☆RUATDIKA☆ - 4

☆MAGDALENE☆ - 4 By Dingdi Pachuau


A va chhe lo tak!


Bawihtei nèn an inbe ta tlat mai! Um, an inhre chiang mai, a fuh dáwn e. Ka zâwt khawp ang.


A kal liam tùr chu ka thlîr vang vang, khawi vêngah tak awm ang maw? Chaltlâng lamah chuan a awm lo phawt tihna a ni a, a chhan chu GHSS Hall lamah a chho tlat a ni. Zarkawt vêlah an awm pawh a ni thei tho bawk.


Bawihtei chu ka ko duh miah lo, min rawn hmuh ve mai ka ring a nia. Duata lah a langsàr larh a, a rawn hmu ém ém ang.


Ka tlàn dáwn chuan ka hmaah a rawn lang hlawl mai!


"Tiang khân nula i lo thlîr ziah a ni maw?"


"Teuh lo e."


"A nih reng kha aw. Chhe lo deuh kha i hmu leh tawh em?"


"Um."


"Eng tik khân maw?"


"Nichîn deuh khân."


"Min rawn phone ziah tawh rawh, ka hre maithei asin."


A hria alawm.


"A nih, nichina i biak kha tu nge a?"


"Nichin lawka mi kha maw? Hlimhlimi a nih kha, ka țhiannu kha."


"Ka va hmu ngai lo ve!"


"Kan inah pawh vawi 3 vêl a lo kal tawh, i hre miah lo maw? A mak thei e," a ti nang nang a.


Ka hre lo tak tak! Hria ni ila ka theihnghilh lo tawp ang. Theihnghilh theih hmêl a pu lo tlat.


"I lo chuang dáwn em?"


"I phal maw!?" tih leh làwn a rual nghal a. Duata hi ka roh tih a hria a, ani pawh hi a chuang zen zen lo; mahse, ka thil hriat duh tak min hrilh bawk sia, làwmmanah ka phurh tho tho a ngai.


Hlimhlimi chuan ka ngaihtuahna a luah hneh kher mai. Hmuh leh ka châk, lo lêng leh se ka ti. 


Ni tin ka haw lam chuan ka melh ziah a; mahse, ka hmu leh ta chuang lo. Bawihtei a chanchin zawh ka duh bawk si lo va, Bawihtei țhiannu a lo ni kher kher chu a pawi ka ti.


Zàn lam hi chu kâr tàwp a nih loh chuan Melo-i hmu tùrin ka kal ngai lo, ka lèn chuan amah kawm ngei ka duh ang a, lehkha zir se ka duh bawk si. Lêng tùr chuan min sâwm ve ziah tho; mahse, ka in-control ve a, kâr tàwp a nih loh chuan ka lêng bîk lo.


Bawngkàwn lamah erawh min kawp tih ka hria a, ka kal ta lo. Min lo phone țhìn nain ka kal duh chuang lo. Kawp nih kher chu ka la na ve viau.


Mut hmunah ka ngaihtuah rauh rauh a, kawp nih ka duh lo hle si a, keiin ka kawp tho bawk si. Hetiang rilru chu a dik thei dáwn bîk em ni? Ka duh miah loh kha mi chungah ka ti bîk a ni a, ka dik bîk lo a ni lo maw?


Mahse, mipa leh hmeichhia chu kan inang hlei nem. Melo-i pawh hian min kawp tho maithei asin, ka hre miah lo. Kei chuan ka bialnu nghet bera ka neih a ni a, Bawngkawnah lah ka lêng tawh hek lo. Min lo kawp ve a nih vaih chuan ka țhen hmak ang a, ngaihzawng hi ka thlah hmak ang, ka nei mai mai tawh lo ang.


Bawihtei thil sawi kha ka ngaihtuah kual a, tuna ka ngaihzawng nghet ber Melo-i pawh hi nupui atân ka duh hran miah lo, ani pawhin pasal neih a la ngaihtuah lo hulhual ang, a la naupan bâkah a nu leh pain an la phal dáwn lo sa. Ka duh a, ani pawhin min duh ve a ni mai, hmangaihna hi chu a awm lo hrim hrim. Kei pawh hian hmangaih ka nei hek lo, ka chhûngte erawh hi chu ka ngainain ka duhsak ém ém, ka duat theihnaah chuan ka duat bawk. Hmangaihna hi chu sawi ve mai mai, nula leh tlangvâl inkârah hlauh phei chuan. An induh tawn țhin avàngin hmangaih emaw an inti ringawt țhìn a, induh tawnna mai a ni, tisa in-ît tawnna mai mai.


