☆MAGDALENE☆ - 20

☆MAGDALENE☆ - 20 By Dingdi Pachuau



"I sawi duh chu sawi rawh."


"Ka phatsan lo che."


"I thil sawi leh i chêt dàn a inpèrsan a nih dáwn chu!"


"Engtin nge ka phatsan thei teh lul ang che?"


"I hre zâwk ang chu."


"Kha pa kha duhna chhe tê mah ka nei tawh lo."


"Ka hriat ve thil pawh va ni suh."


"I thil sawi dàn hian min tina tak zet a ni."


Min en kiau reng a, a rilru a na tih chu a hriat theih reng. Ka hnial thlâk zêl avàng hian nâ a lo ti viau a ni ngei ang.


"Kha pa khan kan in luah a hria tih ka hre miah lo va, a lo lût ka hmuh pawhin mak ka ti viau rêng a ni. Chhuak leh nghal tùrin ka hrilh a; mahse, a chhuak duh lo. Ka inrin miah loh laiin khatiang khân a che thut a, nang lah kha i lo luh lai tak a lo ni bawk si a."


"Kha pa kha i bialpa Ngaihawma kha a ni maw? Ani tih chu hria ila damdawi in dêng rawk tùr khawpin la khawih ngei ang."


"Julian?"


"A tilui che maw? Ka hmuh dàn nèn chuan a va ang lo ve."


"A chêt thut avàngin ka inring hman lo a ni. Khatianga a chêt duh kha ka ring lo bawk."


"I bialpa hlui a nia, hun eng emaw chen i lo zui tawh a nih kha."


"Ka thinlungah hmun a chang tawh lo chiang bal."


Thinrim viau mah ila a thil sawi dàn chuan ka nuih a tiza viau; mahse, ka nui miah lo ang.


"Julian, hrehawm ka ti a nia, khami zàn ațang khân chhìn khat tê pawh ka la chhîng lo."


"I bialpa Ngaihawma vàng khân maw?"


A thil sawi ka la kàwi zel chu a haw ngang a ni ang, a ngawi ta hmak mai.


A țawng duh tâk lohah chuan kan ngawi dùn ta kar mai. Bawihtei hnên ațang pawhin a thiam thu sawi hi chu ka hre tawh a nih kha. Tunah pawh a sawi dàn a dang chuang lo, a lo ni tak tak pawh a ni thei; mahse, ka mit ngeiin ka hmu chiang hle si a nih kha.


"Ka sawi țha leh ang, kha pa khân ka inrin loh laiin ka kut man betin min fâwp lui a ni, ka fâwp lêt ve hauh lo. I lo lût thut bawk si a, ka thinrim bâkah ka zak a, i kal kha ka ko zui lawm lawm che, a chhan chu min hmuh dàn kha a dik lo dáwn si a. Ka kohna che i hre lo der tlat a, ka call lah i chhâng duh si lo. Ka mangan ém avàngin Bawihtei ka call a, engkim ka hrilh ta vek a nih kha."


"Nang phatsan che hi ka tum ngai lo, duh pawh ka duh lo. Ka sawi zawng zawng kha thu dik vek a ni, awih tùrin ka tilui thei lo che a; mahse, awih la chu ka ti."


Ka ngawih reng avàngin," Aw le, ka tibuai rei tawh che. Ka sawi zo tawh bawk a, ka kal tawh ang."


Chelh ding tùr leh ko ding tùr ka ni tih ka hria; mahse, ka ti hauh lo. A kal liam chu ka thlîr zui a, a lan theih tâk lohah chuan ka ruak huaiin ka hria. Engati nge ka chelh din loh le? A thu sawi kha awihin hlim takin kan awm leh thei mai àwm si a, ka rilru luhlul zet chu anchhia ka lawh mawlh mawlh a.


"Boss?"


Kimtei chu ka en há a.


"Boss, eng thil nge ni ta? In inhau em ni?"


"Eng maw?"


"In inhau si loh chuan engati nge a țah a?"


