☆MAGDALENE☆ - 18

☆MAGDALENE☆ - 18 By Dingdi Pachuau


Kan haw meuh chuan dâr 9 a pêl tawh. Kawng tluanin a titi seuh seuh reng a, a nui sen sen reng bawk nèn, he  khawvêla ka lo piang ve hi ka inchhîr lo chiang khawp mai.


Ina ka luhpui chuan Muansanga a lo awm reng tawh a. A u a hmuh chuan a lo meng phar nasa mai a, nui chung hian," I va nalh ve! Mi dang daih i ni dáwn emaw ka tih thut chu le!" a lo ti thûm dãt a.


"Ka mawi chiang asin, zanin anga nalh hian ka la inchei ngai lo."


Rei ka awm lo, Muansanga'n room lam pan nghal daih mah se awm reina chi a ni tawh lo.


Birthday ka lawmsak hnu ațang hi chuan kan inkâr a nghet zualin ka hria, kei ngei pawh hian ka bialnu tak tak angin ka en, hmeichhe dang ka melh tawh lo.


Zan khat chu Bawihtei chuan," Melo-i nèn khân in la ni reng em?" a ti phawng mai a, room-a ka awm lai niin, ani chu ka khumah a vãng zawngin a mu ar a.


"Ni lo."


"In renew leh lo maw?"


"Teuh lo!"


"Nih, u Lawmi hi?"


"Ka țhiannu."


"Eng mah a awm lo tak tak maw?"


"Aw."


"Nih leh, tu nge i bialnu ni ta? Nail polish pawh i leisak kha?"


"Tu nge ka leisak tih sawi a?"


"Sawi a ngai lo, a hriat vek alawm. Nuin i thawmhnaw a sûkin a hmuh reng kha."


"Ka bialnu tân ka lei ve maw le!"


"Chu chu tu nge?"


"I hria."


A rawn tho thuai a, ka țhutna bulah rawn kalin," Ka hria maw?!! Tu nge niang? Melo-i a ni lo va, U Lawmi a ni bawk si lo. Min hrilh mai la?" a ti a.


"I hriat zawng a ni tih chiah ka sawi ang."


A hre châk ngang a niang, min zâwt sek a, kei lahin ka hrilh nghal mai duh si lo va, a thinrim khawp mai.


"A hmelchhia a niang, kan hriat i zak a nih kha."


"Chhe teuh lo!"


"Chuti, sawi mai la."


"A hming bulah M a awm."


"Melo-i, Manuni. Manuni a ni maw? Kan țhian zînga mi kha."


"I hre țhelh."


Lawmi a lo kal deuh reng a, Melo-i a châng chângin a lo kal bawk. Lo hau ringawt chi a ni si lo va, min rawn kàwm ve a ni mai bawk si nèn, a buaithlâk ka ti ru țhìn kher mai.


Hlimhlimi pawhin a hria, a châng chuan a'n thîk ve lâwp lâwp a, a àwm ka ti ve tho. Phone-ah min be țha duh lo țhìn a, ka lèn phah leh nge nge țhìn. A thîk hian ka lâwm zawk tlat zel a, min duh ve vâng ka ti lo thei lo.


Kei chuan tlangvâl a kalpui ka la hmu miah lo. An college-ah te hian a lo luck phian thei a, ka hmuh loh leh hriat loh lamah hian a lo nei ru thei tho bawk; mahse, ka ring chhe phal lo, chutianga min kawp duh tùr angin ka hmu lo. Ka ngaih a țha viau.


Ni khat chu dàwra ka awm laiin min rawn phone ve tlat mai!


"Khawngaih takin, lo chho mai teh, ka inthlahrung viau nain."


Hetiang hian min la ti ngai miah lo. Thil tha lo eng emaw a thleng thut a nih ka ring deuh thut a, hmanhmawh takin ka chhuak a, Amawia chu kal pahin ka chhuak lawk dáwn tih ka hrilh nghal a.


