☆MAGDALENE☆ - 16

*I nihna zahpui ngai suh*


☆MAGDALENE☆ - 16 By Dingdi Pachuau


Chaw kan ei laiin ka nuin," I thawmhnaw ka sûknaah nail polish bûr ka hmu nawlh a," a ti a, Bawihtei chuan rang zet hian min rawn en nghal a.


"Tu ta tùr nge a?"


"Ka bialnu maw le!"


"A hausa ropui si! Leisak a ngai àwm lo em mai a!"


"I hre lo."


"Min lo pe daih teh."


"Kei pawh Tàte, ka duh ve."


"Aw le, Nonoi ka pe ang, chuan Au Bawihtei inhnawihtîr ve la aw."


"Yessss...!!"


Eng rawng ber kha nge maw ka lo pêk hmaih le!!


Âțana'n min lo call nawlh mai!


"Hey, mate, zanin i hman ang em?"


"Eng ti tùrin maw?"


"ITI lamah khân maw le."


Lizzy-te inah maw? Ka lèn lohna a va rei tawh ve.


"Pawi hlei nem."


"Chance i nei thei maithei a nia," tiin a nui hak hak a.


"A ni maw?"


"Nau khal deuh a neih kha..."


Ni dáwn tak, Baby-i a nih nghe nghe kha.


"Aw, kan lêng dáwn nia."


Ka rilruah erawh Zarkawt lam hlîr  a awm thung, ruah a sûr lo va, ka lèn chu a lo ring maithei; mahse, țhianpa min sàwmna chu hnialsak chi a ni bawk si lo.


Lizzy-te in kan luh chuan an chhûngin an lo awm a, Lizzy chuan min lo chhàwn leh ber a, Baby-i pawhin lehkha a lo zir bîk lo.


"Julian, i va reh ém ém! I dàwr lam i tluang zêl maw?"


"Aw, tluang ve zêl e. Han reh deuh vang vang hian kan luck ve hmel deuh a."


"Ninawm chiang, i luck hle kha."


"Luck loh hi, țhianpate bialnu rìmnaah kan zui ruk ruk chu a nih hi."


A nui a, " Khawi lam nula nge lamah nge i țuan tih Âțana hi ka zâwt mai tùr a nia," a ti leh a.


"In pa hian eng mah a hre lo, hmeichhe hming zâwt teh, 'Lizzy' tih bâk a hre lo tawp ang."


Kan nui ta dar dar a.


Baby-i chu ka melh tawh lo rêng réng, ka duh tak tak loh tùrah chuan ka inham buai peih tawh lo. A hmaa ka nungchang țha lo zet kha chu phawrh chhuah leh ka tum tawh lo, ngaihzawng neih lamah chuan ka piang thar tawh.


Buaina neuh neuh ka neih ve țhin avàngin zànah pawh ka lêng vak thei lo, ruah a lo sûr ve țhìn bawk nèn;.mahse, tlai lamah tal hi chuan ka tlawh haw ziah thung.


Kâr khat ka zinsan a, ani pawhin min ngai ve viauin ka ring. Ka kal dáwn ka hrilh lo va, a hnua ka hrilh chuan a thinrima a tihtauh ve te ka ring a nia, a thinrim miah lo.


Ka lung a lêng khawp mai, ka ngaihzia erawh a bulah chuan ka thup ve deuh. Mipa ve si, lunglèn viau chu a zahthlâk ve a, ka haw hunah erawh ka hrilh mawlh mawlh ang.


Ani erawh chuan min ngai tih sawi a hreh miah lo, kan intext-naah a sawi a, ka phone lahin min ngaihzia bâk sawi tùr a hre lo.


"Eng nge ka lo hawn ang che?"


"Dam takin nangmah kha lo haw la a tâwk a ni mai."


"Kawr i duh em?"


"Duh lo."


"Pheikhawk aw?"


"Ka mamawh lo."


"I duh eng emaw tal sawi teh, lo hawnsak che ka duh alawm."


"A nih chuan, sweet tui tâwk aw."


"Eng atân?!"


"Ei atân."


"A ngai lo."


"Duh sawi tùrin min tia, ngai lo i ti leh daih bawk sia?"


"Ei tùr lam ni lo sawi rawh."


"Nangmah."


"Keimah ni lo?"


"Apple."


Ka nui hawk a.


"Fa kan neih hunah a hmingah 'Apple' phuah ngei ngei ang che."


"Kan neih hunah maw?!!!"


"Aw, kan pahnihin fa kan neih hunah."


Fa neih ka sawi a nia! Fa neih leh nupui neih hi ka la ngaihtuah duh loh thil kha a ni, eng vàngin nge ka sawi chhuah le? Ani pawh hi ka nupui tùr angin ka la ngaihtuah chhin miah lo.


