☆SILVER ZUNGBUN☆ - 5 By Dingdu Pachuau

☆SILVER ZUNGBUN☆ - 5 By Dingdi Pachuau



Dàwr leh restaurant-a thawkte hi kan vaiin 10 kan ni. Thawmhnaw lamah 3, pheikhawk lamah 3 bawk, restaurant-ah 4. Eisiam hi a hran hlakin an awm bawk. An fel hlawm viauin ka hria, junior ber ni mah ila min en hrang chuang lo. An nun leh ka nun erawh a inang lo tak zet, anni chu chhûngkaw pângngai ațanga lo thawk an ni a, intodelh an duh vàng leh mimala hlawh neih an duh vàng a ni tlângpui. Kei nèn chuan inang lo tak an ni,  hlawh an lâk huna an lei tùrte an sawi leh siam siam țhìn a, ngaihthlâk hrehawm ka lo ti lek lek zâwk țhìn.



Âteite chhûng hi ka chunga an fel poh leh inthlahrun a nâ ka ti. Chutah, Ka pu pawisa ka la ba zui, tûn thla hi ral vat vat se ka ti, eng zât nge min pêk dâwn phei chu ka hre lo; mahse, Ka pu pawisa ka bat hi pêk ngei ka duh.



Ka theih ang chin chinah ka insûm a, ei leh inah phei chuan tihhautak loh chu ka thil tum ber a ni. Hmeichhe lam mamawh chu ka room-a cupboard-ah a awm vek a, ka tân chuan eng thil mah lei a ngai lo.



Âtei hian min hre thiam lutuk hi mak ka ti, ka chanchin min zâwt ngai lo va, hlim takin min be seuh seuh a, a châng chuan ka dinhmun hi a hre vek emaw ni chu aw ka ti hial.



Ka pu erawh inah ka hmu tam lo khawp. Tûkțhuan erawh a ei ziah a, zanriah lam erawh a rawn nang lo zauh zauh. Eng hna nge a thawh țhin ka hre lo, leiletah erawh a kal leh tawh rih lo tih ka hre thung. Khua lum si a, a sam leh a biang, khabe hmul chhur mai chu hnawk ka lo ti țhìn, engah nge maw a ngaih ni, a mêt duh hauh lo lehnghal.



"Novi, engtin nge Boss-te nèn hian in inhriat a?"



Ka thawhpuite zînga pakhat Feli chuan a rawn ti chhuak phawng a, a thil min zawh hi zawh àwm lo ni pawhin ka hre chuang lo.



"Boss u hi ka hriat hmasak zâwk tak chu a nia."



"U a nei elo?" Mary chuan a lo ti vat a.



"I la hre nange? Pà zet a nei alawm," Feli chuan a lo ti sap a, min mitmei zeuh bawk a.



"A ni maw? Hmuh a châkawm, a lo kal ve ngai lo a ni maw?"



"Ngai lo, pathlawi hausa leh  luck a nia, min duh se chuan ka pan ruak ruak ang."



An nui dùn awr awr a, min dàwrtu an rawn kal tâkah chuan an lo chiauau vat a, kei pawhin ka lo ngaihven nghâl a.



Chhùnah inchung ațangin ei tùr min rawn pe thla a, lâwmthu kan lo sawi tliar tliar a.



"Ka thawhna hi nuam ka ti teh a nia, chhùnah ei tùr min pe thlap a, kan hlawh lah a tam tho si, a hrehawm bawk si lo," Feli chuan a ti barh barh a. Mary erawh min rawn dàwr tum pakhat a lo chiauau avàngin a tho rih a.



"Nia, kan vànnei khawp mai," ka lo ti ve a.



"Helaia ka thawh hma hian dàwr dangah ka thawk tawh a, an duh khirhin dàwr kan nghâk rei thei lutuk a, chhùnah lah kan pawisain lunch kan lei a ngai a, chhûngte hnênah pawisa dìl ziah a ngai a, a inthlahrunawm tawp," a ti leh barh barh a.



"A nih tak chu."



Chhàn thui dàn tùr ka hre lo.



Mary rawn lêt chuan," Fel, pathlawi luck chungchâng kha sawi leh teh," a rawn ti nghal phar phar a.



"Awii, he nu râwpzia ém ém hi chu, keini ang experience nei lo lutuk chu e, khûtah kan awm."



"Pathlawi experience ngah tawh tak mai hi an zei a, ka duh chi a nia."



An thil sawi chuan ka nuih pawh an tiza mang miah lo, fiamthu mah ni se a râpawm ka ti mah mah.



"Novi, ka hmu ve châk sia, thla lo la ru teh, nangni chu in inhriat țhat tho chu. Nang chu ni tin i hmu thei bîk sia, ka thîk che e," Mary chuan a ti vang vang a.



