☆RUATDIKA☆- 16

☆RUATDIKA☆-16 By Dingdi Pachuau


Toilet ațanga ka chhuah hnu rei vak lovah chuan Ruatdikate chu an chhuak a, ka pi chuan MSi chu lo lêng leh tùrin a hrilh lawm lawm a, ka khawngaih reuh tawp, mo neih a lo duh tawh àwm hle mai ka tih phah.


Neil-a erawh a lêng rei deuh, ka pi nèn chuan an titi a, an nui leh har har tawh. Neil-a hi chuan ka pi kawm dàn hi a thiam tlat, a kàwm hlim thiam tlat a ni.


"Ka pi, Angel-i hi nupuia ka neih i phal ang tiraw?" Makti zet hian Neil-a chu ka en a, a fiamthu emaw ka ti deuh nain a hmelah nui hmel s lang miah lo.


"Neil, i duh tak tak em?"


"Ka pi, ka duh loh te'n ka zâwt dáwn che em ni? I phal tiraw?"


"Neil, in la inhre rei lo e, thla khat ém pawh a la tling hlei ném le."


"Ka pi, Angel-i hi ka duh bâkah ka hmangaih a ni. Hmangaih tùr chuan second rei lo tê bâk a ngai lo, nang pawhin 'Pathian ruat an nih chuan kâr khat lek inhria pawh an innei mai' i tih kha, Angel-i hi ka tân Pathianin min ruatsak ngei a nih ka ring," a ti leh ta zel a, kei chuan sawi tùr hre lovin an inbiakna chu ka lo ngaithla reng ringawt.


Ka pi chuan," A dik reng mai, Neil. Nang phei chu ka hriatna che a rei tawh a, i fel tih pawh ka hria. Ka tunu i duh tlat pawh hi ka lo lâwm viau asin; mahse, ani berin min chhuahsan leh daih chuan ka khua a har dáwn em asin, i țhianpa hi nupui nei tùrin nawr phawt teh," a ti ta daih a.


"Ka pi, tûn chûk chûka neih ka tum tihna a ni lo a nia. Hna hi Mizoram lama thawh dàn ka ngaihtuah mêk a, ka tihfel hnu lamah chuan nupui neih ka duh tawh a ni. Angel-i hi ka la râwn miah lo nain sàwm chu ka tum ràn a, R-a hi chuan nupui ka neih phawt loh chuan neih a tum lo va, ka nei phawt ang a, ka nawr ve dáwn nia."


Neil-a haw hnu chuan ka pi chuan," Neil-a hian a duh tak tak che a ni, ka thla a muang suai mai, pasal țha tak a ni ngei bawk ang," a ti sar sar a.


"Nia, min duh hi ka vánnei ngawt mai."


"Pasal neih chu i duh ve tawh reng reng em?"


"Pasal neih thut hi chu ka la tum miah lo, Neil-a pawhin a hna a la tifel lo va, a la theih chuang loh bâkah hna a fel meuh chuan kum a liam leh daih dáwn asin."


"Chuti, ka bulah i la awm rei thei dáwn tihna a nih chu. Ti ta daih ila, i u bialnu kha a tê reuh tiraw?"a ti ta daih a.


"Lian lo ve khawp mai; mahse, a chhe lo reuh a, a pian pawh a mawi alawm."


A nui var var a.


"An inneiha fa a neih hnuah chuan a chêr ve khawp ang le."


"Nih leh, kei ve thung hi?"


"Nang chu nu nih i ngeih zâwkin ka ring."


Chutiang mai mai chu kan sawi a, kan nui kan nui mai, a nuam reuh tawp. Kei pawhin thil dang rilru hahna tùr dah boin hlim takin ka pi chu ka titipui a, hlim tak takin ka nui ve sak sak mai.


Tlaiah  Ruatdika a rawn haw hma viau, vawiin chu dàwrah a kalin ka ring lo. Ni danga tlai dâr 5 vêla lo haw țhìn kha dâr 3 vêlah a lo haw tlat, MSi a thlah hnuah a lo haw nghal a ni ngei ang.


Ka biak duh avàngin," Ka be lawk thei che ang em?" ka ti a, ani chuan," Min biak reng hi," a ti nghut a, ka thin a rim țêp; mahse, a tih dàn phung a ni tih mahni inhrilh mawlh mawlhin," Ka pi hriat i duh athu le," ka ti thung a.


Min en rùn rún phawt a, chutah,"Ka room-ah," ti nghutin a room lamah a chho nghal a, ngei viau mah ila thil ka zawh duh miau avangin ka zui lo thei lo.


Kawngka a inkhàr avàng chuan ka kik dat dat phawt a, "Lo lut vat mai rawh," a rawn tih thùm bul tâkah chuan rang zetin ka lût ta a.


