☆SILVER ZUNGBUN☆ - 9 By Dingdi Pachuau

☆SILVER ZUNGBUN☆ - 9 By Dingdi Pachuau



A rawn call ta daih.



"I mut theih loh si chuan, Princess-i nausen lai chanchin ka hrilh ang che aw, i ngaithla peih ang em?"



Ka hre châk lutuk tlat.



"Tehrêng mai."



"A tê reuh khawp mai a, a thi mai ang tih ka hlau hial țhìn. A țahte hian a sen vek zêl a, doctor kan panpui zing khawp mai. Natna a chhar hma bîk hle bawk a, a têt zual lai phei chuan inah ka awm reng țhìn, ka chhuah hlànin min lo thihsan daih ang tih ka hlau țhìn a."



A inhmeh lo ka ti thlâwt.



"Zànah harh se ka buaipui vek a, min tirethei viau mah se ka hlimpui ém ém thung a ni."



"Kan inan duh hmel. Kei pawh ka têt laiin ka nuin min hah phah lutuk a; mahse, a hlim thu min hrilh fo."



Phone-a a nui ri hriat chu a nuam tawp.



"A dik alawm. Khatianga buai taka hun ka hmang thei kha a hunlai khân hrehawm ti viau mah ila, tunah hi chuan ka hlimna belhchhahtu a ni tawh."



"Ka nu sawi dàn chiah chiah. Zàna ka mut theih loh chânga ka țahte hian tihngaihna a hre lo țhìn lutuk a, min khawngaih vàngin a mittuite hial a tla ve țhìn. 'Fa i neih hunah i la hre thiam ve mai ang' min ti țhìn a, nang chuan i lo tem lâwk vek tawh si a," ka ti ve a.



"Nia; a hunlai kha chuan mangang țhìn mah ila, mangan hrehawm tawrh kha a phû hliah hliah ka ti, tunah chuan fanu duhawm ber a ni tawh si a."



A ngawih deuh vang vang lai chuhin,"Nautei nu hi khawiah nge a awm?" tiin ka zâwt a, hetianga ka zawh loh chuan thil thleng hre saah min ngai thei, chu chu ka duh lo.



A ngawih vang vang lai chuan," A ngai leh lo mai. Thil țûl lo ka lo zâwt che a ni," ka ti leh a.



"A nu ka hre bîk lo a ni, ka zinna kawng sîra ka chhar a nia; mahse, pa erawh a nei, keimah hi a pa dik tak chu ka ni."



A țawng chhuah dàn ațang chuan a rilru a thil awm tùr ka hre thiam deuh ruak.



"Ka hmuh țantirh chuan eng nge a nih pawh ka hre lo, bawlhhlawh an paih ni maiah ka ngai a; mahse, a che tlatin ka hria a, a hnuah phei chuan a rawn țap ta a, an paihna a la rei lutuk lo a niang, fanghmìrin an lo bàwm țan deuh tawh ringawt. Khatih laia ka rilru awm dàn kha chu ngaihtuah lêt leh pawh ka duh tawh lo hial."



A râpthlâk ka ti lutuk. Chutiang tehbelin ka lo hre lo va, a chhar dàn dik tak han hriat chu, Nautei chu ka khawngaih thar. Bâkah, Ka pu chu ka hmuh dàn a dang ta daih bawk.



"I tițha tak zet a ni, a khawngaihthlâk dâwn ém asin."



Za lo zet hian a nui a," He khawvêl nunrâwng takah hian a lo piang chhuak ve a, harsa takin dam chhuah tumin a bei ve ngei ang a, a hringtute'n hetiang an ti thei hi mak ka ti, a nunràwnthlâk ka ti hle a ni," a ti leh sup sup a.



"A dik alawm, mihring hi a lo nunràwn theih khawp a lo nih hi."



"Hetianga ti leh tho tùr chuan pai loh law law tùr a nia."



Sawi mai tùr ka hre lo, a thil sawi chu dik ka ti ém ém si a.



"Hmeichhia hi chu in nun a râwng deuh chu a ni tiraw?"



Nautei nu hi chu a dem ve tak meuh a nih hi. Hmeichhiate hial a dem tâk, min hmer tel ve tho tihna a ni si.



"Râwng deuhte pawh kan awm ang a, fel tak takte pawh an awm tho ang chu, kan inang vek si lo va."



A thaw hawk a," A dik tho ang; mahse, ka ngaih dànah chuan a ngai reng tho," a ti a.



"Mipa pawh sual tak tak an awm ve tho." Kha mi sualpa leh ka pa hrawn ngaihtuah ràn chuan ka ti a.



"Awm ve tho mai."



Ka nui a," Kha i in-surrender țan deuh," ka ti a, ani pawh chu a rawn nui ve tho.



