☆RUATDIKA☆ - 29

☆RUATDIKA☆- 29 By Dingdi Pachuau


A ri no chawk mai a, nâ a ti chu a râk țhawt bawk. A na ti  indawm lai chuan ka kal pèl a, ka thawmhnaw chu lain kawngka lamah ka tlân nghal.


Min rawn man hman leh hrâm, ka samah țhãmin hnung lam ațanga min pawm bet a, min pawm nghet kher mai. A thinrim tawh bawk a, a țawng nawk nawk mai. Min pawm bet mai pawh ni lovin a kut chuan min țhâm tel pah a, a na kher asin, ka kawr hâk a lo panin a thêmhlêm si a, a pawt chhe hialin ka ring.


Ka tâl chiam a, min thlah duh miah lo. Eng țawng nge ka hriat loh hian a râk nawk nawk a, ka hmaiah a bêng țhuai a, a thîp țhawkin ka hria. A na lutuk, hun remchâng a hmuh veleh min fawh a tum. Ka ten lutuk a, ka thin a rim tawh bawk si, a ngalah chuan ka pheikhawk chang ve deuh tak chuan ka theihtâwp tak meuhin ka tlawh ngheng mai a, min thlah chiang hle, a tlu thla hnawkin ka hria.


Step-ah ka tlân thla dàwr dáwr a, min rawn ûm zui ringin ka tlân char char. A him chin, ka in luah bul  ka thlen hnuah chauh ka ding ngam, ka kawr chu khùr dar dar chungin ka ha nghal a, ka thin a phu nasa kher mai. Ka intipachang a, ka mittui ka dang thei hrâm hrâm a ni.


"Jorin?"


Ka phu zawk! Aw ka hriatna lam hawi vatin," Min rawn hnaih hlek suh!" ka ti vîn țhat a, ka kut ka hûm ruh nghal a; mahse, Max makti hmêl zeta min lo entu ka hmuh chuan ka kut chu ka thlah dul ta riai riai a.


"Eng thil nge thleng a?! Kha, i hmui a thî a nia, i kawr te kha! Eng thil nge i chungah thleng a?"


Ka hmui chu ka hup vat a, a thî tih ka lo hre miah lo. Ka kawr hâk chu ka'n en chiang a, ka hâk dàn pawh a dik lo; mahse, ka ha țha chuang lo, inphelh a ngai dáwn si a.


"Min ngaihtuah suh, ka țha a nia."


Ka aw khùr nasa lutuk chu ka ngei kher mai.


"I țha miah lo, puih theihna che ka nei em?" a ti leh zung zung a, min rawn pan hnai a, min  ngaihtuah tak zet tih a hmêlah chuan a hriat theih a.


"Ka lâwm e, Max. Ka țha alawm, ka intipalh mai mai a nih hi. Ka luhsan mai ang che aw, Bye," tiin ka in luah panin step-ah chuan ka chho ta nghal a.


 In ka lût chiah chu kawngka ka kalh nghal rak a, ka tuihàlzia ka hre chhuak chiah bawk. Ka ril erawh a țâm lo khawp mai, ka ei peih lo sa.


Ka awm hahdam hnuah ka inbual a, ka hmui chu vûrin ka dep bawk, zanin chu chaw ei lovin mu mai ang. Ka thil tawn chu ka ngaihtuah lêt rauh rauh a, kha pa kha rui lo se chuan ka hneh lo chiang ngawt ang, Angel-i'n hre ta se, a thinrim àwm, a țhen nghal vang vang duh ang chu. Thil țha lo ber pawh thleng thei a ni si a, ka fîm khur viau a ngai tawh ang.


Ka chî-ai miah lo kha ka vànneihna pakhat a ni. Lo chî-ai ta ila, ani kha rui lo ta bawk se chuan ka chan chu a chhe khawpin ka ring. Ka ngaihtuah chian poh leh a mak ka ti, khatiang rilru a pu kha mak ka ti tak zet,  ka ngaihtuah lo thei lo. Ka lo insawn chhuak hi ka lo tidik a nih hi, kha ramhuaipa bulah kha chuan ka kal leh tawh lo khawp ang.


