☆RUATDIKA☆- 14

☆RUATDIKA☆- 14 By Dingdi Pachuau


Room ka luh chuan Angel-i chu a lo muhìl hman tawh!! A rui chhe hle a nih dawn hi, vawiin lamah kein a kal nasa bawk a, a chau hle tak ang.


Peih lo zetin bathroom-ah chuan ka lût a, a sûlhnu ka chhui a, han tihfel ngai vak chu a awm lo, zu rim leh cigarette rim pawh a nam tawh mang lo.


Ka muthilh sek tawh avàngin ka mut lah chu a chhuak duh ta dêr lo mai, ka meng reng a. Thil chi hrang hrang ka ngaihtuah a, eng tikah nge he ka mang chhia hi a reh ang? Ka pi hian ka nihna hi hre tawh mai se, min kaltîr mai se, a nih loh pawhin min hrem dáwn chuan min hrem mai se, ka awm dàn hi ka ning hluah hluah.


Neil-a ka ngaihtuahnaah a lo lang leh a, ka tân chuan a țha mah mah. Eng mah ni lo, hna thawh mumal nei lo, chhûngte leh unau pawh nei lo tân chuan a sâng lutuk tlat. Ka nihna dik tak a hriat hunah phei chuan engtin nge kan awm ang? A thin a rim ngawt ang, min hua ang, min haw ngawt ang, dâwt ka sawi vàngin leh ka nihna lo puia ka nun avàngin.  Ni e, Ruatdika sawi kha a dik a ni, Neil-a hian a rilru min pêk tak tak hmain ka nihna hi ka hrilh a ngai a ni, min ngaina der ve a, kei pawhin ka ngaina, a bula awm a nuam ka ti.  Ka him bîk riau a, a thlamuanthlâk ka ti bawk. Mahse, ka tân chuan a sâng a, kei ve mai tân hian han cho rual a ni lo. A rilru min pe tâwk lo se ka ti, chuti lo chu ka nihna dik tak a hriat hunah a na ngei ngei dáwn a, keiin hrehawm ka ti bawk ang.


Zîngah in hnuaia ka chhuk hmain ka kawr, nizàna zu bua ka hrûkna kha ka su a, ka kut pakhat chauh ka hmang thei si a, a buaithlâk khawp mai. A fai ngût pawhin ka ring lo.


Ka awm a nuam lo viau, ka kut lah chuan min tur deuh et et reng a, chhûng rilah ka khua a sik deuh er erin ka hria. Ruatdika chuan Angel-i nèn chuan min han chîk laileng khawp a, min be miah lo mah se a mit erawhin min hlatsan lo khawp mai. Nuam lo tak a ni, nuam lo tak. Ka pi erawhin a dàn ngai têin min be leh barh barh a, Angel-i  pawhin a dàn ngai tê bawk, thawveng zet zetin a chhâng lêt ve bawk, a zia a lang deuh țan; kei erawh chu ka țawng mang lo.


Chhùnah Angel-i a chhuak, kei chu ka nawmsam loh avàngin ka peih tawh lo. Kal chhuak lo tùrin ka thlêm ve nain ka thu sawi hi chu sawi loh ang vêl a ni țhìn. A tum tawh hi chu a tum tlang tawp zêl a, ka inrawlh buai tam peih lo țhìn rêng a ni.


Ka piin min ngaihsak khawp mai; mahse, chutia na vut vut ka ni lo va, khawsik deuh ser ser chauh a ni bawk a, ka pi damdawi min pêk chuan min chhâwk hma viau. Mu lum tùra min tih tlat avàngin ka mu a, ka pi chuan min zui ve zêl. Ka khum bulah chuan a țhu ve reng a, chutia min ngaihsak chu nuam ka ti; mahse, ka inthlahrung. Ka pi tak tak a ni si lo va, a tunu emaw min tih vàng chauh a ni si.


"Ka pi, chhuk la, zu muhìl tawh rawh."


"Aw le, i muhìl thei ang tiraw?"


"Aw, hei ka khawsik pawh  a reh tawh a, ka muhìl ang a, ka harh chuan ka dam vâk mai ang."


