☆MAGDALENE☆ - 9

☆MAGDALENE☆ - 9 By Dingdi Pachuau


Um, ka text tawh lo ang, ka bànsan angah ngai rawh se; mahse, kan hria ang chu.


Ni tin dàwrah chuan ka kal a, Hlimhlimi erawh ka text ta lo. An inah ka kal lo va, ka hmu ngai hek lo. Exam zo phawt se ka ti, chumi hnuah ka che chauh tawh ang.


Hmeichhe luhlul hi ka la tawng miah lo va, he nu ang hi ka la ngaizawng ngai hek lo, chona tharah ka ngai lo thei lo va, bànsan mai ka tum hauh lo.


Sunday-ah pawh an lo lêng tawh lo, exam lai a ni a, a pawi lo. Țha takin exam hlawm rawh se, exam zawh lamah erawh chuan...


Bawihtei hnên ațangin an exam zawh hun tùr ka hre thei a, Muansanga chu a exam zo hma dáwn, haw a duh chuan ka dang lo ang.


Sangha manna tùr bungrua leh mamawh ka lei sa vek a, exam zawha kal mai thei tùrin ka inruahman tawh. Bawihtei hnên ațangin Hlimhlimi haw a tum tih ka hria a, a fuh viau dáwn e.


Muansanga chu lui kalpuiah ka sâwm a; mahse, min hnial tlat. Exam laiin dàwr a nghâk țha thei si lo va, a hman ve hun lai chuan regular taka nghah a duh thu a sawi, min tihlim khawp mai. Mi rin tlâk tak a ni tih ka hre chho zêl a, la naupang hle mah se, a fel a, a rinawmin ka mit a tlung viau a ni.


Exam zawh tlaiah dàwrah Bawihteite țhianho chu an rawn pêng a, kan tam ta phian mai. Hlimhlimi chu ka melh duh miah lo va, ka lo be hek lo.


"Tàte, thil leina tùr chu?"


Ka pe ve mai a, an tàwi deuh hrat hrat a, ka ngaihven duh lo lui tlat a.


"Tàte, noodles kan thawh khâwm ang a, kan lo chhùm ang chu? Chuan, kan free ve ang che u."


Ka nuih chu an tiza khawp mai a; mahse, ka nui duh miah lo.


"Chhùm ula."


Ka thil tih lai chauh chu ka ngaihtuah lui char char a, a rûk erawh chuan ka bengkhawn reng thung.


Hlimhlimi'n a chhum leh ngei ka ring, an chhùm zo min rawn pêk chuan," Tu chhum nge?" ka lo ti rêng a.


"Hlimhlimi," Zotei chuan a lo ti var a.


In tùr an duh ka zâwt a, exam zawh manah tiin ka treat hlawm a, an lâwm khawp mai.


An titi nak nak a.


"In haw dáwn hlawm em?"


"Kei chu ka haw lo ang," Zotei chuan a lo ti vat a, Manuni chuan," Hlimhlimi nèn chuan haw kan tum," a lo ti ve bawk a.


"Ticket in la tawh em?"


"La lo, vawiin hian lâk kan tum a."


"Kan phei rualin phei ve ula?"


"Nia, Hlimhlimite khuaah kan kal dáwn a," Bawihtei chuan a lo ti vat a.


"Eng nge in lo tih dáwn?"


Ka chhâng lo.


"Luiah kan kal dáwn," Bawihtei chuan a ti leh a.


Manuni chuan," In phal tak tak maw? In bâwr dáwn lo em ni?" a ti leh a.


"In duh leh duh loh a ni mai; mahse, naktûk chaw ei khamah chhuah tum ila?"


Zànah Bawihtei helhhawlh chu a insiam reng mai a, a châng leh a bag chu a phelh darh leh vek a, thawmhnaw a suasam reng mai. Nonoi lah chuan a lo châk ve viau bawk; mahse, ani erawh ka pate'n hruai an phal lo, an thlêm lungawi thei mai.


Ka pain car ken a phal lo va, Bolero keng zâwk tùrin min ti. Ruah sûr thut thei a nih avàngin motor tê aiin a lian a țha zâwk a ti tlat a, ka hnial lo.


Laltei khân khum pakhat chauh a neih vàngin ka nuin bedding ken tùr min siamsak a, țûl ka ti fahran lo nain a thu ka sawisêl  duh lo.


Hlimhlimi kan lam phawt a, dàwrah ka pêng lawk. Kan kal tùr thu chu ka hrilh leh a, eng emaw a lo thlen thut chuan min rawn phone nghal tùrin ka hrilh bawk a.


