☆RUATDIKA☆- 23

☆RUATDIKA☆- 23 By Dingdi Pachuau


Nilêngin ka in luah te reuh têah chuan kan inkhung ta. Lèn chu ka châk tho nain ina awm deng deng pawh nuam ka ti tho.


Ruatdika lah hi chhuah a tum miah lo, riah leh a tum em ni le? A fuh vak lo asin, nizàn pawh kha...


"Eng tikah nge i chhuah dáwn?"


"Ka duh hunah."


"Riah leh i tum tawh lo ang chu tiraw?"


"Min va huphurh ve!"


"Huphurh thil lam a ni lo, i lo kal chhan hi chiang takin sawi la, i tih tùr chu ti teh."


"Eng dang vak nge ni se i tih?"


"Angel-i chu hmin tum la."


"Kha nu hming kha sawi tawh suh."


"I lo kal chhan a ni lo em ni?!" A mak e, Angel-i a rawn kal chhan loh chuan eng nge ni ta ang? Ka pi khân hmin tùr khân min duh viau a, ka thu sawi engah mah a ngai duh si lo.


"Nangmah hi ka rawn kal chhan chu i ni."


Keimah maw? Engvàngin maw? Hremna min pêk a tum chu a ni ém lo maw? Nge ka piin a rawn tîr? Angel-i ka la hmin loh vàngin maw?


"Ka pi chuan min hre thiamin min ngaidam tawh emaw ka ti asin, Angel-i erawh ka la hmin thei lo va, ka la tum ve ngar ngar tho."


"Ka pi chuan engtin nge a tih che a? I chhukna chhan pawh hi ka pi vàng a ni tiraw?"


Ruatdika chu ka en vat a, ka thil sawi sual chu ka hre chhuak vat bawk.


"Ni lo, ni lo rêng rêng. Ka pi vàng a ni lo," ka ti ta chùl a.


"Zêp nei ziah suh."


"Haw tawh rawh." He pa bulah hian ka sawi loh tùr ka sawi chhuak zêl dáwn tlat, ka ngawi thei si lo.


"Ka hmanhmawh lo."


"A nih chuan, eng mah min zâwt tawh suh, ka duh vànga chhuk ka ni, ka piin tel vena a nei lo."


Min en vang vang a," A țha e. Ka nupui ni tùra ka hruai chhoh hunah che thu dik tak chu kan la hria ang chu," a ti ta nghut mai.


Nupui maw? A nupui maw?!!! Ni lo, ni lul lo. A nu leh pa leh ka pi an thin a rim lutuk ang. Bâkah, min tihthinrim nân a sawi ve mai mai bawk a ni.


"Hahaha, fiamthu i duh hle mai."


"Fiamthu ka duh vak lo, ka thiam lo hle bawk."


Hetiang sawi ka duh lo, a fiamthu a nih loh hlauh phei chuan ka duh lo leh zual.


"Ka chhuk hnuah Neil-a i tlawh em?"


"Tlawh e, ni tin ka kal ziah. A hnênah nang hi ka enkawl ang che tih ka tiam a ni."


Ka sawi chhuak fuh leh ta lo. Thil eng emaw sawi hlek ila kan chungchângah a lût zêl chu a buaithlâk ka ti.


"A țha alawm," ngaihtuah lo zet chuan ka ti ringawt a.


"Chu chiah, ka tum rêng a ni. Nang hian kawng min hawnsak rêng ta che."


"Eng maw?"


"Zorin, ka thil sawi ngaihtuah rawh!"


Ka bânah manin min pawt țhu a,rilru nuam lo zet chuan ka thaw halh a. Amah hmachhawn chuan min thuttîr sauh sauh a.


"Min en rawh."


Ka en hma chu a ta ngawi reng, kei ka hmanhmawh lo khawp thung.


"Min..en...rawh!"


Ka en ta hrâm. Ngun zet hian min en chhuk ràn a, a meng deuh sawr sawr a.


