☆SILVER ZUNGBUN☆ - 8 By Dingdi Pachuau

☆SILVER ZUNGBUN☆ - 8 By Dingdi Pachuau



Tûkțhuan kan kîl lai chuan Âtei chuan," Nizànah Melo-ite an rawn lêng a," hrilh bîk pawh nei chuang lo hian a ti a.



Pu ber chuan," Ka mut hnuah maw?" a lo ti a. Nizàn kha a mu hma teh vut lutuk a, dik tâwk lohna a nei emaw ka ti hial.



"Aw, a rawn haw phei zawk a."



"Hmuh ka châk reuh asin le, a hmel a la țha em? Ka tupa/ tunute nu atân ka iai loh tehrêng nèn!"



"Ka pa!" tiin ka pu chuan a lo khap hmuk a.



"A hmelțhain a fel reuh ém asin, engtikah nge a phei leh dâwn, Bawihi?"



Âtei chuan," Naktûkah a niang, chawlh a nei rei thei bîk lo va," a lo ti a.



Kha mite unau kha Lunglei khua an ni emaw ka ti, an ni lo tihna em ni? Chimawmliana khân 'Ka va hmu ngai lo che ve' te kha min ti ringawt a, chuti a nih chuan min hmu ngai tawp nâng, Aizawl ațang chuan.



 "Aizâwla mi an ni elo?" tiin Âtei chu ka lo zâwt ve a.



"Ni lo ve, Melo-i kha Aizawl DIET-ah a thawk a."



"Tu nèn nge an lo lèn a?" Pu ber chuan a lo ti leh a.



"LMa nèn. LMa lah chuan Novi a bèlbul nghâl chawt a. A lo lèn tirha a complain nasat nèn," nui hak hak hian a ti a.



"Nèlawm lo min ti a," ka lo ti ve a.



"Fapa duat sual," Pu ber chuan a lo ti hlak a," Melo-i chu ka hmu châk hle a ni," a ti leh a.



"Aw, tu emaw kha inhruaitîr la?" Awmze nei fêa Ka pu melh ralh pah chuan a lo ti a.



"Nia, a chhuah dâwn tho chuan."



"I lèn duh leh Rickshaw la mai rawh," ti hmukin a tho ta nghâl daih a, Âtei leh pu ber chu an nui dùn hawk hawk a.



"Senior tawh pui hi a che naupang chhia thei a nia. Tu emaw pa hi chu aw..."



"Âpa, vawiinah ice cream kan lei dâwn em?" tiin a àu lang lang a.



Tui hmun ațang chuan," Tehrêng mai, eng zât nge i duh?" a rawn ti thûm dût dût a.



"Za nga."



Kan nui ta vek.



"Eng atân nge i tih a, Naute? Za nga chu a tam àwm em mai," Pu ber chuan a ti a.



Ka pu chu rawn pheiin," Kan lei țeuh ang, chaw ei kham veleh insiam la, Au Novi hruaiin kan chhuak ang a, tah chuan kan lei ang," a ti a.



"A nuam àwm mang e, min lo hawn ve rawh aw. Âpa nèn in chhuak dâwn sia, chaw kha ei țeuh teh le," a nî chuan a ti a.



Ka insiam zawha room ațanga ka chhuah chuan Princess-i chu a lo inpeih at tawh a, Ka pu erawh room lamah a la awm.



"Au No, ice cream chu i ei ve duh ang em?" tiin min zâwt a.



"A tui ngawt ang chu!"



"Ka pe ve dâwn che nia."



Ka pu a lo chhuah tâkah chuan kan lo en vat a, Princess-i chuan," Âpa mawizia hi!" a lo ti chùl a.



"Ka lâwm e, lal fanu," tiin a pawm kâng nawlh a, kawngka lam panin a kalpui ta nghâl a, kei pawhin hmanhmawh fahran chuan ka zui chhuak ve nghâl vat.



Step-ah Âtei kan tâwk a, dàwr têah a kal lawk a ni.



"Min lo hawn ve rawh aw, lo haw har lo la."



"Aw le, bye bye."



"Bye bye."



Princess-i chu ka bulah a țhu a, front seat-ah kan țhu lo. A titi siam siam a, a titi paha a hmui pawrh têrh têrh țhìn chu a hmuhnawm ka ti.



