☆SILVER ZUNGBUN☆ - 10 By Dingdi Pachuau

☆SILVER ZUNGBUN☆ - 10 By Dingdi Pachuau


***

Misuala min sual hnu ațang chuan rilru hrehawm rêng rêngin hun ka hmang țan ta a, a sawi ang takin police-ah ka report ngam teuh lo. Ka report chuan ka hmingchhia ang a, ka nu natna khuma mu mêk natna ka belhchhah ang a, police lamin U Rina an man ngam pawh ka ring hek lo. A chhan chu an chhûngkua hi an awmthei viau a, mi hmingțha chhûng an ni bawk. Thlahtute ațanga lo awmthei an ni a, sawrkârah pawh an tlatlum viau( hei hi ka pahrawn sawi ka hriat a ni.)



Kan in hi tlàn bosan ka châk thei khawp mai, ka nu hi awm lo se chuan ka tlân bo daih tawh ang. Ka chunga thil thleng chu ka nu ka hrilh thei si lo, ka nun hi a ipik ngawih ngawih. A châng leh tùr ei ka ngaihtuah a, inawhhlum thlengin; mahse, ka nu rilru tùr ka ngaihtuah a, bâkah, ka intihhlum  chuan vàn ram ka kai dâwn si lo, rilru hrehawm leh ipik ngawih ngawihin dârkâr minute tin ka hmang țhìn.



Zan tin deuhthaw a rawn kal a, ka pa nèn chuan zu an in țhìn niin ka hria. Dik tak chuan ka room-ah pawh ka mu ngam tawh lo, ka nu natna khuma mu mêk bula mut chu ka chuh ta tlat zel a, a tìrah ka pa pawhin min hnial lo; mahse, a hnuah erawh U Rina ka tlàn bosan theihna a ni tih a hre ta a ni ngei ang, amahin riah a chuh ta tlat a, ka tân hnial ngaihna a vâng ta.



Ka pa ber nèn an țan dun takah chuan hun remchâng a hmu leh thei ta a, ka saruak thlalâk kha a neih tlat avàng leh video nèn lam a neih vàngin chumi hmang chuan min vau ta ziah a; mahse, room ka kalh nghal ziah avàngin hun remchâng a hmu thei bîk lo.



Ka chanchin hi ka rin ngam tak hnêna hrilh vek ka châk thei lutuk. Ka rilru tâwt lutuk han paihthàwla sawi chhuah ve bawrh bawrh pawh ka châk, ka thâwl ve deuh huai ka ring țhìn; mahse,  țhian ka neih vete lah chu college an kal vek tawh a, kawm bîk pawh ka nei lo. Keimahin ka tuar ngawt ngawt a, ka taksain a tuar nasa a, ka chêr rawk rawk mai a ni.



Inah ka tawm tlawk tlawk, miin min hria ang tih ka hlau, dàwra ka kal ve lawk châng pawhin min en dàn a dik lo vek tawhin ka hria. Min en hrek hrek maiin ka hria a, engtin nge pâwn lamah hian Misuala hian min lo sawi ang ni? Awm rei pawh nuam ka ti lo, a hnu deuhah phei chuan dàwrah pawh ka kal ngai ta lo.



Ka nu bulah ka tâp chawt reng a, ka kalsan lo tluk a ni. A bulah chuan ka ipikna ka thup hrâm hrâm a, lan chhuahtîr loh tumin hlim hmel thei ang berin ka be țhìn. Ka nu dam țhat lai chuan kan in hi nuam ka tiin school kala hmun danga ka awm ve lai pawhin kan in hi ka ngai ngawih ngawih țhìn. Kan khua Champhaiah hian kan in awmna hi hmun țha pâwl a ni ve a, ka nu pu ațanga kan rochun a ni. Hmun țhain kan in pawh țha mah se hrehawm ti ngawih ngawihin hun ka hmang tawh a ni, mahni in mah ni se, thlâkhlelhna chhe té mah ka nei lo; mahse, ka nu dam chhûng chuan ka chhuahsan a rem si lo.