ITI lamah Âțana pawh ka lènpui leh tawh a, Baby erawh a lo awm lo a niang, ka hmu miah lo. Tih tak takah chuan hmeichhia hi ka nawr luih leh tih luih an ni bîk lo, an duh ve tho a, duh kan inpe tawn ni maiah ka ngai. Baby pawh hi ka thlêm a ngaih ka ring hran lo, a mit mengah ka hmu ve thiam tho.


Tlai khat chu ka pain chhûngkaw inkhâwm hun a hmang a, nun hman fîmkhur a ngaih thu a sawi a. Kan nun  kan hman fîmkhur loh chuan kawppui țha kan neih theih loh tùr thu leh kan nun dàn ang chiah kha kan fate'n an rawn entawn tùr a nih vàngin fîmkhur a ngai tih a sawi dap dap a. Chutah," Tàtea pawh Nonoi țawngțaisak chhànna i hmuh theihna tùr chuan nangmah pawhin i zir viau a ngai a ni, chutiangin Bawihtei pawh. Mahniin zir loh miau chuan nupui pasal țha tak  chu hmuh a har a ni. Nupui pasal țha tak nei tùr chuan in nungchang in uluk tùr a ni a, pâwn lamah mai ni lovin, chhûngril lamah pawh in uluk a ngai tak zet a ni," a ti leh a.


Ka ngaihtuah vang vang  a, ka u leh Bawihtei hi an fel viau, chhûngrilah pawh an fel tho chuan ka hria. Kei ve hi, pâwn lam lan dànah hian chhûngkaw hmuhah chuan ka sual lêm lo a ni maithei; mahse, ka chhûngril nun hi a lâk tlâk lêm loh viau. Ka nu leh pa an fel teh lul nèn, ka pa hi ka chhùn lo ngawt mai. A rûk hian hrehawm a lo ti viau țhìnin ka ring ta, a fapa neihchhun ka ni a, kei lo innghahna tùr a nei miah lo.


Ka pa hian zû a in a ngai lo, zûk leh hmuam pawh ti lo, tlangvâl fel leh kohhran bèl tlat mi a ni. Chuti khawpa fel fihlîm chu a ni a, kei ve thung hi? Zû ka in zeuh zeuh, meizial ka zù a, kuhva ka ei bawk. Bâkah, nulat tlangvàlna lamah ka sihhnip viau bawk a nih hi, fapa chhuanawm tak chu ka va ni lo ém!!


Zànah ka lêng lo, ka pa thu sawi mawlh chu ka rilruah a awm a, ka awm dàn hi ka sim a ngai. Vawilehkhatah chuan ka sim thut thei lo a ni maithei; mahse, muangchângin ka ti thei alawm, chìn țhan sim thut chu a har ngawt ang; mahse, ka tum phawt chuan...mipa ka ni alawm le, ka thei ngei ang.


Chhùn lamah chuan ka dàwr lamah ka tâp nasa a, khawiah vak ka chhuak lo. Ka chhuah chuan ka nun sim ka tum hi ka thei lo leh mai ang tih ka hlau, a chhan chu chhuah tam chuan thlêmna hi a hnai bîk tlat a, inah chhûngte bulah awm ila thil sual chu ka ti lo deuh nge nge tlat a ni.


Zàn lama ina ka awm tam ta deuh chu Bawihtei chuan," I chhuak khât ta riau mai,in intithiam lo a ni lo maw?" tiin min zâwt a.


"In bula awm hi nuam ka ti thar tlat a."


"Ka awih lo. Buaina in nei tak tak a ni lo maw?"


"Nei mai mai lo."


"Ka awih lo chiang."


Kâr tàwpah erawh Melo-i'n lêng tùra min sàwm nasat ém avàngin ka lêng tho. Ka bialnu a ni miau a, ka lêng ve ang chu. A hma pawhin ka lêng fo a, ka țhen a nih ngawt loh chuan ka lêng ve ang chu.


