☆MAGDALENE☆ - 1

☆MAGDALENE☆- 1 By Dingdi Pachuau


Ka duat ém ém ka bike, a hming pawh ' Duata' ti ngata ka phuah chungah chuan ka țhu reng a, phone call ka chãng mêk a ni.


An ina zu luh ngawt chu ka hreh tawh si, a hmain a nuin a room-a kan awm dùn min phâwk titih tawh a, a nuam fahran lo, chumi hnuah chuan an inah ka kal leh ta lo vang vang. Hmun dangah kan awm dùn ta mai zêl a, vawiin kher hi chuan a chhuak hman tlat lo, inah a nu leh pate an awm bawk si. Hmuh ngei ka duh, ka thisen hian a ngai ngawih ngawih tlat tawh nia.


Ka phone a rawn nghawr dar dar tâkah chuan ka khi sak a, amah bâk a ni dáwn lo tih ka hria.


"An chhuak tawh e, hmanhmawh la aw."


Ka thaw huai a, Duata chu tinungin an in lamah chuan ka tlàntîr ta vâwk vâwk a.


Minute 3 vêl bâk an in thlen nân hun ka hmang lo. Nui sâng hian min lo làwm a, in ka lût chiah chu kawngka ka kalh nghal a.


"Ka ngai hman tawh lutuk che."


A kâwngah kuahin zei zet hian a nghâwngah chuan ka fâwp a, a nui hak a.


"Ei tùr i duh phawt lo'm ni?"


"Nangmah hi ka ei zâwk mai ang che."


A nui har har a, hetia a nuih tak hian a sexy ka ti a, ka taksaah hna thawh a nei tlat zêl. Ka pawm kãng lawp a, a room lam ka panpui ta nghal a.


A hnu fêah khumah chuan a zangthal zâwngin ka mu a, ka kut dinglam ka lukham a. Ani chu bawk khup zâwngin ka âwm nghèngin a mu a.


"An rawn haw dáwn tawh ang em?"


Banga sana intâr en zauhin," Dáwn lo ang, dârkâr khat pawh a la liam ém hlei nem. Ânu i hlau chiang,"a ti sap a.


"Hlau ila ka rawn kal dáwn em ni?"


"Ânu hàu chu a na lo e."


"Keimah vànga an hàu che ka duh lo alawm."


"Hàu chu a na lo ka tih chu, âpain min duat thung a. Chuan, ânuin min hàu pawhin âpain min lo chhan ziah alawm."


A hnung ruak kâng chûl hoh hoh pahin," Min țhen tùrin ti ta che se la?"tiin ka zâwt ta khauh a.


"Teuh lo, ka tlân bo daih ang."


"I tlàn bo daih te'n."


"Ka țhen dáwn miah lo che."


Ka bialnu tia ka chhàl ve ber Melody hi tunah 2nd sem B.Sc PUC- ah a zir mêk a, cl - xii GHSS-a a zirlai ațang tawhin ka chhas a ni. Vote nei rual a la nih loh avàngin ka fîmkhur ve hle; mahse, nikum kum tìrah khân nei thei dinhmunah a din tâk avàngin ka thaw a veng huai a, an inah pawh ka lêng ngam ta. Tlangvâl awm hle hle chi ka ni lêm lo va, ka lèn zan hnihna ațangin ka awm hle hle lo țan a, chu pawh an bathlârah a la ni zui. Light a êng si lo va, a rem châng ve êm bawk a ni. Chuta țang chuan rem châng ka melh ta ziah a, a chhûngte lah mi zâu chi an lo ni a, bathlàr chu kan bedroom a ni ta ringawt mai!


Hmeichhe ngo leh pumraw lian zet zawt a ni a, a tuai pur mai a. Mit la tâwk chiah leh phûr tâwk chiaha mi siam a thiamin a zei reuh a, a chhûngte bulah erawh chuan a che naupang viau thung. Khum lamah erawh a naupang chhia viau lo va, a zei mah mahin ka hre țhìn; mahse, ka duh viau thung si.


Bialnu hi ka nei ve nual tawh a, pakhatah ringawt ka innghat ngai lo. Tlangvâl fel  ka ni lo va, zu pawh in ve thei mai niin in țhìn erawh ka ni lo. A ngawl vei hi ka duh loh thil a nih vàngin ka in ve chhunah pawh ka in tam ngai lo, tlêm tê a ni mai. Ti lo bîk nih ka duh lo va, a pà lo ka ti ve tlat, ka chhûngte bulah erawh a rim pawh ka nam ngai lo thung. Ka pa hi ka zah a, ka nam dáwn a nih chuan ka haw duh lo, țhiante bulah ka riak mai. Chu pawh hrilh hre lo chuan ka riak chhuak ngai lo, ka phone thlap țhìn.


