☆RUATDIKA☆ - 24

☆RUATDIKA☆ - 24 By Dingdi Pachuau


"University țha takah chuan zirna chu chhunzawm i tum ta em?"


Dunlop chhah ang reng tak chungah chuan kan mu mai mai a, a malah ka lu nghatin ani erawh a țhu mu titih thung a.


"Class kal țhat a ngai dáwn sia, ka tlin tâwk tùr IGNOU hnuaiah hian ka ti mai ang ka tia."


"Chennai-ah kher maw?"


"Ka hre chuang lo."


"Lehkha zir a ngai tawh em ni? Ka hnuaiah inzir mai la?"


Ka nuih sak a, " Lehkhathiam hi ka ngai sâng a, chuvàngin, B.A tal hi chu chhuah ve hrâm ka duh a ni," ka ti a.


"A țha, i tum phawt chuan i thei ang. Angel-i chuan pawisa a pe ta che em?"


"Eng pawisa?"


"A lem i chan man kha, engkim ka hre vek."


"Min pêk a tum a, ka la duh ta lo a ni. Dâwt sawi man lâk kha nuam ka ti thei dáwn lo va, bâkah ka duh lo a ni tawp mai."


"Ka rin dàn chiah!"


"Sum hi a lo ni ber lo tih rilru ka pu tawh."


Min en vang vang pahin," I chunga ka ngaih dàn hi a dang nasa tawh a ni," a ti sup a.


"Min ngai chhe viau tih sawi lo teh. Nun thar țan ka tum mêk a nih hi," lungawi lo ru deuh chuan ka ti nang nang a.


"Chu rêng, mipa i kawp hnem viau tawha ka rinna che pawh kha, ka paih țhen ta. I la virgin hialin a nia ka rin ni!"


Ka sen awp awp ang chu, a sawi frank mah mah țhìn. Min ngai khawlo viau pawh hi ka dem chuang lo, a àwm ka tihpui ve tlat.


"Gin maithei a ni."


Kan nui ve ve. A nui hmel hmuh hian a lang naupang sawt a, hmuh a nuam ka ti. Ka rualpui vel lek ni àwmin a lang tlat.


"Nui ve ziah tawh rawh."


"Ka nui elo?"


"Inti-mi tak rùn lo hian nui ve zauh zauh rawh, i lang nèlawm ve sawt bâkah kum 20 ang vêlin i lang naupang bawk."


"Ka duh miah lo!"


"I cute tawp."


"Min tilài țêp."


A laih lohzia hre chiang bertu ka nih ka ring! Tlangval kum 30 mi hi ka chhaih lài lul lo ang e.


"Zanin chu..?"


"Eng nge?"


"Test ila?"


"Eng chu?"


"Gin leh gin loh kha."


"Ngawi hmiah rawh."


A nui chu ka ngei lutuk. Pasal neih hmaa nupa chauhin an chen tùr lo tem lâwk chu ka duh dàn a ni miah lo, inneih zàn a hlu lo duh ngawt ang.


"Ka pasal tùr hnênah chauh."


"Tihian, kan innei a ni mai alawm."


"Min luhkhung maw?"


"A nih àwm hi!"


"Pasal neih ka la duh hlei nem."


"Neil-a pawh neih i tum tho kha."


"Ani chu a dang, min hmangaih miau a."


Ka thil sawi chuan a nghawng deuh a ni maithei, a ngawi ta daih.


Mut hmunah pawh a ngawi reng a, ka be bîk lo. Nia, inngaihtuah ve rauh rauh rawh se, min duhna ringawtah hian ka innghat bur thei lo a ni.


A muhìl tawh emaw ka tih hnuah chuan," Kei pawhin ka duh em em che a, hmeichhe dang zawng zawng aiin ka thlang bawk che a," a ti nuah nuah a. A rilruin a lo ngaihtuah reng a nih dáwn hi.


"Khatlaa mi ai pawhin maw?" Fiam ve rêng rêng ka châk tlat.


