☆RUATDIKA☆- 13

☆RUATDIKA☆- 13 By Dingdi Pachuau


Ruatdika
~~~~~~~

Min hnial ngam a nih chu!! Phuba ka lâkna tùra inpe ve siin ka phuba lâk tum dàn a pawm lo nia, ani hian thu a rawn nei ve thei ngawt lo.


Ka tibuai tih chu ka hria; mahse, nuam ka ti tlat.  Hmeichhe pakhat, kum 22 mi lek hian ka ngaihtuahna a tibuai pha thei chu a ni ta si, ka in-awih lo lek lek zâwk!  Ka nihna țhìn, tak ve ngel ngawl, hmeichhia be hmasa ngai lo ka nihnate kha tûn hnai tê hian ka hloh ta tlat. Keimah ka inhua a, a chunga țuan ka duh. Phuba lâk kher ngai ka ti lo va, ka duh ngai hek lo; mahse, he nu hi chu engtin emaw tih a ngai, a chunga eng emaw tih ka  tum dàn hian a nuih a tiza ngût ang em le?


Ka cousin tak tak chu a lo thleng ta ngei e. In chhûng ka luha ka hmuh chiah chuan khawiah pawh hmu mah ila ka hai dáwn lo tih ka hre nghal mai, thlalâkah kha chuan a lang dang deuh tlat alawm. Hmai chhanah zawng, a chiang e.


Zorini hmel chu phûng hmu an sawi ang chiah a ni, khawngaihthlâk zâwk hian a! Hei hi ka duh dàn a ni lo'm ni? A hlauthâwng ngawih ngawih tih a hmel ațangin a hriat e, chan țha ka chang, a rûkin ka nui suk suk reng mai.


Zanriah kan kîl laia Angel-i'n Zorini chanchin a sawi chuan ka beng a verh zar mai. He nu tê hi ka rin a ang miah lo, chhûngte kha a lo nei lo tak tsk a nih chu!  Chuti a nih chuan dâwt a lo sawi bîk lo a nih àwm hi, bâkah a huaisenin a tuar a chhel reuh ka ti khawp mai, a la naupan teh lul nèn.


Ka mut hmunah ka ngaihtuah a, ka unaunu thar hi ka fak ve tlat !!! A kawm țhin leh a lo hmêl hriat sa pawh ni miah lo a lo awmpui ve duh mai hi a tițha ve tlat.


Dîm têa kawngka hawng ri chuan ka beng a verh zar mai. Ka unaunu lo thleng thar hi ka mi rin zâwng tak a ni miah lo, ka en zui a ngai. Dîm têin ka chhuak ve a,  thâwm a dîm thiam ém mai, eng emaw chu tih a tum chiang a ni.


Fridge a hawn êng ațang chuan Zorini a ni tih ka hmu thei ta a, ka thaw huai, ka nuih a za hial. Rinhlelhna rilru ka lo pu nasa deuh a ni ang e.


He nu tê hi a dam lo lehpek em ni le? Zan laiah lehnghal, tui vawta chal deh chu, a na ngang a ni ang. Ti hian amah hian a che rek rek țhìn àwm sia, dam lo pawh ni se, ngaihventu tùr  chhûngte a neih miau loh chuan  peih lo chung chung pawhin a chêt a ngai dáwn asin, ka khawngaih thut a nih chu.


Room-ah hruaiin damdawi ka pe a, a mit sen râm mai chu hmuh a nuam ka ti lo, ka tih ngaia ka rin loh a chal kual vêl chu ka hmehsak ta. Ka hmet ngai lo, ka lu a nâ a nih pawhin. He nu bulah hian ka tih ngai loh ka ti leh ta chu a nih hi!


A mittui a tla, a luang ngiai ngiai. A lu hi a na lutuk tihna em ni? Nge hrehawm a ti lutuk? Kei hian ka lo tihrehawm viau em ni? A mittui hi chu tlâktîr ka duh lo asin. Sual viau mah ila mittui tlâktîr kher hi chu ka duh bîk lo.


Min tibuai chî-ai zo. Damdawi inah kalpui mai a țha ang, ka buai phîlî tak tak. Ka mangang tih ani pawhin a hre ngei ngei ang, ka thup hman tlat lo.


Mahse, làwmthu sawi sapin a room lam panin a kal ta mai. Ka thin a rim thut, a mittui titlatu hi keimah ka ni, keimah ka inhua. Mi mittui titlatu  ka nih chuan ka hlim rei bîk dáwn em ni? Naupang chhe rilru ka pu thut ni berin ka hria. Ka pi a tihhlim teh lul nèn, keiin ka ti țap ta thung si.


