☆RUATDIKA☆- 17

☆RUATDIKA☆- 17 By Dingdi Pachuau


Ka pi thâwk pawh a ziaawm chho zel a, ka lâwm hle mai. Hetiang a nih  chuan thu dik hrilh pawh a huphurhawm, Ruatdika sawi kha a dik , a nunna hi ka kutah a lo awm tak zet a nih hi.


"Bawihi, mutpui ka ngai miah lo a nia, ka țha vek tawh  e."


"Ni lo, ka pi. Țawng thu chhe loah, lo awm leh thut palh ta la, tu mahin kan rawn hre dáwn lo che, zanin tal chu ka riahpui dáwn che," ka ti ve tlat a, ka tum ve si a, a tàwpah chuan remti lo deuh chuan a remti ve ta hrâm a.


"Ka pi, ka hnâr ngai miah lo, mutpui ka hrehawm lo ang, chuan, ka mang a chhe lo bawk."


Mut hmunah chuan Angel-i chanchin chu min zâwt a, a nu leh pa hming, an chènna țhin, a nî hming nèn zawng zawng chuan chipchiar takin min zâwt a, kei pawhin mahni chanchin hriat loh thu va awm suh, ka hrilh par par a.


"Engtin nge in inhriat țan dàn?"


"Facebook ațangin ania, Singapore-ah ka țhiannu a awm ve țhìn a, chu nèn chuan an lo inkâwm ve țhìn a."


"Chhûngte zawn chhuah a tum ngai lo em ni le? An awmin ka ring tlat."


"A nu leh pa leh a nî bâk kha a hre lo, a nu leh pa lah an boral hma si a, a nî lah chuti bawk. A tân chuan tihngaihna a vâng ve bawk a ni."


Ka pi mut hnuah chuan vawiin tlai Ruatdika room-a thil thleng kha ka ngaihtuah lêt a. He pa hian min lo duh reng maw? Ka chunga sual tak tak leh nèlawm lo zet zeta min biak lai pawh khân min lo duh ru reng tawh tihna em ni? Min tilai zo vek, ka piin min la hmu dùn ngei ang, chawhlui pawh kan kîl tlâng leh ngei dáwn, ka dik lo zo vek tawh ang.


Neil-a kha a hua. Um, a huat tak zet thu a sawi kha. Engtin nge a țhian țha ber a huat theih? Kan inngaihzàwn vàngin maw? Kei hi ka awm lohna tùr hmunah ka awm váng a ni, an inkâr tichhetu ka ni thei lo ang. A buaithlak kual vel vek tawh.


Ruatdika min duh vàng ringawtin Neil-a ka țhen thei lo, Neil-a țhenin Ruatdika ka pan hek lo ang ;mahse, Neil-a pawh thu dik tak ka hrilh ang, a hnu lam chu a thu thu a ni tawh mai.


Neil-a chuan min hmangaih alawm, Ruatdika chuan min duh tih a sawi ringawt. Duh leh hmangaih a inang lo va, inhnaih tê si, inhlat deuh si a ni. Duhna chu taksa mawina, pâwn lam lan dànah a innghat fo a, hmangaihna erawh chhûng ril lamah a ni thung. Neil-a hian hmangaihna dik taka min hmangaih chuan thu dik hre mah se min kalsan theih ka ring miah lo; mahse, min kalsan ta pawh ni se ka dem chuang miah lo ang.


Zîngah ka pi aiin ka harh hmasa a, ka tho hma ve tlat. Inphih fai tùrin room-ah ka chho a, Ruatdika chu morning walk nei tùrin a chhuak leh daih tawhin ka ring, helaia awm nghet chu ni ila ka chhuak ve thìn khawp ang.


Hmuh ka huphurh. Nimin tlai thil thleng vàng khân, a chhan chu a fawh hi nuam ka ti tlat a, țang ve hle mah ila, a tàwpah chuan ka fâwp lêt nge nge zel. Chhàn lêt loh theih loh hian min fâwp tlat zel a, a duhthawh thiam bawk si.


Ka pi exer ka lâkpui lo nain a kut leh ke ka massage a, chumi pah chuan a kutte chu exer ka lâktîr a. "Heti hian ti rawh," "Chutiang chuan," tih leh " Khati khân" tiin ka tihtîr a, hah lo leh chau miah lovin ka tihpui vek a, a sâwtpui ngeiin ka ring.


Tûkțhuan kan kîl lai chuan Ruatdika chu ka en duh lo, min duh tih a sawi  hnu hian hmuh ka huphurh ta tlat. Ka pi hian a hria ang tih ka hlau, keimah lam hian ka haider luih mai a ngai.


Min en leh vung vung țhìn tih ka hria, en lo mah ila ka hre tho. Ka pi erawh chu a dàn ngai têin a țawng leh barh barh tawh.


