☆MAGDALENE☆ - 24

☆MAGDALENE☆ - 24  By Dingdi Pachuau

Kan chhuah hnu chuan," Kha doctor kha a fel e tiraw? Doctor ni àwm hliah hliah a ni," a ti siam siam a.

"Ka dinhmun a tiderthâwng deuh elo?"

"Teuh lo! Nang chuan dinhmun sâng ber i luah reng alawm."

"Dam vat i mamawh a nia."

Car-a ka țhuttîr hnu chuan ka țhu lût ve a, nui seih chung hian," Kan inneih hi a hnãi tawh si a, dam vat vat chu ka mamawh rêng a ni, pasalte ina damloh luh nghal chu ka duh bîk miah lo," a ti a.

"Chûng zawng ai chuan làwițhat zàn mawlh kha a ni zâwk."

A sen ap ap mai, a zak sen ap ap chuan min tilâwm zâwk. A biangah tisen a awm thei tawh a nia.

"Damdawi in lama kan hman loh hrâm ka beisei, làwițhat zàn damdawi ina hman chu a fuh lo ngawt ang!"

"I țawngțai țhat hle a ngai a nih chu!"

Ka nui hawk mai. Ani ka tawn ațang hian ka țawngțai zing ve ta riau tih ka ngaihtuah a, khâng hun kal ta zawng zawnga ka țawngțai zât kha chu chhiar tham a ni tak tak ang chu! Tunah chuan kei lo ang takin a rûka hlauhthàwnna leh manganna riau ka neih țhin vangin ka țawngțai ve ta zauh zauh.

"Tluang taka kan inneih theihna tùrin ka dîl țhìn asin, kei mi sual țawngțaina min chhànsak duh a nih ngai chuan."

"Thinlung taka i dìl phawt chuan chhàn duh loh a nei hlei nem. Kan ring zo lo țhìn ém mai pawh a."

Ka chhûngte an phûr ém ém a, a bîkin Nonoi. Kawr a ngaihtuah a, ka nuin Bawihtei leh Nonoi leh a tân  thawmhnaw a order a, chu pawh Lawmkimi tihtîr a nia, Lawmkimi a fel khawp mai. Hlimhlimi incheina tùr zawng zawng a kuta dah tùrin min ti a; mahse, han pumpêk ringawt chu a dikin ka hre si lo. A awihawm loh hial zâwk, a inpe zo leh lutuk a.

"'Ka thû ngawt ang' ka tih tawh kha, ka țhian țha i ni a, ka tih theih ve tâwkah chuan min hnial miah suh," a ti tlat a, ka hnial ngam ta lo.

"Ka hausa a, nangni tân ka hman ve loh chuan hmanna tùr ka nei lo bawk. Ka țhiante tâna ka ui tlat chuan engtin nge ni ang? Nakinah pasal ka neih ve hunah pawh nangni bâk pùr tùr ka nei dáwn si lo va, ka lo inhmang hmasa rih a nih hi."

Hlimhlimi bulah chuan inneih thuam chhawm a ngai lo tih ka sawi lâwk vek a, chu chu rilru helhkamah an lo nei ang tih ka hlau a ni. An chhûngkaw rilru put dan tùr chu hre thiam lo mah ila ka thil sawi chuan awmzia nei se ka ti; mahse, Hlimhlimi nu chhûngte lamin 'chutiang ringawt a ni thei bîk lo' an ti tlat a. Nia, an rilru damna a nih phawt chuan an duh ang chuan rawn chhawmtîr se, rilru damna hi a hlu ngai e.

Ațana pawh a hna lamah buai viau mah se thian țha nih a tlin e. Engkimah min puiin a țangkai khawp mai. Eng dang zawng aiin inneih niah  Hlimhlimi a dam țha lo ang tih ka hlau, inneih inkhâwmah a chàu mai ang tih ka hlau a ni.