"Ka duh che ka tih tawh kha. Ka duhna che hi chuti maia kal botîr ka tum lo. Chuvàngin ka duh che phal rawh."


Leh tawp mai a. Min duat deuh leh khawngaih thlala deuha min dìl chu a awm lo ve khawp mai. Ani hi chu a nih ve dàn a nia, mi han tih thliam thliam hi a thiam ve lo, Neil-a nèn chuan an inang lo kher asin.


"A la hma ém mai." Ka thu sawi awmzia chu hre thiam hrâm se.


"Min duh tawp lo bîk lo tiraw?"


"Neil-a țhianpa i ni a..." min lo titàwp chat a. "Ka țhianpa chuan hlim taka ka siam che hi a duh ngei ang," a ti leh a.


A țha alawm, ka duh lo bîk lo. Neil-a boralna a la rei lo va, min hnèm thiam ber tùr chu a ni, hlim chu ka duh ve tho asin.


"Min duh loh chuan ka tilui lo che; mahse, hun min pe la?"


Ka ngaihtuah vang vang a, he pa hi heti khawp hian a tlâwm tawh a, kei eng mah ni lo leh fahrah mai mai hnênah hian. Ka inchhuan khum thei lo ang, ka duh ve tho si a.


"A țha alawm; mahse,..."


Ka hmui a rawn hup vat a," A tâwk. Țha tak, hlim takin ka siam ang che," a ti sup a, min kuah nghal a.


"Min la mutpui loh vàng a ni em?"


A nui hawk a,"Nizànah pawh kan mut dun reng kha," a ti a, ka zak țêp.


Ka thil sawi awmzia a hre reng sia, a hai der vêl chu ka ngei tawp. Ka sawi chhuak tawh miah lo ang.


"Mut dun chu i duh em ni? Ka inpeih reng a nia."


A hnungah ka chùm awk a, a nui nghawr dat.


"Min duh ka phal dáwn chuan fair tak a nia ka duh dáwn ni."


"Intithu țan nghal ringawt suh."


"Fair loh chuan ka phal lo law law ang."


"Ka fair viau. Chuan, țan nghal ila?"


"Eng?" Ka melh chho há a.


"Fair tâwkin aw," tiin ka hawi chho chu min fâwp nghal a, chuti teh thut chu ka beisei lo asin.


"Min chhâng lêt rawh."


Sawi lo mah se ka tum tho, he pa hi ka duh ve tho si a, Neil-a khân min duh a, min hrilh a, kan inngaizawng ta kha a ni a. Ani pawhin tunah min hrilh leh a, Neil-a uiresan pawh ka ni bîk chuangin ka hre lo.


"Zorin!" Thil dang ka ngaihtuahsan hian a thin a rim țhìn rêng.


"A pawi ka ti."


"Sawi tawh suh!" A thin hi a chhe ve sia maw, a buaithlâk țhìn.


"Min chhâng lêt duh miah loh fawh hi a țùlna ka hre lo ve!" A hawi sawn ta nghal a, ka inthiam lo kher mai.


Kan inbe ta lo char char. A ngawi ngul mai a, a nuihzatthlâk ka ti. Min tihhlim tùr thu leh min enkawl tùr thu kha a sawi ve si a, naupang ang chiah a ni, mipa naupang thinchhia leh titau peih deuh a ang.


Mipa naupang. Hm, a ni chiah alawm. A nu leh pain an fa neihchhun leh an mal khalh a ni a, a pi leh puin an duat, keh thei dawma an dawm leh an tu neihchhun a ni bawk, a àwm viau tho. Ka nui deuh sak a, kei lah hian ka hnial ve pàng páng țhìn bawk sia, a lungawi lo thei khawp ang chu.


"Nuihzatthlâk a awm em ni?"


"Aih."


"I nuih reng kha."


"I hmu sual a ni ang."