Ka han thlen lai chuan tui hmunah a lo awm a, a lo kûn ngar ngar mai.


"Eng thil nge ni ta? I țha em?"


"Ka hnâr a thî ringawt a, ka mangang lutuk a."


A ni lah tak a, a lo far fup fup reng mai.


"I chal leh i bek i tihuh em?"


"Aih."


Ka tihhuhsak sawk sawk a, fartîr ngawt ai chuan tiin long chair-ah chuan ka muttîr a.


"A hmain a thî tawh țhìn em?"


"Aih, ka têt lai chauhin."


A hnu deuhah chuan a reh ve ta mai a; mahse, thawh chhuahtîr ka la phal lo va, a mu leh ta rih a.


"Vawiinah class i kal lo va?"


"Aw, kan sir-in nupui a nei a."


A nih chu. Bawihtei pawh a kal loh ngei dáwn chu.


"I lu a hai em?"


"Hai maithei, tlêm têin a haiin ka ring."


"Harsatna leh buaina i tawh chuan min lo call zêl ang che. I nau chu class kal a ngai a, ani ai chuan ka rawn thleng rang thei zâwk hrim hrim bawk. Eng pawh thleng se, min rawn call zêl tùrin ka duh che, inthlahrunna tùr a awm lo."


"Ka lâwm e."


"I lu chu hai lo se, Duata chungah i'n chuang tùr a niah!"


"Naaa, i sual. Eng tikah nge ka chuan theih ang?"


"Naktûkah."


"Tak tak?"


"Ka rawn kal hma ang a, ka thlah dáwn che em niang? I duh em?"


"Aw; mahse, a thui lo e."


"Chuti, kan tlân kual vak ang a?"


A nui ta sen sen a.


"Chu ai chuan kan room thleng min thlah la?"


"I ti tak tak lo?"


"I hreh a ni maw?"


"Naktûkah kan hria ang chu!"


Ka kal hma ta ngei e. Ani pawh a lo inpeih at tawh a, a jacket pâwl, thâwl deuh hleka a hâk chu a inhmeh kher asin, a sam chu a thlah mâwl tawp a, jeans pawdal riai  leh a pheikhawk dum nèn chuan sawisêlna tùr ka hre lo.


"I inhmeh kher mai!"


Nui sen sen chungin," Ka lâwm e," a ti phawt a, chutah," Kal tawh ila?" a ti nghal zat a.


Duata hnungah chuan a rawn lâwn nghal auh a, nui suk chungin," Ready?" ka ti a, a lo hre thiam ve nasa.


"Ready."


Ka phit chhuahpui nghal a, a hlauh ka rin teh lul nen, a hlau miah lo. A khêk râih mai! Naupang chhia reuh lutuk.


Min lo en duh khawp mai. Hriat ngai loh leh hmuh ngai loh na na na chu min lo en duh viau pawh ka thiam tho.


"Nuam lo i ti em?"


Ka nuih suk a.


"Nuam ka ti, ka kalpui thei che a; bâkah, mipa, lo beisei deuhtute chuan min hmuh chuan an beisei ngam dawn lo che a."


"Ah, chutiang an awm teuh lo."


"Hawi kual teh, mipaho mit meng ațang hian thîkna hlîr ka hmu."


A nui hak hak a; mahse, hmeichhe pahnih kan tawh chuan a nui hmel chu a reh riai riai a.


"Kha, bum tùr i hmu leh tawh elo!"


Chu nu chuan Hlimhlimi a en tlat avàngin a bia a nih ka ring.


"Min lo hre thiam lawk?"


"Nula virgin leh țha ber ang ziazanga   lêng ka ngaisâng lo."


"I kawlh dàn ațang hian Janet-i i nih ka ring. Mi nunah lo buai vak duh suh, i nunah buai la a tâwk mai."