Dawhkan hnuai ațang chuan a kein ka keah min rawn tlawh dè dé a, ka phu zawk. Ka piin a hria ang tih ka hlauhzia chu!! Melh duh lovin ka ke chu ka dah sawn a, eng mah hre lo ang hmiahin ka awm. A huat tâwk a tling a ni ngei ang, a rawn tinawn leh sak. Tûn țum phei chu a ke chuan a chàwn thleng a rawn nûl chho, ka ding hluai.


Ka pi chuan," Engtizia nge?" tiin min thlêk deuh hâ a, ka zak chhàn ngaihna hre lo chuan," Ka puar deuh thut a, ka kham tawh mai ang," ka ti a.


"I chaw pawh i la bàr zawh loh kha."


"Ka puar tawh."


"Ei zo rawh, chawthlênga chaw a la awm laia kalsan chu a malsâwm lo."


Amah vàngin ka tho tih a hre reng sia, ka va ngei tak! Min rawn tlawh lo se chuan ka la kham àwm tawp si lo.


Tui lo zet chuan ka țhu leh, inring rànin ka țhu a, a rawn tinawn ta ém lo. A nui deuh suk suk ringawt. Ka puar chiah em pawh ka hre lo.


Ruatdika'n ka pi kalsan a phal loh vàngin inah ka awmpui a, Neil-a pawh a lo lêng leh, naktûkah a chhuk leh tawh dáwn. A huphurh khawp mai a, ka khawngaih roh tawp. Keimah vànga chhuk huphurh a ni tih ka hre ve tho si a. Ka thil hrilh tùr pawh hrilhna hun ka la nei lo, hun fâl kan nei lo va, bâkah, ka huphurh ve ém aváng hian hrilh ka tum zuau pawh hian ka țhulh leh țhìn.


Chhùnah Ruatdika a rawn haw a, chhùn ei tùr a rawn lei nual mai. A țhen chu a dah țha a, engtiziaa rawn lei țeuh nge a nih ka hre lo, ka zâwt hek lo. Neil-a chuan a lo phùlpui hlut a, nimin tlaia Ruatdika thu sawi kha ka hre chhuak zawk mai. Neil-a a hua tih kha; mahse, chutiang chu a nih duh hmel loh, a țawngpui ve tho sia.


Ruatdika chu thil ei zawhah a kal leh mai a, pakhat tê mahin min be lo. Neil-a nèn erawh an țawng bawrh bawrh thung si a, a ngeiawm ve thlâwt.


"Neil, nakin zànah i lo lêng leh ang tiraw?"


"Lèn àwm tak. Min ning tawh em ni?"


Fiamthu tih hre mah ila, ka nui duh miah lo.


"Ah, i tiawihawm loh e, thil hrilh duh che ka nei maithei a nia."


"A țha lo lam a nih chuan min hrilh tum suh aw, ka ngaithla duh lo."


"Țha lo lam pawh a ni lo, a ngaithlatu rilru azir a niang chu."


"A țha a nih chu. Ka rilru a chhe si lo va."


A lêng rei lutuk lo, thil tihfel tùr a la neih nual avàngin, min hmu lo leh vang vang dáwn sia, min rawn hmu leh phawt a lo ni.


Neil-a hi chu a țha thlâwt, ka phû lo ngawih ngawih zâwk a ni. Pasal atân a aia țha tùr an awmin ka ring lo, a innghahna tlâk si. A zaidamin a fel si, hei bâk bâk chu an awm thei lo ang.


*Beep beep*


Neil-a chu, a hàwna a la rei loh nèn, message-in min rawn ûm zui lehnghal a niah.


*Drawer-ah khân chhang 'cial' ka dah kha*


Uai, hei chu Ruatdika message a ni!!
Ka nuih a zã, hei hi min duat ve dàn chu em ni? Țawngka pawha sawi ngam lovin message ngei maiin. A thil tih dàn hi a nuihzatthlâk bawk si, a lawmawm bawk si.


Mahse, a message hi, drawer-a chhang cial a dah thu a rawn sawi ringawt, 'lo ei rawh' pawh a ti lo. Ka ei tùr pawh a ni lo thei a, ka pi ei tùr pawh a ni maithei asin.


*Kan lo ei thei tihna maw?*


A rawn reply rang khawp mai.


*EI RAWH*


A thinrim leh ringawt tawh a ni ang, he pa hi chu aw, thinchhe lutuk mai. Hetiang chuan ka ei ngam tawp nâng, ei lo tawp ang, ka ril pawh a țâm lo. Min duat suh se, a farnu pawh ka ni lo va, a bialnu pawh ka ni hek lo.