Chhûngte nei lo ringawtin mihring hi a awm theih dáwn em ni? A nu khân unau, nu leh pa a nei ngei ang, chutiang bawkin a pa pawhin. A la naupang ém a, chhui chhuah a tum lo mai a ni ngei ang. A nî, a innghahna berin a boralsan hnuah  chuan bùl ngawih ngawihin a inhre leh zual ngei ang, a khawngaihthlâk reuh asin.


Zîngah hah hnêpin ka tlân a, ka rilru ațangin he nu hi paih chhuah ka duh, ka pi leh keini pawh min bum mai duh a nih hi. Eng nge a tih zêl ang kan hre miah lo, ka khawngaihin a chungah zahngaihna ka lantîr tawh tùr a ni lo. Nizàn vàng khân ka ngaihtuah ta luaah a ngaih loh hrâm ka beisei.


Chaw ei laiin ka pi hnênah chuan," Vawiin chu keimahin ka kal ang, zui ka duh lo," ka ti tlat a, inah awm se, a bula awm tam loh ka duh. A mit bui deuh lâk saw nizàna a țahna kha a ni chiang, a țap leh a mittui tla kha ka hmu duh tawh lo.


          ****************


Ka zui chu a lo ning àwm hle mai maw.  Nizànah lah ka mittui tla a hmu lehnghal bawk si a, lem ka channaah a ngai ngei ang chu. Ni e, a țha alawm. Angel-i hi a phuba lâkna niin ka ngai nghet hmiah, hei aia hlauthâwng pawhin min la siam thei ngei ang, a bulah awm tam lo ila a ţha ber.


Ka pi chhùn mut hlàn chuan Angel-i chuan in leh a chheh vêl chu a fang kual nasa mai a, engkim mai chu a chîk ni maiin ka hria. In chhûngah chuan cigarette zu lo hrâm tùrin ka hrilh a, mi dang awm lai chuan. A chhan chu ka pi ka vêngthâwng a, Ruatdika pawh hian a zûk ngai ka hre tlat lo.


"Ka pa khân hêng zawng zawng hi a kalsan thei lo a ni!"


"Mahse, i nute hnênah khân an kal daih sia?"


"Kha tak kha, kal lo thei lovin an siam tlat alawm. Ka rin dàn tak phei chuan ka nu kha an duh lo hle ang a, ka nu a nei lui a nih chuan ro rêng rêng chantîr loh an tum a nih ka ring."


"Angel, ka lo sawi tùr chu a awm lo viau nain hun kal tawh chu liamtîr la, i pi hian a ngai ém ém che a, a tunu ang takin awm rawh. Chuan, in inkâr a țha leh zual ang a, chu chu a țha ber."


"Mahse, kei chu min ngaina teuh lo. Mi â ka ni bîk lo, min melh vawi khatna ațangin min ngaina lo tih la hre ve thei tho. Chuan, an bulah ka chêng peih lo ang tih chu i rin tho ka ring bawk," ngaihsam zet hian a ti a.


"I awm rei deuh ang a..."


"Ni lo e,"tiin min lo pawt chat a," An hnêna chêng tùr chuan min beisei thei lo ang, ka peih miah lo," a ti leh mai a.


"I la awm rei lo lulai ém a, nuam i la ti lo mai mai a nih hi."


"Pitari hian a ngainat ang che hian min ngaina dáwn lo sa!"


"A tunu emaw min tih vàng mai mai alawm. Thisen zawmpui nge nge chu a ngaina zâwk daih ang che, a tunu dik tak i ni alawm."


"Chhûngte ka mamawh lo, sum chiah ka duh."


Kan inang lo ve ngawt mai. Kei chuan chhûngte belh tùr ka mamawh asin, sum hi chu dam chuan a awm thei zêl mai zâwk a, dam phawt chuan thawk tùr kan nih angin. Kan nihna hi inthleng thei ila ka ti ngawt mai; mahse, kei pawh hi sum vànga helai hmun thleng hi ka ni ve tho, Angel-i nèn hian kan inang reng, ani ai hian țhatna ka nei bîk reng reng lo.


Chawhnu lamah chuan Angel-i chuan lèn a rawt a, ka peih lo viau nain ka hnial duh lo. Ka pi bulah chuan chhuanlam siamin kan chhuak dùn ta a, Angel-i chuan Aizawl khawpui a hriat chian loh ém avàngin kea lèn a châk a ni.


Chanmari lamah kan chhuk a, khua a lum a, kan inchei teh chiam lo. Khutah pawh kan inchei fahran ngai lo hrim hrim a, incheina kan uar lêm lo, makeup erawh a uar ve khawp.


