☆SILVER ZUNGBUN☆ - 15 By Dingdi Pachuau

☆SILVER ZUNGBUN☆ - 15 By Dingdi Pachuau



Tûkțhuan kan kîl laiin a chhûngte hnênah chuan a zin leh lawk dâwn tih a sawi ringawt a, chiangkuang takin a zinna hmun tùr, eng nge a tih dâwn tih lam a sawi lo.



Dàwr ka kal tùr pawh min thlah ta lo. Nizàna ka thu hrilh kha a ngai haw hle a ni ngei ang, a rûk tak chuan hrehawm ka ti ve tho asin. Induh deuh leh inla eng emaw ta viauah min ngai ngei ang.



Dik tak chuan, ka duh phâk a ni tlat lo a ni. Ka beisei phâk a ni lo va, min duhna chhâng lêt ve ngam tùr lah ka ni hek lo. Hei tak hi a hriatthiam loh tùr thil chu a ni, kei chuan thui tak ka dâwn ve vek. A chhûngte zahna thlentu a nih ka duh lo, ka duh rûkna dah bovin ka theih chhûng chuan ka hnial ang, miin an nuih tùr ka phal lo.



Ni e, hetia a zin bo hi a țha zâwk ang. Eng ém ka tâwk tawh bîk nâng, ka buaina ka hrilh reng si a, a tân pawh a ninawm zozai ang tih ka ring.


***


"Inhlawhna țha tâwk ka va duh tak ém! Hlâwk deuh si leh huphurhawm lutuk si lo," Mary chuan a ti vang vang a.



Chhùn chawlh lai a ni a, dàwr leh ka țhiante hi ka khawvêl an ni tawp mai a, hmun dangah ka kal ngai hek lo.



"Țha deuh ka hria," Feli chuan a lo ti vat a.



"Eng?"



"Singapore-ah kal rawh, a nih loh pawhin US-ah."



"Singapore chu ka peih lo sa a, US erawh chu...engtin nge kal dan tùr niang?" tiin Feli chu a zâwt leh a, kei pawh chuan an thil sawi chu ka lo bengkhawn ve viau.



"Ih, ka pa nau(patea) fate an awm a, Ka patea hi chu Burma-ah a têt lai ațangin ka pite hnênah a awm a, an tân chuan kal a awlsam deuh a ni maithei. E, thil țha deuh ka hria, thingtlângah chhûngte in nei em?" a ti teh daih a.



"Nei e, ka pi, ka nu nute an la awm. Engtizia teh daih nge chu chu i rawn sawi a?" A ngaihna hre lo zet hian a zâwt a.



"Ih, pawisa hmuhna țha deuh ka hrilh dâwn che alawm. Vut hi i hria em? Mau vut hi a țha bîk a. Mau tuai lam deuh i lâk khâwmtîr țeuh ang a, a hrin lai pawhin a pawi lo. Chu chu hâlin an hàlna pãt kha la khâwm se, rambo polythene-ah phui takin dah țhain parcel-ah phui takin i khungtîr leh thlap ang. Thingtlângah chuan mau a la tam ang a, a harsa dâwn lo. Chutiang chu ka patea fate chu kan thawn țhìn a; mahse, thingtlângah chhûngte kan nei tawh lo va, a theih tawh lo. Thawn man i chawi ang a; mahse, pawisa rawn lêt leh tùr ngaihtuah ang che."



"Parcel lian over lo khat i thawn chuan $ 100 vêl i hlawh thei mai ang. Eng atân nge an lo hman phei chu ka hre lo, chhûngte an nih vanga pawisa min rawn thawn tam nge an nih pawh chu ka hre chuang hlei lo va, tam tak i thawn theih phei chuan ni khatah $ 1000 vêl i hlawh daih dáwn asin," a ti barh barh a.



"A ni tak tak em?"



"Ni e."



"A nih tak tak chuan, dàwra thawh pawh hi ka peih tawh miah lo ang," nui chung hian a ti a, kan nui țhâ hlawm a.



