☆RUATDIKA☆ - 25

☆RUATDIKA☆ - 25 By Dingdi Pachuau


"Ruatdik..."


Min fawh leh tawh avàngin ka sawi zawm thei lo. A duhthawh bawk si a, a kut pawh a che fet sâwt khawp mai.


"Ka mamawh tak zet che a ni."


A aw sehchilh deuh nuai leh khùr titih deuh ațang chuan dâwt a sawi lo tih ka hre ve mai, a thâwk a rangin a tâwi a, keimah vànga hetianga a awm thei hi mak ka ti.


A kut chuan min chûl ruai tawh a, kei pawh ka pângngai tawh miah lo. Ka mar chu a phu rang tawh hle, ka thinphu lah chuti bawk.


"Ruatdik, ka la thianghlim a nia."


A kut che lai chu a tàwp chat. Ngun zetin a mitmeng thim raih chuan min en a, dâwt ka sawi nge sawi lo hriat tum a ang ka ti.


"Mipa nèn kan la chesual lo," ka ti leh sap a. A rawn kûn hniam a, ngunthlûk zet hian min enin min rawn fâwp ngawih ngawih a.


"Ka ring che, chuan ka lâwm hle a ni."


"Ka la thianghlim vàngin i lâwm maw?"


"Aw, a hmasa ber ka ni dáwn sia."


A va confi deuh ve!


"Ka pasal hnênah chauh ka thianghlimna hlan ka tum asin."


"I pasal ka ni dáwn alawm, Peach."


"Over-confident," ka lo ti hlak a.


"Kan la hria ang chu!" a ti duh chauh.


"Zanin atân chuan hei chauh hi i phal rih a nih hmèl,"tiin ka âwmbâwr chu a țhâm leh siah mai, a nâ tih ka sawi ngam lo. Ngatinge mipa hian hetiang thil pahnih hi an lawm ém ém ni?


Mak deuh mai chu tui deuhin ka muhìl thei nia, naktûkah a chho dáwn a, ka mut țhat theih ka rin loh teh lul nèn. A bulah hian ka thla a muang lutuk a, rilru a chàwl tlat a ni.


Zîngah erawh ka hriat loh laiin a tho bîk miah lo, ka chalah fâwpin," Hey, Peach, morning, tho ang hmiang," tiin min kuah a. Peih lo zeta mengin ka zi ar ar a.


"Che tawh suh!"


Ka zi tàwp chiang kher mai!


"Bathroom i hmang hmasa dáwn nge ka hmang hmasa dáwn?"


A awm dàn leh insûm hmél chuan ka nuih a tiza tlat a, ka khawngaih roh bawk si.


"Boss first."


"Min nuihzat suh, nangmah vàng a nih hi."


Bathroom a pan phei chu ka en reng a, a pian mawlh mai hi a hmuhnawm ka ti. Boxer chauh a ha a, a dàr, a dul leh a mal, a chhîp ațanga a ke lèr thlengin a hmuhnawm a ni tawp, a chhe lo thlâwt.


"I mit kha a tla ang e," bathroom a luh dáwn chuan rawn hawi lêtin a mit a siai zauh a, ka en tih a lo hre reng a nih hi!


Dàwra ka kalsan tùr chu ka huphurh kher mai, ka awm loh hlànin a chho tawh dáwn. Ina ka haw hunah chuan a lo awm tawh dáwn lo, ka huphurh sa. Ka lung a lêng ngawt ang, ka ngai dáwn lutuk, bâkah zànah ka bulah a mu tawh dáwn si lo. Keimah chauhin khawhar zetin ka mu dáwn tawh a ni.


"Ka lo thlah ang che aw?"


"Aih." Ka duh lo, a chhan chu ka mittui a tla ang tih ka hlau, ka kalsan huphurh dáwn em asin.


"Min ngai viau lo la."


A sual dàn hi, ka ngai dáwn tih a hre reng sia.