Hlimhlimi chuan min rawn chelh vat a, Janet-i an tih chuan rum deuh hian min en a, chutah Hlimhlimi melh lehin 'i châk lo ang' tih melhin a melhin ka hria, step-ah chuan rang zetin a tlân thla a, a kalpuinu chuan a zui ve nghal a.


"Tikhân a ti țhìn che tiraw?"


"A na lo, ka nihna tho a nia."


"Tuar ringawt tawh suh ang che, ka phal hlei nem."


"A bialpa kha ka lo ngaihzàwn miau tawh  avàngin sawi tùr a vâng ém a ni."


"A țawng khum che tih ka hriat leh chuan a bialpa nên an châk lo ngawt ang!"


Min nuih tlawn a, " I kawlh hmel lutuk a nia, ani ai khân i hlauhawm daih zâwk," a ti a.


"A bialpa chu ka hmu châk ngawt mai!"


"A ho lutuk, i țha fé, i țha berrrrr."


An room thleng chu ka thlah a, ka dâk ve tak nain Bawihtei ka hmu lo, min hmu ta se, mak a ti ngawt ang.


Step-ah kan intâwk ta tak tak!


"E heeee!!!! Eng nge i lo tih?!!!"


"Ka bialnu ka thlah."


Meng phar ãwk ãwk chung hian," Woww!!! Hetah a kal ve maw? Ka awih lo, min hrilh teh, tu nge ni?" a ti chûl a, ka kutah a chelh rân a.


"I hria ka tih tawh kha."


"Ramhuainu leh!" tiin a phun sap a.


"Eng maw?!!"


Min en loh avàngin a enna lam chu ka en ve a, Janet-i bawk kha lo niin. A țhiannu nèn bawk an lo chho leh a, min hmuh chuan a țawng lai chu a tàwp chiang kher mai.


Rang zetin min kal pèl a, an liam hma chu ka en zui ngar ngar.


"A hlauh hmel tawp che!"


"A țha!"


"Lo kal zeuh zeuh rawh, kha nu hlauh atân khân i țha dáwn riau," tiin a nui hak hak a.


"I tlai ang, chho tawh rawh."


"Ka țhiante ka hrilh châk tawh lutuk. Chuan, Tàte, pawisa i ngah tho sia, vawiin chu kan țhianho ei tùr min treat la?"


"Fing phakar reuh lutuk!"


"Mawh? I hausak ém kha? 'Tlangvâl hausa' an ti luai luai che tih ka hria."


"Noodles kha rawn chhùm leh mai ula a nih chu."


"I thurûk ka sawi puang miah lo ang."


"Eng thurûk maw?"


"Hey, hre lo der vêl.  Ka hriat chhuah hunah i rethei ngawt ang!"


Chhùnah an rawn kal leh țhâm țhâm.


"Nangniho lah hi, tlangvâl zui tùr pawh hi in hmu zo lo emaw ni? Inzui țhûm țhûm ringawt mai."


"U Kimte, tlangvâl hausa kan rawn bêm dáwn alawm, zei lo thei e."


Bawihtei leh Kimtei hi chu an innêl a, an infiamna pawh a na țhìn.


"Luck lo awm khâwm."


"Tlangvâl hausa kan neih chhûng chuan tlangvâl dang melh kan tum lo."


Tlaia ka pèn hman loh vàng leh zànah pawh ka lèn hman loh avàngin ka call a, a rawn nui hak hak a.


"A va za àwm kar kar ve!"


"Vawiin kha ka ngaihtuah chhuak a, Janet-i kha a bialpa bulah a vui nasa dáwn hian ka hre lutuk a."


"Ngeiawm reuh ém a nih kha."


"Bawihtei'n ' Tàtea a hlau lutuk' a ti a, chuan, i bialnu kan college-ah a kal ve tih a sawi bawk a, ka nuih a za a."


A nui hak hak reng a.


