☆RUATSANGA☆ - 1

RUATSANGA  -  1  By  Dingdi Pachuau

( Story ka  vawikhat post-na a ni a,min lo chhiarsak ve hram ru. Ka inbuatsaih nasa ve khawp mai, chhiar peih loh pawhin a sawisel theih tho ania, a leng vek aw)


Vawiin chhun dar 12 hian ka hmu dawn a ni. Ințhenna tifel turin ka hmu dawn tih amah pawhin a hre tawh a, kum ruk lai kan inhmuh loh hnuah hian  engtiangin nge min lo dawnsawn ang tih chu ka hre chák phian. A thinrim viau ang em? Nge a lo hlim viau zawk ang le? Nupui tel lo va nun hman chu nuam a lo ti phian maithei bawk a.

Maimichhîng vang vangin a hmêl awmdan tur ka ngaihtuah a. A hmel, chhe lo tak leh pâ zet kha..  Ni lo, chutiang ka ngaihtuah  tur a ni lo. Ka chhuahsan chhan kha ka hrereng tur a ni. Ka hmuh hunah ka bêng pawp mai ang em? Nge ni a,ka hmanraw hmuh hmasak berin a hmâiah ka vawm chawrh mai zawk ang?

Ni lo, fîm taka rilru ka hman a ngai.

Hmm....ka thinrimna so but but chu ka thunun a ngai a ni. Hahdam tak leh zâidam thei ang berin  ka hmachhawn zawk tur a ni ang. Chuti lo chu, a thin ka tihrim vaih zawng, ințhenna a tifel duh lo ang. Mamawha pantu zawk ka ni tlat, ka inbengdaih a ngai. Ințhenna a fel hma leh ka zalên hma a ni mai a, chuvangin rilru fîm tak pua ka tihfel thuai a ngai a ni.

******flashback*****

 Banga  frame mawi zeta thlalak intâr  chu ka en reng a. A mitmu uk kharh, nalh zet leh fin hmêl zet chuan ka mit a la chiang a ni. A mithmul dum buk chhah zet  chuan a tilang zahawmin a luhlul ve thawkhat ang tih ka ring thiam mai a. A hmui mawlh mai chu... A mawi tâwk chiaha chhah niin fawh nuam tâwk chiaha pan a ni thung lawi si. Fâwp ta ila, thawnthu ka chhiar țhina a changtupa ang maia fawh nuam a ni ang em?

Thlalak chu  ka chûl kual dan dan a, a sam dum hlap, ngîl zet ațang chuan chûl kualin a hmuiah chuan ka tâwp chat a. He a hmui ngei mai hi...ka fâwp châk takzet, ka  insûm thei lo,zãwimuanga hnaih zêlin a hmuiah chuan ka fâwp ta zoh a.

"Dî-te?"

Ka ding ngîl zawt mai. Ka phu nasa bawk nen, frame chu a che lawih a, sailungvar chhuatah chuan a tla keh darh ta chuaih a.

Ni lo, Lalpa leh!! Frame ka tikeh.

Ka hmâi chu ka kut pahnihin ka hup vang vang a, ka zak bawk si. Buaina ka hmachhawn chu a ni ta reng mai. Frame ka tihchhiat chu thil man to tak ni lo hrâm teh se.

"E khai!!" Nu Sangi chuan pawitih hmêl tak leh awka chhuak ațanga lâwm vak lo tih hriat hian a ti țhat a. Mahni lo maha inthiam loh nakalaia. Mahse Nu Sangi hi a sual vak miah lo.

Kan  pahnih hian  he inah hian hnathawka chhawr kan ni a, mahse Nu Sangi chu a thawhna a rei tawh, kum sãwm a chuang tawh daih.  Ka hnathawh hi min enfelsak țhin a, a mittlun loh lai a awm chuan ka tinawn leh țhin. A strict viau nain  a rilru a sual hran lo va,min duhsakna kawng kawngah hi chuan a fel em em.

"A pawi ka ti takzet a ni, Nu Sang. Ka châwi mai ang, ka lei phâk a ni ang tiraw?"  ka ti sap a, hrehawm ti zet hian ka kut chu ka hûm nghet sauh sauh a. Ka hlawh tlêm tê hian a lei pha meuh ang em  pawh hriat va ni suh. Mahse, ka tihchhiat a ni miau si a,ka tih ngei ngei tur a ni. Ka rilru a hah kher mai. A man zât lah hriat a ni si lo, Lalpa, thil man to tak nihtir lo hrãm rawh aw.

"He frame hi thil man tlâwm tak a ni lo asin, i lei pha lo ang tih ka hlauhpui hle mai che. Mahse, lo lungngai lutuk lo la, Pu hnenah ka sawi ang a, a hrethiam maiin ka ring. A fel  lutuk ania"

Ka inthiam lo takzet. Vawiin hi he ina thla hnih ka thawhna chiah a la ni si. Chutah, frame man to tak ka tichhe leh ringawt chu a nia. Pu chu fel viau mahse a lungawi kherin ka ring lo, chubâkah ka la mi thar si. Ka pa erawhin a hriatchhuah loh hrâm ka beisei. A hrechhuak anih chuan a thin a rim ang a, kut min thlâk leh hrep mai ang. Chu thil thleng tur chu ka ngai ngam lo.

"Dãrthlalang keh them hi lo tifai la, inchung lamah  frame dang hman loh ka han zawng chhin ang e"

"Ka lawm e, Nu Sang. Ni dangah chuan ka fîmkhur viau tawh ang tih ka tiam e"

"Um, fîmkhur hi a ngâi viau reng asin. A chhan chu he inah hi chuan  thil man to tak takin min hual khup si a"

Nuam lo ti zetin ka bu nghat a, Nu Sangi kal hnu chuan dârthlalang keh them chu ka chharfai nghal a.

Hna ka thawh âwm tãwk zawng pahin he inah hian  maid angin ka thawk a, mahse zan ka riak ngai lo thung. Hna hrehawm tak a awm lêm lo va, chuvang chuan hrehawm ka ti hran lo. Ka pa hi he in neitute huan enkawltu-ah a țang a, he hna pawh hi ka pa min hmuhsak a ni. Ka pa chuan huan enkawl bakah wiring, inchung siam, sink siamthat leh hna hrang hrang a thawk tel vek țhin.

Pawl sawmpahnih ka pass hnuah college  kal zawm duh viau mah ila, ka pa hlawh ringawt ațang chuan ka chhunzawm thei lo tih ka hria a, chuvangin he ina maid anga thawh pawh hi ka hnial thei lo a ni. Ka hlawh hi tam lo mahse ka khâwl zel ang a, college kalna tur senso chu ka intum ve thei mai ang. College kal kher lo pawhin DIET-ah ka training thei ang a, primary teacher  nih hi ka lo dream țhin a ni bawk a, ka dream chu ka puitlin thei dawn a ni. College kal zawm pawh ka châk tho, college life  an tih fo pawh hi ka tem ve châk.

Rei lo te hnuah Nu Sangi chu frame kengin a lo chhuk a, dârthlalang keh them ka lo paihfâi vek tawh avangin thlalak chu frame-ah chuan a vuah a,bangah chuan a târ leh ta a.

"Saron room-ah ka han hmu a, hei a infit tâwk chiah lehnghal a, a lawmawm hle mai"

Saron room....Saron room chu room nuam tak a ni tih ka hria. Bathlar zâu tak neiin saron par chi hrang hrang, rawng inang lo tak tak leh par dan pawh inang lo tam tak a par vul chûk a. Room chhûng chei dan hrim hrim pawhin mit a la hle a, lal fanu room ni âwm a mawi a ni. Tu room nge ni ang aw tiin ka ngaihtuah fo,vawihnih chu ka tifai ve tawh.

Frame banga a târ fel hnu chuan inthlahrung tak chungin," Nu Sang, khawngaih takin thil eng emaw min tihsak leh thei ang em?" Ka ti sap a.

Mit ko sân âk pahin," Eng thil nge ni ta?" A lo ti vat a.

"Thil thleng hi  ka pa lakah kan zêp tlat thei ang em? A hriat chuan a thinrim ka hlau si a, kan zêp thei ang tiraw?" A hriat chuan min vaw dawn chiang sa.

"Tehreng mai,a hre miah lo ang" nui sâng chungin a lo ti a, ka thaw huai mai.

"Ka lawm e,ka lawm takzet e"tiin ka kuah chawt a, ka nu ang hialah ka chan a ni.

Ka hnung chúl hauh hauh pah chuan,"Rsa  thlalak i fâwp lai kha ka hmu reng che asin" a ti ta.

Mak ka ti lutuk chu ka meng phar nasa ngawtin ka ring. Ka zak lutuk chu ka sa pup pup a,ka kuahna chu thlahin ka biang  chu ka hup ta ringawt a.

"Ni lo, i hmuh ang kha a ni lo. Bawlhhlawh kâi ka chhêmfai zawk alawm"

"Tak tak maw?" A mit ko a sân âk âk a. "Ka hmu reng che alawm. A ãwm lo hran hleinem. Rsa hi  chu a hmelțha a, chutah chhûngkaw rochuntu tur a la ni zui. I lo star  ru viau anih pawhin nangni ang kumah chuan a zahthlak hleinem. Mahse beisei sang lutuk lo la,chuti lo chu nangmah kha i intina mai ang. A chhan chu Rsa te ang tlangval class sâng chuan class lo tak hmeichhia chu a duh dawn miah lo ania, chuvang chuan  nangmah i invêng lâwk dawn nia"

Um, dik chiah. Nu Sangi sawi chu a dik chiah a ni. Kei ang  hmeichhe dinhmun hniam lutuk hi...hna lamah rilru pe zawk teh ang.

#######################

Engtin ngai ve ang che maw?
Hlân che ila hmangaih biahthu.....

Kut bêng ri avang chuan ka zâi tâwp chiang kher mai. Pu ber (in neitupa ber) ka hmu chu ka zak kher mai, thlalakah chuan ka hmu fo. Mahse  hmaichhanah tak chuan ka hmu tam lo khawp, hmuh nuam pawh ka ti lêm lo. In ka tihfai lai hian ka hmu ngai lo tluk a ni, room-a a inkhung bo loh leh a chhuak daih zel.

Bûk nghat nghat pah hian,"I zâi thiam hle mai"  a la ti zui.

Ka hmai chu a sa vat vat a, ka beng pawh a ling  țha khawpin la ring. Library ka tihfai lai niin a reh bawk si nen, phûr taka hna ka thawh theih nan zâi ka ni reng a ni.

"Ka lawm e, ka pu. I awm tih ka lo hre miah lo va, min ngaidam rawh" tiin puanchhia leh funiture spray bur chu  lain ka kalsawn nghal a. Nu Sangi hian in neitute  awm lai chuan  an awmna tifai  lo turin  min hrilh fo țhin.

Kawngka ka pêl țêp tihah chuan," Kal suh, i tihtur ti zo phawt rawh" tiin min ko ding a. Chair-ah chuan țhuin,"Nuna fanu i ni tiraw?" tiin min zawt zui nghal a.

"Aw, ni e, ka pu"

"Hetianga fanu hmelțha leh záithiam  tak hi  a nei  tih ka lo hre miah hleinem. I aw a mawi ka ti hle a ni" chair chu nghêng ar arin min en reng a.

"Ka lawm e, ka pu"

"Mizo idol/ icon-ah te hian tel ve la?"

Min hmuhsit vânga sawi chu ni lul suh se. A hmelah lah chuan chutiang lang miah lovin  a tih tak hmel viau bawk si.

"Ina ka zâi mai mai țhin bâk, hmun dangah ka zâi ngai lo, ka pu"

"Bathroom-ah i tihna a ni thei ang em?"nui chungin a ti leh a, kei pawh ka nui ve ringawt a.

"Chuan, Bawihi, i hming le?"

"Dingdi Pachuau"

"I hming chu a common lo hle mai, a mawi phian bawk si. A nih leh, i kum zat te?"

'Kum sawmpariat ka tling țêp, ka pu"

Eng engemaw min zawt ta nual a, kan titi ta hrep mai. Ka lehkha zirna te, zirzawm lam chungchang leh  kan chhungkaw chanchin  min zawt țeuh mai. Hna lâk tura interview hi  ka inchan ber.

"Eng ang hla nge  sak nuam i tih ber?"

Leh ta daih chuan... mahse a lawmawm ve reng reng e.

"Hla hlui lam hi ngaihthlak nuam ka tih bâkah  sak pawh a nuam ka ti"

"Ţha hle mai, nih leh hla pakhat min sak sak thei ang em?"

**********************

A tûk zîng ațang  chuan  Pu ber tûkțhuan ei laia newspaper  lo chhiarsak chu  ka hna pakhat a ni leh ta. A chhan chu a mit hi a chak tãwk tawh lo hle a, chhiarsak mai turin min ti a,a hrehawm lêm lo nen, phûr tak chuan ka chhiarsak a.

A phone a rawn ri dar dar a, a kekawr  iptê ațanga phawrhin a chhâng nghal a.

"Hello, Bawiha?"

A tupa Rsa a be chiang. Ka lung phu a lo rang ve ringawt a, ka lo phúr ve viau bawk.

"Engtikah maw? Aw le, ka lo kal ang"

An inbia chu ka lo ngaithla ve reng a, newspaper lo chhiar rîk thu awm hek suh, an  pûtû inbia hre theia ka lo awm ve ringawt pawh chu ka lawm  tâwk ve em em a ni. A aw ri hriat ka châk hle mai. A thûm deuh ang nge, a sîn deuh ang le? Ni lo, a sîn lo ang ,a hmêl nên a inhmeh thei lo. A thâwp deuh sat ang a...a ni thei lo, cool reih rawih, zâwi lam,aw ki hniam reih rawih lam a ni ngei ang, chu chu a hmêl nen a inhmeh ber.

"Ka tupa Rsa a nih kha" phone dawhkan chunga dah pah chuan  a ti a. "Kar leh thawhlehni khian graduation day an hmang dawn a,min rawn hrilh a nih kha. Delhi-ah sumdawnna lam a zir a, hetia a zo thei tawh mai tur hi ka lawm takzet a ni. Ka upa ve ta a, ka thachhang dâwltu hi ka mamawh ve tawh a ni," a ti barh barh a.

"I lawm hle dawn a nih chu"

"Tehreng mai. Naupang smart tak a ni a, mahse a châng chuan a tihmawhin a luhlul hle, dân ka siam pawh a bawhchhe ve țhin. Boxing leh karate a tui hle a, a thiam viau bawk. A thil tih țhin zînga ka duh theih miah loh chu bike-a chak taka a tlân țhin hi a ni, ka hâu fo a, a sim chuang hlei lo va, a chetsual ka lo hlauhpui țhin vang ania"

A tupa chanchin tui taka a sawi chu ngun takin leh ngaihnawm ti takin ka lo ngaithla reng a, a chanchin ka hriat tam poh leh ka duhna a zual zel ni maiin ka hria.

A chhe lo tih chu a thlalak ațangin a  lang reng a. A taka hmuh ka chãk viau a ni. Ka hmuh hunah engtin nge ka awm ang? Ka nervous over ang em? Ka buai vek ang nge, ka khawng reng zawk ang? Fb leh IG lamah lamah stalk ka tum lahin ka hmu zo reng reng lo. Social media lam hian a lung a lên tehchiam lo pawh a ni mahna.

Nu Sangi leh ka pa hnên ațangin Rsa pu, a nu leh pa chanchin hi chu ka hre nual tawh. Rsa nu leh pa hi kum riat an inneih hnuah an ințhen a, Rsa pa hi  Rsa pi leh pu fa neihchhun a ni. Tunah Champhaiah nupui dang neiin  sikulah a thawk a,an harsa lo viau. A pa sumdawnna hi a tuipui thlâwt loh avangin a pa pawhin a tilui duh lo reng a ni. Rsa nu ve thung hi chu eng emaw laia Miss Mizoram lo ni pha ve ngat kha a ni a, mi zînga inlâr nuam ti chi leh chhe lo tak mai a ni. Fashion  a buaipui hle a,IG lamah pawh a lâr phian. A bialpa Bank Manager,Aizawl ami nen an inkawp nghet viau. Rsa hi chu a pi leh pu bulah seilianin an ni hian an enkawl chho ta a ni.
         


RUATSANGA - 2  By  Dingdi Pachuau


Zing ka tho hma țhin lutuk hi ka ning ve  thlâwt. Zing dar  4:30 ah ka  tho zat zat a, a chhan chu Pu berte in hi  kan in nen a inhlat em avangin ka inbuatsaih hma a ngai țhin a ni.

Pu ber pawhin min lo chîk riau a ni ang,  an ina riaka awm ve rih mai turin min râwn a. Ka pa erawh chu huan enkawltu  nia zîng taka kal ve kher a ngaih loh avangin riah ve kher a ngai lo a ti pawh a ni mahna. Ni lênga thawh ni pawh a nei meuh si lo a. Pu ber min râwn ang chuan  kei pawhin riahchilh mai ka duh, zîng lutuka thawh a ngâi tawh lo mahna. Nu Sangite bulah ka awm ve thei mai anga, a zia phian ang. Room ruak pawh a la awm tho sia.

Nu Sangite chenna hi Pu berte in atangin a hnâi ka tih tawh kha, Pu berte compound vek niin hnathawkte luah atana an sak a ni bawk. Chuvang chuan fin ve mai pawh ka inthlahrung duh bîk lo a ni. Mahse Nu Sangi hnena Saron room, ka room tura ruahman tura a hrilh chuan mak ka ti kher mai.

********************

"An inah i riak ve ang maw?"

"Chu chu a sawi dan chu a ni alawm"

"Engngati nge? Sangite chênnah i awm thei mai lo'm ni?"

"A thu hnial ka duh bîk lo alawm"

"A ina riak turin ka duh lo che. Sangi  chu ka lo bia ang a, an ina riak ve mai turin"

"Ni lo, ka pa. Chutiang chu ti suh, a thu hnial ka ni dawn asin"

Ka pa thu ka hnial avang chuan vuak ka tuar leh ta. Kum ruk kal taa ka nu min chhuahsan hnu khan ka pa nun chu a buai lehzual a. Eng emaw hlekah  hauh leh vuak ka tuar ziah, a chhan ka hre ngai lo. Ka nuin min chhuahsan atang khan hma lam pan tumna leh inthlak danglam tumna hi a nunah hmuh tur a awm lo reng reng.

***********************

Ka phone ri mai mai chuh!

Rûm nghat pahin banga sana intar chu ka en a, zing dar 5:30 chauh a la ni. Pu ber a awm lo chuang lo a, thawh hma viauna chhan tur ka hre lo. Tun ang hunah tu tehlulin nge min rawn phone ang?

A rik rei loh avang chuan  khum dûp nuam takah chuan  ka han inlet kual a. He khum nuam tak hi thawhsan ka huphurh lek lek țhin, ni rei lo tê chauh la mu mah ila. Room lah hi ka duhthusam. A chhunga furniture  lah hi a mawiin a to dawn tih a hriat hliah hliah vek a. Parda fual hnalh, man to tih hriat zet inzâr hnalh lah hi a mawi bawk si. Kan ina ka room  ka mitthla a, tehkhin phâk a ni hlawl lo. Thawnthua lal fanu ang maiin ka inchan hial reng a, a nuam ka ti takzet.

Phone bawk chu a lo ri leh a.

"Hello?"

"Dî-te, i tho tawh em?"

"Tho têp,Nu Sang. Eng nge ni ta?"

"Pu berte lo thlen ni kha ania, an lo zîng chhuah dawn sia, ka rawn kâitho che. Rsa room kha tihfai țhat leh vek a ngai dawn a,a rawn haw tel dawn tawh avangin. Inchhung chêt ngai nen,I buai lutuk ka hlauh avangin ka rawn hrilh lâwk che"

Ni dawn tak. Pu ber lo haw ni chu a ni ngei mai. Mahse Rsa a lo haw tel ve dawn tih ka hre miah lo. Rsa a lo haw dawn, he inah hian a lo haw dawn.

Ka tho rang kher mai. Phûrna mak tak sawifiah  thiam rual lohin min tuam a, hmaichhanah ngêi ka hmu thei dawn ta. Ka phûr lutuk leh helhhawlh lutuk chu ka za chung maiin ka hria.

Inchhung chêt tur ka ti zo ta. Rsa room-ah ka lut nawn leh a, muangchãngin ka hrufai nawn leh vek. Sawisel tur a hmu ang tih ka hlau a, engkim chu duhthusama faiin hmu se ka duh.

Ka tifai zo chiangkuang ta bawk a, puanchhia leh furniture spray bur  chu ka la a, room rawn pan chho thawm ka hriat avang chuan ka pên chu ka ding chat mai a.

Lalpa, Rsa a ni ngei ang.

Kawngkhar a rawn ri a,min hmuh ka duh loh chuan ka bihruk vat a ngai. Tukverh hnâi ber bulah tlân vatin parda fual hnelh hnawlh phênah chuan ka tawlhlût ta nghal a.

Min hmuh loh hrâm ka beisei.

Room-ah chuan a rawn lut ta ngei e,Nu Sangi chu a ni lo chiang. Ka thin a phu dawt dawt mai. Khum lam a pan thâwm ka hria a, parda pan deuh zawk chhan ațang chuan chiang lutuk loin ka hmu thei a, ka en reng a, khum bulah chuan a ding a, min hnungchhawn bawk.

A sâng thlerh thlawrh hle mai. Room chhung chu enkualin a jacket a hlîp a, khumah chuan a thehthla nghal a, a dârpharh  hlâi darh  chu a  t-shirt vâr  hãk , taksa phuar deuh hlek atang chuan chiang takin a lang thei a.

Ka dinna  parda lam chu a rawn thlêk ta vang vang mai. Ka thâwk a tâwp dawnin ka hria, ka thâw ngam tawh lo, ka thinphu a rang bawk si. Rei rawn en lovin a hawisawn  ta a, a hawisawn rual rualin boruak tam thei ang ber ka hîp lut nghal a.

A  t-shirt chu a hlip leh ta. Ka mit chu ka khap sawk sawk mai, a pian chu a nalh teh e, chiang deuhin hmu lo mah ila, a nalh chiang tih ka hria.

