☆RUATDIKA☆- 12

☆RUATDIKA☆- 12 By Dingdi Pachuau


'Nahi' a ni ringawt.


Ka pi a rawn lang a, an inbiak hlàn chuan inbual tùrin room-ah ka chho a, vawiin lama ka thlan tlà bâl zawng zawngte chu tui chuan ka tleuh fai vek a, ka lu ka su bawk a, a nuam ngei mai.


Ka phone a rawn ri a, Neil-a a nih ringin phûr zet hian ka ban a, a lo ni tak tak a.


"Hello?"


"Hey, i țha em? "


"Um, țha e,  nang? I ngaihawm vawng vawng lutuk."


"A ni maw? Min ngai tak tak maw? Ka rawn thlâwk chho nghal mai dáwn emaw ni le?"


A rawn nui hak hak a. A nui ri chu a ngaihawm, a dam raih mai a.


"Haha, lo thlâwk chho tak tak teh, i chhûngte'n mak an ti àwm mang e."


"Min hre thiam viau ang."


"Tak tak?"


"Ka ning tawh viau, helaia awm hi. Tûn țum ka chhuk phei chu, bàn hial ka nâp."


"Engtizia maw? Mipa i nih kha, hmeichhia ni lovin."


"Nang hmu thei lova awm hi a lo hrehawm ém a ni."


"I rawn chhoh hunah min hmu hnê hlûi mai ang."


Kan inbe rei phian mai, kei pawhin ka ngai tak tak. A bula awm leh ka châk, min duat a, min ngaihtuahin a zaidam si a, a bula awm a nuam ka ti ngawih ngawih.


Message ka check a, Company lah hi,  ka ning lutuk.  Ka delete țeuh a, Angel-i message a lo awm ve ker reuh niin.


*I rawn chhuk dáwn rih lovin ka hria a, Bobby kan inah ka awmtîr ve rih aw. A pain a hnawt chhuak sia, chènna a nei rih si lo nèn, rei lo tùrah ngai ang. In enkawl țha la, bye* tiin.



*I thu thu.* tiin ka reply ve ta ngawt a.


Ka duh vak lo nain ka hrilh duh teuh  lo. A bialpa Bobby hi thlah pawlh niin a chhe vak lo; mahse, a lêrh ka ti. Angel-i hi a duh tak tak lo ang tih ka hlauhpui țhìn, ani lah hian duh tak têin a duh miau si a. Lo inrawlh ka tum hran lo nain ka duhpui lutuk lo.


Angel-i awm dàn leh nunphung hrim hrim hi ka ngaihtuah chian hi chuan demawm ka ti hran miah lo, a thil tawn leh nun chhoh dàn eng mah hriatpui loh phei chuan lo sawi sèl chiam chi ni pawhin ka hre lo. Amah a intodelh a, a inchâwm a, a taima viau bawk. Mi famkim a ni bîk lo va, sawi sèl duh chuan mihring tung chhoa kal tawh phawt hi sèl loh tùr tunge awm ang le? 'A țha lai inhmuhsak hrâm hrâm hi chènho chuan a pawimawh' Singapore-a ka piin a ti țhìn, a dik ngawt ang.


Ka room kawngka a rawn ri kârh kârh a, Ruatdika a ni lehpek ang chu.


"Lo lût rawh."


A rawn lût  a, room en kual pah chuan,"I ngaihtuah tawh em?"a ti sup a.


"Eng?"


"Nizàna mi kha."


Min rawn en ta chiah a, ka hre leh ta. Zànah a duh huna ka room-a rawn riah kha. Thil ni thei a ni lo, unau tak tak chu ni ila a la hriat thiam theih deuh, unau kan ni lo.


"A theih loh!"


"Chiah maw?"


"Bialnu  i neih ve reng kha? Ngatinge ka chungah hetiang hi tih i tum tlat a?"


A ding ta chat a, a inkuangkuah thûn bawk si a, a hlauhawm ru riau.


"Bialnu ka neih vang chuan i duh lo tihna em ni?"


"Ni lo, room khata riah dun kha a țha lo hrim hrim, ka piin a hre reu reu ang e."


"Ka pi i vêngthâwng deuh a nih chuan..."


Ka sawi awmzia a man thiam lo kual vêl chu ka ngei lutuk. Bialnu a nei ve reng a, ani chu pan mai se.


"Ka thu sawi man thiam lo kual suh. Chutianga riahpui i mamawh a nih chuan i bialnu hnênah kal mai rawh."


