☆RUATDIKA☆- 32

☆RUATDIKA☆ -32 By Dingdi Pachuau


Ka tel lova nun hman leh a duh tawh lo, thu dik a ni ang em? Nge min lâk lêt leh a tumna hmanrua?


"Ka ring thei lo che!" Ka ring ka tikhawng ang,  vawi khata nêm nghal mai tùrin min ring suh se.


"Min ring tùrin ka tilui thei lo che; mahse, chance vawi khat chiah min pe rawh, chance vawi khat chiah ka dîl che a ni."


"Inchhîr suh ka tih che kha i hria em?"


"Zorin, ka thiam loh vek a ni ka tih tawh kha. Engkim hi siam țhat leh vek ka tum, chance min pe rawh, chu chauh chu ka duh."


Chance pe thei lo khawpa mi khawngaihna nei lo ka ni em? Mi nunrâwng leh ngaihdamna nei lo mihring ka ni ka ni em ni? Ngaidam thei lo khawpa thil eng mah tisual lo, mi fel, țha famkim ka ni em? Teuh lo, kei ngei pawh ngaihdam ngai ka nih ve tho kha. Mihring kan ni, thil kan tisual thei vek, ngaihdam ngai lo mihring kan awm em le? Pathian hnênah pawh ngaihdam kan dîl chàmchî a ni lo'm ni? Min ngaidam duh lo ta se, engtin nge kan tih ang? Ka ngaih dàn chuan mihring hian a tlêm berah, chance vawi khat tal chu kan phû vek ka ti.


"Vawi khat chiah chance ka pe ang che, ngaihdam ngai ve tho ka nih vàngin."


"Ka lâwm e, vawi khat chiah a ni ka mamawh chu. Ka tibeidawng tawh miah lo ang che, ka tiam e," a ti sup a, a hmél hi ka khawngaih.


"Pawisa hi chu la ang che. Chuan, vawi khat mah Pathian hmaah tih loh chuan țhingțhi tawh ngai suh."


Ka lungawi loh a hlauh vàng nge ka hre lo, pawisa chu a la ta. Ka khawngaih thut, heti taka a tlâwm ka hmuh hian hrehawm ka ti lutuk, mipa inla pà ve tâwk tak a ni si a.


Awm khawtlai chu a tum bîk lo a ni ang, ka lam panin a bân a phar deuh zuau a, a tàwp leh chiang khawp mai. Za lo zeta nui suk chungin kawngka lam chu a pan ta nghal a.


Ka en zui duh lo, ka ko lêt mai ang tih ka hlau. Kawng khãr ri khap ka hriat hnuah chauh ka hawi chhuak a, ka mittui a tling pam mai.


Minute 5 vêl hnuah ka kawngkhàr a lo ri leh a, a lo lêt leh em ni? Ni lo, a lo lêt tùr a ni lo, kawngka pawh ka la kalh hlei nêm, ka mittui a hmuh hlauh phei chuan...


"Jorin? I țha em?"


Max a ni tih ka hriat veleh chuan," Max, lo lût rawh," ka ti a, ka mittui chu ka hru hul nghal a.


A lo luh chuan min en vang vang a, za lo deuh hian ka nuih sak a.


"I țap lo tiraw? Eng nge chanchin?"a ti var a.


"Chance pe tùrin min ngèn a."


"Chuan?"


"Ka 'aw' ta mai. Max, ka tisual ang em? Ka khawngaih lutuk a, bâkah, ngaihdam ngai vek kan ni alawm tiraw?"


Rawn kal hnaiin min rawn kuah a," I tidik chiah alawm, hlim taka in awm dun leh hi ka ring tlat, ka duhsak bawk che. I hlim hmél ka hmu thei țan dáwn tawh e," a ti sap sap a.


"Max, ka hlauthâwng tawh a ni, Ruatdika hi rin ka duh lutuk; mahse, a hma ang bawk khân lo awm leh ta ila?"


"I ngaihtuah thui lutuk a nih kha. Hma hun hi ngaihtuah loh tùr ka ti lo; mahse, hlauthâwng rêng rênga hun hman tùr a ni lo, tûn hun zêl hi hlim taka hman dàn ngaihtuah zâwk tùr, chutiang chu mi fing an ni ngai."


"A nih, nang chu mi fing i ni tihna a ni maw?"


A nui hak hak a.


"Hlim zêl hi ka duh țhìn a, thil hlimawm lo lam hi ka ngaihtuah duh ngai lo. Nun a tihchhiat duh bâkah mi hrisêl tak nih a har alawm. Chuvangin, hlim hi tum tlat tùr a ni."


Ruatdika chu a reh ta vang vang lawi a, ka hre thiam lo kher mai. Chance pêk chu reh vang vang tùr tihnaah a ngai em ni ang, dâwt min hrilh chu a ni ém lo maw? A number lah ka nei tawh si lo, ni lo ve, nei pawh ni ila ka be hmasa dûk dûk dáwn lo. Chance petu zâwkin biak hmasak dûk dûkte chu, ka ti lo tawp ang.