Ka nupui ni ta se...


College hi ka kal tluantîr kher lo ang, amahin a duh tlat a nih loh chuan. Ka bula awm reng tùrin ka duh ngei ang, chuan... ka la mutpui miah lo! Tum pawh ka la tum lo a nia, mak tak a ni. Thla hnih lai kan ni tawh, a âwmbâwr takngial pawh ka la khawih lo!!


Ka â deuh tawh a niang, mipa ve tak ka nih țhin kha. Țha tih zâwng leh duh chu hlah loh tum ve ngar ngar kha ka ni ve țhìn a nia, kei hi ka pà lo thut em ni le? A âwmbâwr ém pawh la khawih loh chu, mak tak a ni mak tak!!!


A birthday-a pêk tùr tlereuh ka lei a, maipawl sweet pack 2 leiin ka khi ru sak a, sweet tui ka hriat ve chhun a ni miau va. A hmuh hunah engtin tak awm ang maw? A nuih a zat loh vêk pawhin a hlim thoin ka ring, ka hawnsakna a hla vang vang ém!


Ka chhûngte thil tùr ka leisak hlawm ve bawk a, Nonoi tân adidas sneakers nalh zet ka leisak, a lâwm lehpek khawp ang chu.


Mahni in ngeia han awm leh vang vang chu a nuam leh khawp mai, hmun dang ai chuan mahni in ngei hi a lo nuam ber mai a nih hi. Chhûngte, min hmangaiha min thlahleltute bula awm hi a lo nuam ber mai.


Thlen zàna chhuah tharh chu mawi lo ti viau mah ila ka ngaih tawh ém avàngin rei lo tê tal pawh hmuh ka duh, ka chhuak leh ta nge nge.


Ka phone lâwk miah lo va, ka'n surprise thut mai chu, nuam ve reuh tak a ni. Hetiang hian a lo nuam viau thei ang tih chu hria ila ka surprise zing ngawt ang.


"Ka ngai lutuk tawh che a."


"Eng chenin?"


"Nangmah chen chiah khân."


"Eng nge ka lo hawnsak tùr che kha?"


"Nangmah leh sweet leh apple."


Maipawl sweet chu ka pe a, mak tih hmel zet hian a en a.


"Ei rawh."


A la ei ngai lo a ni maithei, a ei chhin hlek a, chutah, phûr zetin," Ah, a va tui reuh tak!! Ka duh zawng tak a ni," a ti hlut a, pakhat chu min pe ve a.


"Eng nge a hming?"


"Maipawl sweet."


"A hming chiah ka hria."


Handbag ka leisak chu ka pe leh a, a hmu chiah chu a au chùl mai!


"A va mawi tak! Ka neih ve phâka ka ruat loh leh ka awh phâk loh a nih hi."


Min kuah châk châk a, a hlim lâwm hmel chuan ka awm a tinuam tak zet a ni, leisak man a awm hliah hliahin ka hria.


"Ka lâwm e aw, ka lâwm, sawi ngaihna pawh ka hre lo."


"I hlim hmel hian i làwmzia a sawi fiah ber a nih dáwn hi."


"Ka hlimin ka lâwm tak tak a ni."


"Min fâwp phawt la?"


Ka fiamthu a ni tak nain min rawn fâwp nghal, kan infâwp kham thei lo.


"I mittui a tla a nia."


"Ka làwm ém vàng alawm."


A mittui chu duat takin ka nuaisak a, ka fâwp leh zauh a.


"Le, i thingpui siam ka in châk tawh a nia."


A siam hlànin car-a apple ka dah chu ka han la a, apple ka khai min rawn hmuh chuan," Apple elo?" phûr zet hian a rawn ti a.


"Ka bialnu i nih chhûng chuan apple i nghei lo ang."


"A va nuam dáwn tak! Mahse, ka tân i inhmang nasa tawh e."


"I tân hian ka lo thawk țàng țáng a nih ka ring ta."


"Ka tawng che hi Pathian ruat a ni chiang, ka țawngțainaah mipa dik tak ka dîl țhìn a, min chhànna chu nangmah hi i ni."


Sawi tùr ka vàn, he nula naupang tak hian sawi tùr min tihre lo ngun teh e.


Ka lêng rei lo ang ka ti tak nain ka lêng rei leh tho. Ka hawsan phal thlâwt lo,  maipawl sweet chu kan ei kan ei mai.


Dàwra thawkte T-shirt ka hawnsak chu ka pêk chuan an lo lâwm thiam khawp mai. Kimtei chuan," Boss hi a lo fel ber mai," nui var var chung hian a ti a.


Amawia chuan," A fel ber tih i va hre har ve!" a lo ti a, Muansanga nèn chuan kan lo nui a.


