☆RUATDIKA☆ - 18

☆RUATDIKA☆-18 By Dingdi Pachuau


"Mu rawh aw, i tân  mut a țha."


A che sawn chuang lo. A bânah ka kai a, min zui ve mai bawk a.


"Tu nèn nge in in a? I in tam viau a ni maw?"


Khuma thu chung chuan," Ka in tam lo a nih hi, ka rui hlei nem," a la ti duh chauh a, rui lo chu a inti ve sia, ka nuih a za zâwk. Engtin nge a rawn inkhalh thlen zâwk ni?


"Ka rui lo tak tak. In dàn tâwk ka thiam ve alawm."


Mu thuai teh se, rui lo a inti ve tlat bawk si a, a buaithlâk, zàn a rei tawh.


"Um, i ruih loh chuan mu tawh rawh le, zàn a rei tawh."


"Chhang ka leisak che kha i ei ta em?"


"Ei lo, i ei châk em ni?"


"Ei ta che, 'ei rawh' ka tih che kha."


"Aw, naktûkah aw."


"Naktûkah chuan a tui tawh lo ang."


"Aw, ka ei dáwn nia, mu phawt la?"


"Vawi khat chiah min kuah teh."


He pa hi chu aw, a va nawi tak! A mut thuai loh chuan duh aiin a nawi rei dáwn tlat. A ruih hian hetiang hian a nawi ziah em le?


"Mu thuai mai teh."


"Vawi khat chiah!"


Ka kuah ta poh, dîm têin. Min kuah lêt lo va,a țhut ngaiin a țhu reng.


"Le, mu tawh rawh le, naktûkah chuan i harh vâk tawh mai ang."


A pheikhawk chu phelhsakin khumah chuan ka muttîr a, a maimichhìn tlat tawh avàngin a muhìl a nih ka ring deuh a, chuti taka hmaa a muthilh nghal chu ka ring chiah lo deuh bawk si.


"Muttui aw."


"Muttui le, Zorin."


Kawngka chu dìm têin ka khâr a, tui takin a muhìl thei em ang chu maw. A ruih ngai loh nèn, zanin zet chu a mak a ni.


Chhang chu, ka ngaihtuah a, ka ei châk ta tù tú mai. In hnuaiah ka chhuk a, ka zu ei ta poh. A tui tak tak a nih hi, ka room-ah ka la chho a,  ka ei țeuh mai.


Ka puar ém avàng chuan ka muhìl thei lawk lo lehnghal. Khumah pawh mu peih lo chuan ka vei ka vei a, lehkhabu chhiar tùr ka duh, hetiang chuan ka muhìl thei lawk lo ang.


Ni lo, Neil-a hi ka chanchin kha ka hrilh hman leh ta si lo va, ka hrilh dàn tùr chu ka phone-a note-ah ka type chhuak ta vek zâwk a, țawngkam mawi deuh leh hriat nuam tùr deuh ngaihtuahin ka type ta dul mai a, ka duh ang tâwka țhaa ka type hnuah pawh ka mut a la chhuak lo. Khumah chuan ka mu ve ar a, number za ațangin a lêt zâwngin ka chhiar a, vawi thum ka chhiarnaah chuan ka chhiar zo thei ta bîk lo, ka lo muthilhsan ta nge nge a.


Zînga ka thawh chuan morning walk neiin a lo tho leh daih tawh, he pa hi a mak ka ti, a thawh har ka ring ve deuh a nia, a ngai reng tho.


A lo haw pawhin nizàn lamah a rui nawi hle a ni tih pawh a hriat loh, min be chuang lo va, nizàn lam thil thleng kha hria ang pawhin a awm hek lo.


Chhùnah Neil-a a lo kal zawk a, a awm rei lo. Ka thil hrilh tùr hrilh hman pawhin a khawsa lo, min rawn mangțha zawk tak tak a ni, car-a a luh dáwnah erawh kan infâwp zawk hman. Ka ngai leh roh dáwn e, nuihna tùr a vâng leh rih dáwn a ni.


