☆RUATDIKA☆ - 30

☆RUATDIKA☆- 30 By Dingdi Pachuau


A tàwp tawh, engkim a tàwp vek tawh. Min duh lotu vànga ka mittui tla chu ka hua. Ni lo, ka mittui hi amah vàng a ni lo, ka rilru a nat vàng a ni zâwk, ani zawngin mittui a phû lo.


Ani vàng mai maiin ka intihrehawm lo ang, ka nun dàn a ngai reng tùr a ni. Ka tân, ka tân chiah hna ka thawk ang, rinawm taka ka thawh phawt chuan malsàwmin ka awm dáwn chiang. Mipa rêng rêng ka hnaih tawh lo ang, thil hre chiang mang hlei lova mi hnâwl țhìntu hlauh phei chu.


Ruah sûr duh ta viau chu ka ning țan riau. Dàwr hla lo mah se, nihliap ken chhuah a ngai ve ziah a, chêt a tinuam lo tlat. Bâkah, Ruatdika rawn chhuk a Sunday ruah sûr kha ka hre chhuak ziah, ka duh lo tawp.


Max pawh ka hmu ziah, min hmuha min biak hma ngeia kalsan hman ka tum țhìn. Mi fel tak a ni ngei mai; mahse, mipa tho a ni. Ka be khât khawp mai, min hmuh palh pawhin ka nuih lui ve hrâm hrâm nain mi pângngai chung lam a nih vàngin  biak ka duh lohzia chu a man thei khawp ang.


Ka nun hlim lohzia chu pui tak a ni. Mi hlim thei tak, nuih duh tak ni țhìn kha ka nui ngai ta lo. Hna thawhnaah erawh ka nui lui hrâm hrâm, pawisa ka thawh chhan ka ngaihtuah a, ka ti hrâm hrâm a ni.


Hna ka thawhnaah ka kal a, thil țûl ka lei tih lohah chuan ka chhuak ngai lo. Inah ka awm tlawk tlawk a, ina tih theih awlsam tê ka ngaihtuah  a ngai. Rilru kal ding lutuk vèn nân laptop ka lei a, ka chanchin chu ka ziak țan ta a, a zia lutuk. Ka rilrua awm zawng zawng ka inpaih ruak thei a, ka lei lo ang tih ka hlau ta viau. Chutih rualin, awm tlawk tlawk ai tiin exer lâk dàn chi hrang hrang youtube ațangin ka download a, ka taksa tih-hrisèl nân exer ka la țhìn.


Thla a lo vei meuh chuan ka taksa rawl țhûm a dam tawh a, ka thlan ka tichhuak țha bawk nèn, ka vun pawh a lo êng deuh țan. Ka chunga thil thleng zawng zawng kha a hun laiin hrehawm hle mah se, malsàwmnaa  chantîr ka tum tlat a, intih-hrehawm nân ka hmang duh lo hi ka inchhîr lo khawp. Ka chanchin ka ziah zawng zawng pawh hi nakinah, Mizoram ka chhoh leh hunah thu thiam deuhte ka entîr ang a, mite chhiar theih tùrin ka buatsaih ang. Tu emaw pakhat tal pawhin hlâwkna an lo chhar ve mial thei asin.


Angel-i'n min rawn phone lo va, ka phone hek lo. Ruatdika kaihhnawih lam hrim hrim lak ațangin ka inthiar fihlîm hmak, min rawn phone lo va, min rawn phone nachhan tùr pawh a awm hek lo. An tel lovin khati chen kha ka lo nung ve tawh a, nun zêl pawh ka la tum.


Zirtàwp zàn ka haw chu Max chuan min lo be ding a, min be lo se chuan hmu lo derin ka luhsan ngei ang.


"Min hua em ni?"a ti ta tlat a.


"Haw nâng."


"Ka biak i hlau thei hle si."


"Nia, mipa hi ka hua che u a ni."


Min en vang vang a, a mit hmul sàn ãk chung chuan," I pawi ka sawi chuan ngaihdam ka dîl e; mahse, i hlim lo hmel hmuh hi hrehawm ka ti, mipa pahnih khat vàng chuan i nun tichhe lul suh," a ti sap sap a.


