☆RUATDIKA☆ - 20

☆RUATDIKA☆-20 By Dingdi Pachuau


Ka rilru ka siam fel tawh. Eng pawh ni se, naktûkah ka hrilh ang, ka pi hremna chu eng thil pawh ka tuar mai ang.


Zànah ka hrilh dan tùr ka ngaihtuah nauh nauh a, ka huphurh lutuk ringawt; mahse, Neil-a thlarauin min awmpuiin min uap rengin ka ring, min sawipui a tum kha.


Zîngah ka hrilh dàn tùr mawlh ka ngaihtuah leh char char a, pehhêl tak siin ka hrilh a ngai ang, a chhan chu lung țha lo a ni tlat si a, eng pawh thleng thei a ni tlat.


Chhùnah a room-a a awm laiin ka luh chilh a, a room-ah hian luh ka dîl khât khawp mai, mak a lo ti rêng a.


"Aw, Bawihi, eng nge i duh tâk le?"


"Ka pi, thil pawimawh tak hrilh duh che ka nei a."


Țhutna min kawh hmuhin ani pawh ka ep chiahah a țhu ve nghal a.


Sawi țan dàn tùr ka hre lawk lo va, ka ngawih vang vang hnuah thaw la hawkin," Ka pi, a hmasa berin i ngaihdamna ka dîl dáwn lo va, ka ngam hek lo. I tunu dik tak ka nih loh thu hrilh che hi ka huphurh tak zet a ni," ka ti chhuak tawp a, pehhêl lam pawh kha a lang lo, a lo chhuak tawp mai a ni.


Ngun zet hian min en kar a, hrehawm ti zetin ka hawi sawn a.


"Ka pi, eng hremna pawh min pe rawh, tawrh ka inhuam vek a ni. I tunu dik tak ka ni lo va, lem ka rawn chang mai a ni."


"Ka pi, thiam thu sawi tùr pakhat mah ka nei lo, dâwt ka sawi vàng hian hrehawm ti ém émin hun ka hmang a; mahse, ka ngainatna che hi chu a der mai a ni lo, ka ngaina tak tak che a ni."


A mit chu a khap lo reng reng. Ka en ve țhìn tak nain ka en rei ngam lo, a la țawng ve miah loh avàng chuan hrehawm ka ti a, ka thâwk a sak tlat.


"Ka pi, eng emaw tal sawi teh, mawh, ka pi?" tiin a ke bulah chuan ka țhingțhi thla rawk a.


Ka kut rang zeta vuanin," Hetiang hi ti suh," a ti charh a, min vuan ding a, kei erawh chuan ka en ngam lo, chhuat lam ka bih ngar a.


"Ka pi, hrehawm ka ti tawh ém a ni."


"Ka rinhlelhna che a rei tawh asin!"


Makti takin ka pi chu ka en thuai a, ka pi hian min lo ringhlel daih tawh maw!! A va mak ém!


"I țhiannu ka hmuh hmasak ber khân a nu a ang lutuk a, a hai theih loh a ni. Nang hi chuan a tu ve ve mah i ang lo va, eng tik nge i inpuan ang tih ka lo nghâk zâwk che a."


"Ka pi, i lo hre reng maw? Ka bum che emaw ka ti char char asin."


"I inpuan hun hi ka nghâk a ni."


"Engtin pawhin min hrem rawh, ka tuar vek ang, ka pi."


A bula min țhuttîrin," Bawihi, Angel-i khân a ai awh tùrin a ti che tiraw?" tiin min zâwt nghal a.


"Ka pi, ani chu a hman loh vàng mai a ni, ka țhian a nia, a harsatnaah ka pui mai a ni, thiam lohna a nei lo."


"Eng hnà nge a thawh chiah?"


"Eng hna chiah nge ka hre lo, Hotel-ah a thawk a. Ka pi, ani chu hrem tel ve suh aw, keima thiam loh a nia, ka tuar ang."


Min en vang vang a, chutah," Hremna ka pe dáwn lo che; mahse, tih tùr ka tuk dáwn che a ni," a ti charh charh a.


"Ka pi, eng pawh ti rawh, ka pawm vek, hnial thei che ka ni lo alawm."