Lu thing nâ nâin a nui suk a, thil nuihzatthlak a ngaihtuah chhuak pawh a ni mahna. Kei lahin mit tla lek lekin ka lo thlîr reng a,a hmél chhe lo lutuk tak mai saw, ka theihnghilh thei tawh lovang tih ka hre nghal a ni.

A jeans pawdal hâk chu phelhin  a hlîp zui nghal. Ka en duh tawh lo, ka maimichhîng tawp. Mit ka chhîn loh chuan a boxer hlîp leh  ta se ka au chhuak vak ang tih ka hlau.

Ka meng leh der der a,a boxer pawh a lo hlîp tak tak!!! Lalpa leh, ka kutin ka hmui ka hup vat,nget lutukin, ka auchhuah vak loh nan.

Ruak vekin a awm ta. Min hnungchhawn zawngin a ding hlauh. Chuti ni lo se...

A mawng sexy zet leh a mal sei thlarhte chu.. Milim kertuin milim, a duhtawka mawi leh duhthusama  a ker ang hi ka tehkhin. Chiangkuang taka hmuh ka châk kher mai.

Bathroom lam a pan a, a intleuh zawk dawn a ni ang. Bathroom-a a awm chhungin room hi ka chhuahsan ngei a ngai.

Ka thlan a tla bawrh bawrh mai. Tui herh hâw ri ka hriat veleh  thâwm dîm thei ang berin ka dingdihlîp a, kawngkhar  dîm lutuka hawngin ka chhuak ta a.


Tukțhuan ei laiin Pu ber chu newspaper ka chhiarsak leh ta a. Ke pên thâwm a rawn awm a, Rsa chuan chair-a rawn țhut pahin ,"Good morning, ka pu " a ti nghal a.

Ka newspaper kenlai pawh chhiar chhunzawm lo chuan Rsa chu ka en reng a, a va chhe lo tehlul em!! A sam a la hnâwng deuh a, shower gel rim nam vang vang ațang chuan a intleuh zo chiah tih a hriat theih bawk a.

"Morning, nizan i mu țha maw? I tho nuam em?"

"Aw, mumang bo țhakin ka mu. Kapu, nang pawh i mu țha tiraw?"

Pu ber chuan nuih var var pahin," Tehreng mai. Hei hi Dîte-i  a nih hi. Kan huan enkawltu ber Nuna fanu ania" tiin min hmelhriattir a.

Min en reng a,ka zak kher mai. A mitmeng uk kharh, vāwt raih mai chuan min x-ray ni berin ka hria. Khûk chem chema khûk ral daih ka va châk em!

"Chibai"

A aw chhuak vâwt reih rawih leh hniam chhak chu a inhmeh phian, Pu ber a biak dan leh min biak dan aw chu a dang daih. Ka kut a thlan dap dap a, ka lung a phu rang viau bawk.

"Chibai le, ka pu" Ka aw chhuak chu ka va duh lo tak, a khûr deuh ti tih lehnghal. Chubakah ka aw chu a mawi lo thar riauin ka hre pek.

Chaw ei pah chuan sumdawnna chungchang an sawi a, bungraw lo thleng tharte pawh enfel a ngaih thu Pu ber chuan a hrilh malh malh a. An thusawi lo ngaihthlak ve reng chu mawi lova ka hriat avangin newspaper chu  ka bihsan ta daih a, mahse a rûkin Rsa chu ka melh ru reng tho.

Melh loh ka tum pawhin ka melh lo thei lo. Dining chair-a a  țhu chu a inhmeh bik hliah hliahin ka hria. Chaw ei paha a țawng leh zauh thin chu a aw hniam chhek chhawk nen chuan a inhmeh ngawih ngawih.

A zûnah ka uai zo  ta chu a nih ber hi.

####################


Rsa awm achin chu zîng thawh  pawh ka phûr ta riau mai. Tûkthuan ei laiin ka hmu thei a, ka lawm tâwk em em a ni.

Min be ngai lo, min en ngai lo bawk. Chaw a ei mawlh mawlh a, a puin a biakin a chhâng a ni leh mai. Mahse keiin duhtâwkin ka en thei a, ka lung a âwi ve em em mai a ni. A engkim mai hian ka lung a dum ni maiin ka hria, ka duh hi a ni tawp mai.

Ina a awm tawh hi chuan ka zui rû reng hi a ni tawp mai.Gym-ah emaw, pool-ah emaw khawi room-ah pawh ni se ka bihthla reng a,ka zui kual char char a ni mai.

"Nang hi, uitein a pu a zui kual reng ang maiin Rsa hi ngatinge i zui reng a? Thil thleng a awm em ni?" Nu Sangi'n min biakna chu chhân ngaihna ka hre lo kher mai.

"Engmah a awm lo. Ka hna ka thawk mai ania" ka ti ringawt a.

"Dâwt sawi lo mai teh. Rsa i zui kual reng mai leh i biru kual reng hi  ka hmu lo che emaw i ti a ni ang e. Ka hmu reng țhin che asin, i ti mah mah  lo maw? Rsa'n nula high class lo chu a melh lovang  tih ka hrilh tawh che kha. Nangmah intina suh ang che"

"Ka hria alawm, keini ang mi hnuaihnung  chu melh  pawh min melh peih lo tih chu. Ka star ve mai mai ania, chu chu a pawi viau em ni?"

"Star te chu pawi lo ve. Mahse invêng fîmkhur turin ka duh mai che ania. I bihthla ru țhinte hi hmu fuh ta che se la, engtin nge ni ang?"

"Ka fîmkhur alawm"

Lu thing nar nar pahin," Ni lo, Bawihi.  I fîmkhur sêng lovang tih ka   hlauhpui che a ni" a ti ve thung a.


RUATSANGA - 3  By  Dingdi Pachuau


Zan khat chu ka muthilh theih loh avangin pâwnah ka chhuak a, pangpar chi hrang hrang, saron, rose leh derhken rawng chi hrang chu an  pâr vul chûk a. Thli a thâwt heuh heuh avangin chûng pangpar  rim inpawlh chiai chu a rawn nam leh chem chem țhin a.

"I muhîl thei nange?"

Ka phu zawk, ka zuang dâwrh lo chauh tak tak. A aw atang chuan Rsa a ni tih ka hria. Ka lung a phu dawt dawt a. Ka phut nasat vang chu thuhran ni se, ka bula a awm vang chu a ni  bawk.

Inherin ka inkuangkuah thân a. Kan inhlat loh em avang chuan ka lungphu  ri chu a rawn hre pha ang tih ka hlâu ru hial mai.

"Aw, ka pu"

A chhiat lohzia mai chuh!! Pawn light chuan min ên chiah lo nain zân thla êngah chuan a lang chiang kher mai. Mipa hmeltha hi chu Tv -ah te ka lo hmu ve fo tawh thin, mahse  ka duhthisam tur hi ka hmu ngai lo. Ka duhthusam tur mipa hi ka mitthla thiam thin lo va, mahse Rsa ka hmuh chiah hian ka duhthusam thin , ka suangtuah thin ang ngei kha amah hi a ni tih ka hria.

"I sam chu a mawi hle mai"

Ka mut tawh avangin ka sam, ka vial tawm vek țhin chu ka thlah a,a sei angreng a, a hmâwr lam hi a kir pah bawk a. Mu tawh, tho leh ka nih avangin a hnawk nuaihin ka ring a, ka sam chu ka han chûl ringawt a.

"Ka lawm e, ka pu"

"Pu chu ka la ni bîk lo asin"

Chhân dân tur ka hre lo. Ka hnathawhna pu ber tupa niin min chhawrtu ve tho a ni si a, pu mai loh chuan koh dan ka hre lo a ni.

"I pa hi a thawkrim khawpin ka hria, pangpar a chîng tam bawk si"

"Nia". Chhân thui dân tur ka hrw hlawl lo.

"Ka pi khân pangpar hi a ngaina thin hle asin. A chîng țantu pawh amah kha ania"

Kum nga kalta khan a pi hi a boral tawh tih ka hria,  Rsa enkawltu ber a ni bawk a, a ngâi viauin ka ring. Pangpar pawh hi a pi lo chîn chhuah a nih avangin an chîng zui ta reng a ni.

"Oh , a ni maw?"

"Pangpar i ngaina ve em?"

"Aw"

"Thil dang duh deuh bîk, ngainat bîk i nei em?"

"Pasta"

Kan ngâwi deuh vang vang a, kalsan mai ka duh a ni, mahse han kalsan vut lah chu dikin ka hre si lo. Lâi deuhin ka awm reng sia, a hahthlak.

"Ka puin i zaithiam hle tih a sawi a"

Ka zak kher mai. Ka zaithiam hle si lo va, nuam lo ka ti a ni, zaithiam tak chu ni ila, a nuam deuh tur.

"Ka pu chuan a ti ve mai mai a nih chu. Ka zaithiam lo  tak tak"

"A ni maw?" A sana bun  chu a bih zoh a. "A tlâi tawh riau mai. Mut tum tawh rawh, thil ngaihtuah vak vak lo la" a ti  a. "Nge  tu emaw ngaihtuah deuh bik i nei a ni lo maw?"a ti leh a.

"Nei chiang e, nangmah. Nangmah kha ka ngaihtuah che"tia âu vak mai ka duh, mahse ka ti ta êm lo.

"Ka kal ang e, mangțha le. Tui deuhin i mu dawn nia"

Tui deuha muthilh  chu khawi lam, ka muhil thei lo chiang kher mai.Amah ngaihtuahin ka tlâivâr deuhthaw a ni.

###################

Pu ber chu a fel viau mai, min ngaina der ve hle bawk. An in hi a zâu hle a, Nu Sangi nen enkawltu kan nih bâkah  cook hi a awm hran leh a. Pu ber hian driver chhawr a nei bawk a, pu ber a kalchhuah loh ni chuan  ka pa a puih ve mai bakah a țul țul a thawk ve lâwp lâwp țhin. Ani pawh Nu Sangite in bulah a awm ve a, a hranin in a luah ve a ni.

Nu Sangi hian fanu, kei aia la nâu ve deuh, pawl sawmpahnih zirlai a nei a. Tin, thingtlang atanga an chhûng,Lungleia sikul rawn kal an awmpui bawk. Anni pawh hian an hman châng chuan min rawn thawhpui ve zawk zawk tho, an fel dun phian. An țawng duh a, an rawn kal hi chuan kan nui nasa țhin khawp.

Aizawl lamah Pu ber chu sumdawnna thilah inhmuhkhâwm a ngaih avangin a kal a, Rsa'n a zui ve ka ring ania, mahse a zui miah lo.

Chhûnah Rsa țhianteho an lo lêng a, eisiamtuin an eitur a siamsak vek a, kei erawh chuan ka buaipui lo hrim hrim. Hmeichhe pahnih leh mipa pahnih an ni a. Hmeichhe pakhat sambuang, chhe lo zet chu a ngaihzawng a ni ngei ang.

A engamah hmain ka ngaina lo nghal ringawt. A bialnu ni ngeia ka hriat vang pawh a ni mahna. A hmel a țha,a changkang, a ngo viau bawk. Ka rilruin ka lo thîk ve em em mai a ni.

"Thawmhnaw i su zo tawh em?"

"Aw, ka zo deuh chiah"

"Rsa room ami, a thawmhnaw bâl ka lak theihnghilh daih a, i han la lawk mai dawn em ni? Room-ah an awm chuangin ka hre lo"

Ka châk rualin ka huphurh tho, a room hi tifâi țhin mah ila, luh luh hi ka huphurh țhin tho nia.

Zâwi muangin ka chho a, kawngka chu a inhawn deuh avangin ka bih dêk dêk phawt a. Chuta ka thil hmuh avang chuan ka ding khawng chiang kher mai!

Rsa khumah chuan sambuangi leh  Rsa chu ruak deuhthawin an lo awmdun a, an lo infâwp mawlh mawlh mai. Hmeichhia chu Rsa mal chungah țhuin a kâwng achin chunglam chuan khuhtu a nei lo. Rsa pawh boxer nen chauh a awm a nih hmel.

Ka inngaihtuah harh hnu chuan  ka tawlhsawn vat a,ka â húih mai. Ka thil hmuh chuan  min tihrehawm hle, hrehawm ti tur ka nih phei chu ka hre lo.mahse, ka thinlung hi a na em em si. Bialnu a neih chu ka ring khawp , mahse hetah inah, a room-ah, kawngka pawh kalh  lo ém chuan an awmdun ka ring pha miah lo.

Hemi ni atang hian Rsa hmuh loh dan tur mawlh ka zawng ta ngar ngar a. Pu ber tukthuan ei laia newspaper ka chhiar  pawhin ani a lo lan chuan ka kalsawn daih zel,a chhan chu an titi țhin tho sia,chhiar chhunzawmna hun a awm chuang lo. A theih chinah  chuan hmuh loh hrâm ka tum, mahse zánah erawh ka mu țha lo țhin khawp mai.

He pa hi ka duh phãk a ni lo a, a duh tur chi ka ni hek lo. Hei hi ka hriatchian hle a ngai. Ani tân chuan  engmah ka ni lo a, an ina chhawr pakhat ve mai ka ni. Nu Sangi pawhin min hrilh lâwk tawh kha, ka buaina lo turah ka lo buai ve chiam a nih hi, zahthlak zawk hian a.

"Rsa a dam țha lo a, a room-ah chaw han pe  mai ta che"

"Midang tir zawk rawh,kei chu hei ka hman lo sia" Washing machine-ah thawmhnaw bâl ka vawm lut mawlh mawlh a.

Nu Sangi chuan chuan makti hmel  deuh tak hian," Midang an awm lo, eisiamtu ber a lo kal loh hi. Han dah la, i lo chhuk lehnghal dawn alawm. Ngati nge a? I châk viau ka ring asin" a ti a.

"Nu Sang, nangmahin han pe mai la, ka laklawh bawk sia"

"Hmuh i hlâu em ni?"

"Teuh lo, hei ka buai em hi"

"Tak tak maw?! Nangma pek ngei a duh sia" Ka hresual a nih kloh pawhin a sawi sual tal a ni ang, awihawm loh lutuk.

"A nuihzatthlak loh ania"

"Tinge a? I duh ni khân ka hre si a"

"Ka duh tawh lo"

"A va mak dawn ve!! I zui kual dat dat reng sia"

 ************************

Sitting room ka tifâi a, frames leh leather sofa ka hrufâi a, centre table  ka tihfâi laiin Rsa chu a lo kal a, ka lo en duh miah. Ka tih lai chu ka tichhunzawm malh malh a. A rúk tak chuan nuam ka ti lo, ka thil tih lâia min en ve reng chuan ka confi thei lo.Safa-ah chuan rawn țhuin , centre table-ah chuan a ke chu a rawn hlâng duai a.

Eng nge inah a tih reng reng ni? A pu hnung zuia a chhuah ve ka rin tehlul nen, thatchhe lutuk mai.

Ka thil tih lai chu châwlin ka kalsawn a.

"Dîte"

Amah en chuang lovin ka ding a.

"I dawhkân hrûk hi a fâi lo ania, hru nawn leh rawh"

A hmâia ben ka châkzia mai chuh..ka thinrim chu ka insûm țang țang a ni. Lêt lehin dawhkan chung chu ka spray a, ka hru leh nghal a. A ke pawh chu ka hru tel sawk sawk a, lâksawn tum miau lo hek.

"Ka tui a va hâl tak!"

Ka en duh chuang lo, ka thiltih lai chu ka ti mawlh mawlh a.

"Ka tui a hâl ka tih chu"

Hmm...a va han chimawmin min va tibuai em!!  Ka thinrim chu ka insûm hrâm hrâm takmeuh.  Tui laksak tur chuan choka lam ka pan a.

Ka lét leh chuan a lo awm tawh miah lo. A va han ngeiawm thiam tak! Dawhkan ka nawhfai a sawisel a, a tui hâl thu sawiin min tîr leh a, a hâl tak tak hauh si lo. Keimah leh keimah chu ka insawh thinrim hlur mai.

Pu ber awm loh chhung chu min tithinur reng hi a ni ringawt. Kei lahin ka hniah ngam bawk si lo, a hnuaia thawk ni miau hek i.  A chimawm khat tlat hi a ni mai, ka thinurna tur tâwk chiaha ngeiawm a thiam lutuk hi a châng chuan ka nuih a za zawk.


*************

Ka zîng tho chu ka lu a na búr mai. Nizan ka mut țhat loh vang a ni. Ka mumangah Rsa leh sambuangi kha ka lo hmu a, sambuangi hmuh lai chuan min lo vîn phar nasa mai a, thinrim țúnin zîng ka thawh phah.

Ka insúk laiin Nu Sangi'n min rawn ko a." Rsa'n  newspaper chhiarsak turin a duh che a?" a rawn ti a.

"Pu ber chauh ka chhiarsak țhin. Ani chu chhiarsak a ngai lo, a mit a la țha alawm. Ka hman loh bakah ka lu a na"

"Ngati nge hmuh i hreh tak viau le?"

"Ka lu a nat vang ania,ka insuk zawhah ka mu lawk ang"

Min tilui bik lo. Ka insûk zawh chuan ka  room-ah ka chho a, damdawi pawh ei chuang lovin ka mu vang vang a. Ka mut hnu rei vak lovah chuan ka muhil ta mai reng a.

Ka room kawngka kik thawm avangin ka harh a, Nu Sangi a nih ka ring. Ka lu na a la reh chiah loh avang chuan peih lo deuhin ka tho a, kawngka chu ka va hawng a, mahse tumah ka hmu lo. Kawngka bulah chuan tray-ah  hian damdawi mum, tui bottle leh bowl lian vak lo, inchhín tlat hi a lo awm a. Makti deuh chuan ka'n hawng a, pasta a lo ni a. Nu Sangi siam a ni ngei ang, Nu Sangi kha pasta ka ngaina tih ka hrilh tawh emaw ni dawn le?

*******************

Zan khat chu ka țhiannu birthday lawmnaah kal ve ka tum a, zîng lamah Pu bet ka díl tawh avangin leh zan lama hna thawh tur a awm chuan loh avangin rilru  zângkhâi deuhin ka insiam a.

Ka thawmhnaw zinga ka inhmeh ve bera ka hriat , kawr dum fual,khup chen, bãn tâwi té chu hain pheikhawk pum sen, hnniam té ka bun tawp a, ka sam chu ka uluk ve kher mai. Make up etawh ka inhnawih vak ngai loh avangin tlêm té, a hming  chauhin ka inhnawih ve a, Mama'n min rawn hruai dawn avangin inhnuaiah chhukin ka lo nghãk a.

Tsa,Tv room atang lo chhuak chuan min hmuh chuan a mit ko sân âk chung hian,"Wow, khawilam nula nge i nih chu le?"a ti a, ka chhân loh avangi"Khaw'nge i kal dawn?" a ti leh a.

"Ka chhuak lawk dawn"

Ka incheina chu a thlêk kual vel a,ka lâi bawk si, ka phone chu ka ensan daih a.

"Kekawr  ha ta che"

Rum taka melhin," Ka duh duh ka ha thei alawm, kekawr chauh hi hãk tur a ni kher lo. Kawrfual pawh thawmhnaw a ni tho" ka ti  hlar a. A nui suk duh chauh nia. Mama lo thleng thuai thuai se ka ti kher mai.


"Kawrfual pawh a nih loh kha"

Ka chhâng peih tawh lo. Ka phone chu ka  thlêk  ka thlêk tawh mai, a rawn thleng har ka ti tawh hle a ni.

"Rawn haw har lo la. Hmeichhia, zân rei tak tak pâwn lama hun hmang țhin hi ka tei thei țhak lo ania"

A va han thú lo tak em!! Zan tina chhuak țhin pawh ka ni lo va, a mi tihdan hi chu pāidam hi a har ve ngawt mai.

Rei vak lo hnuah chuan Mama chu a rawn thleng  a, horn a rawn pe a. Hmanhmawh takin ka chhuak a, ka țhutna tur passenger seat kawng min lo hawnsakah chuan nuihsakin ka țhu lút nghal a.

Mama hi ka star țhin. Ka țhiannu Lily u nen an inkãwm țhin a, Lily te ina kan awm lai hian anni thiandun  pawh an lo awm ve ziah. Hmelțha, sport thei tak, ria lam deuh leh ngo lam aia hãng lam pâwl mah hi a ni a. Star-tu a ngah țhin viau niin Lily'n a sawi, ka ringhlel chhin lo, a luck hle tih ka hre tlat a ni.

Kan thlen meuh chuan an lo awm kim deuh vek tawh a,sâwm chin chu. Lily chuan min lo welcome vat a,a bula min țhuttirin ," I lo kal thei hi ka lawm takzet a ni" a ti sap sap a.

"Kei pawh. I birthday ka lãwmpui che"


"Ka lawm e"

Ka rin âi daihin nuam ka ti. High school ka kal laia țhian țhenkhatte nen kan titi a, kan lãm a, ei tur lah kan hnianghnâr si.


Dar 9:30 velah chuan haw tawh mai ka duh a, Lily chu ka ko a.

"A tlâi tawh sia, ka haw tawh mai ang"

"A la hma lutuk"

"I hriat kha, ka tân chuan haw tlâi a chi miah loh ania"

"Zanin chauhte chu, titi pawh kan la titi hman hleinem. Titipui che ka châk ania"

"Eng lam nge sawi i duh a?"

Meng sawr sawr pah hian, "Rsa chanchin min han hrilh teh, Chénpui a nuam em? A bula awm ve chhin ka chãk ania" a ti sar sar a.

"Châk duh suh, a chimawm khat tlat"

Ani lah chuan min rawn hnaih sauh pahin," Awii, ka hrechiang châk deuh deuh. A chhe lo ropui si" a ti leh sap sap a.

"Chhe lo viau mah se a ngeiawm tho"

Lily chuan mak tih hmêl deuh hian," Wow!!Nang pawhin chhe lo i ti ve  tho elo?!  Mipa i ngaihsak vak ngai pawhin ka hre ngai si lova" a ti chúl a.

"Mipa ngaihsak loh pawhin chhe lote chu ka hre ve thei tho lo em ni?" Kan inen a, kan nui dun hak hak a.



