☆RUATDIKA☆ - 37

☆RUATDIKA☆ - 37 By Dingdi Pachuau


"Zanin  kha chaw i ei tlêm riauin ka hria."


A dik, tunah pawh hian ka ril a țâm lek lek a ni.


"Alu kha ka hnê a."


"Nangma siam a ni lo'm ni?"


"Ni e."


"Siam loh mai tùr alawm chutiang te chu."


Alu sawi ringawt pawh chuan a rim hre theiin ka inhria, ka pum a rawn let leh but but a, ka hmui ka hup vat a.


"Naktûk chu ka bulah chhuak ve tawh rawh aw, ina i awm hian ka ngaihtuah deuh tlat che a ni."


"Ngaihtuah ka ngai miah lo, ka țha lutuk. Chêtah ka nu ka àwl ve thei a, zia ka ti khawp asin."


"Naktûk chu hruai che ka tum tlat tho, ka bulah awm la ka duh a ni."


Bathroom-ah ka intifai a, face wash ka hman rim chu ka tei thei ta țhak lo mai. Ka inring hman lo, ka pum let but vàngin ka uak nghal tuar mai.


Ka hmai ka la phih fai bawk si lo, hnâra thaw lovin ka-in ka thaw a, ka tifai zo thei hrâm, ka ni nghulh mai.


"I va rei ve, vâwt i ti lo em ni?"


"Ka pum a nuam lo riau."


"Engtizia nge? Engtin nge i awm? A na viau em?" Min ngaihtuah tih hriat zetin min zâwt nghal ruai mai.


"Ka luak a chhuak a, ka luak thei bawk si lo. Kan chawhmeh zîngah khan ei sual ka nei a nih ka ring."


Ka kut vawt thlar chelh chung chuan," Damdawi ei a țha mai ang em? I ril a țâm te hi a ni zâwk lo maw?" a ti sup sup a, min ngaihtuah ve khawp mai.


"A țâm deuh tho; mahse, ka ei theiin ka ring chuang lo, ka pumpui hi a chiang lo deuh a niang."


"Naktûkah entîr a ngai a nih chu. Kan entîr ang a, a zia vat mai ang. Apple ka'n lâk ang che, i ei theiin ka ring," a ti a, a tho ta nghal a.


Apple a lâk hlàn chuan Bathroom-ah ka lût leh hman. Ka lute a haiin ka hria, ka pum chu a no nghual mai, thlum lam ai chuan thûr lam ei ila a zia maithei a ni.


Apple chu ka ei a, a zia ta deuh. Ulgel pawh a rawn la lût ve ngei; mahse, ka ei lo, tui ka ti ngai lo.


Duat zeta min kuah hlù hlúin," I zia deuh tiraw? I ril țàm vàng a lo ni deuh chu a nih kha. Pum țha lo chuan tlêm tlêmin ei tùr  ei zêl tùr, ril țâma awm a țha lo," tiin min hrilh ve nuap nuap a.


"Ka pum hi ka la sawi sêl ngai miah lo asin le, a mak e."


"In lamah hian i che nasa a niang."


"Nasa lo, ka thil ei dik loh a nih ka ring."


Zîng kârah chuan ka awm a nuam lo seng seng a, ka khua pawh a sik deuhin ka hria. Peih lo zetin ka tho a, Ruatdika erawh morning walk a nei leh tawh a niang, hmuh tùr a awm lo.


"I awm a nuam meuh nange?"


"Nuam lo lo ve. I thawhna a rei tawh em, ka nu?"


Ka pasal nu bâk hi nu dang ka nei hlei nem. A chunga ka țhat phawt chuan ka chungah a sual bîk lo ang, an duh loh nih tawh hnua la sual leh phei chu, ka tum lo ve hrim hrim. Min hringtunu ang tluk zeta ka en tlat chuan ani pawhin a fanu angin min en ve mai ang. Ka pa pawhin ko bawrh bawrh tùrin min hrilh kha, ka zàwm khawp ang.


"Rei vak lo ve. Tui lum in tùr a awm kha."


Zîng kârah tui lum ka in țhìn tih pawh a hre thlap tawh, min ngaihven ru ve tho tihna.


Tui lum chu ka inthlit a, a chawhmeh kan hmui zet rim chu ka hîp lût fuh kher mai, ka pum a let nghal but. Ka uak nghal țhawt a, ka insûm hman lo.


