☆RUATDIKA☆ - 36

☆RUATDIKA☆ - 36 By Dingdi Pachuau


Tlai lam chu keimah ngeiin eirawng ka bâwl ta. Ka nu pawh ka bulah chuan a lo awm ve tho a, siam tùr leh siam dàn tùr ka zâwt vek thung. A chhan chu chhûngkaw hrang hrang hian ei kan siam dàn, kan duh dàn leh kan sâwngbàwl dàn thlengin a inang lo vek tlat a, ka thu thuin ka siam duh bîk lo.


Ka nu leh pate bulah hian Ruatdika hi a țawng duh vak lo a nih hi. Nge ka pa chunga a lungawi loh deuh vàng ni ang?


"I pi pawhin in lo chho tih a hre tawh a, hun remchângah tlawh ve ula a țha ang," ka nu chuan a ti a.


"Ka tlawh dáwn lo."


Ruatdika chu ka melh vat a, min en lovin a chaw chauh chu a lo melh a.


"Bawiha, engtizia nge hetiang hian i awm tlat a?"


Nuam lo ka ti nghal rum rum mai. A pi nèn an inkâr hi keimah vànga ințan chho vek a ni si a, ka nu leh pate pawh hian an hre vekin ka ring.


"Tunu a nei alawm, min mamawh lo ve."


"A tupa i ni alawm."


"A tupa ang pawhin min en tawh lo, kawng engkimah kei aia rin zâwk tunu a nei alawm."


Ka pa chuan," Bawiha, tlawh chu a sualna a awm hlei nem. I pi a ni a, Angel-i awm tho mah se, thil engkim lo buaipui hmasatu leh a rinchhan tak meuh zâwk țhìn i ni a, hun remchângah in tlawh ngei dáwn nia," a lo ti a.


A ngawi reng a, hrehawm ka ti. Kan boruak chu a uap churh, siam țhat dàn a awm ang em? Ka pi tlawh chu kei tak hian asin huphurh ni, Angel-i a lo awm ngei dáwn bawk si.


Mut hmunah chuan a ngawi rùn reng a. Ka biak pawhin min chhâng tawi khawp mai, zangthalin a mu a, in chung lam a melh rân.


A áwmah ka kut nghatin," I lung phû a rang mah mah a nia aw. Ka chungah lungawi lohna i nei a nih chuan sawi la," ka ti a, a hlim loh chuan hlim a har, nuam ka ti lo.


"Ka tlawh dáwn lo."


Ka nu thil sawi khân a la tilungawi lo a nih àwm hi.


"A vâwt ka ti a nia, min kuah teh."



Muangchânga inherin min en rùn phawt a, chutah," I hmel hi chu a țha a ni tiraw?" a ti sup a, min rawn kuah nghal sat sat a.


Ka nui hak a," Ka pasal tluka țha hi an awm lo, ka vànnei tak zet a ni. A lungawi loh pawhin a țha tho," ka ti sap sap a.


"Min tihlungawi tumna hmanrua a ni thei ang em?"


"Ni pah tho, thu dik a ni tho bawk a."


Ka hmuia fâwpin," Ka lungawi loh lai ber pawhin ka bula awm tùrin ka duh ber che, nang chu thil dang zawng zawng aia ka thlan kha i ni miau a," a ti sar sar a, a mal sei zet chuan min khan nghal a.


"Ka lâwm hle rêng a ni, kei chu eng mah ni lo leh phû lo ngawih ngawihtu che ka ni sia."


"Induh tawn tùrin phû leh phû loh a awm lo."


A kut lum țha zet chuan min chûl hliau hliau a, a hnu deuhah chuan min chûl riak riak ta thung. A hmuiin ka hmui a kalsan lo va, kei lahin a fawh kham tik ka nei bawk si lo.


A taksa lum ham ham nghen hi nuam ka ti, rei lo te hnuah chuan vâwt pawh ka ti ta vak lo. Kan puan sin lah a luam nuam bawk si, ka ke hmâwr hit thlar pawh chu a lum țan a.