"Ka bialnu kha nangmah i ni lo, 'ka chungah phuba la rawh' titu kha nangmah hi i ni lovem ni?"


Nia, kha thil kha ka sawi ngei alawm, ka mâwl ka ti viau bawk. Phuba a lâknaah hetiang thil hi a tel ka rin loh lutuk vàng a nia.


"A nih, ka room-ah riak la, kei ka pi bulah?"


"Min fiam kual  suh!"


A thin ka tirim ta chiang mai. Țha te tea sawipui theih ka beisei asin le, a boruak ka tichhe leh ta vek mai.


"Eng pawh tâwk thei tùrin inring reng ang che!"


A chhuah pahin kawng a khãr ri țhuai a, ka phu zawk mai. A va thinchhe teh lul ém! Nunrãwng si, thinchhe si, nèlawm loh si, sual si, pà bawk si.


Nia, he pa hi a pà ka ti tak tak, sual viau mah se. A bialnu chu ni ila, ka duh  viau ang; mahse, a bialnu ka ni lo, tunah phei hi chuan keh nawk nawk ka châk, thing nawk nawk ila.


Engtin nge phuba chu a lâk tâk ang le? Ka pi a hrilh dáwn em ni? Ni lo, a hrilh lo ang, hrilh a duh miah loh kha. Chuti a nih chuan, Neil-a a hrilh ang em? A hrilh chuan ...


Chaw ei laite chuan a țawng lo reng reng, ka piin a biak chauhin a țawng a, chu pawh 'aw' leh 'aih' chauhin. He pa hian eng nge a ngaihtuah? Engtin nge phuba chu a lâk ang le?


"Naktûkah chuan i u hi i zui ve tawh dáwn nia."


Ka melh zauh a, ani erawh chuan hre lo ang hmakin a thil ei chauh a ngaihtuah niin a lang, ka zui peih lo asin le, tuna a mood ang a put hlauh phei chuan.


"Aw le, ka pi."


Zàn ka mutnaah chuan a phuba lâk dàn tùr mawlh chu ka ngaihtuah leh. A ti mai mai lo tih ka hre bawk si a, ka rilru a nuam thei miah lo.


*Beep beep*


Ka message dawn chu ka ngaihven peih lawk lo va, company bâk a ni lehpek lo ang.


*Beep beep*


Ka ban ta nge nge. Number ringawt.


*Phuba lâk hmang ka ni lo.*


*Mahse, inchhîr suh ang che.*


Ruatdika mai mai chuh!! Phuba lâk hmang ni si lo; mahse, inchhîr lo tùrin min hrilh leh bawk si, ka hre thiam lo ve. Eng emaw tak chu tih a tum tho a nih hmel.


*Eng thil nge tih i tum?*


*Lo nghâk mai rawh.*


Lo nghah hi alawm ka duh loh. Ka duh zâwng tak a tih hi ka ring miah lo, chu chuan a thil tih tum hi min tihriat châk sauh.


*I sual e a.*


*Inngaihtuah țhat leh i duh em?*


Teuh lo, ka dinna ngaiah ka ding reng ang.


*Duh lo.*


*Ok, rinawm takin le.*


A reh ta vang vang. A thil tih tùr hi thil țha a nih ka ring hlawl lo; mahse, tih theih ka nei chuang lo, ka zahawmna ka hloh thei lo a ni.


Zîng kâr ațangin ka huphurh lâwk tawh, ka muhìl țha thei lo, ka harh hma khawp mai.  Min be lo va, min melh hek lo.


Ka pi thuin nilêngin ka zui ve a, min be lo thei khawp mai. Mi dang bulah lêm, a țawng tho si. Chhùnah amahin a chhuak a, kei dàwrah min hnutchhiah! Khawnge a kal dáwn ka hre lo, ka zâwt lo va, min hrilh hek lo. Pawi chai lo, khâwl nèlawm lo bulah ka awm reng peih bîk lo.


Kan haw tlai ang reng hle mai. Ka chau hran lo nain boruak ka zo lo țêp, ka lu a ni ut ut mai.


In kan thleng a, motor ațangin ka chhuk hmasa a, ka kalsan lah lah. Ka intih theih khum ve theihna lai a nia lawm le.


In chhûnga ka lût chiah chu ka ding chawt chiang lutuk!!!