Ice cream an zawrhna dàwr kawtah kan ding phawt a, Ka pu chu chhuakin dàwrah chuan a lût a , a rawn chhuah leh meuh chuan  polythene-in a rawn khai țawk a.



"E, a va tam ve!"



"Dàwrah in ei ve dâwn alawm."



"Âpa, ka sem diat diat ang aw?"



"Aw le, Princess."



Dàwr kan thlen chuan min zui lût ve nghâl a, Feli leh Mary  hmêl chu hmuhnawm tak a ni.



"Le, sem tawh la?"



Polythene chu a khai hniam nghâl a, Princess-i chuan lo ban vatin a la chhuak a, min pe hmasa ber a.



"Ka lâwm e, Princess."



Feli leh Mary chu a pe ve leh a, anni pawh chuan lâwmthu an lo sawi ve bawk a.



"Âpa, a dang hi mi dang kan sem leh dâwn em?"



"Aw, dàwr pakhat zâwka mite ve thung aw."



An chhuak chu Feli chuan a umzui deuh nghâl a, a bihthla dêk dêk lehpek.



"Ka va han duh tak! A fanu nèn lam hian ka hmangaihin ka hria."



Mary nèn chuan kan lo nui hak hak a. Khua hi a tihar lo ve teh a nia.


*******


LMa a rawn lang ta zut mai, eng mah thawh a nei lo a niang. A tìrah chuan ka lo be vak lo, mipa a ni a, biak nèl ka duh vak lo.



Mahse, engah mah a ngai miah lo. A rawn kal a țhulh phah lo va, a chimawm a reh phah hek lo. Feli leh Mary chuan an kàwm peih khawp mai a, fiamthu thawhin an nuihpui vak vak ziah.



Customer an rawn kal lahin a lo chhàwn thiam thiamah a țang a, hlim hmel taka lo chhàwnin lei tum lêm lote pawhin an lei phah fo.



"Engtin nge i tih bîk?"



"Eng chu?"



"Kawr i leitîr thei zêl bîk a."



A nui hawk hawk a," In hriat theih loh tùrin, an beng bulah ka lo vau ziah alawm," a lo ti mai a, awih lo zet hian ka en a.



"Min hrilh chiang ve mai la?"



"I hre chhuak thei mai lo em ni?"



"Hre lo, hei ka zâwt rêng che."



"Nui phawt rawh, i nui hmêl hmuh a khât ém mai. Nèlawm hi a pawimawh, lo fak ringawt a ni lo, an rilru i hnehsak a ngai."



Feli chuan," An rilru hneh chu alawm kan thiam loh," a lo ti a.



"Tak tak chuan, ka hre chuang bîk lo. Mi lo ti thiam bîk riau hi kan awm a niang," a ti a.



"Ni e, mihring chu kan mizia a inang lo ém a ni."



"Nangmah ber hi, i nuih tam a ngai. Heti hrim chuan hrisèl pawh i hrisêl thei lo ang," min ti ta êrh a.



A dik reng mai.



"Ti ta daih ila, in luah tùr tê fel deuh, tlâwm ve tak in hre mial lo maw?"



"Yes, luah rawh, zànah ka lo lêng țhìn ang," LMa chuan a lo ti vat a.



"Luah tùr chu i hria em ni?"



"Hre rih chuang lo."



Feli chuan," Ka lo ngaihtuah ve chhin ang e, Puteate in hnuai kha chu a ruak ngei mai a; mahse, chhûngkaw rual deuh hlek luah chi a nia," a lo ti a.



Mary thung chuan," Ka hre miah lo mai, kan vêng lamah chuan a vâng lutuk," a lo ti ve a.



"Kan in chung chu a ruak reng asin," LMa chuan a lo ti a.



"A to àwm?"



"Leh ringawt. Hriat chian hma hauha to àwm tih. Kan nau pakhat lehkha zirin a luah dâwn a," a ti leh a.



"Min lo melhpui ve deuh teh u aw."



Fùr a zo a, favàng hun a rawn inher chho a, in luah tùr pawh chu Feli'n a hmu a, hman hun atâna enah ka ti a. Mahse, Ka pu sawipui leh phawt ka duh, a thu lo chuan ka ti ngam lo.



Sunday tlaiah hun remchâng ka hmu ta. Eirawng ka bàwl a, Âtei leh Princess-i an lêng chhuak a, Pu ber pawh a chhuak ve lawk.



