☆MAGDALENE☆ - 15

☆MAGDALENE☆ - 15 By Dingdi Pachuau


July thla a ni a, ruah pawh a sûr leh ta tluk tluk mai. Dàwr kal tùr pawhin Duata ka keng peih tawh lo, hul duh tlat si chuan.


Bawihtei chu ka rualin a kal țhìn a, Nonoi erawh ka pain a hruai mai țhìn. Ka nun a hlim avàngin ruah rawn sûr țhìn pawh chuan min hlimpui ve ni  maiin ka hria a, ka nun 'boring' zet kha chu ka paih bo chiang hneh tawh khawp mai.


Zànah ruah a sùr loh hlauh chuan ka chhuak leh ta zauh zauh. Ka chhûngte chuan Lawmkimite inah ka lêng țhìn niin an ngai, an titi dàn ațangin. Eng mah ka sawi chhuak lo, Hlimhlimi'n zêp rih tùrin min duh si a, a rûk thei ang ber tùrin kan la inkawp; mahse, Muansanga hian min ringhlel tawh maithei. A awm laiin zan thum chu ka lêng ve tawh, hre mah se a pawi pawh ka ti lo.


"Nizànah Mama'n kan inngaizawng em tih min zâwt a."


Tlaiah ka pêng haw a, Apple ka leisak chu ka pe a, a khât tâwkin ka leisak ziah ta, a thei ngainat ber a nih vàngin. Ani'n làwmman atân thingpui 'cial' tak min siamsak thung a,  thingpui min pêk laiin a sawi chhuak a ni.


"Engtin nge i chhàn?"


"Thu dik ka hrilh."


"A țhat chu, chuan, chance-te pawh  min pêk nachâng a hre deuh tawh ang chu."


A nui sen sen a.


"Eng ang chance nge i la duh belh cheu a?"


"I bula ka awm hi chuan biahthu di a tam thei ang ber hlan che ka duh alawm."


A nuih a za ngang a niang, a nui ri hak hak a.


"Eng nge sawi dik loh ka nei em ni?"


"I  va lawmawm teh lul ém!!!"


Ve leh chhâwng takin a.


Lawmkimi pawhin an dàwr lian zet chu a enkawl ve țan a, enkawl lo pawh ni se, a buai dáwn lo chiang; mahse, hna thawh loh ringawt chu a duh bîk lo a ni, a ngaihsànawm reuh phian.


Tlai khat ka pêng haw chu ni danga min lo lawm țhin dàn nèn a inang lo deuhin ka hria, bâkah, a mit mengah hlim loh rûkna ka hmu bawk.


"I mit meng a mawi sar sar viau nain tlêm têin chhûm a zîng a nia."


A nui lui sek a.


"I hmuh dàn mai mai a nih chu."


"Dâwt sawi ve suh, i inhmeh lo a nia."


"Eng mah a ni lo, hmeichhe thil mai mai a nia."


Nia, min hrilh duh loh chuan ka tilui lo ang, min hrilh duh hunah chuan min hrilh ve mai ang, hmeichhe thil phei chu lo hriatpui ve vak chi pawh a nih loh chu.


In ka luh chuan Bawihtei lo țawng làng láng ri chu ka hre nghal a.


"A, ka ngei a ni tawp mai. A inla chhe lo ropui si, tuma'n kan ei lo. Chhe lo ve tho mah se, amah a intițha lutuk a, a hmel a tichhe vek, a rilru a la sual zui."


"E khai! Tu chanchin nge i lo sawi tâk bawrh bawrh a?"


"Ka ngei deuh maw le!"


"A nih tak chu, hmeichhia hian ngei hi in ngah viauin ka hria."


Ka room-a ka lût chu min zui lût ve nghal a.


"A ngeiawm ém alawm, a buai lohna tùrah a buai ziah a."


"A ni maw? Nang ve hi le, i buai lohna tùrah i lo buai ve tho a ni lo maw, ka nau?"


"A teuh lo!!"