"Kan ințhen daih tawh!"


"Ngatinge in ințhen a?"


"Kan induh tawh lo a ni mai."


"Induhtawnna hi chu khati mai kha a ni țhìn alawm."


"Min hrilh fin tum teh suh."


Min kuah nghet sauhin a kut chuan ka kawr hma lam chu a zen tumin a dap ruk ruk a. A kut chu man chatin," Thil pawi ti miah suh aw," ka ti sap a.


"Uikawm viau lo teh!"


Ka uikawm pawh a ni tawp lo, kan inkârah 'thil' a thleng ang tih ka hlauh vàng a ni zâwk.


"Nih leh, hei bâk hi chu a theih loh."


Ani ai chuan keimah hi ka invèn a ngai, ka țan hrâm hrâm a ngai zâwk. Ani chu mipa a ni a, a hmingchhe zâwk leh chan chhe zâwk chu hmeichhia zêl hi kan ni.


"I hlauthâwng em?"


"Ka ring che alawm, țha lo leh ka duh loh thil chu i tihluih duh ka ring lo."


A chek hlak a.


"I fing reuh mang e!"


Ka nui hak a, chutih rual erawh chuan a kut lian zet lum ham ham chuan ka âwmbawr a rawn chûl ta, ka thaw halh. Ka thin phu nghal zawih zawih chu a hre ngeiin ka ring.


"Min hlau em ni?"


Țawng chhuah chu ka ngam lo asin le!  Ka aw a khùr ngei ngei ang, ka hlauhthâwng a, ka hlauthâwng lo tho bawk si. He pa hi ka hlau lo!


"Aih."


Ka nghawng rawn nawr châk châkin," Min hlau miah suh, i duh lo chung chu tihluih che ka tum lo," a ti sup sup a. Ka thu hriatin min tihlàwmzia chu a hre phâk kher lo maithei, min tilui dáwn lo, hriat a nuam tak zet.


"Ka lâwm e."


A hmuiah chuan ka fawhsak zauh a, ani chuti lek chu a lo duh tâwk îkhâw lo mai. Âm zetin min fâwp ngawr ngawr a, chumi pah chuan ka âwmbâwr chu a țhâm țâwk a, ka âng zawk mai.


"A na ti miah suh, tuna ka awm dàn hi a hrehawm fé zâwk."


Ka sawisêl ngam lo. Ka hre thiam mai, min do ràntu chu hmu lo mah ila, ka hre ve tho.


Zîngah breakfast a lo buatsaih leh vek a, fel hi chu a fel alawm, a duh chuan. Ka dàwr nghahna address chiang takin ka hrilh a, a bula awm thlahlel hle mah ila hna ka thawh a ngai, awm dùn reng thei kan ni lo.


Chhùnah phone kan khawih ngai loh avangin kan haw dáwn tak takah chauh phone kan khawih thei a, ka phone chu ka check vat vat, ka pi hnên ațangin missed calls vawi nga!!!  Eng nge ni ang le? Angel-i chungchângah a ni ngei ang, ka la hmin si lo, ka be huphurh khawp mai.


Ruatdika ka phone a, min lo nghah tawh thu a sawi chuan ka thaw huai. Vawiin tlai chu bodyguard țha chi ka nei dáwn e.


A lo ding vàng tawh, a chhiat lohzia chuh! Ka tuiral lo chauh, engtin nge min duh theih zâwk le aw ka ti. A tân hian hmeichhe țha tak tak hi an tam dáwn tih a hre chiang bertu ka ni hial ang chu.


"Min lo nghahna a rei tawh em?"


Ka kut a vuan chat a, rawn kûn hniama ka hmuia fâwp zauhin," Chatuan tluka rei niin ka hria," a ti sup a,  min thlahlel ve tho tih ka hriat hian nuam ka ti, ka nui var var a.


In kan thlen chuan thil thar a lo lei leh nual tih ka hmu thei nghal. Ka mamawh tak tak an ni a, ka sawisêl duh lo. Sawisêl pawh ni ila awmzia a awm lo, ka thu lo ém mai.