Zanriah kîl laiin a ke bawk chuan min rawn tawk leh a, a tìrah chuan ka ngaihsak lo. A hnuah erawh chuan rum zet hian ka pi hmuh loh laiin ka melh a, min en duh bîk țhak lo. Ka pi chu a bia a, kei erawh a dàn ngai têin min be lehpek lo.


"Zanin i chhuak ang em?"


"Aw."


"MSi-te inah maw?"


"Aw."


"Eng tikah nge neih i tum ang?"


Ngawi rengin an titi chu ka lo ngaithla a, Ruatdika pawh a ninhlei tawh lo bawk a, a zia viau e. Ka piin a rawn sawi chhuak chu ka lâwm tawp.


"Ka pi.. !!"


"Bawiha, ngaihzawng neia tei tei a hun tawh loh hi, ngaihzawng ni lovin nupui neih i hun tawh zâwk a ni. Kei chuan i duh apiang ka duhpui mai ang che; mahse, nawr lutuk che hi chu ka duh bîk lo."


"Ka pi, min nawr reng tawh chu."


"I pi hi min ngaihtuah tel la ka duh a ni."


"Ka pi, ka ngaihtuah che, ka ngaihtuah lutuk che avàng hian alawm buaithlâk ni!"


"Engti kawng zâwngin nge buaithlâk?!!"


"Nupui chungchângah kher kher hi chuan min nawr lo teh u, hun ka tih leh ka duh hunah chuan ka nei ve mai ang."


A tho ta daih a, a thinrim leh tawh a nih hi. Țawngka vìn a hmang lo chu ka lo lâwm hle a ni, a chhan chu ka pi hian mak a ti lutuk ang, a tupa hian a thu a hnial vak ngai àwm si lo va.


"Ka nawr lutuk em, Bawihi?"


Ka pi nuih sak pah chuan," Ka pi, ka hre thiam che alawm, nawr pawh ni la thil àwm lo a ni miah lo; mahse, ani pawhin nupui țha tak, a duh tak neihsak che chu a duh ngei ang. Chutianga a duh leh dam chhûng hun hmanpui tùr khawpa duh chu a la nei lo pawh a ni maithei a. Tunah hian nupui lo nei ta ringawt se, a duh ve tho, a hmangaih miah loh a lo nih phei chuan nakinah hrehawm in ti dáwn lutuk asin. Chuvàngin, amahin a sawi chat hun nghâk ila, a fuh berin ka ring," ka ti a.


"Bawihi, kum 30 vâl a ni tawh a, a nei lo mai ang tih ka hlau a ni. Bâkah, ka upa tawh a..."


"Ka pi, i upa deuh tawh pawh a ni thei, i la dam chho zêl dáwn alawm. Ka sawi tawh kha, dam chho zêl tùrin ka hrilh tawh che kha."


Min en vang vang pah chuan," Nang hi chuan min thlamuan thiam teh e, ka tupa hi chu mipa ngang hi a nia, thil awmziate hi min hrilhfiah ve dap dap țhin se a zia tùr a nia. Nia, ka nawr tawh lo ang, a duh hunah tak nei rawh se," a ti sap sap a.


Ruatdika chu a chhuak hma kher mai. A lung a awi chiah lo chu a nih hi, a ho mai mai êm mai. A pi a tar ve tawh a, nupui neih a la duh rih loh thu hrilhfiah ve mai se, hetiang hian an awm lo tùr.


Neil-a a rawn lan chuan ka pi pawh a tupa chunga a lungawi lohna chu a bo leh tawh a ni ang, a nui leh var var reng tawh. Neil-a hi chuan a chhaih peihin a nuihpui peih a, a tân pawh hian ngainat loh theih a ni mawlh lo.


Kan pahniha kan  awm dun hnu chuan ka dàra min kuah pahin," I thil min hrilh tùr kha eng nge ni ang aw tiin ka rilruah a awm reng a," a ti sar sar a.


"Ka hrilh duh che ang em aw?"


"Ka lo ngaithla e."


Dik tak chuan ka huphurh alawm, a hriat hnuah thinrim ta se, min huat chuan hrehawm ka ti dáwn lutuk. Mipa ka hnaih hmasak ve berin min kalsan chuan hrehawm ka ti viau ang, a lakah hian ka rilru ka pe viau tawh si a.


"Ih,.. ka ngai dáwn che e."


"Tlân dùn daih ang!"


"Engtin a?!!!"


"Ințhen hi ka ning tawh. Ka hmangaih che a, nupui atân neih che ka duh a ni. Kan inrûk chuan a fel hma ting dáwn tihna a nia."


"Inrûka bul țan i duh maw?"


"Kan awm dun hma dàn ka ngaihtuah alawm. Inru innei tluang an tam e, innei rei rei an ni duh nghe nghein ka hria."


A kut chelhsak pah chuan,"Neil, chutiang a ni ringawt hlei nem. Nang phei chu i fel êm hi, dàn thianghlim ngata nupui neih i duh zâwk lo em ni?"ka ti  thung a.


