☆KHA PA MAWLH KHA☆ - By Dingdi Pachuau

☆KHA PA MAWLH KHA☆ By Dingdi Pachuau



Nilaini a ni a, zîng ka thawh hlim ațangin ka che nghal char char. Zîngkâr ațangin ni chhuak a țang at mai a, vawiin chu a lum leh pek khawp ang, ka huphurh lâwk.



MP Election duty tùr mikhual kan nei leh ngei dâwn, chu chu ka hming ka hriat chian tluk zetin ka hria. Kan ina kan chhûngkua ni lo, mi dang an rawn awm ve hian ka che zawng zawng a buaiin ka rilru a dik lo vek țhìn. Hei hi hmân ațanga sim theih ka duh ngawih ngawih thil a ni; mahse, tûn thlengin ka la sim thei lo chu a nih hi.



Ka pa hi BLO a nih vàngin election a awm rêng rêngin mikhual kan nei ziah, kan têt lai ațang tawhin. Ka pa a hna ațanga a pension hma chu kan nei reng dâwn a nih àwm hi.



Mikhual an awm hian keimah ka inthlahrungin nuam an ti lo ang tih ka hlauh țhin avàngin an bula awm tam loh hi ka tum hrâm hrâm zêl. Mi biangbiak ka thiam loh ém avàng hian mi hmachhawn hi ka hreh ngawih ngawih a, a theih chhûng chu ka pindanah ka inkhung țhìn.



"Engah nge mikhual neih chu i lo huphurh viau? Pasal tùr i lo zawng pah thei alawm, tlangvâl pawh an lo kal ang chu," tiin ka pain min fiam a.



Mikhual neih ka huphurh theihzia a hai lo, ka inringtâwk lovin ka inthlahrung țhìn tih pawh a hre vek. Ani pawh hian sim tùrin min duh tih ka hria; mahse, ani ai hian ka duh fé, ka thei si lo a nih hi.



"I thih phah dâwn lo, huphurh suh, zan khat bâk an riak dâwn hlei nem."



Min hnem tum viau mah se, ka huphurhna rilru chu a tikiam chuang hek lo.



Ka nu Lungleiah a kal a, in ka tihfel avàngin leh mikhual kan neih dâwn avàngin hna dang ka thawh a rem lo. Ka unaute ka ngaih ber ni a ni hial ang, anni chu awm se hetianga lo huphurh viau hi a ngai lo tùr.



Ka tifel zo thawkhat ta. Khua a lum si a, mikhual 6 vêl lo thleng tùr nghah pahin tiin fan hnuaiah chuan dawhkàn bawhin ka chàwl a, ka lo muhìl lehnghal a.



An lo thleng ta, sumo thar ţha zet mai an rawn hmang a, keimah chauh ni lovin, ka pa sikul a bàn ve tawh avàngin kan pahnihin kan lo hmachhawn. An vaiin, driver tiamin 6 an ni. Thingpui ka lo chhuang nghal vat.



Ka chêt nasat avàngin ka thlan nasa a, ka taksa a ban chup mai. Lo chibai an ngai ngei dâwn si, ka va huphurh tak!



An rawn lût ta, an rawn țawng lût nasa mai. Nu ber emaw tiin min rawn chibai hlawm ta sap sap mai, thil làwmawm tak chu a ni miah lo, 'ka nu' anga min ngai upa chu ka lâwm teuh lo. Lâwm lo viau mah ila, lo nuih der erawh ka țhulh bîk lo.



A tàwp bera ka chibai erawh chuan ka mit a la ta zak mai. Mipa hi ka melh khât, a chhan chu Mizo mipaah hian ka duhzâwng tak ka hmuh ka ring ngai lo( ka va zak lo tak! An duhzâwng ka ni bîk àwm tawp si lo); mahse, he pa hi chuan ka rilru a rawn thlâk ta dâwrh mai, ka melh nawn leh chiang.



Mipa ka duhzâwng chu sâng ve tâwk tak leh ngo a ni ziah. A chhan chu ka sâng lo va, ka ngo hek lo. Chuvàng tak chuan, fate an ngaihtuahawm loh nân an pa tùr atân chuan ngo leh sâng ka duh ziah, mi zînga insit rêng rênga hun an hman loh nân.



He sipai pa hi chu mipa pâwn lam lan dàn ka tehna ațang chuan a tling chiang mai. A sâng țha khawp mai a, a koki pawh ka chen pha miah lo, bâkah a la ngo zui, ka rei! Ka duhthusàm țhin mipa chu tunah hian ka chibai ta reng mai si, Mizo ngei a ni bawk! A hming pawh Ruatfela.