Khua a lum a, ka mut a chhuah loh nân hla ka play a. Anni țhian thum chuan an lo zàwm dial dial lehnghal a, khua a har lo khawp mai.


Hmuifângah ka chawlhpui a, Bawihtei chuan nuam a ti ngang mai. Naute hlim hmêl hmuh chu a lo nuam e, an la naupang deuh bawk a, thla an la sek mai.


Phone call a lo kal a, Lawmkimi a ni.


"Hey, ka lo haw, min lo hmuak la?"


June thla a ni tawh tak e.


"Lunglei ka pan mêk, min lo hrilh lâwk tùr alawm, in rawn chhuak tawh em?"


"Chhuak țêp. Eng nge i tih dáwn?"


"Ka fawr dáwn."


"A chin tâwk hria la aw."


Ka nui hawk hawk mai.


Kan inbiak zawh hnu chuan ka han hawi a, motor-ah an lo țhu vek tawh niin.


"Chhe lo deuh kha a ni chiang, a lo haw chho dáwn a ni maw?" Bawihtei chuan a lo ti nghal a.


"A chhe lo e, kha nu kha."


"Nia."


Ka țhiannu a nia, chubâk eng mah keimahah nihna a nei lo.


Thênzâwlah rei lo tê kan chàwl a, vûr leh theitui vawt leh thei den kan lei a, kan tlân leh vang vang.


Lunglei ațangin Hnahthial lamah kan tlân leh char char a, a tlai ruih tawh a, boruak pawh a nuam viau e. Dâwn leh Rotlâng inkâr hi a fân ém a, khua a tam loh vàng hi a ni ngei ang, a khawharthlâk bîk.


"Kan inah chaw ei r'u aw, ka nute pawh ka hrilh sâ vek tawh a nia."


"Kan tihautak hle dáwn che u a nih chu."


Kei chu ka țawng ve miah lo, an thu sawi chu ka lo ngaihthla ringawt.


"U Laltei in luaha awm lovin kan inah innghah mai tùr a nia."


"Kan awm rei dáwn asin."


"Kâr khat maw?"


"Aw."


"A rei loh chu, zanin chu kan inah lût hmasa phawt ang u aw."


Pawi ka ti hran lo. Eirawng bàwl leh rih kha a peihawm loh si, ka kal hmasak zâwk khân chaw ka ei mumal lo.


Zanriah chu Hlimhlimite inah chuan kan ei a, Bawihtei a țawng nasa khawp mai. A titi barh barh reng a, kei erawh ka țawng tam lo viau.


Laltei in luaha kan luh chuan ka rin aiin a lo hnawk lo va, Bawihtei chuan a tifai vat vat a.


"A nuam reuh e."


"Tah hian awm mai la?"


"In phal lo tih ka chiang ém mai."


Bawihtei'n in a tihfai chhûngin ka inbual a, tui chu a lum pûrhin ka hria.


"Inbual ve rawh, i zo tawh a ni lo'm ni?"


A inbual hlàn chuan Hlimhlimi a lo kal, biak loh ka duh teh lul nèn, biak ngei a ngai ta.


"Lo kal rawh, eng nge ni ta?"


"A, ka lo kal mai mai. A inbual em ni?"


"Aw."


Bet lo zet hian ka bulah chuan a rawn țhu a, țhutna dang awm hek lo. Min melh leh zauh țhìn a, kan mit a intawng thei khawp mai.


"Bawihtei chu lo riak se?"


"Sâwm la?"


"Nang pawh?"


"Phungthlûk a ngai kher lo."


A âng zuau a; mahse, a tàwp leh daih.
Ngun zetin ka en ràn reng a, a lài hmel chu hmuhnawm ka ti.


"Ka message i reply loh chhan kha ka hre duh."


Bawihtei'n kan țawng a hriat ka duh bîk loh vàngin ka țawng zàwi viau. A rawn hawi lo va, a sam chu a kutin a vial a vial leh tawh.


"Eng vàngin nge ka duh loh ang che? A chhan ka hre duh."


Min chhâng lo.


"Min hrilh hma chu ka zâwt reng mai dáwn che a ni."


Bawihtei a rawn chhuah tâk avàngin ka zâwt chhuak leh ta rih lo. Pawi lo, zanin a la awm, naktûk pawh, ni dang leh zêl pawh.


Khua a lum a, current off-in tukverh ka hawng a, thla a eng a, boruak a nuam sawt sawt mai.


Hlimhlimi chu ka va text leh ta nge nge. Dâr 10 a hnai thuak tawh a, inlêng an nei lo ang chu maw.


