☆MAGDALENE☆ - 19

☆MAGDALENE☆ - 19 By Dingdi Pachuau


"Min hrilh duh em?"


Ka ngawi rùn ringawt.


"Ih maw, Tàte, thil țha lo thleng a awm hi chuan min hrilh ve la, i zia sawt dáwn asin, mahni chauha tuar lovin inpaih thâwl la?"


A tidik ve reng; mahse, hetiang lam hi vawi khat tê mah ka la sawipui ngai lo tawp a ni mai.


"Ka bialnuin mipa dang a fâwp a ni."


Ka va tlâwm vawng vawng tak! Ka bialnute'n mipa dang min kawpsan zel chu a nih hi, hmeichhia hi mipa ai hian an lo rinawm lo awlsam zâwk chu a lo ni.


"A ni maw!!! A va mak àwm ve!!!"


Hmeichhia hi an lo inang vek chu a lo nih hi, rinawm ber angin an insawi a, min duh ber angin an awm thiam a, lemchang, bumhmang mai an lo ni.


"Tu nge tih tal sawi tawh la?"


"Mahnia awm ka duh!"


"Aw le, aw le. Tàte, ngaihtuah vak vak duh suh aw, i hlim loh chuan a hrehawm a nia."


A chhuah hnuah pawh chuan ka awm ngai rengin ka awm, ka maimichhîng a, ka mitthlaah lah chuan chiang zetin an pahniha an awm dùn chu ka hmu zêl mai. Ka meng ta kar, ka men chuan ka hmu lo nain rilru ațanga paih chhuah erawh a har tho.


Ka phone a ri char char, ka'n en chuan amah a ni amah. A va la ngam zâwk ve!! Ka chhâng lo ang, ka hmet tàwp hmak. Mai mai chuan, eng ang lekah nge min ngaih le? A insawi fiah ang maw? Chuan, ka lo ngaidam ang a.


Ni lo ve, mit ngeiin ka hmu a, beng ngeiin ka hre bawk. Kawp nih hi ka duh tawh lo hulhual, hmeichhia hi ka ring leh khât tawh khawp ang.


Melo-i nèn khân kan inzui rei viau a, min kawp tih ka hriat khân  ka la na ve viau a, zu ka in nghek nghe a nih kha. Hlimhlimi nèn hi chuan kan la inzui rei lutuk lo; mahse, ka rilru ka pe nasa ém ém thung si. A tân  ui ka nei lo va, mi dang ka kawpsan hek lo. Ka theihtâwpin ka duat a, khawih pawh ka tum hek lo; mahse...


Phone a rawn ri leh a, teivet chuan. Bangah ka vawm teuh lutuk; mahse, rawn call-tu Bawihtei a ni tih ka hriat chuan ka thaw hawk, ka beiseina chu a tàwp leh ta, amah a nih ka rin teh lul nen!


"Tàte, kawngka lo hawng teh."


Tunah dâr 11 a ri tawh a nia! Eng a lo ti dáwn chu ni maw?


"Tàte, i bialnu  chu Hlimhlimi maw lo ni a?!!!"


Engtin nge a hriat chhuah ni?


"Rinhlelh dun ngaihna che u ka hre lo reng reng. In lo va inzêp thei ém ém!"


"Zêp rih a duh tlat a."


"Min rawn phone a, a țap nghal bawk sia, ka hre thiam lo lutuk a."


Engati nge a țah ringawt? A zak ve maw? A inthiam lo ve deuh bawk ang chu, ka phâwk dùn chiang ém bawk a ni, insawi fihlìm chu a har ve khawp ang.


"A zak a ni maw?"


"Mipa i hmuh kha a bialpa hlui Ngaihawma kha a ni àwm e."


A bialpa hlui maw? A bialpa hlui chu a ni lo tawp a nih kha. Tu mihring nge ex-te nèn infâwp ngai? An la ințhen lo tihna. A rûka ni reng chung siin min lo kawp a, kei lahin lungsi zetin ka lo kuah bawk a...


"Ka hnek hrep lo kha a vànnei khawp alawm!"


"I hnek maw?!!"


"A hrilh lo che em ni? A bialpa ka hnek hrep lo kha a vànnei hle tih a rawn phone leh che a nih chuan i lo hrilh dáwn nia."


"Ka hre thiam lo!"


"Kei chuan ka duh ém avàngin ka ngaizawng a, ani erawh chuan a bialpa hlui, ni lo, a bialpa thup mawi nân lek min lo hmang a."


"In thil sawi dàn a inang lo!"


"A insawi thiam ve ang chu! Ka hmu chiang ém asin, insawi fihlìm ngaihna a awm lo, ka mit pahnih ngei hian ka hmu a ni."


Ka nau bulah hian awka vîn ka hmang khât viau; mahse, zanin chu ka insûm thei lo. Ka room bang hi sound proof ni lo phei se chuan ka nute pawh an mangang an lo tlân lût daih tawh ang.