Neil-a chhuk ațangin kâr khat a ni ta. Kei pawh Mizoramah thla khat chuang ka awm tling ve ta. Ka pi hian chhuk lam a sawi ri si lo va, sawi chhuaktu nih ka huphurh si a, ka la sawi lo mai mai. Ruatdika inah a awm tam lo va, 'ka duat tawh ang che' min tih erawh kha chu ei tùr lamah a țuan a, min rawn hawnsak ziah. Tlai khat a lo haw ve thung chu T-shirt min rawn lei niin. Min pe dawt hreh si a, 'ka room-ah chumi khami chu han la teh' tiin min tîr a, ka han la zêl a. Ani, a room kawngkhàr bul chiahah paper bag-ah a lo dah niin, hmuh chu ka hmu ngei, eng nge a nih ka en lo va, ka khawih hek lo. Keima thil ni lo hi ka khawih khât viau.



"I hmu em?"


"Kha, ka pêk vek tawh che kha."


"Ni lo, kawngkhàr bula mi kha."


"Hmu e. Eng nge ni?"


"I en lo em ni?"


"Eng atân nge ka en ringawt ang?"


A chek hluk a." I ta tùr a nih kha," a ti sup a.


"Eng thil nge?"


"Han en mai rawh!"


Min duat ve dàn lah hi, țawng hluk hluk ringawt mai, min pêk ve mai àwm. Min pe hreh leh sî a nih chiah hi.


A mawi reuh khawp mai, a colour lah chu duhthusàm. Ka inhmeh dáwn tih ka hre mai, a chhan chu ka duh chi a ni miau a.


In hnuaiah chuan ka tlân thla dat dat a, ka pi nèn an lo awm dun tawh avàngin ka pi hnènah chuan," Ka pi, en teh, surprise gift ka dawn hi, a mawi lutuk!" tiin ka hmuh a, Ruatdika enin,"Ka lâwm lutuk e, unaupa fel tak i ni," ka ti thung a.


"I ho e a."


Ka pi thung chuan," A leisak che maw?!! A va mawi e! I inhmeh ngawt ang, a lei thiam khawp mai," a ti a, ka nui var var a.


"I làwmna siam a har lo si!"


"Min leisak vawi khatna a nia, ka lâwm ém asin."


"Gift mai maia tihlungawi theih!"


"Ka lâwm e," tiin kawr chu in chung lamah ka chhohpui ta daih a, a sawi thui ang tih ka hlau a ni.


Zànah Neil-a hman hun tak ka hriat loh avàngin leh  phone-a ka hrilh hriat hreh ém avàngin ka zu text a, ka nghâk vang vang a; mahse, min rawn reply lo. A la hman lo a ni ang, note-a ka thil type sa chu ka send bawk a, a hmuh hunah engtin nge a tih ang le? Min rawn phone thuai ka ring.


Zànah min rawn phone lo, a tûkah pawh nilêngin a call ka nghâk a, ka phone ka en sek; mahse, message takngial pawh min lo thawn lo, a mak hle mai! Ka message kha a read ngei si a.


Zàn dâr 10-ah ka call chàn chu ka dawng ta chiah e. Chhàn ka huphurh viau nain a rilru hriat ka châk tho si, huphurh si, phûr ru tak siin ka chhâng ta a.


"Hey, Neil?"


"Angel, thu dik a ni em?" A awri ațang ringawt pawh chuan awih har a tihzia a hriat theih hial, thu dik ni lo se a ti hle a ni ang.


"Neil, thu dik a ni si a ni. Ka pi tunu hi ka ni lo va, a țhiannu zâwk ka nia. Chuan, Angel-i ka ni lo."


A thaw hap ri chu ka hria. Hrehawm ka ti, dâwt avàngin tunah hian rilru hrehawm takin a awm dáwn si a.


"Angel, awih a har ka ti a ni. Dâwt sawiin lem i chang thei lo ang!"


Mahse, a dik si a ni. Lem ka chang a, pawisa vàngin, chu chu eng thil mahin a tidanglam thei lo.


"Neil, a pawi ka ti."


A ngawi vang vang phawt a, a rilru tùr ka ngaihtuah a, hrehawm ka tihpui ngawih ngawih, keimah ka indem em em a ni. Mi rilru tinatu mai ka ni si a, chu pawh ka bialpa hmasa ber niin dâwt ka sawi vàng  a la ni zui.