"A țap maw?"


"Aw, i țhiannu nèn in chhuah dun lai pawh khân a mittui a tla tawh. Thil awmzia zawh ka duh viau a, hrehawm a tih phah ang tih ka hlau leh deuh a."


"Keima'n ka zâwt alawm, eng emaw thil țha lo thleng a awm thu chauh a sawi a, ka zâwt chhunzawm ta lo va," Kimtei chuan a lo ti a.


"Aw, harsatna a nei a nih kha."


"A khawngaihthlâk reuh, a dawldâng si."


A dawldâng maw? Ani hi a hnâr kha a lo thî leh a niang, a mit lang bui deuh hlek pawh kha a țahna a ni maithei. Engati nge țap leh tùr siin min kawp ni? A țap ang maw?


Ka ngaihtuah duh tawh lo. Ka awm loh lai chuhin a bialpa lêngah a sâwm a, ka pèn a rin loh vàngin hun thâwl a lo neihpui a ni, ka lu ka thing nak nak a.


Ka phone a ri a.


"Aw, Bawihte?"


"Eng chena rei nge ka țhiannu hi i țahtîr dáwn?"


"Ka țahtîr lo."


"A bialpa hlui a duh tawh lo tih a sawi mawlh mawlh a, kei chuan pakhat tê mahin ka ringhlel lo. Engati nge i rin theih loh? Vawiinah pawh zah sawi thei lovin a rawn pan che a."


"A duhtu tân chuan bân sei a ngai alawm."


"A bân a rawn tisei rêng a ni. Nangmah chauh a duh thu leh a hmangaih thu che a sawi a, nangmah pawh a hrilh tawh che tih a sawi. A bialpa hmasa kha a hmangaih lo, a hmangaih chu nangmah i ni."


"Min phatsan tho alawm."


"Tàte, a phatsan che ka ring lo. A rilru hi a lêrh lo a nia, tlangvâl duhtu pawh a hmu nual, kan college-ah ngei pawh. Tumah a chhâng lo, an beisei theih tùr pawhin a awm ngai lo."


"Rilru chu a inthlâk thei alawm."


"A dik. Aw, ka sawi tawh lo ang. I thu thu a ni e."


Ka rilru a nuam chuang rêng rêng lo. Bawihtei thu sawi leh Hlimhlimi insawi fiahna chu ka ngaihtuah lêt a, an thil sawi chu a dik thei maithei. Dik ta se, engati nge Hlimhlimi khân țap chunga min lo pan loh le? A tilui ngei a nih chuan fawh pawh a fâwp thei dáwn em ni? A lo țang hman lo nge a hamhaih vàngin a lo dawh tawp ni ang? Ka rilruin ka ngaihtuah kual nasa lutuk.


Ka phone chu ka khawih rauh rauh a, ka phone dáwn em niang? Phone ta ila eng nge ka sawi ang? 'I thil sawi kha ka ring' ka ti dáwn em ni? Ni lo, 'inenkawl țha rawh, i dawldâng lutuk' te pawh ti ta ila, a nih loh pawhin' lehkha zir țha rawh, in exam a hnai tawh' pawh ti tal ila.


Ka phone ta nge nge. A ring ta ngei e.


"Hello?"


Mipa aw?!!! Tu nge? A bialpa kha a ni leh ngei ang chu.


"Phone neitu pe nghal rawh, i zak chai nange?" Ka thinrim lutuk chu ka insehruh nghal vat, ka hmuh vaih chuan tu emaw zâwk zâwk chu kan thi deuhthaw ang.


"Ka pu, min lo hre thiam lawk? He phone neitu hi i hria em ni? Hei nikhaw hre lovin a tlu a."


"Eng maw?!!! Khawiah nge? Ka lo kal nghal."


Ka insûm hrâm hrâm nain ka che buai tho mai. Rilru fîm put hrâm hrâm ka tum a, he thil hi keimah vàng a nih hlauh chuan, ni lo, ni lul suh se.