Angel-i ka hrilh duh ang em aw? A bialpa a duh ve em em chuan min khawih a tum a ni si a, hrilh ta ila a rilru a na ngawt ang chu. Hrilh lo mai ang, buaina a tam mai mai. Tunah hian  a chahbi kha ka la kawl a, nakinah ka hman hunah ka dah mai ang.


Ruatdika lah hi, min lo phone dáwn lo a ni ang, ka text kha a hmu ngei àwm sia, engtizia nge le? A buai viau em niang? Han call ka hreh deuh si. Message tal pawhin min rawn hrilh ve tal tùr a nia, zaninah lah pawngsual ka tâwk țêp a nia. Hre na se chuan, ni lo, hei zet hi chu ka hrilh ngam lo ang, min ngaihtuah dáwn lutuk tlat.


Muhìl thei lovin ka meng reng a, ka ngaihtuah lêtin ka hlau tulh tulh mai. Ka chunga a thil tih tum kha lo hlawhtling ta se tih mawlh ka ngaihtuah a, ka hlau leh hnuhnawh kher mai. Ka mut theih loh vàngin Ruatdika chu ka text a, naktûk zînga min phone tùrin ka hrilh a.


Ka men rei vàngin ka tho har. Dâr 7 vêla phone a rawn rîk chuan ka nui sak a, ka hmui ka hup nghal, a na lutuk. Ruatdika chuan min lo call ta nge nge e.


"Hello?" Zângkhai vah hian ka ti a.


"Zorin, ka rin i lo ang lo hle mai!"


Hei chu Angel-i a ni daih mai!!  Min call-tu pawh en lovin Ruatdika a nih ka ring ringawt kha a ni a, ring dik lo kher mai.


"Engtizia nge?"


"Hre lo der vêl suh, i lo tenawm hle mai. Ka thil chah che chhuanlama hmangin ka inah Bobby i lo thlêm vêl a."


Ka hre dik lo emaw ka ti hial!! Mak ka ti lutuk, engtin nge Bobby chuan a han thlen teh rêng ni?


"Angel, i hre sual a nih chu..."


"I thlalâk nèn lam ka hmu e, ka bialpa lo thlêm kual tùr hian tunge i nih? I lo tenawm tak zet a ni."


A aw chhuak a thinrim ém avàng leh a rilru a nat hmèl ém avàng chuan thil awm dàn ka sawi fiah thei dáwn chuangin ka hre lo, ka rilru a na kher mai. Hetiang zâwng hian Bobby khân min puh ang tihngaihna ka lo hre miah lo, Angel-i chuan mi dang a hrilh tawh ang em le?


"Angel, Bobby chuan a hrilh dik lo che a ni, chutiang..." ka sawi lai mêk chuan," Ngawi hmak rawh!" a ti tuarh a, ka phu zawk lehnghal.


"I chunga ka țhatna ka lo lantîr kha ka lo tisual hle mai, tûn hnuah chuan i hmêl hmuh pawh ka duh tawh lo, țhian atân pawh ka duh tawh lo che," a ti tuar tuar a.


Ka duh aiin a sawi thui. A thinrim lai a nia, ka hre thiam rih ang, thinrim lai chuan sawi duh loh țha zawng zawng kan sawi chhuak țhìn rêng a ni, a hnuah kan inchhîr leh châwk.


"Angel, inbengdai phawt teh."


"I lo nikhua lo ém mai, mipa dang an tam teh lul nèn, ngatinge ani, ka bialpa ber kher? Ka rilru tihnat i tum hrim hrim a ni tiraw?"


Ka ngawi reng, rilru na lo ka ni bîk lo; mahse, ka țawng chhuak thei tawh lo.


"Bobby hi vawi eng zât nge i lo thlèm tawh? Ka hriat loh pawh hian i lo thlêm nasa tawh ngawt ang chu. Ka lo hre chhuak lo hi i vànnei thlâwt, chuti ni lo se chuan ka pawt darh vek tawh ang che. Tuna ka hmuh phâk loha i awm pawh hi lâwm hle rawh."