A ngawi leh ta daih. Eirawng a bâwl a, keiin ka pui. Chaw ei laiin min rawn tlawh leh a, ka en duh miah lo. Chaw ei khamah thlèng a sil leh thlap, ka nuih a tiza. Inla pà takin thlèng a sil chu a ni sia.


Zànah kan mut dàn ngai têin kan mu leh a; mahse kan inkâra puan ka dah chu a dah sawn daih.


"Rawn tawlh rawh."


"A lum ém mai."


Ka kâwngah min rawn pawt dâwrh a, a taksa si chêtin min kuah bet.


"Ka thu awih ve mai țhìn la, i duh loh thil ka tih i duh loh chuan."


Ka beng bul chêta țawng a ni bawk a, a zâ ka ti, ka mûr iai iai mai. Mipa min hnimhnai hmasa bertu chu Neil-a a ni mai a, ani nèn lah infawh bâk thil dang kan ti miah si lo.


A mal sei thlurh mai chuan min rawn khan a, ka țang țùng mai. A kut lah chu ka kâwnga kuah mai duh tâwk lo chuan ka âwmbawr hnaih zetin a rawn tiche a, thâwk pawh ka thaw țha ngam lo.


"Țang țùng suh, engtin mah ka tih loh che hi."


A tidik leh chiah bawk si, keimah hi ka dik tâwk lo a niang.


"Naktûkah em ni i chhoh ang?"


"Ka chhohsan dáwn lo che."


"Min vêng dáwn maw?"


"Um."


"Ka bulah i awm ve ang maw?"


"Um."


"Ka nuih pawh a za lo."


"Kei pawh."


Ka țawng zêl duh tawh lo, naktûkah dàwr ka nghah a ngai tawh, muthilh ka duh.


"Muttui le."


"Muttui le."


Zînga ka harh chuan a lo tho tawh a, ka harh hma ve viau asin le. Ei tùr a lo siam diam tawh avàngin kei chu dàwr kal thei tùrin ka insiam nghal a, he pa hi ka chhuahsan dáwn sia, khawiah nge chahbi a lo dah ang aw?


"Breakfast hi ei la, ka lo thlah ang che."


"A ngai lo, keimahin ka kal thei."


Ka chhuah dáwn chuan," Chahbi i dahna chu text-in min lo hrilh mai dáwn nia, ka mangțha mai ang che, kan inhmu leh har tawh àwm ém mai, tluang deuhin i thlâwk dáwn nia," ka ti zawk zawk a, min chhàn hmain ka tlân ta hlawk hlawk a.


Nilêngin kan buai leh ta. Ruatdika pawh ka ngaihtuahnaah a awm hman mang lo, tluang takin a chhuak ang chu maw? Chahbi a dahna hmun chu min rawn text ngei ang chu.


Ina haw ka peih lo kher asin, keimah tê chauhin ka awm leh rak rak ang a, Ruatdika khân min rawn chingphùl viau nain khawhar taka awm ai chuan a nuam ka ti tho, min vìnin min be țha duh lo mah se chènpui kha a nuam ka ti, a ei siam a tui si.


Ka hmanhmawh peih lo, muang chângin ka kal, ka phone ka en a, Ruatdika text ka hmu lo. He pa hi, min text tùr khân ka ti sia, khawnge a dah ang le?!!


Hla deuh hlek ațang chuan ka chènna building chu ka melh a, ka in luah chu a thim țhap. Ka nun, beiseina êng sêt sêt neia thim leh ta hi ka tehkhin. Nizàn tun ang hunah kha chuan Ruatdika khân min tihtauh khumin min be duh lo a nih kha.


Ka nui sak a, a va za lo tak ém! Khawhar taka ka awm laiin a rawn lang a, khawhar leh tùr bawkin min kalsan leh a, hei hi ka chan tùr dik tak chu a ni.


"I lo thleng thei maw? Ka ngaihtuah deuh che a."