"Vawt hi i ti ve thei bawk sia tiraw?"


"Min kuah lum tùr i awm a, pawi pawh ka ti vak lo."


Min khanna a mal sei zet chu chêt sawnin ka veilam mal chu a chawi kâng a, amah min khantîr a.


"Zanin chu uar deuh takin aw ni ang, naute i pai ngei ka duh tawh bawk sia."


A kut chuan min chûl riak riak reng a, ka thâwk a dik lo țan. Kan inmelh ràn mai a, ka danglam țan tih chu a hre khawp ang le.


"Ka kham thei lo che a nih hi tiraw?"


"Kei pawh ka ni tho."



"Mutkawr te tak tê chauh ha tawh țhìn teh?"


"Ngati? A vâwt ve tho bawk sia."


"Hlih a buaithlâk. I vun nêl thep si thlapa mut ka duh alawm."


Ka kawr chu ka hlîp a, vâwtin ka taksa a man er er a, ka vun a bâwl țak țak mai. Ka hlih zawh veleh kan puan sin lai chuan ka inkhuh leh vat a, a lum leh ta ham ham mai.


"Chuan, bra hi a hnawk viau bawk."


"A dang sawi sèl tùr a la awm em?"


A haw kher a ni ang, ka mal a țhâm salh, a na kher asin. Chu mai duh tâwk lo chuan ka âwmbâwr a'n țhâm leh salh bawk, a natzia mai chuh, ka țê țhawt mai.


"A  naaaaaaa!"


"Bengchheng viau lo teh, ka pate'n an hre reu reu ang che."


A na lutuk ringawt.


"Mi sualpa!"


Ka inlet a, ka hnungchhawn ta daih. Hrilhhai viau rawh se, ngatinge a țhàm vak kher ni? A na ve tho asin.


Min rawn si leh nghal vat.


"I titau elo?"


Ka ngawih reng vàng chuan," A na viau em ni a?" a ti sup a, ka nghâwng chu a rawn nûl zui zui a.


Ka chhâng lo ang, min thlêm rawh se.


Ka beng kâwm a rawn fâwp a, ka mûr iai iai, ka hmui ka pet fan fan a.


"Peach, ka tihpalh. Țhàm nat  viau ka tum miah lo, ka thâ i tiza thut a."


A kut chuan zei zet hian min rawn chûl chho leh dan dan mai. Ka mansak chat a, a nghet thei ang berin ka chelh bet tlat a.



"Peach, min hrem lo la?"


"A la nâ a nia, khawih tawh suh."


"Ka tina tawh miah lo ang, ka dìm tawh ngawt ang, min thlah la?"


A rûk têin ka khawngaih ve deuh tho. Ka thlah hnu chuan a kut chu ka âwm lamah a sawn chho zêl a.


"Fapa hmelțha tâwk siam ang."


Ka nuih a tizâ. Fa a awt si a, kei pawhin rai thuai chu ka duh khawp mai, kan thu lohna ber a ni bawk si a.


Min dìm takin a che ta rêng a, ka âwmbâwr pawh a dìm ta khawp, duat takin a'n fâwp a, kei ve thung chu awm ngaihna ka lo hre tawh lo, a duh tak chu ka chungah ti thuai thuai se ka ti, ka lo nghâkhlel lutuk.


A tûkah ka mal ka'n en chu, a lo duk chiang khawp mai, a na viau lehnghal. Ka thawh pahin ka'n tauh deuh pah bawk nèn, ka hup vawng vawng ringawt.


Hna thawh tùr vak a awm lo. Machine-ah ka insu a, eirawng bâwl leh chhuat nawh a ni deuh mai. Chhuat lah chu a fai sa hi ka nâwt a ni ringawt, bàl a vâng. Tukverh darthlalang nawh fai leh furniture nawh fai a ni leh mai, chu pawh a fai hlawm si.


Zàn mutnaah Ruatdika chu ka titipui ve țhìn a, ka pi chungchâng a ni deuh ber. Kei chuan huphurh viau mah ila tlawh hrâm ka duh, ka nu leh pa duh dàn a ni bawk si a, an duh dàn zawm hi ka duh. Anmahni bumtu hi an fapa nupui atân min pawm tawh a, an thu anga awm hi ka tih tùr nghet tak niah ka ngai.