A thinrim ém avàng chuan ka nuih za viau mah se ka nuih duh bîk lo.


"I nau hriat lai hi chuan âng bawrh bawrh tawh lo la, tiraw? Chuan, eng maw thinrimthlâk deuh chu?"


Ka khumah ka țhu a, ani erawh chair-ah a țhu thung a.


"Kha, Janet-i ka sawi tawh kha i hria tiraw? Kha nu khân vawiinah kan țhiannu pakhat a rawn ti leh deuh salh a, kan thin a rim lutuk a. Kan țhiannu chu a mittui a tlà a, ka kêk hrep châk asin."


"Tu i țhiannu ber maw?"


"Hlimhlimi, kan țhian zîngah pawh mi pawi sawi lo ber a nia, a chhâng lêt ve ngai bawk si lo va, ka khawngaih."


Chuvàng a lo ni maw a mitah khân chhûm a zìn deuh chiai ni.


"Eng chungchângah nge ni?"


A melh ngai melh ràn rán pah chuan," A bialpa hlui chungchâng bawk maw le. A bialpa hlui leh Janet-i kha an la inzui reng a, chu chu intihtheih khum deuhin  leh a nunhlui duhawm lo rawn sawi chhuak lehin fiamthu a rawn thawh leh a, vawiin erawh miin an hre tam lo hlauh a, a zia deuh; mahse, a mittui a tla thung, a rilru a na hle a nih ka ring."


Chu nu chuan eng vàng nge chutianga a tih leh ni? A bialpa hlui khân naute kha titla tùrin a ti te te a, vanduai thilthua a chhiat hnuah titla angin a sawi chhuak leh daih si, a ngeiawmin a tenawm tak zet a ni. A bialpa hlui bialnu Janet-i reng reng pawh, sawi chhuah fo kha a ngai lo asin, a tân hlâwkna leh țangkaina a nei miah si lo.


"Tàte, a ngeiawm i ti ve em?"


"Aw, a ngeiawm ém a nih chu!"


"Ngeiawm lutuk! A bialpa hlui chu hmuh ka châk asin, chhuahchhàl nek a châkawm."


Kei deuh hian ka hmu châk, vawi khat tal hnek ka duh ang!


"Ka'n hnek sawk dáwn em niang?"


A thinrim hmel pawh chu a reh ve tial tial a, Bawihtei hi chu a thinrim chuan lo thinrimpui ve ila a reh hma ber. Zaidam leh zâwldawh taka thlèm chuan a thinrim a reh har țhìn. Amah ai hian lo thinrim țhìn ila a fuh ber.


"Nonoi bulah chuan thinrimna tih-lan tawh miah loh tùr aw, insùm hrâm hrâm tùr."


Ruah a tla cherh cherh nain lèn hrâm ka duh. A rilru na avànga a mittui tla chu lâk lêtsak thei lo mah ila, a rilru hrehawm ka tihziasak maithei asin. A rilru natna tihnêpsak tùra kuah vang vang ka duh bawk.


Ka lèn tùr thu ka hrilh sa lo va, ka lèn pawh a ring lo ang, ruah a tla deuh cherh cherh reng bawk si a, mak a lo ti ngawt ang chu.


Kawngkhàr ka kik a.


"Tu nge ni?"


"Keimah, kawng min lo hawn teh."


Muansanga a lèn chuan kawngka chhûng lamah a kalh țhìn; mahse, ka lén tùr thu ka hrilh sa țhin avàngin 'tu nge' ka nih min zâwt ngai lo thung.


Kawngka min rawn hawnsak chuan a mit sen râm ka en hmasa ber, a țap a ni hial lo maw?!


"Hey?"


"Hey..."


Pan hnaiin dìm leh duat zetin ka kuah a, ani pawh chuan nghet takin min lo kuah lêt nghal.


Rei tâwk tak chu kuahin a hnung ka chûl hauh hauh a, a lungchhiat ka tizual a ni maithei, ka âwmah chuan beiin a insût ta faih faih a.


