☆SILVER ZUNGBUN☆ - 1 By Dingdi Pachuau

☆SILVER ZUNGBUN☆ - 1 By Dingdi Pachuau



Ka hah lutuk chu ka thaw huam huam mai. Ka ding khùr dar dar a, chawlh vang vang ka va châk tak! Mahse,  chàwl rei thei ka ni lo, ka awmna lai hi ka hre chiang lo lehnghal.



Thâwm ka ngaithla pah reng a; mahse, min umzui thâwm àwm ka hre rih lo. Ka rilru erawh a nuam chuang miah lo, a chhan chu ka awm lo tih an hre thuai dâwn tlat, an hre tawh hial ang, min rawn zawng ngei ang, chu chu ka hre ve chiang a ni.



Hmanhmawh tak fîmkhur tak siin ka kal leh ta a, ka tui a hâl lutuk ringawt. Ka hrawk a thîpin a na hle a, ka dang a ro ém ém bawk. Zalènna famkim ka hmu ang em ka hre rih lo; mahse, vànneihna ka lamah a țang ta rih a, hei, ka tlân chhuak thei tal alawm. Chuvàngin, ka beih hrâm hrâm a ngai.



Ka kawr hâk chu a țet deuh nual ngei ang. Ka kekawr dinglam khûp chu a țet ngei tih ka hria, ka zuan thlâkna lamah khân ka tithlêr chiang, ka khûp a pilh bawk. Ka kiu dinglam pawh a pilh nuan bawk ang. A tìrah chuan ka ngaihsak vak lo; mahse, ka tlân nasa a, ka thisen a lum chho tihah khân ka khûp pilh chu a thî duh hle mai a, ka rawmawlin ka țâwn tawp.



A thim deuh tawh avàngin kawng chu ka hmu chiang thei tawh lo; mahse, pawi ka ti lo. Min rawn zawng a nih pawhin min hmu vat thei bîk lo ang, chutah, duty kha mi pahnih chauh an ni lehnghal.



Kawngpuia ka kal ngam loh avàngin kawngpui hrûlah deuh zêl ka kal a, chuti lo chu kawng ka bo mai ang tih ka hlau a ni; mahse, ka awmna hi ka hre chiang tlat lo va, ka bo chu a ni deuh dèr tawh zâwk.



Motor tlân ka hre zauh zauh, min hmu thei ang tih ka hlauh ém avàngin a biru thei ang berin ka kal hrâm hrâm a, ka slipper bun chu a chhe țêp tawhin ka ring. Ka kal chak theih nân a chângin ka slipper chu ka keng a, ka ke chu a na tak zet tawh bawk.



Hla takah chuan light êng ka hmu ta, hlauthâwng takin ka ding chawt. In ațanga lo chhuak a ni, mihring țawng ang deuh ri deuh niai niai pawh ka hria. A hlauhawm ang em? Hlauhawm ang, min zawngtute an awm maithei asin, ka thin a phu dawt dawt. Ka va pawh tùr a ni lo ang; mahse, ka hnaih tùr a ni, ka awmna hi ka hriat a ngai.



Muangchângin, fîmkhur takin ka hnaih phei a, ka hnaih phei tâkah chuan in ni lovin bazar shed a lo ni tih ka hre thei, kawtah chuan pickup pakhat a lo ding bawk. Khawi lai nge tih ka hre thei rih lo.



Ka hnaih phei hret hret a, fîmkhur takin ka rahna tùr chu ka rap chhin hmasa phawt zêl. Chuti lo chu ka rahna chu a lo rintlâk lo ang a, ka tlu ang tih ka hlau, thâwm ka siam ngei dâwn si.



Hmeichhe nui hawr hawr rî ka hriat chuan ka thin a rim țûn mai. Ka nuih lohna rei tawhzia min tihre chhuak a, chutianga hlim taka a nui hawr hawr thei bîk chu ka thîk, nun hi a va lo inang lo thei tak ém!



Țawng ri deuh niai niai kâra,"A nih, ka kal tawh mai ang, tlàn tlaivàr pawh a ngai maithei si a."