"Awih har ka ti."


"Neil, min kalsan dáwn tiraw?"


"Chutiang sawi ngai suh."


"Engti pawhin thu tlûkna siam la, ka pawm vek ang, Neil."


"Ka piin a hre tawh em?"


"Hre lo, Neil. Ka hrilh ngam lo a ni; mahse, ani pawhin a hre thuai ang."


"Mak a tiin hrehawm a va ti dáwn em!! Kei pawhin hrehawm ka tiin awih har ka ti a nia, ani phei chuan..."


"Neil, ka pi chuan Jail-ah min khung duh maiin i ring em?" Ka rilru chu a hrehawm telh telh mai, ka rin aiin ka dâwt sawi hian a nghawng nasa dáwn tlat.


"Teuh lo, Angel. A rilru chu a na viau ang."


"Neil, hrehawm ka ti a, pawi ka ti tak zet a ni."


A thaw leh halh halh țhìn a, kei pawh ka mittui a tla pùr tawh. Neil-a'n min kalsan tùr angin ka ngaihtuah a, ka rilru a ipikin hrehawm ka ti lâwk sa a, ka thinlung a tâwt up up a ni.


"Angel.."


"Angel-i ka ni lo, Zorini ka nia."


"Chutiang chuan ka ko thei lo che a ni, ka tân chuan Angel-i i ni tho tho."


Ka mittui kârah chuan ka nui sak a, a za lo khawp mai.


"Ka lâwm e, Neil. Min theihnghilh vang vang ang che. I laka dâwt ka sawi avàng hian ngaihdam ka dîl dáwn lo che, ngaihdam dîl tùr che hian dikna ka nei si lo va." Ka mittui chu a far zâwih a, Neil-a hriatah erawh țah ka duh lo.


"Angel, chutiang sawi suh."


"Ni lo, Neil, kei chu fahrah, chhûngte pawh nei lo ka ni a, lemchang, dâwt sawi ka ni bawk. Ka tân hian i sâng lutuk a, ka nihna lo pui hmangin ka bum che a, theihnghilh vang vang tlâk ka ni."


"Angel!"


"Neil,  khatiang khân min ko tawh suh, ka inthiam lohna a zual telh telh a nia."


"Ka tân chuan angel dik tak i ni tho si a ni."


"Ni lo ve, Neil. Dâwt hmanga nun hi ka duh tawh lo, ka pi ka hrilh ang a, hremna a duh ang tak min pe se, lâwm takin ka tuar ang. Chuan, he in ațang hian ka chhuak vang vang ang a, ka nunhlui zawng zawng hi ka phûm bo ang a, nun thar, țha zâwkin ka nung tawh ang."


"Naktûkah ka lo haw ang a..." a la țawng lai mêk chuan," Lo haw suh, Neil. I chhuk thla chauh a, keimah vàng mai mai chuan lo haw lul suh," ka ti a, ka mittui chu a tla zawih zawih a, ka insûm peih tawh lo.


"Angel, khawngaihin, ka thu sawi ngaithla phawt teh."


"Neil, kei pawhin hrehawm ka tihzia hi hria la chuan min khawngaih ve tho ang, heta ka chhûngte hi ka ngaina hlawm em em tawh a, an bula dâwt sawi reng mai hi ka ning ve tawh asin." Ka țap chhuak ta phawng mai a, Neil-a hriata țah ka duh lo viau nain ka insûm thei tawh lo.


"Aw, ka hria e, Angel. Khawngaihin, ka thil sawi hi min lo ngaihthla phawt rawh aw, naktûkah ka lo chho ang a, chumi hunah chauh chuan thu tlûkna chu i siam dáwn nia aw, kei chuan ka kalsan dáwn lo che, ka hmangaih che ka tih tawh kha. Ka hmangaihna che hi eng thil mahin a tihchhiat ka phal lo, min lo nghâk hrâm rawh aw, min tiam rawh, Angel?  Ka lo thlen hunah chauh ka pi pawh chu hrilh la, ka lo thlen hma chu hrilh suh aw, min tiam rawh, Angel?"


