☆MAGDALENE☆- 22

☆MAGDALENE☆- 22 By Dingdi Pachuau



"Ka lâwm e, Julian. Mi țha tak i ni, mi țanpui duhna rilru i nei hi ka chhuang tak zet che a ni."


"Nangmah ațanga ka zir chhuah a nih hi. Nang hi tawng lo che ila chuan hetiang tih nachâng hi ka hre miah lo ang, làwmthu ka hrilh mawlh mawlh che."


Ka âwma a hmai nawr châk châkin,"Julian, miin min en duh teh a nia," a ti ta sap a.


"Min en peih chhûng chu min en mai mai rawh se! Ka rilru ang hi nei ve ta se, an kuah lo thei lo ang che."


Car-ah lûtin kan in lamah kan chho a, kan rilru a hlim dùn bawk a, kan khi sâng reng mai.


Bawihtei leh Nonoi nèn kan chhuakho leh ta a, kan vênga hmeithai pakhat kan țanpui leh dáwn a ni.


Mi inhnuai luah a ni a, a theih ang angin pheikhawk chhe siamin a inhlawh ve țhìn. Chhûngkhat laina a nei tawh lo va, a tar reuh tawh bawk sia, Bawihtei'n țanpui tùra a thlan a ni.


Electric blanket, mawza lum leh shawl kan pe a, pawisa fai Rs 5000 leh ei tùr țhahnem tâwk nèn, a lo lâwm khawp mai a, mittui tla chungin min chibai diat diat a.


"Àpi, nu i nei tawh lo em ni? Unaute pawh?"


Nonoi țhìn hi chu aw.


A mittui hru zauh zauh pahin," Aw, Bawihte, vànah an kal vek tawh a, kei pawh an hnênah ka kal ve țêp tawh," a ti boh boh a.


"Àpi, khua a vâwt sia, shawl lum kha sin la, ei tùr kha i ei țeuh țeuh dáwn nia. Zànah blanket kha i on ang a, a lum nuam tawh viau ang."


Kan țawngțai a, ka țawngțai khàtzia ka hre chhuak hnuhnawh.  Sunday tin inkhâwm ve țhìn mah ila țawngtai hi ka thil peih loh a nih vàng hian ka țawngțai ngai lo tluk a ni.


Car chuan ka tlan kualpui a, X-mas hla ka play dap dap a, anni chuan an lo zaipui ve a, Bawihtei phawk a chhuak leh pek, hla hril pahin a lâm a, Nonoi leh Hlimhlimi'n an nuih tlâwrh tlâwrh thung a.


Zanriah kîl hmain ka pain chhûngkaw inkhâwm hun a hmang a, làwmthu sawiin a țawngțai a, kan thil tih ropui a tihzia leh mite tân malsàwmna nih a inchhìrawm lohzia a sawi pah bawk a. Hlimhlimi chuan a lo ngaihthla ngun kher mai, ka pa thu sawi chu a en kar reng a.


Hlim takin zanriah chu kan kîlho a, Hlimhlimi chu ka nute chuan an be barh barh reng a, chhûngte hriatpui thlap bialnu neih chu a lo nuam bîk teh e, amah a lo fel bawk si a, a fel over chuang miah bawk  si lo.


"Zanin kan kan ur lâwk ve dáwn lo em ni?" Lawmkimi a lo ni a.


"A țha alawm, lo chho la, Ațana erawh a ITI ka ring."


A rawn nui hak hak a.


"ITI ti țuah hum reng mai," a ti phawt a," Eng zât nge kan nih dáwn?" a rawn ti leh a.


"Ka nu leh pa, Bawihtei leh Nonoi, Hlimhlimi leh nang, kan vaiin pasarih kan nih chu."


"Bialpa neih loh chu a buaithlâk tlat, urlâwk zànah kan hawihil reng zêl a."


Ei tùr leh present tùr nèn, a rawn thawk chho rip khawp mai. Present min pe vek a, kei pawhin ka pe, a nuam ve hranpa rêng rêng e.


Zàn mut dáwnah Nonoi hian a khum bulah thlèng a dawh ziah, urlâwk zàn apiangin. Chìn țhanah a neih tawh a, Bawihtei'n a fuih phùr phei chuan thlèng 5 lai te a dawh tlar pût țhìn.


Ka nute mut hnu leh Lawmkimi haw hnuah chuan Bawihtei chuan chance min pe ve ngei a ni, a room-ah a lût ta daih a, keini pahnih chuan shawl lum inzàwn chungin bathlàrah kan chhuak a, thla eng deuh ruai hnuaiah chuan hmangaih biahthu dî kan inhlan mawlh mawlh a.