"A dik alawm; mahse, tùn atân chuan huatna hian ka thinlung a chiah hneh lutuk tawh a, ka paih chhuak mai thei rih lo a ni," ka ti ve charh charh a.


"Lungngai suh, nakinah i paih chhuak vek ngei ang. I la naupan hmel si a, huatna thinlung neia hun hmang tùr atân chuan i uiawm lutuk tlat. I duh chuan engkim min hrilh thei ang."


"Mipa hi ka ring tawh lo che u."


A nui suk a, a biangsum a lang chiang khawp mai.


"A țha; mahse, ka kawm che phal hrâm la, țhian kawm tùr ka neih loh bâkah nang pawhin i nei lovin ka hria a," a ti leh zêl a.


"Mahse, kei chuan țhian ka mamawh lo a ni."


"Keiin ka mamawh thung alawm, chuan, nang hi ka țhian ni tùr chuan ka duh bawk che a ni," a ti leh ta tlat mai.


Hnial ka tum leh lai tak chuan," Min hnial lo hrâm la," a ti leh pek a, ka thaw a ti-ipik tawp. Chutianga min ti chung chunga hnial chu ka huphurh ve khawp mai, a polite loh thlâkin a nunràwnthlâk.


"Ka lo ngaihtuah ang."


A hmela hlimna chu ka hmu thei. Nui var var pah chuan," Ka lâwm e, mi fel tak i ni tih ka hria a ni,"a ti leh a, min fakna chuan min tizak lek lek alawm le, ka nih loh dàn lutuk a ni si a.


Țhian hi ka mamawh lo, hetia mahnia awm rek reka awma thinlung natna ka neih vete pawh ziah chhuah mai zâwk hi a awlsam ka ti; mahse, Max hian ka țhian nih a duh tlat si. Kei hi chuan awm tawp a mi dang hnaih tawh miah loh hi ka duh, ka rilru tinatu mai an ni zâwkin ka hre tlat a ni.


Max nèn kan inbiak lehna hmasa ber chu  a hnu lam kârah a ni daih. Min hmuh ka hlauh vàng hian ka hêl char char, min hmuh dáwn chuan ka biru a, min hmuh theih loh veleh hmanhmawh zetin ka kal vat zêl. Kei chuan kawm ngeih ka duh lo, țhian ka duh lo a ni tawp.


"I lo haw hun ka lo châng char char a."


Ka țhenawmpa chu ni lo se chuan ka ngei viau ang; mahse, Max hi chu a ngeiawm lo a, a nui sâng reng thei a, a over lo bawk. Duk taka sawi chuan tûn hunah pawh hian ka hmu duh lo va, ka in luahah pawh ka lût duh lawk lo rêng a ni; mahse, pâwna a din reng avàngin leh kei pawh pâwna din reng ka duh loh vángin min hmu ta hrâm a ni.


"Ngati maw?"


"Thing buk hnuaia i ding reng kha ka hmu reng che. Min hmuh duh lova min hêl hrâm hrâm pawh hi ka hre tho; mahse, kei chuan țhiana siam che hi ka tum ruh tlat a ni."


Hm, mi pângngai chung lam chuan eng mah a hai lo ve.


"Nia, a dik alawm."


"Jorin, engtin mah tih che ka tum lo, țhiana siam che ka tum mai a ni."


"A țha alawm."


Nui sângin," Aw le, Zanin chu kan ințhian țan lawm nân lo lêng phawt la, ei tùr siam sa ka nei țeuh nèn, i lo lêng ang tiraw?" a ti a, naupang chhe thlèm takin min thlêm ni berin ka hria.


Ka ngawi vang vang phawt a, amah vêk chuan," Ei tùr lo ei chauh a ni mai, i tân a buaithlâk, siam chawp leh vek a ngai dáwn sia," a ti leh a. Hm, hnialna tùr ka nei ta miah lo mai,   a sawi dik. Kei ve mai hi a țhian atân min duh a nih chuan lo induh viau tùr ka ni em ni le? Ka lo chapo mah mah a ni lo maw?


"A țha e, kal ila."


Hlim zeta nuiin step-ah chuan kan inzui chho ta a, kawngka hawngin min luh hmasaktîr a, a in luah zet chu,  a tinuam reuh kher asin.