"Ka pi missed calls ka hmu a, ka'n call ve tawh ang e."


"A ngai lo!"


Ka en vat, chutianga ranga min lo kalh nghal chu mak ka ti!


"Ngati maw?"


"Rawn phone-na chhan tùr che a nei lo."


"Min rawn call miau sia."


Ka han call ta nge nge a. A mut a la hun chuang lo va, a pawi lo ang chu. Ruatdika lah chu a kal sawn hmak bawk a, engtizia chu ni maw?


"Hello, Bawihi?"


"Aw, ka pi. Dàwr nghah chhûnga phone kan khawih theih loh vángin i call ka chhâng thei lo che a, a pawi ka ti lutuk. I țha em?"


"Aw, țha e. Bawiha a lo kal tiraw?"


"Aih" ka tih chuan dâwt ka sawi dáwn si, dâwt sawi ka duh tawh lo. Hreh zet chuan," Aw," ka ti sap a.


"Lo hàwtîr rawh aw, chuan ka hnêna min tiam kha hlen i tum bawk dáwn nia."


Ruatdika chu mit khap lêk lovin  ka en reng a, a langah erawh ka thinrim duh lo. Eng thil nge a pi min rawn phone ngai khawpa a tih ni? A pi thu hnialin a rawn kal em ni zâwk?


"Sawi fiah rawh le."


Tukverh bul ațang chuan," Tikhân min melh rûn kher suh," a ti phawt a, chutah," Ka pi ka rawn chhuahsan a ni," a ti ta.


Ka țawng lawk lo, mak ka ti lutuk!


"Eng..eng maw!!!"


"Ka sawi tawh kha."


He pa hi a â tawh a nih hi. Engtin nge a pi tar tawh tak chu a rawn chhuahsan theih?! Ni lo, ka hre sual a ni. Thil theih a ni lo.


"Naktûkah haw chho ang che."


A nui suk duh chauh nia! Hahthlâk hian.


"Tlangvâl hawklak rual i ni tawh lo..."


"Thu tlûkna siam rual ka ni tawh," tiin ka thu sawi lai chu a lo pawt chat a.


"Chuti, naupang chhe chêtin che mah ta che."


"Naupang chhia ka ni lo, test i duh em? Ka inpeih reng a nia."


A va hahthlâk tak! Kum 30 chin chu thu tlûkna fing tak siam rual a ni tawh asin, hetia awm mai mai lo hian. Kei hi rilru puitling ka inti hauh lo; mahse, tunah tak hi chuan ka bula mi ai hian ka rilru a puitling zâwkin ka hria.


"Ka rilru tihah suh."


"Ka tihlim che emaw ka ti?"


"Khawngaihin, ka ngèn che , a rang thei ang berin haw chho rawh aw, ka pi a buai dáwn lutuk, a innghahna awmchhun i nih hi."


"Ka hua!"


Ka hmui ka hup vat, a thu sawi hi awih a va har ve!! Ni lo, a pi a haw thei lo ang. A piin ani bâk innghahna a nei tawh lo, thinrim awka ni lova a thlèma ka thlèm a ngai zâwk a nih hi.


"Lo kal teh."


A luhlulzia hi, a che eih lo. Min melh rûn a, a mit pawh a khap lo.


Ka pan phei a,  a hmaah dingin ka nuih sak a.


"Min tlawn hlek suh!"


Ka mitah hian ka rilru hi a lang chhuak vek a nih ka ring, ka thil tum a hre tlat.


"Min duh tiraw?"


"Aw, ka pi ai pawhin."


Ka nuih a za lutuk. A lawmawmzia hi; mahse, nuih a chi miah loh.


A kâwngah chuan ka bân rawlhin ka kuah vang vang a, kei pawhin ka duh alawm. A nungchang frank tak, nèlawm loh zet leh a chânga naupang chhia zet hian ka ngaih a tizualin ka duhna a tizual tlat a nih chu.


