☆SILVER ZUNGBUN☆ - 6 By Dingdi Pachuau

☆SILVER ZUNGBUN☆ - 6 By Dingdi Pachuau




"I hnathawhna chu hrehawm i ti em?"



"Ti lo ve, a nuam lutuk." Ka puin hetiang zawhna min zâwt hi mak ka ti, ka lâwm phian. He khawvêlah hian min ngaihsaktu, a der tal pawha min lo ngaihsaktu an awm hi nuam ka ti alawm. Ka nu min hmangaihtu ka chân tawh a, Ka pute chhûngin min ngaihsak tih ka hriat hian lâwm lo thei ka ni lo.



"Țhiante i nei tawh em?"



"Aw, thawhpuite an fel a."



"A țhat chu. Vawiin chu Âtei a hman dâwn lo va, keiman ka thlah ang che."



Phâwk zet hian ka en a, Ka pu hian min thlah chuan țhiante'n min lo fiam nasa ngawt ang.



"Ka pu, a ngai lo, rickshaw ka châng mai ang," tiin ka hnial ve a.



"I hman tawh chuan kal ila?"



Hm, ka thu sawi ve mai mai chuan a engah mah a thawk lo chiang.



Kan tlàn lai chuan," Mamawh i neih chuan sawi hreh lo la," a ti sup a, ka en zawk a, min lo en ve chiah a, ka hawi lêt rang kher mai.



"Hmeichhia chuan mamawh in ngah țhìn tih ka hre ve tho a nia."



Za vak lo chuan ka nui a," Ka pu, U Âtei'n engkim ka mamawh chu min pe vek alawm," ka ti sap a.



"Um, a țha. Hlawh a pe țha che em?"



"Aw, ka pu."



"In dan lamte i lo ngaihtuah ngawt ang e, hmeichhia mahni chauha in luah hi a him lo a nia."



"Ka pu, ka inkhâwl ve deuh hunah ka lo rilrûk asin, ka awm reng thei lo ang, ka tibuai rei tawh lutuk che u," ka lo ti ve thung a.



"Engati nge? A nuam lo i ti a ni maw?"



"Aih, ni lo, a nuam lutuk."



"Chuti si?"



Min hnial loh dàn tùr ber nia ka rin dànin," Mahnia ka awm chuan ka rilru a puitling hma ber dâwn a," ka ti ve ta ringawt a.



A ngawi vung vung a, a lung a awi lo ang tih ka hlau tawp. A chhan chu amah vàng chauha tûn dinhmuna ding thei hi ka ni si a.



Hlauthâwng ru deuh tak chuan ka melh zauh zauh a, ani erawh chuan min melh hauh lo. Kawng chauh chu a en ding ngar a.



"Khatiang hmel pu chung khân min en tawh suh," a ti sup phawt a, chutah," Pheikhawk number eng zât nge i bun?" a ti ta daih mai a.



A thil sawi intu lo lutuk avàng chuan makti zet hian ka en ve thung a, eng atân nge ka pheikhawk bun zât min zawh ni? Ka hre thiam lo.



"Sawi mai la."



Ka hrilh ve mai. A rûk tak chuan ka nuih a za deuh, lehkha thiam tak a nih ka ring sa a; mahse, a thil sawi inkahpah lutuk hi a mak!



Kan thleng a, làwmthu sawiin ka chhuk a. Tlân lêt leh mai tùra ka rin tehlul nen, a park țha a, a rawn chhuak ve ta mai.



Ka hnungah a lo lût ve niin, Feli chu a awm dàn a lo dik lo. Lài zet hian a lo welcome a, ka en lêt a, ka hmu ve chiah.



"A nawm loh hran loh hi."



Dàwr chungchâng chu a sawina a nih ka ring. Thawmhnaw khai dul chu a en kual a, Feli lah chuan min rawn signal zawk zawk a, Mary pawhin a lo hre thiam ve chiang, a lo meng phâwk nasa.



Kawr pakhat mawi zet mai chu a lâktîr a, hmeichhe kawr lehnghal. Eng atân nge maw a tih ni? Hm, a bialnu a pe dâwn a niang.



