☆RUATDIKA☆ - 19

☆RUATDIKA☆ - 19 By Dingdi Pachuau


"Eng...maww!!"


Ka thin a phu nasa lutuk a, ka âwm ka dawm vawng vawng.


"Neil-a...a..chesual..a, a na...viau a ni àwm e."


"Mamite, engtizia nge? Ni lo, a ni thei lo vang, nizànah pawh kan inbe reng alawm." Ka kaihza tha a khùr nasa lutuk a, ka țhu thla leh hnawk.


Phone chu a ri rak rak a.


"Bawihi, a pawi ka ti tak zet a ni." Hei chu Neil-a pu a ni thung.


"Ka pu, a thi tih min hrilh miah suh aw."


"Bawihi, a pawi ka ti. Valtea chu a hliam a na lutuk a, tih ngaihna a awm ngang lo a ni."


Ka țap chhuak hawk a, ka pi leh kan awmpuite pahnih an lo tlân vat a, ka pi chu kuahin," Ka pi, ka duh lo, Neil-a a thi!"ka ti a, ka țap hawm hawm a. Ka bîng chûk chûk a, ka kut leh ke a hik mup mup a, ka lu hai mup mupin ka khaw hmuh a tawi a, a thim ta mup a.


Ka thâwk a hrehawm a, ka âwm hi nem vaktu awm ang mai hian thâwk a harsa. Thâwk a har lutuk a, ka thi ngei dáwn a nih hi, hetiang chuan ka thi har lo ang.


Tunge min nem vaktu hi ni ang? A hrehawm lutuk. Ka thaw a chham dáwn, ka theihtâwpa nâin thâwk ka la ta vak a, thih leh thih tiin. Ka thaw chhuak kâwk a, ka kut hi tu emawin a rawn man chat a.


"I harh em?"


Ruatdika aw a ni.


Ka han meng dáwn a, ka mitko vun a rit lutuk a, ka meng thei lo.


"I harh tiraw? Han meng teh."


Ka meng thei lo. Engtizia nge?


"I harh chuan ka kut hi vuan nghet teh."


Ka theih ang chuan ka vuan nghet ve a; mahse, ka meng thei lo.


"Um, i harh tawh e. Men han tum teh."


Ka thei hlawl lo, ka mitko vun a rit lutuk. Țawng chhuah ka tum a, ka hmui ka chêt deuh a, rî a chhuak chuang lo.


"I țha a nia aw, Zorin. I bulah ka awm reng a, eng mah hlauhthàwn tùr a awm lo. Tihian, i kut hi ka chelhsak reng ang che."


Meng leh  țawng thei lovin awm mah ila, ka thla a muang deuh suai. Ka bulah Ruatdika a awm a, ka kutah a chelh reng a ni.


Ka lo muhìl leh a ni chêk ang, ka kut a kham lutuk a, a mu churh churh mai. Ka harh lo thei lo, ka han meng uau a, a èn lutuk avàngin ka maimichhîng leh vat a. Ka kut chu ka han chêt dáwn a, ka chêt thei lo, delh bettu a awm a ni ang.


Ka rûm chhuak a ni ngei ang, ka bulah che thâwm ka hria a, tu tak ni ang maw?


"Zorin, i harh tiraw?"


Ruatdika a nih hi.


"A êng lutuk."


"I meng thei tawh tiraw?!!! Zorin, a va làwmawm ém!! Light ka'n off țhen lawk ang e."


A hnuah chuan ka meng ve thei ta. Ka room-ah kan awm a lo ni, engtizia nge le? Ka dam lo em ni? Ni lo, ka kut nat lutuk vàng hi a ni ngei ang.


"Ka kut hi a na lutuk!"


"Ka lo hmet ang e."


A rawn hmet nawk nawk a, a mu nasa lutuk ni berin ka hria.


"Ka delhsak che a ni ang."


"Ngatinge hetia ka awm a?"


"I taksa a chak lo thut a; mahse, hei i țhain i harh tawh bawk a, i chak vat mai ang."


Ka tui a hâl a, ka zun a chhuak bawk. Tui chu min rawn tulh a, toilet-a min hruai a tum erawh chuan ka duh lo. Ka chak reng alawm, ka kal thei a, ka pângngai reng.


"Dâr eng zât nge ni a?"


"Zîng lam dâr 2 a pèl tawh."


A nih chu, ka va mu rei ém ém. Chuan, ngatinge ka bulah Ruatdika hi a awm tlat le? Ka taksa chak loh thut avànga hetia han awm mai chuh!


"Thil dik lo a awm em?"