November thla a lo thleng a, a vâwt leh țan ta. Ka dàwr ka zauh avàngin ka buai ve tawh hle a, tlaiah pawh ka pêng ziah hman tawh lo. Ani pawh exam a hnai tawh a, ka buai azârah lehkha a zir thei zâwk ang chu.


Muansanga pawh lehkha zir ngawrh tùrin ka ti a, dàwr nghah loh erawh a tum lo bur. Kan buaizia a hre chiang ve a, a àwm ve tho; mahse, a zirnain a tuar ang tih ka hlauhpui.


Vawiin chu ka haw hma ve tlat mai! Ka pêng haw thei ve ta, phûr zetin ka inkhalh chho a, kawngka pawh a lo inkalh lo ve, tlêm têin a inhawng zui. Ka barakhaih dáwn, min phu thut dáwn sia, a lâwm ve ngawt ang.


Kawngka pawh kik lovin ka hawng rawk a, ka lût thut.  Ka  thil hmuh avàng chuan ka ding chawt thung!


Tlangvâl pakhat leh Hlimhlimi chu an lo infâwp niin, țhutthlengah chuan ualau deuhin an inbawhbet bawk.


Anni pawh ka thâwm avàng chuan an thil tih chu an tàwp chat mai. Mipa chuan Hlimhlimi kut a vawn chu a thlah nghal a, Hlimhlimi chu a lo hawi chhuak lo hrim hrim, a zak ve viau a niang, a kut chu a tuai nauh nauh a.


"Kawngka kik nachâng i hre nange?"


Min tih dan kher kher chuh!


"Khatiang tih i duh a nih chuan kawngka kalh ta che."


"Julian..."


Ten hmél zeta melh chung hian," Ka lo hre chiang viau che emaw ka ti a, ka lo hre chiang lo hle mai che," ka ti sup a, vîn lo tùra ka insùm nasatzia chuh!


"Ka bialnu lakah hian lo inthiar fihlîm ang che."


Ka insûm hman tawh lo, ka kut chu ka vai fua a, a khabeah ka hnek bur mai.


"Nei rawh, nei vek rawh. Mi ingaizawngte inkârah ka inrawlh ngai lo ve!"


Ka chhuak nghal, Hlimhlimi min kohna pawh ka hre reng, ka hawi lêt lul lo ang, he inah hian ka kal tawh lo ang. Mi rinawm ber angah ka ngai a, kei ngei pawh hmeichhe dang lakah ka inthiar fihlîm ve, hei mai hi ka chantâwk chu a lo nih tho hi.


In ka thlen hnuah chauh ka thinlung natzia chu ka hre chhuak. Ka thil hmuh kha nuai bo hmak ka va duh tak ém! Zu in țeuh ila, rui chhum hmawk ila ka zia deuh maithei.


Hmeichhe pakhat vànga zu han in leh ringawt pawh chu. Ka in lohna rei tawhzia hi, Hlimhlimi nèn kan inzui ațang khân ka in tawh miah lo! Tunah ka thinlung nat avàngin ka in leh ang maw? Tireh hlen thei dáwn se chuan ka in chiang ngawt ang.


Zanriah ei kham veleh ka room-ah ka lût nghal a, inbual pawh ka peih lo. Khumah chuan a vâng zâwngin ka bawk a, ka maimichhîng vang vang a.


"Thil thleng a awm em?"


Bawihtei  a lut niin. Kawngka pawh a kik lo a nih dáwn hi.


"Kawngka kik ri ka hre lo."


"Vawi 3 ka kik, i hre lo a nih chiah chu. Thil thleng a awm tiraw?"


"Aw."




*MI DANG I SAWISEL HMAIN NANGMAH INEN FIAH HMASA PHAWT RAWH*


(Ka tih dàn ka thlâk leh e. A tàwp berah message ka dah leh ta, a hnawk lo zâwkin ka hria.

Comments chhiar hi ka chakna hnâr a ni, lo sawisel ula, in duh khawp loh laite lo point out zêl r'u, insiam țhat nân ka lo hmang zêl ang.)