"Ka fel lo a niang chutiang rilru chu ka pu si alawm."


"Ka thil sawi vàng kha a nih kha. Hmalam hun êng tak kan nei a, i hna i tifel phawt ang a, chumi hnu lam chu i thu thu a nia."


"Min nei  duh tak tak em, Angel?"


Angel. Hei hi ka hming a ni lo. Ka pi tunu hi ka nihna a ni lo, tûn hun hi hrilh hun a ni, hrilh pawp mai ang.


"Neil..."


"Min duh ve tho tiraw?"


"Teh rêng mai, Neil."


Min pawm chat a, nghet deuhin min kuah a, ka sam chûl hoh hoh pah chuan," Ka nghâk ang, nangmahin min duha min nghah peih phawt chuan. Kei aiin i rilru a lo puitling daih zâwk a nih hi, ka tluk lo hle mai che," a ti dap dap a.


"Ni lo, kan inthlâkhlelh vàng a ni záwk."


"A dik chiah, ințhen hi kan hreh ve ve a ni. Mahse, ka tuar ang, nangmah váng hian ka tuar thei ang tih ka hria. Min lo nghâk reng rawh aw, khuta i chhuk thla a nih pawhin min hrilh la, kan inhnaih deuh sawt chuan lung pawh a lêng lo deuh sawt ang a."


A ngaihtuahna a va naupang chhia reuh tak!!


"Naupang chhia e."


"Naupang chhia ka ni lo aw, test i duh em?"


Hnai zetah kan inen ràn a, ka nui deuh nain a nui miah lo, a thu tak hle mai.


"I ho, ka pi a awm reng hi."


"I room-ah."


A bânah ka sik hlak a. "Fiamthu pawhin sawi reng reng suh, ka hlau mai ang che," nui chungin ka ti a. Ani pawh chu a rawn nui ve nghal a.


"I va duhawm reuh tak!"tiin ka biangah chuan a piai vâwt a, a na kher mai.


"A na a nia!"


"Ngahnge i duhawm viau ni!"


"Min tihlaih i tum chiang."


"I lài em?"


"Aih."


"A țha, ka bulah hi chuan lài lo hian ngam sârh la ka duh."


Nia, Neil-a bulah hi chuan ka ngam sârh alawm. Ka ring ngam a, ka duh loh zâwngin a awm lo tawp ang, min hmangaihtu a ni a, min hmangaih miau chuan ka duh loh dàn chuan a awm lo ang.


Dâr 11 rîk dáwnah a haw. Kan la inthlahlel viau nain zàn rei tak men ai chuan naktûkah a kal hmain lo kal leh mai se kan ti a, zàn men rei chu a tûkah a hrehawm duh ém mai. Zin tùr a ni si a, ka khawngaih ve alawm.


Ruatdika a lo la haw miah lo. He pa hi eng nge a hriat le? A pi thil sawi kha a la run viau em ni le? A ho e, nupui nei tùrin a duh ve tawh a, a sawi ve maiah ngaihsak mai tùr a nia.


Mut hmunah ka ngaichang reng a, a lo haw har tak zet. Ani hi rawn haw loh a tum em ni le? Nge a rui em ni le? A rui a ni ngei ang, a nih loh chuan a bialnute inah riah a tum a ni ang.


He pa zah lohzia hi. A nu leh pate an awm ve reng àwm sia, a va zak lo tak! Mu dùna riak dùn duh pawh ni se, hmun dangah hotel vêlah pawh riah chhuah mai àwm.


Thâwm ngaichang reng paha mu ka ni bawk a, thâwm rawn awm deuh ka hriat chuan dâr zât ka en vat a, dâr 12:37 chiah. He pa lèn reizia hi. Mahse, a rawn haw tal alawm, țhaah ngai ang.


Ka room kawngka a rawn ri dat dat. Eng atân nge min tih ni? Rang zetin ka tho chhuak a, kawng chu ka va hawng a.


Kàwi fé hian a lo ding a, a meng țha hlei thei lo a nih hmèl. A rim chuh!!! Ka hnâr ka hup vat, tluk loh rim a nam lutuk.


"Zu i in a ni maw?!!"


"I hre reng a, min zâwt kher suh." A țawng chu a pângngai viau.


"Khati chung khân i bialnute inah i lèn loh hrâm ka beisei."


A nui hawk a.


"Ka lêng alawm. Ka lo haw hnuah chauh ka in."


A țawng ring hran lo nain zàn a rei tawh si a, ka pi kan tiharh ang tih ka hlau. Ka room kawng chu khârin a room chu ka hawng a.

"Lût rawh le, zàn a rei tawh."


"Ka room-ah ka mu peih lo."


A room-a a mut lohin khawiah nge mut a tum ni?