☆SILVER ZUNGBUN☆ - 3 By Dingdi Pachuau

☆SILVER ZUNGBUN☆ - 3 By Dingdi Pachuau



Mangchhia bawkin min tibuai leh a; mahse, ka țê chhuak lo hlauh thung. Ka harh chuan ka thlan a lo tla leh nasa mai a, ka mumang a ni chu ka lâwm tak zet, ka thaw huai huai mai.



Ka muhìl ngam tawh lo va, thim thamah chuan ka meng kar reng mai, ka tâl sek lo thei lo, ka khûpin min tur deuh et et reng avàng chuan ka inher rem reng mai.  Sana tal nei ila chuan dâr zât ka hre thei mahna.



Khawvàr dâwn hnaihah ka lo muhìl leh sek a, cooker phit rî-ah ka harh. Khua a lo êng uarh tawh a,hmanhmawh zetin ka tho a, khum tlângah ka khûp ka la tauh zui, ka țê țhawt.



"Engtizia nge?"



T-shirt lian zet hain kekawr  bùl lam a lo ha tawh a, a lang lian lehzual kher mai. Mutna pindan kawngkaah chuan a lo ding rùn a. He putar hi a tlangvàl țhat lai chuan a lian ngawt ang ka ring, tunah chuan kum 40-50 vêl a ni tawh ngei ang a.



 Harh chhuak thutin,"Engmah a ni lo," ka ti vat a, ka lo țê leh pek tih ka hre chhuak.



"Kha, i khûp kha a thî leh a nih kha."



Ka tauh vàng kha a nih chiah chu. Ka'n en a, a tuamna pâwn lamah chuan thisen tharlâm zet hian a rawn val chhuak leh kulh tawh.



"Ka tauh a."



"Kan chhuah hmain kan tuam țha dâwn nia."



Chaw ei khamah ka khûp chu min tuamsak a, a kut lian zet chu a thap tehlul nèn, a mi tawh a dam phian mai; mahse, ka lo țang țùn tho.



"Strawberry ka lo lawk ang, lo insiam la?"



Insiam tùr pawh ka nei lo, ka thawmhnaw hâk loh kekawr leh kawr chu ka thlep a, polythene-ah ka dah a.



Bowl lian deuh takah hian Strawberry chu a rawn keng lût a, dawhkàna dahin," I duh chuan sil la, ei rawh," a ti a, pindanah chuan a lût a.



Ka ei lo, ka ei châk reng; mahse, ka ei lo.



Rei vak lo hnuah motor-ah lûtin kan tlân chhuak ta a, metal road a ni lo va, a phut khawp mai. Fùrah chuan a diak ve thei ngawtin ka ring.



A ngawih reng avàng chuan," Dâr engtikah nge Lunglei chu kan thlen ang?" tiin ka zâwt a.



"Rei lo te hnuah."



Ke khân lo kal ta ila ka thleng har lutuk dâwn lo a nih chu. Ani lah khân a hlat thu leh ka kal thlen theih loh tùr thu kha min hrilh ve sia, tunah lah rei lo te hnuah Lunglei kan thlen tùr thu a sawi leh bawk sia, a thu sawi a inkalh tlat.



He putar hi ka kalsan hma leh ka tân a țha a ni mai. Pawisa pûk kha...



"Ka pu, khawngaihin, pawisa chu min pûktîr rawh aw?"



A ngawi vung vung phawt a, chutah," Min rùl leh ngei ang tih engtin nge ka hriat theih ang?" a rawn ti ta dût a.



Nia, kei in ațanga tlânbo hi rin chu ka har ngawt ang. Kan inhre țhìn pawh a ni lo va, bâkah, ka awm dàn hi a rinhlelhawm ve ém a, ka thiam lo miah lo.



"Ka zungbun hi i kawl dâwn nia."



Ka zungbun chu ka tuai rauh rauh a, ka nu min pêk a ni a, hei chiah hi ka nu hriatrengna tùr ka neihchhun a ni tawh. Rangkachak țhî min pêk lah kha kha mi sualpa khân min chhuh tawh, a hralh daih tawh ang.