Max pawh chuan min zâwt ãwl lo mai a, a ni rêng a, khami zàn a haw hnu ațang khân a hmel che eih leh a chanchin hriat tùr a awm miah lo tlat a ni.


Hm, min tihder a nih hi. Kei pawhin ka bum a, min bum lêt ve ta a nih hi. Phubâ a la ve ta; mahse, ka tuar dam thei mai ang. Ka tisual leh tawh lo ang, mipa rêng rêng ka ring leh tawh ngai lo ang. Bumna ngaiah min bum nawn tawh lo khawp ang, ka rilru ka siam sauh sauh a.


Thla kal ta zawng zawngah khân a tel lo leh amaha rinna nghat thei tawh lovin hun ka hmang a, tunah pawh hian a tel lo thovin hun ka hmang alawm le, harsa ka ti lo ang. Tûn ataka harsa tih tâk viau thu a awm lo.


Mahse, harsa chu ka va tiru si ém! Amah ka beiseina eng chuai tawh, thim deuh mup kha tlêm têin a lo êng leh deuh țan a ni a, tunah hian a thim leh țan ta. Nia, a thim tùr a ni, engtikah mah a êng leh tawh lo vang.


Zawi zetin kawngah chuan ka kal hnang hnang a, ka va khawngaihthlâk si ém! Beiseina siamsakin ka awm te te a, paih bosakin ka awm leh si. Mahni inkhawngaihnain ka khat a, ka mittui a lo hnai leh a.


Step chho kal hi ka va ning tawh tak ém! Tuna ka boruak tawn mêk nèn phei hi chuan ka hnê tak zet a ni, in reh raiha mahnia chêt leh rak rak a ngai dáwn si, mu leh tawp mai ang.


Eng emaw ni ka pal a, ka harh zawk mai. Ka lo hmu miah lo niin! Ka en chiang a, luggage lian ve tâwk tak a ni! Ka ta a ni miah lo, Max dah a niang. Ka hawi kual a, Ruatdika ka hmu ta chiah, makti zetin ka en hû a.


"Eng nge i tih?"


"Ka rawn luh khung dáwn che!"


Eng maw?! Min kalsan hnuah min rawn bum leh a tum maw? Teuh lo mai.


"Fiamthu suh, min kalsan rawh, ka ring lo che!"


"Zorin, heta ka lo kal zàn, a tûkah khân ka haw chho a, thil tifel tùrin. Rin aiin hun a duh rei a, min hre thiam rawh, ka hman veleh ka lo chhuk a ni."


"Min phone thei reng alawm, ka ring miah lo che."


"Ka try nasa lutuk, number i thlãk a niang ka ti a."


Ni dáwn tak, ka thlâk daih alawm. Chu pawh ni rêng rêng se.


"Chu pawh ni se..."


"Zorin, chance vawi khat kha bawhpelh ka tum rêng rêng lo asin, ka han rei viau avàngin hrehawm ka ti, phatsan chea bum che ka tum lo."


A ni thei tho. Chanchin min rawn hrilh thei tawp nâng, a buai ve thei tho a, a pi leh a chhûngte lakah pawh.


"Eng atân nge hei hi?"tiin  luggage chu ka kâwk a.


"Ka thawmhnaw, ka rawn luh khung  dáwn che ka tih tawh kha."


"I ti tak tak lo vang?"


"I hre mai ang!"


Pâwna din reng thu a awm si lo, in chhûngah kan lût ta poh a, awm dàn min ti thiam lo, ka zakin ka lai deuh lek lek nia.


"Eng tikah nge i chhoh ang?"


"Ka chho dáwn tawh lo."


He pa hi, a ti tak tak thei lo ang.


"Ei tùr ka lo siam ang e aw." Chhâng lovin ka thlîr ringawt. Ka bulah hian awm ve tak tak a tum em ni ? Ni lo ve, chhûngte enkawl tùr a nei, pi pawh a nei a, sumdàwnna pawh ani lo tuin nge enkawl ang? A theih loh. Ka lu ka thing nar nar a.


"I ti tak tak lo tiraw?"


"Ti tak tak e."


"A theih loh!"


"Ka kalsan tawh dáwn lo che, ka mit hmuh ata hi khawiah mah i kal bo ka phal lo ang bawkin i bulah lo khawiah mah ka kal tawh dáwn lo."


"I pi i puih a ngai."


"Ngai nâng, tunu fel tak a nei alawm." Ka hriat sual nge, a ti-el riaua ka hriat chu le!


"I nu leh pate pawh i enkawl an ngai tho."


"Nang hi enkawl che ka duh ber alawm, chuan, min enkawl ka duh bawk."


Ka ngawi leh ta, puih zai pawh ka rêl lo. Thil awm dàn chu ka ngaihtuah kual a.


"Ngaihtuahna sêng vak vak lo khân hei, lo ei rawh, i ril a țâm tawh ang."


A thil siam rim chuan min ko khawp mai. Ka hnar phal lo, a ei siam ka ei lohna a rei tawh ém asin.


Min en vang vangin," Thil i ei țhat loh chuan nichina step-a i rawn kal chho hnawng hnawng ang khân i kal rêng ang," a ti sup a.