RUATSANGA - 4  By Dingdi Pachuau

"Rsa chu min lo tihpui teh a"

"Zia awm teh"

"Eng nge? Nge i tân i hauh hlur tawh zawk?"

"Ka ning, nei vek rawh. Mahse, ka tihpui che chu beisei suh. A reng rengin țha deuh i neih tawh reng kha"

Ani lah chuan ner sak chung hian,"Hmm,kan awmdan hi  ka hrethiam lo alawm. A chângin min ngaihsak viau a, a châng leh min kawp niin ka hre bawk. Distance chu a buaithlak, ţhen maite hi ka duh  ţhin. Ngaihzawng nei pawh angin ka inhre tawh lo" a ti a.

"A la rawn be tho che a ni lo'm ni?"

"Be tho e. Mahse ani nen hi chuan kan inneih pawh ka ring lo, zu a in ţhin lehnghal"

"A la sim na nge?"

Lu thing nar nar pah hian" Teuh lo. Inneih hma atanga zu in chu an ţha lo tawp ang,  pâ nih hnua sim chu an awm tehmeuh tho ang a, mahse a risky ka ti lutuk" a ti leh barh barh a.

"A nih tak chu. In inbiak leh hunah kawp a neih leh neih loh chu zawhchian a ngai a nih chu"


Zan dar 10:30 ah  Mama'n min thlah haw a, a titi barh barh a, kei erawhin ka ngaihtuahna ka lo kâwm veng veng thung a.

" I va ngâwichawi ve!"

Ka phu zawk lehnghal, chi loh lutuk.

"Chuti mi?" Nui chungin ka thlêk zoh a.

"Zanin kha nuam i ti em?"

"Umm, ti khawp mai"

Kan ngâwi leh vang vang a. Car tape a play ta hlauh a, boruak a nuam deuh sawtin ka hria. Ed Sheeran 'Perfect' a zâi vang vang a.

"He hla hi chu a mawi ve chiang a ni"

"Nia, a satupa hian a sa thiamin a sa lungrun ve bawk em a ni"

Zan boruak thiang raih nen chuan Ed Sheeran aw chu inhmeh ka ti  takzet. Titi lo chuan ngaithlain a changin kan lo zâwm ve a.

Mama chu ka mitsírin ka en ru pah reng a, a rimtui hman chu a rim a pâ viau nain a rim a tui a, hnar pawh a verh khawp mai,amah nen a inhmeh ka ti lutuk.

In kan thlena la chhuk dawn chuan," Ka lawm lutuk aw" tiin ka nuihsak a, ani pawh chuan,"Kei pawh le, ka hruai thei che a,ka lawm hle zawk a ni"nui chungin a ti ve a, a ha vâr țhat chu a lang chiang kher mai.

Pu berte pawh an mu tawh a ni ang, light a thim nual tawh tlat. Kawngkhar ka kalh nghal a, room pan chhoh mai ka tum lai chuan Tv room atang chuan,"I lo va haw hmâ ve, a nuam vak na nge?"Rsa chuan a rawn ti a.

Chimawmliana...

"Nuam e"

"I rawn haw himdam maw?"

A sawi awmzia chu ka hrechiang khawp mai. Ka thinurna chu a rawn inthuah leh tup tupin ka hria. Âwm dawmin ka ding vang vang phawt a, thâwk muangchangin ka la bawk a.

"Aw, ka lawm e"

Ka chhang lêt ve thiam tho. Thinura ka chhân lét hian a chimawm sual sauh zel a, dam taka ka chhân erawh hi chuan a chimawm rei lovin ka hria a ni.

"I luck vak lo a ni maw?"

Chhãn enah pawh ka en tawh lo. Room lamah thinur teuhin la chho  ta a. Haw tlai lo turin min ti a, ka haw ta chéng a, haw hma min ti leh bawk si. He pa tak hi chu a. A, khawvel a tifamkim ve reng reng e.

Lily birthday kan lawm zan atang chuan Mama  chuan min rawn text țan a, pawi ka ti tehchiam lo. Ka lo star ve ngar ngar țhin kha anih avangin  ka be chhe lo hrim hrim, tunah pawh ka la star tho.

Sambuangi pawh a rawn inlâr peih riau. A hming pawh ka hre tawh, Eli a ni. A chhe lo ka ti reng, mahse a phakar hmel ka ti lutuk. Chuan, a inla no viau a, a hawi sâng ka ti bawk.

A rawn kal lahin Rsa room-ah ngat ania an awm țhin ni. Zak lo hi ka ti ve thlâwt. Keini min zah lo pawh ni se,Pu ber hi chu zah ve âwm tak. Ka hriat hma fé aťanga lo inhre tawh ni mahse zak lo ka ti tho tho. A inla no kual vel lah hi ka hné.

Chimawmliana lah ka chungah a la che chimawm  chho zel a, țawngkam țha reng reng a leng lo. Pu ber hmuh lai erawh chuan țawngkam pangngai thei ang ber ka hmang thung.

Ka birthday pawh a lo hnâi ta. Lawm ve ngei ka duh avangin Pu ber ka díl a, kan ina lét leh loh chuan hetah chuan lawm a chi si lohva. Pu bet erawh chuan a ina lâwm mai turin min duh nain ka hnial ve tlat a, min tilui bik lo.

Lily leh Mama an phúr kher mai
Mama phei hi chuan lo lên a duh țhin a, mahse keiman ka remti lo. Miina awma tlangval inlêng lo neih  chu ka duh teuh lo, Chimawmliana'n min nuihzat âwm em mai.

Pu berin a phal avangin ka birthday lo thlen hma ni chiahin ka haw a, ka birthday ni phei chuan an ina ka kal pawh a ngaih loh thu min hrilh nghe nghe. Inbuatsaihna hun min pe a, fel ka ti em em.

Țhian ka ngah lova, chuvang chuan thil ei tur lei  pawh a harsa lo. Lily leh Mama'n sum min tum nual a, ka hnial viau nain ka hnial hmain an lo lei lâwk nual.

Lily hi tét té atanga ka kawmchhoh awmchhun a ni a,sikul kal tlângin kan inkâwm chho ve ngar ngar. Midang te hi chu Higher-a kan kawm an nia, mahse an fel lutuk,kan inkâwmngeih tlâng tawp.

Țhian hmeichhe 3 leh Mama leh Lily u, U Sam-a ka sâwm a. Ka birthday hi ka la lâwm ngai lova, ka lawm ve chhunah chuan ei tur hnianghnâr tak eiin puar se ka duh. Nu Sangite pawh ka sâwm tho taknain an hman lova, Pu ber pawh a rawn kal ka ring chuang lo.

Kan tam lo nângin kan ri ve laih laih a. U Sam-a'n fiamthu a thawh a, Lily lah a phawk berah a țang a,an unau avangin kan nui nasa hle, kan bengchheng viau bawk.

Ka pa a inthiarfihlim avangin mitmei vên tur awm ta lo chu, a țhen an zâi a, a țhen an lâm nghang nghang a, a châng leh fashion show an ti, camera lah a rim.

Thlang lam bathlâr zâu lo téah chuan Mama nen kan țhu a, light-in min chhun phak loh avangin a éng lo hle a.

"Naktuk zân atangin em ni i riah phei leh ang?"

"Ka hre lo le, tinge a?"

"Ka lo lêng châk"

"Hei i lo lên reng hi"

"Nia, tun anga lo lên theih hi ka châk, sawtah chuan lo lên i phal si lo va"

"Ni bawk si"

Ka kut rawn vuan pahin," Awm phei tawh lo la"a ti sap a,"Mahse ka hma ka sial tiraw?"a ti leh a.

Chhân ngaihna pawh ka hre lo, ka zak bawk si. Ka kut chu a chelh ta reng a, kei pawhin lãk lêt ka tum bîk lo. Zahloh chhuah ka duh ve, chuti lo chu bialpa ka nei thei nãng.

"Mahni hma sial dan țha zawk pawh a ni maithei asin"

Ka kut pahniha vuan chungin,"Zanin hi ka tân a hlu takzet a ni" a ti leh sap sap a.

"Engngati maw?"

"Hetia i kut ka vuan thei ringawt pawh hi a hlu em asin"

Ka kut vawn ringawt pawh hlu a ti!! Hetianga min ngaihlutu hi ka la tawng ngai miah lo. Mak ka ti a, ka awih lo lek lek a ni.

"Ka awih chiah lo"

"Ka ti tak tak"

An haw hnuah chuan ka mu nghal tak nain ka muhil thei lo. Mama nen kan infáwp miau a!!! A vawikhatna atan mipa ka  fâwp ve, ka fâwp ti ila min fâwp  a ni mah, kei chuan ka lo dawh tawp, zei lo min ti ngawtin ka ring, mahse chutiang lam engmah a sawi lang miah lo.

A túkah chuan Pu ber hnenah chuan kan in aťanga kal leh mai ka duh thu ka hrilh a, a lo hrethiam mai a. A room-ah min ko lut sauh sauh a, ka birthday present min pe ve ngéi. Ka rin loh lutuk anih avangin  lawmthu sawi ngaihna pawh ka hre lo hial.

"I duhzawng tur ka hre si lova, ka lei risk tawp"

"Ka pu, ka lawm takzet a ni. Lawmthu sawi ngaihna pawh ka hre lo, ka duhzawng a ni hrim hrim ang"

Pu ber room atanga kan chhuak chu Rsa kan tâwk a, a chhuak daih emaw ka ti nghe nghe. En pawh min en lo nia, ka birthday kha a hre ve awm sia, min wish ve tal ãwm. Huh..ka phút sâng em mai a, he pa hian chutiang chu a ti lul lovang.

In ka thlen veleh present ka dawn chu ka hawng a, cotton shirt vâr nalh zet mai leh envelope a lo awm a. Ka thawmhnaw hãk lai chu hlípin ka inthawlh chhin nghal a, darthlalangah ka inthlêk ve ngial. Ka inhmeh reuh lutuk.

Envelope  chu ka la leh a, a inchilh loh avangin ka hawng nghal bawk a, a chhunga ka thil hmuh avang chuan ka meng phar âwk âwk mai!!

Cheque chu kut khúr dar dara chelhin ka en chiang a, ka rei leh!!! Çhéng nuaikhat lâkchhuah theihna cheque!!! Pu ber hming sign lah a awm thlap si.

Envelope chhungah chuan lehkha dang a la awm cheu! Ka en leh a, Pu ber ziak a ni chiang, a hawrawp tung súl leh hrâw zet atang chuan ka hrechiang ve hle.

  *I birthday ka lawmpui che a,he pawisa hi i college kal chhunzawm nan ka pe a che, pawm ngei turin ka duh bawk che*

Mak ka ti lutuk, lâwm bawk si chu ka zuang zawng zawk a, ka țé chiam bawk. Miin min lo hmu ta se chuan ka â emaw an ti ngei ang. Hetiang zah zah pawisa a thláwna han inpêk ringawt mai chuh. Ka awih thei lo hial zawk a ni. Ka chanchin min zawh chiam laia zirna chhunzawm leh ka châk thu ka sawi kha a lo la hrereng a nih hi.

Zânah Mama a lo léng lo. A chhan chu lo lêng rih lo turin ka ti a, ka pain min hâu ang tih ka hlâu a ni. A inla strict ve sia, mi hâu a zak ve tawh si lo nen, zahna ka tuar peih rih lo.

Mut hmunah  min rawn text ngei a, a hnuah phei chuan min rawn call. Mahse ka pa a awm ve avangin leh kan room a inhnaih chilh em avangin ka țawng ring ngam lo. Ka chhân dan atangin Mama pawhin a hrethiam thuai a, min rawn text leh ta zâwk a.

"Tlangval inlêng i nei a ni maw?"

Whatsapp message a ni. Number ringawt atangin ania, a dp lah ka hmu thei lo zui.

Chhân pawh ka chhâng lo. Mama text chu ka chhâng a. Rei lo te hnuah number ngai bawk atang chuan message dang a lo thleng leh a.

"Nei leh si lo ang, luck lo em mai"

 A thuhman dan atang chuan  Chimawmliana bâk a ni thei lo. Engtin nge ka number chu a lo neih pek ni? Ka chhâng ve ta a.

"Mu rawh"

A hmu rang kher mai,a rawn chhâng lét rang bawk.

"Ka mu reng"

"Muhíl rawh"

"Ka hlim lutuk ka muhíl thei lo"

"A va lawmawm ve!"

"Ka hlim chhan chu maw , i awm lova,  boruak hi a nuam ngawih ngawih a ni mai"

"A LO NIH TAK CHU"

Nui hmêl intlar țhút a rawn thawn leh a, ka ngei tâwk a tling leh em em mai. Ka chhâng lét peih tawh lo. Mama text ka chhânlét san leh daih a.

Message tone a rawn ri leh dat a.

"Naktuk chu chaw ei kham dar 10-ah lo kal la, thil țúl min tihpui turin. Rawn inchei nalh hle la, kawrfual  chhíng rawn ha suh ang che"

Awiiiii....he pa hi chuhhhh....Ka incheina lehzelah thu a nei lo chiang em mai.A hnuaia thawk ni mah ila, ka taksa a ni a, ka duh duh danin ka chei ang a, ka duh duh thawmhnaw ka ha bawk ang, a sawi tur a awm lo chiang.

"Puan ka rawn veng ang"

"I duh a thu le"

*********************

Pu berte in ka thlen chuan  dar 10 a ni thuak mai. Pu ber kawr min pék ngei mai kha ka ha a, ka hâk zin ber ber zingah a tel chho dawn tih ka hria. Kekawr dum , hâk nuam zet leh rubber pheikhawk flat dum ka bun  bawk. Thawmhnaw dum hi ka ngaina a, kekawr dum leh pheikhawk dum  ka bun hian ka confi  bík riau bawk.

Pu berin min lo hmuh veleh," I kawr chu i inhmeh hle mai, i inhmeh ka ring reng a, i tân liau liau a  țhui ni âwm a ni" tiin min lo fak chiar chiar a, a inhmeh lo ka ti hial zawk.

"Ka lawm e, ka pu. Hâk a nuam lutuk, ka duhzawng tak a ni bawk"

"A țhat hlauh chu. Taka, vawiin chu Bawiha i zuikual a ngai a ni. A hrilh tawh tho chein ka ring a, office leh bank lamah in kal a ngai a ni. I huphurh em?"

"Huphurh lo ve, ka pu. Ka lo țangkâi ve phawt chuan ka hreh hleinem"

Inchung lam ațangin Rsa  chu a lo chhukthla ta zân zân a, ngun deuhin ka lo en a, he pa hi chu a chhe mawlh lo a ni. Thudik tak a ni bawk. A thawmhnaw hâk apiang a inhmeh zel bawk si, a tân liau liau țhui niawm renga inhmeh a ni zel mai.

Min rawn hmuh veleh ka kelér atangin ka chhíp thlengin min enchhuak dap a.

"I puan rawn ven chu, kha, a va mawi ve!"

Ka chhâng lo, ka peih vél lo. Pu ber a awm ve bawk nen, ka chhân lét loh hian ka him hma.

Ka inthuamna chu a fuh ka ti phian mai. Office leh bank dâwr dawn chuan zahawm tâwk a awm ve a, ka inthuamna chu a zahpuiawm loh ka ti viau.

A pu hnen atanga leather bag dum, lian angreng tak a lâk chu khâiin," Min zui rawh. Vawiin chu ka'n hruai kual tak tak teh ang che" a ti a, a nui deuh suk bawk a.

A nuiha a hmelthat tehlul nen, a nui khât mah mah a ni. Mahse mipa nui vur vur reng chu ka duh miah si lo. A nuih loh pawhin a hmeltha tho a, mahse a nuih paha a ha vâr țhat mai leh a hmui chunglam chhíng deuh hlek chu a inhmeh bík ka ti.

Car-ah ka lút a, a pu nen eng engemaw an inhrilh leh chhúngin  car chhung chu ka lo en kual a.

Motor lam hi chinchâng ka hriat loh em avangin eng car nge tih pawh ka lo hre pek lo. A chhung chu a var hle a, a nuam hle bawk. A faiin a rimtui viau bawk a ni, tlangval car niawm renga rimtui niin ka hria. Enkawl uluk ani tih a hriat hle a, bâl hmuh tur a vâng hle a ni. Inchhung lam chauh ka tihfai țhin avangin car hi tunge tifai țhin ka hre miah lo. E, pu ber driver kha a ni tak ang.

Rsa chuan motor chu a khalh thiam kher mai. A car dum tle hlarh leh a sam dum,ngil zet , a chhipa a tihpir deuh hlek chu inhmeh bík riauin ka hre pek.  Sunglass a'n vuah phei chu chhe lo tak hi a ni ringawt.

"I mit kha a tla ang e"

Zak lutukin ka hawisawn nghal. A sawi dik, ka en nasa lutuk,mit tlãk hlauhawm khawpin.

"Zak duh suh, mi tih loh dan a ni hleinem"

He pa han inngaihhlut dan em em hi chu..

"I inngaihlu mai a nih chu a"

"Hlu ve bawk ang chu, ka hlu ve miau bawk sia"

"A lo nih tak chu"

Țawng thlâwn hi chu ka ba duh bík lo. Kan inbiakna țawngkam hi chu a naupang chhia hle țhin chuan ka hria, mahse he pa bulah hi chuan a nuam hranpa ve tlat ka ti.

SBI, bazar veng kawtah kan ding a, car a park fel hnuah  chhuak mai lo chuan," Lo hnâi teh" a ti sup a.

A ngaihna hre lo zet hian ka  en hâ a, ani chu lo âwn pheiin,"Tihian i mawi zawk" tiin ka sam kilhna chu a rawn phelh a,bakilh chu a ak zui daih a.

Makti deuh hian ka en reng ringawt a. Ka sam țhen chu hmalama húiin, " I sam hi țawn tawm ziah tawh suh" a ti leh sup a. Seat hnunga bag chu lain a chhuak ta nghal a, kei pawh inthing harhin hmanhmawh fahranin ka chhuak ve ta nghal a.

Chawhma hun zawng chu office leh bank  dâwr nan hun kan hmang a, Rsa bulah chuan chhiahhlawh rinawm ber angin  ka lo awm ve reng a, a chângin bag ka lo kensak thúl.

Ka thil hriatchhuah tâk chu Rsa hi ka lo rin ang ngawta thatchhia leh nép  a lo ni miah lo tih hi. A  rintlâk hle zawk a lo ni. A mawng a zâng si, thil a hre ropui bawk si. A puin a lo chhuang  viau leh a lo mamawh viau pawh kha a lo âwm ngawih ngawih a lo ni, a bu ang thlap a ni tlat.

"I ril a țâm tawh em?"

Car-a kan țhut laiin min zawt a. Zíng lamah chaw ka ei tlêm avangin leh kan kal kual nasat avangin ka châu viau lo nain ka ril erawh a țam viau.

"Aw"

"Pehhél lo ve thei bawk sia"

Melh hrâwkin,"Eng nge pehhél a ngaihna? Min zawt  a nih kha, dâwt ka sawi dawn em ni?" Ka lo ti hlar a.


RUATSANGA - 5 By Dingdi Pachuau

"I inhmeh ngawt mai" min melh vang vang pahin a ti sup a.

Leh ringawt a. Amahin thil min zâwt a, țha té téin ka chhâng a. Chimawm deuh deuhin min bia a, bak deuh hleka  chhân lét avânga hetianga intih ringawt mai.

"Nangmah vâng vek"

"Eng chu maw?" Hriatthiam loh  hmel deuh hian a ti a.

"Ka sawi peih lo"

"I sam kha alawm i inhmeh ka tih"

Ka rin loh lam daih a rawn sawichhuah avang chuan sawi tur ka bo vek nia. Min fak ve ngei, a ka ațanga fakna ri lo chhuak chu a inhmeh ka ti hlawl lo. Mahse a lâwmawm thlâwt thung.

"Ka lawm e"

Chanmari lamah kan tlân chho a, restaurant  pakhat changkâng deuh, ka la kal ngâi miah lohnaah min luhpui a, a nuam reuh tawp. Hetianga restaurant nuam leh changkang riau si hi Lungleiah a awm tih ka lo hre lo reng reng.

Mi châwl pawh an lo awm ve nual a, a nuam ka tihzawng tak a ni mai. A neitute pawh an inséng ve nasa ngawtin ka ring.

Kan lút chu a neitunu ber a ni ang chu ka ti mai, min lo chiau âu vat a.

"In lo thleng thei maw? Lo țhu r'u. Kan peih fel vek tawh ania" a lo ti vat a.

"Um, a țhat hlauh chu"

Țhuthmun kan rem hnu rei lo téah chuan kan dawhkânah chuan  ei tur an rawn dah nghal a. Kan order lai ka hre miah lo, mak ka ti ru viau. E, tak a,kan thlen veleh khan a neitunu khan 'Kan peihfel vek tawh ania' a tih tak kha. Rsa hian a lo order lâwk a ni chiang mai.

"Ei rawh le, i duhzawng tak a nih ka ring"

Bowl lian angreng deuha inchhín tlat chu  ka hawng a, Pasta tui  hmêl lutuk tak mai  ka hmuh chuan ka au chiam lo chauh.

"Aaaa....tui dawn lutuk" ka ti chhuak hliai a. Ka ei țeuh mai. Ka ril a țam tawh bawk nen, an pasta siam lah chu a 'cial' tawp a ni mai.

Ka ei zo chu ka puar ta khawp mai. Tui ka in a, ka in zo chu Rsa'n min lo en reng tih ka hmuh chuan  ka lâi lehpek. Mahse , zak âwm lo deuh hian," Ka puar hle mai, a tui lutuk tlat" ka ti a.

"Lo kún hnâi teh"

Ka kún phei ve mai. Ka hmui hnuai lam, ka khabe ni chiah si lo hi a napkin ken chuan a rawn hru a. "Naupang chhe thil ei ang mai"  a la ti sup zui.

Ka zak si, ka ngei bawk si chuan rum deuha melh pahin ,"Min hrilh ve mai la, keimahin ka hru mai dawn alawm" ka ti lét zék a. Mahse, ka inthiam lo leh deuh a, "Ka lawm e" ka ti leh ta zâwk a.