"I chhuk ang a, Angel-i hmin i tum tùr a ni. Ka tunu chu ka hnênah a awm tùr a ni a, a nu leh pa chu la dam ni se chuan ka tilui miah lo ang. A hma thei ang berin i chhukna tùr ka tifel ang."


"Ka pi, mak ka ti! Eng hremna pawh min pe la, sawi sêl thei ka nih loh nèn, ka lâwm e, ka pi. Angel-i chu hmin ngei ka tum ang," ka ti a, ka lâwm bawk si chu ka mittui a tling kiau a.


"Hmin i tum ngei tùr a ni thung ang."


"Ka pi, ka tum ang, ka hmin ngei ang tih erawh ka tiam thei lo che; mahse, ka tum ang."


"A țha e, mi luhlul tak a nih ka ring a. Hmin i tum hrâm dáwn nia."


"Aw le, ka pi. Ka lâwm tak tak a ni."


"Ngen duh che dang ka la nei, Ruatdika hi eng mah hrilh suh la, i chhuk dáwn tih pawh hrilh suh ang che. A nu leh pate'n an hriat chuan an rilru a na ngawt ang, an hriat chhuah hma ngeia i chhuk a ngai a ni."


"Aw le, ka pi."


"Nupui nei thuai se ka duh a ni."


Room-a ka luh chuan ka thâwl huaiin ka hria, Neil-a thlarau chuan min awmpui ngei niin ka hria.


"Neil, ka lâwm e aw. Nang chu tel lo la chuan khatianga huaisenna kha ka nei miah lo vang, ka lâwm e. Ka chhuk hmain ka lo tlawh leh ngei ngei ang che, min lo nghâk reng rawh aw, nang chauh hi ka inhnemna awmchhun i ni si a."


Vawiin Nilaini a ni a, naktûk chawhnuah  ka chhuk tawh dáwn. Neil-a thlàn tlawh ngei ngei ka duh, vawiin bâk hun ka nei tawh dáwn lo, Mizoramah hian ka chho leh ang em tih ka hre lo va, Neil-a ka hmu khât tawh dáwn, ka hmu tawh lo maithei.


Ka pi hnênah Neil-a thlàn tlawh ka dîl a, a chhan chu awm rei ka duh vàng a ni. Ka tlawh thei tawh dáwn si lo va, chhùn thingpui inpui ka duh a, Mamitei sâwm bawk ila ka ti rilru a.


Mamite ka va phone chuan damdawi inah a lo kal daih a, sawrkâr chawlh a nih vàngin hun remchâng tiin a thawhpui dam lo a lo kan daih a lo ni. A pawi lo, keimah pawhin ka kal mai ang, hun fianrial ka neihpui thei zâwk dáwn asin.


Pangpar ka lei a, ei tùr chi hrang hrang nèn. Taxi ka la a, a hmun ka thlen chuan ni a duai deuh ruai a, ka rilru min hriatpui ve ni àwm fahranin. A thlàn lung rem chungah chuan ka țhu a, pangpar chu ka fâwp phawt a, dìm têin ka dah riai riai a.


"Neil, i lo țha em? Ka lo kal har deuh a, min hre thiam rawh aw. Hei, pangpar ka lo ken che a, i duh zâwng a nih ka beisei. Vawiin chu nilêngin hun kan hmang dùn dáwn nia aw."


Thing kawkalha a hming inziak chu ka chhiar a.


"Neil Lalrinchhan, i hming pum hi ka hriatna a la rei lo asin. Min hrilh ngai lo va, ka zâwt ngai hek lo che; mahse, kan inpawh ve viau tho alawm tiraw? Kei pawh ka hming chu i hriatna a rei chuan loh kha, Zorinpuii ka nia, ka duh dàn tak chuan 'Puii' tiin min ko la, ka hlim ngawt ang. 'Puii' tia min koh chuan min duat ngawih ngawihin ka ring tlat a nih chu."


"Neil, ka țawng i hre phâk tiraw? I ngawi reng si a, ka hrilh a hai lek lek tawh a ni."