Misuala min sual ațanga thla thum leh a chanve hnuah ka nu chu a boral ta a, he in hi ka chhuahsan thei ta. Ka zalèn tawh alawm, ka rilru ka siam sauh sauh.



Inlêng neuh neuh awm chhûng chu tiin ka tlân bo lo ta rih, hun remchâng ka melh reng. A rûkin ka insiam sauh sauh a, min hriat chhuah erawh ka hlau viau.



Zan khat erawh ka pa hrawn chuan min man chhuak ta. Inlêngte sitting room-a an awm lai rengin ka room-ah chuan min hau hrepin a kâwnghrènin min hlap a. Ka thisen pawh a chhuak hial, a duhtâwka min sawisak hnuah chuan chhuakin pâwn lam ațangin kawng min kalh hnan ta nghal a. Ka tukverah bar a invuah vek avàngin ka tlân chhuak thei si lo.



Chut țang chuan min dìm lo sâwtin ka chungah a nunrâwng hle mai a. Bâkah, ka nu thih ațanga kâr hnih pawh tling țha lovah chuan hmeichhe dang a rawn hruai lût ta tlat, mi chuan an hre kher lo maithei. Ka nu kha ka khawngaih ngawih ngawih, a pasal hi hetiang hian a chê ang tih hre ta se, a rilru a na dâwn lutuk. Hre lova a boral ta kha a tihchi mah zâwk.



Misuala lahin min beisei reng bawk a, zu rim a nam huam reng a, min tulh luih a chîng bawk. A hnênah ka chhia leh țha hriatna țhat chhûng chuan ka intulût ngai dâwn lo tih ka hrilh a, chu chuan tithinrimin min hnek hrep ziah. Beer leh a thil in apiang min in luihtîr a tum ziah, a chhan chu damdawi a telh țhìn tih ka hria, ka in duh ngai lo.



Hetiang ém ém hian mihring hi a lo sual theih ang tih ka lo ngaihtuah phâk ngai lo. An harhfìm loh vàng a ni ang ka ti țhìn, mihring harhfîm kar, chhia leh țha hriatna hmang thei hi heti khawp hian an sual thei lo tawp ang.



Police-ah ka report ngam dâwn lo tih an hre ve reng àwm si a, eng vànga hetia min sawisa țhìn nge an nih ang tih leh min kalh khung leh tlat mai țhìnte hi a chhan ka hre lo. Sual hrim hrim vàng nge thil tum leh duh an nei zâwk ni ang?



Ni khat chu min hruai chhuak ta tlat. Engtin nge min tih dâwn ka hre lo, kal chhuak tùrin min hrilh a, ka duh lo nain chemte sei zeta min tin tâk avàngin ka kal lo thei lo. Engkim hi ka hlau tawh a, mihring pawh ka hlau tel tawh. Ka mit an tuam a, motor-ah min chuanpui a, khawi lam nge kan pan ka hre lo. Kan tlân rei phian chuan ka hria, dârkâr khat chuang chu kan tlânin ka ring.



In pakhatah kan awm. Ka mit an phelh hnuah chuan ka han hawi vêl a  engmah ka hre chhuak lo. Ka la kal ngai lohna a nih vàng a niang, min hruaitute pawh ka hmu thei lo, hmai an tuam vek.



Mi pathumin min awmpui. Tlai lam a ni a, chu inah chuan current hrui pawh a awm lo, thlâm a nih ka ring deuh ringawt. Hei hi ka tlàn chhuahna hmun remchâng ber a ni thei ang, fîmkhur taka ka bih chian a ngai ang.



Motor dang a rawn kal a, chaw leh ei tùr min rawn pe. Rawn kalte pawhin hmai an tuam vek avàngin tute nge an nih ka hre thei lo.



Zànah mu țha thei lo mah ila min vêngtute chuan engtin mah min khawih an tum lo, ka thla a muang chuang lo. Hengho lak ațanga ka tlàn chhuah hunah chauh ka thla a muang ve thei deuh ang.