"My pleasure"

Ei man a pék lai chuan a neitunu chuan," I ei tui meuh maw?  Kan menu-a tel miah lo ania, mahse Rsa hian a rawn ngénngawl sia. Kan theihtawp chu kan chhuah ve a, sawiselna a awm em?" Tiin min lo  zãwt a.

Mak ka ti viau a ni. An menu-a tel miah lo, Rsa'n a ngen  avanga han siam tâk chuh. An lo tihsak ngei bawk si. An inhre țha hle a nih loh chuan an inchhúng emaw tal a ni ngei ang.

"A tui ka ti lutuk tlat. Kha tianga tui kha ka la ei ngai miah lo"

Kan  chhuah hnua car-a kan chuan luh hnu chuan ," A tui ka ti takzet a ni. An siam dan ka hre châk ngawt mai" ka ti zui a.

A ngawih reng avang chuan " Kha restaurant neitute nen khan in inchhúng em ni?  An menu-a tel miah lo pasta tui lutuk kan ei thei  sia"tiin ka zâwt ta nge nge a.

"Chhúng lo"

Min chhâng tâwi viau. A lung ka  tiâwi lo chu a ni em lo ang chu. Min chhân thui ve deuh ka ring ania.

"Ka lawm e, pasta tui tak min treat avangin"

"Thil ka chah lam lawk ang"

Leh daih mai a. Ka thusawi ve hi chu a engahmah hian a thawk hlawl lo.

"Aw le, Boss"

A rawn nui hawk mai. Makti zet hian ka melh phei a. "I va lawmawm reuh tak!" min ti a nih chu!

Faknaah ka pawmsak leh mai ang. Pasta ka ei kha a tui em avangin a a mi fanna chu sawisel lo phawt ang.

Snapdeal-ah thil a lo chah niin. Car chhúangah ka lo nghâk a. Parcel ang deuh, pahnih lai a rawn pawmchhuak a, lo pui vatin car kawngkhar ka lo hawnsak a.

Car hnung seat-a dah pahin ,"Vawiin chu ride ang aw"a ti leh daih a.

A duh duh a sawi țhin vang leh min ngaihchân ve lem loh țhin avangin  ka lo aw liam ve mai mai.

Inah kan haw leh vang vang a. An awmna hi Serkâwn hmun nuam lai leh remchâng lai tak niin, a fâl deuh hlek a, fâl lutuk phei chu a ni lo. Compound an nei zau hle a, huan zâu tak pawh an nei. Nu Sangi sawi danin Lunglei khaw mi hlun chhúng an ni a, sumdawng hlun an ni bawk. Chuvang chu a ni ang an hausak em em.

Pu ber hmu turin a kal nghal daih a. Kei chuan Nu Sangi ka pui lehnghal a, ka inthuamna nen ani puih chu inrem  fahran lo mahse  lo țhut ringawt chu ka duh bík lo.

Rsa ka hmuh leh meuh chuan vawiin lama a inthuamna a lo thlãk fel vek tawh a, a inthuamna leh ka inthuamna chu a inang hle mai.

"Room-ah chho la, han intifai rawh"

Min bia tih ka hre lawk lo, mahse ka bula a din reng tâkah chuan  min bia tih ka hre chauh.

"Eng nge kan tih leh dawn a?"

"Kan ride dawn ka tih kha"

He pa hi, a ti tak tak a ni ngei ang.

"Chutiang mai mai ka hman lo, hnathawk ka nih hi"

"Vawiin atân chuan a tâwk"  Ka bãnah  rawn chelhin inchung lamah min nam kal chho ta a.

Ka room hlui ka luh chuan ka kum bula rose pâr mawi zet inkhâwi ka hmuh chuan ka mit a la zar mai. Ka pan hnâi a, rose pâr vâr 10 leh a pink 8 niin a tharlâm hle a, a rim ka hním vang vang a.

Khumah chuan vawiin-a  thil chah kan lam, parcel pahnih zinga a té zawk  kha awmin marker-in ka hming a inziak kalh a, card a lo awm bawk a.

"Eng nge ni le?" Tiin makti deuhin  card chu ka la a, ka chhiar nghal a.

*Tlâi deuh tawh mah se, HAPPY BIRTHDAY*

Parcel chu ka hawng nghal zat a. Wow!!!! Adidas sneakers pink, nalh zet mai ka hmu chu, ka lawm lutuk ka au chhuak lo thei lo. Ka mumang a nih ka hlau, ka zu khawih. Ka insik a, a tak ngei chu a ni.

Ka pheikhawk bun lai phelhin  ka inthawlh chhin a, ka tâwk chiah lehnghal. Engtin nge ka bun tâwk chiah a hriat theih ni?  Ka'n kal kual a,ka inhmeh phian bawk si a, ka rilru a hlim takzet.

Inhnuai lamah tlân thlain ,"Birthday present min pêk avangin ka lawm e" ka zu ti lauh lauh a, Nu Sangi leh eisiamtunu chuan min lo en hau a. Rsa a a lo awm lo niin.

"En teh u, ka present dawn hi"tiin ka bun lai sneakers chu ka'n lek kâng kual vel a,ka hlim lutuk chu ka awm hle hle thei lo.

Rsa, pâwn lam atanga lo lút chiah chu ,"Present avangin ka lawm lutuk" tih pahin ka kuah chawt a. "Ka lawm lutuk" ka ti mawlh mawlh a.

"Naupang chhia" a tih sup chu ka hre reng. Mahse, engahmah ka ngai peih lo. A thil min pek hian min tilâwm lutuk a,  ka kuah hi a phú tlat a ni.

"Min tibâl vek dawn ania"

Ka thlah rualin a thaw huai a. Ka ngei țep, ka kut a bãl pawh a ni tawp si lo, ka thawmhnaw lah a bâl lo chiang si.

"Han insiam rawh, hmanhmawh deuh la"

Lungawi vak lo chuan ka chho hnâ hnâ a, mahse ka pheikhawk nun lai ka en chuan lungawi lohna tlêm chu a bo hneh kher mai. Insiam a ngai vak lo ca, ka hmai ka phih a, ka pheikhawk thar pawh khung țha lehin a hmaa ka bun ngai chu ka bun leh ta zawk a.

Inhnuaia ka chhuk chuan  a backpack  chu ak turin min ti a,eng tak awm ang maw? A rit nalh lehnghal a, amahin ah ce mai âwm tak. Car-in kan chhuak âwm tho sia, in leh car inkar ringawt pawh a ak peih lo aniah.

"Khawnge maw kan kal dawn le?"

"I hre mai ang"

Kawta bike ding chu ka melh a, engatan a la chhuak  ni ang maw? Bike-a min ride-pui a tum a ni thei mai ang em?

Helmet a keng tih la hmuh tâkah chuan ,"Bike hi i khalh lo ang chu tiraw?" Tiin ka zawt hlawl a.

"I khalh duh deuh em ni?"

"Bike-ah kan chuang dawn lo tiraw?"

A helmet khum pah chuan ,"Dawn chiang e. Kan ride dawn ka tih kha" a lo ti thung a.

A pu thusawi ka hrechhuak zawk mai. Bike-in chak tak takin a tlân țhin. Bike-in chak takin min tlânpui dawn chiang mai.

"Ni lo, bike-ah ka chuang ngai lo"

Ka ti tak tak. Bike-ah ka la chuang ngai miah lo. A hnung seat sáng euh te hi ka ngei.

"I chuang țan dawn tihna a ni mai"

Bike-ah chuan a țhu ta nghal a. Kei erawh chu ka din ngaiin ka la ding reng thung.

Min rawn enin ," Lo chuang rawh" a ti leh nghut a, bike chu a tinung pah bawk a.

"Aih, ka tla ang"

"Min ring em?"

A bawp sei thlurh mai chuan a intlawhkhalh hneh lutuk. Backpack chu ak-in a hnungah chuan ka lâwn a, ka tha khûr dar dar chu a hrechiang khawp ang, la hlãu miau sia.

"Min kuah thei ang"

Amah sî chéta thut ka duh loh tehlul nen,a bike a tihrúm rin tâkah chuan ka hnaih lo thei lo, ka hlau  tlat si a, a kawrah ka țham tlat a.

"Ka thaw țha thei lo, min țham nasa lutuk a"

A tlânchhuah hnu chuan  tlân chak lovin a tlân pangngai hle a. Ka țhutna a sân euh avangin  ka hnaih lo thei lo, ka tawlhthla zel a ni.

"Ka kâwngah vuan rawh"

A thu ka awih loh chuan ka tla mai ang tih ka hlau. A la tlân chak lo nain a tlân chak hun tur ka hre thei si lova, a pu thusawi ka hrechhuak thar leh a," Tlân chak suh aw" ka ti ringawt a.

"Min ring tlat mai rawh"

Motor a tlêm deuh naah chuan a tlân chak ta hle mai. Ka khap dái thei dawn chuang lo, a kâwngah ka vuan nghet sauh sauh a.

Kawng zâu leh motor awm lohnaah chuan  a tlãn chak far far hle,a hnung  ah ka bei thlar ti ila a dik ber ang.

Bike khalh chu a lo hnehsawh takzet e. Ka hlauhna pawh tlêm tlêmin a kiang ve zel a, mahse a hnung pharh darh mai  nghen chial chu nuam ka ti tlat a, a kawnga ka kuahna pawh ka phelh phal rih lo.

Theiriat kawng chung lamah kan tlân chho zel a, khawiah nge kan kal dawn tih rin ngaihna ka hre lo, a chhungte kan tlawh dawn pawh.a ni maithei a ni.

Kawnga mi kan tawhte reng rengin min enzui zel ni maiin ka hria. Bike khalhtupa hi a chhe lo em bawk a ni, a hmei a pain min enzui zel mai pawh chu ka dem lo ve.

Tlâng lamah kan tlân chho zel. Bike tlân theih chin thleng  bike chu khalhin  tlâng kan thleng chho a, Theiriat Tlâng an tih țhin chu hei ngei hi a lo nih hi.

Ka backpack ah  chu amahin a ak ve thung a. Camera a lo keng reng niin, tlâi ni tla tur, êng sur mai chu a mawi em a, thla lak nan a mawi dawn em a ni. Kei pawhin ka phone ka la chhuak a, ka selfie nghal.

Ka kal hla deuh a, a mawi lehzual dan tur style hrang hrangin ka hmet mawlh mawlh a, midang lo awm ve pawh ka ngaihven lo.

A tlâng a sâng tha bawk a, tlâng hrang hrang a lang thei țeuh mai. A mawi ka ti a, Pathian thilsiam mawizia ka hriatthar phah. Mihringin kan cheimawi țhin tehmeuh mai, mahse a duangchhuaktu chu Amah a ni.

"I bo ang e"

"Bona tur awm lo chuan mawle"

A camera chuan min tin vang vang a, hre äwm lo deuh chuan ka en duh lo lui a, ka zak ve alawm.  Ka ngaihsak lo der a, mahse kei pawhin a rukin ka phone camera chu ka on  ve leh a, ka hmehsak ve khawp ang.

Thla kan la țeuh mai. Kan châwl a, eitur intur a lo keng tel nual bawk niin, a ngaihtuah kim ka ti roh lutuk.

Chimawm viau țhin mahse vawiin a a chétdan hian ka thinlung a dek tlat. Ka birthday kha ka hrilh ve lêm lo nain a hriat chu ka ring tho a, a chhan chu Pu ber ka hrilh lai khan a awm ve tlat. An ina ka room hluia rose  pâr 18  khâwi pawh kha ama dah ngei hi a nih ka ring. Sneakers min pe a, restaurant-ah menu-a tek miah lo  Pasta tui lutuk ka ei bawk.

"Ka lâwm takzet zet e aw. I thiltih zawng zawng vangin. Chuan , hei tlâng nuam takah min hruai bawk a,  nuam ka ti hle a ni"

Min chhâng lovin min melh deuh reng a, ka lo lâi leh hman tawh.

"Lawmthu ka sawi chu i hria tiraw?

"Engtikah nge i lo lét leh dawn?"

Ka lawmthu sawi ve chu leh,  a bengrawngah a thun duh lehpek lo.

A zawhna chu ka hre lo der ve thei tho.

"Engtikah nge i lo lét leh dawn?"

"Khawiah maw?" Ka hre lo der tlat.

"I hriat reng kha"min melh rún pah chuan a ti sup a.

"Hria ila, ka zâwt dawn che em ni?"

Mit a la sawn duh map lo.

"Engtikah nge kan inah i lo lét leh dawn?"fiah fek fawk, záwi muang si hian a sawi kalh kalh a.

"Ka hre lo"

"I bialpa khân 'Lét tawh suh' a ti che em ni?"

Kan inen ta reng mai.

"Lét lo turin a thlém che tiraw?"

Ka mit ka la sawn daih. Ka en reng chuan ka rilru a hre vek ang tih ka hlau.

"Thlém lo"

"Lo lét leh tawh la"

Hetiang ngenna awka hi he pa lak atang hian  ka dawn ka ring lo. Lét leh turin min sâwm ania, min ngâi tihna a ni thei ang em? 'Ni lo, chutiang ngaihtuah suh,i beisei sâng lutuk em mai' tiin ka inhau ru mawlh mawlh a.

"I awm loh chuan inhnialpui tur ka nei lova"

Hmmm...chuvang a lo nih chiah chu. Ngâi tihte chu khawi lamah. Chimawm a chhuahna ber ka awm loh vang a nih chiah chu.

"Ka lo lét tawh lo ang" ka ti ve ngat a.

"Nitin i lo kal tho a"

"Chhún lama i chimawm pawh hi a hnéawm thawkhat viau reng a ni"

A huat ve deuh ka ring ania, a nui hak ri ka hriat chuan ka thusawi chuan a engahmah a thawk lo tih ka hre leh nghal a.

"Min lo hné țhin elo?"

Ka chhâng duh tawh lo. Min han hnialin chimawm viau mahse a chhe lo tho a, a zúnah ka uai tho si.

"Ka zúna i uai ka duh lo a ni"

Lei sei tâwkin ka chhuah khum. Mahse ka rilru chhungrilah chuan 'i tlâi tawh, i tlâi tawh, i zúnah ka uai daih tawh' ka ti mawlh mawlh a. Ni e, a zúnah hian a taka ka hmuh hma khan ka uai daih tawh. Ani duh leh duh loh khân awmzia a nei lo, ka uai lutuk tawh zawk a ni.

"I inngaihlu si a awwww"

A nui leh hak a. "I bulah hi chuan nuih tur hi a tam teh e, hei vang hian alawm ka lawm reuh em em che. Han hnial deuh che ila, i lo țang kawh ve nasa țhin sia, ka lâwm reuh tlat che alawm" a ti leh a.

'Lâwm reuh'. He țawngkam hi chuan min tilâwm tehchiam lo. Hmeichhe naupang hmuhin min hmu tihna a ni thei ang em? Chu chu ka duh miah lo.  Ka lian lém lo, mahse hmeichhe naupang ka ni bík lo.

"Hmeichhe naupang ka ni lo"

"I ni ka ti lo che"

"Hmeichhe naupang enin min en reng kha aw"

Chiang deuha min en hnuah thaw hawk chungin a hawisawn ta a. Kha maw, a dik chiah. Nula enin min en lo hrim hrim. Kum 18 lai ka ni ve tawh, vote nei thei chin, puitlinga chhiar theih  ka ni ve tawh tlat.

A phone a rawn ri a,'tu tak ni ang maw?' Ka tih rilruk lai chuan," Hi, Eli?" Tia a chhân avang chuan  ka hnual rawih mai. Sambuangi, chhe lo deuh, mahse ka thík deuh kha.



RUATSANGA - 6 By Dingdi Pachuau

A kalsawn daih avang chuan an thusawi ka hre thei lo. Kan ei tur eina bawlhhlawh chu ka khâwm a, polythene-ah thunin backpack-ah chuan ka thunfel leh vek a, paih mai mai ka duh lo. Thil țawihral thei a ni si lova, hei hi ka rilruah ka vawng reng țhin.

A rawn lét chuan kan haw a ni nghal mai. Tlâng ațanga kan chhuk thla chu hrehawm ka ti ngang mai. Kawng a chhuk si, min pua hi a ni ringawt.


"Ka lo tawlhthla lo thei lo ania"

"Min ring vek rawh"

Kawng nuam chinah chuan a tlân chak leh ta far far khawp. Ka hlâu tawh bik lo, a khalh thiam em mai a, chubâkah mak tak maiin ka ring thlap tawh mai bawk.

In kan thlen chuan a bike dahțhat laiin keiin ka luhsan a. Nu Sangi'n min lo hmuh chuan," In lo thleng tawh maw? A nuam em?" a lo ti vat a.

"Kan kalna tur i hre lâwk em ni?"

"Hre chuang nâng. Rsa'n a lênpui che a ni lo'm ni?"

Chair-a țhut pah chuan,"Aw, Theiriat Tlangah kan kal a,a nuam lutuk"ka ti ve a.

"Zanriah kha hetah ei vek tur a nih kha aw"

"Engtin maw?!!"

"I birthday pual zanriah mawle"

Mak ka ti lutuk. Ka birthday pualin hetah zanriah a buatsaih a maw?!  Nu Sangi thusawi chu a dik  dawn em ni? Thudik a nih chuan a lâwmawm ngawt ang.

"Ţhu châwl la, i insil harh dawn nia, zanin tlâi atan chuan kan âwl ang che" nui chungin a ti leh a.

"Tak tak em ni, Nu Sang?" Ka awih thei lo.

"Tak tak ni e, kan zavaiin kan ei vek dawn"

Hlim takin room-ah chuan ka chho a, ka zâi pah rât rât a. Ka rilru a hlim takzet a ni. Rose, pasta, sneakers leh zanriah. Chutah pu ber hnen atangin kawr leh pawisa tam tâwk pawh. Min duhsakna hi ka tân chuan a hlú takzet a. Engtik laimaha ka la dawn ngai loh leh neih ngai loh ka han dawnga ka nei hi ka mumang a ang ka ti hial zawk a ni.

Ka insil harh hnu chuan Rose chu ka hním leh vang vang phawt a, inhnuai lamah zâi rât rât pah chuan ka chhukthla leh ta a. Nu Sangi chuan ka chét ve chu phal lo viau mahse ka pui leh tho, âwl ka duh bík teuh lo.

Nu Sangi fanu  leh an ina lehkha zira awm nula ve tho chuan min rawn pui ve leh a. Fiamthu thawhin kan nui vak vak a, Lily bula ka awm ang thoin Nu Sangi fate bulah hian ka awm a, fiamthu  an duh ve tho bawk sia, an bula awm a nuam ka ti viau a ni.

Kan zanriah ei chu a tui kher mai. Ni danga kan ei thin nen chuan a inang lo khawp. Ni dangah pawh kan ei tui viau nain zanin chu a dang hlakin ka hria. Nu Sangite chhung,eisiamtu ber U Chhani, Pu ber driver U Fela leh ka pa leh kei, pu ber leh Rsa kan ni a, kan hlimtlãng dar dar khawpin ka hria.

Ei khamah kan che sang sang a, Nu Sangi kan âwl thung. Kan che zo hmá rèng a, țanrual hi chu chakna a lo ni takmeuh e. Rei țhu khawtlãi lovin U Fela'n min thlah a, U Chhani a thlah hmasa phawt a, a dawtah keini.

In thlen hnu rei vak lovah chuan ka phone ka phawrh a, vawiina ka thlalakho kha ka check leh miah lo mai a, 'check mai mai teh ang' ti rilruin ka han en dawn a, a êng thei ta reng reng lo mai a. A battery low lutuk a lo thi niin.

 Ka on theih hnu chuan Mama miss call 3 lai a lo awm niin. Ka call back a, a vawikhat riknaah a lo chhang nghal.

"Díte?"

"Aw, miss call kha hei ka hmu chiah a, ka phone a lo thi daih alawm. Zia lo tak tak a ni, pawi ka ti lutuk"

"Lo lén ka tum a, in ina ka rawn kalin a lo inkalh sia, khawnge in kal a?"

"Pu berte inah zanriah kan ei alawm. Ka birthday pual zanriah min buatsaihsak a, kan thlenna pawh a la rei lo"

"Um, a nih tak chu. An va ti lawmawm ve a tiraw? I ei puar bawk em?"

"Aw, ka puar lutuk tlat"

"Lo lén nân a tlâi tawh sia,mahse hmuh che ka chãk si. Ka rawn video call dawn che aw?"

"Haha, a zahthlâk, hmêl a chhe duh si"

"Ho lutuk, ka rawn call dawn che"

Min rawn call hmain ka text vat a.

"Ka  pa a awm ve reng ania"

A hmu nghal vat a, min rawn chhang vat bawk a.

"Tinge a lén loh a?"

"Kan chaw ei haw kan thlenna a la rei loh bâkah lén nân a tlâi tawh alawm. Nang pawhin i tih ve tho kha"

"I tidik leh bawk si. Nih leh i pic min lo send teh"

Vawiina Theiriat Tlânga ka selfie, ka lan țhat ve na ber nia ka hriat chu ka thawn a.

"Khawi lai hmun nge? A va nawm hmel ve!"

"Theiriat Tlâng a nih kha"

"Vawiinah i kal em ni?"

"Aw"

"Tu nén?"

"Rsa nén"

Min rawn chhâng har ta deuh.

"Thikthu chhia nih ka duh lo nain  Rsa hi hnaih lo thei hrâm la ka ti"

Mama hian a thík tihna a ni thei ang em?  A ni chiang mai, ve ngei a. Ka nuih a za.

"Vawiinah office  leh bank ka dáwrpui a, lawmthu sawi nan min kalpui alawm"

A reh leh deuh vang vang a, a hmu reng tawh sia, a thinrim deuh em ni le?

"I thinrim lo tiraw?"

"Thinrimna chhan tur a awm ang em?"

"Awm miah lo. Engmah Rsa nén kan inkârah a awm lo. Pu ber tupa niin min chhawrtu a ni a, a thu ka awih mai a ni"

"Um. In inkârah engmah a awm loh chuan a țha a ni mai alawm"

Kan intext rei phian. A lungawi lo  hran lo a ni ang. Ka khawngaih roh, lo lén a tum ve sia, kan lo awm lo nen, min rawn call , ka chhang bawk si lo va, lungawi lo deuh mahse a awm ka ti tho ang.

