☆RUATDIKA☆- 39

☆RUATDIKA☆ - 39 By Dingdi Pachuau



Ka nu bula ka awm thei chu vànnei ka inti tak zet, ka pa lahin min duat bawk si. An mal chungah ka mu a, ka naupang țha leh ni maiin ka hria.


Ka nu chu a hmél a țha ka ti, ka chhùn viau pawhin ka hria a; mahse, ka pa ka chhùn zâwk ka ti. Ka nu pawhin," Kei ai chuan i pa i chhùn zâwk alawm, ani chu a lian a; mahse, i nuihin min chhùn thung," a ti a, a dik ka ti. Darthlalanga inenin ka nui chhin a, ka nu nui chu ka ang khawp mai.


"Nu, ka bulah awm reng tawh r'u aw, a nuam ka ti lutuk ringawt. Min kalsan tawh miah suh u."


Ka pa chuan ka sam chûl hliau hliau pahin," Bawihte, kan bulah i la awm ve thei rih tlat lo a ni, nang chu tunah hian mamawh i ni a, i kal ngei a ngai tawh a ni. An ko lawm lawm tawh che a," a ti a.


"Pa, tuin nge min mamawh a? Nangmahniin min mamawh ve lo em ni? Keiin ka mamawh teh lul che u nèn!"


"Bawihte, kan mamawh aia nasain i pasalin a mamawh che a ni."


"Pasal ka nei elo?!!"


"Aw, mangang takin a nghâk che, a ko reng tawh che a, i kal hun a nghâk reng tawh a ni."


"Mahse, ka la ngai che u asin!"


"Kan la inhmu leh dáwn alawm. Kal tawh rawh le, i hmanhmawh a ngai."


Ka va peih lo tak! Ka muang lutuk chu ka pain ka hnungah min nam dâwrh a, khuarkhurumah ka tla thla vawng vawng niin ka hria! A thim mup mai bawk si a, a hrehawm tak zet.


Ka va chiang lo ém! Ka hminga min ko mawlh mawlhtu an awm chiang. Helai hmun thim zetah hian tu nge min ko teh lul ang le?


"Zorin, harh teh, mawh, harh teh!"


Ka harh lo em ni le? Ka hminga min kotu chuan 'Harh teh' min ti nia. Ka harh reng si a, eng nge a awmzia?


Ka kut pahnihin chêt ka tum a, ka veilam ka chêt thei lo phawt. Ka dinglam chu tlêmin ka tichêin ka hria.


Ka hmui ka'n chêt dáwn a, a theih chuang loh. Hmuh ka duh, hmuh theih ka duh, a thim ém ém si a.


Ka meng vak a, eng mah ka hmu chuang lo. Ka meng tak tak lo em ni le? Ka men tak tak a ngai.


"Zorin, mawh, harh tawh teh."


Ruatdika aw a ni. Ka muhìl lo. Engtiziaa harh tùra min ti nge a nih le?


Ka kut dinglam chu ka chêt a, a hre thei lo. Ka theihtâwpin ka tikâng sâng a, kut ka khawih fuh chiang.


"Zorin!! I harh tiraw? Zorin, Zorin!!! I harh!! Ka va lâwm ém!!!"


Ka kut chu a hmer vang vang, ka veilam ve thung hi engtizia tiche thei lo nge ka nih?


"Han meng dáwn teh, Zorin. I bulah ka awm a nia, min han en teh."


Ka meng ta a nih ka ring, a êng deuh pup tlat! Eng mah ka hmu chuang lo.


"Ih maw, i mit kha khap la, min humuh tum teh!"


Ka khap ve ngei a, mihring hmel ang deuh chu ka hmu phuai; mahse, a fiah lo lutuk.


"Doctor, Zorini hi a harh tawh a nia, ka țawng pawh a hre thei vek! A țha dáwn ka tih kha, ka nupui hi a țha leh ang ka tih kha."


Ka mit ka khap ka khap hnuah chuan ka hmu fiah ve tial tial. Kawr vâr ha, tarmit vuah ka hmu phawt. A hnuah Ruatdika ka hmu ta! A hmêl a pawr hle mai; mahse, a la chhe lo tho. Pawr viau mah se, a hlim hmel chu hmuh a nuam.


"I va han fel tak!!! Ka thu i awih a, ka kohna che i hria a, ka lâwm hle mai. Muhìl tawh suh aw, ka ngai tawh teh che a nia," tiin ka kut chu a hûm sauh sauh a.


"Engtin nge ka awm?" Aw ri a chhuak thei lo tluk a ni, a thâm hle a, a lai vek bawk.


"I muhìl maw le, i harh duh lawk lo va, ka ko ka ko che alawm."