"Zàn chhinchhiah tlâk tak a ni."


"Nia, tiraw? Zàn mai ni lovin ni chhinchhiah tlâk tak a ni bawk ang chu."


"Hmeichhia, ka hmangaih tih ka hrilh hmasak ber nî a ni bawk."


"A nuam é," tiin a hnung zâwng chuan min nghèng ar ar a, kei pawhin ka bân pahnih chuan ka kuah a, ka kuah fet deuh hlek a.


"I va fet roh tak!"


A kokia ka khabe nghatin," Fet lo tak ka ni, hei thla eng zât nge kan inzui ve tâk? Vawi khat tê pawh ka la fet chhin miah lo a nia," ka ti sup a.


"I fel ka ti țhìn a nia."


"Fel loh deuh hlek ka duh tawh!"


A nui tih ka hria, ka huangtau ve sawt, ka kut veilam chuan a kawr lum hâk tlâng ațang chuan ka zen chho dà dá a.


A lo man chat.


"I kut a vâwt si!"


"I taksa ka dek ang a, a lum mai dáwn alawm, min khawngaih lo em ni?"


Kan kut chu a insual deuh fat fat nain ka hneh ve chiang ém! A biang chu ka biangin ka tawhsak a,  a zâ a ti a niang, a tawm châih châih a.


"A zâ i ti a ni maw?"


"Aih...aw, ti deuh tho."


A thaw deuh halh a, a chhan ka hre chiang khawp mai. Hmãna ka nihna kha a lo lêt țan deuh tlat, zanin chu a boruak hian a zir ém a ni, ka duh leh ka hmangaih ém ém hmeichhia a ni bawk si.


"Ka duh tak zet che a ni."


Min chhâng lo mah se rawn thle deuhin min rawn fâwp zauh a, a tih dàn tê chu ka duh reuh khawp mai a,  fawh zauh duh tâwk ve lo chuan ka fâwp vawng vawng thung a. Chumi pah chuan ka kut pawh a awm mai mai bîk lo, kan inzui ațanga ka vawi khat khawihna a nia, ka duh tâwk thuai dáwn miah lo.


"A țha...miah...lo," a ti sap a.


"Eng chu?"


"Kan awm...dàn hi."


"Țha ka ti viau asin."


Thaw halhin," Kan insùm theih loh chuan..." hriat theih che che hian a ti sep a,  a thaw lum ham chuan phùrna mak tak min siam tlat.


"Ka duh che a, min duh bawk chuan thil thleng thei lo a ni hlei nem."


"Mahse, ka duh...tawh lo va."


"Kei chuan ka mamawh che asin," tiin râwp zet hian ka fâwp leh nghal zat a, chumi pah chuan ka kut chuan a âwmbâwr chu ka chûl kual ruai a. A bra hâk pawh ka nawr tawm chho vek tawh, a taksa mâm hen chùl chu a nuam tak zet.


Thaw hawkin," Julian..." a ti a, a er ngàng ngáng reuh a, ka mal chungah a țhu tawh. Kan shawl sin pawhin min peih lohsan tawh, chhuatah a tla daih tawh a, kan ngaihsak chuang lo.


"Magdalene, min ti â zo vek tawh!"


A nui ta hak mai, a nui ri sexy-zia chuh!!


"Ka duh lutuk! Min ko leh teh?"


"Magdalene, ka Magdalene i nih hi!"


Min fâwp vang vang a, chutah, tàwp thutin," Julian, kan insùm a ngai. I insùm theih loh tal pawhin keimah zâwk hi ka insùm a ngai," a ti vat a, shawl chu chharin a ding sawn ta nghal a. Ka kut chu a vâwt nghal ta rawih rawihin ka hria.


Kei chuan eng chena thui pawh thleng ila pawi tihna ka nei hauh lo, pawi tih ahnêkin ka tâ ni se, ka nula ni se ka duh daih zâwk; mahse, amahin rem a ti rih lo a nih chuan ka nghâk mai ang chu.


A bulah kal hnaiin a kàwngah ka kuahsak a," I duh lo chung chu tihluih che ka tum miah lo, ka nghâk thei che alawm," ka ti sup a.


"Ka lâwm e, vawi khat ka tisual tawh a, tihsual nawn leh ka duh tawh lo a ni. Ka duh lo che tihna ni lovin Pathian duh loh zâwng a nia, ka tisual nawn leh ngam tawh lo a ni, ?min hre thiam hrâm rawh aw," a ti sap sap a.


"Ka hmangaih che, ka rilru aiin i rilru a puitling daih zâwk a nih hi, ka tluk lo hle mai che."


