☆MAGDALENE☆ - 26

☆MAGDALENE☆ - 26 By Dingdi Pachuau



A exam tùr chu ka huphurhpui tak zet a ni. A zir ai hi zirsak thei ila, exam-sak thei ila ka ti. A zir ve nasa si a, ka ngaihtuah ém a ni, June ni vat vat se, exam zo tawh se ka ti ber mai.



Kâr lovah June thla chu a lo inher chhuak ve mai a, Bawihtei hi chu ka ngaihtuah lo. Hlimhlimi ber mai hi, exam laklawh laiin a buai ang tih ka hlau, ka lo hlauthâwng nasa mah mah a ni.



A ni khatna chu engmah thleng lovin a zo ve mai. Har pawh a ti lo va, a làwmawm khawp mai. A vawi hnihna erawh har a ti ta deuh, a tițha lutuk lo; mahse, pass a inring tho. A zia e, pass mark a hmuh phâk tho chuan.



A tàwp bera a exam tùr chu  a huphurh deuh a, a chhan chu a har a tih ber a nia, kei chuan ka lo hnèm malh malh thung a, a pass ngei ka rin thu ka hrilh mawlh mawlh bawk a.



Pâwnah ka lo nghâk a, dàwr lamah pawh ka kalsan thei lo. Ka rilruin ka lo țawngțaipui ve mawlh mawlh a, a pass hrâm theihna ka dìlsak.



A chhuakin min rawn hmuh chuan a meng phar ãk a, a rawn nui nghal sen sen mai.



"Min lo nghâk char char elo? Ka va khawngaih che."



"I ti țha àwm em?"



"Um, rin aiin ka chhâng thei a, ka lâwm tawp."



"Ka lo țawngțaipui mawlh mawlh che a."



"Űmm, chu vàng a nih chiah chu, i va fel tak!"



Bawihtei nghâk lo chuan kan kal ta nghal a, restaurant-ah ka chawlhpui a, a duh ber leh ei châk ber ka eipui a.



"I țhiante zaninah kan ina chaw ei vek tùrin ka sâwm tawh a."



"A ni maw? Nia, kan inhmu khât tawh dáwn hlawm e, a țha viau ang. Chutiangte a nachâng i lo hre bîk a, ka va tluk lo tak che!"



"I pasal hi ka fel alawm," nui chungin ka ti a.



"Fel chiangkuang e, ka vànneihzia hi."



Zànah chuan an hlim ve dar dar viau mai. A hlim hmel hmuh chu nuam ka ti a, a țhiante bula awm hi a tân pawh damdawi țha tak a ni.



Zànah a meng rei ve deuh a, zîngah a lu a hai chiai chiai tih a sawi a, a hnâr pawh a rawn za leh țan deuh a, a khua pawh a sik ser ser. Doctor Dika ka phone vat a, a chhan chu ani lo hi biakràwn tùr ka hre lo a ni.



Damdawi pêk tùr min rawn hrilh a, mangang lova amah tichi-ai lo tùrin min hrilh bawk. A chhan chu ka mangan chuan a lo chi-ai ve ang a, thil țha lo zâwk a thleng thei a ni.



Dàwrah ka kal lo va, Bawihtei ka tîr, nilêngin ka awmpui. A lu hai kha chu a zia leh mai a, a khawsik ber chu ka buaipui. Ani lah chuan dàwra kal tùrin min tur a, a lo inenkawl theih tùr thu a sawi a. Inah ka nu pawh a awm tho tak nain ka kalsan duh lo.



Tlai lamah chuan a khawsik a zia ta a, a inthlahrung khawp mai. Ka nu chu chêtpui a tum leh nghal ringawt a, ka phal lo chiang teh e.



"Ka zia tawh alawm, ka nu a che char char zel a, a khawngaihthlâk."



"Kei ka awm alawm, awm mai mai teh."



Zànah a khua a sik lo va, kan mu țha thei; mahse, amah hi a zawi ngiai reuh a, ka lainat ru khawp. A hriatah erawh chuan eng mah ka sawi duh lo.



A peih veleh Doctor Dika hnên ka panpui leh a, motor chuan lah chu a hreh ngawih ngawih mai.



"I hrisêlna check leh phawt ila, damdawi pawh thlâk a lo ngai leh tawh maithei a, vawiin chu tuar hrâm hrâm la, aw?"



Doctor Dika chuan hlim hmel sârh hian min lo chhàwn leh a, a bp check-in a thisen chu a lâksak a, a damdawi tùr pawh a ziahsak leh thlap a.