"In duh zawng a ni hlawm em?"


An duh thu leh țha an tih thu chu an sawi tliar tliar a, ngaihthlâk a nuam khawp mai.


Chawhnu lamah Melo-i a rawn lang hlawl mai, eng tak rawn ti dáwn ni maw?


"Lo lêng rawh."


A țhat ngaiin a la țha reng, a țha sawt zâwk emaw tih tùr a ni. Mi dang chuan an lo be vat a.


Kimtei chuan," I lo lêng khât hle mai, i va ngaihawm ve," a lo ti a, a lo be sawk sawk a.


"Nia tiraw? In ngaihawm hlawm e, in lo dam țha maw?"


"Dam e, nang pawh i lo hmelțha leh ta sawtin ka hria."


Ka lo ngawi reng a.


Amawia chuan," Nia, i chhe lo leh zual tlat, i dam țha a nih ka ring," a lo ti ve a.


"Nia, ka dam țha e. In inhralh țha thei maw?"


"Aw, hralh țha e. Lo lêng zing deuh hlek la kan inhralh țha leh zualin ka ring."


Kimbawngi chu a rûkin rum zetin ka melh, min en lo hlauh a, a vànnei.


Melo-i lah chu an fakna chuan a tihlim hle a ni ang, a nui har har a, sexy ka tih deuh ang țhin khân. Mahse, tunah zawng ka engah mah a thawk tawh lo, nula nui ri satliah a ni mai.


"I dam țha em?"


Ka melh zawk a, nui lui sakin," Aw, dam țha e," ka ti sup a.


"I reh hle mai, min lo call ka ring țhìn a."


A va ring mak ve!


"Call-na chhan tùr che ka nei tawh lo."


"U J, i tân ka rinawm lo ngai lo asin."


Dâwt. Dâwt hi ka ngaina tawh lo.


"Sawi lo teh ang."


"Ka ti tak tak, car-a ka lêng kha min hmu a nih ka ring."


"Hmu e."


Mi dang chuan kan thil sawi chu an rawn hre thei kher lo ang, kan țawng ring hran lo. Min rawn en leh deuh țhìn a, an ngaih chu a țha chiah lo a nih hmel.


"Ka sawi fiah thei."


Hm, sawi fiah rawh se, tunah zawng awmzia a awm tawh lo. Ka tân awmzia a nei pha tawh lo va, insawi fiah erawh a duh phawt chuan insawi fiah se, ka rilru erawh a ngai reng. Mi sual ber pawhin insawi fiahna hun an nei ve țhìn miau alawm le.


"Sawi la."


"Hmun dangah kan kal thei ang em?"


Nia, kei pawhin nuam ka ti viau lo. Min rawn dàwrtute an rawn kal ve zut bawk sia.


Ka chhuahpui a, engah mah tàl buai erawh ka tum tawh lo, sawi fiah se, rawn lêng tawh miah lo se ka duh.


Restaurant hnai berah ka kalpui a, a insawi thiam khawp mai. Kha pa khân a lo beisei ve a, sunday-a mi dang ka lènpui avàng khân lèn ve a châk avàng leh kha pa khân a lo sàwm ve reng avàngin a zui a, fawh erawh an infâwp lo tih a sawi. Rawn fawh a tum a, a rawn fâwp lo niin a sawi.


"Melo, eng mah sawi leh chuan tùr a awm tawh lo a ni. Kan inkawp chhûng khân min tihlim ém ém țhìn a, ka lâwm viau."


"U J, khawngaihin inkàwm leh hrâm ang. Ka ngai thei lutuk che."


"Ni lo, kan inkâwm thei lo ang."


"Engati maw? Khawngaihin, ka kawm che phal hrâm rawh."


"Bialnu dang ka nei tawh a ni."


"A pawi lo."


"Ka bialnu tân rinawm ka tum a ni."


"Inngaizawng leh ang ka tih loh kha, inkâwm ang ka ti mai alawm."


"Mipa leh hmeichhia, inngaizawng țhìn inkawm chu thil țha ber a ni lo."


"Ka kawm chauh che chu remti hrâm la."


Dàwra kan lêt leh chuan ka kuta chelhin a titi leh barh barh tawh a, ka kut a chelh ringawt chu a pawi lo ang chu maw.


Rin loh deuhin dàwrah chuan Bawihteite țhianho an lo awm a, Lawmkimi pawh a lo awm. Ka kut chelh ràn chunga Melo-i nèna kan lût chu min lo en țhap mai.



(Zanin ațang chuan tlêmin ka tih dán ka thlâk hret ang. A hmasa berah message ka dah zêl tawh ang, tu emaw talin an lo hlâwkpui mial tâkin, kei ngei pawh hian ka mamawh tak thil a ni țhìn si a.)