An in luah thlen hma daih Footpath-ah a lo tlu niin. Dàwra miten an lo hmu a, dàwrah chuan an lo zàwn lût a, tihharh tumin an thiam ang angin an lo bei a. Dàwr bula nurse an lo ko ve nghal niin, an tițha reuh tak tak.


Ka thlen chhoh hnu rei vak lovah chuan a rawn harh ta deuh a, a vâwt tih a rawn sawi niah niah. A dik ang, a bek leh a nghâwng vêlah tuiin an tihuh a, khua a lum tawh vak si lo nèn, a vâwt duh khawp ang.


"An in ka hria a, ka lo paw chho mai dáwn em niang? Ka nau a nia."


Ka nau chu a ni chiah lo nàngin dâwt hlang hlak chu a ni bîk lo, ka nau țhiannu chu ka nau a ni ve tho alawm.


Nurse chu ka inzuitîr a, ka paw chho ta mai. A zâng reuh phian lehnghal a, thil a ei țha lo a niang.


Puan lumte kan sintîr hnuah chuan nurse chu thil awmzia ka zâwt a, a taksa chauh vàng leh thisen a neih tlèm vàng a nih a ring. A hmel a dawldâng ve reuh ém bawk a,  tunah tak phei hi chuan tisen pawh a neiin ka hre lo.


Nurse chu làwmthu hrilhin lawmman pêk ka tum a, a lo duh îkhaw lo mai. Ka zak lek lek zâwk alawm le.


Kan pahnih chauha kan awm hnu chuan a mutna bulah chuan ka țhu hnai a, a hmai dâng del chu ka en reng a, ka khawngaih kher mai. 'Zàn ka mu thei lo' a tih kha a lo dik a nih dáwn hi, a taksa a chau lo thei lo ang, exam a hnai a, lehkha a zir nasat phei chuan.


"Haw rawh, min ngaihtuah suh."


A aw chu a thâm chhâl a, a zàwi viau bawk. A mit erawh a meng chuang miah lo.


"Ka hawsan dáwn lo che."


Ka țhut hnaih sauh a, a kut vawt thlar chu ka vawnsak a. Ka inchhîr telh telh mai, a thu sawi kha lo awihsak mai ila, hetiang hian a awm kher àwm si lo.


"Ngaihtuah ka ngai lo."


"Ngaihtuah ngai lo la chuan ka kalsan daih tawh ang che."


A mittui, a bek lama luang thla zãih chu ka hmu chiang ngang mai, ka inthiam lo sauh a, ka khawngaih hle bawk.


"Nâ i nei em?  Mawh, sawi teh?"


A ngawi reng a, a meng bawk lo, a mittui erawh a luang zêl a.


"Hlimhlim, khawi lai nge na? Sawi teh."


"Ka rilru, taksa leh thlarau , a vaiin a na vek."


"Keimah vàng a ni tiraw?"


"Ni lo, keimah vàngin."


"I thu sawi ka awih duh loh vàng a ni tiraw?"


"Keimah leh keimah ka intina a ni."


A bulah chuan ka bawk thla ve a, a lo meng chhuak a, a vai deuh riaiin ka hria.


"Nang chuan thiam lohna i nei lo."


"Sawi tawh suh, a tâwk tawh rih."


A bulah chuan kiu-a inbeng kângin, a sîr zâwngin ka mu a, ka kut lehlam erawh chuan a beka mittui luang leh ngiai ngiai țhìn chu ka hrûksak a.


"Ka kuah lum ang che aw."


Ka pheikhawk tlawh phelhin ka inthawlh ve nghal, min hnial hman lo hrim hrim. Min hnial chiam tùr pawhin chakna a nei lo ang.


A ke vawt ngiai chu ka kein ka tlawhsak a, ka lam hawi thei tùrin saisîrin ka muttîr bawk a, ka kuah nghal zat a. Ka âwm nghènga a thâwk deuh ham ham chuan nuam ka ti ngei mai,  ka ni deuh veng veng.


"I theih chuan muthilh tum rawh, eng thil mah a thleng lo ang."