Pawisa pawh a pe ve thlap, Feli chuan làwmthu a hrilh a, lo kal leh țhìn tùrin a sâwm nghâl a. A chhuak chiah tihah chuan Feli chuan țê ruai chung hian," Chhiat lohzia kha! Awi, ka thiin ka hria, min han dek teh u," a ti chûl a, Mary chuan a va chelh vat a, kei erawh ka lo nui mai mai thung.



"A 'man' tawp a nih kha, mipa dik tak."



Mary chuan Feli chu thlahin a va en zui leh rih a, rawn hawiin dàwr lam chu a kâwk zawk zawk a, dàwr pakhat zâwkah chuan a lût leh tihna a ni ngei ang.



Feli pawh chu Mary dunna bulah chuan a va phei ve nghal a, an bih dùn reng a.



An va ho dùn tak!



"En teh u, pheikhawk nalh hmel zet a lei leh a nia. Awi, min pe ta se, ka thi thei tak takin ka ring," Feli chuan a âwm dawm vang vang pah chuan a ti a.



"A bialnu a pe dâwn a niang, birthday gift-ah pawh a ni maithei a," Mary chuan a lo ti ve thung a.



"Min mutpui tum ta se, ka hnial miah lo ang."



"Râpthlâk e a!"



"Eng nge, ka duh a ni ve mai. A hmeichhia zâwk hian sual hial mai pawh ka nuam e."



An nui dùn awr awr a, kei erawh an thil sawiin min nghawng hle a ni tih lantîr loh hrâm tumin ka kal sawn deuh. 'Sual'. He țawngkam hi ka hua, hriat nawn leh pawh hi ka duh miah lo asin.



Min dàwrtute rawn kal loh laiin bialpa chungchâng sawiin an titi  țhìn a, kei pawh bialpa ka neih leh neih lohte min zâwt a, ka neih loh thuin ka lo chhâng mai a.



Mary chuan," Nuam ve alawm, tlêmin han kái deuh hlek se," a ti sar sar a, Feli thung chuan," Amah ringawtin a kài chuan a nuam lo, tlêm khulh ve tho ila, boruak ngam dùn tâwk vêlin, boruak a hot duh bîk," a lo ti vat a.



"Kei chu ka in ve thei lo, tlêm tè pawh, ka luak a ni nghâl zêl," Mary chuan a ti leh a.



"A țan tìrah chuan a ni duh. Ka in tam lo nain a nuam ka ti, țhianho kan inhmuh khâwm hian mipaho hian min leisak țhìn a; mahse, nâwi deuh bula awm chu a hahthlâk ka ti," Feli chuan a ti leh barh barh a.



Ngawi rengin an titi chu ka lo ngaithla a, râpthlâk ka ti hran lo. An nun dàn a nia, lo inrawlh ve ka tum lo. Nu leh pa leh chhûngkua la nei ve ve an ni a, kei fahrah, chhûngte pawh nei tawh lo hian an chungchâng lo judge viau ka duh lo, an insawi ang pawh hi an lo ni lo thei tho.



"Novi, nang beer i in tawh țhìn em?"



"In lo ve."



U Rina khân vawi khat chu ka duh lo chung min in luihtîr tawh, chutah damdawi a lo telh zui. Ka chàuin ka zawi vek a, ka rilru erawh a harh vek. A duhtâwkin min ching let a nih kha, mittui tla zawih zawihin, che thei lo leh țawng chhuak thei lovin min khawih ang ang khân ka awm a nih kha.



"In ve chhin tùr alawm, thil reng reng hi chu tihchhin ve zêl tùr asin," Feli chuan a lo ti leh a.



"Tihchhin loh hi a him ber zâwk alawm," nui deuh chung hian ka lo ti thung a.



"Tihchhin pawp pawp zêl hi ka duh mai asin. He khawvêla vawi khat dam ve manah, a ngawl vei erawh tum lo thung ila," Feli chuan a lo ti leh a.



"Kei chu ka hlau."



Thawmhnaw en an rawn kal tâk avàngin kan titi zawm thei ta rih lo. Feli thil sawi erawh ka ngaihtuah zawm zêl a.



Ei tùr kan ei laiin Mary chuan," Thil ka lo zâwt lawk che u aw, tuna ka bialpa hian mutpuiah min sâwm ziah a, ka duh lo ziah. A chhan chu a bialnu hluite ka hriathho rêng rêng hian a zei an ti zêl a, a ngawl ka vei ang tih ka hlau a, vawi khatin vawi hnih a hring ang a, min mutpui a tum thla zen ang tih ka hlau a," a ti sap sap a.