Tukverh bulah min hnungchhawn zawngin a ding a, en pawh min en lo. Ka rilru ka tipaukhauh a, hmeichhe kut a thlâk ngai lo bawk a, na ka tuar lo tùrah ngai ang.


"Angel-i kha i hawtîr a ni tiraw?"


Min chhâng lo.


"Engvànga ti nge i nih? I chah chho te te a, i chhuktîr leh thuai a?"


"Khatiang hmeichhia  kha ka unaunu a ni thei lo ang."


"In inang reng," tih ka tum zuau a; mahse, ka țhulh. A thin a rim leh nasa dáwn si a.


"Mahse, a ni miau si a."


"Min tibuai tawh lo ang."


"Engtin nge i tih? I vau em ni?"


Muang chângin a rawn inher a, chiang zeta min enin," Engtin mah ka ti lo," a ti sup a.


Ka awih miah lo. Angel-i hi a luhlul ve tâwk a, a duh hun têah lo chuan a chhuk ka ring lo, a vau a nih ka ring ber.


"I hriat duh chuan amah zâwt ta che."


"Engtin mah a sawi lo, chhan em em awm lovin a chhuk thut tih a sawi."


"A sawi dik a nih chu."


"A nih chuan, kei hi engtin nge ka awm dáwn? I unaunu tak tak chu i hmu tawh a, a lo kal tawh bawk. Kei chuan tel vena ka nei tawh lo, ka haw ve thei tawh ang em?"


Ka unaunu hnên ațang khân ka hriat duh chu ka hre kim thawkhat. Lem a rawn chan chhan kha University țha zâwka zirna chhunzawm a duh a, pawisa a tumsak dáwn vàng leh Angel-i a hnial zawh loh vàng a ni.


"Hetah college chu kal mai rawh."


"Ni lo, college kal thil a ni lo, chhuk ka duh, dâwt sawi reng hi ka ning tawh."


"Ka pi nunna i kutah a awm ta chiah a nih chu."


"Ruatdik, hetiang hian ti suh."


"A bul țantu kha tunge kha?"


"Keima thiam loh a ni tih chu ka hria; mahse, hetiang hi a nih ka ring phâk lo asin, Neil-a pawh thu dik tak hrilh ka lo tum mêk a."


Thinrim zet hian min melh a," Neil-a. Neil-a nge pawimawh ka pi? Eng nge Neil-a țhat bîk viauna? A pêk theih ang che chu ka pe ve thei tho che, hre rawh, eng nge i duh?"a ti ta  phiar phiar mai a.


"Neil-a hi ka hua, ka haw tak zet. Ka chanpual min lo chuhpui hi ka duh lo, ka tâ i nih hi, tuma min chuhpui che hi ka duh lo."


He pa hi a â a ni ang, makti zet hian ka en reng a, țawng ve ngaihna pawh ka hre lo.


"Sawi teh, Neil-a chuan eng ang fakauva nuamin nge a siam che a? Kei pawhin chutiang chuan ka siam thei ang che, chu aia nuam pawh chuan."


Ka thu hriat chu râpthlâk ka ti lutuk a, ka beng ka hup ringawt. He pa hi a â tak tak a nih hi!


"Tu tâ mah ka ni lo! I thu sawi kha duh tâwk rawh!"


Ka au tuar a, ka piin emaw mi dangin emaw an lo hre pha em tih ka ngaihtuah pha tawh lo, râpthlâk ka ti lutuk tlat.


Min rawn pan hnai vat a, kei ka lo tawlh sawn vat thung; mahse, tawlh sawnna tùr a vâng khawp, bangin min dâl tawh si.


"Min lo hnaih suh, ka au vak a ni mai."