"Ka ngai peih lo che."


"A țha. Khawi maw helai hi," tiin ka kawr nghâwng chu a rawn khawih a, ka en dik vel tawh sia, dik lo lai a lo awm em ni?


A kut pahniha ka khabea dawmin," Țah awih loh," a ti sup a, a rawn kûn hniam zui zat a.


Tukina ka mit ka hnawih duh lo chu a tihzia e. Ka mittui tla chu hrûk a ngai si a, a dum nuau ka hlau a ni.


Buai viau mah ila ka rilruah chuan Ruatdika hlîr a awm, tluang taka a chhuah theih hrâm ka beisei. A pi nén inngeihin inhmu thiam se ka ti, a pi tak tak a ni a, thil țha lo an inkârah awm lul suh se.


Dàwr nghâktuho hi kan inhre ve țhûm a, mipa pawh hmeichhia pawh uniform kan nei vek a, keimah chauh mizo ka awm, northeast mi pawh an awm lo; mahse, min en hrang bîk chuang pawhin ka hre lo, foreigner emaw chu min ti fo! Hmeichhia ai chuan mipa kawm an nuam ka ti, dàwra thawk hi mipa ai chuan hmeichhia kan upa zâwk deuh; mahse, an fel em em vek maiin ka hria. Ka lunglêng lutuk tùr pawh  min hnèm deuh chuan ka hria.


Ina haw chu ka va huphurh tak ém! Muang chângin ka haw a, ka phone ka en a, message a lo awm.


Phûr zetin ka en nghal a, chahbi a dahna min hrilhna lek niin! Ka ngui rawih mai, thu thlum tak min hnutchhiah ve ka ring asin le!


Ina ka luh chuan a ruak huaiin ka hria, light pawh on lo chuan ka țhu vang vang phawt, ka phûr hlawl lo. Ka ngai vawng vawng mai, ka ngaih ang hian min ngai ve àwm tawp si lo. Mipa hi chu an lung a lêng ve vak ngai lo, an tleina tâwk tùr hi chu khawi hmunah pawh an hmu zêl thei.


Dârkâr khat zet chu ka chechàng peih lo, a tàwpah phûr lo zetin light chu ka on ta hrâm. Ka han hawi kual chuan dawhkàn chunga Ruatdika hand-writing ngei maia ka hming a phuah 'PEACH' ziak ka hmuh chuan makti zetin ka pan nghal a,  paper ațangin envelope a lo siam chawp a nih dáwn hi.


A rit deuh nalh mai, eng tak ni ang maw? Phûr takin ka han hawng a, pawisa ka hmuh chuan mak ka ti tak zet. Eng atân nge a dah ni?


Lehkha them teah hian heti hian a lo ziak a.


*He pawisa hi a thianghlim a, i hmang thei ang. Ka ei hek ta țeuh si che a, hei hian a cover zo lo ang tih chu ka hre tho. Lo chhuk leh thuai ka tum, chaw lo ei țha tawh la, min ngaiin i mittui lo titla miah suh. E, ka thawmhnaw kha, min ngaih viau chuan i lo ha thei ang.*


Hetiang ziah kher kher, min tilunglêng daih zâwk. Pawisa chu ka dah țha a, a ziah ang deuhin a T-shirt pakhat chu ka la a, ka hnìm vang vang, a rim a la nam châk alawm.


Nizànah kha chuan kan pahnihin kan la awm dùn asin le, tu dang ngai miah lovin. Tunah chuan keimah chauhin ka awm ta rak rak chu a nih hi.


Ka va han ngai vawng vawng tak ém! Chaw ei țha tùra min tih vàng chauhin a hmingin ka ei. Zàn mut ka huphurh ta viau bawk, min kuahtu leh min duattu a awm ta si lo va, ka khua a har vawng vawng.