"I ti țha hle mai."



"Mutpui miah suh, a duh tak tak che chuan khawih chhiat che a phal lo tawp ang," ka lo ti ve a.



"Nia, bâkah kan la naupang a, naupang lutuka sex hman chu ka duh chiah lo va, ka pasal tùr a ni àwm bawk si lo va, bâkah, min hmuhsit phah nân a hmang zui daih thei a," a ti leh a.



Feli chuan," A dik alawm, ka'n inpuang mai mai ang e. Kei chu tuna ka bialpa nèn hian kan mu dùn tam tawh. Min hmuhsit phah nân a hmang lo va, kan inpawhin kan inhnaih phah viau zâwk; mahse, nupa nih hmaa sex hman hi chu ka support chuang lo, Bible pawhin a phal loh kha," a lo ti a.



"Chu, Bible phal loh tih hre reng chungin in ti tho sia?" Mary chuan a lo ti vat a.



"Nia, fianrial kan nei thei lutuk alawm maw le, mi dang awm ve lohnaa pahnih chauha awm hi chuan a lo harsa a niang, hmeichhia ve ve kan ni bawk si lo va," nui uar uar chung chuan a lo ti leh a.



A ngai holam ve bawk sia, a inzêp hran lo bawk nèn, nuih chu a tiza angreng.



Tlaiah chuan Âtei leh Princess-i chuan min rawn lam ta thung a. Car-a ka țhut luh veleh chuan Princess-i chuan," Au No, nizàna ka birthday cake ang kha ka ziak thiam asin," a lo ti vat a.



"A ni maw? Ka va hmu ve châk."



"In kan thlen hunah ka ziak ang, mawi i ti ve viau ang, Ànî pawhin mawi a ti a, Àpu pawhin, Âpa erawh chuan a la hmu ve lo va," a ti leh a.



"Âpa lo haw hunah i hmuh ve dâwn nia, i ziah chu ka hmu châk tawh e."



"Kan naute hi chuan thiam loh pawh a nei lo, Âpa hmai hmul lem pawh a ziak thiam, Àpu tiang hawl lai pawh," Âtei chuan a lo ti ve a.



"Awi, i va thiam, ka hmu ve vek duh a nia, min hmuhtîr phal ve ang em?"



"Aw, ka entîr vek ang che, i khuma țhu chungin ka ziak thei ang em?"



"Tehrêng mai."



In kan thlen veleh chuan a room-ah a lût nghâl a, writing board, pencil leh paper a rawn keng chhuak a, ka bânah pawtin ka room-ah chuan min luhpui ta a.



"I inthlâk chhûngin ka lo ziak ang aw," khuma lâwn kaiin a ti a.



"Aw le, princess."



Ka inthlâk thuai thuai a, ka zawh hnuah chuan a bulah, khumah chuan ka țhu ve nghâl a.



"Ih...lo la en rih lo la."



"Ngati maw?"



"Ka ziah zawh hunah chauh en ka phal."



"Aw le."



A ziah chhûng chuan ka room chhûng chu ka en kual a, room kil tàwpa parcel lo inhûng chu ka hmu ve chiah. Eng tak ni ang maw? Âtei hian eng emaw a lo dah lût a ni ngei ang.



Va hawna en kher pawh ka tum chuang lo, an in a nia, an thil dah lo en zêl tùr pawh ka ni lo, mahni thil ni lo khawih chiam hi a țûl ber lo, thil mawi pawh va ni hek suh.



"Le, i en thei tawh e."



Naupang kum 6 mi ziakah chuan a àwm ang viau mai ka ti.



"A mawi tawp, i va ziak thiam ve a! Min zirtîr ve rawh aw, ka thiam ve châk a nia," ka ti chûl a.



"Aw le, Âpa hmai hmul lem pawh ka'n ziak leh ang e aw."



"Aw le." Ka nui lo thei lo, a pa hmai hmul lem chu engtin nge a ziah ang tih chu ka ngaihtuah a, a nuihzatthlâk ngawt ang chu.



"Hei, âpa hmai hmul chu."