"Engatinge hetiang thil hi i tih a? Ka piin a ngaihdamna sâng berin min ngaidam tawh a, keimah vànga a duh loh zâwnga i awm chuan ka pi chu ka hmu ngam tawh nâng, ka pi kha ka ngaina asin."


"Ka haw chho peih rih lo a nia."


'Rih lo'. Haw chhoh chu a tum tho a nih dáwn hi, a va țha tak! Kan inhnial buai vek ang tih ka hlau a nia, kei chuan ka pi thu ka hnial ngam dêr dáwn si lo.


"A țha alawm; mahse, i haw chho ngei ang tiraw?"


Min chhâng tawh lo; mahse, a pawi lo, haw chhoh a tum tho tawh e.


A awm chhûng chuan ei tùr a siam zêl a, ka dàwr nghâk haw lam min lo nghâk ziah bawk. Nuam ka ti, a chhoh hun tùr ka huphurh lâwk, ka ngaih dáwn bâkah a hrehawm ngawt ang. Han inhnialin min vìn deuh țhìn mah se, ka duh ém ém tho. Ni lo, ka duh ngawih ngawih tawh zâwk a ni.


A chhoh dáwn zànah, dinner kan kîl laiin," Naktûk chu i chho dáwn sia, dàwr nghâk lovin ka thlah ang che aw," ka ti a.


"A țûl lo," a ti leh tlat nia. 'Aw le' a tih ka rin teh lul nèn.


"Ngati maw?"


"Ka duh lo."


Ka lung a awi lo țêp a ni. A chhoh dáwn tawh vàngin ka tih theih ve tâwk tiin thlah ka duh a, a duh lo tlat si.


"Ka thlâkhlelh ang che hian min thlahlel ve miah lo a ni maw?" Ka lungawi lo awki chu a hre thei khawp ang.


"Eng mah i hre lo."


Teh bawl chuan.


Ințhen dáwn aruaia intih-thinrim ka duh loh vàng chauhin ka ngawi. Ka thil ei chu ka ei mawp mawp a, en pawh ka en duh lo.


Mutnaah pawh ka be lo.


"Eng mah hre lo tih pawh chu i va la na àwm ve a?"


Sîr lam ka hawi tlat, ka chhâng lo ang. Ka rilru a tinâ, țha deuhin sawi ve mai se.


Min rawn hnaihin," Ka naute hi a thin ka tirim a ni maw?"a ti sup a, ka chhâng chuang lo, ka awm ngaiin ka awm reng a.


"Ka chho leh lo mai ang."


Min tihhlauhthàwn dàn hi a hria a nia.


"Chho ngei ngei rawh," ka lo ti a.


"Min ngai dáwn lo em ni?"


"Ngai ang." Dâwt ka sawi duh tawh lo, thu dik a ni miau si a.


Min rawn kuahin," Min thlah ka duh loh chhan chu ka chhohsan thei lo ang che tih ka hlau a ni, nangmah chauha i lêt tùr ka ngaingam lo bawk," ka beng bulah chuan a rawn ti sar sar a.


Hei vàng hi maw lo ni?


"Ka ngai ngawt ang che."


"Ka ngai dáwn che."


Kan inkuah vawng vawng. Zanin hun hi ral thei lo se, naktûk her chhuak thei lo se ka ti.


"Zanin chu... chance min pe la?"


A mit meng thim raih chu ka en rei duh lo, ka en rei chuan ka hnial thei dáwn lo, min mamawhna chiang takin ka hmu si a.


"Min thlêm lo la."


Ka nghâwng tuai nauh nauh chung chuan," Ka mamawh che a ni, nang ang êma ka taksain a mamawh hi ka la hre lo," a ti a, ka hmuiah chuan chin tâwk awm lêk lo chuan min fâwp bawrh bawrh a, kei pawh chuan lo dawh mai mai bîk lo chuan ka lo chhâng ve zêl a.


"Ka mamawhzia che hrilh hi ka zak hauh lo."