"Eng nge han tlawh chu i duh viau chhan?"


Ka ngawi deuh vang vang. Zawldawh taka ka chhàn loh chuan a thin a rim leh mai ang tih ka hlau bawk si a, a thinlung hneh thei tùr tak țawngkam ka chhâk chhuah a ngai.


"I pi a nia, i pi chu ka pi a ni bawk. Chuan, mo țha tak nih ka duh bâkah chhûngkua inngeih taka awm ka duh bawk alawm, tum ve tal la?"


"Nupui țha i nih chuan a tâwk."


"Nupui țha ka ni tihna em ni?"


"I țha lo em ni?"


"Ka țha lutuk lovin ka hria."


"Ka mitah chuan i țha ber tho."


"Ka tân pawh i țha ber. Chuan, ka pi chu tlawh hrâm ila?"


Min melh rùn rún a.


"Chuti taka i ngai pawimawh a nih chuan kan la tlawh ang chu," a ti ta sup a, ka lâwm tak tak a ni. Ka nu leh pate thu a zàwm dáwn tihna a ni si a.


"Ka lâwm e, Honey."


Meng phar âwk chuan," Engtin maw min koh a?" a ti a, ka sawi zak leh deuh si.


"Engtin mah." Ka hmui hnuai lam chu ka pet sawi deuh a, ka inthiam lo deuh hlek a ni.


"I sawi loh chuan kan tlawh lo ang."


A sual thiamzia hi chu aw.


"Honey ka ti maw le. I duh lo em ni?"


"Lo kal teh."


Min kuah vang vang a. "Ka kuah ning thei lo che, sexy, fel, nupui țha leh phûr thei bawk si ka nei hi ka inchhuang hliah hliah," a ti duah a.


"Ka pi chu kan tlawh ang tiraw?"


"Nangmah vàng chauhin."


Ka kuai kûn a, ka fâwp vawng vawng. Ka duh hluah hluah ém a ni. Min duh ve tak zet tih hriat hian nuam ka ti a, kan inkâr hi hmangaihnain bul kan țan lo pawh a ni maithei; mahse, kei chuan ani lo hmangaih tùr hi ka neih ka inring lo.


Kâr khat a ral hnuah kan tlawh ta chauh. Car-in kan kal a, ka pi in ka han hmu leh ta chu a ni a, ka lung a tilêng reuh mai mai. Kan nunhlui, bumtu ka nih lai kha ngaihawm viau lo mah se ka theihnghilh phal chuang lo ang, Ruatdika ka hriat țanna a ni tlat.


Angel-i pawh a lo awm ngei e. A hmel pawh a lo dang deuh tawh, tlêmin a thau ta deuh. A sam pawh a over tawh lo, a pângngai ta viau.


Min lo làwm viau lo nain ka intiluhlul lui tlat a. Ruatdika a ngawi tlat bawk si nèn, keima'n ka be hmasa ta a.


"Ka pi, in lo dam ţha em?"


Angel-i zâwk chuan," Pasal, a rûka neih i ngeih hle mai," a ti phawt a, Ruatdika melhin," Ka unaupa hian ka pi rosum a rawn beisei leh a ni lo maw?" a ti ta daih a.


"Angel, chutiang a ni lo. Keimahin rawn kal ka duh a, ka pi kan hmuh lohna a rei tawh sia; mahse, in lo dam țha tih a hmuh theih e," ka ti thuai thuai a.


Ruatdika chu a țhu ve miah lo, a ding tlat. A kut a kekawr ipteah a zen tlat a, a la țawng lo rêng rêng, ka pi pawh chuti bawk. Ruatdika hi ka hrilh lâwk sa diam, Angel-i'n engtin pawh min lo țawng khum mah se, engtin mah ti lo tùrin ka intiamtîr. A chhan chu Bobby kha ka thlèmah a ngai tlat a, a àn a chhe leh hle ang tih ka ring lâwk a ni.