"In exam zo tawh em kha?"



"Aw, zo tawh e."



"I ti țha em?"



Nui chungin," Ka pass ve chang chang chuan ka ring," tiin a chhâng a, min rawn en a," Pasal neih hnua lehkha zir leh chu a tihchi vak loh," a ti a.



"Ka lo țawngțaipui țhat ém che kha!"



"Nia, a fel asin, doctor. Pasal fel tak ka nei a, ka vànnei asin."



"Nia, hei in vànnei dùn khawp mai. Nupa inhmangaih tak ni chho zêl ula ka ti. A nuamah pawh, a hrehawmah pawh tih ang khân hlim ni leh lungngaih mangan niah pawh inthlamuan tawnin intanpui tawn ula, nupa hlim tak ni zel rawh u."



"Kan lâwm e."



****************



September:



An result a chhuak a, an țhianho chu an pass vek. Ka rin aiin a tițha phian a, First division-ah a pass. Kan va
hlim dùn tak, ka lawmpui lutuk; mahse, kan hlimna hi a va rei lo lulai ém!!!



Ka nupui thisen cancer a ni tih hi rin harsa ka va ti teh lul ém! He natna hi eng vangin nge ka nupui duh tak hian a tawrh kher le? Ani chu mi țha tak a ni si a, kei hian tuar àwm zâwk tak ka ni, ka nunhlui țha lo tak tak ka ngaihtuah chhuah châng phei chuan he natna hi ka nupui aia tuar zâwk tùr ka ni asin.



Ka bulah a mu tlân a, a dawldâng a, tunah pawh a khua a sik leh tawh. Phaia kan zu kal khân thisen cancer ngei a ni tih min hrilh a, kan zuk awm rei phian lehnghal. Cancer a ni tih min hrilh phei chuan ka bîng chûk chûk a, ka mawl muih mai. Ka nupui fel tak hian he natna ngeiawm leh țihbaiawm zet hi a tuar ka phal lo asin. Pathian hnênah ka vui a, keimah ka inmawhchhiat a, ka nunhlui vàng khan Pathianin min hrem niin ka ngai leh a; mahse, engati nge kei ni lovin ka nupuiin a tawrh kher? Pathian hnênah a natna chu lâksaka keimah min tawrhtîr tùrin ka nawr a, a hnuah phei chuan țawngțai pawh ka țawngțai duh ta lo.



"Eng nge i ngaihtuah a?"



"Nangmah."



"Min nei hi i inchhîr em? Heti mai hi ka ni ta si a."



Ka khawngaih lutuk a, ka mittui a hmuh loh nân ka kuah a, a samah ka hmai ka phûm vang vang a.



"Ka la inchhîr chhin miah lo. Ka hmangaih che. Chuan, chutiang chu sawi tawh suh."



"Min nei lovin mi dang nei ta la, hlim takin natna enkawl pawh ngai lovin i awm thei ang a...kei chu enkawl ngai mai ka ni ta si a, ka khawngaih che a ni."



"Ka nupui, ka enkawl tùr i ni alawm."



A ngawi ta vang vang a, a taksa lum hem hem chuan min ur ham ham a.



"Julian, min țhen mai la?"



"Sawi suh!" Nghet takin ka kuah a, hetiang rilru puttîrtu a natna hi ka va haw tak em!



"Ka hmangaih che avàngin thlah zalèn che ka duh a."



"Zalèn ka duh lo!"



"Julian?"



"Sawi tawh suh, engmah ka ngaithla duh lo!"



Zanin chu hnem ngai zâwkin ka hnêm ve ta thung niin ka hria. A tawrh ang hi tuar zâwk ta ila ka down rawih rawihin ka ring, he natna zet hi chuh, ka va haw ngawih ngawih tak em!



"Pathian hi ka dem a ni!"



"Julian, keimah vàng chuan ni lul lo ve."



"Ka tawrh tùr zâwk a nia."



"Sawi theih kan nei hlei nem, a thu thua awm mai tùr kan nia."



"Natna  i tawrh ka phal hlei nem."



"Ani chuan natna kan tawrh te hi a phal a."



A țawng sep sep a, a khawsik chuan a la thlah lo tih hriat takin a pang a la sa var bawk a, a tawrh ai hi tuar thei ila ka ti tak zet.