"Hey, baby, i bulah ka awm reng a nia."


A samah chuan chûlin ka fawhsak bawk a, a duh tâwkin țap rawh se. Ka bulah hian  hrehawm a tihna zawng zawng hi leihbaw vek se, paih chhuak vek se ka duh.


Ka âwm nghènga a inhnît chu ka khawngaih ém ém rualin nuam ka ti tho. Tunah chuan a bialpa niin a inhnemna awmchhun ka ni, ka bula hetianga a awm loh chuan tu bulah nge a awm teh lul ang. Tu tlangvâl bulah mah hetianga awm tùr hian ka duh lo va, ka phal hek lo.


A hnu deuhah chuan ka âwma la bei tlân chung hian," Ka tihpalh aw, hetianga awm hi ka tum miah lo," a ti sep sep a.


"Ka bulah chuan engtin pawhin awm rawh, ka pawm vek, ka phal bawk."


"Ka naupang chhia e tiraw?"


"I awm dàn ang apiang hian ka duh che."


"Ka lâwm e, hmeichhe lâktlâk lo tak ni mah ila."


"Shhhhhhh, chutiang sawi tawh suh, vawi khat tê mah."


A zia tâk hnu chuan țhutnaah ka țhutpui a, duat takin ka kuah reng tho. Țhutnaah a ke hlângin min nghèng chial a, hetiang hi ka duh dàn țhin a ni.


"I lo lèn ka ring miah lo va."


"Rawn tihphut zawk che ka duh a."


"Ka lâwm tak tak a ni."


"Mahse, ka bulah lo chuan lo țap tawh lo la ka duh ngawt mai. I țah lai chuan i bula awm ka duh a, i inhnemna nih ka duh a ni."


Min rawn melhin a nui sêih a.


"I ni alawm, ka lo tawng che hi ka lâwm ngawt mai. Ka làwmzia chu Pathianin a hre chiang ngawt ang."


A thu sawi chuan min tilâwm veng veng.


"I țah chhan min hrilh thei ang em?"


"A ho viau asin."


"Nula hmelțha țahna hial thlentu chu thil ho tak a ni thei lo hrim hrim." Hriat ngei ka duh tlat.


"Aw le, ka hrilh ang che. Nichîn deuh khân Ngaihawma'n min lo call a, Aizâwlah hian a rawn phei a nih ka ring, a chhan chu Janet-i nui ri ka hre tlat a ni."


"Eng vànga naute kha titla nge ka nih min rawn zâwt a, a hmain titla tùra min tih tawh vàngin chutiang zawhna min zâwt chu ka rilru a na lutuk a, min nuihsawh zui bawk sia."


"I tân liau liau ka khawih hlak ang aw."


Hlauhthàwn hmel deuh hian min thlêk a, chutah min nghêng lehin," Khawih tlâk pawh a ni lo, Pathianin engkim a hria alawm. Ka chunga thil thleng, nang ka tawn hma zawng kha chu nawh reh vek duh mah ila thil țha zâwk ka zir chhuah theihna tùr a lo ni zâwk a, fîmkhur lehzuala nun ka hman phahna tùr a lo ni," a ti sep sep a.


He nu rilru puitlin si zia hi, ka tluk leh ta miah lo. Naupang chhia viau țhìnin lang mah se, puitling deuh deuh hian ngaihtuahna a hmang leh tlat zêl.


"I puitling reuh e!"


"Ka chhùn che a niang."


Ka nui hawk a.


"Nangmah ațang hian thil zir tùr ka ngah tawh lutuk."


Ka bân chûl hauh hauh pahin," I puitling daih zâwk alawm, kei pawh nangmah ațang hian ka inzir mêk a ni. I nu leh pate pùr buai miah lova sumdàwnna i enkawl thei te hi ka chhuang che a, entawn tlâk ka ti bawk che a ni. Nu leh pa hausa deuh deuh nei țhenkhatte ang lo takin nang chuan engkim i thawk chhuak a, awm mai mai thei i nih teh lul nèn," a ti duah a.