A tûk chaw ei khamah chuan Misuala chu a rawn kal a, amah chauhin. Eitùr min rawn ken nual a, ka lâksak duh lo.  Damdawi a telh leh ka hlau a ni.



In ațanga min hruai chhuah chhan chu kan inah inhmuh khâwmna an neih dâwn vàng a ni àwm e. Chuta ka lang ve a nih chuan min sawisakna tam tak chu ka thup vek thei dâwn si lo va, zawhna a tam dâwn vàng a ni.



Engtik laiin nge a lo tih hman ka hre lo, ka tui in tùrah damdawi a lo telh leh hman! A duhtâwkin min pâwngsual leh ta a, ka zawi vek avàng leh ka aw takngial pawh a chhuah theih loh avàngin ka dang thei lo. Ka rilru a na lutuk a, ka mittui pawh a tla thei tawh lo.



Rilru chhe tak put hi ka duh ngai lo, ka nu min zirtîr ber țhin pawh a ni, mi chungah rilru chhia pu lo tùrin min hrilh fo; mahse, tunah hi chuan ka chunga an chêt dàn avàng hian ngaihdam ka duh lo, min tihhrehawmna zawng zawng hi rulh lêt vek ka duh.



A duhtâwk a ngah hnuah chuan," Ka ta i ni a, i ni reng ang. Min hnial mah la ka ta i ni tho. Tumahin nang ang hmeichhe thianghlim lo leh saruaka thlalâk nei hi an duh dâwn lo che. Chu vàngin, tlàn bo lam kha chu ngaihtuah lo la, tlân bo mah la ka rawn zawng chhuak tho ang che. Tumahin ka lak ațang hian an chhan thei bawk lo ang che," a ti a, khum ațanga thovin a thawmhnaw chu a ha ta mawlh mawlh a.



"I la awm rei rih deuh dâwn a, tlàn bo kha chu tum duh suh, i thlalâk ka neih hi hria la, i tlàn bo chuan ka release zeuh zeuh ang tih hria ang che, video phei hi chu.." a ti a, a sawi zawm duh lo va.



A chhuah dâwnah chuan," Damdawi hnawih chi ka dah hi lo hmang țangkai rawh, i taksaa ser leh hliam hnuhma tân khân a țha a nia, i thawmhnaw hák thlâk tùr pawh ka dah a nia," a ti leh a.



A lo kal ta rih lo ve. Damdawi a dah erawh chu a țha tih ka hriat avàngin ka inhnawih, ka taksaa ser leh kak hlek hlek chuan a ngeih khawp a, a hil duak duak mai.



Min hruai chhuah ațanga ni ngana chiah a ni a, zîngah phone-a an inbe rî ka hria, ka pa hrawn a rawn kal ve thung dâwn. Eng nge a rawn tih ang le? Thil țha ti tùr chuan a rawn kal ka ring miah lo.



Kan thlen țantirh ațanga tlàn chhuah dàn tùr melh ràn ka nih vàngin bathroom ka luh apiangin ventilation chu a derthâwng a ni tih ka hria. Ka luh apiangin ka sâwi ziah a, a hnuai lam a sàn deuh avàngin ka zuanthlâk ngam an ring lo pawh a ni maithei.



Inthiar pahin ka sâwi leh a, a tla thei deuhthaw. Ka lâwm lutuk chu ka thin a phu nasa lutuk ringawt! Heta țang hian ka tlân chhuak ang a, Misuala leh ka pa hrawn hmel hi hmuh tawh loh ka duh.



Ka pa hrawn rawn kal chuan min vêngtute chu a kal sawntîr tê tê a, chumi hnuah min man bet a, nui huah huah chungin ka chunga tih a duh ka rin phâk loh chu a ti ve ta. Ka kut phuar betin ka kaah puan a hnawh a, mangchhia pawha ka man duh loh chu ka chungah a thlentîr ta.