THLA LI HNUAH CHUAN


"Neil, mu tawh rawh aw. Âpa lo haw hmain muhìl leh la, chuti lo zawng, a lo haw hunah a tiharh leh dáwn chiang si che a, i tlei țha duh lo palh ang. I  farnu pawh a muhìl tawh a nia," tiin ka fa phìr zînga pakhat zâwk chu ka be mawlh mawlh a, a farnu Maxy erawh a muhìl leh daih tawh, mut a duh reuh lutuk a; Neil nèn chuan inang lo tak an ni.


Kei chu ka kut veilam ka la chêt țhat theih loh avàngin ka fate pahnih pawh hi ka khawih tam lo khawp mai. Fa vawi khat neihna a lo ni bawk nèn, zei loh theih tak a ni, chuta kârah kut veilam lo hman țhat theih loh nèn, ka khawr ém ém reng mai.


Ka nu leh Sangi an rim ém ém mai, keiin ka khawihpui thei si lo. Hnute tui pawh ka pe mang lo, a chhan chu an zai chhuah khân kei kha ka lâk tlâk loh a, an up dùn reng phawt a. Damdawi inah kan awm rei phah, kei pawh ka dam chian deuh thleng ka awm, a ninawm ve reng.


Maxy hi chu a fel, țah pawh a țap ngai lo tluk a ni; Neil erawh chu ngaihven a ngai khawp a, kut lum a hre bawk si. A pa hian a duh ém mai a, zànah harh se, a chang chawt mai. Ka nu leh pa pawh hian an duat ém ém khawp. Maxy erawh a ngawi ràn reng a, a țê ve ngai lo. Chuvàng chuan, ngaihsak a hlawh lo deuhin ka hre țhìn a, ka khawngaih deuh țhìn.


An hmêl a inang lutuk lo. Maxy hi a chumin a lian deuh a, Neil erawh a tê deuh, bâkah  a țahbelh zâwk. Maxy hian  hmêlah min chhùn lo va, Neil hian min chhùn zâwk. An mit mengah erawh an pa an chhùn khawp mai. Ka fate an nih vàng nge, hmêlțha ka ti dùn ém ém mai a, ka en ning thei lo.


A ni tak tak. Ruatdika lo haw chuan kan fate pahnih chu a titho leh ve ve tawh!! An muhìl hmel hi a hmu thei thlâwt lo, an bulah a mu a, an kut a vuan a, a chêt a chêt na na na chuan a tiharh zêl.


"Kan fate hi chu aw, an va hmêlțha tak ém! Ka chhuang a ni, an țhut theih hun ka nghâkhlel ngawt mai."


"An din theih hun i nghâkhlel leh ang a."


"Ni zêl ang chu, thil thiam thar an neih chuan an chhûngte kan làwm loh te'n tunge lâwm chuang ang?"


"Dik bawk si. Nih leh, ngati nge i tihharh kher zêl? Chhûngril lamah a rawn tur ut ut zêl che em ni?"


"Tur chiang e."


"Ka awih thlâwt lo!"


A nui hawk hawk a. Maxy chhaih pah chuan," Ânu hi a timak ém mai tiraw? Min zâwt te te a, a awih leh mang si lo. Hetiang chu ni ve miah suh aw," ka ngei tùr tâwk lek chuan a ti a.


"Khatiang khân ka fanu kha fuih khawlo miah suh aw."


"Ka fanu a ni ve tho, ka tel lovin a piang thei bîk lo aw."


"Thei maithei asin."


"Fiamthu pawhin sawi miah suh. Chuti lo zawng, kan fate hian chhang an nei vat mai tùr a nia."


"Awiii, râpthlâk!!!"


"Nge, a rei leh tawh viau asin."


"Thla ruk pawh an la tlin ém loh hi maw."


"Doctor pawhin 'a pawi lo' a ti alawm."


Phâwk zet hian ka en a," Doctor i zâwt leh sî sê maw?" ka ti a, a tizahthlâk roh e.


"Thil engkim zawh hi  a țha alawm, hriat loh chu zawh zêl tùr."


"A zahthlâk e,  râwp a ti ngawt ang che."


A nui hawk hawk. Ka nu a rawn lût a, an pahnihin an lo harh tih a hmuh chuan," Aw, in lo harh leh tawh a ni maw, ka duat te u. I pa a lo haw hi chuan in muhil rei thei lo chu a nih hi maw, Maxy  Bawihtei kha ka lo pawm dáwn em niang?" a rawn ti a.


Ka nu hian Maxy hi a chang deuh a, Neil erawh hi chu mipa chan deuh a nia, an pawm reng mai a ni.