"Awm lo, i țha."


"Ka awih lo, thil thleng a awm a ni tiraw?"


Min en vang vang a. "I hre chhuak lo maw?"a ti ringawt a.


"Eng chu?"


"Muhìl leh phawt rawh, naktûk zîngah  i harh țhat var hunah ka hrilh ang che."


"Ka harh țha tawh alawm, nang pawhin i țha min tih kha."


"Aw le, țhu phawt rawh."


Khumah chuan ka țhu a, ka kut chu ka tuai nauh nauh a. Ka bulah rawn țhu hnaiin ka kut chu a rawn chelh a.


"Neil-a kha a accident a, a boral a ni."


"Dâwt!"


"Zorin, dâwt inhrilhna chi a ni em ni?"


Ka hmui chu ka pet fan fan a, hei hi a lo nih chiah hi, Ruatdika min awmpui reng chhan pawh hi. Ni lo, nikhaw hre lovin ka tlu tak alawm, Mamitei'n min rawn phone kha.


Neil-a chu a thi a ni! Rawn chhoh a tum a, keimah vàngin. Kawng lakah a accident ta a, ka thiam loh vek a ni. Neil-a thihnaah hian a mawhphurtu ka ni.


"Keima thiam loh vek a ni!"


"Zorin, inmawh chhiat suh, i thiam loh a ni lo."


"Thu dik ka hrilh a, rawn chhoh a tum a, chumi vàng chuan a che sual a ni."


Min rawn kuah a, ka inhnît leh ta hlawp hlawp mai. Nghet zetin min kuah a, kei pawhin ka kuah lêt ve a.


Ka hnung chûl pah chuan," I thiam loh a ni lo, a vanduai ve a ni mai," a ti sup sup a.


"Chutiang... a ni.. lo, min... ngaih...tuah avànga... rawn.. chhoh tum a ni. Lem.... changin.. dâwt sawi lo.. ila chuan ..a chungah... eng thil mah.. a thleng lo.. vang," inhnît hlawp hlawp chung chuan ka ti a.


A dik a ni. Keimah vàng chiah chiah a ni, tunah te hian tuma dawm lohin a mu vâwt riai ang a, a țhiante erawh chu a bulah an țhu ve maithei. Hliam na tak tuara thi a ni ngei dáwn si a, nâ a tawrh lai chuan a bulah awm thei tal ila...


"Ka khawngaih ém mai."


Ka țap lo thei lo, ka khawngaih ém asin. Min hmu tùrin rawn chhoh a tum a, hetiang hi a chunga a thlen a ring bîk miah lovang. Inneih te hial kan tum a nih kha. Dâwt sawia lem chang ka ni a, Pathian hian min hren tùr zâwk a ni asin, ani pawisawi miah lo leh hma lam hun êng tak nei chu zuah tùr a ni asin le.


"A ai thi thei zâwk ila."


"Zorin, sawi suh."


Ka insûm thei lo, ka mittui a luang zawih zawih reng a, Ruatdika kawr  âwm pawh  a huh hneh khawp ang chu. Ani lah chuan min hnem tumin nghet zetin min kuah reng a, ka bulah awm lo phei se chuan...


"I duh tâwkin țap rawh; mahse, i thiam loh a nih thu kha chu sawi tawh suh."


Ka khawngaih ém a ni, hmel hriat dawm hlumtu pawh a nei lo ang. Nâ tuar hrepa a thih phei chuan... ka rilru chu a na tak zet a, a bulah awmin thlamuan thei tal ila. Min ngai a, min thlahlel a, min ngaihtuah a, chuvàng tak chuan rawn chhoh pawh tum a ni a...


"A nâ ka ti ém mai."


Țah tlawk tlawk bâk tih theih rêng ka nei lo.


Mamitei nèn kan inhmuh phei chuan kan inkuah a, kan țap dùn tlawk tlawk. A tân a na dáwn lutuk, a unaupa neihchhun, a innghahna liau liau a ni a, nat lâwkna pawh awm hauh lovin thihna chuan a lâsak ta si. He thihna nunrâwng hi ka va haw tak ém!!


A ruang lo thlen niah chuan ka intipachang ve tawh viau a, Mamitei leh mi dang an țah hawm hawm pawhin ka insûm ve hrâm hrâm tawh. Ruatdika ka bulah a awm reng a, min hlatsan lo khawp mai. A unaunu lem mai mai ka ni tih hriat miah lohvin min buaipui char char a, kei hian ka va tibuai teh lul ém!!!