A chau ngang a nih ka ring, a muhìl deuh nghal mai. A samah chuan duat zetin ka fâwp a, tunah tak hi chuan he nula duat bâk hi ngaihtuah ka nei lo. Engtin nge a thil sawi kha ka lo lâk kawihsak zêl theih ni? A derthàwnzia ka lo hmu miah lo hi mak ka inti, ka mit hi kha pa nèn an infawh, ni lo, kha pain a fâwp lui ka hmuh ațang khân a lo del chiang hle a lo ni.


Keimah vàngin zàn a mu thei lo va, a chak lo hluah hluah a ni. Vawiina thil thleng kha a chhûngte leh țhiante'n hre ta se, sual min ti ngawt ang. Nia, a chungah hian ka lo râwng deuh hlek chu a ni, a sawi kha a dik.


A muhìl chiang ta maw tihah chuan dìm têin ka thawhsan a, Bawihtei ka phone nghal.


A chhan chu taksa chakna tùr leh thisen siam tùr chaw țha ka duh. A ei a ngai, a exam dáwn si a, hetia taksa chàu em em chung chuan engtin nge lehkha pawh a zir theih teh lul ang?


"Bawihte, khawngaihin, lo chhuk zâwk mai teh, car kha rawn khalh mai rawh, fîmkhur takin i rawn khalh dáwn nia."


An ei tùr neih ka check-sak a, an lo la nei ve nual. Apple pum khat a lo la nei, ei zawh a hun tawh asin. A la ei phal lo a ni ngei ang, ka va lainat reuh tak!


Bawihtei lo thlen hnuah chuan khua pawh a tlai lam deuh hlek tawh a, che thei ziazang a la nih loh vàngin Bawihtei chu eirawng ka bàwltîr ringawt, kalsan ka ngam lo, ka phal lo a ni zâwk mah. Ka kalsan hlànin a lo chau leh thut ang tih ka hlau tawh.


A mutna bulah ka țhu a, a hmel chu ka thlîr vang vang. Tunah la muhìl mah se, a lo harh hunah chuan a harh chiang tawh ang a, pángngai takin a awm theih tawh ka beisei. Ei tùr țhate eiin lehkha pawh a zir thei tawh ang chu. A rilru ka tihnatsak zawng zawngte ka tidam leh ang a, a hma aiin ka duat sauh ang.


A rawn meng a, a khap deuh sak sak a.


"Hey, i lo harh tawh maw?"


Min en vang vang a,"I ni tak tak em?" a ti thâm sep a, a mit chu a khap fak fak a.


"Ka ni tak tak."


"Eng nge i lo tih a?"


"Ka ngai tawh che a."


"I ni tak tak lo!"


A kut chu lâksakin ka hmai ka chùltîr dan dan a.


"Ka ni tak tak alawm, Bawihtei pawh a lo kal asin."


"Ka thu sawi i awih loh kha."


"Ka awih tawh."


"Engati nge ka mut a? Ka dam lo em ni?"


"Dam e, i chau a nih kha. Ei tùr Bawihtei siam i ei ang a, i chak sawt sawt mai ang."


Bawihtei a rawn lût ve a.


"I harh tawh maw? Ei tùr ka siam țeuh a nia, i ril a țâm em?"


"Ka hre lo."


A hnu deuhah chuan  ka kai tho a, a lu  a hai a ni maithei, a maimichhîng vang vang a.


"I țha em?"


"Aw, tlêmin ka lu a hai deuh a."


"I bp check a ngai a nih chu. Thil i ei ang a, i zia sawt sawt mai ang."


Bawihtei haw hnuah pawh kei chu ka la awm zêl. Muansanga lo haw chuan ka lo awm ve chu min en leh zauh țhìn nain eng mah a sawi chuang lo. Zanriah eiah min sâwm ve nghal a, a pawi pawh ka ti vak lo.



(THIL ȚHA TIH NÂNA HUN ȚHA BER CHU TÛN HUN HI A NI.)