Lunglèn leh khawhar avànga ina awm tlawk tlawk thu awm hek suh, dàwr nghâk tùr chuan phûr fahran lo hian ka chhuak ve ziah, ka haw lam phei hi chu ka kal lam aiin ka phûr lo leh zual a, ka ning hluah hluah.


Ka phone khât, amahin min rawn phone zâwk. A chhan chu zàn lam hi a hman hun ka hre tlat lo a ni, kei chu ka hman tùr àwm hun hi a hria a,  min rawn call hun hun hi kan inbiak hun a ni mai, a pi nèn an inkâr ka zâwt hmasa ziah. A sawi țha duh lo țhìn a, ka zâwt nawn sek, a ning ngawt ang. Puitling taka awm tùrin ka fuih! Kei teh lul fuihna hian a thlen thui phei chu ka ring lo khawp mai a; mahse, min sawisêl ngai chuang miah lo.


Zan khat chu Ruatdika nu hnên ațangin phone call ka dawng nawlh mai!!! Mak ka ti lutuk ringawt.


"Hello?"


"Angel-i, ni lo, Zorini maw?"


Tu tak ni ang maw? Nutling aw a ni bawk si.


"Aw, Zorini ka ni e."


"Zorin, Ruatdika nu ka nia."


Ka hmui ka hup vat!! Ruatdika nu. Ka thin a phu dup dup nghal. Ka nihna dik tak chu ka pi chuan a lo hrilh ve ta a ni phawt mai a, ani meuhin min rawn phone ta chu a pawimawh ngawt ang, nuam lo tihna erawh ka nei nghal.


"Aw, ka nî, eng nge ni ta?"


'Ka ni' ka ti leh ringawt, a lo duh lo viau ang em? Mahse, ka ko tho tho tawh.


"Hetiang mi i nih hi ka lo ring miah lo asin, Zorin. Ka ngaina che a, ka ring em em bawk che.  Sum duh vànga hetia min bum duh mai hi mak ka ti tàwp thei lo a ni."


Țawng ngaihna ka hre lo, a sawi dik vek bawk si. Chubâkah, ka nu rual zet niin Ruatdika nu a ni kher bawk si nèn, ka țawng ngam lo.


"Neil-a boral kha ka tawrhpui lutuk che. Ani kha a fel em em a, inneih hial in tum bawk tiraw?"


"Aw; mahse,.."


"A pawi ka tihpui hle che a ni. Chhûngkaw țha tak ațanga seilian a ni a, pasal țha tak a nih ngei pawh  ka ring. Bawiha țhian țha ber a ni a, a hnênah enkawl che a tiam ngei pawh ka ring."


A dik alawm, a tiam ngei tih amah pawhin a sawi. Ka țawng ngam ve lo.


"Bawiha hian nupui țha tak nei se, fate pawh nei se tih kan duh ngawih ngawih a, a bulah hian lo sawipui ve la ka duh tak zet a ni. Hualsak chu ka nei tawh a, mi țha tak leh chhûngkaw hung tak an ni nghe nghe. Ka ngen duh che chu maw, Neil-a vangin a ngaihsak che a ni thei, chu chu remchângah lain nupui nei tùrin lo nawr ve teh ka tia; chubâkah, a pi thu hnial lo tùr hian lo fuih hrâm hrâm teh. Nang chu a țhianpa thlarau a zah vàng tal pawhin a zah chein ka ring a."


Sawi theih eng nge ka neih le? Ka dâwt sawi khân nghawng a rawn nei chho zél a nih hi.


"Aw le, ka nî."


"Ka ring che aw, Zorin. Hmeichhe fel tak i ni tih ka hria e,  Bawiha'n a rawn phone che emaw a rawn tlawh che a nih pawhin ka thu hrilh che hi lo hre reng rawh aw. Nang pawhin Neil-a ang chiaha fel pasal tùr i hmuh ngei ka ring, ka duhsak bawk che."