"Ei châk i neih chuan sawi la aw, tûn hnai tê hian eng mah i ei lo tlat, chaw lah tih tham i ei ngai si lo."


Ka pi chhuk hnu chuan ka maimichhîng vang vang a. Ni e, Angel-i lo lan ațang hian ka rilru a nuam thei lo va, hlauthâwng rêng rêngin hun ka hmang a, thil ka ei thei lo. Ka pi tê chuan mi a lo chîk reuh hle mai, ka hlauthâwng hmelte hi a hmuh hmaih lo tawp ang chu.


 Ka pi tak tak ni se ka va ti tak ém!! Ka thil tawn engkim ka hrilh ang a, ani'n min duat ém ém si. Ka hun lo paltlang tawh zawng zawng chu hrilhin zànah a bulah ka mu ang a, min kuah muhìl tùrin ka duh ang.


Ka phone a rawn rî a, Neil-a a nih hi. Tûn ang hunah min rawn phone ngai si lo va, a va mak ém!!


"Hey, Neil!!!"


"Darling Angel, mak i va tih hmel ve?"


"A mak alawm, tûn ang hunah i lo call ngai si lo va."


"Ni tho mai, hun rei lo tê ka nei thei a. Thil hrilh tùr che ka nei a nia."


A awka chhuak chu a zângkhai ém  avàng chuan thil țha lam a nih ka ring deuh ngawt.


"A ni maw? Ka va hre châk. Ka hriat ve i phal em?"


"Teh rêng, a hre hmasa ber i ni. Kâr lehah ka lo chho dáwn."


"Tak tak??"


"Aw, tak tak. Ka hmu châk tawh lutuk che."


"Kei pawh, Neil. I bula awm leh tawh ka châk." Min duat a, a nuam ém asin.


"Lo inenkawl țha la aw, chuan, ka tân chauh lo invawng țha la, tlangvâl dang lo melh miah suh."


Ka nui var var a. "Tlangvâl dang melh tùr pawh an awm lo, lo chho vat vat mai rawh,"ka ti ve a, ani pawh a nui ve tho.


Kan inbiak zawh chuan ka thaw huai a, Neil-a a lo chho leh tùr chu ka lâwm hle mai, a bula awm a nuam a, invêng țêtin awm a ngaih loh bâkah min duat a, ka hahdam țhìn.


Ka lo muhìl ve ngei mai, ka muhìl rei phian lehnghal a. Dâr zât ka en vat a, dâr 2 a pèl. A la tlai lutuk lo ve, vawiin chu inbual lo phawt mai teh ang, ka nuam lo ém mai.


Angel-i pawh chu khawiah tak lêng ang maw? A rawn haw tlai loh hrâm ka beisei, chuan, buaipui a ngaih loh hrâm ka beisei bawk. A rawn nawi hlauh chuan ka pi ka zah lutuk dáwn a ni, bâkah ka piin min hmuh dàn tùr a hniam lutuk ang.


Dâr 3:17-ah min rawn phone.


"Zo, chaw kha min lo chhum kêp suh se aw,  min lo hrilhsak mai la?"


"Ni lo, khawiah nge i awm?  Chaw nghei i tum em ni?"


"Tum nâng aw. Min ngaihtuah suh, Pitari hnênah chuan min lo phatsak mai rawh aw. Kha in kha nuam ka ti thlâwt lo."


Nuam  lo  ka ti kher mai.


"Nih, lo haw har lo la aw."


"Ka hre lo le, ka rawn haw kher lo thei bawk a, ka rawn hrilh leh mai ang che."


A phone a off ta hmak mai. Ka call dáwn a, switch-off a ti ta tlat. Ka țhiani tak hi chu aw, buaina min thlen loh hrâm ka beisei rualin buaina a tawh loh hrâm ka beisei bawk.


Ka pi hnênah chuan inthlahrung deuh, thu khuh si hian ka hrilh a, ka pi chuan," A țhiante hnênah maw? Chhûngte leh țhiante a nei lo emaw ka ti a?"a ti ta chiah a.