Ka pi leh Angel-i chu in chung step ațangin an rawn chhuk mêk a, Angel-i ka hmu chiah chu ka au chhuak lo chauh a ni, ka hmui ka hup rang hle.


Ka pi chuan min rawn hmu hmasa a, hlim deuh hian,"Aw Angel Bawihte, in lo haw tawh maw? Hei, i țhiannu Zorini a lo thleng chho ve a, in inngai tawh dáwn si a,"a ti heu mai!!


Ka hamhaih dàn chu pui tak a ni ringawt!!!


Angel-i chuan," Hey, min ngaih tawh ka ring a, mahni chauha awm chu a khawharthlâk khawp mai," tiin min rawn pan a, ka kut chu rawn chelhin min mitmei nghal vat a.


"Nia...mak..ka ti lutuk ringawt." Chubâk sawi tùr ka hre lo, mak ka ti ém a ni.


Ruatdika lo lût chuan," Mikhual kan nei elo? Angel-i țhiannu maw?"a rawn ti a, kan bulah chuan dingin min en tawn ta reng a.


He pa thil tih hi a ni chiang lutuk!!


"Ah..umm,..ka țhiannu Angel-i a nih hi, chuan, ka u Ruatdika,"tiin inhmel hriatna ka nei ta nghal a. An inchibai ve chuan ka hria, ka țang țùng mai, ka thlante a tla dep depin a nia ka hriat ni.


Ka pi chuan," Angel, i țhiannu ber a ni bawk si a, i room-ah ka innghahtîr mai asin, riah dun pawh in duh zâwk ang a,"a lo ti siam siam a.


"Aw, ka pi, a țha alawm."


"Han inthlâkin intifai ula, chaw kan ei nghal deuh mai ang, a hma tawh vak si lo,"a ti leh a.


Room ka thleng chu ka thaw hawk hawk, ka lo țang nasa lutuk a, ka hah vek mai.


"Min beisei lo hle tiraw?"


Angel-i chuan min lo zui ve reng niin. Kawngka chu ka va khâr țha a, ka kalh nghal bawk.


"Mak ka ti tawp, engtin nge i lo kal ve theih? I lo thlenna a rei tawh em?"


"Rei lutuk lo, ka inbual zo deuh chauh a ni."


"Ka piin a lo hre chhuak lo che maw? Ka hlauhthàwnzia hi, ka thâwk a tàwp țêp a ni."


"A khai! Insûm rawh, ka sawi tùr chu ka hre ve bawk alawm."


Chhuatah chuan ka vei sek a, ani erawh chu lung muang zet hian a țhu dar dar a.


"Vei sek teh suh, min hre chhuak lo ang, hlau duh suh."


"Ka hlauthâwng a ni."


"Va inbual phawt teh, kha i thlante a tla nasa a nia."


Ka kutphah chu a thlan miah lo, a hit vek zâwk. Ka hlauthâwng lutuk a, ka na vekin ka hria.


Ka intleuh rei lo khawp mai. Ruatdika hian eng vànga he thil hi ti nge a nih ang? Hlauthâwngin thi se min ti em ni? He pa hi chu aw, a sual thiam ve khawp mai.


"Ka pi chu ka rin aiin a lo hausa daih mai."


"Eng tik thleng nge awm i tum ang?"


"Ka hre rih lo, ka rin ang a nih loh phei chuan awm rei pawh a pawi lo."


Ni lo, a awm rei poh leh ka hlauthâwng rei dáwn tihna. Nitin min hre chhuak ang tih hlauthâwng reng rengin hun ka hmang dáwn asin, Angel-i hian ka hlauhthàwn ang hian a hlauthâwng ve àwm dèr si lo.


"Engvànga lo chho ve nge i nih rêng rêng a?"


"Ka pi hausakzia hre tùrin maw le. Hetiang a nih chuan ro chan tùr pawh ka nei ve nual dáwn tihna a ni a, ka kalsan phal dáwn teuh lo."


Ka lu a va tihai tak ém!!!


Chaw kan ei lai chuan ka ngawi reng a, ka thil ei pawh a tui lo. Ka thin chu a phu dêp dêp reng a, ka hlauthâwng zek zek reng a ni mai.