A nute pawh an awm tho, a nute pawh hian min hre vek tawh tho a, tunah tak phei hi chuan hun fâl neih loh hi ka duh zâwk. Ka insûm thei lo leh mai ang tih ka hlau, nupui țha tak neih ka duh dáwn si a.


Melo-i chuan min mitmei nasa viau; mahse, ka haider lui tlat a, in chhûngah ka țhu lui tlat. An bathlàra kan awm dun leh hlauh chuan kan tih țhin kha kan ti leh mai ang, chuvàngin, a nute chu ka titipui lui tlat a.


Duh ila chance chu ka hmu leh chiang, hrehawm ka ti, ka insûm nasa viau bawk. Melo-i chu ka en lo hrâm hrâm, a vun deh nawmzia ka hria, a vun ngo ser sawr mâm zetin min tihphùr theihzia pawh a la ngai reng; mahse, ka hnar ve thei rih tlat, zanin atân chuan.


Mutnaah min rawn text, mak a ti tak tak a ni ang. Kei pawh ka infak viau, ka insùm theihna leh ka tumna ka bawhchhe lo chu, tlangvâl fel ka ni ka ti lo, ka tân a harzia chu a tawng lo tân hriat thiam theih pawh a ni lo.


Sunday-ah Bawihteite țhianho chu an rawn lêng leh ta. An rawn lêng leh dáwn tih ka hriat sa avàngin sitting room-ah ka lo awm a, ngaihsak vak lo ang deuhin ka lo awm. An rawn lût a, ka lo mitsìr reng tho.


Hlimhlimi pawh a lo tel leh ta ngei! Engtin nge a hma khân ka lo hmuh miah loh theih le! Hmuh hmaih chi rual a lo ni si lo.


A incheina simple tak chu a inhmeh kher asin. A sam uk kherh khawrh chu a thlah mâwl tawp a, sana silver rawng lian vak lo a bun a, zungbun erawh ka hmu lo. Silver țhî sîn te, fual lo zet hi a awrh bawk a, chubâk tlereuh inbel a nei lo.


Min rawn hmuh chuan Bawihtei chuan," Tàte, i lêng chhuak dáwn em?" a rawn ti nghal vat a.


"Ka hre lo le, eng nge ni ta?"


"Ih maw, kan țhianho hi lèn ve kan châk a, bolero khân min phur kual la?"


"Engtin nge a tui lam kan tih ang?"


"I sual e, min free ve mai la?"


"A theih loh, thawh chhuah a ngai."


A ner nâng nâng a, ka nuih duh miah lo. Pawisa hi thawh chhuaha neih tùr a ni a, a  thlàwnin kan dawng ringawt lo. Thawh chhuah a ngai tih hi ka naute pahnih hian hria se ka duh.


"A țha alawm, saturday-ah dàwrah ka lo kal leh mai ang."


"Good girl! A mai maiin pawisa hman ral miah loh tùr, kan hmang a nih pawhin kan thawk chhuak leh tùr a ni."


Ka inchhuan vena chu ka nu leh pa pawisa hmang lovin ka theihtáwpin pawisa ka thawk chhuak ve hi a ni. Ka nu leh pa hi sawrkar hnathawk ve ve an ni a, ka nu erawhin a bànsan, a fate enkawl min duh vàngin. Ka pa pawh a pension țêp tawh, M.Com ka pass hnu khân sumdàwnna lam ka buaipui nghâl, ka tuina a nih miau avàngin. Tunah chuan a hlâwkna ka têl chho ve tawh a, nu leh pa sum lamah tibuai miah lovin a petuah zâwk ka țang ve tawh a, ka lâwm viau rêng a ni.


Chanchinbu chhiar ang deuha langin Bawihteite țhianho chu ka ngaihven reng a, an nui leh dar dar țhìn. Hlimhlimi chu ka lo ngaihven leh zual bîk a, a mit meng fiah kâk leh lian kel kawlah chuan hlim loh rûkna ka hmu thei tlat a ni. Eng vàng nge ni ang? A nui ve țhìn tak nain eng emaw rilru kaptu a nei tih a hriat theih.