Ka rilru ka tipàukhauh tlat a, ka mittui pawh ka titla duh lo, ka mittui tla hi hmuh a phû ka ti lo. Rilru nona lam ka ngaihtuah duh lo lui tlat a, ka tlàn chhuah huna ka awm dan tùr, ka hlim dàn tùr chauh ka ngaihtuah.



A haw hnuah inbual ka duh chhuanlamin bathroom-ah ka lût a, min vêngtute pawh hian ka tlàn chhuah duh an ring lo a ni maithei, an fîmkhur lo sâwtin an inthlahdah sâwt tlat. Phone an play a, an zaipui vak vak. Keiin chu chu remchângah ka la a, an ngaihțhat nân ka insil thuak ringawt.



Ventilation chu thâwm dìm thei ang bera tichhiain ka țum thla a, ka rin aiin a lo sâng lehnghal. Kawng pawh awm lovah chuan ka tlân ta char char, chawlh ka duh lo, min man hlauha  ka chan tùr ka ngaihtuah a, chu chuan chakna min pe thar deuh sawt zél.


***


Ka sawi țha thei lo țhìn a, ka mittui a lo tla ve chhên bawk nèn, ani erawh chuan dawhthei takin a lo ngaithla a, a chângin ka hnung a lo chûl leh a, min thlamuan tum takin ka kut pawh a thlah hek lo.



"Chuan, ka tlàn bona lamah i motor kha ka hmu ta a, hmeichhe pakhat hnéna tlaivâr deuhthawa tlàn a ngaih thu i hrilh khân ka chuanna ngei tùr niin ka lo hria a, a chhan chu tlaivâr deuhthawa i tlàn chuan kan khua ațanga hla tak a ni dâwn tih ka hre tlat a ni, chu chu ka duhthusàm a ni si a," ka ti leh sap sap a.



A ngawi vang vang a, a hmel ka en loh avàngin a rilru puthmang ka hre thei mai lo.



"I tlân chhuak ngam chu i huaisen ka ti hle a ni," a ti ta sup a.



"Ka huaisen lo, police-ah pawh ka report ngam loh chu; mahse, ka â thei dâwn takngialin ka hria a..."



"Min zui haw rawh aw, heta nangmah chauha i awm hi ka remti lo a ni," a ti leh ta sup a.



Zui haw ta ringawt ila, a chhûngte leh miin engtin nge min ngaih ang?



"Engtin nge miin min ngaih ang?"



"Engah mah ngai suh, hlau thlabâr rêng rênga i awm hi ka duh lo," a ti leh a.



"Nichînah khân kawngka hi tu emawin a rawn kik a, ka hlauh ém avàngin ka hawng duh lo va."



"I thawmhnaw hâkthlâk siam la, kal ang."



Hlauthâwng rilru tho chuan ka insiam vat vat a, ka hmanhmawh kher mai. Ka pu hi awm lo ta se, engtin nge tunah pawh hian ka awm ang le?



Ka hman hnuah chuan kan chhuak a, a bul hnai tëah lo chuan kal pawh ka kal ngam lo. Min enthla an awm ka ring tlat mai a, ka rilru a nuam chuang lo.



Motor kan luh hnuah dâr zât ka hre ve chauh! Dâr 11:45pm. Ka rei leh, zàn a va rei tawh ve!



"Zàn a rei tawh hle mai, ka tibuai hle mai che, ka pu," ka ti chhuak sap a, ka inthlahrung hnuhnawh a ni.



"Min 'pu' tawh lo teh, 'Christopher' tiin emaw 'Lâna' tiin emaw min ko thei ang, Lalnunpuia ka nia," kan tlàn chhuah hnuah chuan a ti a.



"Ka koh hmasak dàn che a ni sia, bâkah, kei aiin i upa daih bawk sia, a inthlahrunawm e," ka lo ti thung a.



"Mi bulah phei chuan 'Ka pu' tiin min ko tawh miah suh, ka upat hmel lehzual tlat."



Tîm deuh hlek hian ka nuih a, ani pawh a hmel chang rùn mai kha paih bo deuhin a nui ve sul a, a lang naupang deuh sawtin ka hria.