"Eng atân nge ka tih ang?"



Pawisa chu nei ila chuan kawl pawh a kawl hauh lo ang, ka kut ațang hian a chhuak hek lo ang; mahse, tunah tak hi chuan pawisa ka neih theih hmasakna ber tùr chu ani hi a ni tlat.



"Hei chauh hi ka nu thil min pêk ka neih tawh a nih vàngin ka hlut hle asin, pawisa ka thawh chhuah veleh ka lo lam leh nghal ang," ka ti sep sep a.



"Eng zât nge i duh a?"



"Sâng nga a tâwk thei mai ang."



Thawmhnaw ka lei phawt ang. Ka thawmhnaw neihchhun nèn hi chuan ka lang mak dâwn si a, hna ka zawnnaah min la duh lo ang tih ka hlau.



"Hmelhriat thlenna tùr i neih loh hmel si a, min zui haw phawt dâwn nia."



A chhûngte'n engtin nge an lo ngaih ang le? Kei lah engmah neih nei lo ka ni si, engtin nge ka insawi fiah ang?



Kan tlân muang lêm lo bawk a, dârkâr hnih vêl a nih ka ring, Lunglei kan luh kha. Ka hmuh dàn tùra ka lo rin dàn nèn a inang lo kher mai, hmuh khawpui ka tum leh lutuk a niang, ka rin aiin a lo ho daih a.



Motor ațanga kan chhuah chuan ka ke chu a rawl țhûm mai. Ka kawr hâk chuan ka khûp chu a khuh loh chiah chiah avàngin ka khûp tuam chu a langsàr kher asin.



Polythene ka kawr ka dahna chu ka khai a, ani chuan motor hnunga basket khaiin garage chung chiaha building chhohna step-ah chuan a chho ta nghâl a, a pên a hlâwk bîk si a, ka khûp a lo na bawk nèn, step a lo ni kher bawk si a, ka umpha lo kher mai.



Kawngkhàr bulah erawh min lo nghâk. Nuam lo ka ti khawp a, in chhûng luh pawh ka hreh viau bawk.



Inah chuan putar sam vâr vo leh hmeichhe naupang kum 5 bàwr vêl sam buang thêng hi an lo awm a, TV an lo en a. Kan luh veleh chuan ka pu chuan," Hey, princess, Âpa ka lo thleng tawh a nia," a ti thûm dût a. Hmeichhe naupang chu rawn hawiin a țê riai riai a, rawn tlânin a rawn kuah chat a, ani lah chuan zo zet hian a pawm kâng lawp a.



"Âpa, eng nge min  lo hawn?" a ti phawt a, a biangah chuan a fawhsak chuk chuk phawt a, min hmuh tâkah chuan a zak ve deuh a niang, a pa phènah chuan a biru châih châih a, min rawn en leh dêk dêk a.



"Strawberry i duh deuh ang chi kha ka lo hawn che alawm," tiin dawhkanah chuan a nghat a, a basket khai pawh chu a nghat ve ta nghal a.



Fanu a lo nei reng a nih hi, a upat tawh hmel nèn, rin aiin fa a la nei tê tlat. A nupui hi khawiah nge a awm le?



"Christopher, hei khawi lam nula nge ni?" putar  chuan a lo ti a, a țawngka chhuak chu a tar lo phian.



'Ka pu' hi a hming Christopher-a maw lo ni?! A upa tawh roh sia, a hming chu, ka nuih a tiza lek lek. A țhalai hming ka ti.



"Novi a nih kha."



Ka hming min phuah ve leh ringawt mai! Novi. A chhiat vak loh chu.



Putar chuan min rawn chibai a, ngun zet hian min en pah a.



"Bawiha, in rawn inrù tihna em ni?"



"Ka pa!"



A pa a lo nih chu. An inang rêng a ni, an mitmeng leh an hmaithlâk a inang viau a, an aw pawh a inang. Putar erawh hi chu a lian vak lo, a vàntlâng vêl a ni.