"Ka va lâwm!!"


"Bawihtei pawh hian a chhuang țhìn rêng che a ni, kei pawhin ka chhuang che a, kei min duh tlat erawh ka hre thiam lo lek lek che a ni."


A hnara piai sak pahin," I duhawmzia hi inhre mawlh hek lo che maw le!" ka ti a, a nui leh sek a.


"U Lawmi hi a chhe lo sia, duh daih pawh ni la ka hre thiam viau ang che."


"Ka bula țhu hi ka duh ber."


"Kei deuh, ka bula țhu ka nghen chial hi khawvêlah ka duh ber."


"I nu ai pawhin maw?"


"Ka nu chu ka duh hlei nem, ka chhûngte chu ka hmangaih vek alawm."


"A nih kei?"


"Thil dang zawng aiin le."


Làwmman atân ka fâwp zauh a, a nui hak a.


"Ka țap zo chauh a, ka hlim leh hle tawh bawk sia, a mak e."


A zia naupang chhia kha a chhuak leh tawh dáwn e. Ka duh ve ve, puitling deuha a awm hian ka puitlin lohzia min hriat chhuahtîr a, naupang chhe rilru a put châng hian duat a ngaihzia leh a rilru thianghlimzia ka hre chhuak bawk.


"Zanin chu ka riak mai dáwn emaw ni le."


"Haha, Mama nèn mut dun i duh a thu le."


"I bulah mut ka duh daih zâwk!"


"Nula leh tlangvâl inngaizawng chu mut dun a fuh lo, a fuh lohzia chu ka hriat chian tawh viau hi."


"Engtin mah kan awm loh te chuan?"


"A, negative leh positive chu an inhîp tawn awlsam alawm."


"A nih, tu nge negative ni zâwk?"


Min en a, a nui ringawt.


"A tu emaw zâwk zâwk, positive lo zâwk kha a niang."


A bula awm hi ka ning thei lo, a titi siam siam a, a chângin duhawm zetin a nui sen sen a, a duh loh zâwng sawi lui ila, min melh rum a, chu chuan nuih a tiza duh bawk si.


"Ka haw tawh ang."


"Dâr 9:30 a ni tawh."


"A la hma é, i bulah chuan ka thla a muang a, minute 10 ang vêl bâkin ka hre lo."


"Ka awih chiah lo."


"A ni tak tak. I bulah chuan hun hi a tlànin a tlân ni berin ka hria."


"Kei chuan a thlâwkin ka hre zâwk."


Ka fâwp leh vawng vawng phawt, kan inhnê lo va, kan inthlahlel telh telh ni maiin ka hria.


"Ka thlah phal lo che."


"Kei pawh, tihian rei lo tê ding leh lawk ang."


Kan inpawm leh rih.


In ka thlena ka phone ka check chuan a message a lo awm vàng tawh.


*I tlân chhuak chiah tihah khân Mama a rawn haw ve chiah a, min phâwk hman lo chiah chiah.*


Ka nui suk a. 'Phâwk' țawngkam ber kher a hmang chuan ka nuih a tiza.


*Min phâwk tùrin eng thil nge kan tih?*


A rawn reply vat.


*Ih, infawh leh inpawm vêl kha. Ka nau mah ni se a hmuh laia infawh chu ka duh miah lo.*


*Kei chu pawi ka ti miah lo ang.*


A rawn type leh e.


*Nang chu mipa i nia, hmeichhe tân chuan a zahthlâk alawm.*


*Ka duh tlâwrh tlâwrh che a nih mai chu.*


Voice message. A rawn nui kar kar.


*Ka bulah hi chuan i nuihzatthlâk ve țhìn e tiraw?*


*Min ti â vek tawh a nih hi.*


Voice message, a rawn nui leh kar kar.


*I â lo, i lawmawm alawm. Ka làwm reuh che e.*


Mipa naupang mâwl zetah min chhuah mai dáwn, a bulah chuan ka ni thei tak tak pawhin ka ring e a!!!