"A, ka nu, a țap chuang lo va. Tihian, awm mai mai se, i hah tawh ém kha, min tibuai lo ve."


"Ka hah miah lo, ka tûte tân chuan hah pawh ni ila, ka pawisa rêng rêng lo a nia, ka pawm leh châk tawh hrim hrim bawk," tiin Maxy chu a pawm ta nghal a.


Neil erawh chu a pain a kuah a, a pa chu a en kar reng mai a.


"I têt lai a chhùn a ni ngei ngei ang, sual reuh bawk si," ka ti hlak a.


"Duata, Ânu hian sual reuh a ti che a nih chu, i sual lo tiraw? Duat i duh vàngin pawm i ngèn ringawt tiraw? Aw, a dik chiah. Duat a duh vàng a ni alawm, ka duat ém asin," a ti sup sup a, Neil lah chuan a thiam dàn ang angin a pa lawmna chu a lo chhàwn ve a, a lawmawm reuh tawp.


"Lal-âpa, eng tikah maw Max thil rawn thawn chu a lo thlen dáwn?"


"Naktûk chawhnu lamah."


Kan fanu hi Max hming chawiin Maxy kan ti a, a la làwm ém ém zui. Mipa hming hmeichhe hming atâna hman chu remchâng lo viauin lang mah se a lo remchâng phian tho. Kan fapa lah Ruatdika'n Neil-a thlarau hnêna a lo tiam tawh angin a hming kan puttir a; mahse, 'Duata' tiin kan ko lâr ta  zâwk chu a nih hi.


Kan in chhûngah hian Angel-i leh ka pi hming a ri khât khawp mai, ni lo, a ri ngai lo zâwk. Ka chêtsual chhanah khân Ruatdika'n Angel-i a puh tlat a, ka dam deuh hnu khân ka tlu sual ve palh mai a ni tiin ka hrilh nain a awih miah duh miah lo. Kan ina an pîtua lo lèn pawh a phal lo va, Angel-i phei chu a hmêl a rawn inlan lo tùrin a hrilh ni àwm a ni. A thinrim ém a, eng mah a sawipui theih loh. A bula ka pî leh Angel-i hming sawi rîk chuan a kalsawn nghal loh chuan a țawng ngai lo. Nakinah ka dam țhat hnuah ka la sawipui chhin ang.


Kan fate hi kan chhûngkaw hlimna an ni chiang alawm, buaipui ngai viau țhìn mah se, hlimna min thlen hian a bùk hneh lutuk a, buaipui lam hi chu a kâng nawl nawl zél.


Ka kut pawh a dam chho zêl a, doctor-in dìm tùra min tih vàngin ka la hmang rim lo a ni mai. Zawi muang chuan ka hmang thei a, naute damdawi leh sahbawn leh thil rit lo tê tê chu ka chawi thei tawh, naute erawh ka bân veilam chuan ka la kuah ngam lo.  Ka hnute tui an ring lo bawk a, an hnêk tùr chu kan siam chawpsak mai țhìn.


Max thil rawn thawn chu a cute hlawm tawp. Hmeichhe naupang thil a tam zâwk a, Neil tâ tùr pawh a awm nual tho. A changkâng reuh hlawm bawk sia, a insêng nasa ngawt ang.


Mamitei pawh vawi 2 a rawn lêng tawh. Damdawi ina kan awm laiin a rawn kal a; mahse, ka nikhua loh lai kha a ni a, ka hre ve lo. Inah a rawn kal leh a, Neil chu a làwm lutuk, a unaupa a hre chhuak pawh a ni ang. A awm rei hman lo va, lo lèn leh thuai a tum thu a sawi. A hnu rei vak lovah a lo lêng leh, a puin a hmuh ve châk avàngin thla a la deuh chuai chuai reng a, a châng leh video-in.


Kan khum hi zau viau mah se, naute hi kan mutpui miah lo. Ruatdika hian a duh lo tlat, min ngaihtuah vàng a ni pakhat a, chubâkah, mut hrantîr a lo tum ve sa hrim hrim bawk. 'An têt lai ațanga nu leh pa rinchhan lova an awm hi a țha' zu ti mauh a. Kan khum bulah, an khumah an mu ve mai. Kan mu țha thei chuang hlei lo va, kan ngaihven reng tho avàngin.


Zan khat chu naute pahnih mut tawh hnuah ka titipui a.


"Thil ka zâwt ang che aw."


"Yes."


"Thinrim lo la?"


"Umm."


Ka huphurh ve det tho. "Engati nge ka pi hi i huat tlat a?"


A ngawi chiang ta khawp mai.



"Ih maw, thinrim lo la ka tih tawh kha."


"Sawi tawh suh."