A form hâk inhmehzia chu, a boot bun lian zet leh lang lawk lek lek chu a inhmeh thlâwt! A tipà ka ti, heti khawpa form inhmeh hi ka la hmu ngai lo. A pâwnlam lan dàn chu ka chibai chhûngin ka hmu hman vek!



Khabe hmul tam vak lo a nei. A mithmul a dum țhain a buk viau. Gold colour sana a bun, a kut dinglam zungteah zungbun a bun bawk, tu pêk tak ni ang maw?



Ka hmai a mawm lehpek ngawt ang! A va zahthlâk tak! Bâkah, ka lo muhìl sek nèn, khua a lum si a, ka mit a bui vek ngei ang, dârthlalangah lo inen hmasak tùr asin le; mahse, ka tlai zo vek tawh.



"Bawihi, thingpui chu han siam la?"



An țhu khâwm a, ka pa chuan eng eng emaw a sawipui a, inthlan lam hlîr an sawi. An zînga an hotupa ber R.O chuan a bag ațangin lehkha pawimawh a rawn la chhuak a, ka pate nèn chuan an sam nghal mawlh mawlh a.



Thingpui ka va pêk chuan làwmthu an lo sawi sap sap, an polite hmel viau e. Kumin MP election chu țum dang election aiin a danglam, a chhan chu rawn duty-te an naupang tlâng viau, kum 30 leh 40 inkâr vél an nih vek ka ring, chutah, chhe lo ém ém a la awm zui.



Thingpui an in zawh hnuah chuan school lamah an inzui chho ta a, kan in ațanga pên sàwm vêl lek a ni, an chhuah hnuah chuan ka thaw huai mai.



Eirawng ka bâwl ta nghâl. La hma viau mah se, lo inhmakhua kha ka duh. Zànah kan inah political party agent leh khawtlâng hruaitute nèn inhmuh khâwm an duh leh ngei dâwn si a.



An rawn chhuk leh hnuah chuan inbual dài tùrin ka ti hlawm a, anni chuan nui chung hian 'mut dâwnah' an ti tlat a, an peih vak rih lo ni tùrah ka ngai mai. Driver leh Pu Faka erawh chu an insil dai, khua a lum ka tih tehlul nèn, inbual ka châk asin.



Zanriah chu kan ei hmasaktîr a, inkhâwm zàn a nih vàngin a hmanhmawhthlâk ta vak lo. An chaw ei lai chuan room-ah ka awm daih, ka nuin a vil thung.



An ei zawhah ka nuin min rawn ko va, ka va chhuak a, an puar leh puar lohte chu a mawihnaiah ka zâwt ve. Ruatfela ber chuan thûm chhar hian," I bai siam kha a tui khawp mai," a lo ti sup a, ka awih lo lutuk chu ka nui ringawt!



Bai siamah kher kher hi chuan ka hlawhchham țhak. Ka nu a awm loh vàng chauhin ka siam ve a ni a, a tui chu ka ring thlâwt lo a ni.



Chaw kan ei a, an lo titi ta thung. An thil sawi chu ka ngaithla ru reng a, ka pa an phone tlang theih loh thu leh kan chhûngkaw phone number an neih țhûm thute chu nui chungin an sawi a, ka phone number pawh an sawi lang chiang viau, ka hming an la hre țhelh zui, 'Miriam' an ti, chaw ei pah chuan ka lo nui sak sak.



Zànah sikulah an riak dáwn. Khua a lum si a, inbual ka duh avàngin inbual an duh leh duh loh ka zâwt hlawm a, an lo duh lo, nichîn deuh khân Ruatfela khân zàn mut dâwna inbual a duh a sawi zauh kha ka hre reng sia, a inthlahrung deuh a ni ngei ang.



Mu tùra an chhoh dâwn chuan ka pa chuan," Hetah riak țhen ula, khitah chuan in leng dáwn em ni?" a ti a.



A ni lah tak a, office-ah EVM an dah àwm si a, office a lian vak si lo nèn, an leng lo tawp ang, chêp taka an mu a nih loh chuan.



"Nia, sir, Zuala (driver) nèn hian kan han riak ang a, nangni chu hetah riak rawh u," Ruatfela chuan a ti thûm leh sup sup a.



"Ni lo ve, kan riak tlâng vek ang chu," R.O chuan a lo ti tlat a.