Melo-i nèn kan nih tak tak hma pawh hian kawp ngheh ve deuh deuh chu ka nei, kohhrana inhmang ve tak takte pawh ka kawp ve tho. Nula tlangvâl nih hi chuan a lo mak khawp a, opposite sex na na na chu, duh ve ve kan lo ni tlângpui. Hun rem châng hmuh chuan an lo duh ve mai zêl a; mahse, ka dem chuang lo. Duh leh duh intawng kan ni maiah ka ngai hmiah.


Melo-i hi chu thup țît țêt nei lo leh frank ve tak a nih vàng hian ka làwm a, ka mit a lâkna hmasa ber chu a âwmbâwr leh  a mawngbâwr a ni. A âwmbâwr lian leh lawh chuan ka mit a làin thil dang min ngaihtuahtîr thei lo va, a kâwng fêk tho si, a mawng lian leh laihte chuan ka marphû a tirang a, min awmtîr hle hle thei lo.


"U J, eng nge i ngaihtuah a?"


Ka suangtuahna ram ata inthing harhin," Nangmah maw le,"tiin a hmui chu ka kutzungpui chuan ka tuaisak nâ nâ a, nui chung hian," Nula dang i ngaihtuah a ni ang ka lo ti a," a ti sap a.


"I bula ka awm lai reng hian engtin nge nula dang ka ngaihtuah theih ang le?"


"Min ning tawh a ni ang ka tia?"


"A thleng ngai lo ang."


"Chuti, kan țan leh dáwn em ni? Keimah ka che ve thung tawh ang,"tiin a rawn kûn hnai a, duhthawh zetin min fâwp a, kei pawhin chin tâwk nei lo lêkin ka lo chhâng lêt bawk a.


A nute lo haw hma hretin ka haw ta. Zarkawta ka dàwrah ka pêng haw leh rih a, customer an lo awm ve nual. Ka dàwr awmna hi a fuh reuh a, customer tân pan a rem chàn bâkah bike/scooty park mai a awlsam a, luah man pawh ka chawi sâng ang reng; mahse, ka inhralh thei a, a zia viau tho.


Pahnih ka chhawr a, nula leh tlangvâl an ni. Nula zâwk Kimtei chuan," Boss, i kalna ka hre mai,"nui chung hian a ti a, min dàwrtute an chhuak tawh a, ka chhawrte hian min nêl a, kan inngam bawrh bawrh țhìn rêng a ni.


"Khawiah nge ka kal a?"


"Hre lo der vêl. Amawi, a inthuam dàn ațang hian a kalna tùr chu a hriat sa mai tiraw?"tiin dàwra thawk ve tho tlangvâl zâwk chu a zâwt a.


"Ka hre miah lo mai!" ani chuan a lo ti thung a.


Kimtei chuan,"A hmel ațang pawh hian a che fuh thawkhat tih ka hre bawk," a ti zui a, nui suk chungin," Nula senior thil hre thei chin bulah hi chuan awm tam loh a him ber a nih dáwn hi," ka ti a, Amawia chuan nui var var chung hian," Dik chiah, sam awm dàn ațangin mi nungchang tùr hi a lo sawi zuah zuah thei asin," a lo ti ve bawk a, chutiang chuan kan insawisa a, a hnu deuhah chuan ka hawsan ta nghe nghe a.


In ka thlen chuan an lo awm vek tawh a, ka chhang chiah, a hming pawha ka koh phal loh 'Bawihte' ti bâka ka koh ngai loh chuan min lo hmuh veleh chuan," Tàte, khawngaihin pawisa min pûktîr rawh aw, ka țhiannu birthday a ni dáwn a, nute pawisa dìl ka hreh tawh sia," a lo ti a. (Tàte tia min koh chhan hi chu, Taite tih hi kan tê ber hian a thiam lo va, kan tê ber min koh ve dàn 'Tàte' ti hlîrin ka chhûngte pawh hian min ko ta, mawi lo ka ti viau nain min ko miau si a)


"Eng zât nge i duh a?"


"Chêng zahnih chiah. Chuan, inrinniah i dàwr nghâkin ka rùl mai ang che."


Bawihtei nèn hian kum 7-in kan inthlàu a, kum 22-na a hmang mêk. Kan tê ber Nonoi hi kum 12 chiah a la ni thung, ka u hmeichhia hian pastor pasalah neiin Bangalore-ah an awm a, Mizoram lamah an rawn chhuak khât khawp mai. Unau hmeichhia 3 ka nei tihna a nih chu. Fapa mal ka nih avàng hian ka nu leh pate hian min duat bîk chuang lo va, ka unau dangte nèn min en dàn a hrang hek lo.  Ka unaute erawh hi chuan min duat deuh chuan ka hria, mipa ka nih vàng a ni ang.