"I in chu a nuam reuh hle mai!"


"Ka lâwm e, lo țhu rawh, in tùr i duh em?"


"Um, tui vâwt a awm chuan, khawngaihin?"


Min rawn pe nghal. Ka piah deuha țhuin," I lo lêng duh a, ka lâwm hle a ni," a ti leh a, chutah," I ril a țâm tawh em? Kan ei nghal mai dáwn em niang?" a ti leh nghal zat a.


"A pawi miah lo."


A ei siam chu a tui  kher asin. Ruatdika ka hre chhuak zawk, ka duh lo kher mai. Max hian Indian foods a ngaina teh chiam lo a ni maithei,  a ei siam chu a foreign raih mai.


Ei pah chuan a titi reng a, a nui deuh reng bawk. He pa hi mipa ngainatawm tak chu a nih dáwn hi, a mizia chu a ngainatawm bâkah a polite-in  manner a hre tawp bawk si. Hnampui nge nge chu a hriat deuh e.


A țawng duh a, țawng bual bual ni si lo, fel thlarhin a țawng a, min ngaihsak thiam viau bawk. A bula awm a nuamin a hahdam tawp a ni mai.


Ka chhuah dáwn chuan," Jorin, i bula awm a nuam khawp mai,  ni dang ka hman remchàn hunah lo lêng leh hrâm rawh aw," a ti leh a, ka khawngaih roh, heti khawpa ka lèn thlahlel mai chu, min sâwm tak țâwk țâwk a.


"Teh rêng mai."


Ka chhuah chuan a lo chhuak ve zêl a, in ka luh dáwnah chuan," Ei tùr vàng khân ka lâwm e," ka ti sap a, ani pawh chuan," Kei pawh le, kan inhmu leh dáwn nia," a ti ve a.


Mut hmunah chuan ka ngaihtuah lêt a, mihring hi mahni chauha awm tùrin Pathian hian min siam lo va, mi dang nèn chêngho leh nungho tùrin min siam a ni. Kei pawh han indah hran ngial tum mah ila, Pathian min siam chhan angin țhian leh rual pâwl tùr ka lo ni. Inlâk hran chu mahni tân a lo pawi a, mite mamawh miah lova inngaihna rilrua a awm duh bâkah a mi an loh thlâk deuh tlat.


Tlêmin ka ngaih dàn ka thlâk hret hret zêl a, zîng kâra ka hmuh pawhin ka be ve ta zauh zauh. A rei deuh hnu phei chuan inbiak loh kan hlau ve ve tawh a, kan hmanhmawh deuh pawhin kan kut tal kan invai hrâm hrâm țhìn.


Ruatdika ka hmuh lohna pawh  thla 4 zet a lo ni ve ta. Ka theihnghilh hran lo va, ka hre reng chuang lo. Ka thinlung a tihnat ém avàngin ka theihnghilh thei dáwn lo tih ka hria; mahse, hriat chhuah loh ka tum ve ngar ngar tho.


Max nèn chuan kan inkàwm ngeih tawh khawp mai a, ei tùr kan neihin kan insâwm tawn a, kan hun neih erawh a inang lo țhìn ém zâwk a. Zànah a chângin dâr 11-ah te a lo haw a, zîng lamah a tho hma lutuk lo țhìn nèn, kan inhmu zut bîk thei lo.


Zirtàwp zàn a ni a, in ka thlen chuan ani chu inah a lo awm daih tawh a, ei tùr a lo siam leh țeuh mai. Kan innèl viau tawh avàngin ka țawng bawrh bawrh, ka mize pangngai kha a chhuak leh tlat tawh a.


"Max, i fel teh lul nèn, bialnu i nei lo em ni le? Nge i lo nei ru reng zâwk?"tiin ka zâwt ta phawng a.


A nui mai a," Ka mamawh hran lo," tiin min chhâng a.


"Ni lo ve, kei ang hi chuan awm miah suh. I la hmanhmawh loh chuan thuhran, nei ngei ngei ang che."


Min en vang vang a," A dik alawm; mahse,.."a ti a, a ngawi leh rih a, sawi hreh deuh hlek nei hmel a pu deuh.