*A chhan chu min hrilh tawh rawh le.*

Ka châng ràn a, a 'read' chiang e. Min reply loh chuan ka call leh mai ang.


Minute 5  ka nghâk a, min reply lo. Ka call ta ngat, a ring a, vawi hnih a ring hnuah a tàwp ta hmak, a reject chiang e.

Beep beep


Message a lo thleng ve ta thung.


*Khawngaihin, phone call chu a chhàn chi loh, a tlai tawh.*


Ka khi sak, ka text char char ang.


*Min chhâng tawh rawh le.*


Min reply dáwn e, a type mêk. Ka nghâkhlel lutuk chu ka awm hle hle thei lo.


Beep beep


*A chhan chu a theih loh a ni mai.*


Hm, a theih loh chhan chu alawm ka hriat duh, bialpa a nei pawh a ni lo va.


*Min duh loh chuan sawi mai rawh, pehhêl lovin. Chuan, ka tilui lo ang che.*


Ka nghâk leh rih.


*Chutiang lam a ni lo.*


He nu hi eng nge a awmzia ni le? Min duh lo a nih chuan ka tilui dáwn lo, mi duh lo chung tilui duh tùr pawh ka ni hek lo,  polite lo over ka ni bîk lo.


*Eng lam nge?*


*Julian, i hre thiam lo a ni.*


Ka tho hluai a, eng nge hriat thiam loh tùr awm le? Min duh lo a nih chuan sawi mai se, ka inham buai lo ang.


*Min duh lo a ni maw? A țha e, ka tibuai tawh lo ang che.*


*Julian, ka duh lo che tih ka sawi lo.*


Sawi lo mah se, harsatna hlîr alawm a rawn sawi le.


*Inhmu ang, ka rawn kal a nia.*


Ka nghâk rei ve tawh e, zaninah sawi fel nghal ka duh. Ka tho a, an in lam ka pan nghal.


Beep beep


*A tlai tawh si, a chi loh.*


Ka thleng țêp tawh zâwk, ka nghâk tlat ang. Nia, a tlai tawh; mahse, ka hmuh ngei a ngai, sawi fel ka duh.


Khua chu a reh țhiap tawh a, in pakhat ka pelh erawh chu kawngka a la inhawng huau a, TV ring ang reng deuhin an la en a.


*Ka rawn thleng tawh a nia, pâwnah ka nghâk che.*


A buai ngawt ang, an mut tawh phei chuan. Minute 5 ka nghâk ta, thâwm a la awm lo, engah mah min ngai lo a nih chuan a lo chhuak lo ang, chu chu ka rin dàn a ni a, a lo chhuak a nih chuan tlêm tein...


Kawngka a rawn inhawng ta e, a thâwm a dìm kher mai. Ka nui suk mai, tlêm chuan min duh ve chiang e.


Ka pan vat a, thim deuh raih mah se thla a êng a, ka hmu chiang thei tho.


"A tlai tawh..." bang nghèngin ka nam bet a, hlauthâwng zetin a thaw hap a, a tha a khûr dar dar mai.


"Min duh ve tho a ni tiraw? Min duh lo chu ni la, i lo chhuak miah lo ang."


"Julian.."


"Ka duh che!"


"Julian.."


Ka kûn hniam a, ka fâwp dáwn chiang, amah pawh chuan ka thil tum chu a lo hai bîk lo tawp.


"Ti suh, Julian."


"Eng vàngin maw ka tih loh ang?"


Kan hmui chu a insi deuhthaw ta, a thinphu dap dap pawh ka hre theiin ka hria, a thaw hak a.


"Julian..."a țawng chu ka hmui chuan a titàwp ta hmak mai, strawberry rim a la nam zui, ka duh chi tak, rimtui reuh lutuk mai.


Muangchângin ka fâwp a, min chhàn leh chhàn loh ka ngaichàng rêng bawk a. A tìrah chuan a che miah lo, chhàn pawh min chhâng hek lo; mahse, ka luhlulna lam a ni ve tlat.


Ka fâwp lui zêl a, bangah chuan na si lovin ka nawr bet. A hnu deuhah chuan min chhâng ve ta, chu veleh chuan uar zet hian ka fâwp ta tàwn táwn a.


A kâwngah ka chelh a, ani pawh chuan a tuar thei ta bîk lo a ni ang, ka nghâwngah a kut pahnihin min kuah a, chintâwk awm lo lêk chuan kan inkeih tàwn táwn a. Thuin hmun a chang lo va, kan induhna chu chetziain kan lantîr zâwk a ni.