Mipa aw thûm chhek chhawkin a tih chuan hmeichhe aw hian," Nia, a tlai tawh mah mah, mahni chauha tlàn chu i khua a har duh àwm sia, ka lo chuang ve mai dâwn em niang?" nui har har chung hian a ti leh a.



Um, chuti a nih chuan kawta pickup ding kha chu pa khalh chu a ni ngei ang, ka chuang ve tùr a ni. Tlaivâr deuhthawa tlàn a ngaih chuan a tlân thui hle dâwn tihna, chu chu ka duhthusàm a ni. Min zawngtute lak ațanga hla taka awm ka duh.



Vànneihna ka lamah a țang zêl. Pickup awmna chu tuma hmuh lovin ka thleng phei a, a hnungah ka țhu lût vat. A thim avàngin engmah ka hmu thei lo va, eng eng emaw chu a phur nual a nih dâwn hi. Ka mut dan tùr ka siam rem a, thinphu dap dap chung chuan chu 'aw thûm pa' lo kal hun chu ka châng ta a, ka han hawi vêl a, a chung neiin a lo siam lehnghal a, ruah pawh sûr mah se, ka him dâwn tihna.



Hmeichhia chuan a rawn thlah a, an inbialnu bialpa a ni ve ngei ang, ka luak an tichhuak. Ka beng ka hup a, motor a nghawr dar dar tâkah chuan ka kut ka la sawn chauh. Kan tlân chhuak ta, ka thaw huai mai. Tunah chuan ka himna tùr lam ka pan ta mêk e, ka him tluan thei ang em?



Ka khûp chu ka khawih a, a lo la ban chap mai. A thî chu a reh tawh ngei ka beisei, a thikhârin a chhilh tawh ngei ang chu maw, ka chàu ngawih ngawih, ka mut a chhuak selh selh bawk. Motor tlân chuan min àwi pah a, rei lo te hnuah chuan ka chunga thil thleng theihnghilh țhak chuan ka muhìl ta bawrh bawrh a.



*******



"Lo lêng ve rih rawh aw."



U Rina nèn chuan kan in pan chuan kan kal dùn hnak hnak a, ka bialpa a ni. Ka nu damlo ka awmpui reng a, intiharh pahin damdawi leh ei tùr leiin ka chhuak a, ani nén hian kan inhmu a, lêng tùrin ka sâwm  ve pah a ni.



U Rina hi Cl- xi ka zir laiin kan ina a rawn kal ka hmu a, chhe lo ka ti tak zet. Ka pa (ka pa hrawn) nèn an hna thawh a lo inang niin, a hnuah pawh kan ina a lo kal hi ka hmu ta zauh zauh. Min fiam peih hle a a, kei aiin upa mah se, min kàwm thiam hle. Ka pa ai chuan a naupang deuh zâwk tih ka hria a, chhe lo ka tih ém avàngin kei pawhin min fiam pawhin ka haw ngai lo.



Cl- xii ka zir kumah min duh thu min hrilh a, kei pawhin ka duh ve tho avàngin kan inngaizawng ta a, min duat thiamin min duh thiam a, nuam ka ti thei tawp. Ka thil duh duh min lei a; mahse, a bulah ka thil duh ka sawi vak ngai lo. Ka nuin min lei thei a, ka pain min lei thei bawk a, bialpate leitîr ûm ûm ka duh bîk lo a ni.



Ka nu hian kum naupang têin ka pa (min hringtu) pasalah a nei a; mahse, vànduaithlâk takin ka pian hnu kum hnihnaah ka pa chu motor accident-ah a boral ta hlauh mai a, pa tel lovin ka nu chuan min enkawl chho ta ngar ngar a. Cl- x ka zir kumah tuna ka pa nèn hian an innei leh a, kumah an inthlàu lutuk lo bawk a, an inàwm mai.



