☆MAGDALENE☆ - 10

☆MAGDALENE☆ - 10 By Dingdi Pachuau


Ka duh tâwk thei lo va, ka thlah hlei thei lo bawk.


A tàwpah chuan kan tàwp ve ta hrâm, kan tàwp meuh chuan thâwk kan la dun ham ham a, kuah erawh kan la inkuah nghet khawp.


"Min pehhêl tawh suh."


"Haw tawh rawh, a tlai tawh."


"Hetia awm hi ka duh zâwk!"


"Ni lo, a tih chi loh."


A țawng zàwi sep sep leh thla êng chu a inhmeh ka ti, thla êng hnuaiah ngei mai nula ka fâwp ang tih ka lo la ngaihtuah ngai miah lo.


"A hlu tak zet a ni!"


"Khawngaihin, haw tawh rawh."


Min thâwk khum lum ham ham mai, zanin boruak zet chuh, a nuam tih piah lam a ni.


"Aw, lût phawt la?"


"Min thlah la?"


Ani pawhin min la kuah reng sia, ka thlah phal bîk hlei nem.


"Ka phal lo."


"Julian?"


"Ka hming i lam dàn hi ka duh zâwng tak a ni."


"Mi dang an lo harh palh ang e."


Ka fâwp leh vang vang phawt a, ka thlah chauh. Ka thlah meuh chuan ka kim lo deuh húin ka hria, eng emaw thil hlu tak hloh ang mai niin ka inhria.


Ina a luh hnuah chauh ka haw, ka kal chak ngang mai.


Ka va text leh hrâm.


*An lo harh em?*


Dâr 10:20 a ni tawh, min reply dáwn lo em ni le? Min reply ngei chu ka ring, a la la muhìl hman lo tawp ang.


Beep beep


Ka khi sak, ka ring dik chiah.


*Vanneihthlâk deuhin, harh lo hlauh.*


A țha e, an lo harh hlauh chuan eng emaw chhuanlam țha tak a siam ve ngei a ngai dáwn si a.


Ka harh hma ngang mai. Tho peih lawk lo chuan ka mut hmunah chuan ka la bawk vang vang a, nizàn ka hun hman dàn ka ngaihtuah lêt a, ka nui suk suk mai.


Min hnar bîk lo a ni, min duh ve tho tihna; mahse, 've tho' hi ka duh khawp lo. Mi dang nèna min duh kawp phei chuan... ka duhãm a ni maithei e; mahse, kawp nih hi ka duh tawh miah lo, bâkah kei pawhin kawp ka duh tawh lo bawk.


Bawihtei rawn haw thlengin ka mu, tih tùr a awm si lo va, mut hmunah ka nui suk suk reng ringawt.


"Tàte, vawiinah luiah chuan kan kal dáwn em?"


"Ka hre lo le, chawlh rih phawt i duh em?"


"Ka hre lo, Hlimhlimi chuan an leipuia kal tùrin min sâwm a."


"Nangmah chauhin maw?"


A nui hak hak a.


"Kan pahnihin. Kal ila, chuan, naktûk lamah lui lamah chuan kal ta zâwk ila?"


A țha khawp ang, leipui pawh chu hmuh a châkawm alawm le. Bâkah zaninah Lalteite inah lêngin a pasal naute pawh kha sâwm țha leh ila, tih tùr dang an lo nei maithei bawk si.


Chaw kan ei har lo, ni a sa țha khawp mai. A lum reuh hle a, Bawihtei phei chu a thlan a tla nasa mai.


"Hrehawm i ti em?"


Min en há pahin," I ti a ni maw?" min ti lêt a, kei chuan," Khaw lum ka tuar țhang tawh e," ka lo ti thung a.


"Khaw lum chu nuam ka ti hran lo nain leipuiah chuan ka kal châk."


Hlimhlimi kan sâwm phei a, ani pawh a lo inpeih tawh a. An leipui kawngah chuan motor a kal theih loh avàngin kein kan kal a, kawng erawh a fai țha viau.


Dârkâr chanve vêl kan kal hnuah an leipui chu kan thleng a, thlai hmun a ni. Kawng bul mai têah chuan thlâm a lo awm a, a kawtah chuan pangpâr a lo pâr vul chûk mai a.


"A mawizia hi!" tiin Bawihtei chu a au chûl mai a. "Thla ka'n la lawk," tiin a phone a la chhuak nghal a. Hlimhlimi thlâma lût chu ka zui ve nghal a.


"A lum in ti em?"


"Aw."


"Hetiang hnuaiah hian alawm hna kan thawh țhin."


Bawihtei chuan," A lum viau nain in leipui hi a nuam reuh ka ti, chawhmeh kan la dáwn tihna a ni tiraw?" a rawn ti a, a rawn lût nghal bawk a.


"Aw, chàwl rih ila, a hmanhmawhthlâk chuang lo va."


Thlâm namthlâk chu a hawng a, thli a lo thaw lût nghal, a lum lutuk pawh a zia ta deuh hlek.