Novi chuan," Tàte, chhûng inkhâwm kan neihsan țêp che, i lo haw har lutuk a," a lo ti nang nang a. A lian ûr tawh nain naute enin kan en vek a, a naupang ber a nih vàng bawk hian kan lakah pawh a pangchang thei hle. Amah pawh a la naupang chhia viau, a rilru pawh a la thianghlim.


"A nih chu, dàwrah ka awm rei deuh hlek a, hun i hmang leh dáwn a ni maw?"


"Aw, nupui țha deuh i neih theih nân ka dìlsak leh ang che."


Hun a hman apiangin nupui tùr țha leh fel, hmelțha  min dìlsak ziah, ka nuih a za thei. Ka la upa lo va, nupui neih ka la duh rih lo tih ka hrilh pawhin," Nakinah i la duh dáwn tho," a ti tlat zêl. A u chiah Bawihtei tân pasal tùr doctor a dîl ziah bawk, a nuihzatthlâk thei viau nain tu mah kan nui ngam ngai lo.


Hun chu a hmang leh ta ngei a, Bible a chhiar a, a țawngțai duah leh khawp. Kan chhûngkaw hming kimin a chham leh vek, kan upa berte tân pawh naute a dìlsak leh. Fa pahnih an nei tawh nain a la duhkhawp lo va, a țawngțai tawh chuan fa dang a dìlsak bâng lo.


Chaw kan ei lai chuan ka nu chuan," Âpa, ka Nonoi birthday a thleng teuh tawh sia, kumin chu pawisa kan nei lo sia, engtin nge maw kan tih dáwn ni?" ka pa mitmei zauh pah chuan a ti a.


Ka pa chuan," Ani zawng a fel ém mai, a țawngțai leh ang a, Pathianin a pe leh țeuh mai ang," a lo ti thung a.


"Tàtea'n pawisa chu a ngah mai."


Novi thil sawi vàng chuan ka nui sak a," Nono, ka pawisa chu i hmu tawh em ni?" tiin nui chungin ka zâwt a.


"Hmu lo ve; mahse, dàwr i nei a, bike i nei bawk a. Ka țhiante pawhin ' I u hian pawisa a nei țeuh ang, bike pawh a nei nalh ém mai' an ti ziah, sikula min hruai khân i bike kha an hmu alawm, an chuang ve châk hlawm râp mai."


Kan nui ta vek.


Bawihtei chuan," Nono, in miss zîngah Tàtea nupui tùr chu lo zawnsak mai la?" a lo ti a, ani chuan," Kan miss-te chu an hmêl chhe hlawm alawm, kan monu tùr khawpa țha an awm lo," a lo ti leh a, kan nui leh dar dar.


"Tàtea hi chu i ngaisâng teh e tiraw?"


"Min duat ém alawm, ka birthday hunah pawh thil min leisak leh dáwn sia."


A fing ve teh a nia, a duhna lamah hi chuan.


"Teh rêng mai, i duh ber ka leisak ang che. Kan naute neichhun i ni alawm le!"


"Kan chhûngkaw zînga Tàtea duat ber i hria em?" Bawihtei chuan a ti sar sar a.


"Duata a duat ber, a dawtah keimah."


Ka bike 'Duata' hi kan chhûngkaw zînga mi niin a ngai tlat, bike ti pawhin a sawi ngai lo, 'Duata' a ti deuh thlap zêl.


"Duata hi chu ka ngei tlat!"


"A chungah kan chuang thei a, a țha ka ti, a mawi bawk si."


A rilru hi a țha a nia.


Ka room-ah Bawihtei chu a lo lût a, min nuih pahin," Vawiin chu i lêng leh a ni tiraw?" a ti phawt a, chutah," A la nau ve leh chhâwng ém mai, in mualpho hlauh ang e," a ti leh a.


"Vote a nei tawh aw. India dànah pawh puitlinga chhiar a ni tawh."


"I hrût naupang thei e."


"Eng mah i hriat loh kha, lo sawi ve suh."


Nui kar kar chung hian," I bum naupang thei e, i rualpui deuhte hi chhãi ve ta che," a ti leh a.


"Duat tùr ka duh alawm."


"Ahaa!! I va zak lo tak! Nonoi nèn kan awm reng alawm."


"Bialnu duat leh naute duat a inang hlei nem."


"Hmm, a nih vêl tak chu! Pawisa chu?"


Ka wallet-a chêng zahnih chu la chhuakin ka pe nghal a.


"Inrinni chuan theihnghilh lo la?"