Ka bân bêng taih pah chuan," Kei chuan ka tisual miau tawh alawm, hre reng chunga ka tihsual leh si chuan..." a ti vang vang a.


"Mahse, ka khawih leh châk tho."


"Heyyyy..!!!"


"Khawih ringawt te chu..."


"Naupang chhia lutuk!"


"A ral thei chuang hlei nem."


A nui leh ta hak hak mai. Rawn inherin," Ka nuih i tiza roh e, heti chena upa ve tawh si," a ti a, rawn dingdihlîpin ka nghâwngah a bân pahnihin a rawn kuah a.


"Ka hmangaih che, Julian. I lawmawm viau rualin i nghal ve tho bawk si. Hetiang hi i nih ve dàn hrim hrim em ni?"


"Nghal ve pângngai."


"Ka rin dàn chiah."


"A ral theih chuan loh kha, phal ve mai la?"


"Nghal over!"


X-mas hun hlimawm ber ka ti lo thei lo. Ka hlim bâkah ka bulah ka hmeichhe hmangaih ém ém a awm ve bawk a, hlim lo rual ka ni lo.


Inkhâwm bânah thlate kan la ho tal tal a, Hlimhlimi thla chu ka la tam bîk asin, X-mas present ka pêk kawr ngei mai a ha a, a inhmeh bawk si. A necktie min pêk ka awrh ve zar a, mi hriatpui lêm lohin kan hlim dùn ém ém a ni.


Dàwrah pawh ka bialnu a ni tih an hre tawh a, customer awm loh kârin Kimtei a tawrhhlelhawm thei khawp mai, Hlimhlimi  a sen nasa thei lutuk a, ka lo khawngaih țhìn.


"Fiam chiam tawh teh suh, i tikhawngaihthlâk ém mai."


"Boss, lo țan viau lo la, ka tih dan ve pângngai tih i hriat tho kha."


"Hawi ngaihna pawh a hre lo lek lek țhìn alawm le!"


"I țan si!"


Hlimhlimi kan bula a rawn phei tâk avàngin kan thil sawi chu kan duh tâwk ta rih a; mahse, a rei lo kher mai.


"Hlimhlim, Boss chu a zei ropui tawh dáwn sia, i inzir ve fé chu a ngai tawh ang," a ti leh pek.


"Kimbawng!"


"Eng nge sawi dik loh ka nei em ni?"


"Duh tâwk rawh, kum tling lo bulah khatiang kha sawi chi em ni? I sawi leh a nih chuan ka mantîr ang che."


Amawia nuihza lutuk chu a lo nui dîr tlat tlat a, Hlimhlimi pawh a biang sen tât a kuta dawm chungin a lo nui ve tho a.


"Ka hlau lo teih teih."


"I sawi leh a nih chuan noodles a chhum pawh i ei tawh lo ang."


"Aaa, Boss, ka tlâwm, ka sawi tawh lo ang."


Urlâwk zàn tih loh kha chu kan inah a riak lo va, an in luah hi a him tâwk a; mahse, Bawihtei'n a riahpui zauh zauh thung. Amah mai chuan ka ngaihtuah deuh hlek a, keiin riahpui thu a awm si lo. Riahpui chu ka châk zâwng tak ni mah se, amahin a duh lo hulhual. Ka chhûngte a zah bâkah inngaizawng riah dun chu țha a ti lo, 'thlêmna do zawh a har' a ti tlat.


A ni têlin ka duhna a zual telh telhin ka hria. Naupang chhia viau țhìn mah se, a ngaihtuahna a puitling țhìn ka tia, thil a ngaihtuah thui phian ka ti bawk. A nun ațangin thil tam tak ka zir chhuak tawh a, ka tawng hi ka inchhîr chhin lo rêng rêng.


"Nang hi mihring zînga angel thla nei lo lo piang i ni ngat mai!"


A nui hak hak a.


"Angelte chuan thil an tisual ve ngai hlei nem, kei chuan thil ka tisual rem rum alawm."


"Mihring i ni ve tho a, a famkim theih loh alawm."


"Ka tân pawh angel i ni ve tho."


Apple țhial hmarh hmarh pah chuan," Angel hmelchhe chi, chutah pawh biang hmul nei," ka lo ti a.


"Teuh lo, angel hmelțha, pà zet leh hmangaihna ngah tak, hmeichhiate duhthusâma țha."


Ka mitko ka lo sàn ãwk ãwk a.


"Eng nge, ka sawi dik reng alawm."


"O-V-E-R."


"Not O-V-E-R"


Kan nui hawk hawk a.


"Zanin chu ka riahpui ve tawh ang che."


"Pathian hlau rawh!"


"Ka riahpui vàng chein ka khawih dáwn che tihna a ni lo."


