☆SILVER ZUNGBUN☆ - 13 By Dingdi Pachuau

☆SILVER ZUNGBUN☆ - 13 By Dingdi Pachuau



Ka pu lo haw hma chu ka rilru a nuam thei lo. Mi dang bula sawi ka duh lo va, Âteite chuan ka chanchin hre ve tawh tho mah se anni hrilh ringawt chu ka hreh si.



Min rawn phone hmasak ni lova va phone hmasak lah chu ka hreh si, rilru kam nei ûrhin a lo haw hma chu ka lo awm. A rûkin ka invêng nasa ém ém mai a, customer lo nuih der takngial pawh a harsa ka ti.



Zirtàwp zàna zanriah kan kîl laiin a lo thleng thut. Rin loh deuha a lo thleng hrâwk mai han hmuh chu a làwmawm duh tawp; mahse, a bawrchhawrin a lang pawr viau mai. A biang hmul kha a lo țo leh țan suar tawh a, a sam lah chu a kawi nuai bawk.



"Âpa..." A țhutna ațanga chhukin a pa chu a pan vat a, ani pawh chuan a lo pawm vat a.



"Thu i lo awih em?"



"Aw, Ànî pawhin min hau miah lo."



"I inbual phawt dâwn nge i lo kîl ve nghâl dâwn?" Âtei chuan a ti var a.



"Ka'n intleuh lawk ang e."



Kan kham hma chuan min rawn zawm hman tho. Princess-i leh a pu erawh an kham hman tawh.



"Thil thleng a awm em?" Min en chuang lo nain keimah min bia tih ka hre tho.



Za lo zeta nui lui sak chung hian," Awm hran lo ve," ka ti a, ka chhàn dàn vàng nge min rawn en ta chiah. Ka mit chu ka khup ta zàl zál, dâwt ka sawi tih a hre ngei ang.



"I kalna tùr i sawi si lo va, Aizâwlahte i va kal dâwrh dâwrh a ni maw?" Âtei chuan a lo ti ta hlauh a.



"Kal e."



"Nupui i va zawng te hi a ni lo maw?" tiin Âtei chu a nui hak hak a.



"Mi hmuh duh ka nei a, ka va hmu lawk maw le."



U Melo-i. A hmuh thu Âtei a rawn hrilh kha, ani pui roh hi, a va hmu tak tak a ni maw!



Ka kham hnuah chuan Âtei chuan," Melo-i i va hmu a ni maw?" a ti zauh a.



"Aw."



"In renew dâwn tihna em ni?"



"Thil hre chiang lovin sawi ringawt țhin teh suh."



Chaw ei khamah chuan TV bulah chuan kan țhu khâwm tal tal a, Nautei titi kan ngaithla a.



"Ka la inbual lo va, kan inbual ve lawk ang e," tiin ka tho va, khua a vawt ve țan tawh a, boruak a nuam țan ka ti, Champhai chu a vâwt leh tawh ngawt ang chu.



Ka inbual zawhah chuan khum bul dawhkàna ka phone dah chu ka la a, khuma țhu chunga khawihin news ka chhiar zar zar a, like pawh ka pe leh rih bawk a.



Mary leh Feli nèn whatsapp group kan siam a, chutah chuan kan nawi țhìn. Zanin pawh an pahnihin an lo nawi leh tawh khawp mai a, ka lût ve zawk a.



*In bengchheng lutuk!* ka ti ve a.



Mary - *Bengchheng lo sawi suh, zanin tlai khân tlangvâl chhe lo tâwkin kan inah chaw a rawn ei a, chhe lo bawn tawp a ni mai*



Feli - *Chhe leh ngawt ang* Feli hi chuan Mary han sawisèl hi a peih ve hrim hrim a, thinrim leh huat vàng ni lovin. An inngam lutuk vàng a ni zâwk, ka nui țhâ a.



Mary - *Hmu ve na la chuan, hahîpin i sawi leh ngei ang*



*Chu, in pa a dah nil hle elo?*



Mary - *Loh theih nâng, hmelah leh pianah chuan kan pa a tla vang vang; mahse, kan pa ka hmangaih daih zâwk*



Hmangaih hi an han sawi ve tak a, an tawngin an hre thiam em ni le? U Rina kha chu ka duh ve țhìn ngei mai; mahse, ka hmangaih lo a niang, ani pawhin min lo hmangaih  lo tawp tihna a ni a...



Feli - *En teh u, group pakhata pic an rawn forward hi ka rawn share ve ang che u, a hmel hi Novi a ang lek lekin ka hria*



Thlalâk a rawn dah chu a rawn lang nghal a, ka phone ka thlauh tawp mai.



Ka thlalâk dang an rawn release leh ta tak tak!!



Ka thâ a khùr zawih zawih a, ka thâwk a rang a, khumah țhu sa lo phei ila chuan ka tlu thei hialin ka ring.



