☆RUATDIKA☆- 21

☆RUATDIKA☆ -21 By Dingdi Pachuau


Ruatdika
~~~~~~~


Vawiin hi meeting pawimawh chu nei lo ila, Zorini leh ka pi ka hruai kual ngei ang. Nimina Neil-a thlàna a lo țhu ràn ka hmuh kha chuan ka khawngaihin ka thinlung a dek tak zet.  Heti ém éma Neil-a ngaia a țap hmuh hi hrehawm ka ti, Neil-a accident chhanah amah a inthiam lo tih ka hriat phei chuan ka thinlung hi chemtêa vih tluk zetin a nâ. Mitthi tawh chunga inthiam lohna neih tlat chu a hrehawm asin, kei pawh Neil-a chungah hian ka inthiam lo tho, Zorini a ngaihzàwn vàng khân ka be țha duh lo vêl kha a ni a, hetia a awm tâk lohah chuan hrehawm ka ti a, ka inthiam lo viau ta rêng a ni.


Meeting-ah pawh ka rilru chu a bet lo kher asin, thlànah amah chauhin a kal leh ang tih mawlh ka hlau. A taksa a derdêpin thil a ei thei si lo va, zàn a mu tlêm bawk si nèn, a lo tlu reng ang tih ka hlau zek zek a ni.


Meeting chu dâr 2 -ah kan zo ta hrâm, ka thaw huai. Țhu muang lovin motor ka tinung a, a ei duh tùr deuh bera ka rin cake tui ber chu leisakin  in lam ka pan a, ka pi nèn an chhuak kha an haw tawh ém ang chu maw.


Cake ka hawn chu chawi lûtin ka hmuh hmasak ber Lawmi hnênah chuan," Angel-i a lo haw tawh em?"tiin ka zâwt a, ani chuan," Haw lo, ka pu," a lo ti vat a.


"A nih, ka pi ve thung?"


"Aw, haw tawh, a room-ah a awm."


Ka pi țhìn hi chu aw. Thlànah amahin a kal leh a nih chiah chu, kaltîr loh tùr a nia, chhuanlam siama khawiah emaw kal kualpui mai tùr a nia, a lo țah leh nasat viau phei  chuan...


Cake pawh chu dah lo chuan ka chawi chhuak leh nghal a, a ril a țam viau tawh ang chu.


Ka hmanhmawh a ni, ka rilru chu a hmanhmawh tak zet, traffic a la jam lehnghal. Ka thin a rim tûk mai, ka țhu hle hle thei lo, ka kut ka tihchêt loh leh ka ke ka tiche tlat tlat, ka inthunun hlei thei lo.


Neil-a thlàn ka thlen chuan a tlai ve leh ruai tawh, Zorini hmel rêng ka hmu lo. Ka hawi kual nasa, ka hmu miah lo, khawiah nge a kal reuh le? Kan intâwklàwi em ni zâwk?


Ka phone chu ka phawrh a, a number chu hmet chhuakin ka'n call a, a ring lo, switch-off a ti. He nu tê hi chu aw, on ve reng țhin tùr asin le.


Haw lehnghal ka tum nain Neil-a chu biak lawk ka duh, a thlan chu ka pan hnai a, nimina Zorini ei tùr dah chu a dah ang angin a lo la awm bal, pangpâr pawh chutiangin.


"Thianpa, ka sawi tawh ang khân thil pakhatah chauh min ngaidam tùrin ka ngèn leh a che, Zorini hi ka duh tlat avàngin. Ni e, nang ai chuan ka hre hmasa zâwk a, ka duh hmasa zâwk bawk; mahse, ka unaunu ang a nih miau avàngin ka tih-lan kha a rem lo a ni."


"I chunga ka sualna zawng zawngah khân min ngaidam tùrin ka ti lo che; mahse, Zorini hi chu țha takin ka lo enkawl ang tih ka tiam leh a che. Nang pawhin țha tak leh hlim taka a awm i duh ngei ang tih ka hria, a malzia leh chhûngte a neih lohzia pawh i hre vek tawh a, mal taka a awmna leh a khawharna zawng zawng hi tih-rehsak ngei ka lo tum tlat ang."


"Ka mangțha rih ang che, Zorini ka ngaihtuah a ngai rih si a."


A chak thei ang berin ka tlân chhuak a, in ka thlen chuan khua a thim ruai tawh mai, a lo awm ve tawh ém ang chu maw. Mahni hian khawiah mah kal tawh lo se a țha ang, ngaihtuah a na tlat.