Ruatdika lah chuan Angel-i chu thil eng eng emaw a zâwt kual a, ka pi nèn chuan interview an neihtîr a ni ringawt. Ruatdika ka ngeizia chu, tlawh hrep ka châk! Zorini ka ni tih a hre reng tawh a, Angel-i ka ni lo tih thlengin. Angel-i chu Zorini tak tak anga enin a chanchin a zâwt hrep a, Angel-i lah chuan zêp nei tawh hek suh, ka chanchin a hre chiang si a, a hrilh ta vek a. Chaw pawh kan ei rei phah vek, ka lung a awi hlawl lo.


"Angel Bawihte, i țhiannu i lo awmpui chu i tițha hle mai, ka chhuang lutuk che a nia,"ka pi chuan a ti sap sap a.


"Ka lâwm e, ka pi." Chubâk sawi theih ka nei lo. Ka ning, ka ning hluah hluah. Bo daih theih ka châk.


"Zorin, i duh chuan khuta awm kher tawh lovin hetah Angel-i nèn pawh in lo awm thei reng a nia. Dàwrah pawh hna thawh tùr a tam a, hna mumal nei lova awm ringawt chu tûnlai khawvêlah chuan a țha lo a nia,"ka pi chuan a ti leh a.


Angel-i chuan," Ka pi chu i fel hle mai, ka lo ngaihtuah dáwn nia,"a ti ve ngial a, a duh lo tih ka hre sa. A pi leh a unaupa bulah hian a duh angin a khawsa thei dáwn lo va, a duh ngai lo ang tih ka hria. Mawi hnaiah a chhâng ve mai mai a ni.


Ka awm a nuam thei lo, tunah hi chuan bomb kam sa, eng tik lai pawha puak mai thei bula awm angah ka inngai, fîmkhur a ngai a, invèn reng a ngai.


Room-a kan chhoh hnuah  chuan Bobby chanchin chu a sawi sap sap a, cigarette ngat chu la chhuakin a zu pah a. Hei hi ka ngai thei lo țhìn. Tukverh chu ka va hawng a, cigarette rim hi ka ning țhìn.


"Chuan, Bobby chu engtin nge a lo awm ang?"


"Ina lo awm tùrin ka ti a; mahse, a haw lehin ka ring."


"A pain a hnawt chhuak emaw ka ti?"


"Aw, ni e; mahse, an fapa mal a ni miau a."


Chuvàng a ni ngei ang, Angel-i hian a kawp ang. Fapa mal a nih chuan ro changtu tùr a ni tlat.


"Zorin, ka unaupa hi eng nge a an? A chhiat loh riau hi?"


"A pângngai."


"Engtia pângngai maw? Eng emaw a awm em?"


Angel-i chu ka en duh lo. Eng thil mah awm lo mah se, 'eng emaw' awm hi a hriat ka hlau.


"A fel pângngai ka tihna."


"A khirh viau ang em? Ka pi ro hi kan inchuh duh hmel sia?"


Râpthlâk ti zet hian ka en a, eng mah phei chu ka sawi chhuak lo. Angel-i rilruah hian inlaichìnna leh inunauna ai chuan pawisa hian hmun a luah hneh hle a lo nih hi, chu chu mak ka ti ta viau a ni.


"Eng nge? Ka pa khân hêng in leh sumdàwnna zawng zawng hi a neih tùr a ni miau a, ka nî fapain a lo rochun daih theih thu a awm lo."


Ka sawi ve lo mai ang, ka chhûngte an ni ve si lo va, inrawlh loh a țha zâwk ang e.


Ka lu na a zual avàngin ka muhìl thei lo, Angel-i cigarette zûk leh vàng vek, damdawi ei mai ka duh. Ka thil tawn hi a nasa mah mah tawh a ni, hetiang chuan ka tar hma lutuk ang.


Damdawi ka ei duh tùr ka hmu ta miah lo mai, in hnuaiah chhuk ila, zawng leh ringawt mai ang.


Drawer zawng zawng ka hawng kim leh tawh, ka hmu chuang lo. Ruatdika bathroom-ah chuan a awm ngei ang chu, kaihthawh erawh ka tum bau lo. Tui vawtin dep ila a zia deuh ang chu, Angel-i cigarette rim hian ka lu na a tizual ziah lehnghal.


Fridge ațangin tui vâwt ka la a, drawer-a towel thar awm chu la chhuakin tui vâwtah chuan ka chiah a, ka chal chu ka dep a, ka mitko thlengin.


"Engtizia nge?"


He pa hi ka ngei lutuk.


"Nangmah vàng a nih hi."


"Vawiinah ka dek miah lo che."


Ka chhâng peih lo, ka thil tih chu ka ti leh malh malh a.