Choka bula toilet-ah chuan ka lut vat a, ka luak thei chuang lo. Min hnawh up up nain ka uak țhawt țhawt ringawt, nawmsam loh nèn, ka tâwt țún mai.


Ka nu chuan pâwn ațangin," Engtizia nge? I dam țha lo em ni?" a rawn ti a, ka chhâng lo, ka kûn tlawk tlawk mai.


Ka zia deuh hnu chuan ka chhuak a, ngaihtuah hmèl zeta min lo enin," I dam țha em? Nimin lamah kha chuan i țha reng tiraw?" a lo ti sawk sawk a.


"Aw, ka țha. Nimin tlai deuh ațang khân ka dik lo deuh țan a, alu kha ni berin ka hria; mahse, ka ei miah si lo va. Nizànah pawh khatiang khân ka awm tawh."


"Nang hi, i ruak lo a ni lo maw? A ni thei ang em?"


Ka nu chu makti zet hian ka en a, ka rai ang maw? A ni thei ang em? Ka period a lo hun leh tawh em ni? Ka ngaihtuah a, kan inneih hnuah ka la period miah lo nia. Krismas hmain kan innei a, tunah Jan 28 a ni tawh, ka period hun a pèl tawh chiang.


"Ka.. hre...lo.!" Ka chhâng buh nuai mai.


Ruatdika a rawn lût ve chiah. Min rawn hmuh chuan a ding chawt, min rawn pan nghal.


"I hmêl chuh!! I țap a ni tih min hrilh miah suh, eng thil nge thleng?"


Ka chhàn hmain ka nu chuan," A awm a nuam chiah lo a nih kha, thu lawmawm lam ni hrâm se ka ti hle mai," a lo ti a.


"Eng chu? Zorin, engtin nge i awm? I luak a la chhuak reng em ni? Vawiin chu inentîr ngei ngei i ngai a ni."


"Bawiha, Zorini hi a rai a ni maithei."


Phâwk zet hian min en a, ka nu a en leh a, chutah, kei min en leh a, kei lah ka lo chiang chiah rih bawk si lo.


"A ni maw? Zorin, i rai maw!!! Tak tak a ni em? Nu, a ni tak tak em?" a ti ta ruai a, a hmêl chu hlim hmêl, ring chiang chiah lo deuh leh nui hmêl a inpawlh nuai a.


"Ka hre lo tak tak, ka period chu a hun daih tawh sia. Ka nuin a sawi chhuah tâkah chuan ka inring ve deuh."


"A ni ngei ngei ang. Fa ka nei ve dáwn ta, pa ka ni ve tawh dáwn, ka va lâwm tak!!!"


"Hey, a la chiang lo a nia, test kan neih hunah a chiang chauh ang."


Ka pa lo tho pawh chuan kan thil sawi chu a rawn hre ve hman a, an phî chûk mai. Heti khawp hian tû an lo awt tawh chu a ni sia, ka lo rai tak tak lo ang tih ka hlauthâwng ta hial mai.


Inentîrnaah kan kal vek, ka nu leh pain ina lo awma lo nghah bîk an duh lo ve ve a, a nuihzatthlâk zâwk.


Nau chu ka lo pai ngei e.


Ka chhûngte hlim hmêl chuan ka țah an tichhuak zâwk. An khi sâng reng mai a, an thenrual ţhate ni ngei tùr an phone kual a, an ka pawh zen ila min seh lo ang tih tùr vek an ni.


A tûkah Ruatdika'n in lama che tùr nula a rawn hawpui nghal. Ka chêt a phal lo va, a thu ka hnial a phal bawk hek lo.


"En teh, ka la rai țan chauh a, engkim ka la ti thei vek. Thla ruk thla sarih hnuah chuan ka chêt phal lo la ka hre thiam, tunah chuan..."


"Zorin, min hnial lo teh. Tûn ațang hian inenkawl țhat i ngai alawm. Naute tân leh nangma tâna țha ber tùr a nih hi, i duh duh i tithei dáwn tho; mahse, motor chuan leh step-a i kal ka phal lo, thla thum hnuah chauh motor-ah  pawh i chuang thei  ang."


"In-checkup a ngaih hunah kein ka kal ang maw?"


"Kha kha chu ka sawi tel lo, i hriat reng kha," tiin ka pum, la thêp zaih chu a fâwp zoh a.