Pencil chuan paper vâr thianghlim zetah chuan a lo thai kual nuai nuai niin, awmze nei lêk lo hian a thai râng kual si a,  ka nuihpui vak vak a.



"I va thiam ém ém! Âpa hmai hmul chu a va buk țha tak!"



Kawngka a rawn rì a, Ka pu lo niin. T-shirt dum nghâwng V leh kekawrbùl sen a lo ha tawh, a lang lian lehpek khawp mai. Feli leh Mary chuan hmu se chuan...



"Hey, lal fanu, in va hlim àwm ve a? Ka lo lût thei ang em?" a ti thûm dût a.



"Aw, lo kal rawh, birthday cake lem ka ziak a."



"A ni maw? Min entîr phal ve ang tiraw? Ka en châk teh a nia."



"Aw, hei hi a nih hi," tiin a birthday cake lem ziah chu a hmuhtîr ta a.



"Ka fanu ziah thiamzia hi aw...i cake siam hi ka ei mai dâwn."



"Âpa, a ei theih loh. Dàwrah chauh an zuar țhin alawm."



"E, a ei theih emaw ka ti asin, cake aiah i biang hi ka seh mai ang," tiin a biangah chuan a fawhsak a.



"Eng lem nge a ziah leh kha?" ka lo ti a.



"Âpa, i hmai hmul lem ka ziak bawk asin."



Ani chu a nui hawk a," Ka hmai hmul lem maw!?" tiin a fanu paper chu a en sak a, a nui ta hawk hawk a.



"I va ziak thiam tak em! Ka lal fanu hi ka va chhuang tak ém!"



"Âpa, lehkha dang ka'n la lawk ang aw, Àpu tiang hawl lem pawh ka thiam a," tiin khum ațangin a tho tharh a, a chhuak ta nghâl a.



A chhuah hnuah chuan a reh ta raih mai. Biak mai dàn tùr ka hre lo.



"Saw saw i en tawh em?" tiin ka room kil tàwpa parcel chu a kâwk a.



"Aih."



"Hawng la, en rawh, i tâ tùr a nih saw."



"Eng thil maw?"



"I hriat duh chuan..." tiin khum bul ațang chuan a kal sawn a, kawngka bulah chuan dingin," I inhmeh tùra ka rin a nia, i duh loh chuan sawi hreh chuang lo la," tiin kawngkhàr chu a hawng a,a chhuak ta nghâl a.



Makti deuh hian ka awm ngaiin ka la awmreng a, Ka pu hian thil min lei tihna a ni maw? Ka rei leh! Eng thil tak ni ang maw? Ka hmu châk tù tú mai.



Pheikhawk , inchi nga vêl zeta sâng a ni a, a dum vek lo deuh, a vârin tlêm tê a țial deuh a, mawi tak a ni, a to ngawt ang chu.



Ka inthawlh chhin a, ka tâwk chiah lehnghal! Engtin nge ka bun tâwk a hriat ni? E, vawiin khân car-a kan chuan laiin min zawh tak kha. Sunday-a ka inkhâwm hian pheikhawk bun tùr ka neih lohzia a lo hria a ni chiang. Ka lei ve mai dâwn alawm le, leisak ka ngai lo asin.



Thil dang a lo la awm cheu. Ka han phawrh leh a, kawr a ni. Hei chuh, vawiina dàwra a lei kha a nih hi, 'a bialnu tân a niang' tì khân Mary-te khân an sawi tak kha. Ka tân min lo leisak a ni reng si a, a va làwmawmin a va zahthlâk tho si ém! Mahse, hetiang thil man to lutuk chu ka ha chhuakin ka bun chhuak ngam dâwn em ni? Ka hlawh nèn a inphû lo. Bâkah, mi awmpui mai mai ka ni lehnghal.



Zanriah ei khama room-a ka awm laiin a lo lût leh a.



"I duhzâwng a ni em?"



"Aw, a mawi dùn lutuk."



"A țha."



"Mahse, ka pu, hetiang thil man to-"



"Inbel ve zauh zauh hi a țha a nia, rilru nawm loh nân hmang miah suh."



"Ka lâwm lutuk a; mahse, ka pu-"



Min rawn hnaih ruakin ka bânah a rawn chelh nghâl a, hlauthâwng zet hian ka lo tawm chãwih a, en pawh ka lo en ngam lo.