Kan inbiak zawh hnu rei lo têah chuan ka muhìl ve mai, mangchhia pawh khân min tibuai zawm ta bîk lo. Ka mumangah Nautei ka lo hmu thung.



Dàwrah LMa a rawn kal a, vawiin chu a rawn inla-cool ve tawp, țawng pawh a țawng vak lo.



"I țawng duh lo tlat vawiin chu, i inla-value chiang mai," Feli chuan nui uar uar hian a ti a.



"Mipa țawng zuah zuah pà tak an awm ngai lo a nia," Mary chuan a lo ti thung a.



"Chuvàng em ni i țawng tlèm tak?" ka lo ti ve a.



"Țawng tam loh ka zir ve țan a."



A hnunga ben kâwrh pahin," Vêl a che. I țawng loh chuan a nuam lo a nia, kan inhralh thei lo ang," Feli chuan a ti a. Mary chuan a lo nuih var var bawk a.



A phone khawih nauh nauh pah chuan," Dàwr nghâktu ka ni lo," a ti nghut a.



"Min nghahpui alawm."



"Chuti, ka haw daih dâwn."



"Haw lo ang, mawng i titam ve alawm."



Feli leh Mary hi chuan an hnehsawh thei a nia, ani pawh hian a lo dawngsawng thiam hle țhìn a, huatah la lovin an infiam tawn nasa thei țhìn.



In ka thlen chuan, chaw ka chhuan hmain ka whatsapp phawt a, chutah chuan, he khawvêla ka hmuh duh loh ber mai thil ka hmu ta a ni!!!



Mi dang chuan min hre mai lo ang; mahse, kei hian ka chiang a ni, keima saruak thla ngei a ni tih ka chiang. Ka hmel lang lo chiah chiah mah se, ka inhre chiang, ka khawvêl a chhe rup ni maiin ka hria.



Thlalâk chu ka ennawn ngam tawh lo, eng tiang chiahin nge a darh nasat tawh ang? Ka rei, Feli sawi pawh kha a lo nih ngei dâwn hi, ka ensak duh lo kha a ni a, lo ensak phei ila, ka che buai vek ngei ang.



Ka khûr chhe vek. Kha mi sualpa thil tih kha a ni chiang, min vau nasat ém kha. Ka tlàn bo vàngin a ti ta ngei a nih hi, engtin nge ka tih ang? Ka hmel lanna pawh a nei ngei ang, Lalpa leh! Ka hmel lanna a post darh a nih hlauh chuan...A lo post darh tawh maithei asin, hei chauh hi ka hmu pawh a ni thei tho.



Ka rilru a bîng mup mup mai. Mi zawng zawngin an hmu tawh ngei ang, mi chuan awmherh takah min ngai ngei ngei dâwn, a va zahthlâk tak! Tunah chuan engkim a tàwp ta vekin ka hria, ka hmel lanna a post leh hunah phei chuan...miin min hriat chhuah hunah phei chuan, ka va zak dâwn tak!



Engtin nge ka tih tâk ang? Ka bialpa, mi țha tak nia ka lo ngaih țhin khân tunah hian min timualpho ta hle mai. A chungah eng nge tihsual ka neih? Ka thianghlim zahawmna min hnehchhuh tawh a, chu mai duhtâwk lovin min timualpho leh kher a.



"Nu, min lo hmu em?  Ka va ngai tak che ém! Tunah chuan engkim a chhe ta vek. Nu, i fanu hi ka chhe ta vek, hmalam hun nei nia ka inhriat vena pawh tunah chuan engmah lo mai a ni ta, engtin nge ka tih ang, Nu? Min țanpui hrâm teh," tiin ka țap tlawk tlawk a.



Țhiante hmel eng pawh ka hmu ngam tawh nâng. Hrehawm ka ti ngawih ngawih, engtin nge ka awm tâk ang? Hmeichhe huaisen tak ka ni lo va, tunah phei hi chuan zahna tùr hlîr ka hmaah a rawn inchhawp tawh si, beiseina êng sêt sêt kha tunah chuan a thi ta hmak, a thim mup tawh a ni.



"Novi? Engtizia nge? Eng thil nge thleng?"



Eng thil nge thleng? Thil râpthlâk lutuk, ka nunkhua tichhe vek thei a thleng a ni.



"Novi?" Ka kokiah a kut pahniha rawn vuanin min sâwi a, ka harh chhuak chiah. LMa a lo ni a.



"Eng thil nge thleng?"



Ka mittui chu ka hru hul sawk sawk a, harsa zeta nui luiin," Eng thil mah a thleng lo ve, ka nu ka ngai ém a ni," ka ti sap a, chhûngril lamah hrehawm tihnain min hnawh ùl a, țah chhuah hawk hawk ka châk, a zia deuh mahna.