"Mipa a ni ngei ngei ang, a hmingah eng nge kan phuah ang le?"


Nuih sak pahin," A la hma ém mai a," ka lo ti thung a. A ni lah tak a, tunah chuan a la hma lutuk.


"Lo inhmakhua lâwk hi a țha. A thawmhnaw tùr pawh naktûk ațangin lei lâwk a ngai ang, teptèr deuha chêt chu a buaithlâk. Ka va duat hleuh hleuh dáwn tak!" tiin ka pum chu a chûl hauh hauh a.


"I duat khawlo palh ang e!"


"A awl ngawt ang!"


Ka nau pai hian kan chhûngkhur boruak a tidang dáwrhin ka hria. An phûr ém ém hlawm a, tu emaw ber chhuak se, ka ei duh tùr zâwng leh ka tâna țha tùr ei tùr an rawn lei haw ziah a, ka tân tak pawh he naute hi malsàwmna a ni.


Ka han rai no chu ka haw khawp mai. Chawhmeh kan hmui leh alu hi ka ngaithei miah lo mai a, a rim ka hriat hlek chuan ka luak a ni deuh nghal mai, ka inthlahrung lutuk; mahse, ka chhûngte chuan min hre thiam khawp mai a, chawhmeh hâng leh bai an siam mai zêl.  Ka tihrehawm vek tihna a ni ber mai,  chaw lah hi ka ei thei lo khawp mai a, thei lam ka ei nasa. Ka ei theih ber a nih vàngin an chhuah apiangin an rawn lei haw ngei ngei.


Ka nuin hmeichhia a duh a, ka pa leh Ruatdika'n mipa an duh thung. Chaw ei lai hian duhthu an sâm țhìn a, naute chanchin an sawi ngei ngei.


"Hmeichhia a ni phawt ang a, a dawtah mipa chu a nei mai dáwn alawm. Fa hmasa berah chuan hmeichhia a țha ngai," ka nu chuan a ti a.


"Mipa pawh an țhat lohna a awm miah lo, kei pawh hi fa u ber ka nia, ka fel lutuk," ka pa chuan a lo ti a.


"Nu, hmeichhia i nih vàngin hmeichhia duh kher lo la, mipa duh ve mai la, kan lung a rual mai dàwn alawm."


"Bawiha, Zorini pawhin hmeichhia a duh zâwk ang, hmeichhia chuan hmeichhia kan duh zâwk tlangpui, fa hmasa ber atân chuan. A chhan chu hmeichhe fa chu nute'n an tha kan chhawr hma thei a, min pui hma thei bîk a ni."


Chutiang chu a ni an sawi țhin ni. A châng leh a hming tùr an phuah lâwk a, an duh a inang leh si lo va, hming phuah mumal lo bawkin kan tàwp leh țhìn. A hlimthlâk ve mai mai, kan chhûngkaw titi-ah naute bâkin hmun a chang lo ve.


Thla hnih a pum a, thla thum ka pai chhoh meuh chuan ka puar ve ta âk a. A mak ka ti țhìn, ka pum lo puar ta chu darthlalangah ka inen a, a sîr zâwnga dingin. Nakinah chuan lian zetin a rawn puar ang a, ka la hahpui ve ngawih ngawih àwm si a tiin ka ngaihtuah a. Inen reng chu a zahthlâk ka ti, ka pian chu mawi lo ka ti lutuk a.


Pâwna ka chhuah an phal lo va, in chunga chho tùrin step kal a ngaih bawk vàngin Ruatdika chuan in chung kal a phal lo bur, ka tlûksual a hlau tlat. A chãng chuan a over mah mah ka ti deuh a; mahse, a phal loh chu tihluih ka tum bîk lo.


Zan khat chu Ruatdika hnênah chuan," Naute pawh thla thum a tling ve tawh bawk sia, Naktûk chu Neil-a thlànah kal ila," ka ti a, min melh zawk a, hmun dang en leh nghalin," Ngati maw?" a ti sup a.


"Làwmthu hrilh pahin kan tlawh ve ang chu. Làwmthu hrilh tùr tam tak ka nei alawm, nang min pêk vàng te, hlimna min neih lêttîr avàng te hian lawmthu sawi ka bâ a ni."


"A țha alawm."