"Ka tihpalh," ti supin ka bân chu a thlah ta riai riai a," Ka tihpalh tak tak," a ti leh a.



Ngawi rengin thâwm dìm zetin a chhuak ta daih, makti zetin a chhuahna lam chu ka en reng. Ka tihrilhhai nge min tihrilhhai ka hre thiam lo.



He thil thlen hnu ațang hian kan inbe khât ta khawp. A țawng tam lo tih ka hria, kei lahin biak ka tum hranpa lo. Tûkțhuan kîl lai hi kan inhmuh remchàn hun lai a ni a; mahse, biak chu sawi loh, melh pawh min melh ngai lo, a inthiam lo nge ni a a thinrim zâwk ni ang? Ka awm a tinuam lo tulh tulh mai.



Zan khat erawh ka muhìl thei lo lehpek a, Ka puin min biak duh loh tlat chhan chu ka ngaihtuah lo thei lo a ni, a thil min lei ka lo hnial tlat vang kha em ni? Mahse, ka hnial nain pêk lêt pawh ka tum chuan loh kha. Ka ngaihtuah tam poh leh ka hrethiam lo tulh tulh.



A lo haw hun ka châng ràn, biak ngei ka duh. Heti hrim chuan an ina awm pawh ka inthlahrun phah vek a, chhuah mai duhna rilru ka pu hial tawh tlat a ni.



Kawngka rî ka lo châng reng. Dâr sawm pakhat a ni a, a lo haw țêp tawh ang chu, ka biak ngei a ngai a ni.



Hm, a rawn haw ta. Kawngka rî-ah chuan ka tho vat a, thâwm dìm takin room ațang chuan ka chhuak a, room ațanga ka chhuak chu min lo hmu reng niin.



"Mangchhia i mang leh tawh a ni maw?" a lo ti sup a.



"Aih."



"Chuti si, zàn a rei tawh, mu rawh."



"Ka pu..." tiin ka chàwl leh rih a, chutah, intihuaisenin," Ka chungah i thinrim em ni?" ka ti chhuak thei ta hrâm a.



Ngun zetin min rawn en ta rùn a.



"Engin nge chutiang rilru puttîr che a?" a ti ta sup a.



"Ka pu, min be ngai si lo va. Thil min leisak ka hnial vàng che kha a ni em? Ka pu, ka lâwm lutuk asin. E, làwmthu pawh ka la hrilh mumal lo che, i thil min leisak vàng khân ka lâwm tak zet e.  Ka pawisa chuan ka lei thei har viau ang tih ka hria a nia."



A meng sawr sawr phawt a, chutah, chiang kêk kâwk hian," Ka thin a rim rêng rêng lo. Ka tawh i hlau tih hre reng chunga i bân ka rawn vuan kha ka inthiam lo a ni, i hlauthawng ém ém si a," a ti chhuak ta charh charh a.



Chuvàng chu maw lo ni?!!!



"Thil eng emaw tak chu i chungah a thleng tih ka hria alawm, rilru hlim takin awm tawh rawh. I chungah ka thin a rim lo tih hria la, i mamawh sawi hreh lo bawk ang che. Mu tawh rawh."



"Aw le, ka pu, ka lâwm e. Mangțha le."



"Muttui le."



Tunah chuan ka chungah a thinrim lo tih ka hre ta bawk a, rilru nuam lo takin ka awm tawh lo ang.



Ka chunga thil eng emaw thleng  chu engtin nge a hriat theih le? Ka pu hi mi fing tak chu a ni, engtikah emaw chuan ka chunga thil thleng zawng zawng hi tu emaw ka rinngam tak leh ka nèl tak chu ka la hrilh vek ngei ang.




*HLAWHTLINNA HLUTZIA HRIAT CHIAN THEIHNA BER CHU  HLAWHCHHAMNA AȚANGIN A NI. CHUTIANG CHIAH CHUAN DAMNA/ HRISÈLNA HLUTZIA HRIAT CHIAN THEIHNA BER CHU DAMLOHNA KHUM AȚANGIN A NI.



Ka group siam ve liau liau (TOSODiP) join duh tân

https://www.facebook.com/groups/389869478234571/