Ka la inhnît hlap hlap a, Neil-a rilru ka tihbuai dan tùr leh ka tihhrehawm dàn tùrzia ka ngaihtuah chhuak a, hrehawm ka ti lehling ta viau mai.


"Neil,..keimah..vàng chuan..lo chho ...sssuhhh."


"Angel ka duat, khawngaihin, min tiam rawh, ka lo thlen hma chu ka pi hrilh suh aw, min tiam rawh le?"


"Aw... le, Neil.. ka ..tiam a ..chhhhee."


"A țha, i rilru kha lo tihrehawm viau suh aw, ka hmangaih che a, ka hmangaih reng che a nia."


Kan inbiak tâwp hnuah pawh chuan ka țah a chhuak tlat a, ka țap țha leh a. Neil-a chuan min hmangaih a, hetia dâwt ka sawi chung leh lem ka chang chung pawh hian min kalsan dáwn lo a ni. Chu chuan min tilâwm a, min tihlàwm rualin ka rilru a tihrehawm a, hmuh pawh châk viau mah ila, hmuh ka hreh deuh tho.


Zàn ka mu tlêm khawp mai. Ka inngaihtuah a, Neil-a chu lo chho lo tùr khân ka ti tak na a, lo chhoh a tum tho si a. A lo chhoh hunah ka pi min hrilhpui a tum dáwn em ni le? Ka va tibuai tak em!! Kei lo mi dang țha a hmuh țeuh áwn nèn, kei hi ka mâwl a ni. A rilru a hrehawm dáwn teh lul nèn, ka țah khum lehnghal a, a rilru a buai ngawt ang. Min ngaihtuah bawk siin, rilru hrehawm deuhin a awm ngei ang, ka mâwl êm a ni.


Zîng thawh chhuah ka va huphurh tak!! Ka mit chu a bui lûk ang a, a sen rûm ang chu. Ka mu mang lo a ni.


Step-ah Ruatdika nèn kan intâwk a, ka sam chuan ka hmel ka hliah hrâm hrâm nain ka bânah kàiin min pawt chho ta dàwr dáwr a. Ka bengchheng ngam si lo, ka țang ve nasa nain ka hneh ngang lo.


A room-ah min pawt lûtin kawng a khâr nghal a, kawngka bul chêtah dingin," Eng nge thil awmzia? I dam em? Na i nei lo tiraw?"a ti a.


En lovin," Ka țha, nizànah ka mu thei lo va," ka ti ringawt, a dikna chen a awm ve tho, dâwt ka sawi bîk lo.


"Engvàngin nge i țah? Tuin nge tițap che?"


Ka ngawi reng.


"Sawi rawh." A țawngkam chu a tidam ve lutuk a, ka nuih a tiza zâwk.


"Ka țap ve mai mai."


Min rawn hnaihin," Sawi rawh, ka zâidam lai hian," a ti leh a, a insûm nasa ngawt ang.


"Neil-a thu dik ka hrilh a."


"Chuan?"


"A hrehawm ka ti a, ka țap."


Min en reng nain ka en ve duh lo.


"A vìn che em ni?"


"Aih."


"A thinrimin a àn khum che em?"


"Aih."


Kan ngawi vang vang a, nuam lo ka ti kher mai.


"Nih, eng thil nge a sawi?"


"A lo chhoh hma chu ka pi hrilh lo tùrin min ti a."


"Ka pi hrilh i tum em ni?"


"Aw."


"Hrilh lo tùr khân ka ti che sia?"


"Ka thei tawh lo, dâwta nun reng chu ka ning tawh."


"Ka pi i hrilh hnuah engtia awm nge i tum?"


"Hremna min pêk apiang lâwm takin ka pawm ang, chumi hnuah erawh ka kal bo vang vang tawh ang."


Chawhnu dâr 1 vêlah ka phone a rawn ri char char a, phûr deuhin Neil-a a nih ringin ka en a, number ringawt a ni.


"Hello?"


Țap rî ka hre nghal.


"Angel, Neil-a a accident."


Eng maw?!!!Ka  țhutna ațangin ka tho zawt mai.