Mahse, ka rin aiin a chak chho chak leh reuh si. Amah hian a tum ve ém bawk a ni, kan inneih hma kâr chiah ațangin class pawh a kal peih ve ta a, kei chuan ka la remti lo viau nain chawl rei tawh a inti ve tawh si a, a kal ve ta. A hnâr a thî leh ang a, a chau leh mai ang tih ka hlauthâwng khawp mai a; mahse, chutiang chu a thleng bîk lo.

Zàna ka lèn chuan hlim hmel pu deuh hian min lo làwm a, vawiin lama a hun hman dante chu a sawi siam siam a.

"Ka țhiante hi an phûr over tawh a, kan zînga pasal nei hmasa ber tùr ka nih vàngin min fiam reng bawk sia, an ninawm tak tak a ni. 'Làwițhat zàn chanchin engkim kan hre duh ang' an ti leh tlat pek a."

"Engkim i la hrilh vek dáwn nia."

"An tizahthlâk tak tak!  Sawi chî pawh ni nghal lo chuan maw le."

"Kan inneih zawha an zâwt che a nih chuan ' sawi chî loh, tawn chauha hriat chi' i ti dáwn nia. Chuan, vawiin lam i chàu em?"

"Aih, ka chàu miah lo, ka țha tawh tak zet a ni."

"Ka țawngțai nasa ém a ni."

"A va làwmawm tak! Chuvàng a nih chiah chu, i fel ngawt mai."

"Nang hi tawng lo che ila chuan țawngțai hlutna tak tak leh țangkaina hi ka pawh tak takin ka ring lo. Ka tâna ruat hi chu i ni chiang alawm."

A nui sen sen a.

"Pathian hi ka tân a țha ngawt mai, nang hi ka pasal ni tùrin min lo thlansak che a ni a, ka vànneihzia hi ka chhût chhuak thiam lo zâwk. Nula zawng zawngin min thîk ang a, mi zawng zawng vànneih tih ka ni bawk ngei ang, ka ni ngei bawk sia."

"Mahse, ka bula i chèn tak tak hma chu ka ngaih a la ngam zân thei lo."

"Kâr leh tûn ang hunah chuan kan awm dùn tawh dáwn asin. Ka ngaihtuah chian hi chuan ka nervous leh tlat zel a nih chu."

"Kei min neih hi maw?"

"Pasal neih hi maw le. Ka phùr rualin ka huphurh a."

"Ka huphurh loh nèn aw."

Nui chung hian," Nang chu mipa i nia," a ti leh a.

"Nang hmeichhia i nia, chuan?"

"Hmeichhia chu ngaihtuah tùr a tam alawm, ka sawi thiam chiah lo. Mipa hriat si loha buaina tam tak a awm ka ti mai ang."

Zan ka mut dáwnah Melo-i'n min rawn call tlat mai!

"Nupui i nei dáwn tih ka lo hria a."

"Aw, nei dáwn e."

"Min sàwm ve pawh i tum lo a ni maw?"

Nia, ka lo hrechang tawh miah lo.

"Mi ka sâwm vak hlei nem," ka ti ta ringawt a.

"Ka hre thiam che alawm, min sâwm lo mah la, lawmpuina thu tal rawn hrilh che ka duh a. Ka lawmpui ém ém che, U J. Mi fel tak i nia, i nupui pawh mi fel tak a nih ka ring bawk e."

"Ka làwm e, i fel hle mai."

A nui hak a, nuihzat vang chu a ni lo chiang.

Buai viau tùr ka ni na a, ka buai lo tlat. Ațana leh Lawmkimi an fel, engkim an buaipui a, ka leh àwl dêr mai. Ka phûr a, phûr viau e ti lovin Hlimhlimi doctor Pu Dika ka call peih khawp mai. A chhan chu ka hlauthâwng a, kan inneihnaah a buai ang tih ka hlau a ni. A bîk takin ka sâwm ringawt, ani doctor thiam a lo tel ve chuan thil thleng thut pawh lo awm mah se, a buaipui thiam deuh tùrah ka dah ringawt.