Ka nu hi zirtîrtu a ni a, ka pa pawh kha a ni ve tho. Tuna ka pa erawh police a ni thung, ka nu hi a lian lo nain a hmelțha reuh a, a vun a ngo bawk nèn, tlangval tam tak tân pawh a iaiawm loh viau a ni. Vun rawngah ka chhùn a, sàn lamah ka pa boral ta kha ka chhùn a niang, ka nu chuan ka koki pawh a chen lo.



Ka nu a dam țhat loh avàngin cl- xii ka pass hnuah zirna ka chhunzawm ta lo va, țhian pawh ka kàwm ta mang lo. In lamah ka nu chu ka enkawl ta char char, a chângin damdawi inah kan lût bawk a. A natna, pumpui cancer hi kan hriat chhuah meuh chuan a lo nasa tawh a, tih vak ngaihna a awm tawh lo a ni.



In kan thlen chuan ka nu chu a lo muhìl a, ka pain a lo awmpui. Awmpui ti ila, sitting room-ah ka pa chu a lo awm. Ka nu chanchin ka zawh chuan a muthilh thu min lo hrilh a, ka thaw huai. A muthilh theih hi chuan a țha ka ti, nâ a hre vak lo deuh ang chu.



Ka nu mutna room-ah chuan ka kal nghal a, U Rina pawhin min rawn zui lût. Ka nu ka menpui nasa tawh tih a hria a, min menpui ve tùr hian a rawn kal fo bawk.



"A mut theih tho chuan nang pawh chàwl hahdam ve la?"



A dik khawp mai. Ka mit a kham ûrh a, ka hmêl a dâng viau bawk. Tisen ka nei tawh lo khawp mai, ka kutphahte hi a dâng vár pup mai a; mahse, ka sawisêl lo. Ka nu hi ka theih chhûng chu enkawl ka duh a ni, ani lo hi neih ka nei si lo. Ka pa hi chuan min duat viau nain ka nêl lutuk lo, a thinrim vawi khat ka hmu tawh a, a hlauhawm ka ti.



Ka room-ah chuan min zui lût a, a lo luh ve fo tawh avàng leh engtin mah kan awm ngai chuan loh avàngin ka sawisêl hran lo. Min duat a, min ngaihsak a, ka lâwm viau záwk.



"Ka mutsan daih che chuan i khua a lo har palh ang?"



"I hah tawh ém kha, muhìl rawh. I pa nèn kan lo inkàwm mai dáwn alawm."



Ka chàu tawngkhawng tawh bawk a, ka muhìl bawrh bawrh mai. Ka mu rei bawk a niang, ka harh chuan khua a lo thim tawh. Ka mit ka khap fak fak a, ka zi ian ian a, tah chuan ruak vekin ka lo awm a ni tih ka hre chiah!



Mak ka ti lutuk, ka thin a phu nghal dawt dawt bawk. Ka muthilh chhûng khân ka chungah eng thil nge thleng ang? Ka indap kual a, ka bulah taksa ka dap fuh a, ka țê nghal țhawt, zu rim a nam huam zui.



"Țha deuh khân awm mai teh, tunah chuan i harh tawh bawk a, nuam i ti viau ang."



U Rina. Eng thil nge ka chungah a tih? Ka room ațang khân a chhuak ngei sia, ka room ka lo kalh lo chu pawi ka ti vawng vawng mai.



"U Rin, engtin nge ka bulah i awm theih?"



"Min ko a nih kha. I bula mu ve tùrin min ti tlat a, ka bialnu bula mut miau chuan, a taksa nâl han han tawh reng si chuan insùm a har viau asin."



Ni lo, eng thil mah a ti thei lo vang. A hma pawhin engtin mah kan awm ngai lo a nih kha.



"Min phelh ruak a ni tiraw? U Rin, ka rin i lo ang lo hle mai, mi muhìl lai pawh i phelh ruak duh a nia, ka rin tehlul che nèn!"



"Min sâwmtu kha nangmah i ni miau a. Ka bialnu hi ka hnar thei hlei nem, lo hnai teh, kan tih zawh hmain i lo harh a, chhunzawm leh teh ang," tiin min rawn kuah nghal a.