"I thin a rim rih ém mai, naktûk lamah kan sawi țha dáwn nia aw. Mut tum la."


"Min ngaihtuah suh, hmeichhe pakhat vàngin ka nun tihchhiat vek ka tum hlei nem."


Mahse, muthilh chu a harsa dáwn a nih hi. Maimichhîng ila mitthlaah ka hmu nghal zel si, ka thin a rim țún mai. Keimah ka inhua a ni, hmeichhia ka lo ring hma leh lutuk a, chu chu ka tuar ta chiah a nih hi.


Dàwr kal loh theih si loh, phûr lo zetin ka kal. Dàwra thawkte hmuhah chuan eng mah thleng lo angin lan ka tum ve țàng țáng; mahse, a har ka ti. Ka rilru a hlim lo hle si.


Lawmkimi a rawn lêng a, rilru ipik nei lo chi a ni si a, ka lo huphurh viau. A țawng leh bawrh bawrh ang a, ka rilru awm dàn hre lo lêkin.


Mahse, a zia a thlâk deuh tlat. A țawng bawrh bawrh lo; a châng zeuh zeuhin a țawng a, chu pawh ring lo tê têin, ka boruak tawn hi a hre ve ta emaw tih mai tùr a ni.


"I hmel a dik lo, nizànah i mu țha lo hle a ni maw?"


Mu țha lo tih lêmah, ka muhìl lo hrim hrim zâwk. Ka mit hnuai inrîn phei kalh chuan a tichiang thawkhat khawp ang chu.


"Nia, ka muhìl thei lo va."


"Thil thleng a awm em?"


"Eng eng emaw chu a thleng ve bawk ang chu!"


"A țha lam maw?"


"Țha pawh, țha lo pawh."


Sawi duh loh chin ka nei tih a hre thiam ve tho va, min zâwt lui bîk lo. Lehkha thiam, zir sâng nge nge chuan mi ningkhâwng chu a lo hre deuh nge nge e.


Nilêngin a lo lêng, ka buai avàngin nimin lam chanchin pawh ka ngaihtuah hman ta rih lo, a țha phian mai.


Muansanga a lo thlen lai pawh ka lo hmu lo, laptop bihin ka lo buai lutuk a.
Amawia leh Kimtei pawh ka be hman lo achha chu a ni, mak min ti ngawt ang, ni danga infiam bawrh bawrh țhìn kan ni si a.


Ka phone pawh ka khawih hman lo. Ina ka haw hnuah ka en hman chauh, missed calls 5 a lo awm, Hlimhlimi vek a ni. Ka be lo tawp ang, a insawi fiahna ka ngaithla peih lo.


"Tàte, phone chhâng teh!"


"Ka hman lo."


"A be duh che a, hrehawm a ti lutuk a nia."


"Nuam ka tih bîk a ring em ni?"


"Sawi fel ula?"


"Sawi fel tùr a awm lo."


"Vawiinah class pawh a lo kal lo."


"A thu thu alawm, a bialpa nèn khân an awm dùn pek a niang chu!"


"Ring chhe lutuk lo teh!"


"Rin țhat thu a awm hlei nem."


Kan pahnih pawhin kan inhnial nghal titih ta mai, inbe tùrin min duh, keiin ka duh lo, ka duh lo bur. Insawi fiahna ka ngaithla peih lo, ani insawi fiahna aiin ka mit ka ring zâwk.


Ni thum a liam ta. Phone call leh message ka chhàn ngai loh vàngin ka awm dàn ngaiin ka la awm! Biak theiha awm ka tum lo va, call lah ka tum hek lo. Call chhàn ai chuan nilênga inhrem pawh ka duh zâwk!


Chhùna dàwra ka awm laiin Bawihtei leh a țhiante an lo pêng. An titi dàn ațang chuan Hlimhlimi an kan a ni àwm e, a dam lo em ni? Nge a bialpa nèn an che na deuh a tuar lo zâwk? Ka lo ngaihtuah tùr a awm lo ve.


Zànah ka room-ah min rawn luhchilh leh.


"Lehkha zir rawh."


"Thil awmzia sawi teh ang."


"Sawi tùr a awm lo."


"Sawi tùr ka nei a, lo ngaithla tal la?"


"I țhiannu nge i țan keimah?"


"Ka țan ve ve che u, thil nih dàn phung ka sawi ang a, lo ngaithla hrâm la, khawngaihin?"


Um, han sawi se, a rilru pawh a dam ve deuh mahna! Ka rilru a sawh sawntîr chuang lo ang.


"Hlimhlimi hi tunah a dam lo a ni, in pahnih inkâr vàngin."


"Chu, a va la na àwm ve!" Tilui tih hriat zetin ka țhen sak a.


"Tàte, exam a hnai tawh a nia, fiamthu thawhna chi a ni lo."


Keimah vàng chuan ni lul lo ve, kan pahnih inkâr vàng ni lovin ama thil tih sualah hrehawm a ti ve a ni mahna.