"Ka ei țha bawk, chuan, exer ka la ziah bawk aw."


A kut a bêng a, min tiphu zawk zui.


"A va țhain ka va duh ém! Kan pahnihin exer kan la thei tawh dáwn a."


"I ho, min tiphu zawk alawm, naupang chhia ang mai."


"Khatia i'n men kual vêl khân i chhe miah lo."


Ka nuihza ka insûm hrâm hrâm. Ka la nui dáwn rih lo, zanin ka hrem ang a, naktûk lam chu naktûkin hril rawh se. Zanin chu nui hmél a hmu dáwn lo.


"I ei tui em?"


"A zia ve reng."


"Tui ti vak lova ei chu i nih loh kha, kha i ei zo deuh vek tawh a nia."


Ka bowl chu a ruak deuh vek tawh! A tui ém a ni, ka la kham lo!


"A siamtu ka khawngaih deuh vàng a nih hi aw."


"Ka lâwm tho tho e, i ei duh tal a."


Sil tùr a sil leh thlap, keiin dawhkân ka lo tifai thung.


"I țhenawmpa hi a lo haw tlai țhìn em?"


"A chângin."


"A fel ngawt mai."


"Fel e, mipa dik tak a nih hi."


A nui hawk.


"Eng nge i nuihzat a ni maw?"


"Teuh lo, a zia hi a puitling ka ti alawm."


"I tluk teuh lo."


"Um, ka tluk lo tih ka hria e. Ka awm loh chhûng zawnga a lo enkawlna che leh a lo ngaihsakna che zawng zawngah làwmthu ka la hrilh ang."


Teh duah a.


"A fel asin."


"Ka hria alawm. Hmeichhe ngaihzawng a nei ngai lo a ni tih hre chhuak lo ila chuan ka thîk ngawt ang!"


A hria!! Engtin nge a hriat le?"


"Engtin nge i hriat a?"


"Ka hre mai maw le."


"Tunge hrilh che?"


"Ka sava te reuh téin."


A lo nih tak chu, min hrilh duh lo vei a, ka hrem khawp ang.


"Ka awm loh chhûng khân min lo ngai em?"


"Ngai lo."


A nui hawk a.


"Dâwt sawi i duh tawh lo emaw ka ti."


"Dâwt a ni bawk lo."


"Kei chu ka ngai che, ngaih loh che erawh ka tum ngar ngar."


Ka awih tho, ka awih lo phal lo.


"Ngahnge ka sawi i awih duh loh ni? Ka thu sawi kha rin ve mai tùr a nia."


"Nia, rinhlelhnain min chiah hneh lutuk vàng a ni."


"Mi i ring chhe ve hrim hrim a nih kha."


"Ka thiam loh vek a ni."


Sawi tùr a bo! Țawng lova ngawih reng lah chu a laihthlâk ka ti riau.


"Bobby kha ka hnek asin!"


E khai!!! Mi kutthlâk hi  chìn țhanah a nei mai ang tih ka hlau ta.


"Mi nunrâwng tak ang mai i ni!"


"Ka that lo kha a vànnei zâwk a ni!"


"Ruatdik!" ka ti țhat a. Mi thah lam chu sawi lul suh se, ka phal miah lo.


"Dâwta a hêk che kha ka hua alawm!"


"Eng mah pawi min khawih chuang hlei nem!"


"Engtin maw!!!"a ti a, a tho thut a, ngun zet hian min melh rùn a," Khawih che a tum a ni tiraw? Chu pa chuh, engtin nge a ngam a? Ka lo sawisa nêp deuh mah mah a ni," a ti nghut nghut a, a kut chu a hûm ruh tlat a.


"Ka ngam ve alawm."


" A thlêm che ni anga a sawi kha dâwt a ni tih chiah a sawi a, khawih a tum che tih min hrilh tel lo a nih chiah chu! Chu pa chuh, ka hmuh leh hunah..."


"Ruatdik, engtin mah ka awm lo, eng pawi mah a thleng lo tak tak. Theihnghilh ka duh, sawi tawh suh."


Ka kut a rawn vuan chat a, a insanmarzia chu ka hre thei. A thinrim a insûm nasa ngawt ang.


"Zorin, ka tihpalh tak zet."


"Hun kal tawh a nia, theihnghilh ang."


"I chungah thil țha lo thleng ta se, engtin nge ka awm ang?"


A aw chu thunun tum hle mah se, a khûr deuh tih a hriat tho.


"Eng mah a thleng lo ang."


Min kuah thut a, nghet zetin min kuah. Ka thaw thei lo țêp.


"Ka kalsan tawh miah lo ang che, keimah vàng a ni."


"I thiam loh a ni lo."


"A ni, ka thiam loh vek. Ka inhaw tak zet a ni."


Rei tâwk tak min kuah hnuah chuan min thlah, kei chuan ka kuah lêt miah lo, zanin chu ka lo intiam tawh tlat, ka hrem dáwn.


"Min kuah lêt ve miah lo, ka tihlauthâwng zo tawh che a ni tiraw? Min rin leh theih ngei tùrin ka bei ang."


Ni lo, hrem ka tum vàng a ni zâwk.