"Vawi khat mah ka la thlêm lo!"


"Dâwt a nih chu! Dâwt sawi hi chu engah mah i ngai tawh nâng, pawisa hmuhna tùr a nih phawt chuan!"


Hei zet chuh, min deh dàn a dang zar mai!


"Angel, kha kha chu sawi tawh lo teh, pawisa pawh kha chêng khat pawh ka lâksak duh loh che kha."


"Pitari'n a pe miau che a!"


Hei leh zêl pawh a lo hria a ni maw?!! Ka pe ang, ka pe lêt vek ang.


Rilru kam nei țûnin dàwrah ka kal a, ka hmui a na bawk nèn, ka țawng tlêm khawp mai. Customers hlim hmêl pûa lo chhawn pawh chu a harsa ka ti ngawih ngawih.


Rilru thlamuang lo takin chak zetin ka haw a, kawngah hian min lo châng reu reu ang tih pawh ka hlau zo ta. Ka thin a phu dèp dép reng mai, in ka thlen hma chu ka thla a muang thei lo.


In ka thlen veleh Ruatdika ka phone nghal a, a ring char char a, min chhâng thei lo. A buai em ni ang? A ni em em tawh lo, niminah pawh min be tawh lo. Ka tinawn leh, chu pawh a ring ral țhak. Ka beidawng lo ang, amah pawhin vawi 102 lai min call kha.


Ei tùr pawh ngaihsak lo chuan ka call char char, vawi 103 ka call-na chiahah min rawn chhâng ta hrâm, ka thaw huai thei.


"Eng nge?" A aw chhuak lungawi lo ri chu ka hre chiang khawp mai.


"Ruatdik, engtizia nge ni ta? Min rawn call duh bawk si lo."


"Ka buai a ni mai."


"Tunah pawh i la buai maw? Ngatinge hetiang hian i awm a?"


"Engtin nge ka awm a?"


A awm dàn hian min tibuai tlat. Lungawi lohna a nei a, keimah vàng em ni? Ni lo se hetiang hian min be dáwn em ni?


"Ka chungah lungawi lohna i nei em ni? Engvàng nge ni ang?"


"I hre zâwk ang chu!" a ti hmuk a.


"Ka hre lo va, ka zâwt che alawm."


"Zorin, heti tak hian sum hi i lo mamawh a ni maw? Ka hnênah sawi mai tùr a nia. Chuan, mipa pawh..."


Eng nge a sawi awmzia hi ni ang le?!


"Eng sum nge i sawi chu?"


"Ka pi hnêna i dìl sum kha maw le!"


A hre sual, a hre letling dèr. Ka pi kha ka dîl lo, min pe a ni zâwk.


"Ruatdik, sum chu duh lo ka ni lo..." ka la sawi lai chuan," Ka pi i dìl tawh vàng khân em ni Angel-i sum pêk tùr che pawh kha i hnial tâk? 'Sum hi a lo ni ber lo' te kha i ti vêl a, i ti mak khawp mai!" a ti nghut nghut a.


Tukinah Angel-i, tunah Ruatdika. Ka vawiin hun hi a fuh lo thlâwt a nih hi. Angel-i ina ka kal ațang khân a fuh lo kual vêl vek.


"Ka dìl a ni lo, min pêk a ni."


"Zorin, rai i duh miah lo pawh kha mipa dang mutpui theih loh i hlauh vàng a ni em? A ni tiraw? Hmeichhe dang aia danglam bîka ka lo hria che kha ka tihsual a ni, in inang vek!"


"Kha kha ka sawi fiah thei."


"Sawi fiah a ngai lo ve. Ka buai, sawi tùr ka nei tawh lo."


A dah hmak, ka call leh pawhin  switch-off a ti ta tlat. He thil hian ka rin aiin nghawng a nei thui, Ruatdika hian a hre sual a ni, ka hrilh fiah vat loh chuan kan inkârah buaina awm dáwn tlat.