Ka hmu zing bîk lo asin. Thlalâk chu, a va buaithlâk duh àwm ve aw.



"Aw le, ka lo tum ang e," ka ti ve ringawt a.



"Mipa chhe lo chu ka hmu ve châk alawm, Feli'n chhe lo a tih chuan a chhe lo dâwn tih ka hre sa bawk. Awi, ka hmu châk tawh," a ti vawr vawr a.



Feli lah chuan," Over chiang e. I hmuh hunah pawh lo duh ve miah suh, nang aiin a lêtin ka star hmasa tawh," nui chung hian a lo ti a.



"Pathlawi tih lêmah a senior miah lo a nia, kum 35 vél a niin ka ring, fanu pakhat a nei. Thil mak deuh chu nupui a neih àwm ka hre miah si lo va, fanu a nei tlat sia, mak ka ti tawp maw le," Feli chuan a ti lar lar a.



"A ni maw? Awi, a fanu nu chuan a va țhen phal ve maw le."



Feli hian thil a hriat hmel riau. Nia, Princess-i hian nu a nei miah lo, a chanchin tùr àwm pawh hi an sawi ngai miah lo. Ka pu nèn lah hian pafa ni ve si, an inang lo bawk si, a nu hian a pian hlimah a rawn pe tawp te hi a ni lo maw le? A mak àwm bawk si, ka hre lo. Ka hriat chian ber chu  a nu chî hi a chak hle a ni tih chauh hi.



"Novi, kan thu sawi hi chu engah mah lo ngai suh aw, kan duhthusàm leh rilru kan sawi mai mai a nih hi," Feli chuan a ti leh rih a.



"Haha, ngai lo ve, sawi bawrh bawrh rawh u."



Min dàwrtu tùrte an rawn kal tâk avàngin ka kalsan ta a, an thil sawi pawh ka hre thei ta lo.



Vawiin chu Âteite'n min rawn lam lo tlat. Princess-i birthday lawm an tum a, an inbuatsaih avàngin an hman lo. Kei pawhin birthday gift tùr ka lei ve nghe nghe, man to tak phei chu ka leisak thei lo.



Rickshaw kan nghah laiin ka phone a rawn rì a, number ringawt! Ka hlauthâwng thut a, chhàn pawh ka chhâng ngam lawk lo va.



"Novi?"



Ka pu a nih hi!



"Aw, ka pu?"



"Lo awm rawh, ka lo thleng țêp."



Min rawn lam dâwn maw? A va mak, a ngai lo asin, rickshaw ka la mai dâwn a.



"A ngai lo, ka pu-"



"Ka lo thleng a ni mai."



Țhiante chuan rickshaw an lo phar a, chanmari leh lunglàwn lam an nih vàngin an haw tlâng leh ta dial. Ka pute hi chu bazâr vêng an nih vàngin hawpui tùr ka nei ve lo. Mi dang lah chanmari, Ramthar, Rahsi vêng tih vêl an ni leh daih.



Țhiante an tlân liam chiah tihah dàwr kawtah Ka pu chu a rawn ding ve nghâl. A car chu Âtei khalh țhin kha a nih vàngin ka lo hre chat tawh a ni, ka chuang ngun ve tawh miau alawm.



"Lo kal rawh le."



Ka lût vat a, motor chhûng chu a èn loh avàngin a hmel pawh ka hmu thei chuang lo, chiang lo ruai chuan ka hmu thei ruau ruau.



"Ka lâwm e," ka ti sap a.



Motor chu tinungin a her pawp a, kan tlân lêt vat.



"I hah em?"



"Hah lo ve."



"I ril a țâm tawh em?"



"Aih..."



Kan ngawi leh vang vang a, a țawng tam lo ve bawk si a, kei lahin sawi tùr ka hre bîk bawk si lo. In kan thlena motor a tihdin thlengin kan țawng leh tawh lo.



Ka chhuk hmasa a, inah chuan ka chhohsan. Ka hnungah min rawn zui ve tho a, a pên zau bawk a, kawngka bulah min ûmpha tho.



TV room chu an lo chei niin, Princess-i chu a lo khêk chùl a, min hmuh veleh," Au No, a mawi i ti em? Ànî ka cheipui a," a lo ti lar lar a.



"I va fel ve! In chei mawi lutuk tlat."



Room lamah inthlâk tùrin ka lût nghâl a, ka hmai ka phih hnuah chuan ka chhuak ve chauh.



Chaw ei kan siam nghâl a, Princess-i erawh a țawng lar lar reng a, ka bulah awmin in an chei dàn ngawt chu min hrilh a.



"Lal fanu, duhtâwk la, i kut sil tawh rawh le."



Ka pu chu ka melh zauh a, ka meng phar ãwk mai!