"Ka chhuk tawh dáwn a, Neil. Ka lo tlawh thei tawh dáwn rih lo che a ni, lo khawhar viau suh aw, ka ngaihtuahnain ka rawn kan reng dáwn tho che, i khua a har hman dáwn chuang lo, Neil. Ka ngai dáwn lutuk che asin, ka hmu pha tawh dáwn si lo che a; mahse, ka taksa hetah awm lo mah se ka rilru nhaihtuahnain ka rawn tlawh reng dáwn tho che a ni."


"Neil, ih maw, ka nu leh pate i hmu tawh em? Lo zâwt rawh aw, min hria em tih leh min rawn ngaihtuah ve țhìn em tihte ka hre châk a. Ka malzia leh ka khawhar theihziate hi lo hrilh mawlh mawlh rawh aw, Neil. In awmnaa lo  kal ve daihte pawh ka châk."


Ka mittui ka dang zo leh tawh lo. A tla zawih zawih, tu mah an awm hran lo bawk a, ka tlawh tàwp hun a ni tawh dáwn bawk nèn, ka mittui zawng zawng hi tlâktîr vek ang, Neil-a hian a phû ém asin.


"Neil, min en teh, tu mah neih ka nei lo asin, min hmangaihtu awmchhun i ni a, ka hlim ve teh lul nèn! Kan tân hian Khuanu hi a râwng deuh a ni tiraw? Keima thiam loh zâwk a ni si a, a tuar lo tùr zâwkin i tuar daih hi ka hre thiam thei lo, min ngaidam rawh aw, min ngaidam hrâm rawh, Neil. Ka va ngai tak che ém!"


"Vawiin chiah hi maw, ka rawn tlawh thei tawh che, Neil. Ka awm lo leh vang vang tawh dáwn, chuvángin min chhâng ve hrâm teh. Keimah maia hetia min kalsan hi a nâ ka ti, hmangaihtu ka neih loh hi, Neil. Nang chauh hi ka innghahna awmchhun chu i ni asin, Neil, khawngaihin, ka lungchhe au thâwm hi lo ngaithla hrâm teh."


Ka țah nasat ém avàngin ka bulah lo kal an awm tih pawh ka ngaihtuah lo. Ka hnung lam ațangin kutin min rawn kuah a, Neil-a'n min thlamuantu tùr a rawn tîrah ka ngai tawp.


"Neil, a hrehawm ka ti ém mai, i bulah min hruai ve mai teh." Ka țap tlawk tlawk.


"Zorin, nangmah chauhin engatinge i kal a? Min sàwm tùr alawm, mahni chauha i kal hi ka duh lo."


Ka țap ka bâng tawh nain ka mittui chu a hul mawh khawp mai.


"I buai thei ém a, tihbuai belh che ka duh lo a ni."


"Nangmah chauh chuan ka ngaihtuah che a ni, eng pawh thleng thei a ni a..."


"Ka lâwm e. Neil-a hi a khua a lo har ang tih ka hlau ém a ni, hetia ka awmpui hian a khua a har lo deuh dáwn a."


Min en reng tih ka hria, kei erawh chuan Neil-a hming inziahna thing chu ka en reng thung a.


"Zorin, ka țhian ngawih ngawih a ni ve tho asin, kei pawhin ka ngai a, hrehawm ka ti. Mahse, thihna hi chu na viau mah se, kan tawn tùr vek a nia, a tuar thiam thiam mi vànnei an ni. Nang pawh, intipachang hrâm hrâma i hma lam hun leh thil hlimawm lam ngaihtuah tùrin ka duh che. En teh, i chèr tawhzia kha. Neil-a hian hmu che se la, a lungawi kher lo maithei a ni."


Ruatdika thu sawi chu ka ngaihtuah a, a dik chiah. Tuna ka awm dàn ang hian Neil-a khân min hmu ta se, a lungawi kher lo maithei, a chhan chu ka nêp tlat, eng mah ti thei lêk lovin ka sûn a, hlim hmel tu mah ka hmuh hek lo. Hlim tùrin min duh ang, thil sâwt tawh lo laka intilungngai lo tùrin min duh ngei ang. A dik; mahse, a har.


"A dik alawm; mahse, a har ka ti ém a ni."