"Novi, eng emaw thleng chu a awm a ni tiraw?"



"Awm lo, ka nu ka ngai ka tih tawh kha."



"Um, a nih leh țap bawrh bawrh rawh," tiin min kuah a, kei pawhin ka lo hnial bîk lo, min kuah ang chuan ka awm ve tawp. Ka mittui a far zawih zawih reng a, ka kianga ani lo awm ve ringawt pawh hian ka lung a tichhe zual.



Ka zia deuh hnuah chuan ka inlahrang ta a, ani chuan,"Vawi hnih ka rawn call che a, min chhâng thei lo va," a ti sap a.



"A nih chu, ka lo hre miah lo."



Light chu a on a, "Chaw i ei tawh em? tiin min zâwt leh a.



"Ei lo, ka ril a țâm lo va."



"Chutiang ringawt tùr a ni ngai lo, pumpui țha lo i vei mai ang."



Nia, chaw hi ka ei țha lutuk lo. Ka pute inah kha chuan ka ei țha viau, heta ka awm hnuah hian zàn lam hi ka peih lo țhìn a, ka nghei leh ringawt țhìn.



Țhiante bulah ka inthlahrung sawt. A chhan chu thlalâk kha an hmu ve ngei si a, keimah tih an hre chhuak ang tih ka hlau ngawih ngawih. Ruak vekin ka awm si a, a zahthlâk ém asin.



Tunah hi chuan mi min hriat rêng rêng lohna hmuna awm bo vang vang ka châk, social media-in a thlen phâk lohna ram pilrilah. Ka țhiante leh Ka pute chhûng mawlh mai hi ka hmaizah, LMa pawh tiamin. Ka chungah an țha si a, hetianga ka awm hi an ring phâk dâwn si lo, mak min ti dâwn lutuk.



Ni tin chuan dàwr nghâk tùr chuan ka chhuak ve a, rilru erawh a hlim thláwt lo, hlauthawng rêng rêngin hun ka hmang. Min rawn dàwrtute zîngah hian kha mi sualpa kha ka hmu nawlh mai ang tih ka hlau ngawih ngawih, a nih loh pawhin a țhiante emaw a chhûngte emaw min enthla rengtu an awm ka ring ru hial. Chuvàngin, ngaihngam takin ka awm thei lo.



LMa erawh a nungchang a thlâk khawp. Min ngaihsakin a hma aiin min kàwm tam a, zànah ni se ka khawhar hlau ni àwm takin a lo lêng zut, rei tak tak phei chu a lêng ngai lo. A bulah thu dik tak kha ka sawi tlat lo va, dâwt chu ka sawi hauh lo. Ka nu kha ka ngai a, ka bulah awm se, țah hliam hliam kha ka châk a ni.



Tlai khat chu dàwr kan khâr têp tawh tihah tlangval pakhat hi a rawn lût a, kawr chu a rawn en dan dan a. Mipa a nih avàng leh hmeichhe kawr a rawn en si avàng chuan Feli leh Mary chu nui ru deuh chuan an inmelh nasa mai a, ka hmu ru reng. Eng emaw sawiin an titi ta daih nghe nghe a kei erawh chu ka insûm thei a, ka lo chhàwn a.



A duhzâwngte chu ka zâwt a, a bul hnaih deuha ka awm lai chuan," Thlalâk kha chu a bul țanna chauh a nih kha," a ti sap a. Hre thiam lo zet hian ka en a, min ngaihven chhunzawm lo zet hian kawr dang a en leh a.



A thil sawi awmzia chu ka ngaihtuah a, kha mi sualpa tirhkah kha a ni ngei ang, a thil sawi kha, thlalâk kha a bul țanna chauh a ni tih a sawi. E khai, min man chhuak chiang ta hle mai! Ka awm a nuam lo, ka thin a rawn phu nasa lutuk.



A lo kal bo daih tawh.



Tu nge a nih ka hre lo; mahse, ka hriat kher a ngai lo. Mi sualpa chekàwi zînga mi a ni tih ka hria a, a tâwk viau. Heti a nih hrim chuan ka awmna, ka chènna thlengin a hre tawh ngei ang chu.



Rilru nuam lo zetin leh hawi zak zak chungin ka haw a, ka hmanhmawh ru kher mai. Min enthla an awm leh awm loh ka melh ru reng bawk a, ka hmu hran miah lo nain min enthla rengtu an awm ka ring ve tawp.



Ina ka luh chuan ka thaw deuh hlawp hlawp a, kawngka ka kalh nghâl. Rilru nuam lo leh hlauthâwng rêng rênga hun han hman mai chuh, a hrehawm tak zet.