"Ka hming min phuahsak hi kei chu ka sawisêl lo, a mawi ka ti. Ka hming dik tak Zonunmawii a ni na chungin," ka ti ve a.



"Hming mawi tak a nih chu."



"Ka lâwm e."



In kan thlen chuan an lo muhìl vek tawh a, ka room ngaiah chuan ka lût leh a, ani pawh chuan min rawn zui lût a.



"I muhìl thei ang em?"



"Tunah chuan ka thla a muang tawh alawm, ka lâwm e, ka pu," ka ti a.



"Ka pu..." a tih tâk supah chuan ka sawi sual ka hre chhuak chiah.



Nuam lo ti zeta nui chung hian," Ka tihpalh, ka lo theihnghilh leh hman tawh a," ka ti sap a.



"Âteite bula mut i duh em?"



"Aih, duh lo ve, ka hlau tawh lo."



Min en ràn rán hnuah chuan," Hmeichhiaah chuan Âtei, ka fanu leh nang chiah hi ka ring che u, hmeichhia ka rin lohna i tidanglam dâwrh a ni," a ti ta sup a.



Eng thil nge a tawn ve le?



"Hmeichhe rin tùr ka hmuh loh hnua ka rin leh hmasak ber i ni."



"Eng thil nge thleng a?"



A dàr chhìn ãkin," Hmeichhe rinawm lohzia ka hriat tawh vàng maw le," a ti sup a, chutah," Mu tawh rawh, engmah hlauh tùr a awm tawh lo tih hria la," a ti leh a.



"Aw le, i chungah hian ka lâwm tak meuh a ni, ka pu." Ka lei ka chhuah zawk, ka sawi sual tih ka hriat chhuah nghâl avàngin.



"A har viau em ni?"



"Har lo ve, ka lâwm e...Lân."



Hm, ka ti thei ta e.



A nui suk a, "A țha lo lêm lo ve," a ti a, inher vutin room ațang chuan a chhuak a, dìm zetin kawngkhàr chu a khâr nghâl a.



Tunah chuan ka thla a muang ta alawm. Ka in luahah kha chuan ka muhìl thei dáwn lo tih ka hre chiang, tunah erawh chuan min thlamuantu ka pu...Lâna bulah ka awm tawh e.



A bulah hian inthlahrung viau tùr ka ni zâwk si a; mahse, ka nêlin ka inthlahrung miah si lo, mak ka ti. Ka hmel hriat țhin leh ka chhûngte an ni miah si lo, mak ka ti. Ka nu hian ka tân liau liau min pêk a nih ka ring ta hial, ka manganzia hriain min chhanchhuak tùrin min pêk a niang.



Ka muhìl țan deuh tihah ka mumanga ka pahrawn hmel chiang zeta ka hmuh avàngin ka harh chiang kher mai. Ka lu ka chêt nawk nawk a, hmuh ka duh lo, ka mang nawn leh ang tih ka hlauh vàngin ka meng leh ta rih a.



Ka mutna room hi a him tâwk. Tumahin min rawn tibuai lo ang, tukverh zâwnah pawh an rawn lâwn thei lo, ka pute in awmna hi a lùn lutuk lo nain a him tâwkah ka ngai.



Dâr 2 vêlah ka țawngțai leh a, ka mu ve leh ta. Mangchhia pawhin min tibuai zawm ta bîk lo.



Zînga ka harh chuan ka awmna chu ka hre thiam lo lek lek mai. Ngun deuha ka ngaihtuah hnuah chauh ka hre chhuak, ka puin an inah min hruai haw tak e.



Eokm ațanga ka thawh chhuah chuan min lo hmuh veleh Princess-i chu a lo au râih a.



"Au No, i lo haw leh tawh elo? A va nuam tak! Ka ngai tawh che a," a lo ti lang lang a, min rawn hnaihin ka kutah a rawn chelh a.



"Âpain i lo haw tih a sawi a, ka ring miah lo asin."



Nui chung hian," Mahse, hei ka lo haw leh tawh sia, i ring tawh em?" tiin ka zâwt lêt a.