"Bar awmna i hre mial em?"


A țawng chu miin an hria ang tih ka hlau lutuk ringawt. Insûm thei hrâm se ka ti, helaia a awm chhûng chu. Ka pi ka zah a, Ruatdika pawh ka zah tho.


"Hre lo. Khawngaihin, helaia awm chhûng tal chu insûm hrâm la?"


"A ho e, mut hnuah alawm ka in dáwn le, Pitari chuan a hre lo tawp ang, a mut hmà ém kha."


A pi a ni a, a koh dàn te hi ka duh lo, zah taka lam tùr a ni asin. Hm, a buaithlâk a nih hi.


Kan kal kual nasa mai. Zànah chuan a rawl ve khawp ang, kei chu kein ka kal nasa a, ka chàu ve deuh ringawtin ka ring. Kalna tùr, pèn neuh neuhna tùr a hre khawp, amah chuan kal se chuan a bo hrim hrim ang. A thil en deuh ber chu tlereuh a ni, ka nuih a za. Tlereuh a lawm dàn ém ém hi, khutah pawh a nei țeuh tawh, lei a sim thei chuang lo.


"Zorin, ka inhmeh em?"


En mang hlei lo chuan," Aw, a mawi tawp," ka ti ve ringawt a, inhmeh a intih chuan a lei nghal dáwn tho a, a beh chhin tawh chuan a lei tlangpui țhìn. Chuvàng chuan, ka en peih sî sê lo.


Pair 5 a lei!! A duhnaah hi chuan pawisa pawh hi a ren lo thei a nia, kei chuan pair 1 pawh ka la lei lo, inhmeh lo ka inti lutuk a, lei enah pawh ka en lo.


"Beer lei lawk ka va duh tak!"


An zawrhna ka hre dèr lo, hria pawh ni ila ka hrilh lo tawp ang; mahse, ka țhiani hi chu a â lo a nia,  dàwr nghâktu chu a bekbàwr a, beer zawrhna a zâwt tih ka hre nghal.


Kein muang chângin kan haw leh ta a, ka khawngaih ve deuh a, kawng chho kan kal dáwn si a, bus chuan a duh leh duh loh ka zâwt a.


"Ni lo ve, thlan a tla ang a, zàn mut a tui dáwn bâkah beer pawh a tui sawt dáwn asin."


In kan thlen chuan a tlai ruih tawh. Chho kan kal avàngin ka kal chakpui duh lo va, chuti chung pawh chuan a thaw a kaah a leng lo, a thlan a tla nasa lutuk bawk.


Ruatdika pawh a lo haw tawh a nih hi. Kawngah kan muang deuh hlek a nih dáwn hi. Pawi lo, ani hi kan boss a ni chuang hlei nem.


"A nuam bawk em? In hah àwm mang e."


Ka pi chu nuih sakin," Hah deuh maithei, thlan a tla nasa khawp mai," ka ti ham ham a.


"A lum lutuk, ka'n inbual nghal teh ang," tiin  Angel-i chu room lam panin a chho nghal a. Ka pi chuan a en zui vang vang a, a rilruah eng tak ngaihtuah ang maw?


"Angel Bawihte, i țhiannu hi a khawngaihthlâk ka ti ém mai, hetah chuan thawh duh hrâm se ka ti."


Chhàn dàn ka hre mai lo.


"Thlêm țâng țâng teh aw."


"Aw le, ka pi."


Inbual tùr chuan ka chho ve ta a, Angel-i chu a lo inbual zo tawh a, a lo zai rât rât a. He nu hi chu ka awt țhìn, a rilru thawveng thei lutuk hi. Rilru hah ve deuhna pawh hi a nei ngai lo ni berin ka hria, min pe țhen ve se.


Ka chau nghulh mai, chaw ei khama ka pite nèna sitting room-a kan țhut pawh chuan ka mut a chhuak selh selh mai, vawiin kha kein kan kal nasa deuh a ni ang, kei meuh pawhin ka tlin loh dáwn chu. Ruatdika hmêl hmuh tùr awm lo chuan min tithawveng deuh ringawt, a chhan chu ka pi chu a mu hma leh dáwn a, Angel-i hian beer a in ngei dáwn si a, chu chu a hriat ka duh lo a ni.