Kan inneih ni chu a lo thleng ta ngei e. Ka ute chhûngkua pawh an rawn chho a, kan chhûbgte hmun hrang hranga mi an rawn kal țeuh bawk. A làwmawm ka ti, ka nupui neih min rawn lawmpui tùrte an ni a, an tițha ka ti hle a ni.

Mo leh a țhiante incheina tùr hi ka hmuhpui miah lo, Lawmkimi'n a phal tlat lo va. Ka tilui duh bîk lo, kan inneihnaah ka hmu mai a niang chu.

Biak inah kan innei lo, leh tlat mai a. Lawmkimi'n Wedding hall a hawng thar a, chu chu keini hian kan hmang hmasa ber ta a nih chu. A hall hman man leh a cheina zawng zawng amahin a tum vek a, ka tân a insêngso a ni tawp mai, țhian țha hi an lo hlu tak zet tih ka hre chiang thar leh ta hle a ni.

 Mo lo luh hma zawng ka rilru a nuam thei lo, ka hlauthâwng zek zek mai a ni. Piano ri mawi zetin 'From this moment on' a tum rîk tâk riai riaiah chuan kawngka lam ka hawi vat a, khawvêla hmeichhe nalh ber chu a lo lût ta hnalh hnalh e. Lawmkimi hian min barakhaih hnehsawh lutuk a, tunah pawh hian min tithidang lo chauh a ni e.

Ka hmangaih chu a va inhmeh ngawih ngawih tak! A inthuamna chu a inhmeh tak zet, a lak ațangin ka mit ka la sawn hlei thei lo. Ka hlauhthàwnna zawng zawng chu paih bo ang duak a ni ta, hlimnain min rawn tuam hlawp hlawpin ka hria.

Inneih thutiam kan chham laite chuan ka chham uluk khawp mai a, ka thu chham chu hall chhûnga awm zawng zawngte chuan hre vek se ka duh, ka chham ring viau bawk. A thu chham lai chu ngun zet hian ka lo en a, a kut khùr deuh dar dar chu nghet zetin ka vuan tlat a.

A rei hran lo ve. Ka hlauhthàwn ang thil a thleng lo va, ka lâwm hle a ni. Inkhâwm hunserh a zawh chuan ka thaw huai mai, Hlimhlimi hi chu a chau ngawtin ka ring. 

Min lawmpuitute chuan min chibai nak nak a, Dr. Dika pawh ka hmu a, min rawn chibai ngat a.

"Ka lawmpui hle mai che u, Hlimhlimi pawh a chak sâwt viau a, a làwmawm ka ti tak zet a ni."

"Kan làwm e, i lo tel thei hi ka lâwm hle a ni," ka lo ti vat a.

Thla kan la chuai chuai a, Lawmkimi chu a intithu hle zêl. Engkim a ruahman fel thlarh mai a, buai nuai nuai a awm lo. 

Zàn lam party tih erawh ka hnial fithla hmak. Hlimhlimi hi ngaihtuah a ngai, chhùn lam boruak hian a tichàu tâwk viau ang tih ka hria, zàn lama hun hmang leh zel tùr chuan a la chak tâwk lo tlat.

Min lawmpuitute hlim hmêl pu reng chunga a hmachhawn thei reng chu ka fak a, ka chhuang viau bawk. A chau dáwn tih ka hria; mahse, a hmêlah engmah a tilang duh miah lo chu  ka chhuang tak zet a ni.

Zànah chuan a chàu viau ta rêng a, khuma a bawk thlar mai ka hmuh chuan ka khawngaih lutuk.

"I chàu si a, i muthilh hmain intleuh lawk la, i harh deuh huai maithei asin. I chàu lutuk pawh a zia ang."

"Um, ka rin aiin ka chàu daih mai."

"Ka pawm tho ang che aw."

Bathroom-ah chuan ka pawm lût a, a che a zàwi raih mai. A chàu hle a nih dáwn hi.

"Damdawi ei phawt la, i muhìl dáwn nia."