Ruatdika aw ka hre thut mai chu mak ka ti!! A chho tawh ang chu tih laiin, ka bulah a la awm, a aw ka la hria. Ka hre sual miah lo. Ka lâwm lutuk chu ka insûm thei lo, tlân chungin ka pan phei a, a nghâwngah ka kuah chawt a.


"Hey, i țha maw?!!"


Nghet zetin ka kuah a, min kuah lêt ve vatin a nghâwngah ka uai nawlh a, a kâwngah chuan ka ke pahnihin ka kherh nghal a.


"Thil dik lo a awm em?"


Ka fâwp nghal mawlh mawlh. Ka lâwm ém a ni, a lo la awm hi ka rin loh lutuk thil a ni si a, keimaha awm kha ka huphurh ta tlat a ni.


"I lo la awm a, ka lâwm e."


"Ka kalsan dáwn lo che ka tih kha."


Kan infâwp mawlh mawlh, ka duhthawh a, ani lah chuti bawk. Kan inthlah meuh chuan kan thaw dùn huam huam mai!


"Hetianga tlaiah hian i haw ziah em?"


Ina kan luh hnu, ka inthlâk fel hnua kan țhut dun laiin min zâwt a.


"Aw, a chângin hei aia tlaiah pawh ka haw tho."


"Nangmah chauhin maw?!"


"Aw, ka ngaihtuahawm loh a nia."


Ka kut hmer vang vangin," Ka duh lo hle mai, nangmah chauh lehnghalin,"a ti sup a.


"Dàwr a hla hlei nem."


A ku pahniha ka biang rawn dawmin," Eng thil pawh thleng thei a ni, a țha ka ti miah lo,"a ti leh a, a mitmeng fing zet chuan ngun zetin min en reng a.


"A thleng bîk nâng, min ngaihtuah lutuk lo la."


"Ka ngaihtuah lo thei lo che, naktûkah chuan ka lo nghâk tawh ang che."


"Naktûkah i la awm dáwn maw!!" Ka thu hriat chuan min tilâwm lutuk ringawt. Naktûkah a la awm dáwn, chuan ka dàwr nghâk, ka haw tùr min lo nghah a tum bawk.


"Ka hawsan dáwn lo che ka tih kha."


"Min tihder emaw ka ti."


"Ka tihder ngai lo ang che."


Ka rilru a hlim veng veng mai. Neil-a boral ațanga ka hlim lehna hmasa ber a ni bawk.


"Min tihlim hle mai."


"I hlim hi ka thil duh ber a ni." Rawn kûn hniamin lungchim zetin min fâwp a, kei pawhin a tih dàn ang chiaha lungchimin ka lo chhâng ve zat.


Hetiang hian ka hlim leh thei ang tih ka ngaihtuah pha miah lo. Ka rilru chu a nuam veng veng a, ka nui leh sak țhìn bawk, ka hlim ém a, a àwm ve tho.


"Zanin kan chawhmeh chu a va tui tak! I bazar em ni a?"


"Aw, kan mamawh tùr ka lei nual bawk."


A haw loh avànga ka hlim lutuk vàng khân ka lo hmu hlawm lo va, table fan thar leh bungbêl țhenkhat leh mini fridge a lo lei niin! Ka va hawi lo tak!


"A țha i ti em?"


"Ti lutuk tlat, ka mamawh i hre hle mai, ka lâwm e."


"Naktûkah thil dang ka lo en leh dáwn nia."


"Aih, a ngai tawh lo, a tâwk tawh. I inhmang nasa lutuk ang, ka lei ve mai dáwn alawm."


"Zorin!"


A duh loh zâwng ka sawi leh tawh a ni maw, ka hmui ka hup ta vat.


"Ka lei ang ang hi pawm mai rawh."


"Aw le."


Kan pahnihin thlêng kan sil dùn a, ani'n a lo hru hul zêl. A kârlakah mi fawh a tum zen a, nuam ka ti, ka nui reng mai.


"I hlim em?"


"Teh rêng mai."