Ei tùr an siam chu min rawn pe ve a, noodles a ni. Ka ngaina lo khawp țhìn mai a, ei ka huphurh țhìn.


Ka ei hlek a, ka rin ai chuan a lo tui phian.


"Tu siam nge a?"


"Keimah a nia, a tui lo em?" Hlimhlimi ngei mai chuan a rawn ti ta a, a hmêlah chuan nuam ti lo hmêl leh hlauthâwng hmêl a lang thei a.


"A tui lutuk zâwk, hetianga siam hi ka  ei vawi khatna a nia, i siam tui lutuk."


Ka ei zo vek. Hetiang hian noodles hi a lo tui thei ang tih ngaihna rêng ka lo hre lo.


"Tàte, dâr 3 vêlah hian i inpeih hman ang tiraw?"


"Lêng tùr chuan maw?"


"Um."


"Tlangvâl an lo kal ve dáwn em?"


"Nangmah," nui ar ar chung hian a ti a, a țhiante pawh chu an lo nui ve a.


"Tlangvâl vànnei ka ni dáwn tihna a ni maw?"


An nui dar dar a.


Lêng tùra kan chhuah meuh chuan dâr 3:05 a ni tawh. Lènna tùr an hre chuang lo, ka ride-pui dáwn a nih duh hmel viau.


Front seat-ah Bawihtei chu țhu tùrin an ti a, ani chuan," Ka bialpa a ni si lo, ka duh lo," a lo ti tlat a, mi dang lahin an duh bawk si lo.


"Ruati leh Zotei kha lo țhu mai r'u."


A hnungah Zotei, Manuni leh Hlimhlimi an țhu a, ka hnung chiahah Hlimhlimi a țhu.


"Vawiin tlai atân chuan in driver mai ka ni, in duh duh in sawi thei ang."


Fiamthu an lo duh zêk a, an infiam a, an țawng barh barh hlawm a, a bîk takin Ruati a țawng duh. Fiamthu a sawi a, sawi tùr lah chu a hre phian. Amah insawisa pahin fiamthu a thawh a, kei pawh ka lo nui leh suk suk țhìn.


Darthlalang ațangin Hlimhlimi nèn kan inmelh sak mai, min lo en reng tawh a ni maithei; ka en ve meuh chuan a mit a la sawn rang kher mai.


World Bank road-ah tlânin Zàmpuimânga thlàn bulah kan ding a,  khua a la tlai lêm lo bawk a, awm an lo awm tam lo. Nula 2 leh tlangvâl 3 an lo awm ve, chu pawh inhlat deuhin. Kalpui ka duh vak lo nain an châk ve tlat sia, lo awm tam deuh phei se chuan ka hawpui leh nghal daih ang.


Motor ațanga chhukin an hawi harh vêl a, kan ina an nui awr awr nèn chuan an dang daih mai. An nui sak sak ringawt, an hlim tih chu a hriat tho.


Motor-a an ei tùr ka dahsak chu ka la chhuak a, Bawihtei ka pêk chuan mak a lo ti ngang mai.


"Khawiah nge i lo dah a? Ka lo hmu miah lo, ka lâwm e. En teh u, ei tùr kan nei," ti chûl chungin a țhiante chu a hmuh a.


An hlim hmêl hmuh chu nuam ka ti, kei chu an bul chêtah ka awm lo; mahse, ka awm hlatsan chuang lo. Tlangvâl dang an awm ve bawk si a, kal hlatsan ka duh lo hrim hrim.


Melo-i'n min lo call a.


"I lo lêng dáwn lo'm ni?"


"Hei, ka naute ka lènpui a."


"A va fair lo chiang!"


Ka nui a," Nang chu ka lènpui ngun tawh che e, i duh phawt chuan next-ah kan lêng leh ang a?" ka ti a.


"Next-ah chuan ka hman lo ang."


"Nih, i hman hunah a ni mai alawm."


"Nakin zànah lo lêng rawh aw, ka inkhâwm dáwn lo. Keimah chauhin ka awm dáwn." A thil rawn sawi dàn hian kawh a nei chiang.


"Ka inkhâwm maithei thung a."


"Ah, ka awih chiah lo e!"


Kan nui ve ve a, chutih lai chuan," Julian Zoremsâng!" tiin hmeichhe pakhat hian min rawn ko vak a.