Ina ka luh chuan ka pi pawh a lo țhu vàng tawh mai,  Zorini chu a room-ah a awm pek a ni ang, a inbual pawh a ni maithei bawk.


"Ka pi, Angel-i a lo haw tawh em?"


"Engtin maw?!!"


"Vawiina in chhuah dun hnuah amahin a chhuak leh lo em ni? Thlànah amah chauha  kaltîr hi a țha miah lo a nia. Tûn hnuah chuan phal tawh miah suh."


"A chhuk tawh."


"Nikhaw hre lovin a tlu mai ang tih a hlauhawm, a țap nasa thei si."


"Bawiha, a chhuk tawh."


"Eng maw!!! A chhuk a?!!" Step-a ka chho tawh chu laklawh deuh hian ka ding a, ka pi hian eng thil nge a sawi hi!!


"Vawiin tlai khân Chennai-ah a chhuk tawh."


A room-ah ka tlân chho vat a, kawngkhàr bulah chuan ka ding leh te te a, ka kik ta karh karh. Min chhàwn miah lo!


Kawngka chu hawngin ka hawi kual nghal a, a thawmhnaw pakhat mah hmuh tùr a awm lo. Bathroom ka va hawng leh a, eng thil mah hnutchhiah a nei lo. A perfume rim tui veng veng tih loh chu a rim ara hriat tùr leh hmuh tùr a awm lo.


Khumah țhuin a number-ah chuan  ka  call a, switch-off a la ti tlat. Ani hi a chhuk tak tak a nih dáwn hi. Engtizia nge le? A tum thut em ni? Nge ka pi hian thu dik hriain a chhuktîr? Um, ka pi hian a hre vek ngei ang.


In hnuaiah ka pi bulah ka tlân chhuk lehnghal a, ka pi hnênah chuan," Engtizia nge a chhuk thut a? Engvànga hre ve lo nge ka nih?"ka ti a, ka vìn lohna tùrin ka insûm nasa khawp mai.


"Bawiha, i unaunu dik tak a ni rêng réng lo, lem a lo chang mai mai a nih kha."


Ka hria, ka hre vek. Ka unaunu a ni ang tih ka hlau zâwk asin.


"Kei, nang leh ka chhûngte zawng zawng min bum vek a ni."


Ka insehruh nasa mai. Zorini hian a lo hrilh tak tak a nih hi, a hrilh dàwn laiin a huphurh ngawt ang chu. Ka pi kha ka chhuanlam ve nasa a nih kha; mahse, a hrilh ta tho a, ka pi lah engtin mah a awm si lo. Dâwt ka hrilh tih a hria ang em?


"I unaunu dik tak chu a țhiannu Zorini lema chang kha a lo ni zâwk a, chah chhoh leh ka tum a ni."


"Ni lo, ka pi. Kha nu kha ka unaunu a ni thei lo, ka duh bawk hek lo."


Min en kar pah chuan," I unaunu dik tak a ni, a hmelah a hai theih loh," a ti charh a," Kha nu, Zorini pawh kha a khawngaihthlâk viau rualin ka tunu a ni tlat si lo va, heta awmtîr reng thu a awm lo a ni," a ti leh a.


"Ka pi, ngatinge min hrilh loh?" A chhuk dáwn tih min hrilh lo hi a mak ka ti, Zorini tal pawhin min hrilh ve àwm, ka ngaihtuah ve tehlul nèn.


"I thinrim ka hlau a, i vîn ve thei si a, kut i thlâk ang tih ka hlauhpui deuh nèn, hrilh che chu ka tum tho."


"Bawiha, theihnghilh daih rawh aw, i unaunu tak tak emaw tiin engkim kan lo hlàn lo chauh a ni a, a hun takah kan hre ta zâwk a. A tihzia viau a ni."


Zorini chu ka ngaihtuah tak zet a ni. A derdêp si, thlawhna chu a ruih loh hrâm ka beisei. Chhuk a huphurh ve ang em le? A chhuk dáwn a nih pawhin min mangțha ve tal tùr a nia, a rûk bawkin min tlànchhiatsan leh tihna a ni a, a rûka chêt hi a thiam zâwng tak a nih àwm hi.


Zànah chuan ka chhuak a, motor-ah ka țhu reng. Ka lêng peih lo, ka haw peih bawk si lo, Chaltlang kawng chhuk zau laiah motor chu ka dintîr a, ka țhu reng mai. Zorini number chu ka hmet chhuak leh țhìn, a rûka râla a chhuk hi mak ka ti.