Ka muhil țép tihah message tone a rawn ri leh dat a, ka lu bul maia ka dah avangin a nghawr dat bawk a. Ka thin a rim kher mai, ka muthilh teuh tawh nen. Rsa a la ni zui.

"Mu tawh em?"

"Aw"

"I châu viau lo maw?"

"Châu lo ve, tinge a?"

"Ka ngaihtuahnaah hian i awm reng sia, i châu tawh ngawt ang ka lo ti a"

He pa hian min fiam leh tawh tihna em ni? Nge min lémna thar zawk?

"I ngaihtuahna chu a țha lo a nih chu"

"Ţha tiu teu viau ka ti asin"

"Ngaihtuahna tuiék. Paih bo vat rawh"

"Lawmawm reuh lehpek"

A ti leh ta. A lakah hi chuan naupang, lawmawm bâk hi ka ni mawlh lo.

"Naupang enin min en ziah suh, naupang ka ni lo. Nula ka nih hi. India danah pawh puitling, vote nei thei chin ngat"

Nui hmél a rawn tlar tuar mai. Mai mai a,naupang chhia min ti ziah a, naupang chhia ka ni bík lo. Nula, ngaihzawng nei ka nih hi.

********************

A ngâi téin ka nitin hna chu ka thawk chhunzawm leh ta a. Zán lamah Mama a rawn lêng ve ta. A lo lén zankhatna, a țantírah chuan hrehawm ka ti khawp mai. Ka pa a awm ve si a, chubakah lo biak a tum si lo. Mahse Mama felzia ka hmuchhuak, ka pa chu a be siam siam a, chhân lét loh theih lohin a be thiam tlat nia. Zan danga a rawn lén leha ka pa a awm chuan ka pa zawkin a lo be vat ta a, an titi dun thei phian. Kei an sírah  lo țhuin  an titi ka lo zawm ve mai thin.

"Mama hi a fel roh hi le"

Zanriah kan ei laiin ka pain Mama chanchin a sawi a,mak ka ti kheer asin. Ka pa nen hian kan titi khât a,thil pawimawh a sawi bâk hi kan inbe tam lo, nél pawh ka nél lutuk lo. Ruih cháng a nei a,a ruih chânga a duh loh zawng ka sawi palh hlauh chuan kut min thlâk țhin. Hei vâng hian ka nél tak tak thei lo va , a ruih chuan ka be ngâi lo lehzual, ka tithinrim palh ang tih ka hlâu lehzual țhin. Lily hian min hrechiang khawp ang. Ka nu min chhiahsan hma, kan chhungkaw nundan zawng zawng hretu  a ni a, min khawngaih thei tawp. Ka nu min chhuahsan hnuah pawh Lily hian min riahpui țhin, Lily a awm chuan ka pa pawh hian min vaw ngai bík lo.  Tun hnu pawh hian hna ka thawh theih áwm tâwk min ngaihtuahpui ve reng a, mahse college rap lo tân chuan a vâng ve a ni. Dâwr nghah tur chu kan hmu mai, mahse ka pain a phal lo. Lily hi chu an rethei lém lo va, zirna pawh a zawm thei bík a ni.

"Tlangval fel tak a ni"

Mama chu a lâwm ngawt ang. Ka pa hian mi hi a fak ve mai mai ngai lo. Kei phei chu min sawisél reng thin zawk. Mahse nunțha leh chêtdan phung dik zawk  ka neih a duh țhinah ka ngâi mai. Ani bâk hi neih ka nei si lo va, ka chhungkaw neih chhun a ni.  A khawhar hnem nâna zu a in țhin leh nuthlâwi a rím țhin pawh hi sawisél ka tum lém lo, a hlimna tur a zawng a ni ve mai. Mahse kut min thlâk țhin hi chu a zahthlâk ka ti, a na ve țhin tho bawk si.

Mama hi Rsa nen an inrual vel ka ring. Chhungkaw vântlâng tak niin an unau hi pathum an ni a, a upa ber a ni. A nau hmeichhia nen kan inrual chiah. Venglaiah an awm a, tunah hian M.A chhuak tawhin sikulah a inhlawh mék a, B.Ed lam tih leh a tum bawk.

Zãnah Mama chu a lo léng ngei a. Ka pa a léng tawh a, free takin thlang lam bathlârah  kan țhu leh a. Vawiin lama kan hun hman dan min zawt a, keiin a hun hman dan ka zawt ve thung a.

"I hah em? I hna hi a hahthlâk lutuk lo tiraw?"

"Hahthlâk lo ve. Ina kan thawh țhin ang tho alawm kan thawh"

"Hna dang han kawhhmuh tur che hria ila ka ti ngawt mai"

Min ngaihtuah tih ka hria,nuam pawh ka ti. Miin min ngaihtuah tih hriatte chu nuam miau hek.

"Hna dang thawh ka pa'n a remti lo. Dâwra inhlawhna tur pawh ka hmu ve mai țhin, mahse ani berin rem a tih loh miau chuan.  Tuna ka thawhnaah hian Pu ber hian hlawh min pe țha a, duat pawh min duat. Ka vannei viau asin"

"I puin a duat che chu a lawmawm e. Rsa hi eng nge a an ve?"

"A hrehawm hran love. A fel ve reng mai" ' A chimawm deuh mai pawh a'ka ti rilru a, mahse ka sawichhuak lo.

"A țhat hlauh chu. Hrehawm ti deuh hian hun i hmang ang tih ka hlâu ania.  B.Ed hi ka chhunzawm leh ang a, ka zawh hnu lamah chuan hna nghet lam pawh a beisei theih ve tawh ang a, chumi hunah chuan ka duat tak tak thei tawh ang che"

"Tunah pawh hei min duat reng alawm. E taka, ka pain fel a ti teh che ania aw"

"A ni maw? Ka mark score a sâng sawt tihna"

Kan inen a, kan nui ve ve a, ka kut a chelh chu a hum nghet sauh sauh a, ka hmuiah a fawp zohva.

"Ka ngâi veng veng chein ka hria , i bula ka awm reng chung pawh hian"

"Awihawm loh e"

"Ngahnge i awih loh ringawt? Ka rilru i hre hleinem"

"Hm, kei pawh i hre lo. Ka star hmasa zawk che tih pawh i hre lo"

Min kuah hnaih lehzualin," I hre lo zawk a nih chu. Min hriat hma khan ka star daih tawh che, chumi lai chuan min la hre miah lo" nui pahin a ti a.

"Engtikah?" Ka en pah hâ a.

"Chutih lai chuan high school pawh i la rap lo"

"Ka va awih lo tak! Chung hunlaiin min la hre lo aw"

"Ka hria che ka tih chu. Lily nen in inkawm țhin a, an inah i lêng ka hmu fo che. Sam-a nen kan inkâwm țhin a, i la naupang lutuk a, chuvang chuan ka sawichhuak ngai lo. Sam-a pawhin a hre miah lovang.  Kei chu ka inti tlangval chho tawh a, naupang té star kha ka inthiam lo țhin hle asin"

"Zanin chu inpuanna ropui ka ngâithla a ni maw?"

Ka hmuia fawh leh zoh pahin," Nia, tuma hnena ka sawi ngam ngai loh a nih kha. A hre hmasa ber i ni" a ti sap a, min kuah chial a, kei pawhin ka kuah lét ve a.

A hnu deuhah chuan a nupui duhzawng sawiin a duhthusam țhin chu keimah ka nih thute chu a sawi a, ka lo nuih a.

"Chutiang sawi chu a la hmâ e"

"Mihringin kan hma chin kan hre miah lo, lo ngaihtuah lâwk hi a țha asin"

"A dik tho mai. Kei chu pasal neih lam hi ngaihtuah pawh ka la duh lo, zir zawm lehte ka la duh si a, a la hlâ em mai"

"Sawi chu a pawi vak chuang hleinem, kei pawhin ka la zir zawm leh dawn tho chu"

Nui chung chuan,"Chuvang chuan alawm nupui pasal lam hi chu ka sawi duh loh. A la hmâ em a, ka ngaihtuah pawh hian ka nuih a za zawk" ka lo ti a.

"Kum 2/3 bâk a ngai tawh hleinem" a lo ti thung a.

Nui chung bawk hian," A kārah thil tam tak a thleng thei a ni...kei chu engmah ka sawi lâwk duh lo" ka ti leh tlat a.

"Kum chu a ral chak e"

Chutiang mai mai chu kan sawi a, ka pa lo haw hma lawkin a haw a, a haw tur chu ka thlah a, step-ah  chuan min fawp leh vang vang a.


"Hawsan che hi ka hreh tial tial mai"

"Riak ve mai la" ka fiam châk tlat.

"Min thlém lul suh"

"I duh lo a ni maw?" Ka chimawm ve tlat.

"Ka riak ve tak tak ang a, i pa laka ka mark score hi a chhe duai mai ang a"

Kan nui leh rih a.

**********************

Inrinni zan a ni a, ka pa pawh  a hna ngâi, nuthlãwi rímin a chhuak leh tawh a. Ka inkhâwm hman thlâwt lo,  ka tlâi tlat. Inkhawm a ngaih avang leh a hnu lama  YMA lam committee a ngaih avangin Mama chu a lo leng dawn lo, min hrilh leh thlap tawh. Tih tur a awm loh dawn em avangin  'mut hmâ zânah' ka puang mai a. Mu thei mai turin ka inbuatsaih a,  ka ha nâwtin ka hmai ka phih a.

Ka hmâi ka hrúk laiin kawngka a rawn ri a,  tu tak chu ni ang maw? Inchungte  nau chu ni se, min rawn ko hmasa leh phawt awm si a.

"Lo lút rawh u"

Rsa, helmet keng chunga rawn lút ka hmuh chuan  mak ka ti lutuk ringawt. Eng nge a rawn tih dawn? Engtin nge min rawn zawn hmuh chat theih?  Kan inah a la rawn kal ngai lo va, kan lâr lém lo  bawk nen, engtin nge kan in a rawn hmuh theih zawk ni?

"'Lo leng rawh' te ti ve la?"

Towel dah țhat pah chuan, " Lo leng rawh. Eng nge i lo tih dawn? Engtin nge kan in  awmna i rawn hriat theih a?" Ka ti thuai a, ka zawt lo thei lo, mak ka ti em a ni.

"In in ka rawn zawnna lamah hei, ka rawn tlâi vek réng hi. Mi ka rawn zawt kual nasa alawm"

"Eng nge i lo tih dawn?"

"Ka lo leng dawn mawle"

Awih lo deuh hian ka melh reng a.

"'Ţhu rawh'te min ti ve la?"

"E, țhu rawh. Thil ţul tihtur a awm lo tiraw?"
"Eng nge i sawi awmzia?"hriatthiam loh hmel deuh hian min zawt a.

"In inlamah tih tur țul a awm avangin i rawn kal tiraw?"

Ţhutthlénga țhut pah chuan,"A va mak!! Ka rawn léng ka tih chu. I phal lo mi?" A ti nghut a.

"A epa țhut ve pahin," Ni lo, a mak em alawm, ka pa hmuh i duh vang a ni lo maw?  Mahse, a chhuak tawh a" ka ti leh țâlh a.

"Ni mai mai lo, ka rawn rím dawn che" min melh rún pah chuan a ti leh sup a.

Sawi tur ka hre ta mai lo.

A helmet chu dawhkanah a dah a. Min rawn en lehin," Zanin  chu a lo léng dawn nange ?" A ti a.

""Tu chu maw?" Ka hre lo der leh tlat a.

"I bialpa kha mawle"

"Léng ang, a la rawn thleng lo mai mai anih ka ring" Dâwt ka hrilh a ni ve mai.

"Tinge ka message min rawn reply duh tak miah loh a?"

Rsa message reng reng ka chhâng ngai lo. Naupang chhe ena min en vang hian ka thin ka tirim lui ve a, ka chhâng duh lo.

"Ka peih lo a ni mai"

"Naupang chhia reuh lutuk. Mahse hetiang hi chu tihdan țha deuh ka hria asin"

"Naupang chhia min ti ziah suh"

"Thingpui min lum la"

"Naupang chhe thingpui lum i in duh em ni?"

A nui hak a, a nui ri chuan ka thinlung a dek  lehpek tlat. A nui hak ri hi a mawi ka ti a,  hriat reng ka duh.

"Lo kal teh"

Ka melh hrá a, eng nge tih a tum ang?

"Ka duh lo"

"Min hlau mi?"

"I hlauhawm em ni?"

"Maithei"

"Ka hlau lo nâng chein  thingpui chu ka'n lum ang e"

Thingpui tur ka chhuang zo chiah chu ka hnungah a lo awm reng tawh niin,  ka sam ka kilh chhoh chu a rawn phelh a.

"Tawm chho tawh suh ka tih kha. Ti khan i inhmeh," tih pah chuan a rawn kún hniam a, ka samah chuan a hmâi a rawn phúm a, thâwk a la vang vang a. A chét dan avang chuan ka khawng vekin ka hria, ka che ngam tawh lo hrim hrim.



RUATSANGA - 7 By Dingdi Pachuau

(In comment ka chhiar chhuak vek a, ka lawm hle a ni. Ka lo țang sauh sauh ania, chhiar tui vek u)

"Eng nge tih i tum a?"ka ti chhuak thei țâwk. Min hnaih bawk si a, ka chét zeuh pawhin a taksa ka si nghal dawn tih ka hriat avangin ka che ngam lo.

"Ka message i chhân loh chhan chu eng maw?"

Ka hnung chiaha a din avang leh ka hma chiaha gas dahna chhuar avangin ka che sawn thei lo. Min hnaih mah mah a ni, tháwk pawh ka thaw țha ngam dawn hleinem.

"Kalsawn teh, ka che thei lo ania"

"Min chhâng phawt la"

Ka chhân hma chu a kal sawn duh âwm si lo va, chuvang chuan ka ngawih vang vang hnuah chuan," Naupang chhia min tih ziah vâng a nih kha"ka ti ta nge nge a.

"Naupang chhia tih chu a huatthlalaawm vak mi?"

"Aw"

Ka kokiah a khabe a rawn nghat tawh. Ka thâwk a dik thei lo, hetianga a awm reng chuan  ka thâw a chham mai ang.

"Kal sawn tawh teh. Hei thingpui pawh a so dawn tawh ania"

A kal sawn ve mai bawk a, a kal hnu chuan thàwk ka la ham ham mai.

Thingpui ka va pék  lai chuan phone a khawih avangin thingpui chu dawhkân chungah ka dahsak a, a bulah țhu lovin a piah deuhah ka țhu thung a.

Ka message tone a ri dat a,mahse ka ngaihven lem lo. Mi lo lén laia phone ensan daih  chu ka duh bík lova, a pawimawh a nih chuan  min call mai țhin turah ka ngai.

A ri leh dat a, dawhkân chunga ka dah avangin  a nghawr tel zui a. Rsa chuan min en rulh pahin," En ta che, a pawimawh a ni ang chu" a ti sup a.

"Pawimawh se chu min lo call mai ang" Ka ngaihven duh chuang lo.

A hnuah ka phone chu a rawn ri ta tak tak.

"Kha,a rawn call mai che kha, a pawimawh a ni ngei ang"

Number ringawt anih avang chuan tunge tih ka hre thei lova.

"Hello?"

"Message reply țhin tawh ang che"

Ka ngei lutuk. Rsa niin,a number ka neih loh zawk atangin min bia. Kan inmelh reng mai a.

"I hmelchhe lutuk" ka ti vak a.

"Ka hmelchhia tih ka hriat vawikhatna"

"Chimawm viau țhin mah ta che"

"Ka chimawm mi?" Phone-a min be pangngai ang rengin a phone a beng bulah a chelh reng a.

"Lo lét tawh la"

A ti leh ta.

"Inah tihtur tam tak ka nei ve alawm"

"A hma pawhin kan inah i awm theih tho kha, i tel lo chuan  ka pu khua a har alawm. Chubakah a nuam lo zo vek"

A ti tak tak ang em? A pu chu a khua a harin ka ring hran lo. Amah ber hi, ka tel lo chuan nuam lo a ti tak tak ang em?  A ti tak tak nge ti tak tak lo tih hriat tumin ka melh ve ran a, mahse ka hre thei chuang hlei lova.

"Dâwt"

"Ka rilru i hre lo"

"Hriat loh vang tak chuan alawm dâwt ka tih ni"

Min melh rún mai a, melha thih theih ni se chuan  ka thi chiang ngawtin ka ring.

Thingpui no chu lain a in pawp a,a sa tawh lém lo a ni ang. A in zo chu a ding vut a, helmet la pahin,"Lo lêt turin inbuatsaih ang che" a ti phawt a. Min en leh a, "Nula, vote nei thei chin i nih tawh chuan  message reply țhin tawh bawk rawh" a ti leh nghut a, inmangțha-na hun pawh awm lo chuan a chhuak ka daih a.

Ka hawi hâi kher asin.

A thinrim em ni? Ka thusawi khawilai ber khan nge tithinrim ang? Ka ngaihtuah a, ka hre thláwt lo. Hmm, a duh leh thinrim rawh se,ka bialpa pawh ni hlei lo. Amah zawk hi anih hi naupang chhia dik tak chu.

Naupang chhia lutuk, chimawm bawk si.

**************************

Pathianniah  ka inkhâwm a, sande sikul bânah Mama'n min rawn text a, Lily-te nen lénho a rawt a,kei pawhin ka lo hnial miah lo. Hun thâwl neih laia lén khawthawn hian  rilru a tithawveng a, hnathawh tur  ngaihtuah miah lova lén ve pawh ka châk alawm le.

Lily-te hi Zotlanga awm an ni a,Mama'n min rawn sâwm phawt a,thingpuite ka intír hnuah  muangchângin kan chhuak a. Lily'n min rawn phone sek lehnghal a.

Lily-te in kan thlen veleh chuan,"In va rei ve!" A lo ti nghal a.

"Thingpuite kan in leh rih alawm"

"Ka awih lo, thingpui lo deuhte pawh...."

Mama chu a lo nui var var a,"Ni ve bawk ang chu, kan inhmuh khât em hi maw" a lo ti a, kan nui dar dar a.

"Lénna tur țha deuh ka hria ania"

Mama melh ralh pah chuan,"Țhiani hi chu thil a hre thei teh ania aw"ka ti zeuh a,Lily  run tâwk a lo tling.

"Sual viau suh. Nih leh, ka hriatnaah chuan kan léng lovang"


"Ngati maw?"

"Khati khan ngahnge i tih kher a?"

Mama chu a lo inrawlh vat a."Lily sawina hmun chu ka kal châk tawh, a nuam dawn tih ka hre sa mai" a lo ti a.

"In nu hi ka ngei ania,Mi thusawi laia mi melh relh hi a chíng si"

Kan nui vek. A ni lah tak a, mi kan ei loh deuhte thusawi  kan ngaihthlak hian Lily nen hian kan inmelh relh a, nui chuang si lo hian kan inman em em țhin a ni.

"Nang pawh i bâng bík lo aw"

Kan pathumin kan ni a, U Sam-a kan sâwm  ve ngial nain,"Bialnu ka nei ve si lo,mahni naute nena lên zawng a luck loh thlãk em mai"a ti tlat a.

Lily chuan,"Hmu zo hek lo che mawle"a lo ti thung a. An unau hi an inkâwmngeih a,an infiam bawrh bawrh thin.

Lily nu, Nu Thangpuii chuan kan chhuah dawn chuan,"Fimkhur ula aw. Sunday hi chuan nula tlangval an lêng ve nasa țhin a, motor vei vâk a tam țhin.Chuan, mi mit tikham zâwngin awm loh tur ,fímkhur hi himna bulpui ber a ni" tiin min thlah a.

Motor-a kan luh hnu chuan Lily en pah chuan," Khawiah chuan maw kan lén dawn a?"tiin ka zawt a.

"Ka nuteite huanah"

"Chu chu khawi laiah nge a awm?"

"Pukpui lamah khan tlân phawt teh ang u"

Nula leh tlangval léng, kawng zâu lâia motor lo park pawh kan tâwk ta zauh zauh. Nu Thangpuii sawi ang deuh khan  motor veivâk pawh a lo tam, chak deuh deuha tlân tâwk lah bo lo. Pathianni tlâia ka chhuah ngai loh avangin ka tân chuan thil thar vek a ni.

Lily nuteite huan chu Pukpui ram chin si niin,motor kawngpui atangin vei lamah a péng a,metal road a ni lo nâin a kawng a chhe hran lo viau.Hlat pawh a lo hla lutuk lova,kawngpui atangin darkar chanve vél chauh tlân a lo ni.

An huan chu a zâu nuam hle mai. A awih mang miah lo bawk. Lui hnaih lam deuhah thlâm niâwm tak, lian vak lo  hi a lo ding a. An huan chu a faiin a nuam kher asin.

Hawi ila, thei kung chi hrang hrang hmuh tur a awn, thei kung lian deuh chi leh a té deuhte pawh a kim khawp mai, thei hming ka hriat chu hmu deuh vekin ka inhria,ka hre tam lo mai pawh a.

Lily sawi ang chiah, a nuam takzet a ni. Thlâmah kan lut a, tukverh kan hawng dar nghal vek a, thlâm awmna lah a thawveng reuh si.

Eitur kan ken chu Mama'n thlâm chhuarah chuan a dah a, tukverhah kan hawi kual vel a, tui a harsat loh vang a ni ang, díl záu deuh pawh a awm. Mahse hawi zâu vak theih a ni lo, thei kungho an lian tawh a, min hliah țhen. Nimbu leh lakhuihthei pawh mitthim tlin tâwk hmuh tur a awm.

"I nuteite chuan huan an neih țhat hi le"

"Chaw ei a châkawm ka ti"

"I ril a țâm em ni a?"

"Tâm hran chuang love.  Rama chaw ei hi a tui duh an ti sia,chuvang mawle"

"Buhfâi ka en ang a,a awm chuan kan chhúm dawn nia" tiin Lily chuan bucket inchhínho chu a check a,a lo awm tak tak a. Chawhmeh ni se,luikam bul mai anih avangin thlâi an chíng țeuh bawk si.

"Ei rawng bâwl tak tak ang u"

Kan inrawt phúr a,ei rawng bâwl kan țan nghâl a ni mai. Kan ril a țam a ni lova,rama chaw han ei ve reng reng kan châk a ni.