Light a éng lo chu zia ka ti lutuk. Ka hmu thei ruai ruai chauh. Kan insual a ni ta mai, ka hneh dâwn lo tih ka hre sa, ka nu ka enkawlnaah ka chàu zo tawh a, thil ka ei thei lo bawk nèn, thahrui ka nei lo.



"Țang duh suh, min hneh dâwn chuang lo. Au mah la, tu mahin an hre dâwn lo, i nu a muhìl a, i pa lahin kan inngaizawngin kan induh tih a hre tho bawk si," a ti sur sur a.



"Khawngaihin, U Rin, hetiang hian awm suh, ka duh lo, min duh tak tak a nih chuan ka duh lo chung chu min tilui lo hrâm rawh." A ngenin ka ngèn tawp, chuti lo chu ka hneh dâwn si lo.



"Ka ta a ni ang a, thil a fel dèr mai ang. Mi tih loh dàn a ni hlei nem, țang tawh lo mai teh."



A kutah ka theihtâwpa nâin ka sehsak a, țê țhawtin min thlah chiang khawp mai. Tlànna tùr ka hre chuang lo, kawngka a kalh ngei dâwn bawk si. A sawi angin au chiam mah ila, tu mahin an hre thei lo ang, kan in hi a phui țha êm a ni.



"Tlàn chhuahnna a awm lo. Ka kut i seh man i pêk a ngai aw."



Dimna tel miah lovin min rawn man bet ta. Tâl mah ila engah mah a ngai lo. Khumah min nghat chawrh a, min rawn bawh thuah nghal, ka theih ang angin ka lo tlawh a, ka ham bawk.



Ka dulah tak a rawn hnek ta sawk mai, ka rûm kâwk. A na lutuk, țang tùrin thâ rêng ka nei ta lo. Ka mittui a tla zawih zawih a, ani lah chuan dimna pakhat mah tel lovin ka thianghlimna min lâksak ta. Ka taksa natna chu thuhran, ka rilru a na lutuk a, ka țap chhuak thei lo zâwk, ka mittui erawh a luang zaih zaih reng thung. Kan in ngeiah, ka room ngeiah min pâwngsual chu a ni ta mai si, ka rilru nat dàn chu sawi ngaihna pawh ka hre lo.



A duhtâwk a ngah hnuah chuan," Sawi chhuak suh ang che, police-ah report tum mah la, police ve tho ka nih hi hria ang che. Kan inngaizawng tih an hre vek, tumahin an awihsak chuang lo ang che. Bâkah, i saruak thlalâk ka nei bawk, tihmualpho i duh loh chuan ngawi hmak ang che," a ti ngul ngul a.



Chhàn pawh ka chhâng lo, ka mittui dîr zaih zaih reng chu hrûk pawh ka tum chuang lo. Tunah zet chuan engmah tih theih ka nei lo, ka nu thichhâwngin khumah a awm a, ka room ațanga hla lo têah. A fanu hi a bialpain a pâwngsual a ni tih hre ve ta se, engtiang takin rilru nâ ang maw?



"Bâkah, i pa pawhin a awihsak chuang lo ang che, kan induh tih a hre ve tho."



"Tunah chuan ka tâ i ni tawh a, khawiah mah min kalsan thei lo bawk ang. I saruak thlalâk leh video ka nei bawk, tlànbo tum vaih teh, i mualpho nghal a ni mai. Police-ah pawh hrilh tum duh suh, nang aiin hmelhriat ka nei tam zâwk tih hria ang che."



A rawn kûn hniam leh a, tunah chuan a hmel țha ka tihna, min duatna leh min duhnate kha a bo zo tawh. Ka ten a, ka hlau a, ka țih ngawih ngawih.



Ka hmuia rawn fawh a tum chuan ka lo thle sawn a, ka ten, ka hua, ka hlau.



Ka khabea rawn hmerin," Min dang suh, ka thu hnuaia awm i nih tawh hi," a ti chhur chhur a, min hmerna chu a nat êm avàngin ka âng lo thei lo va, ani lah chuan a hmui tenawm zet chuan min rawn fâwp nghal a.