Pu Faka chuan," Miriam, zîngah thingpui min lo pe peih ang em?" a lo ti a.



Ka tho hma ngai lo. Zîng dâr 5:30 vêlah an tho ngei ang a, chumi hun vêla thingpui han pêk chu, hmm, ka tho thei ngût ang em?



"Peih lohna tùr a awm hlei nem," ka lo ti ve ringawt.



"Maria-i alawm," Ruatfela chuan a lo ti sup thung a, Pu Faka chuan nui chung hian," Pawi lo, a dik vek tho," a lo ti a, kan nui a.



"Maria, zîng dâr 5:45 vélah thingpui chu min lo pe peih ang maw?"



Nui chung hian," Peih mai ang chu," amah en chung chuan ka ti a," Pawnthuah in duh belh ang em?" ka ti nghal zat a.



"Ngai lo, ruah a sùr loh phei chuan duh aiin a lum mah mah ang," R.O chuan a lo ti ve a, mi dang pawh chuan an lo ti ve sap sap a.



An chhoh hnu chuan ka inbual a, a va nuam tak! Khawlum tak hnuaia tui vâwta han inbual sar sar chu, nuam tak a ni ringawt.



Mutnaah Wattpad story ka chhiar a, whatsapp message ka dawng nawlh mai, number ringawt ațangin!



*Naktûk zîng chu thingpui kha min lo pe ngei ngei rawh aw, Maria*



Tu tak ni ang maw? Ka ngaihtuahnaa awm-mêka hi a ni thei ang em? Ka ring phal lo. Ni tak tak se aw...



A dp ka check vat; hmuh theih tùrin a awm lo, tu nge tih ka hre thei lo. Ka number a save lo tihna a niang.



*Aw le* tiin ka reply a.



Message dang ka nghâk ru deuh viau nain a lo thleng tawh lo. Ruatfela a ni ang em le? A nih loh chuan tu nge niang? R.O nge Pu Faka nge Driver? Tu pawh chu lo ni se, naktûk zîngah thingpui ka pêk an ngai dâwn.



Tihtùr ka neih vàng chuan thawhhai ka hlau tawp, ka muhìl țha thei hauh lo. Ka harh hma khawp mai, hetiang hi ka ning ngawih ngawih, ka tireh ringawt thei si lo.



Thingpui ka han pêk meuh chuan an lo inpeih tawh khawp mai. Ruatfela phei chu a uniform dak thlarhin a lo ha tawh! Pâwnah a lo tei a lo tei a, tray-a thingpui leh a hmeh ka chawi min lo hmuh veleh chuan a lo nui suk a, ka en duh lo viau nain ka mitmei ru ve tho tlat.



Làwmthu an lo sawi tliar tliar a, a hnuah Ruatfela, pâwna awm chu ka va pe ve. Mau hmanga siam țhutna nuam zetah a lo țhu tawh.



"Ka lâwm e," a lo ti sup a, min lo en vang vang pah a, min tilai lutuk ringawt.



"I theihnghilh ka hlauh vàng a ni miah lo a nia."



Hre thiam lo zet hian ka en há a, ka hriatthiam lohzia a hria a ni chêk ang chu," Message kha," a lo ti zauh a, ka hre thiam chiah. Nizàna message min rawn thawntu kha amah hi a lo ni chiah.



Lai zeta nui chung hian," Nangmah i lo ni maw?" ka la ti zui, zei loh theih heih heih e.



"I number chu kan nei vekin ka ring."



Um, ka ringhlel hauh lo; mahse, min phone tlang thei tawp nâng, signal ka nei ngai hlei nem. Sikul tlângah chauh signal chu ka nei ve thei.



Ka chhuksan rih, thingpui ka la in bîk lo tlat.



Kan vêng chu voters kan tam lêm loh avàng leh zîngkâr lama vote an thlâk deuh vek tawh avàngin chaw ei tùrin dâr 10:15 -ah an lo chhuk a, Ruatfela erawh a la duty.



Ka pain kan ar tui lai a talhsak avàngin an lâwm thiam khawp mai a, an khi sâng hlawm reng mai. An ei tam ve riauin ka hria.



An ei kham hnuah R.O leh Pu Faka chu an chho leh nghal a, Ruatfela a rawn chhuk ta thung. Kei leh ka nu nèn, kan pathumin chawhlui chu kan kîlho ta.



"Ei țeuh rawh aw," ka nu chuan a ti a.