Damdawi chu ka lâksak a, ka eitîr hnuah ka muttîr dáwn a, țawngțai a rawt ta tlat a, kan țawngțai dun hnuah chuan ka muttîr a, kei pawh a bulah chuan ka inthawlh ve nghal a.

"Muhìl rawh le," tiin ka fâwp zauh a, ka kuah nghal a.

Min kuah lêt sat sat pahin," Ka lâwm e aw, zanin chu làwițhat zàn ka hmanpui thei mang si lo che a, min ngei em?" a ti sep sep a.

"Ka hmangaih che, làwițhat zan chu zan tin kan hmang thei tawh dáwn alawm, ka nghâk thei che."

A muhìl hma hle mai, a chàu ngang a ni. Kei erawh chu ka muhìl lawk thei lo, ka rilru a hlim a, a châng leh ka mumang a nih ka ring deuh thut thut thùl; mahse, ka awm nghèng chêtin leh ka kuah chialin a thaw sâk sâk a, ka mumang a ni lo tih ka inhrilh leh țhìn.

Zîngah erawh a tho hma ngang a niang, min lo thawhsan daih niin. Ka harh chiah chuan ka hrilh a hai khawp mai, ka ko va, a lo lût vat a.

"Morning, i lo harh tawh elo? Thingpui i duh em?"

"Morning, Sweetie. Lo kal teh le."

A rawn kal hnaih lai chuan ka lo pawt thut a, khumah chuan min rawn bawh nghal a.

"Min lo thawhsan daih a."

"Nia, mo thar tûka thawh tlài chu a zahthlâk dáwn ém a."

"Mu leh rih teh, a la hma lutuk!"

"Ka nu...a tho ve tawh a nia."

"Mu mai mai teh."

Ka bulah chuan ka muttîr a, puan pawh ka sinpui leh thlap a.

"Ka nuin min lo ngaihtuah ang e."

"Tunah tak hi chuan min ngaihtuah zâwk la. I la chàu viau em?"

A mitmeng nalh sir ser, zaidam zeta min melhin," Aih...ka chàu tawh lo," a ti sep a.

"Chuti, làwițhat zîng hmang ila?"

A nui hak a, min kuah châih châihin," Julian, ka nu a tho tawh ka tih kha," a ti leh sap a.

"Ani chu engah mah ngai suh, chuan, tumah an lo lût lo ang, i ngaih tițha lo suh."

Ka fâwp a, ka fawh pah chuan ka kut chuan ka chùl theih remchâng lai ka chûl nghal ruai a.

Ani pawhin min fâwp lêt a, ka chûl ang chiah chuan min chûl lêt ve zêl a, a hmel sen tàn tán ațang erawh chuan a zak tih ka hre mai.

"I lan sexy-zia hi i hria em?"

A thawmhnaw chu muangchângin ka hlihsak a, kawrhnuai a lo ha lo lehnghal.

"Duhawm reuh lutuk, ka duh dan chiah a ni."

Ka duhthawh lutuk chuan ka tina zâwk ang tih ka hlau a, ka insûm hrâm hrâm. Muangchângin ka chêtpui a, nizàn lama chau chhe dèr kha a ni si a, ka duh dan anga ka chêtpui chiam chuan a chauh belh dêr mai ang.

"Julian..."

Zàwi sî sapa ka hming a lam ruai mai chuan min tihlim a, min tithatho bawk. Kan pahniha kan vawi khatna a nih vangin a tân hriat reng tlâk ni se ka duh.

"Magdalene, ka magdalene..."

"Julian, ka..hma..ngaih che, ka ..ma..mawh che, tak zetin."

A țawng buai niai leh thaw tàwi hat hat leh biang sen tal mai ațang chuan a duh leh mamawh chu ka hre chiang khawp mai, ka nui sak a.

"I ta ka ni e."

*I NUN NGEI I THUNUN THEIH LOH CHUAN MI NUN SAWISÊLSAK SUH*