A kutin ka taksa a rawn chûl leh a, ka ten avàng leh hrehawm ka tih ém avàng chuan," Khawngaihin, ti lo hrâm rawh, engmah ka sawi lo ang," ka lo ti khùr dar dar a, min sual leh ang tih ka hlau. A thu anga ka sawi chhuah loh chuan min kalsan mai ka ring a ni.



"Khawngaihin, min khawih tawh suh."



*******



"Min khawih tawh suh, khawngaihin?"



Ka tâl vak vak a, ka lu ka tauh dawt mai. Ka harh zawk mai a, ka mumang a lo ni. Ka thlan a lo tla nasa a, ka lo țang nasa bawk. Ka mumang a ni tih ka hriat rual chuan ka thaw huai a, ka mit chu ka khap sak sak a, ka awmna chu ka hre thiam lo hle mai.



Maimichhîng vang vangin ka awm dàn chu ka ngaihtuah a, nizànah pickup hnungah ka chuang a nih kha. In ațangin ka tlân chhuak a...Chuti, helai hi khawi lai nge? Min man tawh em? Motor hi a tlân tawh miah lo a nia. Min man tawh nge ka zalèn tawh?



"Tu nge i nih?"



Ka phu chiang lutuk a, ka țê țhawt. Ka lu chu motor bangah ka la tauh dawt zui.



Min betu țawng thûm zet lam chu zawi muangin ka en a, nizàna aw thûm deuh kha a ni. Inkuangkuah hlûn hian min lo en rùn a, a sâng tih ka hre thei nghal, tlangvâl bialnu nei rual lek emaw ka tih kha a upat hmèl ta viau si, ngun zet hian, che sawn eih lo hian min en rùn reng a.



"Tu nge i nih?" Hlauhthàwnna rilru thup hrâm hrâm chuan ka ti a, ka lu ka tauhna chu ka tuai vat vat a.



A zawhna ngai bawk chuan ka zâwt lêt ve. Ka rilrua hlauhna erawh ka bengdài hrâm hrâm, chuti lo chu min hre chhuak hlauh dah ang e.



"Engtin nge ka motor-ah i lo chuan theih?"



Zawhna bawk.



Ka tho chhuak tùr chu ka ke leh ka khûp nâ avàng chuan ka țhen sawk a, ka lo theihnghilh tawh a lo ni.



"I motor-ah dîl lo chea ka lo chuan avàngin min ngaidam rawh, ka kal tawh ang e."



Harsa zetin ka chhuk a, ka taksa a na kher mai, ka mal lah chu a rawl ém ém zui.



"Engtizia nge i khûp kha?"



Țhen sak pah hian," Ka tlu palh a," ka ti ta ringawt. A dik lohna a awm lo, tukverh ațanga ka zuan thlâknaah ka tlu palh a. Na angreng viau mah se, ka kal thei ang.  Thil ken tùr dang ka nei lo bawk a, kein ka kal leh mai ang.



Ka hawi vêl a, in pakhat chauh a awm. A bâk chu leilet vek a ni. E, green house pawh a awm nual mai, zîng lam a ni a, ni pawh a la chhuak sâng lutuk lo ve.



"Khawiah nge i kal dâwn?"



"Ka pu, helai hi khawi lai nge?"



Ka zawhna avàng chuan mak a ti a nih pawhin a hmêlah a tilang lo rêng rêng.



"Hliam i tuar a nih kha."



Ka khûp chiah a lo en leh tawh. Ka zawhna chu min chhâng se ka tih tehlul nèn, helai hmun hi eng nge, khawi laia awm nge a nih hria ila chuan ka kal dàn tùr a hriat theih deuh ang.



Ka pum a rawn ri rak rak a, nimin zîng  ațangin engmah ka la ei lo tih ka hre chhuak chiah.



"I khûp kha tuam țhat a ngai a nih kha."



Ka khûp mawlh chu. Ka khûp ai chuan tunah hian tui ka mamawh zâwk, tui in ila, rilțàm pawh a zia deuh ang.