"Ka pu, biak lawk che ka duh a."



TV-ah Tennis khèl a en mêk, va tihbuai ka inthlahrung viau nain hetiang hun remchâng hi ka hmu tawh kher lo maithei a.



"In dan chungchâng kha a ni em?"



"Aw..."



"Ka hmuhsak tawh che a, a tâwk reuh viau tùrah ka ngai a, rawng i bàwl zawhah kan va enchhin dâwn em niang?"



"Ka pu..." sawi tùr min tihaihchham. In min ensak/zawnsak ka lo ring miah lo asin, bâkah, to deuh te a lo nih phei chuan...



"Hmun him leh țha ka duhpui che a ni, lùn tho si, langsàr vak si lo. Tui leh electric lama harsatna awm lo tùr, mi nazawng pal pal theih loh tùr ka duh bawk a."



Khawi laiah tak hmu ang maw?



"Ka pu, a to lo ang chu tiraw?"



"Ka țhianpa nupuite in hnuaiah a nia, a to lo. Bungrua a awm sa nual bawk a."



Venglaiah tho a lo nia, dàwr ațangin a hla miah lo. Duhthusàm a ni mai, vêng hulùm lai ni mah se, gate lian deuh tak a awm avàngin a duh nazawng luha paltlang theih a ni miah lo.



Bungrua lah a lo awm sa țeuh a, lei ngai tùr chu cooker, no leh fian leh hmunphiah a ni mai.



"A țha i ti em?"



"Țha lutuk ringawt. Ka lâwm e, ka pu," tiin ka nuih sak a.



Ani pawh a nui ve suk.



Zanriah kan kîl laiin Ka pu chuan ka in dan tum dàn chu a sawi chhuak a, Âtei leh pu ber chuan an lo phal lo nasa mai a.



"A awihawm loh e, i inthlahrung lutuk a nih kha."



"Fanu thar ka neih belh ka lo ti a, ka lo hlim tawh tehlul nèn, i chhuah leh daihte chuan..."



Heti taka min ui der ve hi ka lâwm. Anni bâk hi chhûngte ka nei dèr si lo. In dang ta pawh ni ila, ka tlawh reng reng tho ang.



Ka dàwr nghahpuite bulah in luah tùr ka hmuh tawh thu ka hrilh chuan min làwmpui ve khawp mai. A awmna lai ka sawi chuan mak an lo ti khawp mai a.



"I van hmu țha ém ém! In luah tùr an nei ang tih rin ngaihna pawh ka lo hre lo réng réng," Feli chuan a ti a.



"Ka pu min hmuhsak a nia."



"I pu hi, a nèlawm loh hmel tehlul nèn, a fel riau a nih hi. Fel lo pawh ni ta se ka la duh tho."



Mary chuan," Lum hlumah pawh i hlawh duh thoin ka ring," a lo ti vat a. Ani lah chuan," Tehréng, ka dam chhuak mial thei tlat," a lo ti leh a, kan nui dar dar a.



Tunah chuan ka lo nui tam ve ta. Za taka nuih erawh ka la nei lo nain ka nun kal chhoh zêl dàn ka ngaihtuah hian vànneihna ka lam a țanzia ngaihtuah chhuakin làwm avàngin ka nui lo thei lo.



Room-ah ka thawmhnaw sûk ka thlep țha a, naktûk lama ka insawn tawh dâwn avàngin airbag-ah ka indah țha țan a, chutih  lai chuan kawngka a rawn rì dat dat  a, Princess-i a nih ka ring a.



"Lo lût dat dat rawh," nui chung hian ka ti a.



Ka pu ka hmuh tâkah chuan ka nui hmel chu a tàwp ta riai riai.



"I inthlep fel țan tawh a ni maw?"



"Aw, ni deuh tho."



"I châk tawh em?"



"Châk tho, châk lo tho."



"Mangchhia khan a la tibuai țhìn che em?"



Mangchhia. Ka lo hre tawh hlei nem. Min tibuai tawh lo hle mai, thil làwmawm tak a ni.



"A reh ve tawh dâwn a niang."



"A zia hlauh chu. Eng emaw harsatna i tâwk palh thei, chutih hunah chuan eng harsatna pawh tâwk la, min rawn phone hmasa ber ang che," a ti  sup sup a.



"Aw le,...ka pu."