Kan inbiak zawh chuan a reh tlawk tlawk mai. Ka biang lum thla pap pap chu ka mittui a ni maw? A lo tla tih pawh ka hre hlei nem le.


Ruatdika pawh a haw chhohna a la rei lo teh lul nèn, hetiang thu hian min han dêng leh chu a ni a. Lunglêng  rilru hrehawma awm lai nèn chuan a inhmeh lo tak zet a ni.


Zànah chaw pawh ei lovin ka mu a, ka pum a ri rawk rawk mai; mahse, ka ril a țam hlawl lo. Ka rilru a hrehawm a, a nâ a, ka lo piang ve hi ka inchhîr leh țan ta.


Ka muthilh theih loh avángin tukverh hawngin ka dâk a, khua ka hmu zau lo kher mai, ka thaw a ti-ipik zual. Mal takin ka lo piang chhuak a, ka mal hle a ni tih hi theihnghilh ka duh a, ka theihnghilh theihna tùr ka zawng ve hram hram țhìn; mahse, ka hre reng zêl chu a nih hi. Ka theihnghilh ve dáwn pawhin hriattîrin ka awm leh țhìn.


Ruatdika hi, ni e, ka tâ tùr a ni lo a nih ka ring. Ka pi, ni lo, ka pi ti ngam tùr pawh ka ni lo, hian kei chu min duh lo sa a, Ruatdika nuin min beisei lo chiang sa bawk. Kei chu an tân chuan dâwt sawi, lem chang, bumtu mai ka ni, ka dem thei miah lo.


Ruatdika nu thu min hrilh dàn kha a fing ka ti thlâwt. Nu fing tak a ni. Min ngei leh huain a awm miah lo; mahse, ka tân chuan Ruatdika lak ațanga inthiarfihlim tùra warning dik tak ang a ni. A dik chiah bawk, ka tân beisei ve phâk chi a ni miah lo, ka pi ro khâwmtu tùr a ni lehnghal a, Angel-i'n a khâwm ve nual bawk ang a, ka tân a sâng lutuk. Min duh tih chu ka hria, duhna hi chuan a tàwp a thleng lo țhìn. Kei ve thung hi?


Ka duh tak zet tawh a ni. A hausakna leh a hmel lan dàn chu thuhran, ka duh a ni tawp. Heti tak hian Neil-a kha ka duh lo, Ruatdika ka duh dàn hi chu a ril a, kalsan har ka ti ngawt ang.


Kalsan tùr anga ka inngaih chhin ringawt pawhin ka thinlung a nâ. A na ngut ngut mai; mahse, engtin nge a nu leh a pi thu hi ka hnial theih ang le? Ka tân chuan an zahawm lutuk, ka hnial thei miah lo ang tih ka chiang.


Ni tin chuan ka hna thawhna lam panin phûr lo zetin ka chhuak, Ruatdika min lo phone châng erawh chuan biak châk zet ang tùrin ka lo chhâng ziah. Ka be châk rêng bawk a, ka ngai a, ka intihlim lui hram hram țhìn. Ka hnên ațang chuan a nu leh a pi sawisêlna leh huatna a hmu lo ang, ka haw lo ve ve bawk. An fapa/ tupa tâna țha an ngaihtuah ve loh bawk te'n, nu țha/ pi țha an ni nâng.


Inrinni a ni a, chawhma chauh thawk țhìnte chuan picnic an rêl a, kei pawhin phûr lêm lo takin ka aw ve mai. Chawhnu lamah picnic neiin zànah dinner kan ei pah ang. Rilru kam rùntu chu nei lo ila nuam deuhin ka hmang ngei ang. Țhiante'n motor an keng a, kan kalna hmun chu ka la kal ngai lo. A mawi ka ti, ka chhuak ngai lo lutuk a, ka mâwl chhuih mai.