Neil-a accident dan chu a lo haw chho tùr kha a țhianpa car a khalhsak  a, a țhianpa chuan Airport thleng a thlah ang. A flat-a a tlân kîr, lo lêt leh lamah a chesual ta a ni. A motor chu a chhe teh chiam lo nain a taksa a shock na thung a ni.


A hmel vawi khat tal hmuh ka duh. He lei chhûngrila a taksa dài raih a zàl hma ngei hian vawi khat tal a bianga chùl ka duh, ka chûl tawh ngai dáwn lo va, ka hmu tawh dáwn hek lo. Ka hmuh tàwpna ber a ni tawh ang a, kumkhuain ka mangțha tawh dáwn asin.


"Vawi khat chiah a hmél ka hmu thei ang em?"


Ruatdika chuan a sawi a nih ka ring, vui hunserh zawh, phûm tùra an kalpui hmain an hawng leh a, Mamitei nèn chuan kan en a.


A hmél chuan mitthi hmel pawh a pu lo, muhìl hmél a ang zâwk. A lu lamah hliam a tuar lo a nih hi, a hmui dâng lap erawh chuan min tilungawi lo khawp mai, vâwt a ti a ni ngei ang.


"Neil, harh tawh la, i muhìl rei tawh ém mai. Min chhâng teh, mawh, ka biak hma chein min biak hmasak ziah kha. I lung a awi lo em ni, Neil?"


A hmai vâwt thlar chu ka chûl a, a vâwt tak zet a ni.


"Vâwt i ti tiraw? Hei, i hit vek a nia, tho teh, i mit kha meng teh."


Ka țap lo va, ka țawngin ka be reng thung.


"Neil, min hua em? Neil, min chhâng teh, khawngaihin, mawh, khawngaihin?"


A hmui chu ka khawihsak a, a lo vâwt thlar tho. Kâr khat kalta mai khân he hmui ngei hian min fâwp asin, lungchim taka min fâwp țhìntu ngei kha he hmui hi a ni asin.


"Neil, harh teh, mawh, i ngawi rei tawh e."


Ka bul vêlah mi tam tak an awm tih ka ngaihtuah lo va, ka bulah Mamitei lungngai takin a țap hawm hawm tih pawh ka ngaihtuah hek lo, Neil-a nèn chauh he khawvêlah hian kan awm niin ka hria.


"Neil, min kalsan i tum tiraw? I thin a rim a, min chhâng duh lo a ni tiraw? Neil, ka dem lo che, ka thiam loh a ni. Engkim hi ka thiam loh vek a ni, ngaihdam tlâk ka ni lo rêng a ni."


Tu emawin min rawn kuah a, Mamitei a nih hi. Ani pawh hian min dem ve tho ang, engkim hi ka thiam loh vek a ni si a.


"Mamite, Neil-a hi a thinrim a, min chhâng duh lo. Ka thiam loh vek a nia, ka hre thiam ém ém a ni. Nang pawh hian min dem ve tho em?"


Min chhâng lo chuan a țap leh râwih râwih a, Neil-a pawh chu an la sawn dáwn ta. Kumkhua atâna ka hmuh theih tawh loh tùrin an kalpui tawh dáwn, ka phal lo, ka phal thei lo.


"Neil, min kalsan suh, engtin nge ka awm ang? Neil, khawngaihin min kalsan suh."


Ka mittui a luang zung zung a, tu mah ka zah lo, ka mittui luang hi ka zahpui hek lo. Neil-a tân ka tih theih hnuhnung ber a nih tawh hi.


"Neil, Neil, Neil..."


Mamitei chuan min kuah a, inhnît hlawp hlawp chungin leh țawng hlei thei lo chung chuan thlàn thleng kal ve tùrin min sâwm a, thuawih tak chuan ka zui a, kan inkuah a, kan țap reng a.


Neil-a ka hmuh theih hun chu a va tàwp teuh tawh ém!  A taksa  kan bula a awm theih hun a tàwp dáwn, kumkhuain min kalsan ang a, kan inhmu thei tawh lo ang.


"Neil, mangțha aw, mangțha ngawih ngawih. A theih anga hmain ka rawn kan leh ang che, i khua lo tihar suh aw."


Zànah Mamitei ka riahpui a, Ruatdika pawhin min zui zêl, min hlatsan lo. Neil-a pu pawhin a tuar viau a; mahse, ani zawng mipa a ni a, a tuarzia a tilang ve lo.