Inbe tawh lo chuan kan țhu ngawi reng a, kan rilru erawh a inhlat viauin ka ring lo. Neil-a kan ngaihtuah ve vein ka ring.


"I ril a țam ém? Ei tùr ka keng țeuh asin. Neil-a pawh hi a rilțàm ve tawh ka ring a, ka ken kêp a."


"Zorin!"


Ei tùr chu ka phawrh a, mi pathum chan tùr zêlin ka dah a, Neil-a chan tùr chu a hming ziahna bulah ka dah hnai a.


"Neil, ei rawh aw, i ril a țâm tawh ang. Eng mah ka tihsak theih loh che hi, ka tihsak theih chhun che chu hei tê chauh hi a ni tawh mai si."


"Zorin!"


A aw chhuak chu hrehawm leh lungngai tuar aw a ni tih ka hre thei. Nia, a țhianpa hi keimah vàngin a hua a nih kha, a inchhîrin hrehawm a ti ve ngei ang chu.


"Neil-a hnênah hian ngaihdam dìlna tùr i neih ve tho ka ring a, hun ka pe ang che, sawlai deuhah sâwn ka lo awm ang."


"I duh chuan i awm ve thei tho a nia."


"Ni lo ve, thurûk sawi tùr a awm țhìn."


Dârkâr chanve vêl hun ka pe. Ruatdika pawh hian a tuar ve hle tho tih ka hria a, a țhianpa a haw tlat kha hetia a thih tâkah hi chuan hrehawm a ti dáwn, chuvàngin ngaihdam dìlna hun thâwl pêk a ngai.


Khawiah mah kal lovin min awmpui ve ta reng a, chawhnu dâr 2 vêlah hun min pe tùrin ka ti ve thung. Ka pi khân ka chhuk tùr thu kha Ruatdika hriat hi a duh lo va, Neil-a hnènah hian a tàwpna tak tak atân mangțhana thu ka sawi duh vangin ka bula awm tùrin ka duh lo.


A kal sawn hnuah chuan Neil-a hming ziahna chu khawihin," Neil, i țhianpa thu sawite kha hre ve lo mah ila, lo pawmsak hrâm rawh aw. A thinlungin a haw tak tak lo che, hrehawm a ti lutuk a nia, lo ngaidam hrâm rawh aw, i țhian țha ber a nih kha."


"Chuan, Neil, Mizoram ka chhuahsan dáwn tâkah chuan ka rawn tlawh thei tawh rih lo ang che, lo khawhar suh aw, ka ngaihtuahnain a awmpui reng dáwn che. Tûn bâk hi chu kan inhmu har tawh viau ang, a chhan chu kei chu i hriat angin chhûngte nei lo ka ni a, ka mal ém ém a ni. Mahse, maw, lo chhoh leh hun chu ka nei ngei ang, ka rawn tlawh leh ngei ngei ang che, ka tiam a che. A hun hre thei rih lo mah ila, ka rawn tlawh leh dáwn lo, lo lungngai lo la, i hnem ngai ka nih zâwk hi."


"Neil, kalsan che har ka va ti tak ém! Ka ngai leh zual sawt dáwn si che a, he khawvel, chhûngte reng reng ka neih ve lohna hmunah hian nang lo chu neih ka nei lo asin, Neil, i hria tiraw?"


Ka insût leh rih a," Mangțhana thu sawi hi ka duh lo; mahse, a ngai tlat rih si. Ka mangțha rih ang che aw, Neil. Khawngaihin, ka chhûngte kha min lo biak ang che aw. Hma taka min kalsan chhante pawh hi lo zâwt la, ka lo kal leh hunah min hrilh dáwn nia."


"Mangțha, Neil, mangțha rih le, min en lo la, keimah zâwkin ka en liam ang che, mangțha ngawih ngawih."


Ruatdika min nghahna lamah zawi muangin ka phei a, Neil-a thlàn chu ka thlîr leh țhìn. A lan theihna tàwp berah chuan ka ding vang vang a, a tàwp nân ka thlîr vang vang a.