A lo inmêt fai vek tawh niin! Țawng lo se, hmun dangah hmu ila chuan ka hai dâwn chiang. Nichin motor a khalh pawh khân ka lo hmu miah lo nia, a lo inmêt fai vek tawh ngei àwm si a.



"Âpa hian àpu a ang tawh miah lo asin, tunah chuan âpa a ni tawh tak tak."



Âtei chuan nui hak hak chung hian," Âpa hian hmuh țha a hmu a niang," tiin a lo fiam zauh a.



"Ànî, ka hmu ve duh."



An nui dar dar a, kei pawh ka nui ve suk suk. A lawmawm thei reuh a nia.



"Ka lal fanu birthday a ni tlat alawm. A tân pa hmelțha ber nih ka duh si a," Ka pu chuan a lo ti thûm chhak a.



"Âpa, i hmelțha ber."



A biangah a chuksak zauh a.



Zanriah kîl lai chuan Ka pu chu ka melh zauh a, hetiang ang hmel hi a put ka lo ring miah lo. Putar lam deuh leh upa deuh tawha ka lo ring kha ka tisual chhiava a ni, tunah tak hi chuan kum 30 bàwr vêl hmel a pu ka ti. Bâkah, a hmelchhe miah lo. Feli sawi kha a dik ngawt ang.



Âtei chuan," Lân, vawiin chu mi ngaihtuah chhuah thut ka nei a," a ti sap a.



Âtei chu a rawn melh a, Ka pu hi chuan a mit hi a chêt nasa. A lu hi a chêt ve vak ngai lo, che lo hian a melh kual a; mahse, engkim hi a hmu thei vek tho si. A lu chêt miah lo hian a duh chu a hmu kim vek ni maiin ka hria.



"Kha, Zàrkawta mi kha."



"Duhtâwk teh."



"Ka ngaihtuah chhuak mai mai a nia, lo innei ta ula tih ka ngaihtuah a," Âtei chuan a ti leh a.



"Tu ka nei nual tawhin ka ring," pu ber pawh chuan a lo ti ve a.



"Hei Princess-i a awm reng alawm," tiin Princess-i chu duat tih hriat zet hian a en a, nu a neih loh vàng, nu bula a awm loh vàng hian a duat leh zual a nih ka ring.



"Nia; mahse, ani pawh hian unau a mamawh ve tho a ni."



Birthday làwm tùr chuan an rawn kal nual a; mahse, an lo inbuatsaih nasa bawk a niang, a fel thlarh mai. Proncess-i chuan a birthday kawr mawi zet a ha a, a nui sâng reng mai. Naupang sàwm vêl zet awmkhâwm chu an rîk luai luai ka ring a nia, a ni miah lo. An bengchheng hran miah lo nia, birthday hlate chu an sa țhap țhap reuh a, an cute hlawm tawp.



Birthday present chu an pe sap sap a, kei pawhin ka pe ve nghal. A dawng tam reuh khawp mai, ka têt lai min tihre chhuak vang vang.



Thla kan la chuai chuai  reng a, ka phone pawhin ka la ve nual. Mary thil min chah kha ka hre chhuak zawk a, Ka pu pawh chu a thla ka hmehsak ve, Felite chuan mak an ti ngawt ang chu, an duh ngawt ang.



Hun kan hmang rei lo, a chhan chu naupang tê tê an ni si a.



An haw hnuah chuan in chu kan tifel a, Princess-i lah chuan a thil dawn chu hawn a lo châk nasa tawh mai a, a nî chu a tur chhên a.



Zàn mutnaah chuan phone chu ka khàl nauh nauh a, naktûkah Mary chu thlalâkho  hi ka entîr ang, Feli chuan a lo duh hlawm khawp ang.



Thlalâk chu ka thlîr vang vang a, Ka pu hian pu ber tlangvàl lai a chhùn ngawtin ka ring, pafa an ni hliah hliah a, hmelchhe lo tak an ni. Ka pu hi tlangvâl hmelțha tak a nih ka lo ring bîk miah lo; mahse, tunah chuan a inmêt fai ta bawk a, a hmel a lang chiang tawh a, a chhiat lohzia an sawi pawh kha àwm ka ti ve ta.



Mipa hmelțha ka ngaihtuah khât ta hle mai! Kha mi sualpa vàng vek kha, kan inngaihzàwn khân mipa dang ka biak hlek pawh kha a phal lo va, a thîk țhìn. Kei lah khan khatiang kha ka lo làwm ve tumhrang, min duh tak zet zet niah ka lo ngai a nia, ka va mâwl tak, mâwl min ti ngawt ang.





*HMUSITTUTE ȚHUTPHAHAH I LO ȚHU VE NGAI EM? NGUN TAKIN INNGAIHTUAH TEH*