Nui hak hak chung hian," Nula i rawn hruai ngai si lo va, Princess-i nu tùrah ka lo ngai mai asin," a ti chuar chuar a, a țawng a muang reih rawih si a, a thil tih rêng rêng pawh a duh uluk ngawtin ka ring.



"Țhu rawh, in ril a țâm em?"



Ka hnaih ber long chair-ah chuan inthlahrung ru zet hian ka țhu a, an in chhûng chu ka en kual a.



"Âpa, âpa i ang tawh lo e."



"Engati maw, Lal fanu?"



"Putar i ang, âpu i ang tawh."



Mipa pahnih chu an nui dùn hawk hawk a, kei pawh ka nuih a lo za viau nain ka nui lang lo.



"Lal fanu, âni ko teh le."



Dawhkàn ațang chuan a fanu chu a hlâng thla a, ani chu room lamah a tlân lût ta nghâl vat a.



Thingpui a siam laiin room ațang chuan a fanu leh nula sam buang lam deuh, lian vak lo hi an rawn chhuak a.



"A, i pa hi i pa a ang tawh lo tak tak a nih hi, Princess. Lalàpu aiin a tar daih záwk tiraw?" tiin nula chu a rawn nui har har a, min rawn hmuh chuan a nui hmel chu a tàwp deuh riai riai a.



"Mikhual kan nei elo?" a ti nghâl zat a.



"Aw, dàwrah khân hna thawk tùr kha in duh a ni lo'm ni? Hna a mamawh a."



"Aw le, aw le, Boss berin i tih tlat chuan," tiin a nui leh sâng a, min rawn  panin," Tu nge i hming le?" a rawn ti a.



Ka chhàn hma chuan," Novi a nih kha," a lo ti sup a.



"Âtei ka nia, ka u leh Princess-i leh ka pate nèn hian kan chéng a," tiin a titi nghal barh barh a, a țawng duh hmel siam siam ka ti. 'Ka pu' nau a nih dâwn hi, an inang lo hle mai.



"Àni, a khûp kha a thî a nia!"



Ka khûp chu an rawn en ta țhap mai. A lo thî leh deuh a nih hi, ka tauh àwm ka hre lo asin le.



"A nâ em, À-u?"



Nuih sakin," Na lo ve," ka lo ti sap a, min tilai lek lek mai.



An chhûngkaw nun dàn chu a nawm hmel reuh ka ti. Hmeichhe pahnih an țawng duh a, mipa pahnih erawh an țawng tam vak lo a nih hmel.



Mikhual room-ah min awmtîr a, a zau fahran lo nain bathroom a awm nghal vek a, a zia ka ti lutuk.



"Mamawh i neih chuan sawi hreh suh aw, nakinah i khûp kha kan tuam țha dâwn nia."



Âtei chhuah hnu chuan ka thil tawn chu ka ngaihtuah lêt vang vang a, ka vànneihna nasatzia ka ngaihtuah chhuak lo thei lo. Hauthâwng thlabâr taka ka awm hnuah ka beisei phâk hauh lohvin chhûngkaw dinhmun țha tak inah ka tlu lût a ni si a, ka nu silver zungbun min pêk chu ka tuai hauh hauh a.



Room kawngka a rawn ri dat dat a, phâwk fé hian ka en vat a, 'Ka pu' a lo ni a.



"Hei, pawisa chu aw," tiin chêng za nga note sàwm min pe a.



"Zungbun kha chu, ngai lo mai rawh se," a ti leh a.



"Ka lâwm e, ka chunga i țhatna zawng zawngah hian ka lâwm tak tak a ni, ka pu."



"Kei pawh le."



Zanriah ei laiin Princess-i leh Âtei chu an țawng zauh zauh a, mipa pahnih erawh an țawng miah lo, kei pawh min bia a nih loh chuan ka țawng bîk lo.



"Âpa, zànah i bulah ka mu ang aw?"



"Tehrêng mai, ka fanu."



Pafa inngai tak chu an nih dâwn hi. Pafa ve si-ah chuan an inang lo chu ka ti, hmeichhe naupang hi a hmelțha viau lo va, ngo ver lo phei se chuan a hmelțha vak bîk lo tawp ang; mahse, a fel hmel reuh, naupang thu âwih thei tak a nih pawh ka ring.