A taksa lum ham ham chu ka nghèng ar ar a, zawh zawm zêl nge dik ang a tàwp hmak? Ka zâwt zawm zâwk ang, ka sawi pawp ta sa sa.


"Kan han lèn pawhin min lo lawm thiam ém kha, naute kawr lah a lei țeuh bawk si."


"A tunu pî a nih khi."


"A fanua fapa pî pawh," ka lo ti sap a, a thinrim ka ring hran lo, thu dik ni miau hek.


"A tupa nupui pî pawh a ni ve tho."


Kan inen a, kan nui ve ve. A thinrim lo tih ka hriat chuan ka huangtau sawt a," Chuan maw, ka chêt sual vàng khân tu mah haw lo la ka ti ngawt mai. Tunah phei chuan fa duhawm tak pahnih kan nei tawh bawk sia, huatna hian i thinlungah hmun chang tawh lo se ka ti," ka ti dap dap a.


"Ka la ngaidam thei lo ve ve!"


"Mahse, ka pi chu i hmangaih tho tiraw?"


A ngawi ta daih. Haw viau mah se a pi a ni a, ngaihdam hun a la nei chêk tùrah ngai ang.


Kan ngawih vang vang hnuah chuan," Angel-i kha vawi khat chiah ka bêng," a ti ta mai!! Mak ti zetin ka en nghal vat a, hmeichhia kut thlâk ngai miah lo hian Angel-i, a unaunu ngei chu kut a thlâk maw?! A va mak ém!!


"Ka hriat sual a ni em?"


"Ka bêng alawm, min zahna pakhat mah a nei hlawl lo. Khatiang unaunu neih kha ka zak!"


Ka hre zawm zêl châk.


"Eng thil nge thleng a?"


A ngawi vang vang phawt a," I rawn harh chhuah hnu khân Laipuitlângah ka han kal zawk a, step-ah khân i che sual ve hrim hrim nge tihluih tih zâwt fiah tùrin. Kha nu huaisàrzia kha, mipa ka ni tih leh a aia upa ka ni tih a hre map lo. Ka thinrim lutuk khân ka kut ka vêng hman lo, a hmaiah ka bêng; mahse, ka inchhîr miah lo. Khatiang kha chu ben leh tùr pawh awm se ka bêng leh hreh lo ang," a ti sup sup a.


Chuvàng chu a lo nih chiah chu.


"Eng thil nge a sawi a?"


"I hriat loh a țha zâwk e. Ka ben khân a țê țhawt a, a pi a lo kal nghal vat, a tunu chu a chhan khawp mai."


A țawng chhuaka a rilru natzia chu ka hre thei. Khati chen kha a pi hi a lo awmpui ve tawh a, a duatin a hmangaih hlein ka ring. Keimah vàng chauh tak takin an inhmu thiam lo va, Angel-i a awmpui ațang hian a zualkai a ni ngei ang. A piin a tunu, rei pawh a la hriat loh a chhan zâwk chuan a rilru a tina tih ka hre mai.


"Ka pi chuan thil awm dàn a hriat chian loh vàng mai mai a nih dáwn chu, bâkah hmeichhia kut i thlâk a, i thlâk na lutuk ang tih a hlau pawh a ni ve thei tho a."


"A tupa, a huat ém émin nge duat a tunu sual zet khian a la hre chho zêl ang chu!"


A piin Angel-i a duat tâk ém avàngin a thîk viau a nih dáwn hi. A ni thei viau ang, duat rawn leh hmangaih rawn a ni țhìn miau si a. Tunah upa ve ta viauin pa dinhmunah hial lo ding ve tawh mah se, duat chu a la mamawh rengin hmangaiha enkawl a la duh reng tihna. Pà viau țhìn mah se, chhûngrilah nona riau a nei ve thei tho. Mihring chu duat thlahlel lo tunge awm le?


"Ka pi chuan a tupa hi a ngai țhìn ngawt ang, a tupain a duat ang khân tu mahin an duat ve àwm si lo va."


"Tunu a nei alawm."


"A tunu hian a tupa ang khân a duat thiam ve lo tawp ang."


"A duat thiam loh tal pawhin a piin a duat thiam thung alawm."


Rilru nâ, thîk țawngkam a ni!!


"Nangma'n i duat thiam zâwk tih ka hre mai, min duat dàn ațang pawh hian a hriat mai. Nuam ka ti, mi vànnei  ber ka ni hial ang. Chuan,ka piin a duat phâk tawh si lo che a, keima'n ka duat  ve tawh thung ang che aw," tiin ka chûl hoh hoh a.


"Duat che ka duh zâwk."


"Mi duat sa reng alawm."


"Duat zual zêl che ka la duh."


"Ka hmangaih che."