"Aw, in dangah chuan awm tawh miah suh aw."



"Aw le."



Ka pu chuan mi dangte chu thil awmzia tlângpui a lo hrilh tawh a niang, eng thil mah min zâwt lo va, dàn pângngaiin min be bawrh bawrh. Ka lêt leh chu an hlim thu an la sawi zui, Princess-i lah chuan min zui tlat.



Ka pu chhuak a lo haw hnuah chuan chaw kan ei a, chaw ei lai chuan ka pu chuan," Vawiinah dàwrah kal lo la, inah Âtei leh ka pate nèn lo awm ang che u," a ti a.



"Nia, dàwra kal kher a ngai lo, in ațang pawh hian hna a thawh theih tho a nia."



Ka chunga an țhatzia hi mak ka ti a, ka lâwm ém ém bawk. Kei engmah ni lo hi min khawngaih ém ém si a, mi dang aia țhatna ka neih loh tehlul nèn!



Inah tih tùr chu a vâng khawp mai. Âtei chuan cake ur dàn min zirpui a, Princess-i a lo tel ve zêl nèn, kan hnawk nuaih mai.



"Ei siam lam hi ka zei lo tak zet a ni."



"I zir ang a, i thiam vat ang, a har miah lo a nia. Pawlh tùr zât dik tak hriat leh hun hman dik hi a pawimawh ber chu a ni. Kan ti țhang ang a, i thiam vat ang," tiin min fuih sauh sauh a.



Ka thil siam chu a ei tlâk hlawl loh. Ani siam chu a dik thlap. A hnuah phei chuan Princess-i nèn chuan chhangphut hmang chuan eng rng emaw kan siam a, kan hlimpui phian. Nizàn lama ka chunga thil thleng theihnghilh țhakin ka nui.



Zànah ka pu chu ka room-ah lo lûtin ka pahrawn leh Misuala hming chu min zâwt a, a phone chu a khawih nauh nauh pah a.



A hnuah phone chu min hmuhin thlalâk min rawn hmuh a, ka pahrawn a lo ni. A thlalâk hmuh pawh hian ka thin a tirim.



"Kha kha tiraw?"



Chhan pawh chhâng lovin ka lu ka bu ringawt.



Phone chu la lêtin a khawih leh nauh nauh a, min rawn pe lehin thlalâk ka hmuh chuan ka thin a rim tù tú.



Misuala zet chuh! A hmelah tak chuan ham bawrh bawrh ka châk, thlalâkah chuan a la nui sâwng zui.



"Ka phone kha i paih chhe mai ang e, ka la hmang duh a nia."



Ka pe lêt ta vat.



"Naktûkah chuan dàwrah kal tawh rawh aw."



Makti zet hian ka en chho a, fiamthu a thawh emaw ka ti deuh a; mahse, a hmelah fiamthu hmel a lang lo.



"Hlau suh, anni hlau hian tlânchhe tawh lo la ka ti a ni. Hlau tùr chu an ni hi an ni zâwk si a."



"Min man leh daih chuan-"



"Teuh lo, chutiang chu an ti lo ang. Chutiang an ti a nih chuan an inchhîr lehzual khawp ang!"



Ka pu chu ka en ràn a, ka pu thu awih mai loh chu tih theih ka nei lo, him tâwkah a ngai tihna a ni mai. Bâkah, tuman min tilui thei tawh bîk lo ang, dàwr nghahpui ka nei a, min rawn vau mah se, an laka inpêk leh chu ka tum lo bur.



"A țha alawm."



"Hlauthâwng miah suh, ka enthla reng dâwn che alawm."



Ka thla a timuang suai suai.



"Ka lâwm e, ka p...Lân."



"Hlau tùr i ni lo, hlau tùr zâwk an ni tih hria la, an vau mai maia zâm lo tùrin i rilru tipaukhauh ang che."




*BEISEINA TIH AWMZIA HRE FIAH THEI TÙR CHUAN BEIDAWNNA KAN TAWH A NGAI ȚHÌN*