"E, chuan, ka chhûngte kha, eng tikah nge kan tlawh ve theih ang le?" tiin ka zâwt nghal a.


"Ni dáwn tak e; mahse, motor-a thui tak tlànpui che ka la phal lo."


"Tunah chuan a pawi tawh nâng."


"Pawi ang, kawng a sawt si. Naute tân a sawt dáwn lutuk asin."


"Nih, ka tân ve thung?"


"Um, i tân pawh a sawt. In pahnih tân a sawt ve ve, kan la sawi țha dáwn nia. I damdawi?"

"Um, ka ei tawh."


Damdawi ka ei theihnghilh ngai lo. Min zâwt ziah a, ei theihnghilh theih a ni lo. Ka la ei lo a nih pawhin min lâksak ziah a, ei tum loh chi pawh a ni lo.


A tûkah thlànah chuan kan kal, kal lamah pangpâr kan lei nghal a, a thlána dah tùr.


Krismas khân  Mamitei'n a lo chei a ni ngei ang, a lo la tharlâm khawp mai. A fai a, hmuh pawh a nuam.


Pangpâr dah pah chuan," Neil, i lo țha maw? Ka rawn tlawh lo rei che sia, min lo hre thiam hrâm a niang chu," ka ti sap a.


Ka ding chhuak chu Ruatdika chuan min kuah pahin ka biangah a fâwp zoh a, Neil-a hnênah chuan," Hei, mate, ka nupui hi i hriat tawh hnu tho mah ni se, ka han hmel hriattîr ang che. Ka nupui Zorinpuii a nih hi, min lawmpui ngei ka beisei. I hnêna ka tiam che kha hei, ka tihlawhtling ta asin, naute pawh kan pai tawh a, min hmu em? Ka hlim asin, làwmthu ka sawi e," a ti sup sup a.


Makti zetin Ruatdika chu ka en a, ani chuan," Neil-a hnênah hian nupui atân ka dîl che alawm, hlim taka ka enkawl tùr thu pawh ka hrilh a," a ti leh a.


"A ni maw? Neil-a hnênah hian a hnêna i thil sawi leh dìlte tihhlawhtlinsak tùrin ka ngèn bawk asin, a mak hle mai."


"Mate, ka làwm e. Fapa ka nei dáwn a, i hnêna làwmthu sawi nân i hming hi ka fapa hmingah chuan ka phuah ngei ang. Nang anga țhian țha leh fel a nih ngei ka ring nghal bawk e."


A hming inziak chu ka en vang vang a, ka rilruin," Neil, ka lâwm tak zet e, I țhianpa hi ka pasal ni tùra min pêk avàngin. I tâna ka tih theih tàwp ber tùr chu i hming daih tawh loh nân kan fapa hming atân i hming ngei hi kan phuah ang, i lo thlîr reng dáwn nia. Engkim vàngin ka lâwm e," ka ti sap sap a.


Ka nau pai hi a mak ka ti. A lian chak ka ti a, mi hi an ni ve ang em tih ka ngaihtuah fo. Ei tùr ka ei țha a, Ruatdika'n doctor min panpui peihin ei tùr chungchângah a râwn fo a, internet lamah nèn. Engkim țûl a ti a, keiin nau pai leh ei tùr ei hna ka thawk thung.


Zànah hian min beisei viau țhìn ka ring a nia, a insûm thei hlein ka hria. Ka pum a chûl loh leh a fâwp reng mai a, a châng leh ka âwmbâwr lo lian ta chu a khàl neuh neuh reng a, min beisei lang ngam chiah si lo a niang, ka khawngaih zâwk.


Zan khat erawh a insûm thei tawh lo a ni chêk ang, ka puar lang ve viau tawh a, a hrâm ve tawh tho. Chu chu a hre ve kar a ni ang chu," Doctor pawhin a pawi tawh lo a ti a," a ti ringawt a, ka lo hai der lui ve ngial.


"Eng chu maw?"


"Nupa nun hmanpui che maw le."


Nia, naute pawh a nih tùr ang a insiam zo ve tawh ang chu maw. Doctor a râwn peih bawk a, a hre zâwk daih ang.


Naute tâna pawi miah lo tùrin nupa nun chu hlimawm zetin min chenpui a,   a duhthawh thiam khawp mai a, min dìm thiam ém ém bawk. Hetiang chuan pawi a khawih phâk  lo hrim hrim ang, a insûm rei tawh si a, ka khawngaih ve tho alawm.