Ka lo chhîng sek a ni ang, no tla keh chhawk riin min tiharh a. Ka meng thei lawk lo va, ka harh chian deuh hnu chuan room chu cigarette zûk khuin a lo zâm khat chuai chuai a, ka hnâr ka hup nghal. Ka tho vat a, tukverh ka hawng nghal. Chutah, cigarette rim nam chum chum kârah zu rim ka hre leh nghal zat. A va buaithlak tak ém! Ani lah chu bathroom lamah a inthiarfihlîm nghal zat a, hau hman pawh a ni lo.


Chhuata zu leh no keh inpawlh nuai mai chu engtin nge ka tih ang? Zu rim lah chu a nam ropui si, ka muthilh sek avàngin ka mit lah chu a kham ûrh mai a. No chu fîmkhur takin ka chhar a, a tàwp ber keh chuan ka inti-ât hrâm; mahse, ka ngaihtuah hman lo. Zu bua chu ka hrûk fai leh phawt a ngai. Ka thawmhnaw bàl chuan ka hru ta ringawt, naktûkah thawh veleh sûk ngei ngei a ngai ang.


Bathroom-ah a awm tlat avàngin ka kut pawh ka sil thei lo va, ka kut tuamna tùr bandage pawh a lâk theih loh, in hnuaiah ka chhuk leh mai a ngai. Zu rim ka nam dawn si a, Ruatdika a lo harh loh hrâm ka beisei.


Light pawh ka on ngam lo, tap on-in ka kut chu ka sil fai a, ka kut pawh a la thî reng mai, a kak zau loh hrâm ka beisei.


"Zu rim a va nam ve!"


Ka phu chiang lutuk! He pa hian in hnuai ka chhuk hi min lo chãng ziah emaw ni le! Ka inher lo, ka kut chu ka sil char char ringawt.


"I in a ni maw?!!!"


Light a rawn on nghal a, ka khap sak sak mai.


"I va ngam ve!!"


Min pawt her sawk a, ka țê deuh țhat mai.


"Hmeichhe kutthlâk chîng ka ni lo hi Pathian hnênah làwmthu sawi rawh!"


A thinrimzia chu ka hmu thei, a sen vek a, min vìn lo tùr leh țawng ring lo tùrin a insûm nasa ngawt ang, a insehruh nasa ngang mai.


Ka kut chu a hmer tlat avàngin a mu churh churh a, ka tih-ah lam a ni lehnghal a, a thî chhuata far koh koh chu ka hmu zui a; mahse, ka țawng ngam lo.


"Thah hial che a ni ka duh ni!"


A țawngka chhuak khûr deuh lek lek chuan a thinrim nasatzia a tilang chiang hle a, hmeichhia ni lo ngat ila chuan min hnek thal țhuai tawh ngei ang.


"A nâ!"


"A la țawng ngam ka ti!"


"Khawngaihin, ka kut a thî a nia."


Ka țawng ring ngam lo, a thinrimzia ka hria a; mahse, ka kut ka ngaihtuah ve tho si.


Chhuata thi far chu a hmu ve ta a ni ang, ka kut chu a en nghal a. A hmâwr lam chu a lo duk deuh tawh hialin ka hria, a mu churh churh bawk si, a hit chuai mai.


"Engtin nge i tih?"


"No kehah ka ti-ât palh."


"Fîmkhur lo lutuk!"


Anchhe lawha phun sup chungin rang zetin a kal sawn a, ka rin loh deuhin a rawn lêt leh a, betadine leh tuamna tùr a rawn keng a.


Tap chu on lehin ka kut thî chu a khawh faitîr a, a thing hul deuh a, betadine chu hnawihin min tuamsak leh ta a. Hun a hmang rei lo kher mai, mit khap kâr lek ni maiin ka hria.


"Chho la, mu nghal ang che."


"Chhuata thi far hi..."


"Chho rawh!"


He pa hi a over mah mah a ni, ka tihfai loh chuan tunge tifai ang?


"Ka tihfai a ngai alawm."


"Ka inchhìr rum rumna tùr thil ka tih hma hian chho nghal rawh."


Hmanhmawh leh thâwm dìm thei ang berin ka chho ta nghal, hlauhawm viau mah se ka kut min tuamsak a, damdawi min hnawihsak thlap tho alawm le. Tlêm tê chuan ngilneihna chu a nei ve alawm, ka lâwm viau tho.


Ni e, hmeichhia chu ni lo ila min hnek chiang khawp ang, kha vàng khân a ni eng mah ka sawi duh loh law law. Zu inah min ngai mah se a pawi lo, ka in loh phawt chuan. Angel-i erawh naktûk chu thil sawipui deuh a ngai ang.