Thâwk ka la hawk hawk a, nghet zetin ka kut ka hûm a, ngîl âtin ka țhu. An hnên ațanga ka tlàn bo avànga an phuba lâkna hian min va tihrehawm tak ém! Eng vanga hetia min um zui reng nge an nih? Police-ah ka report azeng pawh a ni lo va, an pawi ka sawi hek lo.



An duh ang anga awm tùr hi ka ni bîk em ni? An vauzàm tùr leh an thu hnuaia kûn tùr ka ni réng em? Ka saruak thlalâk an neih vàng ringawt hian min thuhnuai thei ta viau tihna em ni?



Ka nu ka ngai tak zet. Ka nu kha la dam se, hetiang hian ka awm ang em? Awm bîk lo ang, ka hrehawm kha a phal bîk lo asin. Heti tak maia ka dinhmun a chhe ta lutuk hi min hmu ve ta se, min khawngaih ngawt ang. Beiseina ka neih vànga tlân chhuak ka ni ve asin; tunah erawh chu beiseina êng chu a thim ta ruai ruai mai a nih hi.



"Eng thil nge-"



Mittui tling kuau chuan ka en chho a, min lo en rùn tawh. Ka mittui chu rang zetin ka hru zauh a; mahse, min hmu hman tawh tho.



"Thil thleng min hrilh rawh."



Zaidam leh min ngaihtuah tih hriat taka min be țhìn hian ka nu min ngaihtuah chhuahtîr ziah, ka malzia ka hre chhuak tel ziah bawk.



"Dàwrah tlangvâl pakhatin min rawn vau leh a, thlalâk an release leh tawh bawk."



Ka pu chu ka en ngam lo, thlalâk chu hmuh pawh ka ngam hek lo. Ka thlalâkah khán sîr zâwngin lang mah ila ka inhre chiang ém ém si a, miin an hmu țeuh tawh ang a, keimah ka ni tih an hre ngeiin ka ring.



Thih daih mai ka châk!



"An huaisàr hle mai."



"Ih, thih daih mai ka duh, miin-"



Ka hmui a rawn hup nghâl vat.  Ka mittui a far leh nghâl zâwih bawk.



"Khatiang thu kha sawi tawh miah suh."



A kut a lâk sawn veleh chuan," Min hre țhup tawh dâwn si a, ka țhiante hmel pawh ka hmu ngam tawh lo ang," ka ti zàwi raih a.



A ni lah tak a, Feli lah khân ang min tih thu a sawi nghe nghe kha. Mary leh LMa pawhin an hmu ve ngei tawh ang a, min chîk deuhtu chuan ka thlalâk ngei a ni tih an hre ngei ngei ang.



"An thil tih man hi an hmu dâwn khawp." Muangchângin min rawn kuah a. Ni e, min kuah a min thlamuantu ka mamawh tak zet, ka hma lam hun hi a thim mup tawh maiin ka hria.



Ka pu âwm nghènga awm nawmzia chu, min tithlamuang sawng sawng mai. A kut chuan min hnem tum takin ka hnung chu a chûl hliau hliau.



"Kan man chhuak ang. An thil tih man an hmu bawk ang."



Thlalâk kha a dang an la nei țeuh àwm si a, an release zêl a nih chuan miin min kâwk sup sup ngei ang, min en hrek hrek ang a, hnung lamah min sawi zui sep sep bawk ang a.



Ka thaw hawk a, chutih hunah phei chuan dam ka thlahlel lo lehzual ngei ang. Eng nge ka tih tùr? Ka lêt leh mai dâwn em niang? Hei hi kawng awmchhun a nih hmel.



"Ka pu, ka lêt leh mai dâwn em niang? Hei hi-"



Ka la sawi zawh hma chuan," Teuh lo! Khâng ramhuai pahnih hnênah khân engtikah mah i lêt dâwn lo, ngaihtuah pawh ngaihtuah chhin suh," a ti ta țhawt a.



"Mahse..."



"I lêt dâwn lo, engtikah mah ka phal thei ngai lo ang."



Ka ngawi ta reng.



Ka khabea dawmin amah en thei tùr chuan min kuai dâk a," Min en teh, beiseina nei tùrin ka duh che. I tân theihtâwp ka chhuah ang a, kha mite pahnih khan an thil tih man hmuin jail bang an zût ngei ang," a ti charh charh a.



"Keimah vànga i buai  hrep hi ka duh lo, buaina dang i ngah dâwn tehlul nèn!"



"Ka buaina i ni alawm."



A thil sawi chuan min țhâwng dat mai. Buaina. Ka pu buaina ka lo ni maw?!!



"A pawi ka ti-"



"Ka duh che, ka hmuh țantirh ațang khân ka duh tawh che."



Ka pu hian min duh maw?!!! Ka thil hriat hi eng nge ni ngai?



"Ka pu..."



"Aw, ka duh che. Ka duh che avàng hian min ngei ngawt thei lo ang."



A mit a khap lo va, a melh sawn hek lo. Ka pu hian ka rilru hah tihreh tumin a bei ve a niang.



"Ka pu...engati nge min duh?" Ka zâwt lo thei lo. Ka rilru lâkpèn a duh vàng a ni chiang alawm.