In ka luah luh zànah chuan  LMa'n ei tùr a lei a, Ka pute pawh an chhûngin an rawn kal a, kan chêp reuh khawp. An haw har lo hlauh a, a zia tawp.



"Zan tin ka lo tibuai tawh dâwn che a nih hi."



Kan innêl tawh a, kei pawhin ka kàwmngeih tawh. Nuih dàn a hnên ațangin ka zir thar a, nun a hlimawm zâwngin ka thlîr thiam ve țan deuu bawk, min fuih nasa.



"Pawi lo, khua a har lo deuh ang chu."



"Novi, chhàn nuam lo a ni maithei a, thil ka zâwt thei che ang em?"



Nui chung hian," Min zâwt rawh, zawhna chu zawh a thiang alawm le," ka lo ti a.



"I mut a chhuak tawh em?"



"I va ho tak! Chhuak pawh ni se, i la lèn hi."



"Chuti, ka'n haw ve tawh ang e."



*******



Ka ni tin hun hman chu a hrehawm hran lo. Ka mamawh tâwk pawisa ka thawk chhuak thei a, ka dam țha a, thil dang ka mamawh hran lo.



Ka nu silver zungbun min pêk chiah hi a thil neih ka neihchhun a nih tawh avàngin ka tibo ang tih ka hlau hle a, bun pawh ka bun tawh lo, ka dah țha tlat. Ka thil neih leh thil pawimawh pawh pakhat mah ka chhuahpui lo va, ka nu zungbun bâk ka chhuahpui lo.



Ka mutnaah chuan ka ngaihtuah kual leh a, ka pa hrawn leh U Rina khân min zawng ta em le? Nge an beidawng ve tawh ang? Ka ngaihtuah chhuak ngai ta lo hle mai.



Police an ni a, țhiante an ngah dâwn si a, ka thlalákte hi thawn kualin min lo zawng ta se, engtin nge niang? Kei lahin min zawng rutute ka lo hre hrang dâwn miah si lo.



A tûka dàwr kan nghah lai chuan Feli chuan," Thil mak deuh ka hmuh ang che u, a zahthlâk tawp. A rui a ni ngei ngei ang, hetianga camera hmaa in-pose ngam chu, a kai ve hle a ni ngei ang," a ti barh barh a.



"Eng maw?" Mary chuan a lo ti vat a, thawmhnaw chu a khai țha pah mawlh mawlh a.



"Nizànah whatsapp-ah ka dawng nawlh a, hmeichhe saruak thlalâk kha."



Ka nghîng lawih maiin ka hria. A reh ta emaw ka tih kha a rawn inmung chho dâwn chauh a nih hmèl, chêt pawh che ngam lo chuan Feli chu ka melh ràn a.



"E, a va ngo ve! A pian a nalh hmel; mahse, hetianga in-pose kher chu, a hriat hunah a zak ve ngawt ang chu."



Feli chuan," Hm, zak lo ang, tûnlaiah chuan an zak tawh lo. Pawisa a hlawh pawh a ni maithei asin, a hlawh țeuh a niang," a ti leh barh barh a, ka awm dàn hre lo lêk chuan an sawi barh barh a. Kei lah chu chhûngrilah khùrin chêt pawh ka ngam lo a ni si.



Zànah ka mumangah ka lo hmu lehnghal. Ka thlalâk ngei a lo ni a, U Rina lahin min lo sual a lo tum leh a, mut pawh ka muhìl ngam ta lo.



Whatsapp message ka en kual a, zàn a rei tawh viau nain muthilh ka ngam tawh rih loh avàngin ka en kual.



News group-a an thil post ka like a, chhiar pawh ka chhiar lo. Țhiante online an lo awm mial tâkin tiin ka en kual a, an mu vek tawh a ni ngei ang.



Message tone a ri tleng.



*I muhìl leh thei tawh nange?*



Ka pu hian min lo hre chiang ber mai a nih hi.



*Aw*



*Ka rawn kal i duh em?*



Ni lo, zàn a rei tawh. Bâkah, mipa a ni a, a tihchi loh.



*A ngai lo, ka lâwm e*




*MI SUALNA AIIN AN FELNA LAI ZAWNG HRÂM HRÂM ȚHÌN RAWH, CHU CHUAN AN NUN A  SIAM ȚHA ZÂWK NGEI ANG*