"I lu a na em ni?"


"Min hmu mai lo'm ni?" Ka ning hluah hluah, amah vàng a nih hi.


"I lu na ka hmu theiin i ring em ni?"


"Kal mai teh!"


Tui bottle chu ka dah țha a, he pa bulah hian ka awm rei peih lo, ka lu na a zual mai mai.


"Damdawi ei ta che."


Awm se chuan ka ei daih tawh ang, ka haw lutuk, min vìn deuh hlekte hi ka ngei hluah hluah.


Room ka thlen dáwn chuan min rawn man chat a, "I lu kha a na tak tak em?"a rawn ti leh nghut a nih chu. Ka va ngei tak! Ka tiderah a ngai a ni ngei ngei ang, ka thil tih hi lem chan vek a ni kher lo asin.


"Min thlah rawh!"


"Damdawi ei rawh."


"Nangmah hian ka lu na hi i tizual a nih hi!" Àn khum hrep ka va duh tak ém! Muhìl an awm tawh a, zan lai chu ni lo se, ka vìn hrep duh ngei ang.


"Lo kal teh," tiin min kai a, a room-ah chuan min kai lût a. Duh lo teh mah ila damdawi ei tùr ka mamawh a ni.


A hmanhmawh ve lutuk.


"Kha, hei hi ei rawh, nâ i neihin sawi țhìn ta che, tuar tlawk tlawk ziah suh."


Damdawi mûm chu ka kutah min pein tui min thlitsak thlap bawk a, ka ei nghal vat a.


"A na viau em? Ka lo hmet ang aw, mu la?"


Ni lo, he pa room ațang hian ka chhuah vat a ngai. Ka mu thei lo ang.


"Min hlau em ni?"


"Ka'n mu tawh ang e, a reh mai ang."


"Ni lo ve, i mut duh loh pawhin kha laia chair-ah khân țhu rawh, ka lo hmehsak ang che."


A țawngkam ngeiawm deuh țhìn kha a awm tawh miah lo, min ngaihsakna leh duatna awka ka hre ta thung!!


Min țhuttîr a, ka hnungah dingin ka chal, bek leh mitko vêl chu na lo tê hian min hmehsak ta neuh neuh a, a thiam fahran lo; mahse, a nuam ve tlat.


"A zia thuai mai ang."


Ka mut a chhuak selh selh mai, mi hmeh thiam fahran lo mah se min ngaihsakna a tilang hi nuam ka ti, hetiang hian tu mahin min la ngaihsakin min la duat ngai lo. Ka lu a na a nih pawhin damdawi ka ei a, ka tuar tawp mai țhìn, ka khua a sik pawhin chuti bawk. Chhûngte ka nei lo va, min duata min ngaihsaktu tùr ka nei hek lo. Ka ni bulah pawh khân ka pangchang ngai lo hrim hrim.


"Zorin, i țap em ni?"


Ka mittui a tla tih rêng rêng ka lo hre lo, dik tak chuan min ngaihsaktu ka nei ngai si lo va, ka lung a lo chhe deuh a ni ang.


"Zorin, a na viau a ni maw? Damdawi inah kal mai ang aw?" A awka chhuaka manganna ri tel chu ka hre thei, min ngaihtuah avànga manganna.


"A ngai lo ve, ka'n mu tawh ang e, ka lâwm e."


Ka làwm thu hi ka sawi lo thei lo. Ngei viauin che runawm viau țhìn mah se, min ngaihsak tlat. Tu te hnên ațang maha ka dawn ngai loh ngaihsakna he pa, ka ngei ém ém leh min nuihzattu hnên ațang hian ka hmu tlat.


"I mittui kha titla ngai tawh suh ang che."


A aw chhuak a dang leh daih tawh. A sehchilh deuh a, a thinrim leh ringawt tawh a ni ang. Ka mittui tla chu a haw hle mai maw.


Angel-i chu a lo hnâr sêk sêk a, peih lo zet chuan ka mu ve ta a, ka mut hnu chuan ka mittui a rawn tla zaih zaih mai. Ka rilru hi a na khât viau tawh asin, chhûngte ka nei lo ringawt mai hi ka rilru a nâ a ni, chhûngte nuihpui tùr leh min ngaihsaktu tùr, kei pawhin ka ngainat ém ém tùrte ka nei ve lo ringawt mai hi ka vànduai ngawih ngawih bîk a ni. Eng thil sual nge ka tih bîk le?