Ka call țhìn, switch-off a ti zêl si, ka beidawng ve ta. Dâr 9  a pèl tawh, inbual ila mu daih ang.


Ka pum a ri rawk rawk mai, ka tho a, apple pum khat chu ka ei hrâm, tlêm chuan a zia ta deuh.


Ka mu țha lo, ruah a rawn sûr a, ka tho leh. Ruatdika lo kal lai khân ruah kha a rawn sûr a, sunday-ah khân kan mutna pawh kan thawhsan mang lo a nih kha, nunhlui mai a ni ta. Tunah phei chuan ka phone call pawh a chhâng duh tawh si lo. A thil duh tak, min mutpui thei tawh si a, min ning ta pawh a ni ta ve ang.


Vawi khat chiah ka insawi fiah ang, a awih loh chuan a thu a ni mai. Kei chuan ka ngèn ngawih ngawih dáwn lo, hmeichhe chak lo tak chu ka ni; mahse, mipa, ka harsatna tawh hre thiam lotu chuan ka sawi fiah hnua min kalsan duh a nih chuan min kalsan rawh se, ka ngèn chiam lo ang. Min hmangaiha min duhtu chuan a lo hre thiam mai ang. Neil-a pawh khân min kalsan duh loh kha.


Neil-a ka ngaihtuah chhuah lohna a va rei ta ém! A thlànah khân an la kal țhìn ang em? Mamiteite khân ka nihna dik tak hi an hre chhuak ve  tawh ang em le? Ka hmaah hian chhûm dum hlîr mai a lo zîng ta chu a nih hi. An hmél pawh ka hmu ngam tawh lo ang.


"Neil, tuna ka hun tawn mêk hi i lo hre ve vek em? Keima insiamchawp vek a ni tiraw?" tiin tukverh hawngin ka phun sap sap a.


Ka rilru ka siam sauh sauh a. Keimah chauh hi chhûngkua ka neih a ni, laina ka nei lo va, țhian țha ka nei hek lo. Mi dang laka rilru pêk ka tum tawh lo ang. Phatsan kan nihin rilru a na duh ém mai. Mi hmangaih leh duh ka nei tawh lo ang a, mipa rêng rêng hi sex chauh duh an ni tih ka ring tawh bawk ang. Inlaichìnna leh inzawmna ka neihpui tawh lo ang a, keimah chauh ka inngaihtuah tawh ang, he khawvêl lak ațang hian ka inkhârkhip tlat tawh ang; mahse, chu chu Ruatdika hnêna ka insawi fiah hnuah chauh.


Ka ni tin hun hman chu a ngai, ka hlim lo va, ka lungngai vak chuang lo. Ka thinlung chu ka control viau a ngai, Ruatdika ka biak hunah pawh eng mah ka aw-ah lungngaihna emaw nâ tihna emaw ka lantîr lo ang.


Hun ãwl ka neih chhun zîng leh zàn lamah Ruatdika chu ka call tlauh tlauh țhìn, ka luhlul ka chhuah ve tlat. Ka insawi fiah hma chu ka call ang, a duh leh ning rawh se.


Ka beidawng duh lo, ka tilui zêl. Message pawh ka thawn nual tawh, a en ngei pawh ka ring; mahse, reply- na ka hmu lo.


A tàwpah chuan a ning ve tak tak tawh a ni ang, a chhâng ve ta hrâm.


"Ruatdik, ka insawi fiah thei a nia, vawi khat chiah ka thu sawi ngaithla hrâm rawh."


"Hello? Tunge aw?" Hmeichhe aw a ni!!


"Oh, Ruatdika number a niin ka hria a, khawngaihin, ka be thei ang em?"


"Honey, nangmah a be duh che." Ruatdika a bia a ni chiang, 'Honey' a ti deuh thlap lehnghal.


Ruatdika ngei mai chuan min rawn chhâng ta.


"I sawi duh sawi thuai rawh." A țawngkam ngaihnobei lo zet chuan min chhun sawk sawkin ka hria.