Awih lo zet hian min melh a," Kha, i ngaihtuahna kha i mitah ka hmu thei vek a nia aw," a ti a.


"Ka mitah hian hmangaih lêng noh noh bâk i hmuh ka ring lo ve."


"Kha, ka hmu reng alawm, bawlhhlawh ka hmu."


"I rilru a bawlhhlawh zâwk a nih kha. Ka ngaihtuah thlen phâk miah loh min ngaihtuahtîr i tum tlat a, min sual hi i tum reuh ang ka ti, ka hlau deuh reuh che."


A nui ta vak vak a, hetianga a nui hi vawi hnih ka hmuhna a ni ta. Za lutuka a nuih hian nuam ka ti; mahse, mi dang bulah chuan tuna a nuih ang hian nui ve lo se ka duh thung.


A theih anga intino chawpin," Zànah i mutnaah ka rawn kal ang a, i ke lèr ațangin ka rawn chûl che ang a, ka rawn liak pah che ang a," a ti a, a'n meng sexy kual vêl a.


"'Siai tak a' ka lo ti ang a, ka lo bawh chat mai dáwn che alawm."


Ka riah a phal miau loh avàngin ka haw leh ta nge nge. Haw kawngah chuan ka ngaihtuah chho a, ka insûm thei ta lutuk hi mak ka ti thar ta tlat. Chubâkah, nula dang hi ka melh ta ngai miah lo a nia, pakhata heti ém éma ka tlei ta mai hi mak tih loh rual a ni lo; mahse, ka hang ngaihtuah chiang a, a mak leh si lo ve. He hmeichhia hi chu ka hmangaih tlat a ni, mi dangte kha chu hmangaihnain ka en tlat lo hlawm a, an taksa îtnaa ka khah vàng mai mai a lo ni.


Muansanga rawn phei hnuah erawh dàwrah chuan a rawn kal tawh lo. Muansanga pawh class kal țha tùrin ka ti a,a hma ang thova zîng kârah dàwr hawnga Amawiate thlen veleh class kal hman tùra hãwng tùrin ka ti leh.


Chhùnah erawh Hlimhlimi chu a hman phawt chuan lunch break-ah a lo kal țhìn. Noodles min chhumsak ziah a, a châng chuan Bawihteite'n an rawn rawn ve bawk. An țhianho pawhin kan inngaizawng tih an hre vek tawh a, ka hriatah chuan min fiam ngai lo va; mahse, Hlimhlimi bulah erawh min lo sawisa nasain an lo fiam nasa țhìn a ni àwm e.


Ka hriatah chuan Hlimhlimi hnâr chu a thî leh tawh lo. Ka zâwt ve ziah a, ka ngaih a țha zân lo tih a hre ve tho va, a thî lo tih min hrilh ziah, dâwt min hrilh lo tùrah ka ngai.


Bungrua  lain kàr khat lai ka zin bo a,  ka buai reuh phian a. Hlimhlimi pawh ka duh anga zingin ka phone thei lo va, thil țha deuh erawh hawn ka tum ràn a.


Ka haw dáwn zanah chuan Hlimhlimi chu ka phone a, min chhâng thei miah lo. Switch-off a ti tlat, engtizia nge ni, a phone a off ngai ka hre si lo. Ka thil hawnsak chu hrilh ka tum asin le, pawi lo, naktûkah ka haw tawh dáwn tho, a hmuh hunah chuan a làwm ve ngawt ang chu.


In ka thlen chuan ka chau ve raih mai, nilêng zankhua maia motor-a chuan chu ninawm tak hi a ni, mawng a kham thîp hlur maiin ka hria. Ka nute chuan min lo buaipui nghal a, ka bungraw hawn erawh naktûka dàwra unload tùrin kan inbe fel a. Ka peih rih lo, ka chàu ém mai.


Min hmuh veleh Bawihtei chuan," Tàte, Hlimhlimi damdawi inah a awm a, vawiinah a chhuak chiah," a ti a, ka phu zawk mai!


"Engtin maw?!! Engati nge min hrilh loh? A țha em?"


"A zia tawh. A  hnâr a thî a, a luhai nikhaw hre lovin a tlu a."


Ka hlauhthàwn ang thil a lo thleng leh ta maw, ka phone tlang theih miah loh chhan kha hei vang hi a ni ngei ang. Ka insiam sawk sawk a, chauh pawh theihnghilh țhakin, thil dang ngaihtuah lovin ka tlân thla ta nghal a.



*A CHÂNG CHUAN HLIMNA HI MITTUI TAM TAK A TLÂK HNUAH CHAUH KAN HMU ȚHÌN*