Phûr lo zet leh beng chhi rànin rawng ka bâwl a, in chungte nèn lah hian thâwm kan inhre tawn lo bawk si a, inhre tawn tal ila chuan...



Chaw ei kham dâr riat vêlah chuan kawngka a rawn rì a, ka meng phâwk hle ringawt. LMa ni se chuan min ko hmasa dâwn tih ka hria, Ka pu a nih ka ring lo. Min koh hma chuan ka hawn lo ang.



Nasa deuh hlek hian kik pahin a rawn sâwi leh a, ka heh ka pet fan fan. Ka kaihza tha a khùr dar dar a, ka thin a phu nasa hle bawk. Hlauhna namên lo hian min man a, chêt pawh ka che sawn ngam lo, ka ding khùr ngat ngat.



Ka chhàn si loh vàng chuan kawngka chu a kik ta lo. A reh vang vang hnuah pawh ka che sawn ngam lo va, thâwm ka nei ngam hek lo. Zànah nlêng ka nei ngai lo va, LMa leh Ka pu bâk, chuvàngin a rinhlelhawm lehzual a ni.



Ka rilrua lang hmasa ber chu Ka pu a ni. A chhan chu eng emaw thleng se ka phone hmasak ber tùr a ni tlat a ni, ani pawhin phone tùrin min chah thlap nghe nghe kha. Ka text mai teh ang.



Ka kut a khùr nasa lutuk a, spelling pawh  ka tupe dik lo nuai mai, a pawi lo.



Kawngka lamah thâwm ka châng reng a; mahse, thâwm rî ka hre lo. Kei pawhin thâwm ka nei ngam lo, ka thâwk pawhin muangchângin ka thaw, ka thinphu erawh a ri ring mah mah a ni.



A nghâktu tân chuan minute nga pawh hi a va rei tak ém! Minute nga rei ber a ni hialin ka ring!



Kawngka a rawn ri leh chu, ka phu chiang lutuk a, ka phone pawh ka thlauh tawp mai. Ka hminga ka puin min ko ri ka hriat tâkah chuan ka thaw huai nain ka tha khùr leh ka thin phu nasa lutuk chu a reh nghal chuang lo.



Kawngka chu ka hawng ta vat a, Ka pu ka hmuh veleh chuan ka kuah chawt. Tunah hi chuan zah ka sawi tawh lo, ka pu ka hmu hi ka lâwm lutuk a, ka mittui a tla lo chauh a ni.



Ka tha khùr nasa lutuk chu a hre ve chiang, kawngka khârin nghet zetin min kuah lêt a, min kuah lêt tâkah chuan ka hlauhna pawh a reh sawt sawtin ka hria.



Dining chair-ah min țhuttîrin ka kut pahnih chu la kawpin ka hmaah chuan a țhu a, ngun zetin min rawn en chho a.



"Thil thleng min hrilh duh ang em?"



En pawh en ngam lo chuan ka kut chu ka en a," Min hre chhuak tawh a ni," ka ti ta sap a.



"Tuin maw?"



"Ka tlàn bona chhante khân."



Nghet lehzualin ka kut chu a hmer a," Tute hnên ațangin nge i tlàn bo?" a ti leh sup a.



"Ka pa hrawn leh mi sualpa hnên ațangin."



A kutzungpui pahnih chuan ka kut chu a chûl pah a," Saruak thlalâk tûnlaia lâr chiam hi ka thlalâk a ni a, ka duh vàng rênga lâk erawh a ni lo," ka ti a, ka pu chu ka en ràn nain ka mittui a rawn tlin avàng chuan ka hmu chiang thei lo va.



"Eng thil...engtin nge...WTF..!!???"



"Pâwngsual ka ni a..."



Rawn tho thutin min kuah a, kei erawh ka mittui a lo tla zung zung. Ka mitthlaah khâng hunlai kha a rawn lang leh zut zut a, theihnghilh duh teh mah ila, ka theihnghilh theiin ka ring lo, nimin lawka thil thleng ang maiin a la chiang.



"Ka chàu ngawih ngawih-"



"Shh, shh, duhtâwk rih rawh."



Rei fê chu min kuah a, kei lah ka thla a muang huai huai si a, ka nu boral ațanga ka thla a muan ber țum ni hialin ka ring.



Țhutnaah min țhuttîr leh tê tê a, min hmachhawn zâwnga țhu lehin," Engkim a bul ațangin min hrilh vek rawh," min en ràn chung chuan a ti a.




*I TÛN DINHMUN ȚHAT VÀNG MAI KHÂN CHAPOVIN MI DANG HMUSIT ȚHÌN SUH ANG CHE,  HRINGNUN HI A INLET KUAL RENG SI A*