Ruatdika
~~~~~~~


Ka ding chat. Ka ti lutuk tih ka hria; mahse, ka insûm hman lo a ni. Neil-a hming a sawi chhên hi ka thîk tak zet a, nizàn lama an infâwp ka hmuh ațang phei kha chuan ka thinlung hi a tâwt țûn a, a puak keh mai ang tih a hlauhawm zâwk. He nu hian eng mah sawi lo pawh hian min tithinrim thei a, min tihlim thei bawk.


Pên khatin ka hnaih leh hrat a, a thinrim hmel hmuh pawh hi a nuam ka ti tho. A kut rawn pharin," Min rawn hnaih leh teh vaih, ka pi ka ko tawh chiang khawp ang," a ti țhat a, he nu tê hian a ti duh tak tak reuh ang ka ti.


"Ka kaltîr thei lo che," ka ti ta ringawt a, ni e, Neil-a hnênah a ni emaw tu hnênah emaw pawh ni se ka kaltîr thei lo, ka pi hi chu ka chhuanlam mai a ni a, a lung lam hi chu a sawi sêl ve tho nain chuti vaka nasa a ni lo.


"Min kaltîr lam a ni lo, ka thu thu a ni."


A huai reuh hle mai, tàn tàn reuh chuan! A thinrim hmel ve te hi, a țawng paha a hmui sexy zet che ve zel, khûr deuh dar dar chuan min tiphûr tak zet tih a hre dèr si lo.


"Tum chiah la? Ka pi hi a..." ka la sawi zawh hma chuan," Ka pi chu ka ngaihtuah ve reng, ngaihtuah lo ila ka awm tawh lo ang!" a lo ti țhat a, chiang zetin min en lêt ve rân a.


A rilru a buai ve tho tih ka hre thei. Ka pi hi a pi tak tak a ni lo tih hre chiang bertu ka ni ve tho; mahse, ka rin phâk bâkin a duat thiam a, a chhaih thiam bâkah a tihlim thiam em em, ka pi lahin a ngainain a hmangaih bawk. Hetih kâra a nihna dik tak hi a hrilh a nih hlauh chuan ka pi hian a tuar na khawp ang.


"Ka pi avàng chauha la chhuk lo ka ni rêng a ni. Chhûngte ka neih loh avàngin ka pi pawh pi tak tak angin ka en a, ka ngaina em em. Nang ve hi chu, unaupa neih pawh min tichâk lotu i nih hi!"


Makti rilru zetin ka en a, ka thinrimna zawng zawng a bo vek. Ka pi hi a lo ngaina ve tak tak a, chutih laiin kei erawh, eng maw?!!! Keimah vàngin unaupa neih pawh a châk lo zo maw?!!!


"Ka kut nâ min tuamsaka damdawi min petu, ka lu nâ min hmehsaktu i nih vàng chauhin ka ngaina che, a dang zawng zawngah ka unaupa i nihna angin min duat lo, min vìn a, min vau a, min blackmail bawk. Chhûngte, nu leh pa ka neih loh vàngin min hmusit a nih kha, ka duh vàng a ni bîk em ni? Nu leh pa, min duata min ngaihsaktu neih chu ka duh ve tho asin."


A âng barh barh chu ka en a, ka ngaithla reng a, a thil sawi chu a dik deuh vek; mahse, chhûngte a neih loh avángin ka hmusit miah lo, chu erawh chu a sawi dik lo ve tlat.


"Ka sual vàngin em ni nu leh pa ka neih loh bîk? Lem ka chang a, dâwt ka sawi tih chu ka hria, hrehawm ka tihzia hi i hre thiam pha lo ang, helai ka lo kal hi ka inchhîr tak zet a ni."


A thil sawi inkahpah niai ațang chuan a rilru chu a na hle tih ka hria. Nia, hrehawm a ti ngei ang. Keiin ka vìn a, țûl tàwpah lo chuan ka be ngai lo, chu pawh țawngkam pângngai takin ka be ngai lo. Hrehawm a tih theihna ngei tùrin ka awm lui char char a, hrehawm chu a lo ti ngei e.


"Ka hrilh ang, ka pi chu ka hrilh vek ang. A rilru na dáwn mah se, kei pawhin a nâ ka ti ve tho. Ka tuar peih tawh lo, ka thinlung hi a rit ém mai, jail-ah pawh min khung mai rawh se, ka tuar mai ang."


A mittui far  ka hmu, ka hmuh sual a ni em? Ni lo, thup chu a tum viau mai, sîr lam a hawi daih, a mittui tla hi ka chak lohna chu a va ni teh rêng em!!


"Zorin!" Zàwi têin ka ko va, min chhâng lo, a awm ngaiin a awm reng a, ka hnaih hrat a, min en chuan loh avàngin ka hnaih leh zual a, kan insi deuhthaw ta.


"Zorin," ka ko leh a, a inhnît ta hraih mai, a țap chiang. Keimah vàngin a țap leh ta, ka tițap leh ta.


Dîm têin ka kuah a, a lo țang bîk lo. Min hnial lo tih ka hriat veleh nghet zetin ka âwm nghèngin ka kuah a, a inhnît ta faih faih mai. A hnung chùlsakin a samah ka fâwp a, hetia kuaha pawm vawng vawng hi ka châkna a rei tawh asin.


"I.. i..iii...sss..sualll...ssiii."