Chaw ei khama hmun kan tihfel hnu chuan Âtei chuan," Novi, inbual la, room-a cupboard-ah khân engkim i mamawh tùr a awm vek ang aw," a ti a, bu nghat pahin," Aw le, ka làwm e," ka ti sap a.



Cupboard-ah chuan towel thar leh mutnaa hâk tùr leh thawmhnaw hrang hrang a lo awm nual mai. A țhen chu a lian deuh a, a țhrn a tê leh deuh bawk a, size chi hrang hrang a lo awm nual. Chubâkah, kawrhnuai leh kekawrtê chenin, a thar a lo awm vek.



Boruak a lum avàngin tui vâwt chuan ka inphuhtîr seng seng a, ka sam pawh ka su țha leh. Nimin lama ka sûk  khân sahbawn pângngaiin ka su a, a fai sar lo tlat a ni.



Ka khûp chu dam vat vat se ka ti tak tak a ni. Hetiang chuan dàwrah pawh ka thawk thei nãng, a hun lo tak zet a ni.



Mutnaah chuan ka mu dar dar a, mu pah chuan thil ka ngaihtuah kual a, 'Ka pu' hian nupui a nei lo chu a ni phawt mai a, an ințhen nge an innei lo zâwk le? A eng zâwk zâwk pawh chu lo ni ta se, fahraha siam ringawt chu a fuh lo thlâwt. Nge ni a a boral tawh zâwk?



Chutah, kan in lam ka ngaihtuah leh a. Engtin tak tunah hian awm ve ang maw? Min rawn zawng reng tawh ang em? Ka awm lo tih an hriat chhuah huna an thinrim dàn tùrziate ka ngaihtuah a, ka pa (pa hrawn) leh kha mi sualpa kha, an thin chu a rim ngawt ang chu, min rawn zawn ngei pawh ka ring tlat. Ka theih ang anga ka intihdanglam a ngai ngei ang, hmuh thuaka hriat theih loh tùrin engtin nge ka insiam danglam ang le?



Ka tho thut a, bathroom dârthlalangah chuan ka inen vang vang a. Tuna ka sam sei angreng tak hi tan ila, chalsam nei bawk ila, ka dang deuh ngei ang.



Bakcheh ka zawng a, ka hmu mai lo. Naktûk lamah pawh a tan theih tho alawm le, Âtei pawh ka zâwt mai a niang chu.



Kawngka a rawn ri a, ka tho thuai a.



Ka pu leh Princess-i an lo ni a.



"Hei, mangțha che a duh a," a ti sup a, Princess-i chuan," À-u, mangțha aw, muttui," a ti sep a.



"Aw le, nang pawh mangțha muttui le."



"Naktûk lam chu bazâr tùrin i lo inring dâwn nia," a tih hnu chuan kawng chu an khâr leh ta a.



Eng bàzar chungchâng nge a sawi le? E, thawmhnaw ka lei a ngai ve ang chu, underwear pawh. Pheikhawk pawh, dàwra hna ka thawh dâwn phei chuan...



Um, hlawh ka neih chuan a pawisa ka pûk hi ka pe thei thuai dâwn, tihchi lutuk ringawt. Pathian ka lo dem viau țhìn kha ka inchhîr ta deuh, hrehawm tàwpah nawmna min siamsakin min hmuhtîr tho si a.



Ka chanchin min zâwt miah lova min chhawr duh dâwn maite hi mak ka ti deuh deuh. Min ring ngam hmiah mai tihna a ni a, anmahni hi mi rinawm tak an ni ngei ang, mi an rin ngam nghâl mai dànah.




*MI DANGTE CHANCHIN A ȚHA LO LAM I HRIATTE CHU AWIH NGHÂL ZÊL LOVIN A DIK NGEI EM TIH CHÎK ZÂWK ȚHÌN RAWH AW*



Group join duh tân

https://www.facebook.com/groups/389869478234571/


Lo join suau suau r'u aw...