A chhuk tùr thu hi a hre lâwk vek a ni  chiang, niminah pawh nilêngin Neil-a thlànah a awm a, thlahna thu a sawi a ni, mangțhana hun a hmang a ni! Ka va ngaihtuah tlêm ém! Ka hriat laiin eng mah sawi duh lovin hun thâwl pe tùrin min ngên a nih kha.


"Zorin, engtin nge hetiang thil hi i tih theih?"


              *****************


Chennai ka thlen zàn chuan ka muhìl lo hrim hrim. He khawpui boruak han híp leh chu ka ning, min tichau zual. Angel-i chuan min lo làwm viau tak nain ka rilruah eng mah a awm thei lo, Mizoram ka ngai. Neil-a ka ngai a, mi dang pawh ka ngai vek. Chutah, Bobby-a a lo la riak zui, ka thinlung a tizîng, an bengchheng bawk si nèn, kal bo ka châk.


Ruatdika phone call a lo kal zing khawp mai, ka chhâng lo. Ka pi thu ka awih a, ka chhuk tùr thu pawh ka hrilh duh lo a ni a, a phone call phei chu chhàn pawh ka tum lo hrim hrim.


Angel-i vàngin dàwr ka thawhna ngaiah ka thawk leh thei dáwn a, ka lâwm khawp mai.  Dàwra ka thawk leh thei tùr hi  ka làwm em em chhan chu ka rilru a kal ding ngut ngut hman lo ang a, Mizoram lam ngaihtuahna hun ka nei dáwn lo a ni, bâkah regular-a hna ka thawk leh thei tùr chu ka lâwm a ni. Angel-i chuan pawisa kha min pêk a tum a, ka la duh ta lo.Ka dâwt sawi vàngin  Neil-a'n a tuar tawh a, kha sum ka duhna vànga dâwt ka sawina kha paih boa theihnghilh ka duh, theihnghilh veka nun thara bul țan ka duh.


Angel-i bulah chuan ka chunga thil thleng chu ka hrilh lo, hrilh tûl ka ti hran lo. Bâkah, Bobby-a'n a lo zui haw ve deuh ziah bawk si a, hrilhna hun pawh ka la nei lo.


Ka thlen tûk chuan dàwr ka kal lo va, chawlh ka nei rih. Nilêngin ka chhuak lo va, ka room-ah ka awm reng, eng mah ka ei peih bawk lo. Neil-a ka ngai ém ém a, ka ngaih dàn chu ka sawi thiam lo. Ruatdika pawh ka ngai tho, chhûngte leh țhiante neih loh ai chuan min vìn deuh dawt dawttu țhian emaw chhûngte emaw pakhat tal lo neih pawh hi a zia daih zâwk a lo nih hi.


Angel-i chu titipuina hun pawh ka nei thei lo, ina a awm ve chhunah lah Bobby a lo tel ve zêl bawk si, an inah khân a haw ta lo em ni zâwk le ka ti rum rum.


Dàwra ka kal ni khatnaah chuan ka thawhpuite chuan min lo welcome sap sap a, thawk thar an lo awm hran lo va, hmel hriat sa an nih vàngin ka mikhual lo ve.


Kan buai leh țak țak mai. Rilruin thil dang a ngaihtuah hman lo, zàn lamah ka mu țha lo nèn, ka chau kher mai. Ka hmelah a lang chhuak ang tih ka hlau khawp mai. Harsa ti tak chungin hun chu ka hmang ral ve mai a, ina ka haw chuan ka chau lutuk a, khumah ka mu thlawp a, ka muthilh lai pawh ka hre lo.


Harsa ti takin ni tin chuan ka hnaah chuan ka kal ve zêl a, Sunday lo thleng thuai thuai se ka ti kher mai.


Sunday chuan Angel-i titipuina hun ka nei thei ta. A pi chanchin leh thil min chahte chu ka hrilh a, a nui mai mai.


"Pitari chuan a thu thua min dah a tum ringawt a ni maw? Kan hria ang chu," a ti nghat nghat a.


"Angel, be tal la, chhoh i duh loh thu pawh hrilh tal la?"


"Ka be peih lo, a thuhnuaiah ka awm lo ve."


"I pi a ni alawm."


"Ka pa nu tak tak a ni pawhin ka ring lo,"a la ti tak deuh deuh a.


"A duat dáwn lutuk che, Angel. I chho peih lo a nih pawhin be hrâm la ka ti."


