih theih? Condom ka hmang ziah sia?"


"Ka la test lo ka tih chu. Ka pum țhat loh vàng pawh a ni thei tho; mahse, vawi khat chu a tel lovin kan tih tho kha, ruah a tlâk deuh seng seng ni khân."


Ni dáwn tak. Khami ni khân engin nge  min mawlh ni? A lo rai hlauh a nih chuan aw.


"Test kit ka lo lei dáwn em ni?"


"A ngai lo, nichîn khân ka lei a."


"Chuan?"


"Ka la test lo, a lo positive a nih hlauh chuan ka pai duh miah lo a nia."


Makti zet hian ka en a, ani pawh hian naupai chu a lo duh miah lo a ni maw?!! Sex hman chu kan duh ve ve; mahse, naute kan duh lo!!


"I titla dáwn tihna em ni?"


"A nih mai loh chuan. Ka pa hi i hriat angin kohhran upa a nia, kei ka rai chuan a hming chhiat dàn tùrzia chu, tûnlaiah chuan an titla mai zêl alawm."


"I tih dàn dàn le."


Lehlamah chuan ka thaw a veng huai. Lehlamah erawh ka ngaihtuahna a kal thui khawp. Nilêngin ka ngaihtuahnaah a awm a, keimah ang lo takin ka awm phah.


Tlaiah MSi chuan min rawn phone a, a test chu a negative thu min hrilh chuan ka thaw huai mai. Nunna kan lo siam lo ve, lo siam ni ta ila a nuin tihthih a tum tho bawk si a, nunna siamtuin a phal lo a ni ang e.


"Chuti, i pum kha entîr rawh, ulcer pawh a lo ni maithei asin."


"Nia, naktûkah ka tum ang e, i lo kal ve duh ang em?"


"Ka hman chuan."


                ***************


Vûr chuan ka dep ta poh, eng a an phei chu ka ring hran lo. Tlêm chuan a zia deuh em ni aw chu ka ti leh deuh si, a chhan chu dârthlalanga ka enin a vûng nêp deuh tlatin ka hria. Kha pa vàng vek kha, ngatinge min dim loh ém ém ni?


Tih tùr ka neih loh ém avàngin pangpâr ka buaipui leh. Pangpâr hi chuan nun an tihlim ém a, ka tih hmasakho phei chu a țhen chu pàr an tum ve tawh, a mawi dáwn em asin.


Ka pi chuan," Ni a sat ém kha, lo chàwl rih rawh,"tiin min au lang lang a. A ni lah tak a, chawhnu dâr 2 vêl niin ni sat dàn chu sa ngan ngan tak a ni, ka thlan a tla zaih zaih nghe nghe.


"Aw, ka zo țêp e."


"I hmui pawh a dam thei nâng."


Ka pi hian ka hmui vùn chhan hi hria se chuan aw, engtin tak ngai ang maw?


Tui inin ka chàwl zawk a, ka chawlh chhûngin Neil-a'n min rawn phone hlauh, tihzia reuh lutuk.


Ka pi nèn pawh an inbe ve bawk, ka pi nuih hak hak dànah a rawn fiam in fiamthu a rawn sawi lehpek a ni ang, ka pi tân pawh hian a nèlawm ve ém a ni, ngainat loh theih pawh a ni lo.


"Neil-a hi chu chhuah miah suh aw, a fel ka tih tawh kha."


Ka nui hak hak a.


"Ka pi, min duh tak tak teuh lo ang, kei chu mi naràn ve mai ka nia, kei aia țha a hmu țeuh dáwn tih a hriat reng a."


"Ni lo, hmangaihna hi chu a dang daih  alawm."


Neil-a'n min hmangaih àwm lo e. Min duh a nih pawhin min duh mai mai ang, hmangaihna chu a dang daih ang.


"I u hian nupui neih a tum rih mang si lo va, nang hian i tihkhalh daih ang a, Neil-a nèn, in inneih hnuah chuan thlamuang takin ka kalsan thei tawh dáwn che asin."


Ka pi thil sawi chuan ka țah a tichhuak tlat.


"Chutiang sawi suh, ka pi. Rei tâwk i dam dáwn alawm."


"Kum 80 ka ni tawh a, ka dam rei tâwk tawh asin, in fate hmu phaa ka la dam a nih leh ka vànnei tihna a ni dáwn a."


"Chumi thleng chu dam rawh, ka pi."


"Aw le, i fa pawm hman ngei ka tum ang."


Ka nuih sak nain a za lo tak zet. Keia fa ve lul zawng, a hmu lo tawp ang. A tunu ka ni lo va, ka ni ngai dáwn bawk hek lo. Ka bum tih a hriat hunah phei chuan...


Tlaia Ruatdika lo haw chuan mak tak maiin min bia nia!


"I hmui chu a dam tawh em?"


Makti rilru deuh hian ka en há rêng a, ngaihtuah hmel tak hian ka chanchin min la zâwt hek lo, min zâwt ve a nih pawhin ama hlâwkna tùr hlîr. Zanin tlai chu a rawn piang thar tlat.


"Dam deuh tawh." A dam deuh hlek, vûra ka deh hnu kha chuan a zia hle rêng a ni.


"Ka sawi ang khân i ti em?"


Lehzêl chuan.


"Aw."


"Khatiang kha chu han tinawn leh sak ila a dam duh!"


A va piang thar rei lo sî ém!!


[♡Mami Chawngthu♡ 24th Oct (Wed) Birthday Girl pual liau liauin le, Happy Birthday]