"Neil, ka thlîr liam che, mangțha le, mangțha vawng vawng le," tiin, mit phê ruaiin Ruatdika motor lo kenah chuan ka lût ta a.


Zanriah kan kîl laiin Ruatdika chuan," Naktûk chu ka pi, Angel-i hian min zui se a țha ang, ina a awm chuan a hawi harh lo lutuk a, a inngaihtuah lunglêng țhin," a ti sup a.


Ka pi melh vatin," Ka hman lo ang tih ka va hlau tak! Ka pi nèn hian chhuah kan tum a, tiraw ka pi?" ka ti vat a, ka chhuanlam siam chu a hriat thiam hrâm ka beisei tak zet.


Ani chuan," Khawiah maw? E, bazârah ka kalpui dáwn tak e, naktûk chu a hman lo ang," a lo ti ve a, ka thaw huai mai.


"Dâwt in sawi loh ka beisei."


Dâwt. He thu mal hi ka hua.


Zànah a rûkin ka thawmhnaw ka siam fel a, Ruatdika a lèn loh avàngin leh min en zui deuh tlat avàngin ka tilang vak ngam lo.


Mut hnuah ka room a rawn kik a, ka hawnsak a, inthlahrun hmel deuh hian pâwnah chuan a lo ding a, a inhmeh lo tak zet a ni.


"Lo lût la?"


"Thil hrilh che ka duh a."


"Aw le, lo lût rawh."


Khumah ka țhu a, ani chu a ding thung.


"Țhu la?"


"Ding chungin le. Neil-a khân a accident hma zàn khân min rawn phone a."


Ruatdika chu ka en kar a, mak ka ti, engvàngin nge a phone ang? E, a țhianpa a nia, a phone ve bawk ang chu.


"A nih chu,kei pawh min phone alawm."


"Neil-a chuan ka unaunu dik tak i nih loh thu ka hriat tawh leh tawh loh min zâwt a."


"Chuan?" Ka nghâkhlel lutuk ringawt.


"Ka hria tih ka hrilh a, chuan," a ngawi deuh dat a," ka duh che tih thu ka hrilh bawk," a ti ta sup a.


Ni lo, Neil-a chuan mak a ti ngawt ang. In khatah kan chêng dùn bawk si a, min ngaihtuah dáwn lutuk.


"Chuvàngin, a accident chhanah khân inmawhpuh tawh suh, ka thu hrilh kha a tân a râpthlâk dáwn ém asin, keimah vàng hi a ni zâwk."


"Ni lo ve, Ruatdik. A bul ber chu keimah ka ni, nang chu lo insawi luh tum ve teh suh, inthiam lohna nei lo tùrin ka duh lo che."


"Nangmah i inpuh hian ka rilru a na țhìn a ni."


"Aw le, ka sawi tawh lo vang. Chuan, nangmah pawh inpuh hek suh, thiam lohna i neih pawhin Neil-a chuan a ngaidam vek tawh che, ka dìlpui vek tawh che a ni."


Chaw ei khama Ruatdika chhuak tùr chu ka thlîr liam, a rûkin. He ka unaupa tak tak ni lo  hian min vìnin ka chungah sual chhuah țhìn mah se, min ngaihtuah ém ém tho tih ka hria. Mi hnem dàn leh mi duat dàn a thiam lo va; mahse, a thiam dàn angin a tilang ve tho. Ka ngai ém ém tho ang.


Ka pi nèn kan ințhen tùr chu kan inkuah vang vang a, ka ngai viau ang. Thla khat chuang zet ka awmpui ta a, ka ngaina tak tak si a, ka lung a lêng dáwn. Ka duh lo chung pawisa min pe țeuh bawk a, a tunu dik tak ni hlei lo leh amah bumtu chungah hian a ngilnei mah mah a ni.


Thlawhna a kãng ta luah luah. Kan hnuai lam ka thlîr a, ka pi te, Ruatdika te, Mamitei leh a pu leh min hmangaih ém émtu Neil-a chènna chu ka hlatsan ta deuh deuh. Ka hmuh theih chhûng chu ka thlîr a.


"Neil, mangțha le, ka rawn tlawh leh hma che zawng mangțha ngawih ngawih le," tiin ka phun sap sap a.