Saisîr zâwnga ka mu chu ka dul puar àl chûl hliau hliau pah chuan," Duata, a hrehawm miah lo tiraw? Ânu kha i mamawh ang chiahin  ka mamawh ve tho sia, min hre thiam ang tiraw?" a ti sar sar a, ka nui hak hak thung.


"Lo țhang thuai thuai la, lo chhuak thuai rawh aw. Ânu tihrehawm rei lutuk lo la, chuti lo chu i lo chhuah hunah ka bêng hlak ang che."


"Hei,  i tihlau ang e!"


"A tihrehawm rei ang che tih ka hlau alawm, a rit tawh reuh ngawt lo maw?"


"Rit vak lo ve, thla sarih thla riat a nih hunah chuan a rit ve tawh viau ang chu."


"Insem țhen theih se."


"I pai ve châk elo?"


"Châk nâng, ka khawngaih che alawm, a rihna tal kha chhâwk țhen thei che ila ka ti."


"Min duat thung alawm."


"Ka duat telh telh ang che."


"Min duat lutuk hi min duat sual vek mai ang tih ka hlau."


Ka beng a rawn seh zoh a," Mahse, zànah ka beisei zauh zauh dáwn che aw, thla hnih lai ka insûm tawh.I bula mu reng chunga ka khawih thei lo che hrehawm ka tihzia hi," a ti sup sup a.


"I insûm thei ka ti lutuk!"


"Naute ka ngaihtuah vàng chauh."


"Tunah chuan i insùm buai a ngai tawh hran hlei nem tiraw?"


"Um, doctor ka zâwt zing khawp."


"I zak lo em ni?"


"Ngati nge ka zah ang? Ka nupui i ni alawm le!"


Ni khat chu ka nu leh pa an chhuak a, eng nge an tih dáwn an sawi miah lo, ka lo zâwt miah lo bawk a. Apple ka ei mawlh mawlh a, tunah chuan ka zia lutuk tawh. Ka thil huat tam tak pawh ka haw vak tawh lo, kan nula Sangi pawhin chawhmeh a kang sar sar leh thei tawh.


"U Zorin, chhùn hmehah eng nge ka siam ang?"


"I duh duh siam rawh, ka ei thei vek tawh ang."


Chêtna tùr a tam teh chiam lo bawk a, Sangi pawh hi a âwl ve thei viau. Kei pawh ka awm mai mai peih lo țhìn a, mi dang an awm loh phei chuan harsa lo tê tê ka thawk ve tho. Exer lâk ka duh ve tho a, nakina harsa deuha nau neih ka duh bîk hlei nem.


Kitchen ațanga sitting room lama ka phei chuan Ruatdika lo ding chu ka hmu nghal, a zia ka ti tawp. Apple ka ei lai niin, thil dang ka tih lai a lo ni lo hlauh. Ka chê min hmuh chuan a thin a rim dáwn sa.


"Eu, i  lo va haw hma ve! Min ngai hman chu a ni ém lo maw?" nui chungin ka lo ti a.


"Ngai hman chiang e. Naute ka ngai tawh bawk a."


Ka pum a rawn che dat dat.


"I țawng kha a hre chiang mai, a rawn chê a nia!"


"A ni maw!!! Ka hre ve duh," tiin ka kawr chu a rawn hlîm sawt sawt a, a chêtna lai chu ka khawihtîr a, a tàwp daih; mahse, rei lo te hnuah a rawn che leh. A meng phar âwk âwk mai!!


"Mipa a ni ka tih kha, a va harh reuh tak !! Duata, rawn che leh teh, hei âpain ka khawih reng che a nia."


Thil sawi hre ve ni àwm hrimin a rawn che leh dat dat țhìn a, Ruatdika chu a nui hawk hawk reng mai. A hlim hmêl chu a hmuhnawm tak zet, thil hmuh nuam tak chu a va ni chiang ém!


"Thawmhnaw ka lo lei țeuh asin. Duata, i kawr tùr ka lei țeuh tawh a nia aw, lo chhuak vat vat rawh, ka hmu châk tawh che a nia," a ti a, ka dul che dat dat chu a fâwp zauh zauh a.


A ni lah tak a, a rawn hàwn țeuh mai!!