Inrinni chawhnuah chuan Max nèn chuan kan chhuak dùn a, thil a hriain a titi ngaihthlâk a nuam si a, fiamthu a duh tel tho bawk nèn, kan nui nasa mai a, mite pawhin min en deuh haw hawin ka hria.


Kan kalna restaurant chu a changkãngin a nuam viau mai. Max chuan ei tùr a order a, ei tùr siam chhûng chuan an ram chanchin leh a hna thawh hrang hrang chu min hrilh a, ngaihnawm ti zetin ka lo ngaithla a.


Chutah," I chanchin min hrilh ve tawh la, kei chuan ka hrilh vek tawh che, zêp nei miah lovin," nui chung hian a ti a. Nia, ka hrilh a hun ve tawh khawp mai, hrilh tùr pawhin ka nêl ve tawh rêng a ni.


Ka chanchin ka hrilh atalângin kan ei tùr chu kan ei rei hrep a, ka puar leh puar loh pawh ka hre lo.


"I chanchin min hrilh avàngin ka lâwm e; mahse, mal deuh angin inngai tawh suh, keimah ka awm alawm, i unaupa ang chiahin min en rawh aw. Kei pawhin ka unaunu ang chiahin ka en ang che."


Nui sakin a kut chu ka vawnsak a.


"Ka lâwm e, Max unaupa."


Nia, tûn ațang chuan unaupa leh țhian ka nei ta. Ka chanchin engkim ka hrilh ngam tawh a, ka thaw pawh a veng huai. Pathianin ka tân liau liau a rawn tîr a nih ka ring, mal tak leh khawhar taka ka awm a duh lo a ni ngei ang.


Kan in luah thlen hmain kein muangchângin kan kal a, kan la titi barh barh a.


"I mi sawi Bobby chu hmuh ka châk hle mai, ka hnek châk!"


Nui var var chungin," Mipa ka ni lo hi a vànnei ka ti a nia, hmu leh ngat ila chuh!"tih pahin ka kut chu ka hûm a, boruak chu ka hnek thuak thuak a.


"A hlau ngawt ang che!"


"Min hlau tùr a ni rêng a ni; mahse, hmeichhia ka ni bawk sia."


Kan nui dùn hawk hawk a.


Thawhțan zàn ka haw ve thung chu ka period hun a thlen leh dáwn vàngin ka tai a nuam lo leh tawh a, ka thin pawh a chhe leh țan. Muangchângin ka kal a, Max in luah ka en chho a, a lo la thim khap, zanin chu a lo haw tlai leh dáwn a ni ang.


Phûr lo zetin step-ah chuan ka chho a, ka in luah chu ka en chho a, veranda-a mipa hlimthla ka hmuh chuan ka phûr leh ta sârh mai, Max chuan min lo nghâk reng tawh a nih hi. Zanin chu ei ka siam ngei a ngai ve tawh dáwn, a siam ngun tawh ém mai.


"Max, i thlenna a rei tawh em?"


Min chhâng miah lo, Max a ni lo em ni le? A nih loh chuan tunge ni ang? Bobby maw? Ka kut ka hûm ruh nghal, mi zak lo tak a ni! A hria ang, police pawh ka call mai ang.


"Max ka ni lo hlauh chu a pawi hle mai!"


Ruatdika aw a ni!!! Eng nge a lo tih dáwn? Eng mah helaiah hian tih tùr a nei lo, ka in luahah hlauh phei chuan. E, pawisa kha lo lam a tum a ni ang? A thil min leisak zawng zawngte pawh? Mi duhâm hi, ka pe lêt vek ang.


Kan inhmachhawn ràn mai.


"I dam țha a nih hmèl?"


Min zawh a ngai lo, min hmu a, hei, ka la thi lo ve. A hmel hi ka hmu duh tawh lo. Ka mit hmuhah hian rawn inlan tawh lo vang vang se.


"Pawisa kha rawn lam i tum a ni maw?"


"Eng pawisa maw?"


"Ka la dah țha thlap e, chêng te khat mah ka la hmang lo bawk."


"Max i tih kha i bialpa thar a ni ang maw?"


"A nih pawhin sawi tùr pakhat mah i nei lo."


Min en rùn a, kei pawhin zâm map lovin ka en lêt ve kal. Zàm ka tum chhin lo hrim hrim.