Zîng ka thawh chuan a khawsik chu a lo reh tawh a, a pang pawh a dai riai e. Nizàn a muthilh theih hnu khân kei ka muhìl thei lawk lo va, google-ah thisen cancer natna lan chhuah dàn leh a enkawl dàn chu ka zawng kual a. Ei tùr țha chi hrang hrang ka en bawk a, ka meng rei ta zêk a.



Dàwrah rei lo tê ka kal zawk zawk țhìn. Ka kalsan rei ngai lo, ka chhûngte'n duatin ngaihsak hle tho mah se, a inthlahrung thei em em si a, ka awm chuan keima'n engkim ka tihsakin ka pui thei a, a zia deuh.



Doctor Dika nèn kan inhmuh ngun avàngin kan inkàwm ngeih tawh hle a, ka mangan deuh hlek chuan ka call mai țhìn. Ani pawhin Hlimhlimi chu a ngaihven em em a, Kolkata doctor kan zu inentîrna kha Dika țhianpa tho hi a lo ni, engkim an inhrilh tawn reng a, Hlimhlimi case phei hi chu an ngaihven viau a ni. Damdawi in leh kan in hi kan kàr tawn zak zak mai a, Hlimhlimi nu pawhin vawi hnih lai a rawn tlawh leh tawh a ni.



Ni 25 lo inher chhuak tùr chu ka huphurh tak zet a ni. Nikum lama a birthday kan hman dun dàn ka ngaihtuah lêt a, kan hlim dùn hle a nih kha. Khatianga hlim khân kan hmang leh thei ang em? Hmanpui leh ngei chu ka duh a, kan hma hun tùr kan hriat loh miau avàngin. Kan hman hun tàwp pawh a ni maithei a...



Hlimhlimi chân tùr ang hian ka inngaihtuah duh ngai lo; mahse, a natna hian zual lam a pan zêl si a, mihring thiamna hian a tidam thei meuh ang em? Kan theih ang ang chuan kan enkawl ve a, kei chu ka beisei hi a bo vawng vawng a, a hmuh loh leh hriat loh lai hian ka mittui a tla fo, a hmuh lai leh hriat lai erawh chuan ka fuih sauh sauh thung.



Ka chhûngte hian min ngaihsak thar ém ém a, ka pa hian min ţawngțaisak fo, ka beidawnzia a hria a ni ngei ang. Ka nu pawh hian kan lu chunga kut nghatin a țawngțai fo bawk, ka chhûngte hi ka tluk lovin min lo hmangaih hle a ni tih ka hriat chhuah thar phah bawk.



Ni 25 chu a lo thleng ta ngei e. Huphurh viau mah ila, lawmsaka làmpui leh ngei kha ka tum ruh hle.A hmain  Bawihtei  engkim min ruahmanpui tùrin ka hrilh a, ani pawh a lungchhia a, theihtâwp lo chhuah a tum thu min hrilh ve tho.



Zînga a lo harh veleh lo nuih sakin," Happy Birthday," ka lo ti sap a. A mit meng vài riai chu a khap sak a, a birthday a ni tih a hre chhuak ve chiah a niang," Ka làwm e, a lo thleng rang hle mai," a ti sep a.



"I upa leh sawt a nia."



"Nia, i kum ang chen kha ka la dam chho dáwn alawm."



Dam a la duhzia ka hriat hian ka mittui a tihnai ziah. Kan inen vang vang a, chutah," Thih ka la tum mai hlei nem," a ti ta a.



Thihna. He thu hi a sawi vawi khatna a ni. Amah pawh hian thisen cancer a ni tih a inhria a, a hriat țan tirh chuan a ngawi vang vang a, a rawn sawi hmasak ber chu ' Pathianin engkim a hria a ni' tih hi a ni. Eng lam nge sawi a tum ka hre thiam lo va, ka zawh belh ngam hek lo.



"Teuh lo, i thi dáwn reng reng lo, ka phal lo hrim hrim."



A ding reng reng hi a derdêp ém ém a, hei vàng hian ka muttîr ziah. A tlu palh hlauh ang tih ka hlau a, a inhliam hlauh ang tih ka hlauh vangin chemte leh thil zum, hriam lam reng reng a khawih ka phal lo bawk.



"Ka birthday chu a ni tak si a aw..."



A ngaihtuahna a sawi chhuak a nih chiah hi. Ani pawhin kum kal taa a birthday ka lawmsak kha a ngaihtuah  ve chiang mai.



Chhùnah Bawihtei'n sitting room chu a chei a, banner a târ a. Keiin ka hman chângin ka pui zauh zauh bawk. Birthday cake to deuh tak a order a, Hlimhlimi hriat erawh kan duh lo.