"Ok, Big Boss."


A chhuah hnu chuan ka nui suk a. Nia, ka chhãi naupang thei viau. Ka rualpui leh kei aia kum hnih khat tih vêla nau hi ka chhãi ngai miah lo. Kum 19/20 tih bàwr vêl hi nihpui nuam ka ti leh pek tlat, a chhan chu min duh hliau hliau thiam bîk tlatin ka hria. Bâkah, an la zakzum a, ka thuin an la awm thiam ka ti bawk. Min duattu tùr hi ka mamawh hran lo va, ka duat theih tùr ka ngaizâwng zâwk țhìn!


Ka phone a rawn nghawr dar dar a.


"Hey, mate?"


"Mate, zanin chu ITI lamah khân kan lêng dáwn em ni ang?"


Pawi miah lo, a bialnu nau kha a chhe vak lo. Chance a awm mial maithei asin!


"Um, min rawn sâwm phei la."


Țhianpa Ațana nèn hian college kan kal tlâng a, ka kàwm ngeih khawp. A fel a, kei ang ém chuan nula lakah nghal lo mah se a 'single' ngai lo.


Ka nu hnênah chuan ITI lama ka lèn tùr thu ka hrilh a, ani chuan tlân fîmkhur tùrin min hrilh a, chumi hnu chuan ka chhuak ta nghal a. Duata ka lâk chhuah laiin Ațana chu a lo thleng a, nula in lam pan chuan kan phit chhuak ta nghal a.


Ațana bialnu hi a chhe miah lo, kum 25 vêl a ni a, dàwr a nei ve tho a, nula fel tak a ni. A pan thlar reuh a, a incheina pawh a inhmeh thei khawp ; mahse, kei chuan a nau, âwmbâwr poh deuh lah, mâwngbâwr lian deuh hlek chu ka lo hmu tài daih zâwk.


Mahse, chance a awm thei miah lo. College lai kal ve tawh kha a niin ka hre si a, room lamah lehkha zirin a awm daih nia, a va hawihai theih ngai ve!!


Ațana bialnu Lizzy chuan," Julian, i dàwr lam i tluang em?" tiin ka dàwr chanchin chu min zâwt ve a, ka rilru kalding tùr pawh chu min tihtàwpsak ta nghal a.


"Aw, a zia viau rih e."


"Thla chawhnu lamah hian inhralh a har ve deuh hlek țhìnin i hria em?" a ti leh a.


"A ni maithei; mahse, mi hian pawisa hi an lo nei khawp a, khawia mi nge an neih zozai țhin ni ka ti rilru hial țhìn."


"A dik alawm, mi hausa hi an lo tam ve tawh ém a ni."


"In sawi ho lutuk. Pawisa neih loh hlauin ni tin hna kan thawk țhìn alawm, dàwr lian nei tih takah nangni pahnih pawh hi in hausa viau tawh ang chu."


Lizzy chu a nui ar ar a," Julian, ani hi chu thla tin hlawh a nei bîk sia tiraw? A hlawh a tam bawk si, kan thil sawi chu ho ti viau pawh ni se a àwm tho," a ti a, keini pahnih pawh chu kan nui a.


"I tâ tùr vek alawm, keimah chawp hian le!"


"Inla zei lutuk lo la."


A nau chu a rawn chhuak ta, khua a lum vàngin kekawr bùl chhîng deuh a rawn ha a, a ngo purh mai. Lizzy ai chuan a chhe lo daih tak tak!


"Mâte, thingpui i chhuan dáwn chuan no hnih lo chhuang tel ve nghal teh aw."


Min rawn en a, a mit meng dum ham maiah chuan eng nge a ngaihtuah ang ka hre thei lo nain min haw lutuk hmel a pu bîk lo ve.


A kal sawn hnuah Lizzy hnênah chuan," I nau kha khawi college-ah nge a kal?" ka ti ve ringawt a, college a kal ve tawh ang, PUC-ah em ni kha aw?


"PUC-ah."


"Um, ka hmu tawhin ka hre rêng a ni."


Melo-i ka thlahnaah ka hmu tawh tlat a ni, ani pawhin min hria tih ka hre mai.


Thingpui min rawn pêk lai chuan," I va zir nasa àwm ve a?" tiin ka lo fiam a, a nui deuh sãih a.


"Test kan nei dáwn a."


"A nih tak chu, țha deuhin i ti dáwn nia."


Room-a a luh hmain kan mit a indêt leh sak sak, ka ngaihtuah ang hi a ngaihtuah ve tho a niang, min haw bîk lo. Hei pawh ka duat leh maithei a ni, chance ka neih phawt chuan ka hlah phal miah lo ang.