"Nge, nangmah zâwk hian ka pi hi rawn bum leh theih i inbeisei zâwk? Ni lo ve, Zorin, fing thiam lutuk mah ta che. Bobby thlèm mai duh tâwk lovin ka unaupa chu a pi ro khâwm beiseiin a chhûngte remti lo chung i nei duh a nia."


Angel-i thu sawi chu râpthlâk ka ti a, chhàn lêt ve pawh ka duh rum rum ; mahse, ka insûm hrãm hrâm ang. Angel-i kan tlawh ber pawh a ni lo bawk a, a duh duhin lo râk ve mai mai teh se.


"Ka pi, ka thil tih zawng zawng kha hriat reng ka duh tawh lo. Inngeih taka awm hi ka duh a, thisen lamah ka pi tak tak ni lo mah la, ka ngaina ém ém che. Ka pasal pi i ni a, ka pi i ni ve tawh tho bawk."


Ka pi chuan ka thu sawi chu awih se ka ti, a awih loh pawhin thu dik a ni tho a, a pawi lo. Hrilh hriat hrim hrim pawh hi a țha e.


"Angel, sumdàwnna enkawl chu a nuam i ti bawk em?"


Ngaihnêp hmèl fé hian," I châk ve deuh em ni?" a ti phawt a, chutah," Nuam e, i lo thawk ve duh lo'm ni?" a ti leh a.


"Ka lâwm e, pasal leh nu leh pate enkawl tùr ka nei tawh a, ka mamawh tawh lo ve."


"Haha, min intihtheih khum tihna em ni? Chennai-a hna i thawh theihna chhan kha theihnghilh ngai suh."


"Ka theihnghilh ngai lo. I chungah hian ka lâwm ém em rêng a ni. Ka pi hi țha taka i enkawl zêl ka beisei a, țanpuitu i mamawh chuan kan awm reng a nia."


Ka pi chu a kuah thuak a, min melh ralhin," Ka lo hre reng dáwn nia, hna i mamawh chuan min dîl hreh lo la, ka nîte tân pawh mo țha tak ni ang che," a ti leh a.


Ka pi chuan min en kar reng a, nuam lo ka ti viau. A tupa nupui atân hian min duh lo tih ka hre ve bawk si a, a lakah chuan bumtu kha ka la ni reng tlat bawk si, a hahthlâk. Inngeih taka awm ka duh asin, Angel-i pawh hi huat ka duh lo.


"Kan haw tawh dáwn em niang?"


Kan thlen hnua Ruatdika țawng vawi khatna. Haw pawh chu a pawi vak lo, ka tlawh tawh miau a.


Ka pi hnênah chuan," Ka pi, kan haw tawh mai ang, țha takin i lo dam zêl dáwn nia, hun remchângah kan la rawn tlawh leh ang che," ka ti a, haw tum chuan ka ding ta nghal a.


"Zahna i nei miah lo em ni?"


Ka pi thu sawi avàng chuan ka kal tùr chu ka ding chawt. Ka hriat sual emaw ka ti hial, chutiang chu ka beisei miah lo, ka lo beisei sâng lutuk a ni ngei ang.


"Ka pi..."


"Rawn kal tawh suh, ka tupa nèn kan inkâr i siam țhat hma chu  rawn kal tawh suh ang che," tiin ka țawng lai chu min lo dang chat hmak a.


"Ka pi!" Ruatdika thinrim insûm tih hriat zet chunga ka pi a ko tuarh chuan  thil țha lo a ti ang tih hlauin a kutah ka chelhsak ta vat a.


"Zorin, haw mai teh, mi chhûngkaw tibuaitu dik tak i nih hi."


Car-a ka țhut luh pawhin ani chu pâwnah a la ding. Che mang lova a ding reng chuan min tihlauthawng khawp mai, a thinrim tak zet si a. Keimah vàng liau liauin an pîtu hi inhua an ni si a, hrehawm ka ti.