"Aw, nei lo. Ih, Singapore-a a kalpui, a  țhiannu a hmu fuh a, chu chuan chaw eiah a sâwm a."  Dâwt sawi hi ka va ning tawh tak ém!


"A nih tak chu, a rawn bo haw lo ang chu maw?"


"Bo lo tùrah ngai ang, nula a ni ve tawh alâwm."


Angel-i chu ka ngaihtuah kher mai. Ka ngaihtuah chu a ngai miah lo nain rui a a rawn haw loh hrâm ka beisei, Ruatdika thinrim hmel hmuh hi a hrehawm, ka peih lo. Angel-i chu rawn rui lo se, tlai lo bawk se.


Zanriah kan kîl lai chuan Ruatdika chuan," Khawnge i țhiannu?"a ti hmuk a, ka chhàn hmain ka piin," Vawiin lamah a țhiannu nèn an inhmu fuh a, chaw eiah a sâwm a nih kha," tiin min lo chhàn khalh a.


"Țhian a nei maw?!!"min rawn en kur a, nuam lo ka ti lutuk.


"Aw, Singapore-a a kalpui a nia."


Chiang zeta min en avàng chuan ka chaw lem pawh a sak țalh mai.


"I țhiannu hi a kâwlhrâwng ngawt mai."


"Bawiha!"ka pi chuan a lo ti țhat a, ka phu zawk mai. Ka chhûng ril chu a khùr a, keimah vànga an invìn hi ka duh miah lo, ngaihthlâk a nuam lo.


"Ka tihpalh, ka pi."


"Ka pi, a pawi ka ti. Hetiang hi a thleng nawn tawh miah lo ang," tiin ka ding a, ka thil ei a tui lo thlâwt.


"Țhu rawh!" Ruatdika țawng hian min tidam  lo zualin ka hria.


Ka țhu leh ta zàl zàl.


"Eng mah i la ei loh kha, ei rawh. Thil thleng kha chu theihnghilh rawh."


Ka țhu leh tak nain eng mah ka ei belh chuang lo, ka chawk let vêl mai mai.


"Angel Bawihte, naktûkah doctor hnênah kal ang hmiang?"


"Engah maw, ka pi?"


"Inentîr i ngai a ni."


"Ngai lo ve, ka pi. Ka țha alawm."


"Chaw i ei thei lo ringawt pawh hi a țha lo."


"Ka pi, ka țha tak tak alawm."


"Ni lo ve, naktûk chu ka hmelhriat doctor hnênah ka hruai dáwn che nia, vitamin i ei ang a, a zia mai ang."


Angel-i mawlh chu ka ngaihtuah. A rawn haw lo tak tak ang tih ka hlau a ni, ka pi bâkah Ruatdika lâwm lo tùr hmel ka hmu lâwk sa a, hrehawm ka ti. Angel-i mahnia lo tâk țhang a ni si a, mi thu hnuaia awm chu a ti thei țhak si lo. Chuvàng a nih ka ring, zàn riah chhuah pawh hi a tum ang. Hetah chuan a duh angin a awm thei si lo, keiin insûm tùrin ka lo hrilh ve bawk nèn.


Sitting room-a kan țhut laiin min rawn phone ta tak tak. Chhàn ka huphurh khawp mai.


"Hello?"


"Zo, ka rawn haw dawn lo aw."


A aw ațang chuan a awm dàn ka hre thiam nghal mai. A rui leh viau tawh a nih hi.


Ka bula an awm ve miau avàngin," Min lo hre thiam lawk r'u?"tiin ka kal sawn a, room lamah ka chho ta rih a.


"Engtizia nge? Khawnge i awm a?"


"Hotel-ah ka awm, khalai Jail lian puiah khân ka riak peih tawh lo. Pitari leh a tupa nèlawm lo zet kha ka kham ngawih ngawih."


Ka ngaihtuah hle mai.  Mahse, nula puitling a ni tawh alawm le.


"Chuan, eng tikah nge i lo haw ang?"


"Naktûk chhùn vêlah a ni ang."