Țhiante nui bâwk bâwk leh hlim au ri chu ngaihthlâk a nuam, pool-ah an chêng a, kei chu ka chêng ve lo. Nui chungin an chetla chu ka thlîr a, mi hlim thei tak takte hmuh leh an hlim nui thâwm ngaihthlâk chuan min tizia ve hawk.


Dinner lah chu duhthusâm, kei pawhin ka ei țeuh. Thil țûl lo ngaihtuah vak vak duh lovin tui ti takin ka ei ve, an nui pawh ka nuihpui ve.


Min thlah haw diat diat a, kei chu kan kalna hmun ațanga ka chènna a hlat ber avàngin min thlah tlai ber a, kei tih loh pakhat chiah thlah tùr a awm tawh.


Kan inmangțha fel hnu chuan zawi zetin ka kal a, ina luh ka va peih lo tak ém!  Vawiin chu Ruatdika haw hnua ka hun hman hlimawm ve ber a ni ngei ang, ka ngaihtuah lêt rauh rauh a.


"Eng thil phiangsen nge tun ang zan tlai thleng thlengin i tih!? Tunge rawn thlah hawtu che kha?"


Ka phu zawk. Ruatdika thinrim awri insûm tak si, sehchilh nak ka hria chu ka hlau chuang miah lo. Ka thinlung chu hlimnain a rawn bual a, tlânin Ruatdika chu ka kuah chawt,
 Ka mumang a ni ang tih ka hlau.


"Eng thil nge i tih sawi vat rawh!"


Ka kuah leh thei chu ka lâwm lutuk a, chhàn nachâng pawh ka hre lo.


"Sawi rawh!"


Min vin țhawt tâkah chuan ka thlah ve chiah, min kuah lêt ve miah lo a lo ni.


"Dàwra thawkte kan picnic a, eng nge i lo tih dáwn? I lo thlenna a rei tawh em?"


"Dâr 4:30 ațangin ka nghâk tawh che."


E khai!!! Thinrim loh ngaihna a awm lo a nih chu. Ka phone ka silent daih bawk si, a thinur viau pawh hi a àwm ngawih ngawih, ka dem lo. Ka hre thiam mah mah.


"Tunge rawn thlahtu che kha?" la lungawi lo tih hriat zet hian a ti leh nghut a.


"Kan dàwra mi tho. Pakhat thlah tùr a neih pawh a la chuan kha, kan pahnih chauhin kan ni lo."


La lungawi lo mah se a pawi lo. Tunah chuan ka bulah a awm leh tawh a, ka hlim leh em em tawh. Ani thinur hi chu ka thlêm thiam hrim hrim ang.


Ina kan luh hnu pawh chuan a hmelah chuan a la lungawi chiah lo tih chu ka hre thei, a luhlul poh leh ka duhna a nasa ting a ni mai.


"A pawi ka ti, ka phone ka silent daih bawk sia,  check nachâng ka lo hre lo a ni," ka ti sawk sawk a.


"Vawi eng zât nge ka lo call che pawh ka hre nek lo ve."


Ka phone chu ka en a, Lalpa leh! Vawi 102 missed calls a awm!!! Chu pawh amah vek. A thinrim hi a àwm ngawih ngawih, ka va hriat thiampui tak ém!!  Min lo nghâk ngar ngar a, min phone bawk a, kei lahin ka chhâng thei si lo.


"Ka mâwl em mai tiraw?"


Min chhâng lo chuan min en rùn a, ka nuih tlawn titih deuh a.


"Min nuih tlawn suh!"


"Awm ngaihna ka hre lo a nia. Min bêng pawp mai ta che."


"Min nei rawh."


A nuin min rawn phone-a a thu min hrilh kha ka hre chhuak zawk mai.  Nupui nei tùrin a duh, a hualsak khiau tawh bawk. Chu chu kei hi ka ni lo, mi țha tak leh chhûngkaw hung taka mi a ni zâwk. Kei chu keimah tê mai hi ka ni mai, chhûngkua ka nei lo.