"Ka pu, khawngaihin, tui ka in thei ang em?"



Mipa hi ka haw vek tawh! Mahse, tunah tak hi chuan tui ka mamawh ém ém si a, ka huatna ka dah țhat a ngai rih. Bâkah, ka inthup rih a ngai, min hre chhuak a nih hlauh chuan...



"Lo kal rawh."



A hnungah muangchângin ka zui, ka khûp leh ka ke nâ avàngin chak tak pawhin ka kal thei lo, ka bâi sawih sawih mai. Ka melh kual a, mihring ka hmu lo, tumah an awm ve lo a niang.



Bottle khat ka in zo vek. A dang dìl leh ém chu ka zak ve deuh hlek a, tunah chuan tlêmin ka zia ta.



"Khawiah nge kal i tum?"



"Ka hre lo. Tuna ka awmna lai hi khawi lai nge?" tiin ka zâwt lêt leh thung.



"Ka leilet a nih hi."



"A nih, heta țangin eng khua nge hnai ber?"



A mit menga mak tihna lo lang zawk chu ka hmu a; mahse, a reh leh thuai.



"Lunglei."



E khai! Ka awmna a va hla ta vang vang ve! Min rawn zawng hmu thei tho ang em le? Hm, Mizoram chu a zîm ém mai, thei lutuk ang.



"Kein kal ta ila ka thleng har ang em?"



"I kal theih loh kha."



Ka khûp chu ka en thla a, ka rawmawl vâr zet kha thikhâr vàngin a lo sen duk ruih tawh. Ka kețangte pawh a lo pilh nuan a, ka ketinte pawh a lo tliak nuaih mai.



Ka pum a rawn ri leh rawk rawk. A rin ém avàngin ka bula mi chuan a hre dâwn chiang.



"Thingpui in rawh," tiin a kal sawn ta nghal a.



Ka hnial phal lo, ka ril a țãm ém asin. Ka in zawhah ka chak deuh tawh ang a, ka kal mai a niang chu.



Thingpui leh a hmeh min rawn chhawp a, ți deuh chung hian làwmthu ka lo sawi sap. Ka ril a țàm ém avàng chuan ka in nghâl vat a, a lo sa kher mai, ka lei a kàng nghâlin ka hria.



"Muangchângin in rawh. I in chhûngin i khûp kha ka lo en dâwn em niang?"



Ka khûp a rawn khawih tùr chu ka ding zawk mai.



"Min dek hauh suh!" ka lo ti țhat a.



A tho ta vut a, choka lamah a lût ta daih a niang, a lo chhuak ta miah lo. Muangchângin ka țhu a, thingpui chu rilru bet lo zet chuan ka in leh ta a.



Plastic chawhtawlh têah hian tui a rawn chawi a, ka bul stool-a dah pah chuan zàwi sup hian," Kha khân i khûp tifai rawh," a ti thûm bul a, lapua a dah tel bawk a, a kal sawn leh ta nghâl a.



A nâ ka tih vàng chuan ka țhen sak sak a, a thîp vawng vawng mai. A vûng pah deuhin ka hria, ka mittui a tling kawl kawl hialin ka ring.



"Hei hi hnawih la, hei hian i tuam dâwn nia."



Ka bulah a lo ding reng tawh niin, a lo kal lai ka hre miah lo.



Ka tuam ve a, ka khûp kàwi lai a nih vàngin ka tuam thiam lo kher mai.



"Ka lo tuam ang; mahse, dek lo che chuan ka tuam thei lo maithei a nia."



A hriat lai leh hmuh lai chuan ka țhen duh hauh lo, ka insûm țàng țáng a ni. Ka thlan erawh a tla bat bat, ka thil hnawih kha a thîp ém asin.



"Kalna tùr bîk i neih loh chuan awm rih rawh, tumah an rawn kal lo ang, hlauh tùr a awm lo a nia."




*SAWISÈLBO NIH TUM LO LA, HMASÂWN ZÊL TUM ZÂWK RAWH*