"I hnênah hian ka insawi fiah duh a ni." Ka va tlâwm vawng vawng ém! Ka hmangaih leh ka duh a nih miau avàngin a ngai tlat si, thil a hriat sual miau si a.


"Sawi fiah tùr a awm em ni?"


"Tûn chiah hun min pe rawh, ka sawi ang. Mi sual ber pawhin insawi fiahna chance a neih țhin kha."


A nui huk, a nuihzat vàng a ni lo chiang, min tih-elna vàng zâwk a ni.


"Sawi thuai teh, hun ka nei lo a nia."


Um, 'Honey' tia kotu nèn khân an awm dùn dáwn tih hriat reng, hun nei lo a inti vêl. Nia, ka tibuai rei lo ang.


"Pawisa chungchâng kha, ka pi kha ka dìl a ni lo, min pe a nih kha. Chuan, rai chungchâng ve thung kha,message pawhin ka hrilh vek tawh che, i fa a nih vànga rai duh lo ka ni lo, ka dinhmun hi min ngaihtuahpui ta che, naute nei thei dinhmunah ka la ding lo a ni. Ka thiam loh liau liau a nia, dang hrâm hrâm tùr che ka nih vei nèn."


Ka ngawi vang vang phawt a, ani pawh a ngawi tho. Tuna ka sawi tùr hi chu ka huphurh ve khawp; mahse, ka sawi ngei a ngai.


"Bobby chungchâng kha, Angel-i'n documents thla lâksak tùra min tirh vàngin a inah khân ka lût a, khua a lum vàngin ka kawr chung hâk ka phelh, kawr bân bùl tê nèn ka awm. Kawngka ka kalh ngei a, Bobby khân chahbi a lo neih ve avàngin a lo lût palh a ni maithei. Zu a in vàngin rilru sual a pu ta a niang, min khawih a tum a nih kha. Ka ngaizawng lo va, ka thlêm hek lo."


"Chu thil chu eng vànga min hrilh nge i nih?"


"I thu hriatna a dik lo a nih ka ring, ka sawi chu thu dik a ni."


A thaw hawk a," Thlalâk nèn lam ka hmu che u a, chu chu phat i tum a ni ém lo maw?" ti-el fahran hian a ti sup a.


"Kan awm dùn miau lo va, thlalâk chu ka hre ve lo a ni. Angel-i pawh khân a hre sual a ni, Bobby khân thu dik lo a hrilh a nih kha. A chàwn leh a khabe nat chhante kha zâwt rawh se, thu dik a hre mai ang."


"Kei min hrilh lovin amah hrilh ta che."


"Min ngaithla duh dáwn chuang lo a ni."


"I sawi zo tawh em? Nge țap chungin ring tùr chein min ngèn dáwn lo em ni?"


Ka thinlung natzia chu a hre lo ang, a thil sawi chuan min tina tak zet, țap chunga amah ngèn tùrin min ring a nih chu. Ka ngèn lo ang, ka sawi a, min awih lo a nih chuan sawi theih ka nei tawh lo.


"Ring tùrin ka tilui lo che, thu dik ka sawi mai a ni."


"Pawisa i mamawh em?"


Ka thinlung na tawh sa chu tihnat belh lul suh se, a na tâwk tawh viau e.


"Ka mamawh chu ka thawk chhuak ve țêk țêk e, ka pi pawisa min pêk leh heta pawisa i dah pawh kha ka rùl leh vek ang che u." Ka chapona rilru a lo ter ve at tawh, sum chu ka mamawh lo lo ve; mahse, ka mamawh chu ka thawk chhuak ve thei.


"Nia, i thawk chhuak awlsam thei ngawt ang chu!"


"Duh tâwk rawh, ka be buai tawh lo ang che. Hlim takin hun hmang la, inchhîr suh ang che."


Ka be zo chu ka thaw hawk hawk a, ka lo țang nasa viau a ni ang, ka thlan a tla barh barh thei nia. Ka țap lo ang, țah a phû lo. Ka rilru pawh ka tina lo ang; mahse, ka mittui chu a luang nguah nguah si a nih hi.