"Ngaihawma khân a fâwp lui a, chu lai tak chu i hmu a ni."


Za lo zet hian ka nui hawk a.


"Puitling ka nih hi, naupang kum 3 mi lekah min ngai em ni?"


"Chu chu a sawi dàn a nia, kha pa kha a bialpa hlui chu a ni ngei mai; mahse, engah mah a ngai tawh lo a ni. Janet-i vàngin an in luah pawh kha a hria a, khami tlai bâk kha a la lêng miah lo."


"A fâwp lui maw? A duh lo a nih chuan a tih tùr chu a hria alawm."


"Khatianga a chêt thut kha a lo ring pha bîk lo a ni, a che thut a, a kut a man beksak bâkah a bawh thut bawk a ni. A au hman lo va, a tâl hman hek lo."


"Insawi fihlìm chu a tum ve hle mai maw?"


"Tàte, khawngaihin, inhmuin sawi fel hrâm teh u. Hlimhlimi hi ka khawngaih asin, mi dang chuan a dam loh chhan an hre lo, keimah chauhin ka hria. A mittui a tla reng bawk sia, a hrehawm ka ti ém mai."


"Duh lo chung a tilui thei dáwn em ni?"


"Ngaihawma kha a ngei lutuk, a huatzia chu a khawngaihthlâk zâwk. In i chhuahsan chiah tihah khân a hawtîr ve nghal. A chhuah nghal loh chuan police a koh tùr thu a sawi a."


Thu dik a ni ang em? Nge a insawi fihlìm tumna mai mai ni ang?


"Thu dik a nih chuan dàwrah rawn kal rawh se, amah ngeiin hmaichhanah sawi fiah se, a fiah zâwk mahna! Kei chuan an in chhûng ka rap tawh dáwn lo."


"Aw le, ka lo hrilh ang. Nia, i duh dàn i sawi tawh a, a dang chu a mawhphurna a ni tawh e. Ka lâwm e aw, Tàte. Sawi fel thuai thuai ula ka duh tak tak a ni."


A rawn kal tak tak ka ring lo, amah chauh phei chuan. Nula țawng tam a ni lo va, Amawia leh Kimtei pawhin an lo hre kher nâng.


Mahse, ka ring dik lo hle mai. A lo kal tak tak, amah chauh lehnghalin. Ka lo hmu lawk lo va, laptop-ah thil dang ka lo buaipui daih a.


"Julian?"


A aw ka hriat avàngin ka hawi chhuak a, a hmêl dâng del leh zan mu țha lo meng tih hriat fahrana inthlahrung tak chunga min en chuan ka thinlung a tiche dawt mai.


"Lo țhu rawh."


Ka țawng chhuak no lo zet vàng chuan a tîm dai a, Kimtei leh Amawia chuan min rawn ngaihven lo hlauh a, a zia. Chuti ni lo phei se chuan a inthlahrungin a zak leh zual ngawt ang chu.


Ka indah fel laiin Lawmkimi a lo lût ve leh, hun lo lutuk mai. A rawn țawng barh barh a, kan boruak hi hre na se zawng, a lo kal àwm tawp si lo.


"Min chhuahpui lawk teh, rei lo tê a niang?"


Hlimhlimi'n min hmuh tumin min rawn pan a, chutah, ani'n chhuahpui tùrin min rawn sâwm, a va inhmeh lo tak!


"Rei lo tê chauh, please-in?"


Hlimhlimi runluih pah ka duh ve bawk avàngin," Kan chhuak lawk ang, kan rei lo ang," ka ti a, kan chhuahsan ta daih a.


Nuam chu ka ti chiah bîk lo. Zak chung chungin, dam țha lo takin a rawn kal ve àwm si a, kei lahnin ka chhuahsan leh rih daih a, 'min lo nghah ka beisei, insawi fiah duh zâwk a ni bawk a' tiin ka inhnèm chawp a.


Kan rei lo, dàwra kan lêt chuan a țhutna ngaiah a lo la țhu ngar mai.  A lo hawi chhuak lo va, min en hek lo.


"Ka rawn pêng leh tak nain ka'n haw tawh ang e."


"Hei, lunch ei a hun dáwn hi."


"Nia, ka tihek lutuk palh ang che."


A kal hnu chuan ka țhutnaah ka țhu a, Hlimhlimi chu," Kan rei i lo ti em?" tiin ka zâwt a, ka ngeiawm ve chiang alawm.


"Aw, a nghâktu tân chuan."


"Le, eng nge i duh kha? Sawi tùr i nei tiraw?"


A lo hawi chhuak a, min en ta chiah. A mit meng ațang chuan a rilru ka tihnatzia ka hmu thei, a mittui a tling kal a, a hmai pawh a sen țal mai.


"Julian, i nun a râwng hle mai."


*I THIL TUM TIHLAWHTLING TÙRIN BEIDAWNG NGAI SUH*