"Biak pawh ka peih lo, a tel lovin leh amah hre lovin kum heti chen hun ka lo hmang tawh, a sum pawh ka ît nek tawh lo ve."


Ka beidawng. Chhûngte hi a ngai lêm lo nèn, hrilh fiah dàn tùr pawh ka hre tawh lo.


"An duat viau chein ka hria, Zorin."


"Nangmah emaw min tih vàng alawm, bâkah, an sual hran lo."


"Ti leh ta daih ila, zirna kha chhun zawm i duh ta lo em ni?"


"Duh tho mai; mahse, ka hmanhmawh ta rih lo mai. Ih maw, Angel, in hi luah tùr ka zawng ve tawh dáwn em ni ang? Kumkhuain i bulah hian ka awm thei dáwn chuang lo va."


Phâwk fe hian min en a.


"Min ning tawh em ni? Nge awm hran hrim hrim i duh tawh záwk?"tiin min zâwt a.


"Ning nâng. I thlazàr hnuaia ka awm reng chuan puitlin lam ka pan thei dáwn lo tlat a ni, nangmah anga mi puitling hi nih ve ka duh tawh a ni."


Ka thil sawi chu ka ti tak tak.


A duh zâwng takin ka sawi a ni maithei, a nui var var mai a.


"I duh phawt chuan aw. Mahni chauha  chènna tâwk lek chu heta țanga hla vak loah hian ka hria, a to lo bawk. I puitling sâwt ka ti viau a, nangmaha i awm phei chuan kei aiin i puitling daih zâwk ang, a țha alawm."


Angel-i hi chu a duhnaah chuan a fel thei khawp. Engkim min ngaihtuahpui leh vek a, ka tân chuan min țanpuitu vântirhkoh ka ti lo thei lo. Sual ve viau țhìn mah se, ka chungah hi chuan a țha leh tlat zêl.


Ka in luah chu a zau fahran lo nain a tâwk viau. Ka dàwr nghahna lam ka hnaih sauh a, ka tân phei chuan a țha leh zual. Pawisa ka lo khâwl ve nual tawh bawk a, a zia riau.


Mahnia awm chuan rilru ka kàwm nasa thei kher mai. Eirawng bàwl ka peih lo va, ei tùr siam awlsam bâk ka lei ngai lo. Ka chauh theih ém avàngin ka mu hma thei hle a, ka muthilh hmain Neil-a ka ngaihtuah ziah a, tuna ka in luahte hi hmu ve ta se, min khawngaih reuh ngawt ang, keimah chauhin ka luah bawk si a.


Tunah chuan ka mittui pawh a tla zing lo deuh ta. In luah thara ka mut zan khatnaah erawh awráwl chhuah meuhin ka țap leh hrâm a, chumi tih loh chu ka țap leh ta rih lo. Khuareiin min hnêm ang an tih hi ka ring tawp.


Inrinni a ni a, chawhma chu dàwrah kan thawk. Dârkâra thawk kan nih vàng hian a zia a, țhahnemngaih deuh leh kan thawk rei deuh mai a, zîng lam dâr 8 ațanga tlai lam dâr 6 thleng hi chu ngei ngei a ngai thung, a hnu lam chu mahni țhehnemngaihnain a ni thung.


Dâr 12 a rîk chuan ka thawmhnaw ka thlâk a, dàwr ațang chuan ka chhuak a, ei tùr siam awlsam ka lei leh phawt  a, ka in luah ka pan nghal vang vang.


Ka thil lei ka dah fela ka thawmhnaw ka thlâk fel hnuah chuan apple chu ka zai a, ka ei dáwn chiah tihin door-bell a rawn ri ta ral ral mai.


Tu tak ni ang maw? Angel-i a ni ang, ani lo helai vêlah min hretu an awm lo va, lo kal tùr an awm hek lo.


Kawngka chu ka hawng a, chain erawh ka la  phelh lo, pâwna lo ding ka hmuh chuan ka khâr lehnghal vat. Ka thin a phu hlawp hlawp a, ka âwm ka dawm vang vang.


Lalpa, he pa hian hetah hian eng nge a lo tih dáwn?


(Zanin chu ka phone a chiang lo, ka type laiin a insawn daih zel, a dik thei lo. A tawi deuh hlek, min lo hre thiam hrâm mai teh u, lo dah ngei ka duh si. Naktûk  zànah sei deuh hlekin ti mai ang u aw)