Lily'n chawhmeh a lák hlânin mei ka lo chhém a,Mama'n tui plastic-in a zu châwi bawk a, a lo lêt leh chuan min nuih var var pahin,"I inhmeh reuh lutuk" a ti sap a.

"Eng chu maw?"

"Khatia han chét  deuh karh karh kha , i ei rawng bâwl ka ei thei dawn a, ka lâwm tak tak a ni"

Nuihsak pahin,"Ka bâwl tui thiam vak lo ania..mahse ka lâwm e aw, tui tak chuan bâwl ka tum ang" ka ti lét ve a.

"Khawi maw, lo hnâi teh"

Ka hnaih phei chuan a kut pahniha ka biangah vuanin min fâwp chat a,min fawh pah chuan,"Ka insúm rei tawh em mai"a ti sap a.

"Lily a lo lét țep ang, min hmuh hlauh chuan...."

"A ho em mai, anite chuan engkim a hre vek alawm"

"Mahse ka zah tho alawm"

"Zakzum reuh lutuk mai"tih pah chuan min fâwp leh zauh a, tui châwi tur chuan a chhuak leh ta a.

Lily rawn lét chu a phúl hlut a.

"Ka awm loh hlân khan eng nge in lo tih a?"

"Mama'n tui a châwi a, keiin mei ka chhém"

"Ka awih lo, kha, i hmui rawng pawh a dik lo, i hairstyle pawh.."

"Awihawm loh e, engmah tih hman pawh a nih loh kha"

"'Kan ti ve bawk ang chu' ti ve mai la"Mama chuan a lo ti a,a nui pah sâng a.

Lily chuan tifuh inti zet hian,"Khâ maw, zép zép mah ta che. Mahse, ka hmuh lai hi chuan ti suh ang che u, min awhthik ka duh miah lo"a ti a, min melh ralh a.

"In inbe fel thei ta em?"

"Tu nen?"

"A lo phone hunah che 'kawp chungchang zawt rawh'ka tih che kha?"

"Kár lehah a lo zin dawn"

"Tak tak maw?"

"Aw, tahchuan chiang takin kan sawifel ang, hmaichhanah ngei lo chuan a buaithlak. Inhmuh hunah a fel duak mai ang"

Ei rawng chu ka bâwl a, anniin min lo pui bawk a, thing a alh duh bâkah hmin har chi a awm lo bawk a, kan bâwl hmin har lo. Ei tur kan ken vete pawh chu bâwl lâiin kan ei leh rih bawk a, eitur chu kan hnianghnar khawp mai.

Chaw kan ei chu ka puar viau mai. Anni pawh an puar ve ngei ka ring. Lily chuan,"Ka rin aiin ei rawng bâwl i thiam daih mai, ka ei hnem lutuk a, a hrehawm zawk" a dul chúl pah chuan a ti a.

"Nupui țha tak tur a ni"

Lily chuan min rawn nék salh pahin,"Um, nupui ei rawng bâwl thiam tak i nei dawn a nih hi tiraw Mama? Innei tak tak reuh ula,ka hmu châk che u, in inhmeh dun si"a ti a, he nu lah hi a duh duh a sawi a, a tizahthlak thei ania.

"Ngawi mai mai teh"

"Mama, Ďítei hi a nuamah  pawh,a hrehawmah pawh, a pachhiat leh a bawrhsawm lai pawhin  i duh reng thei ang em? Entirnan, hmingchhiatna deuh ang chi leh ramtuileilo ang chi te lo ni ta se,a nih loh tal pawhin nuthlawi lo ni ta se, i la duh tho ang em?"

"'Ta se' tih zel mai, ni lo ta se?"

"Lo tel ve suh, Mama alawm ka zawh"

"I zâwt ho em mai"

"A ho lo, thu serious deuh mai a nih zawk hi"

Ka ngawi ta mai. Lily hi chu ngawihsan ila,min chhâng rei lo a ni mai.

"Le, Mama, zawhna i chhân hun aw. Dítei hi i duh reng thei ang em? Khang ka sawi tak zawng zawngte kha lo tâwk ta se, ka thiannu hi ka hrechiang ve ania,eng pawh lo tâwk ta se,a rawn pan  ngam dawn lo che tih ka hre sá a,ka unaunu anga ka en anih vang hian a tâna țha ber hi ka duhsak a ni"

Mama chuan thu tak deuh hian,"Keimah lamah hi chuan ka chiang khawp mai. Hman atanga ka duh tawh kha a ni a, eng pawh tâwk se, ka phatsan hauh lo ang,amahin min kalsan anih loh chuan" a lo ti a.

"Mama hi chu ka ringtâwk viau che a ni"

"Duhtàwk teh,Lily. A ho em mai"

"Ho lo ti ve ziah suh"

"Inngaihzáwn laite chuan tupawh kan induhtawn vek a,inphatsan tum lo,rinawm tum vek niin a hnuah eng emaw thil té vangin kan induh lo leh mai țhin alawm"

Lily chuan bân lo vaiin," Chutiang sawi turin expi i la nei lo tih ka hre ve em!"a lo ti hmanhmawh a,rum deuhin ka va melh. A sawi dik ve miau bawk si,  Mama hi ka tân chuan 'ngaihzawng' tia ka sawi hmasak ber a ni tlat a ni.

Mama hi ka kâwm tam telh telh a,mi rintlâk tak a ni tih ka hre telh telh. Kohhran leh khawtlângah pawh ama tâwkah chuan a inhmang tâwk ve viau, kri hian ka phú lo em a ni zawk.

Haw kawngah chuan a seat hmaah Lily'n min țhut luihtir tlat a, kal lam erawh kha chuan a hnungah Lily nen kan țhu thung.

"Ti khan țhu dun ru. Mahse kut kha inchelhsak reng lo ula,ka awm ve reng hi. A mâwi tawk hi a awm ve ania" a ti zarh zarh a. A zahthlak bawk si,a nuihzatthlak tho bawk si, ka țhen ka țhen mai.

Mama hi chu a ngaihtuahawm loh thlâwt. Ka pa bulah leh midang bulah pawh mi pangngai biakin min be tho va, min ngaizawng  tih an hre thei kher lovang. Kut invawn leh han inmelh deuh vang vang hi chu a awm ve tehmeuh mai,chu pawh invéng thiam takin. Mahse mi awm loh leh mi hmuh loh na lamah a duhthawh thiam thung.

Muangchangin kan tlân a, Lily chuan a phone ami hla a play a, kan lo zâwm leh dial dial țhin. Hmeichhia a lo zaiin,"dedicated to Mama... by Dítei" a ti a, mipa a lo zai lahin ,"dedicated to Ditei... by Mama" a lo ti ziah,a nuih loh theih loh.

Zotlangah Lily kan drop a, Serkawn, káwn lai taka Rsa bike inhúng vang mai ka hmuh chuan ka mit ka lénkual ruai a. DIET péng lam kawngpui atanga Eli nen
an rawn inzui chu ka hmu ta nghal a, ani pawhin min hmu ve chiah. Mahse ka en rei lo. A léng ve a nih dawn hi.

Mama a lo léng leh rih a, keiin eirawng ka bâwl a, ka ei peih dawn loh avangin ka inbâwl kép duh lova.

"Lily thil sawi kha ka rilruah a awm reng mai"

"Theihnghilh rawh, a sawi ve mai mai a nih kha"

"Ni lo, a thil sawi kha thil serious lutuk tak a ni zawk"

"Ngai serious duh suh"

"Ni lo, Díte, dik takin kei pawhin ka chhâng réng a ni. Eng pawh lo tâwk ta la, ka duhna che a ngâi reng ang, a chhan chu ka hmangaih tlat che a ni"

"Min hmangaih maw!?"

"Aw, ka sawi mai mai lo ania"

"Ka lawm e"

"Ka hmangaih che tih ka hriatna chu a rei tawh, ka nghâk char char che a ni, chân che hi ka tum miah lo ani"

Zanah  ka inkhâwm a, pastor-in thu a sawi a. Pathian hmangaihna leh mihring hmangaihna chungchâng a sawi a,a sawifiah thiam si a, a ngaihnawm ka ti lutuk. Darkar 1 vel chiah chiah a sawi a, rei pawh ka ti lo.

In ka thlen hnuah chawhmeh ka siam a,naktukah ka pa a buai loh nan ka siam lâwk a ni.

Ka phone a rawn ri dat a,message a nih avangin ka ngaihven peih rih lo,ka chawhmeh siam chu ka chhunzawm a.

A rawn ring ta ral ral mai, ka buai tehlul nen.

Number ringawt lehnghal.

"Hello?"

"Ka ngâi tawh che ania"
Rsa aw cool raih, sehchilh nak bawk si ka hria chu mak ka ti kher mai.

A rûi a ni maithei a ni!!

"I rúi a ni maw?"

"Ka mamawh che , Eli, tunah"



RUATSANGA - 8 By Dingdi Pachuau

Eli. 'Eli' tiin min ko!.

Ni lo, a bulah Eli a awm zawk a ni.

"Ngati nge min lo call a?"

"D, ka ngâi takzet che, lo kal hnâi teh, ka lo kuah teh ang che, i sam tawm chho tawh suh ka tih kha"

A rúi takzet a nih dawn hi. Min koh dante lah kha. 'D'. A mawi phian mai, tumahin hemi hming hian min la ko ngai lo.

Hmeichhe nui ri ka hriat tâkah chuan Eli nen an awmdun ngei tih ka chiang ta. Phone chu ka hmet tâwp nghal daih, ka thin a phu dup dup mai.

A bulah Eli a awm a, min la rawn  call ngam ania, ka chhâng rei tawp lovang. A rui a, Eli a la nui kar kar zui, min tihthinrim a tum a ni ngei ang.

Room-ah a awmpui lehpek a ni ngei ang,Ngati nge a ruih em em le? Ni dangah a ruih  ka hre ngai si lo. Ni lo, ka awm lai phei chuan  zu a in ka la hre lo zawk.

Ka lo ngaihtuah múk deuh a ni ang, ka chawhmeh siam so liam ri-ah chuan ka harhchhuak chiah a ni.

Zan ka mumangah Rsa  ka lo la hmu zui. Kan lo innei a, kan lo hlim dun viau, ka nu pawh ka hmu!  Ka harh chuan ka mumang chu ka ngaihtuah zui reng a,a mak ve em bawk a ni.

*********************

Vawiin chu Rsa ka hmu miah lo mai. Nizan khan inah hian a riak lo tawp a ni ang. Chuti a nih chuan  hotel khawiah emaw an riak tihna. A nih loh pawhin Eli room-ah tal a ni ang.

Pu berin a room-ah min ko lut a, inthlahrung angreng deuh leh  nuamti fahran lo hian  a hmaah chuan ka ding a.

"Bawihi, lo țhu la"

"Aw, ka pu, eng thil nge ni ta?"

Bet lo zetin chair-ah chuan ka țhu thla a.

"Min awmpui leh mai ta che"

Makti deuhin ka en reng ringawt a.

"Ka ngên tawp che a ni. Sangi lah chhungkaw  nu ber a ni si a, min riahpui thei bawk si lo. Min riahchilh thei tur, chhungpui nu ber ni lo, âwl thâwng deuh ka duh a,nang hi i remchãng berin ka hria a. I thei hrâm ang tiraw? Hlawh lam kha chu lungngai lo la, tuna i hlawh lét hi a ni ang"

Ka rilru a buai map mai. Thutlúkna siam nghal ringawt pawh a chi lo deuhin ka hria. Mahse pu ber hi chuan min duhsak  ve si a, heta awm lah chu Rsa duhthusam ka tihpuitlinsak a ni dawn si.

"Ka pu, ka pa ka lo râwn phawt ang chu" Chhuanlam siam tur ka hre thlawt lo.

"I pa chu ka be tawh a, nangma thu thu a nih thu a sawi a"

Chuti a nih si chuan  ka thutlúkna tur chu a chiang sa. Ka pa thu ka hnial thei lova, pu ber min sawmna leh ngenna lah hnial thei ka ni hek lo. A zahawm ka ti a,min duhsak em avangin ka tihtheih ve chhun tihhlawhtlinsak chu ka tih ve ngei turah ka ngai.

"Ka pain rem a tih chuan  kei pawhin hnialna ka nei lo, ka pu"

Pu ber chu a nui ta var var a. " Ka va lawm em!!! Kan in pawhin 'in' a ang  ve leh tawh dawn a nih chu,  Bawiha nen hi chuan a khawharthlak ka ti leh tlat țhin a" a ti barh barh a.


Rsa'n 'Ka pu a khua a har' a tih kha ka hrechhuak a, a lo sawi dik ve a nih dawn hi a.

"Rsa hi ka hmu miah lova, a zin em ni?"

Rilru nuam lo hmel a pu deuhin ka hria.

"A țhiante inah 'ka riak dawn e' a ti a, nimin tlãia a chhuak kha a lo la lét lo a nih hi. Zanin chu a lo lét tawhin ka ring"

Chu pa mai mai chuh.

"Zanin chu in inah riak leh phawt la,naktuk zan atang chuan helama riak thei turin i inbuatsaih dawn nia aw"

"Aw le, ka pu"

Mi duhsaka min duat em avangin ka hnial lo, ka thutlûkna siamah hian ka inchhír loh ngei ka beisei.

Zanah Mama ka bia a,ka thutlúkna ka hrilh chuan min hrethiam ve viauin ka hria.

"Ka lo léng leh thei dawn tawh lo tihna a ni maw?"

"Pawi ka ti"

"I thutlúkna a nih avangin ka zahsak hle che a, ka sawisél miah lo che ania. Mahse ka ngâi leh hle dawn che a nih hi, kan inhmu leh lawk thei dawn si lo"

"Inhmuh hunte chu kan insiam ang chu"

"A țha alawm. Chuti a nih chuan B.Ed lam hi tih a hun mai dawn bawk a,ka buaipui ve nghal mai dawn em ni ang?  Lunglei lamah  kan la chhunzawm thei si lova, Aizawl lam a ngai leh ãwm bawk sia"

"A țha khawp ang chu. Țha i tih apiang  kha a țha a ni mai"

"Ka ti thei ta a nih pawhin kâr tawpah ka lo haw țhin ang a"

"Nia, i thu thu"

"Chuti, ka lo lêng zawk dawn aw"

Nui kar kar pahin,"Aw, lo lêng la, mahse lén rei awih loh" ka lo ti a.

A lo thleng rang khawp mai. Ka lo nuih a, ka pa a awm loh avang chuan min rawn kuah nghal chat a, kan free lehpek khawp mai. Mahse Mama hi chu mi puitling  leh zahawm, rintlâk a ni a, insúm hun a hre khawp mai.

Ka pa lo haw thleng a léng. A léng rei ve khawp mai. A âwm ve tho. Naktuk zan atangin kan inhmu leh thei dawn lova, a âm ve pawh a âwm viau e.

***********************

Ka room hluiah ka awm leh ta. Ka thawmhnaw ka remfel malh malh a, chhúnlamah ka remfel loh avangin zan inbual zawhah ka rem a ni. A tam hran lova, ka zo thuai mai reng a.

Kawngka a rawn ri karh karh a,pu ber a nih ka ring a.

"Lo lut rawh"

Rsa a rawn lút hlawl mai. Ka lo en hú ringawt a.

"Welcome back"

"Ka lawm e"

Kawngka bulah chuan a ding a, kei wardrobe bulah ka ding thung a.

"I thawmhnaw rawn remfelpui che ka tum a"

Ka awih lo lutuk.  A chimawm a chhuah leh tawh a nih hi.

"Ka remfel tawh e"

"I châu em?"

He pa hi..a awmdan, tawngkam chhuak hian min tihrilhhai zo dawn. A tider hmel si lova, a â tawh a ni ang,nge a harhfím lo zawk? Nge tihdanglamin a awm? Ka hrethiam lo,engngati nge hheti hian a awm le?

"Engngati nge heti hian i awm a?"

"Engtin nge ka awm?"

A ngaihna a hriat loh hmél kher mai.

"I hre lo der"

"Eng chu maw?"

 A hrereng âwm si a, a hre lo der chiang. Ka sawi âwm bík lo.

"Mut ka lo tum tawh a"

Min en vang vang a.

"I lo lét avangin  ka lawm e. Mut tui le" a ti sup a, ka chhân lét ve hma chuan a chhuak ta daih a.

A ngaihna ka hre hlawl lo.

A țawngkam leh cheziain sawi tur min tihaihchham a, chimawm deuh țhin kha a ni si a, engtiziaa inthlãk thut nge a nih? Nge a tider zawk?

Ka mut hmunah chuan ka ngaihtuah nasa a. Eng emaw ruih a nei a ni ang, mahse zu rim ka hre si lo. A hmel lah kha ruih nei hmêl a pu bawk si lova, ka hrethiam thei lo ve.

Zíng túkțhuan ei laiin pu ber  chu newspaper ka chhiarsak leh a. Rsa rawn chhuk  chuan a pu chu a rawn 'good morning' a, ani pawh chuan  a lo 'morning' lét ve a. Newspaper chu chhiar chhunzawm leh turin min ti nghal a. Ka chhiar chhunzawm leh a, an titi țhin si a, tukin chu titi lovin newspaper min chhiartir daih sia, mak  ka ti ru hle a. Túkțhuan chhung zawngin Rsa chu ka melh lo hrim hrim.

Pu ber chu a driver nen an chhuak a, keini pawh kan hna ngâi kan thawk lehnghal mawlh mawlh a.

Nu Sangi chuan," I tilawmawm khawp mai, i riak thei a. Pu ber hi ka ngaihtuah ve ţhin a, hmeichhia enkawltu a nei lo bawk nen. Mahse hei i awm ta bawk a, ka ngaih a ngam sawt mai. Kei chu chhúngpui nu ber ka nih avang hian ka tan chuan riahchilh a rem si lova" a ti sap sap a.

"Aw, tupa a nei reng alawm, ngaihventu tur chu"

"Mipa leh hmeichhia kan inang lo"

"An induat tawn khawp hi maw"

"Duat tehreng mai, mahse  hmeichhiate'n chhungte kan ngaihvena kan ngaihsak ang hian mipa chuan  an ngaihven thiam tak tak lo"

Rsa a lo kal avangin kan titi chhunzawm ta lo va.

"Díte, min lo pui hman lawk em,  khawngaihin?"

He pa hian eng nge a hriat tak  tak le? A țawngkama tel ngai reng reng lo' khawngaihin'  tihte a hmang a, êngin chhun thluin a tidanglam a ni tak tak ang.

A room lamah kan inzui chho ta a.

A thawmhnaw a lo phawrh darh niin. A kawrkilh tlaho a lo dah khawm ve a, kawra vuah chu a lo tum ve a ni ngei ang. Hriau leh khâwllá pawh a lo awm ve ngei bawk.

"Kawrkilh  kha ka vuah thiam lo, ka tum nasa tawh lutuk"

A lo tum nasa tawh a ni ang, khâwllâ pawhchhiat pawh a lo awm niai mai.

A kawrkilh tla chu ka vuahsak ta hlawm a,ani pawh ngãwi rengin ka bulah a lo țhu a, min en leh vung vung țhin tih ka hria. Mahse ka ngaihsak lo der tlat a.

Kawr țet hlek hlek erawh khâwl a awm loh avangin tihngaihna ka hre lo.

"A țet hi chu khãwl a awm si lo va"

"Hriauin a țhui theih loh mi?"

"Theih tho e, mahse kuthnu  a mawi lo duh em a"

"Ka pi khan puan kha țhui ve țhin ngei mai a, in hnuai lamah a awm ka ring"

In hnuai lamah a tlãn thla a, rei vak lo hnuah  khâwl hlui ve lam tawh hi a rawn châwi chho vú vú a.

"A la hman theihin ka ring"

Hlui deuh tawh mahse hman a la nuam phian a. Puan țhui hi ka thiam miah lo va, mahse thawmhnaw țet țhui tih vel hi chu ka uar khawp. A chhan chu ka nu awm loh hnu hian engkim ka kuta a awm vang a ni ang.

Țhui tur a tam hran lova, chubâkah  a țet hlek hlek chauh a ni hlawm bawk a, ka huphurh lém lo.

"D,Ka pu hian a ngaina hlê che tih i hria em?"

Min zawhna avang chuan ka phu țép, ka in-control vat a, min koh dan lah hi.

"Min duat viau ka lo ti a, min ngainat  vang chu a lo ni ang a?"

"A ngaina takzet che a ni"

"Ka va lawm em min ngaina der ve chu"

"Min hâu a"

Ka melh  ta rân a. A puin a hâu. A pu thusawi kha ka hrechhuak leh a,' a châng chuan ka dân siam a   bawhchhe țhin' a tih kha. Eng vang tak chu ni maw? Hei  vang hi a lo nih chiah dawn hi túkțhuan ei lai pawha an inbiak vak loh chhan kha.

"Ngati nge a hâu che a?"

"A thu hnialin ka riakchhuak a"

Hmm...a lo nih chiah chu. Zanah min rawn phone tak kha. 'Eli' tia min koh nghe nghe kha.

"Ka hria e"

"I hria maw?!! Engtin nge i hriat a?"

"Ka hre ve tawp"

A ngâwi ta vang vang a. A nungchang a thlãk ta lutuk hi a țha nge țha lo pawh ka hrethiam lo. Chimawm deuha min biak țhin khan  chimawm viau ti mah ila, ka lâwm viau țhin. Tunah hi chuan han chhân lét mai dan tur ka haihchham tlat zel, nuam ka ti lo.

Zan lamah Mama'n min lo call thin a, chhun lamah hi chuan kan buai ve ve a, kan inbe hman lo. Hman châng nei mah ila,ani a lo hman remchâng lova, chuvang chuan zan lamah hi chuan kan inbiak loh pawhin kan intext ngei ngei thung.

Rsa nungchang danglam ta lutuk hian ka awm a tinuam thei miah lo, khawiah emaw bazar chhuah dawn pawhin amahin min hruai thlap thlap mai a,chawhmeh  lei ni se,ama'n a khâi vek zel a, nidanga a awmdan nen ka khâikhin lo thei lo va, min tihawihâi tlat.