Ka hawi chhuak chiang kher mai!


Tu nge ni ang? A rawn tlân a, min rawn kuah chawt mai!


Melo-i hnênah chuan," Ngawi lawk aw, ka lo be țha ang che," tiin ka phone chu ka dah a.


Min kuahtu chuan," Ka hai lek lek che a, i biangte hi i lo ti hmul nasa tawh lutuk a," a ti leh a, min thlah hnuah ka en ve vang vang a, Lawmkimi, college kan kalpui țhin kha a nih hi.


"Hey, ka hre lo lek lek tawh che, i va puitling tawh ve! Nula puitling tak tak i ni tawh!"


A țawng char char mai. Kan inkàwm ngeih ve viau țhìn asin, ani hi chu Mizoramah a awm khât a, Company-ah a thawk zui daih bawk si, kan inhmu khât  tawh lutuk a, a àwm viau.


"Âțana i be țhìn em?"


"Teuh lo, a number pawh ka nei lo, heta ka awm chhûngin re-union nei ang u aw, in ngaihawm tawp."


College kan kal lai kha chuan hmeichhe enin kan en ngai lo. Thil ti ru ila a tel ve zêl, hmeichhia angin a awm ngai lo.


Haw kawngah chuan Bawihtei chuan," Tu nge a?" a ti a," I bialnu leh bawk a ni maw?" nui chung hian a ti a.


"Làwmkimi maw? College kan kalho țhìn alawm."


"A chhe lo tawp."


"A lo puitling ve tawh ém a nih kha."


An in bulah țheuhah ka drop diat diat a, ka idea a nia, an in hriat ka duh vàng a ni.


Zàrkawta awm deuh vek an lo ni, a tàwp berah Hlimhlimi kan thlah a, an in luah pawh ka hre ta khiau e.


"Lo lêng rih ula?" Ka châk kher mai.


"Ngawi rawh, kan lâwm e, zànah inkhâwm kan duh dáwn sia, kan tlai palh ang."


Chaltlâng chhoa kan tlàn lai chuan Bawihtei hnênah chuan," I țhiante hi engtin nge an rawn lèn theih zâwk a? Scooty-in an rawn kal țhìn pawh a ni si lo," ka ti a.


"An rawn inthlahtîr ve țhìn alawm."


"A nih tak chu."


"Nichîna mi kha i bialnu hlui a ni lo tak tak maw?"


"Ni lo, țhian hlui ka tih chu."


"Ka țhiante khân chhe lo an ti tawp, ' mo in nei chhe lo dáwn e' an tia, kei pawhin chhe lo ka ti."


Ka nui suk a, nia, a lo chhe lo tawh khawp mai. A hma kha chuan kan inkàwm ve nasain mipa ang deuh chiah khân kan en mai țhìn kha a ni a, a lo nulain a lo puitling chhe lo ta ém a ni.


Kan țhian thum, Lawmkimi, Âțana leh kei chu Làwmkimi rawn chhoh chhûng chuan kan inkawp leh ta chawt mai. Chhùn lamah Âțana a hman si lo va, ka dàwrah a rawn lêng țhìn. Mipain an en duh thei khawp mai, a chhe lo ve ém bawk a ni. A vun a nalh a, a pian a chhe lo bawk a, a lian țha viau bawk.


"I dàwr hi a remchâng e, i inhralh thei ngawtin ka ring."


"Um, hralh ve thei a ni mai e."


"I money tawh ngawtin ka ring."


"Nang deuh kha, i la thawk ngar ngar a nia."


A nui hak a.


"Kei chu nula hausa ka ni sa hrim hrim alawm!"


A tidik chiah. A pi leh pu, a nu leh pa rosum zawng zawng hi a tâ vek tùr, an hausa turu lutuk.


"Bialnu i nei em?"


"Nei ve bawk ang chu."


"A va pawi ve!"


Kimtei leh Amawia'n min rawn en leh zauh zauh țhìn, kan țawng a ring hran lo va, an hre phâk lo ang.


"Bialpa i nei tawh ang chu tiraw?"


"Ka duh zâwng ka la hmu lo a ni ang."


"A va pawi ve!"


Kan inen a, kan nui ve ve.