Chhùnah ka bual a, kawrfual a hâk zen zen loh, inhmeh ka tih ém ém kha ka hâktîr a, a lo thâwl hnak tawh mai.



"Ka lo thâwl tawh hle mai tiraw?"



"I ha tâwk leh vat mai ang."



A natna hian a hneh tawh viau a, damdawi a ei tho bawk nèn, a hah hma ém ém a, mut hle hle loh chuan a chàu deuh nghal mai zêl.



"Zanin chu kan lâm leh ang chu tiraw?"



"Ka làmpui thei ngût che pawhin ka ring lo."



A hmel ka en ngam lo, ka khawngaih țhin ém vàng hian a thil theih loh tùr lam a sawi hian ka en duh ngai lo. Mipa ni mah ila ka mittui a hnai a, ka nupui ka hmangaih em em hmel khawngaihthlâk tak hi ka en ngam lo țhìn.



Zànah chuan Muansanga, Ațana leh Lawmkimi an lo kal ve a. Ka pain hunserh a hmang a, a birthday kan lawmsak chu mak a tiin a hmelah chuan lungchhe hmel ka hmu tel a, a kutah nghet takin ka vuan a.



Cake chu kut khùr der derin a zai a, min rawn en chhoh chuan a mittui parawl kiang chu ka hmu a, a insûm ve nasa ngawt ang; mahse, a insûm hlei thei lo chu a ni.



Music a ri riai riai a, 'A thousand years' chu Christina Perri chuan lungrun zetin a rawn sa a, muangchângin ka pawm tho a, ka làmpui ta a.



Ka âwmah a bei a, muang chângin ka ke chunga a ke nghatin ka làmpui chhat chhat a, muangchâng tak tak a nih loh chuan a hah mai ang tih ka hlau.



"Ka hmangaih che, Julian."



"Kei pawhin ka hmangaih che, Magdalene."



Ka âwm lum deuh pap pap avàngin en lo mah ila a mittui a tla tih ka hria. Kei pawhin intipachang viau mah ila ka mittui a parawl ve tho.



"Julian, ka lâwm e aw."



A thâwk dàn a dik loh vàngin ka chàwl deuh dat a, mi dang pawh chuam kan pahniha lâm chu mittui tla pûrin min lo thlîr ve reng a, Bawihtei phei chuan min en rei duh lo va.



"Chàwl rih ang aw, i hah niin ka hria."



"Aw le."



Ka ding vang vang a, nghet deuhin ka pawm a, tûn dârkârah ngat phei hi chuan a tawrh natna hi paih bosak vawng vawng ka châk, ka neih zawng zawng hian a damna hi thleng thei ila ka ti ngawih ngawih. Ka dam chhûngin a damna hi rulh ngai dáwn pawh ni se, ka thleng duh chiang bal.



Music chu a tàwp ve lo va, a la ri riai riai reng.



"Ka thih hunah U Lawmi hi nei rawh aw."



"I thi dáwn lo, ka phal lo."



"Julian?"



"Shhh, ka ngaithla duh lo."



A ngawi leh rih a, kei pawh ka ngawi. A beidawng ve ta mai tihna em ni? Thih chu a tum loh ém kha, a rilru a thlâk ta em ni? A beidawn vaih chuan a taksa hian a tuar ngei ngei dáwn si.



"Ka duh apiang tihpuitlinsak min tiam tawh kha."



"I thih ka phal ngai lo ang."



Zàn mutnaah chuan a bân chêr țhiak chuan min kuah a, kei pawhin tihnat hlau zetin ka kuah lêt a. A bân chêr lutuk te chuan ka rilru a tina a, ka khawngaih a, ka mittui a hnai zêl.



"Zànah ka tel lova i mut hunah..." sawi zawm lovin a ngawi leh rih a, kei pawh ka mittui a far fap a.



"I tel lovin ka mu duh lo, min kalsan thei lo ang."



Zanin chu inhnèm thei kan awm lo a ni. A hnèmtu tùr zâwk lah hi ka lung a chhe zêl a, a tel lova nun ka ngaihtuah ngam lo a ni.



*MI, A NUNGCHANG DIK TAK HRIATNA ȚHA BER CHU MIIN A CHUNGCHÂNG AN SAWI DÀNAH NI LOVIN, MI CHUNGCHÂNG A SAWI DÀNAH A NI ZÂWK*