Ka muhìl thei lo va, ka rilru a chàwl thei hek lo. Mangchhia ni se, harh chhuak thuai ila ka ti tak zet. Neil-a chu rawn nui leh hak hak tùrin ka beisei a, kawngkapui ber chu ka thlîr leh vang vang țhìn. A nih loh leh phone-a a number chu ka hmet chhuak a, min rawn call mai te ka ring a,  message erawh a type peih fahran loh avàngin ka châng ngam lo. Call erawh dawn ka beisei fo.


Eng mah ka ei thei lo va, ka mu țha thei bawk si lo. Ka pi leh Ruatdika ka timangang a, Mamitei pawhin min ngaihtuah lutuk a, min rawn phone chàmchî mai. Ka rihna a tla hniam nasa a, nui hmêl ka pu thei bawk si lo, nun hi ka ning ngawih ngawih.


Kâr khat a liam a, ni tin Neil-a thlànah ka kal ziah. Ka țap ziah bawk a, amah maia a awm tùr chu ka khawngaih a, a khawhar ka hlau a ni.


A chângin ngawi rengin ka țhu a, Neil-a hming ziahna chu ka chûl ka chûl țhìn. Thlàna ka awm hian ka bul hnaiah a awmin ka hria a, a chângin ka titipui bawrh bawrh a, a tàwp lamah erawh ka țap leh nge nge zêl.


Mamitei'n lehkha min pe a, 'Neil-a lehkhabu kârah a lo awm a, i hming a inziak si a, ka hawng duh lo va'tiin. Lehkha chu ka en vang vang a, eng tak inziak ang maw? Hei hi Neil-a kut chhuak hnuhnung ber chu a ni áwm si a. Huphurh si, chhiar châk bawk siin ka han hawng a, a hawrawp tung sèl sàwl, mipa hawrawp tih hriat zet chu ka pharh ta a.


*Angel (Zorini pawh ni mah la, ka tân chuan angel duhawm, sualna leh dâwt tel lova hrin i ni tho tho♡)


            I thu min hrilh hian min va tihrilhhai teh lul ém! Dâwt hi ka hua a, ka ten a, paih bo vawng vawng hi ka va châk tak ém!


            Mahse, Angel, ka hmangaihna che hian hêng zawng zawng hi a nâwt reh thei vek a ni, mihringte chu thil tisual thei vek kan ni, vawi khat tihsual avàng leh dâwt vawi khat sawi avànga thi tùr ni dáwn ta ila, dam chhuak kan vâng ngawt ang.


             I dâwt sawi i hua a, i ning a, dâwta nun reng i ning tawh tih ka hriat hian ka hlim a ni. Kei pawh thil chu ka tisual rem rum fo, mi țha ka ni lo, R-a khân a hrilh thei ngei ang che.


              Hrehawm i tihzia ka hriatin nangmah tê chauha ka pi hrilh i tum hi ka ngai ngam thei ngang lo, naktûkah ka pi chu kan hrilh dáwn nia aw, kan pahnihin. Chuan, ngaihdam kan dîl ang a, hremna pêk i nih pawh kan pahnihin kan tuar dùn ang, nangmah chauha i tawrh ka remti lo, ka phal bawk hek lo.


             Ka ngaidam vek che, thil tisual thei vek kan ni, ngaidamtu nih hi a ropui ka ti a, nunpui ka tum hrâm hrâm țhìn.


             Ka hmangaih che, ka hmangaih ém ém che. Ka hmangaihna che hian hlimna pe lul che rawh se.*


Ka mittui vàngin ka thil chhiar chu ka hmu phê ruai a, ka mittui chuan ka thil chhiar chu a zu kar koh koh mai.


"Neil, min hmangaihna hi a ropui ka ti, ka phû loh a ni tiraw? Neil, a va pawi tak! Ka thiam loh vek a ni, phû lo viau mah ila, min hmangaihna hi chu ka theihnghilh thei tawh lo vang," tiin ka phun sap sap a, țah hawm hawm erawh ka insûm ve tawh.


A thuziaka 'naktûkah ka pi chu kan hrilh dáwn nia aw' a tih hian ka ngaihtuahna a tithui khawp mai. A rawn haw zànah he lehkha hi min pêk a tum a ni ngei ngei ang, eng mah a chunga thleng tùr a hre si lo, hetiang thil hi a thleng ta si.


"Neil, i aia thi tùr zâwk hi ka ni asin, a pawi ka ti, ka pawi ka ti ém mai."


Hmm, Neil-a hnêna ka hrilh ang ngeiin ka pi hi thu dik ka hrilh ang, ka hrilh a ngai, ka hrilh ngei a ngai tawh. Eng pawh lo thleng dáwn se, ka hrilh ang. Pathianin min ngaidam hrâm se, nunnain tuar tawh lo hrâm rawh se.