An leipui chu a awih hran lo va, a nuam reuh phian. Hmeichhe pahnihin thlai an lo va, kei chuan an vàu tui châwiin thingpui ka lo lumsak a, thlâm bul vêla pangpar derhken leh zàmzo pâr vul chûk chu thla ka lâksak mai mai a.


Thlâm thlanga an lo kal chho chu," Lo hawi r'u," ka ti a, an rawn hawi chho rang khawp mai.


"A, ka hah lai a nia, ka chhe dáwn lutuk!"


"I hah loh lai pawhin i țha chuang emaw ni!"


Hlimhlimi chuan min en mang lo, vawiin hian ka mitah tak min la en miah lo. A zak deuh emaw ni, nge kan inkâr hi Bawihtei'n a hria ang tih a hlau zâwk?


An thlai lawh chu an dah veleh Hlimhlimi chuan," In ril a țâm tawh em? Thingpui ka'n siam ang e," a ti a, kei chuan," In hah sia, ka lo siam zâwk ang e," ka lo ti thung a, ani ai chuan ka che rang hret. No a rawn ban ve tho nèn, kan kut chu a intawk salh a. A la lêt rang khawp mai, a kal sawn nghal a.


Thingpui ka siam lai chuan Bawihtei chuan," Tlangvâl senior thingpui siam chu a tui ngawt ang chu," a lo  ti ham ham a.


"I lei i lem ang tih a hlauhawm khawp mai."


Kan haw hmain Bawihtei'n vàu tui a hmuh ve châk avàngin kan kal leh rih a, thing hnuai hlim a nih vangin a boruak a nuam khawp mai.


Haw kawng chu chho deuh a nih vàngin muang têin kan kal a, ka hma chiahah   Hlimhlimi a kal a, Bawihtei chu a titi barh barh reng a.


Lung te reuh tê tê ka chhar a, ka hma chiaha kal chu ka vawm keuh keuh țhìn, a rawn hawi duh miah lo nia. Tu nge luhlul zâwk tih a hre duh a niang, ka hnaih sauh a, a bânah ka mansak chawt a.


A rawn hawi rang kher mai, a bân chu tàl chhuah tum chuan a țang nghal at a; mahse, ani chu ka hneh ve ém! Ka thlah duh miah lo, kal pah chuan kan insual chu a ni ta mai, insual tih lêmah, inhuat vàng chu a ni lo.


Bawihtei lah chu, kan boruak hre map lo chuan a țawng bawrh bawrh reng a, Hlimhlimi chuan a chhâng zauh zauh ringawt. A țang viau nain ka thlah duh miau loh avàngin a peih ta lo a niang, ka chelh ang ang chuan a bân chu a dah ta a. Chu veleh chuan a kutah ka vuan chat a, ka chelhsak ta tlat a, khaw chhûng kan luh dáwnah chauh ka thlah.


An in bul kan thlen chuan," Thingpui in pahin lo chàwl ula?" a ti ve ngial a; mahse, kan chàwl lo.


"Nakin zànah Lalteite inah lêng ila?"


Min en chuang lo chuan," Ka nu ka lo dîl dáwn nia," a ti ringawt a.


Thlan ban chuap mai, tui thianghlim zeta han tleuh chu a nuam sar sar hle mai, thingpui tui zet mai Bawihtei'n a siam bawk a, dam man a awm hluah hluah maiin ka hria.


Thlai hnah kan hawn chu kan siam dùn a, keiin chawhmeh ka kang a, ani'n bai a siam thung.


Zanriah ei khamah Bawihtei'n Hlimhlimi chu a call hmasa a, a nu chu a lo dîl tak tak niin. Kan va sâwm phei a, a inthuam dàn tê chuan ka mit a la zak mai.


Nipui kawr dik tak kawrfual a ha a, a buang leh a pâwl dal țhuipawlh a ni a, a vun rawng nèn chuan a inhmeh kher mai. A chàwn zên thlarh chu a chanve a lang thei a, chapal kaih, a kawr buang ang rawng tho a bun bawk.


"Nu, kan chhuak dáwn e aw, kan rei vak lovin ka ring."


Bawihtei chuan," Nu, kan in lamah kan riahtîr maithei bawk aw," nui ar ar chung hian a ti ve bawk a,Hlimhlimi nu pawh chu a lo nui ve a.


"Um, va kal r'u. Chhûngte intlawhpawhte hi a țha ngai e."


An chhûngkua an lo kim țhap a, kan lût min lo hmuh chuan Laltei chuan," E he!! Lo lêng r'u, in va hlauhawm khup khup ve!" a lo ti chûl a.


A pasal Dinga pawh chuan," Nangni mai mai chuh, min rawn phone hmasak tùr alawm le aw, naktûk zîngah chaw rawn ei ang che u," a lo ti ve bawk a.