"Ka ngaihtuah che a nia."


"Min ngaihtuah suh, chhuanlam kha chu eng pawh lo siam mai rawh, ka lo haw dáwn lo."


"A țha alawm, ka lo sawi fel ang, fîmkhur la."


"Ok, bye."


Ka va huphurh tak ém!!! Ka hrilh ngei an ngai si a, dâwt sawi leh bawk a ngai dáwn. Tùn thla hian dâwt ka va sawi tam tawh tak.


Ka pi bulah chuan huphurh tak chuan ka hrilh ta nge nge a; mahse, ka pi chuan a lo hre thiam viau a, ka thaw a veng huai.


Ka room-ah erawh Ruatdika'n min luhchilh thung.


"Khawiah nge a riah i hria tiraw?"


"Hotel-ah."


"A inzuar țhìn em?"


"Teuh lo," ka lo ti vat a. A ni lah tak a, a inzuar ngai bîk lo miau a.


"Zu erawh a duh ve hle a nih àwm kha."


Ka ngawi reng thung.


"I dam lo em ni?"


"Dam e."


"I eng nge nâ?"


"Eng mah."


"Dâwt hriat belh hi ka duh tawh lo a nia."


"Nâ ka nei lo."


"I kut kha?"


Ka kut chu enin," A zia,"ka ti ringawt a, a na lutuk lo nain a tur ve a, a nuam fahran lo.


"Luhlul viau mah ta che."


"Mut ka duh a, i chhuak thei tawh ang em?"


"Mu rawh, ka duh hunah ka chhuak mai ang."


Hmm, a awm laiin ka mu duh teuh lo. Ka phone a rawn ri a, Angel-i em ni ang? Ka'n en a, Neil-a. Ruatdika awm lai chuan ka be duh lo asin le.


"Hello?"


"Darling Angel, i mu tawh em? Ka hman chiah a."


"Mu lo ve."


"Ka phûr tawh tak zet a ni, ka hmu châk tawh che."


"Kei pawh."  Ruatdika a awm ve reng sia, min en kur bawk si nèn, chhàn thui vak ka duh lo.


"Eng nge ka lo hawn ang che?"


Ka nui sak a," Eng mah a ngai lo," ka ti sap a, chutianga thil min hawn tùr anga ka ngaihtuah chuan ka hlim a ni, tumahin thil min la hawn ngai lo.


"Ngai e, i duh sawi rawh. Pawisa ka ngah  teh mai a nia," tiin a nui hak hak a, ka mûr chiai chiaiin ka hria.


"Haha, ka hria alawm."


"Ka lo lei țeuh dáwn che, i duh loh chu i paih mai ang a."


"Ka paih phal teuh lo ang."


Kan inbe rei ang reng. Kan inbiak chhûng chuan a lo ding reng a, min en kur reng, nuam ka ti miah lo. Kan inbiak zawh ka huphurh tawp.


"Neil-a chu i la hrilh nange?"


Kha maw, ka ning chiang.


"Hrilh lo."


"Eng tika hrilh nge i tum?"


"Ka hrilh duh hunah ka hrilh ve mai ang."


Ka room bang chu a ri dawp mai! Ka phu chiang lutuk a, ka râk țhawt.


Thinrim tih hriat zet hian a kut chuan bang chu a hnek leh pawp mai a, ka hlau lutuk chuan ka hmai ka hup tawp a, ka tha a khùr zawih zawih mai.


"Khatiang...khân...min chhâng tawh suh."


A țawng chu a sehchilh nak mai, a thin a rim tak zet a ni.


Ka mit hupna chu la kiangin ka en dêk dêk a, a kut ka en hmasa ber. A lo la hûm nghet khawp mai; mahse, a thî deuh tih ka hre nghal.


"I kut kha.." ka ti khùr dar dar a, ka țawng veleh chuan a kut chu hnung lamah dahin thip zet hian min melh khui a, a mit a khap miah lo.


[♡Sarah Khiangte♡ Happy Birthday, I  birthday pual liau liau aw.(27th Oct (Sat)]