Nu Sangi bulah pawh ka  Rsa nungchang inthlâk  lutuk chu a hriat ve leh hriat ve loh ka zàwt a, ani lah chuan,"A tihdan ve hrim hrim alawm, a puin a hâu châng hi chuan a danglam vek țhin. A sual hran lo hrim hrim a, bazar chawhmeh lei ilo hrim hrim hi chu a hma pawhin aman a ti țhin alawm" a lo ti mai a.

"Ka lo awmtirh lam chuan a tih ngâi loh kha"

"Midang chhuak remchâng an awm țhin vang alawm"

"Chu pawh ni se, a chimawm theih em kha"

"Tlangval a ni alawm. A chimawm thiam ve bawk ang chu"

***********************

Lily pawh a bialpa rawn zin lâi khan an sawifel thei ta a ni ang, a status a update peih em mai. Ka lawmpui viau. An inngaihzawnna a rei ve tawh a,hlim dun reng se ka ti a ni.

Pu berte inah ka awmchilh leh tawh tih a hriatin Lily chuan fímkhur turin min chah nasa mai a.

"Fímkhur hle rawh, Rsa zúnah hian i uai palh hlauh ang e, Mama ka khawngaih dawn em mai" tiin min fiam zuk zuk a.

"Teuh lo. Bialnu a nei reng alawm"

"A țhat chu, a chhe lo si a e, nang i rilru a thianghlim ropui si, a zúnah hian i tawlhthlúk ka hlâu takzet  a ni"

"A chimawm tawh miah lo asin"

"Chu lehnghal. Ka rilru i tihah"

Kan nui dun kar kar a,phone-ah pawh hian keini pahnih hi chu kan bengchheng thei viau a ni.

Zing ka thawha in hnuai lama ka chhukthlak chuan Rsa morning walk a rawn lut ve chiah a. Morning walk tih ka hriatna chhan chu a inthuam danah a ni,zingah a walk thin tih ka lo hre ngai miah lo.

A inthuamna inhmehzia mai chuh...amah a palianin a sang bawk a, a chhe lo takzet. A thlan tla hliamte nen lam chuan a chhiatlohpui vekin ka hria.

Min hmu lawk lova, min rawn hmuh takah chuan a nui suk a.

"Morning,beautiful"

Ka lâi em em ringawt. A tawngkam hman tâwi té pawhin min tilâi thei em em mai chu a ni sia, a awka chhuak cool raih mai leh zing boruak chu a inhmeh chiang.

"Morning"

Chokaah min rawn zui lut zel a ni tih ka hmuh chuan ka inher thut a,min rawn su dawt mai. Ka petek tur chu min rawn man hman a, kei pawhin a kawrah ka țham țawk mai.

Kan awmdan chu midangin min lo hmu se mak an ti ngawtin ka ring. Tlu chiah si lovin min vuan ding a, keiin a kawr âwmah ka țhâm bawk sia,kan inen rân mai a.

"Ngati nge i inher thut a?"

"Ngati nge min zui a?"

Kan inzâwt rual chiah. Kan inen hnâi dun bawk a,a hmai tlêm tè téa țhuangvuak hlek hlek chu ka hmu thei.

Amah rinchhan takmeuha tlu lo hrâm ka ni. A kâwr âwm ka țhâmna chu muangchângin ka thlah a, ani erawh chuan min la vuan reng.

"Hah a dam sawng sawng mai"

A thusawi awmzia chu ka hre lo. Ka awmdan ka siamțhat a ka chét tâkah chuan min  vawn dan siamremin ka din pangngai hnuah min thlah ta chauh a, ka thinlung chhúngril a su dup dup mai.

"Tui bottle lâk ka tum a" tiin fridge lam chu a pan ta nghal a. A rimtui hman rim leh a thlan rim inpawlh chu a rim pâ ka ti leh tlat.

Gym-a a luh tak hnu chuan ka thaw huai a. He pa hi ka hnaih lutuk tur a ni lo. A taka ka hmuh hma hauh atang tawh a  ka star tawh kha a ni a,tunah phei chuan in khatah awmin, a hmaa a nungchang chimawm zet kha a paih bo lehnghal a. Ka fímkhur hle a ngai. Ngaihzawng nei lai a ni a, kei pawh chuti tho. Chu chu ka hrereng tur a ni.

Chhunah an putuin an chhuak a, insuk leh room tihfai lam ka zawh hnuin ka room ka tifai  ve a. Bathlara pangpar mawi tak taka pâr, pot-a inhúng tlar dul chu ka síksâwi kual a, ka zâi pah rât rât a. Pangpar hian nun a tihlim ka ti a, hmuh nuam ka ti hle bawk.

Tlâiah thawmhnaw súk ka thlep a, Rsa leh pu ber thawmhnaw a nih vangin thliar hran a har lo. Pu ber thawmhnaw ka dahfel hnuah Rsa thawmhnaw ka dah leh a.

Rsa wardrobe chhunglamah chuan thlalak ka hmu tlat. Ka'n en nawn leh a, kan pahniha lâk, Theiriat Tláng ami kha a lo ni a, kan nui ve ve a, kan lang țha dun hle. Rsa  phei chu a țha lehzual.

Wardrobe ka khâr chiah chu  room kawngkaa Rsa, kawngka biang nghénga lo ding chu ka hmu thut mai a,ka phu chiang kher mai. Ani erawh chu a ding rei tawh a ni maithei, min lo en reng a.

Ka âwm dawm vang vang pah chuan,"Min tiphú alawm le" ka ti halh a.

"Ka tihpalh" a ti sap a,chutah "Thil tirú ang mai alawm i nih le" a ti leh a.

"Thlalak i târ kha ka lo en a"

"A mawi tiraw?"

"Um, hmuh a nuam khawp mai"

A dinna atang chuan a rawn kal hnâi a,kei chuan ka lo en rân a. Ka hma takah chuan rawn dingin,"Kei chu hetia en che hi nuam ka ti zawk daih" a ti sup a,hmun dang a melh lo reng reng.

Ka mit ka la sawn rang ta khawp mai. He pa bulah hian ka lâi zing ta hle a, laih loh tum ringawt mah ila ka incontrol thei dér lo.

Ka hma taka a din avang chuan  kalsawn tur chuan ka nêk a nih loh chuan hél kual a ngai viau. Mahse hél kual daih lah chu hlâu angah min ngai ang tih ka hlâu bawk si.

Mahse ka kalsawn a ngai.

Ka kalsawn tur chu ka banrékah a man chat mai. Hlauthâwng takin ka melh chho hrâ a, ani a lo kún hniam zat thung a.

"Rs, heti hian..."ka sawi zo hman lo chiang kher mai, a hmui chuan ka hmui a rawn chhilhtir ta hmak a. A hmui lum thar thar,hnâwng char mai chu ka lo suangtuah  țhin   ang chiah a ni.



RUATSANGA - 9 By Dingdi Pachuau

(In comments hian min va tihlim ţhin em! In duhdan in sawi thei vek ania, ka lo chhiar chhuak vek zel e)

Lalpa leh!! He pa hian min fawp ania.

Mak ka ti lutuk. Ka taksa chu chesawn thei lovin a khawng vek ni maiin ka hria. Ka lungphu ve thung chu a phu rang lutuk a, a zuang chhuak mai ang tih hlauhawm khawp a ni.

He pa hian min fawp a ni tih ka ring thei lo!

Namsawn tur ka ni tih ka hria,mahse ka duh reng em? Namsawn dawn pawh ni ila, ka namsawn thei ngút ang em? Lung bang anga nghet churh a ni si.

A kut chuan ka kâwngah kuahin alamah min pawt hnâi salh a, a kawr hâk chhana a taksa lum vang vang leh a lungphu dup dup chu ka feel vang vang thei. A lu awmdan chu siamremin a hma aia duhthawhin min fâwp leh tâwn tâwn a.

Ka chhân lét loh avangin min fawh dan a thlâk leh hret, phút lét nei rânin min fáwp leh ta. Mahse ka chhâng lét chuang lo, ka dawh tawp ringawt. A mi fawhna chuan ka thluak chawkbuaiin ka kaihza thâte chu a tizâwi vek mai, thil dang ka ngaihtuah thei lo.

"Min chhâng lét ve rawh ,D" Thu pe aw deuh leh cool raih si chuan  ti sup a.

Min fawp lehin a lei zei zet hmang chuan, ka hmui chíp tlat chu a rawn nawr kâu a,chhân lét tir chu min tum khawp mai.

"Min fâwp ve lul rawh" A aw chhuakah chuan duhna a lang chhuak chiang khawp mai.

Hniala fawh lét loh ka tum ve ngar ngar nain thil theih loh hul hual a ni. Mi tihphúr dán a thiamin, a hmui lah chu damdawi chak tak ang mai a ni. Ka kut chu nghet zetin ka húm a, a chhan chu ka inthunun theih loh ka hlau a ni.

Tunah chuan min fawh dan a thlãk ta. Dam raih leh uluk tak, muangchângin..Ka lu chu a hai chíai chiai țanin ka hria,damdawi chak tak angin ka thluak a fan a. Mak ka tihna leh hnial ka duhna zawng zawng pawh paih bo ang hmak a ni ta. A mi fawhna chuan ka taksaah current chak tak ang maiin hna a thawk a,chhân lét châkna hlírin ka khat ta.

Min fawh uar theihna tur leh ril zâwka min fawh theihna tur chuan ka hmui chu kâuin ka fâwp lét ve ta a. Chutia ka chhân lét tâkah chuan min fawh a châwl deuh dat tih ka hria, mahse a rei lo. Ka kâwnga min kuahna chu lasawnin a kut pahnih chuan ka biang tawn tawnah chuan vuanin duhthawh takin min fâwp leh ta vang vang a.

Hetiang reng reng hian infawh hi a lo nuam ang tih ngaihna ka hre lo reng reng. Mama nen khan kan infawp fo thin,mahse phúrna emaw nuam tih riauna emaw ka nei hran miah lo. Rsa nen erawh a dang zak mai. 'Min chháng lét ve rawh' kha ti kher lo mahse  ka chhâng lét ngei ngei dawn tih ka hria. Chhúngril lamah phúrna mak tak  leh nuam tihna riau min siamsak thei tlat. Lu a hai chiai chiai a,thluak a fan râih maiin ka hria.

************************

He pa hi ka hnaih tur a ni lo. Engtin nge chu chu ka tih theih tehlul ang? In pakhatah kan cheng dun a,nitin zantin ka hmu lo thei si lo. Ka haw hran bawk si lo nen, a khirh țalh mai a ni.

Khami  nia a room-a kan infawh ațang khan hmuh ka hreh thar ta em em mai a,ka hmuh tura a awm pawhin ka en lo hrâm hrâm a, ka hêl hrâm hrâm țhin. Room pakhata kan awm dun châng a awm lo thei lova, chutiang hunah pawh chuan ka hmu lo der tlat a, awmdun loh theih dan mawlh ka zawng țhin.

Ani erawh chuan min en dan leh a awmdan a danglam lo. A ngâi reng. Ngah nge maw danglam awm ve tura ka ngaih ngawt ni? Bialnu a nei a, hmeichhe tam tak pawh a fâwp tawh ngei ang chu, thil chiang sa a ni. Tlangval luck, duh duh thing thei alawm anih le. Ani lakah chuan hmeichhe pakhat,a fawh theih ve mai ka ni,a bialnu pawh ka ni hek lo. Ka lo indahsang lutuk chu ka nuih a za zawk ,leh hnuhnawhin. Engmah ka ni lova, a danglam hek lovang. Hmeichhe pakhat fawh te lek lek, a théngthâwngah pawh a thawk lovang. Ka awmdan hi ka insiamthat a ngai. A fawh theihin ka awm tawh tur a ni lo.

Mama biak pawh ka inthlahrung zo vek. Keima dik loh ania,a ãwm reng. Min rawn hmuin ka awmdan hre kher lo mahse ka inthiam lo.

Zirtawp zíng a ni a,pu ber tùkțhuan ei laiin ka hna ngâi té,newspaper ka chhiarsak leh a. Rsa a rawn chhuk miah lo. Tukțhuan ei zawh thleng pawhin a rawn lang lo, nidangah chuan tun ang hunahte hi chuan hmuh turin a awm var var tawh țhin.

"Engtizia nge maw ni le, ka'n han en ang e"Pu ber chuan a ti nuah nuah a,inchung lamah chuan chhoh a tum a.

"Ka pu,keiman ka'n kâitho zawk ang e" tiin ka kal khalh a, min tír hreh tih ka hria. Han kaihthawh chu ka hreh thlâwt alawm, mahse pu ber ka zah  ve si a.

Phûr fahran lo chuan step-ah chuan ka chho a,a room bul ka thlen chuan ka ding vang vang phawt a, chutah kawngkhâr chu ka kik ta karh karh a.

Min chhâng miah lo,a la muhíl em ni le? Nge a awm lo zâwk? A thinrim zawk em ni ang? A thinrimna tur âwm ka ngaihtuah a, ka hre thei mai lo. Nimin lama a chhuahna lamah a thinrim a nih ngawt loh chuan. Ni lovang, a damlo pawh a ni thei,mahse nimin lamah a damțha hle si.

Ka kik leh a.

"Lo lút rawh"

Muangchângin kawngka chu ka hawng a,khumah a lo la mu niin, rizaiin a lo la inkhuh thún a.

"I pu rualin i chhuak dawn lo em ni?"

Min chhâng lo. Ka lam hawi pawhin a rawn inlet lo,chu mai pawh ni lovin chét pawh a che eih lo.

"I țha em?"

A awmdan ngâi rengin a la awm, luhlulpa mai mai chuh, ka thin tertek a chhuak țep tawh.

"I țha em? I damlo em ni zâwk?"

Khum chu hêlin a hawina lamah chuan inthlahrung angreng deuhin ka kal kual a,a mit a meng lova, min chhâng hek lo.

A damlo a ni ang, tím deuh chuan a chal ka va dehsak a,a lo sa var mai,a sa mah mah zawk. A khua a sik a nih ngei hi.

"I khua a sik a nih hi. Damdawi i ei tawh em?"

"Aih"   Min chhâng ve ta hrâm e.

"Damdawi ka lâksak ang che aw. I pu pawh ka'n hrilh ang e"

Damdawi chu cupboard atangin ka la chhuak a, tui bottle leh no nen chuan side table-ah ka dahsak a.

"Tho la,ei rawh. I pu ka'n hrilh ang e aw" tiin room chu ka chhuahsan ta nghal a.

Pu ber nen chuan a room lamah kan inzuichho leh ta vat a. Ani pawh chu a lo țhu tawh a,damdawi pawh a lo ei tawh a ni ang,ka hmu tawh miah lo.

"Engtik atangin nge a sik a?"

"Nizan atangin"

"Zia lo hle mai, vawiin chu inentír a ngâi a nih chu"

"Ka peih lo"

"Peih lo ti ziah lo la, i dam hma theihna tur alawm,naupang chhia viau țhin mah ta che, vawiin chu i lo awmdam dawn nia, ka kalsan ang che"

Pu ber chu ka zui chhuak leh a. Step-a kan chhuk lai chuan,"Khawngaih takin vawiin chu i lo enkawl hrâm dawn nia aw. A damloh chuan a thin a chhe thei hle a,a vín che a nih pawhin lo dawh hrâm hrâm i tum dawn nia, duattu a mamawh țhin si a" a ti sap sap a.

"Aw le, ka pu. Lo ngaihtuah reng reng suh"

Nu Sangi a awm tho avangin kei chu inchung lamah ka chho leh a, Rsa room-ah chuan ka lút leh a.

"Awmpui ka ngâi lo"

Min melh rún mai a, a mit a sên râm a, a bui deuhin a lang.

"I khua a sik si a, ngaihtuah i ngâi alawm"

"A ngai lo, ka chíndan țhan ania,tuma ngaihtuah ka ngai lo"

"Tihian i bulah ka lo țhu mai mai ang"

Pu berin ngaihtuah turin min ti a, ka kalsan thei lo ang. A damloh laiin a nu leh pa, duata enkawltu tur an awm ngai dâwn si lova, a lo tihțhan a nih pawhin a tidik ang. Nu leh pa bula awma pangchan ve te pawh a châk țhin viau ang chu, mahse atân zawng vana rah ang a ni dawn si.

"Mu leh tawh la, i chal kha  puan huhin ka lo dep ang aw" Keimah talin ka duat loh chuan.

"I duat ka mamawh lo"

"Ka duat dawn lo che, i pang sa lutuk kha ka lo dep dâi mai dawn alawm"

Ka chhân lét zél avang chuan min chhâng peih tawh lo nge, a mu ta a. Tih tak takah chuan, Pachuau ka ni ve a, ka luhlul ve tâwk tho.

Bathroom ami tui ka herh hâw a, chawhtawlh té-ah puan thianghlim nen, side table-ah chuan ka húng a.

"Zangthal zâwngin mu la"

A che duh lawk lova, ka nghâk reng thung. A hnu deuhah rum deuha min melhin a zangthal zawng chuan a mu ve ta hrâm a.

Ka rilru té té chuan ' Ka thu thuin i awm dawn chiang alawm, min vínin min melh rum eng ang mah la, ka hlâu dawn miah lo che. Tu peih rei rei kan ti ang chu' ka ti a, lungawi lo hmêl ka pu duh lo hrim hrim.

"Khati mai tur kha alawm, naupang chhia lutuk tur a ni ngâi lo"

Min melh rum ngang mai.

"Min melh vak suh, i lu te kha a na zual ang e"

A maimichhíng ta daih a, ka nuih chu a za angreng. A khuasik lo se chuan heti hian ka tingam âwm dér si lo. Ka nui sak a.

"Min nuih suh"

Min hmu ru reng emaw ni le. Mahse a maimichhíng bawk si.

"Ka nuih lo che, nuih tur pawh awm lo chuan"

A pang sa ver vawr chu puan huh chuan ka dehsak ta a, a sa hle a ni. Puan pawh chu ka let zung zung mai, a pang mai ni lovin a biang, bek pawh ka dehsak vek, a sa vek si a.

"Zâi pah la"

He pa mai mai chuh.

"A bengchheng i tipalh ang, ka zâi ring thei si"

"Zâi ring lo mai la"

Leh zél chuan. Thina, lo dawh hram hrâm teh.

Ka insúm țâng țâng a ngai, a damlo a, ka duat a ngai si.

"Eng hlâ nge ni ang?"

"I duh duh"

Ka hla duh em em 'Perfect' chu zâwimuang, fân raihin ka sa a, ka sa ring lo. He hla hi chu ka duh ve em a, sak mai mai pawh ka duh lo țhin reng a ni.

A thunawn ka sak lai chuan"Duhtâwk teh, ka ning"a lo ti sup a, ka ngeizia chuh... chawhtawlh tuia theh sawk mai ka duh. Ka insúm leh hrâm.

"A bengchheng ang ka tih ka tih kha"

"Ka kut hi min hrúksak leh teh"

A duh ang leh sawi ang chuan ka ti zél a. Thil ka ngaihtuah kual a,  a nu leh pain an rawn duat ngai lova, chuvang chuan ka dawh hrâm hrâm a ngai a ni. An chhiahhlawh ka ni a, an duh apiang chu ti mai tur ka ni. Tunah chuan a damlo a, a dam lai chuan heti em hian min tirh ngâi bík loh kha maw. Duata pangchanna tur a zawng ve a nih hi, thil harsa tak pawh a ni lêm hlei nem le.

A kut ka hrúk zawh chuan a thâwk dan chu ka en a, a muhil ta a nih ka ring. Ka thaw huai a,tlangval țhalai chhún pachanga rizai hnuaia inkhuh hlún mai hrehawm tur zia chuh. A dinhmun ka ngaihtuah kual zel a, a pu, ngaihtuahtu tur ber a chhuak bawk si a,Nu Sangi a hman lo va, kei a hman ber lah hi damlo enkawl thiam tak ka ni lo chiang si.

A muthilh chhúng chuan room chu ka tifâi zung zung a, pu ber room nen, a bâl ngâi lêm lo bawk a, ka ti zo thuai a.

Room dang chu Nu Sangi'n a tifai nual tawh a, ka âwl ta phian mai. Mahse Nu Sangi chu ka pui leh tho.

"A muhíl em ni?"

"Aw, nichín deuh tawh khan"

"A țhat chu. A damloh hi chuan thinchhiain chiarhiar viau mah se hriat thiam i tum dawn nia, nu leh pa kârah a awm lo rei a, duattu leh pangchanna a mamawh ve a ni. Ka khawngaih thei teh ania, anu leh pa ințhen hnuah a piin a enkawl a, nu leh pi chu fapa rilruah chuan an dinhmun a inang thei miah lovang. A nu kha a nģâi thei hle tih ka hria, mahse a nu khân ka rin aiin a ngaihsak tlat lo țhin. A rilru hi a hliam nasa țhin ngawtin ka ring, enkawl hi a khirh phah ka ring viau nain ka rin ai chuan a fel leh riau bawk si"

"A nu hian an ințhen hnuah a lo tlawh ngai lo em ni?"

Lu thing nar nar pah chuan," Teuh lo, a nu khan a hmangaih ngai lo a nih ka ring ta. A chhan chu pawisa hi a duh ve em a,Rsa pa nen an inneih chhan pawh kha ka rindan chuan pawisa vang a nih ka ring. Rsa pawh hi pâi rih loh kha a duh a, mahse Rsa pa hian fa a duh em a, indan a phal lova,Rsa a lo pian pawhin a ngaihsak țha duh lo réng a ni" a ti leh barh barh a.

Chutiang chu maw Rsa dinhmun chu lo ni le?! Kan inang viau nain kei chu ka nuin min duh lo chuan ka hria. Ka pain kut a thlâk țhin kha a tuar thei tawh thlâwt lova,a chhuahsan a ni mai. Kei erawh chu ka pain min enkawl chho ta a, Rza erawh a puten an enkawl thung,an hausa em a, a duh duh a nei thei thung a, nu hmangaihna erawh sum hian a lo lei thei bík lo a lo nih dawn hi.

Min ko ri ka hriat avangin inchung lamah ka tlân chho vat a, ani chu  a lo harh tawh a, min lo ko vak vak niin.

"Khawnge i kal a?" Min melh rún mai.