Min en chhuk rùn a," A chhan chu ka duh vàng che a ni. Hmeichhia ka rin leh hmasak ber i ni a-"



"Chu pawh ni se... engati nge min rin bîk?"



"Ka rin bîk chhan che chu...ka ring tawp che a ni."



A thil sawi chuan ka nuih a tiza, mittui tling pam chuan ka nuih a.



"I nui...han nui leh teh!"



"Ka pu, min hnem i tum a ni tiraw?"



"Tum e, ka duh bawk che, hlau thlabâra i awm hmuh hi ka duh lo." A rawn kûn hniam a, kan hnâr a insi lo chauh.



"Ka pu-"



"Min hlau em?"



Ka hlau miah lo. Misuala min sual hnu khân mipa tawh hlek pawh ka duh lo kha a ni a; mahse, ka pu hi chu, a dang ta daih. Ka hlau miah lo, ka taksa a deh pawh ka phal a nia! Min kuah hial a, ka thla a muangin nuam ka ti hle bawk a nih hi.



"Ka chungah i țha hle a, engtin nge ka hlauh theih ang che?"



"A țha, min hlau miah suh. Chuan, ka fâwp thei che ang em?"



Min fâwp ang maw? Ka pu hian min duh tak tak tihna em ni? Nula angin min en maw? Heti mai ka ni chung hian nula pângngai angin min en ve maw? Min khawngaih vàng a ni mai lo maw? Min hnem a duh kha. Bâkah, a ni lo ang, nula pângngai angin min en lo hrim hrim ang, a theih loh.



"Ka pu, min khawngaih vàngin hetia i awm kher hi a ngai lo."



"Zonunmawi, ka duh che. I hre thiam em? Mipain hmeichhia a duh ang hian ka duh che, min rin hma chu min rin theihna tùrin ka bei ang," ti nghutin ka hmuiah a rawn fâwp zawk a, rang zetin ka room ațang chuan a chhuak ta nghâl a.



Che lovin ka awm reng. Ka pu khân min fâwp a nia, ka hmui chu ka khawih ringawt a, ka pu hmui khân a rawn dek ngei a nih kha.



Min timuhìl thei lo zo vek. Ngaihtuah ka ngah lutuk, ka rilru a tihah. Ka thlalâk an release hre chhuak lo lêkin ka pu thil sawi chuan ngaihtuahna min sèntîr.



Awm dàn tùr min tihre lo. Min melh rùn reng mai a, tûkțhuan ei laite chuan țawng lovin a ei a, ka va melh lai hian min lo melh hman ziah, ka mit ka la rang lutuk. Dàwra ka kal tùr min thlah hun ka huphurh, sawi tùr a vâng dâwn si.



"Min 'pu' tawh suh ang che."



A țawng chhuak hmasa zâwkah a țang e.



"Thlâk thut a har alawm."



"'Ka pu' tia min koh leh chuan khawi lai hmunah pawh ni se, ka fâwp ang che."



Ka en nghal vat a, a nui miah lo. A fiamthu a nih ka ring a nia, a thutak  hmel viau lehnghal a.



"I ti tak tak hauh lo ang."



"Kan hria ang chu!"



Dàwr kawt kan thlen chuan ka chhuah rualin a rawn chhuak ve a, min rawn zui nghal bawk.



Dàwrah erawh min zui lût lo, dàwr chung restaurant-ah a chho tlang daih!



"Vawiin hi i va ngawichawi ve!"



A ni lah tak a, ka rilru ngaihtuahna ka kàwm kual a, suangtuahna ramah ka lo chêng leh dèl dél țhìn a lo ni.



"Thil ka ngaihtuah kual a."



"Nizànah lah group-ah khân i reh daih a."



"Nia...ka battery a low lutuk a." Dâwt ka va sawi ngun tawh tak!



"Thlalâk kha, sawi leh ta țhìn ila, kha nu kha ni ila chuan post-tu kha ka zawng chhuak ang a, jail-ah ka tàntîr var var ang," Mary chuan a ti a.



"Leh ringawt, ama duhthu pawh a lo ni thei asin," Feli chuan a lo ti thung a.



"Awihawm loh e. I saruak thlalâk social media-a post i duh em ni?" Mary chuan a lo ti leh a.



"Duh nâng."



"Chuti, ani pawhin a duh lo tawp ang. Tûnlaiah chuan dàn a țha tawh a, a post-tu hian a hmeichhe phalna lova a post a nih phei chuan, a case a rip thei reuh viau a nia," a ti leh bawrh bawrh a.



"Novi anna riau a nei zui."



Chhùn chawlh a lo hun chuan kan ei tùr chu Ka pu chuan min rawn pe thla a, Feli leh Mary an meng pâwng zâwrh zâwrh lo chauh.




*THÎKTHU CHHE NAZAWNG HI  HMANGAIHNA DIK TEHFUNG A NI KHER LO*



Group join duh tân


https://www.facebook.com/groups/389869478234571/