"Ka tel lo chuan hun i lo hmang nuam bawk a nih ka ring!"


"I ring dik!"


"I inring tâwk ta riaua ka hriat chu le!"

Tenawm mai mai.


Kaltîr nghal ka duh viau nain pawisa kha ka pai chhuak miah lo va, ina ka luh ngei a ngai dáwn, chu chu ka duh lo a ni.


"Pawisa chu ka pe ang che."


Ka lût vat a, ka kalh nghal. Min rawn zui lo ka làwmzia chuh, a pawisa min hnutchhiah, ka la dah țhat thlap chu la chhuakin kawng chu ka va hawng leh a, kawng chu ka khâr lehnghal a.


"Kha, i pawisa chu!"


A kut pawh a rawn dawh eih lo, chu mai a ni lo, a kekawr ipte ațang pawhin a phawrh lo hrim hrim.


"Nei rawh!"


"Ka mamawh lo ve!"


"Engati nge hetiang hian i awm a?"


A la miah lo ang. Chhuatah pawisa chu dahin," La ang che, in chhûng bungrua i lei pawh hi ka la rùl vek ang che," tiin ka inher vat a, ka lût leh nghal daih a.


Ka tlâwm dáwn lo, a pawisa bat pawh ka duh lo. In chhûng bungrua a leiho pawh hi vawm chhuah vek ka duh, a hmaah ngei mai hian; mahse, chu êm chu ka ti lo ang, mi sual ber anga chêt chu ka duh bîk lo, anmahni ang lek ka ni dáwn tlat!


Ka phone a ri a,  amah tih ka hmuh chuan ka phone chu hawngin a sim ka la chhuak nghal. He pa hian min phone lo ang, a biak theih pawhin ka awm dáwn lo.


A tûkah chuan fîmkhur takin ka chhuak, min lo chãng mial lo ang tih a hriat loh. Mahse, ka hmu lo ve. Tunah hmu lo mah ila, ka fîmkhur a ngai tho.


Ka haw lam pawh ka fîmkhur leh khawp. Thing buk hnuai vêl chu fîmkhur takin ka en kual phawt a, ka in luah ka en chho leh, tu mah ka hmu lo.


"Ngati nge i phone tlang theih miah loh a?"


Ka phu deuh nain ka in-control vat. Ka chhâng lo, a lam ka hawi hek lo. Ka kal dàn ngaiin ka kal reng tho bawk.


"Ka zawhna che chu chhâng rawh."


Hre lo ang hmiahin ka kal hmiah hmiah, ka hai der ve thiam ém!


Ka bânah a rawn man chawt a, kei ka vîn tuarh thung!


"Min dek hlek suh!"


A hamhaih ve deuh hlek a ni maithei; mahse, a rei lo khawp.


"I thinchhiat dànah i period leh tawh dáwn a ni maw?"


A intihre lutuk chu ka chhir pawp châk lutuk! Ka kut a thlah loh avàng chuan ka tãl vak a, min thlah ve mai bawk.


"Vawi khat tê pawh min khawih tawh suh ang che!" Ka in luah panin ka pên pâwk pâwk a, ani pawh chuan min zui leh nghal tho.


"Angel-i bialpa, i lo thlèm chu Max i tih kha a ni tiraw?"


Hm, ti hian min ringhlelin min țhen ve chu a ni si a! Mipa chu a inti ve si, thu dik pawh zawng chhuak ngam hlei lo, ka ngaisâng thlâwt lo.


Ka chhâng lo, ka theih anga chakin ka kal hmawk hmawk, ngaihven loh hi a țha ber. Min lo hre chiang lo lutuk hi a mak. E, a mak leh lo, a inhmeh tâwk chiah zâwk.


"Zorin, hetia awm hi i inhmeh ve lo a nia."


Eng nge ka inhmeh lohna? Induh tâwkna nei tùr hian hausak kher a ngai em ni? Ni lul lo ve, mi tin hian induh tâwkna kan nei thei țheuh. A neih ringin ka khawsa lo va, ka nung hek lo. Ka duh dànin ka awm ang, ka inhmeh a tih dàn angin ka nung lul lo ang, ka nun a ni, ka thu thu.