"Inhnuaiah ka chhuk lawk a"

"Hna i zu thawk leh mi?"

"Aw, Nu Sangi ka pui zawk a, i khawsik a reh tawh em?"

"Puih a ngai lo, min awmpui a ni lo'm ni? Min ngaihsak ta che"

Hmm...he pa hi , ka awmpui leh duat kha a mamawh lo niin a sawi sia.

"Min mamawh lo a ni lo'm ni? Duat kha i duh lo ni khan ka hre sia"

Min en rún reng a. Ka hlâu lek lek mai, mahse ka intipâukhauh lui a.

"I khawsik chu a zia tawh em? Ei tur ka lo laksak dawn che em ni?"

Min chhâng dawn lo emaw tih tawh hnuah "Aw" a ti sup a. Naupang chhe titau chiah chiah a ni mai.

A bula kal hnâiin a pang ka dehsak a,a lo sa lutuk tawh lo ve.

"Umm, a zia deuh ta e, eitur chu ka'n  laksak ang che.  Tui tâwk aw ni ang" ka nuih sak a.

"Ei tur i lâk hnuah min kalsan tawh suh ang che"

"Aw le, boss"

A nui ve suk nia. A tírah khan duat kha mamawh lo te kha a inti vél a, tupawhin duatte chu kan thlahlel alawm. A intihpâ ve na kawng tak anih vangin a hnial ve mai mai alawm.

Eitur siam sa chu ka zu la a, tray-ah châwi chhoin side table-ah bawk chuan ka nghat a.

"Ei țeuh rawh, i damdawi ei a chak si a"

"Ka ei laiin ka bulah awm rawh" Kalsawn ka tum úk tawh ania, chutia a tih tâkah chuan a khum bul chair-ah chuan țhuin ,"Aw le, boss" ka ti a.

"Boss ti ziah suh, ka hmingin min ko ve mai rawh"

"Tunah chuan ka boss i ni tlat"

A nui leh suk mai. He pa hi a nuih hian a hmêlțha thlâwt alawm. A hmëlthatzia hi a inhre ve ang em le? Mahse nui tam lo se ka duh, ka rilru a tibuai.

Eitur a ei chhúng chu a bulah ka awm ve ta reng. Dik tak chuan a bula awm hi a rúk tak chuan ka thlahlel, mahse thlâkhlelh hi ka duh lo.

"Inbual ka duh"

"Awihawm loh, tunah rih chuan ni lo ve"

"Ka thlan a tla nasa asin,ka ban vek"

"Chu pawh ni se, i khawsik pawh a la reh chiang lova, ti rih lo mai rawh"

"Chuti chu, min hru teh"

In hnuaiah tui lum ka zuk la a,ka chhoh chuan a kawr hâk a lo hlíp tawh a.

"Ruakin ka awm sia, min en ngam dawn mi?"

Ka hre lo der. A darpharh hlâi dârh leh a dul sek deuh, thêp zaih mai leh a bân sei thlurh mai. A, mipa pian dik tak neitu hi. Hmuhnawm ka ti asin.

"Min va en ngun ve"

Ka harhchhuak chiah. Ka zak lutuk chu ka hawisawn nghal daih. Ka lo thlêk nasa lutuk alawm le.

"A pawi hleinem, i duhtâwkin min en rawh"

Puan chu tui lumah chuan chiahin ka sâwr a, amah chu ka hnaih a.

"Min en duhtâwk tawh mi?"

Ka chhâng duh lo. Ka en duhtâwk awzawng si lova,chhân kher ngaiin ka hre lo.

"Ka lo hru tawh ang che"

Ka huphurh rualin ka châk tho. Mahse a taksa ka deh rualin ka awmdan ka control a ngai viau ang.

A hnung lam ka hru phawt a,a lo thlan nasa lah tak a, uluk takin ka hru a,a hnung lam ka hrúk zawh chuan a rawn inher a.

Inhmachhawnin kan țhu a, min en reng si. Ka thãwk a dik lo leh țan dawn tlat.

Amah en duh miah lovin ka hrúkna lai zel chu ka en a, a chhan chu min en reng si a,ka mitmeng atangin ka awmdan a hre thei ang tih ka hlâu.

A áwm ka hrúk lai chuan," Ka fâwp thei che ang em?" a ti sup a,ka melh chiang ngei mai. Ani erawh chuan ka hmui char char a lo en thung a.

Ka thaw a rang lehzual, kan inen hnâi set sawt bawk nen,ka lungphu nasa lutuk chu a hre pha ngeiin ka ring.



RUATSANGA - 10 By Dingdi Pachuau

Ka mit ka laksawn hnuah,"Hetiang hian awm suh" ka ti sap a.

"Engtin nge ka awm?"

Ka chháng lo. A hrereng tih ka hria.

"Min en teh"

Ka en duh lo.

"I kawr ha tawh rawh, i khawsik a la reh loh kha" ka ti daih a.

"Min en phawt la"

He pa hi chu tihngaihna thlâwt a awm lo. A luhlul ve tho bawk si a.

"Hei, ka en che hi. Ha tawh rawh"

Min en vang vang phawt a, ka lâi lehpek kher mai. Chutah ka khabea dawm pahin,"Min en hian nuam ka ti alawm, kan infawh hnu atang khan min pehhélin awm ve ta lo ang maiin min ngái a, min haw ta niin ka ngai a" a ti  sup a. "Min hua em?" A ti leh a.

"Huatna chhan tur che a awm hleinem"

"Ngati nge min pehhél char char si a?"

"Theihnghilh daih rawh" ka hawi sawn ta daih a.

"Infawhte chu thil sual a ni hleinem, thil nuam tak a ni alawm"

Ta deuh deuh chuan. Ka zak chu ka sen nasa ngawt ang, a lum up up mai.

"Thil thleng ngai lo pawh a ni lova, nula leh tlangval inkârah chuan a thleng țhin alawm"

"Kan inkârah hi chuan tih loh tawp tur a ni"

"Engvangin maw tih loh tawp tur a nih a?"

"I hrereng alawm"

Ngaihzawng a nei a, keiin ka nei ve bawk. Chuan, chhiahhlawh leh a pu inkâra thleng atân chuan thil țha a ni lo bawk.

"Thil sual a ni lo"

"Ni lo, thil țha a ni lo. Kan pahnih inkârah hlauh phei chuan"

"Chutiang ngaihtuah suh, khawvel a nih hi. A chén thiam thiam an hlim a ni mai"

Chu chu a ngaihdan a ni. Ani chuan a bialnu ni miah lo a fawh pawhin inthiamlohna a nei lova,engahmah a ngai lo tihna.

"Eli ngaihtuah rawh" Engvangin nge he nu hming hi ka sawichhuah kher ni?

"Engatan maw?"

"I bialnu a ni alawm"

Ngaihven lo zet hian"Ka kawr kha min lo pe teh" a ti daih a.

A kawr chu ka pe vat a. Inthawlh vat pahin"Hmeichhiate chu mipa khawvel tinuamtu alawm in nih, Eli pawh ka khawhar min hnémtu ania, mamawh kan inpe tawn mai a ni" a ti nghut a.

Ka rei leh!!.sex hi khawhar hnêma mamawh inphuhrúk tawnsak ang chauhah a lo ngai tihna em ni?

"I hmangaih i la tawn loh vâng a nih chu"

"Hmangaihna a awm lo"

"Sex pawh hi inhmangaihte, nupa inkâra thleng tur a ni"

A nui huk a, awih loh hmél fé hian min en a.

"Engmah i hre lo, kei aia thil hre zawk angin sawi reng reng suh, ka hriat chanve pawh i hre tawp nang"

Ka ngâwi ta reng. A sawi dik bawk si a, sex lam kher kher hi chu a hriat zawng zawng zaa sawm pawh ka hre tawp nang.

"Sex tel lovin tumah an inngaizawng peih teuh lo. Hmangaihna hi chu a hming ve mai a ni. A sawitute pawh hian an sawi ve mai mai alawm"

"Sawi tawh lo ang"

"Nge sex chu practical-a zirtir i duh zawk?"

Makti leh râp hmél zetin ka melh a, he pa hi a damlo â a ni lo maw? A thilsawi rapthlãk zet hi, ka ngaihtuah thui ngam lo.

"Ka pasal lo tur chu sex ka hmanpui lo tawp ang"

A nui leh huk huk a. "I la dâi zím em mai a. Kan la naupang a, nupui pasal neih zawng a la hla em mai. I zei lo viau dawn a nih chu" a nui suk suk a.

"Pawi tawp lo"

A nuih a za hlé a nih ka ring, ka ngei lutuk, ben chawrh ka châk.

"Zei i duh phawt chuan ka inpeih reng ania"

Lukham chuan ka vawm chawrh a,mahse a lo indang hman tho.

"Ka damloh hi, min duat ta che"

"I dam khawp hi maw"

"Ni lo, min vawmna kha, ka lu i tihai ania"

"Mu la a nih mai chu"

Mu pah chuan,"I pasal tur chu ka khawngaih, zei lo a ti dawn em si che a" a ti leh a.

" I nupui chuan a hlâu ngawt ang che ka ring"

"Engah chuan maw?"

"I zei dawn sia"

"Ka zei poh leh nuam a ti ting a ni mai"

"Ka râp che"

A nui leh suk mai. A chimawm leh țan a, sawi tur pawh ka hre leh ta alawm. A damlo ta pawh hi a zia ka ti phian mai.

Chawhnu lamah a muhil leh a, a khawsik la reh hlei thei lo chu a mak ka ti. A pang lah a dâi diai thei si lova, damdawi inah kal zawk ila chuan thisen an exam ang a, an hre thei maiin ka ring a ni.

Pu ber lo haw lai pawhin a la muhíl a, chanchin min zâwt nghal mawlh mawlh a.

"Special-ah inentir se, a țhat dawn chu, a khawsik a awm reng tho chuan"

"Nia, mahse a duh loin ka ring"

"Hmm, duh lehpek lovang. Damdawi in leh a kaihhnawih hi a hua ni berin ka hria, inentir hi thih hrehin a hreh nia,a chhan pawh ka hre lo"

"Zanin ngaichâng ila, naktuk lamah  a reh loh chuan ka lo thlém chhin dawn nia"

"A țha viau ang. A duh loh hi chuan ka tilui thei si lo, a tuar dam ve leh mai țhin. Ka ngaihsak tak tak hman țhin lova"

Zanriah ei dawnah ka han ngaihven leh a, a lo harh ve tawh a, mahse a lo tho chuang  lova.

"Chaw i ei peih dawn em? Nge ka lo pe dawn che?"

"Ka ei peih lo"

"Chaw nghei hi a țha lo asin, tlém té tal ei rawh aw"

"Ka duh lo"

"Naupang chhia viau teh suh, 'cial' deuhin aw ni ang?"

"Ka duh lo ka tih ka tih chu" a ti țhawt a.

Ka phu zawk mai. A thinchhiatzia mai mai chuh. Damdawi ina hruai ngei ngei a ngai, a thin zaițha tal tur pawhin.

"Thildang ei tur tal i duh em?" Ka ti leh hrám. Thil a ei loh chuan pu ber ngaih a țha lo palh ang.

"Nangmah"

Chimawm a chhuah leh țan ta. Ka duhzawng tak.

"Ei chu ka har khawp ang"

"Lo kal chiah la"

"Ka duh bawk lo"

A nui leh huk tawh.

"Chaw ei khamah rawn chho nghal ang che"

"Aw le, boss"

"Chuan, i sam kha thlah ngei ngei ang che"

"I va thú tak"

A nui huk huk ngaihthla chung chuan ka chhuahsan ta nghal a.

Zanriah ei khamah chuan pu ber a chhoh tho avangin ka chho nghal lém lo. Thleng sel fela ka tihfai hnuah ka room-ah kalin ka intleuh ve a, ka sam erawh ka su hman ta lo a nih hi.

Mama'n min rawn text a, text mai duh tâwk lo chuan min rawn video call a. Ka ning e, hmél a chhe duh si,ka zak asin le.

"Ka ngâi takzet che a ni, naktuk chu inhmuh tum ila"

"Ka va hrethiam lo ve aw. Rsa a damlo sia,ka chhuah theih ka va ring lo em!"

"A nih tak chu,a va zia lo ve"

"Nia,....vawiinah tiraw i rawn phei?"

"Aw, ka thlenna a la rei lo. Nih leh ,sunday-ah tal tum la"

"Aw le,  pu ber ka lo díl dawn nia, a phal tho chuan ka ring a, Rsa pawh a dam tawh turah ngai ila"

"Nia,thil té té ka rawn hawn che ania"

"Eng?! Ka hmu châk tawh e"

"Ka hrilh dawn lo che, kan inhmuh hunah chauh"

Mama hian B.Ed kha Aizawlah a va try ve a,vanneihthlâk takin a tling ve hlauh mai a,tunah chuan Aizawl leh Lunglei a kârtawn ve ta chhén a ni. Keimah vâng a ni pakhat, min hmuh a châk ve țhin si a,a rawn phei chhuna hmuh loh chu ka khawngaih ve a ni.

Rsa room-a ka luh chuan khumah  a lo ţhu khur mai a, rum zeta min lo melhin,"Eng thil nge i tih a?" a ti búl nghut a.

Hrethiam lo zet hian ka en a, eng thil nge ka tih? A duhloh zawng ka lo ti leh hman tawh em ni?

" Eng nge ka tih?!"

"I va rei ve.. Lo chho nghal turin ka tih che kha"

Um, ka chho nghal vat lo kha a lo thinrim leh tawh a nih âwm hi,thinawrha hi.

"Ka inbual ve lawk alawm. I pu kha a awm tho sia"

"Ka pu ka mamawh lo"

Huizzz..He pa tak hi chu aw, ka thluak a tibuai zo dawn.

"Eng nge i duh, boss?"

"I hriatreng kha"

He pa zahlohzia tak hi chu. Mi tihzah hi nuam a tihzawng tak a nih dawn hi.

"Chuan, i sam kha"a rawn kâwk a.

"A lum alawm, bâkah a bâl si" ka hnial ve tlat.

"AC kha on mai la"

Inla-boss lutuk mai.

"Ka fawh i duh chuan i thlah lo thei tho"

Ka melh ve râwm râwm a, mi nékchép dan a thiam lutuk hi ka ngei. Mahse nuam tihna riau ka nei bawk si.

Ka thlah ta ngé ngé.

"Thlah lo la  pawi ka ti lo viau asin le"a ti leh ta nghal a. Tifuh intih hmel zet hian a nui suk a,a meng sawr sawr bawk a.

Ka ben sawk nghal loh. A hriat lohin ka rilruin ka inhrosa ve nasa mai.

"Ei tur min siam la"

"Eng ei tur?"

"I siam thiam ber"

"Pasta aw"

A bu nghut a, pasta siam tur chuan ka chhuahsan ta nghal a.

Tam vak lovin ka siam a, chokaa  che rak rak pah chuan thil ka ngaihtuah kual a. Tihian Rsa nupui ni ta mai ila, a ei tur ka siamsak țhin ang, ani lah chu min thlahlel zetin ka bulah a awm ang a, ka kawnga kuahin min hmangaih thu leh min duhthu min hrilh pah ang a, rilru hlim takin ei tur chu kan ei dun ang. Ei tur ei zawhah bathroom-ah intleuh dunin a khumah hmangaihna kan chén dun ang a.....

"Eng i ti veng veng chu ni maw?"

 Ka phu zawk, ka ngaihtuahna ka lo kawm nasa lutuk a lo ni. Ka thil siam ka lo peihfel tawh chu ka vânnei hlauh.

"Room-ah nge hetah i ei dawn?"

"Rilțâma min thihtiŕ i tum a ni êm lo maw?"

"Ka tihpalh, thil ka lo ngaihtuah kual nasa deuh a ni"  I hriat ve chi miah loh.

"Min lo ngaihtuah nasa hle a ni maw?"

"Teuh lo"

Nui suk chungin,"Duh lo ve thei bawk si a"a ti sup a,dining chair-ah chuan a  țhu thla nghal a.

Ka rin aiin a ei tam daih mai, ka siam chu tui a ti ve hle a nih ka ring.

"A tui em?"

"A ei ve theih mai hi"

Mi fak hi chu a hreh ve ngawt mai.
'Tui lutuk' te ti ve mai ta se, thâ pawh a séng tam lo zawk ang a, kei ka lo lâwm bawk ang a. Zei lo em mai.

Room-ah ka zui chho leh a,ka kalsawn a la phal tlat lo alawm. Khumah chuan a țhu sauh sauh a, kei chu a mawng lam tâwpah ka țhu thung a.

"Min hlau ami? Ka bulah hian lo țhu ve la"

"A ngai lo ve"

"Dawih ve siah. I bialpa bulah pawh i țhu zum dúk țhinin ania ka rin ni"

"I ring sual a nih chu"

"Tak tak? Nih leh, engtin nge i awm țhin?"

"I hriat ve kher a ngai lovang"

Ka inrin hmain min rawn pawt sawk a, khumah chuan ka tlu chiang kher mai, min rawn  chelhbet zui bawk a.

"Min thlah rawh"

"Thlah duh lo ta che ila?"

"Ka au vak mai ang"

"Tak tak?"

Kan inmelh rân mai. Ka âu duh tak tak ang em?  Âu ta ila,a puin a hria ang a, a chhan min zâwt ta se? Engtin nge ka chhân ang? 'Min fâwp' ka ti dawn em ni? Mahse min fâwp bawk si lo. Min sual tum ta se chuan au pawh ni ila ,a la zia deuh zawk ang.

"I thluak te reuh té ah hian eng nge i lo ngaihtuah hman a? Thil țha lo tak hi ngaihtuah ziah suh"

A va zak lo tak. Amah hi a ni reng sia, thil țha lo tak tak ngaihtuah lo thei lova min siamtu chu.

"Ka ngaihtuah i hre lo"

"Ka hriain ka ring"

A hre leh tak takin ka ring. A mitmeng uk kharh, fin hmél zet hi. Ka en reng chuan a hre mai ang.

Sír lam hawi pawhin,"Min thlah teh, ka thaw țha thei lo ania" ka ti ta ringawt a.

"Ka fâwp phawt ang che"

Ka tâl phat a,mahse ka tho thei chuang lo. Min nem bet hneh khawp mai. A damlo ve pawh hi ka hneh chuang lo a nih âwm hi.

Ka bân a chelhbet ve ve bawk si a,ka ke lam lah chu a ke pahnihin a kherhbet hneh bawk si, ka tlâwm chu a ni deuh dér mai.

"Ka fawh hi a nuam lo viau ami? Ngati nge i duh loh a?"

Nuam tehreng mai,ka duh alawm. Mahse, min fawh zauh zauh chuan a fawh ngawl ka vei ka hlau.

Ka ngawih reng avang chuan a rawn kún hniam a,lo en reng ka zah avangin ka maimichhíng ta daih a.

"Zakzum reuh lutuk mai"

Muangchângin ka hmui chu a hmui chuan a rawn tawk dē dē a,ka lo hnial bík loh avang chuan a ngampa ta deuh sawt a ni ang,duhthawh takin min fâwp ta buan buan a.

Kan duhthawh dun khawp mai, kei pawhin uar theihtawpin ka lo chhâng lét ve bawk a, kan inthlah meuh chuan thâwk kan la dun hap hap a.

"I hmui fawh ngawl hi ka vei dawn tlat"

Ka zak viau nain a thusawi chuan min tilâwm viau mai. Ka zei loh tehreng nen, mahse Rsa fawh hi chuan ka zei lo tih hi ka theihnghilh vek zel. Mi nawr dan a thiam tlat a, mahni inrintãwkna min pe thei tlat nia.

"Khawizu thlum tak ang mai i ni"

Min  fâwp leh țan dér tawh. Kei pawh ka thluak a tibuai leh tawh a, ka lu pawh a hai leh chíái chíâi tawh mai.

"Ka duh takzet che a ni" min fawh pah chuan a phun sap sap a,kei lah chu ka chhia leh țha hriatna chuan min kiansan hret hret si, chhungril lamah lah chuan nawrtu awm ang maiin duhna nasa tak chuan min rawn nawr sauh sauh ni maiin ka hria.

A kut chuan ka hmai chúlin ka nghâwng lamah a chúlthla a,kei lahin lo dan ahnêkin ka lo insiamrem sauh sauh a, min fâwp pah reng chuan a kut chuan ka àwmbawr lam a chúl thla țan ta.

Mipa réng rengin min tawk ngai lo, ka duh bawk hek lo. Mâma nen kha chuan kan infâwp țhin tehmeuh mai, mahse ka âwmbâwr takngial pawh ka la dehtir lo,khawih a tum ve pawhin ka hnial țhin a, a kut ka paihsak vat zel. Min tilui bík lo, thianghlim takin kan inngaizawng a, zei lo pawh min ti viau ang. Mahse taksa innghen reng hian mipa leh hmeichhiaah chuan thil țha lo tih duhna a thlen thei tih ka hria, fianrialah hlauh phei chuan.

"Duhtâwk ang"

Ka aw chu ka hai țhelh a ni. Ka va inhaw tak em! Hmeichhe sihhnip tak angin ka awm alawm le. Rsa min ngaihdan tur phei chu, easy min ti dawn lutuk, a bialnu pawh ka ni lo lehnghal.

Ani pawh a thiltih lai chu a tâwp chiang kher mai.  A âwmah namin ka țhu chhuak a, ka thâ a khúr nasa lutuk lehnghal. Ka kawr chu siamțhain ka sam pawh ka hui mâm sawk sawk a.

"Ka room lamah ka kal tawh ang e"

Amah pawh ngâichâng lo chuan ka chhuak ta daih a, ka tha khúr nasa lutuk mai chu, kal pawh ka kal țha thei hleinem. Ka room ka luh veleh kawngkhâr nghengin ka ding vang vang  phawt a. Bathroom-ah lutin bathroom darthlalanga ka hmêl ka hmu thut chu ka phu chiang hle mai.

Ka hmâi chu a sen  tân mai a, ka mitmeng lah chu, tisa châknain a phí chiai mai. Ka sam pawh a thur țha khawp mai, hetiang hian Mama khan min hmu ta se,engtin nge min tih ang? Ka zak lutuk chu ka hmai ka hup vang vang a.