"Um, ei țeuh ang, a tui dâwn si a," a lo ti ve mai. Nimin tlai lama vawksa rêp kan chhum pawh a la awm a; mahse, ani chuan dal hâng leh alu kan chu a duhtâwk khawp mai a, arsa chhum tui erawh a hâwp ve zauh zauh chauh.



"Ei țeuh rawh aw, tlai lamah in ei leh ang em?"



"Ka ei țeuh, tlai lam chu Saikûti hall-ah ei tùr an lo siam vek dâwn avàngin kan ei tawh kher lo ang," tiin min chhâng a, mikhual neihin ka rilru thlengin buai vek țhìn mah se, tlai lama chaw an ei loh tùr thu ka hriat chuan ka hnual deuh rawih.



"In véng hi a nuam e ka ti."



"Tak tak maw? A va làwmawm ve!"



"A fai si, sikul compound lah a fai bawk si, a lum vak bawk si lo."



A va làwmawm! Keiniin lum kan tuh tehlul nèn, a la awm rei loh vàng mai mai a nih hi.



Vote thlâk tùra ka han chhoh ve chuan," I thlâk ve tawh dâwn em ni?" min lo ti a.



"Umm..."



"Hmet na lutuk suh aw."



A nui suk chu ka nuih sak a," Ka hmet chawrh dâwn," ka ti lêt ve a.



Office-a ka luh chuan min lo fiam a, a hmasa bera lo țhu Pu Loncy-a chuan," I hming chu a thui ve hle mai, lehkha i zir laiin engtin nge i ziah țhin?" a lo ti a.



"Khatiang tho khân."



"Thui an ti ve țhìn em?"



"Ti e, kei pawhin thui ka ti."



A tàwpna bera ka kutzungchala ink lo hnawihtu tùr Pu Faka hnênah chuan," Tlêm tê chauh aw," ka ti zauh a, ani chuan ka kut chu chelh betin," Ni lo ve, kum nga danah chauh alawm i hnawih theih, hnawih vek ang," a ti a, a hnawih pherh lui ta vak a. Mi dang pawh chuan," Hnawih vak rawh, kum nga hnuah chuan a lo reh hman daih tawh dâwn asin," an lo ti ve a. R.O ve thung chuan," Khati khân ti s'u, thingpui tui tâwk min lum duh lo mai ang," a lo ti a, an nui dar dar a.



Pâwna chhuak pah chuan ka kut chu ka hru mawlh mawlh a, a pherh nasa si a, a mawi lo reh ruh lutuk.



"A ho e, kàitîr ve mai mai teh."



Min lo hmu reng niin, a lo nui sûng a.



"A mawi lo lutuk!"



"Khua leh tui țha i nihna nemnghehna a nih kha, a hlu lutuk zâwk alawm."



A tidik viau lawi si.



Chhùnah thingpui chu driver-in min pêkpui a, min lo fiam nasa.



"In va fel nupa ve!"



"In inhmeh lutuk!"



"Sawi rem nghal ang u."



Vote thlâk tùr an lo awm tawh mang loh avàngin an lo âwl tawh khawp mai. Ruatfela pawh thingbuk hlim hnuaiah a lo țhu mai mai tawh, vote thlâk tùr voters zât ațang chuan mi 10 vêl bâk an beisei tawh lo a ni àwm e.



Thingpui chu Ruatfela chu ka va pe a, làwmthu a lo sawi leh zauh.



"A nuam e."



"A lum ém hi."



"Ka âwl ve ém alawm, buaina a awm bawk si lo, kan zo hma dâwn khawp mai," a ti leh a.



"Dâr 5 nghah thlen a ngaih tho kha."



Thingpui dût hlakin," Ni tho e; mahse, rilru a thawveng tawh tho a," a ti leh a, chhang chu a țhial pah țâlh țâlh a.



Ka kal tùr chu min ko a.



"Ka hman hunah ka rawn text thei ang che tiraw?"



Deuh thlap thlap chuan.



"Aw, tehrêng mai."



A nui suk a, kei pawhin ka nuih ve tho.



Chutih lai chuan field-ah gypsy vâr a rawn tlân chho a," Observer a lo kal tlat mai," tiin a tho ta thuai a, gypsy chu a rûm ham ham a.



"Bawihi, bawihi, tho teh, an lo thleng tawh a nia."



Dawhkàn bawhin ka lo muhìl niin, ka mumang a lo ni maw?! Kha pa kha, kha pa mawlh kha, ka mumang ni mai tùr chuan ka va ui tak ém!!!