A va naupang chhia tak!! A inhnît a, a țawng țha thei lo va, chutah pawh ka sual thu chu a la sawi duh tho nia.


"Nia, ka sual, kaltîr che ka phal loh vàng alawm."


A inhnìt chhûng chuan a țawng leh tawh lo, ka kuah tak zet a ni, hetiang hia  tu mah ka la kuah ngai lo, min kalsan ang tih ka hlau ngawih ngawih ni berin ka hria.


"Min thlah tawh rawh."


Ka thlah phal lo, ka thlah chuan Neil-a bulah emaw khawiah emaw ka hmuh phâk lohah a kal bo daih ang tih ka hlau, sual min ti bawk si.


Ni lo, heti mai chuan ka thlah thei lo. Ka ngaihtuahin ka ngaihsak a ni tih hria se ka duh. Neil-a hi ka thîk em em a, ka thîktîr theih nân chauh MSi pawh kha hruai ka ni!! Neil-a hian a rilru neihsak te tein, rilru nain a kalsan ang tih ka hlauh vànga Neil-a hnaih lo tùra hrilh pawh kha ka ni a, kei chuan Airport ațang tawh khân ka duh tih ka hre tawh. Neil-a aiin ka duh hmasa zâwk; mahse, tunge mahni unau ngaizawnga duh ngai? Ka awm dàn hi a buaithlâk ve ém ém tho asin.


"Min thlah teh, ka thaw țha thei lo a nia."


Ka lo kuah nghet lutuk a ni. Ka thlah hnu chuan a mittui la châm bângte chu a hru hul a,ka en reng. He nu hi ka duh a ni, ka duh lutuk tlat. Bialnu hrang hrang ka lo nei tawh, he nu aia chhe lo tak tak leh class deuh deuh pawh ka lo kawp țeuh tawh; mahse, he nu anga ka thinlunga ka duh hi an la awm lo.


"Ka duh che!"


Ka thil sawi chu a hre lo nge, a hre lo der ka hre lo, engtin mah amahah a thawk miah lo. A mit chu a nuai a, a sam pawh a huih țha bawk.


Ka sawi leh ang, a aia ringin. Hun ka nei teptêr tawh, ka tlai hle tawh zâwk a ni. Neil-a'n min hma khalh tawh lehnghal.


"Zorin, ka duh che."


Chutah, muang chángin a rawn hawi chhuak a," Chutiang sawi suh," a ti ta sap a.


"Ka duhna che hi ka sawi thei lo ang maw? Engvàngin?"


"A theih loh! Ka'n chhuk tawh ang e."


A chhuak tùr chu a bânah ka man hman a, ka pawt lêt. Ka kuah a, ani a tâl; mahse, ka hneh ve chiangkuang khawp. Ka fâwp dáwn, eng pawh ni se, ka fâwp dáwn a ni mai.


A tìrah chuan a țang ve chiang; mahse, ka thlah duh lo, ka tilui zel a, a hnuah erawh chuan min chhâng lêt ve ta, min duh lo hulhual chu a ni bîk lo ka ti ve tlat.


"Tun ațang chuan ka duat tawh ang che."


Meng phî deuh chiai hian," Aih, min duat suh, a ngai angin awm ang che," a ti sap a, a lan dàn sexy-zia hi hria se chuan aw... ka man bet leh a, ka'n fawh leh deuh țâwk kha.


A chhuk hnu deuh lawkah ka chhuk. Khua pawh a lo tlai ruai tawh a, chaw ei a hun mai dáwn. Ngatinge tu mah ka hmuh loh?


Ka pi room ațangin Làwmi, kan awmpui nula zâwk a lo chhuak a, chu chu ka hmuh veleh," Khawnge ka pite hi an awm vek a?" tiin ka zâwt a, ani chuan," Ka pi a chàu deuh thut a, room-ah kan awm," thlaphan hmel ang reng deuh hian a ti a, kei pawh chu ka pi room-ah chuan ka tlân lût rang kher mai.


Khumah a lo mu a, a kut chu Zorini chuan a lo chelhsak a, a lo thaw deuh kâwk kâwk a, nasa tak chu a ni lo.


"Engtizia nge?" Zàwi têin Zorini chu ka zâwt a, ani chuan min en lo chuan," Ka hre lo, ka chhuk khân a lo awm țan deuh tawh a," a ti sap a.


Damdawi a ei theihnghilh ngai si lo va, hmân deuha a awm ațang khan damdawi hi a thlah ta miah lo kha a ni a, a lo ei theihnghilh palh emaw ni dáwn le?


Zanriah kan ei har phah ta. A thâwk a zia deuh hnuah chuan thil awmzia ka zâwt a, damdawi mûm khat a lo ei theihnghilh thu a sawi a, Làwmi hnênah chuan ka pi damdàwi ei hun chu enpui tùrin leh a hun pângngai thlapa eitîr tûrin ka hrilh a.


Chumi zàn chuan ka pi remti lo chung chu Zorini chuan a riahpui a, khum bula sofa-ah chuan a mu mai dáwn emaw ka tih laiin ka pi si chêt chuan a mu ve ta tlat mai. Ka pi hian ka mutpui leh ka nu mutpui pawh a duh ngai miah si lo va, mak ka ti khawp. A tunu tak takah a ngai a ni si a, a nih loh thu hrilh chu a huphurhawm khawp ang chu ; mahse, ka la hrilh ngei a ngai ang, ka hma lam hun atân a pawimawh hle si a.