Car-a a rawn luh chuan ka kut chu a hmer vang vang phawt a, eng mah sawi lo mah se min tilâwm tho. Hrehawm ka ti dáwn tih a hre chiang ve tho a, keimah vàng liau liaua insûm hrâm hrâm a ni, a chungah ka lâwm ém ém.


"Ka lâwm e aw, ka chhuang teh che a nia."


"Ka insûm thei lo lek lek a ni!"


"Engtin pawhin min lo țawng khum mah se, engah mah ka ngai lo a nia. Ka tawn tùrah ka ngai a, ka rilru a hrehawm phah lo aw."


"An sawi thui mah mah."


"Hre thiam hrâm rawh, an thin a la rim ve rih a nih kha."


Kawnga kan tlàn chhûng chuan kan ngawi ta rauh rauh. Kan rilrua awm erawh a inang phian maithei bawk. Ka phone a rawn ri ta hlauh a, kan rilru kal ding lai pawh a rawn titàwp e.


Max a lo ni.


Kan chhoh hnuah pawh kan in-contact reng tho va, min ngaih thu a rawn sawi ve nasa. Nia, min ngai ve tho ang, a reh ve ruih tawh dáwn asin.


Ka pite in kan tlawh ațang chuan min duat ta sauhin ka hria. A hma pawhin min duat tho a, nuam ka ti. Ka pasal hi nei fuh ka inti a, a chângin thinchhiain luhlul viau țhìn mah se, ka tân chuan ani tluk hi an awm thei lo ang.


Ni khat chu ka nu nèn chauh kan awm a, thil țûl ka ti char char a, min be lutuk si lo va, tih tùr ka dap char char.


"Zorin, lo kal lawk teh."


Ka thil tih lai dahin," Aw, ka nu, ka lo kal e," ka ti a, ka thaw huai phawt a, ka pan chauh.


"Lo țhu lawk teh."


Inthlahrung ang reng deuh takin ka țhu a, ka bet lo khawp mai. Eng thil nge a sawi ang aw?


"Ka nu in han tlawh khân eng thu nge a lo sawi a?"


Sawi dàn tùr ka va hre lo tak ém! Ka pi hian a lo hrilh tawh ang em? Engtin nge Ruatdika pawh hian ka nute bulah hian a sawi ang?


"Ka nu, eng thil pawi mah a sawi lo."


"Ka nu hian a tupa nupui atân hian a pawm thei lo che a ni, keini chuan a duh miau che avàngin leh kan fapa hi kan hmangaih ém avàngin eng mah kan sawi sêl lo. Ka fapa hi a neih sum ûmin i nei pawh a ni maithei a, chu chu lo sawi ve thei pawh kan ni hek lo. Ngen duh che ka neih chu ka fapa hi a rilru tina lo ang che. A pi leh a nu leh pa meuh kalsan duh khawpa a rawn pan i ni a, a duh hle che a ni. Chu chu țan chhana hmang lovin a pa leh a pi nèna an inkâr khì awm tlat te hi siam țhat tum ang che, chu chauh chu ka ngèn che a ni."


Ka nu thu sawi chuan ka ngaihtuahna a tithui viau mai. Ka pi chuan min pawm thei lo, chuvànga thinrim pawh a ni. Ka pa nèn an inkâr khì hi chu ka hre thiam ve vak lo, in dan a phal loh vàngah khân ka ngai deuh ringawt.


Eirawng ka bâwl a, ka rilru chu pêk ka tum hram hram; mahse, ka nu thil sawi khân ka rilru a luah khawp bawk si. Alu ka kan hmui huam chu ka hnê thut, ka pum a rawn inlet but but maiin ka hria. Ka pum a țha lo deuh a ni ngei ang.


Alu kan rim mawlh chuan ka awm a tinuam lo, ka pum a tino nghulh mai. Hnâr hupin ka vil a, a nuam fahran lo.


Zanriah kan kîl pawhin alu chu ka bul lam hnaihah pawh ka chhawp duh lo. A rim ka hriat fuh deuh phei chuan ka hnârin ka thaw lo tawp. Ka chaw ei pawh a titui nek lo.