Bawihtei chu mikhual chan a chan deuh avàngin ka nau a ni tih ka sawi chuan an chibai liam liam a, Hlimhlimi chuan," Kei pawh min chibai ve tho ula," nui sen sen chung hian a lo ti ve a, mi dang chuan nui chungin an lo chibai ve lãwp lãwp a.


Kan țhutmuan deuh hnu chuan Dinga hnênah chuan kan kal chhan chu ka sawi a, ani pawh chuan," A châkawm hle mai, sikul kan chawlh lai ni se ka ti hle mai," a lo ti ve vang vang a.


Hlimhlimi chuan," Lèn pawh i den thiam loh kha," a lo ti zauh a, Dinga naute chu an lo nui nasa mai a.


Bawihtei pawh a tlângnêl nghal leh mai. Lalteite inneih thlalâk chu an en pah a, Hlimhlimi nèn chuan an râk chûl a.


"Tàtea nèn in thlalâk hi a mawi tawp."


Laltei chuan," E, ni dáwn tak e, in lanna a awm nual ang," a ti a, Dinga chuan," In lanna kha chu la rawh u, keini lam chuan video nèn kan nei tho," a lo ti ve a.


Ka en ve a, a camera a lo țha ngang mai, kan lang mawi ve khawpin ka hria.


Dinga nau tlangvâl nèn chuan kan titi a, naktûk lama kan kal dan tùr leh thil ken tùrte kan sawi a, a țhianpa chu lo sâwm ve mai tùrin ka ngèn a.


Ani chuan," A lâwm ngawt ang, nuam a tih chi a ni ve a," a ti barh barh a.


Kan haw dáwnah chuan Dinga chuan," Naktûk zîng chu,  chaw chu rawn ei r'u aw, zo-ar tui lai kan lo talh ang, Hlimhlim, nang pawh ka ti tel che a nia," a ti a.


"Min sàwm dan kha a fair lo bîk."


"Fair lutuk! Kan rawn lam hman kher lo ang che u, dâr 8-ah chuan kan inpeih var var ang aw."


Haw kawngah chuan Bawihtei hmuh loh tùr chuan a kutah ka chelhsak a, a lo țang tawh bîk lo. Bawihtei lah a țawng barh barh reng a, a țhiannu hi ka ngaizawng a ni tih hria ta se, a thinrim ang em le?


An inah kan pêng haw a, kan thlah a ni mai ang chu. Rei lo tê chu kan țhu ve a, a nu chuan a meizial tui a tih chu min țheh ve a.


"I zu ngai lo maithei a, ka țheh ve rêng rêng che a nih kha."


"Ka lâwm lutuk, ka pi. Ka la zu ngai miah lo nain a tuiin ka ring."


Kan haw hnuah ka va text a.


*I nu khân min mâkpa cheibàwl țanin ka hria.*


A rawn reply rang kher mai.


*A zahthlâk, sawi teh suh.*


Ka khi sak a, he nu tê hi chu aw, zakzum reuh lutuk mai.


*Ka fawh châk teh lul che nèn, chance min pe duh lo va.*


A chhiar pahin a sen leh țâwn țâwn ang chu!


*Min duh tak tak em? Min fiam vêl mai mai tiraw?*


Hei chu a serious ta tlat!


*Min ringhlel a ni maw?*


*Bialnu i nei tih ka hre ve reng a.*


*Nangmah bâk bialnu ka nei lo.*


*Dâwt sawi kher suh, ka hre ve tho.*


*Engtin nge thu dik a ni tih ka awihtîr theih ang che ? Hunin a hril ang chu.*


*Julian, i duh tlâk ka ni lo.*


*I sawi tlai tawh.*


*Ka ti tak tak.*


*Kei deuh.*


Engtizia nge a hel tâk tlat ni?


*I duh tlâk ka ni lo, i inchhìr hmain min kiansan rawh.*


*Chu kher chu ka thu tlûkna tùr a nih ka ring.*


*Julian...*


*Eng nge ni ta, hon?*


*JULIAN ZOREMSANGGGGGGG...*


*Yes, hon?*


A reh ta vang vang mai. Ka ngaih a țha lo deuh a, hmaihmaah ngei fel taka sawipui a ngai a ni.


*Inhmu ang.*


Min chhâng lo.


*Ka rawn call dáwn che, min reply loh chuan. Chuan, ka rawn kal dáwn a nia.*


A rawn reply rang khawp.


*Ni lo, a tih chi tawh loh. Khawngaihin, rawn kal lo hrâm rawh, ka ngèn che.*


*Ngati nge i hel tâk thut a?*


*Ka inngaihtuah chiang a.*


*Min duh lo tih i hre chhuak a?*


Mipa mah ni ila, ka hlauthâwng khawp, ka zêp lo. Beiseina min siamsak zet a, min tibeidawng ang tih ka hlau thut.


*Ka tân chuan i sâng ém a ni.*


He nu hi chu ka duh telh telh ni maiin ka hria.


*Naktûkah chiang deuhin kan sawi fel ang.*