"Chu lo pawh, sunday-a puan kan ven ang chite pawh hi min rawn chah țhìn a, khutah chuan min lo zawrhsak țhìn alawm; mahse, a thawn țhìntu ber kan upa berin pasal a nei daih a, mi dang hian kan chhunzawm ta lo a nih hi," a ti leh a.



"Puan thawn chu a buaithlâk àwm?"



"Engati maw?"



"A rit duh àwm sia."



"Buaithlâk lo a niang, a thawn țhìn miau sia. A hlâwk alawm, US-ah pawh mizo an tam tawh a, an lei nasa țhìn a ni àwm e, an rawn hralh zo ve zung zung zêl. Awlsam têin $1000 i hlawh thei thuai ang a, ka hrilh man che $ 100 min pe ang a, dàwr nghahpui nih manah Novi $ 50 tal pe ve ang che."



Kan nui ta vek, Mary phei chuan a uar leh zual a, a nui tlâwrh tlâwrh thei.



"Chu ai tam chu ka pe ve ve ang che u, naktûkah ka pite khuaah chuan liam chhoh nghal mai ka duh," a ti a, a la nui sûng a.



"I hausa dâwn si a, Bill Gates-a ai pawhin i hausa daih thei ang chu."



"I ti duh, Bill Gates-a chu ka lehpèl hma ngawt ang, ka'n chhût chhin lawk. Ni khatah $ 100 a nih loh pawhin $ 50 vel lo hlawh thei ta ila, thla khatah chuan $ 3000, a va țha dâwn tak! Puan ka thawn thlâk leh phei chuan $ 5000 vêl. Kan pawisa phei chuan, ngaihtuah pawh ka ngam lo, ka hausa dâwn lutuk!" a ti a, a nui awr awr a, mi dang an awm ve ang tih a hlauhawm thei a nia.



"In va bengchheng ve a?"



LMa lo lût chu," LM, Mary hian naktûkah min pèmsan a tum a nia," ka lo ti a.



"Uai, eng thil nge thleng a?!"



"Ka hausaksan dâwn che u."



"I va ngaihawm àwm ve! Kal lo mai rawh, kan ngai lutuk ang che," nui chung hian a ti a.



Feli chuan," Kal rawh se, pawisa min pêk ve dâwn kha. Ka ui hran miah lo," thutak fê hian a lo ti thung a, a nui duh miah lo lehnghal.



"Kei chu ka ngai dâwn e!" ka lo ti thung a.



Hun âwl kan neih leh veleh chuan LMa chuan," Tûn sunday hian lêng ang u," a ti a.



"Ka châkzâwng tak!"



"Novi tel ve tawh se."



Hm, lèn ve pawh ka châk asin, dàwr kal ngawt ngawt bâk ka chhuak ngai si lo va, lèn khawthawn chu a pawi miah lo ang.



Mahse, ka pu khân chhuak miah lo tùr khân min chah ngun theih hle kha. A thu awih lova ka chhuak a nih chuan ka chungah eng thil pawh thleng se ka thiam loh liau liau a ni ang.



Mahse, chhuah ve ka châk. Buaina ka tâwk bîk kher dâwn em ni?



"Chhûngte ka lo dîl phawt ang," ka ti leh ta nge nge.



"Ninawm e, 'chhûngte' ti reng teh suh, an phal ve ém ém tawh tùr a ni ringawt. LM, kan léng dâwn u nia," Feli chuan a ti hlak hlak a.



Mary chuan," Senior-a pawh a awm chuan loh kha, i free thei sawt ang, ani kha chu tlêma 'sițik' an tih ang deuh chi kha a nih duh hmel a," nui chung hian a ti a.



"A awm lo maw? Chu vàng a nih chiah chu, ka zawi tâk thut."



Kan nui dar dar a.



"Daw chiang lutuk!"



"Lèn loh chuan ka zawi leh zual ang."



"Nia, kan la sawi țha dâwn nia."



Zànriah ei kham hnuah chuan ka pu chuan Princess-i chu rei vak lo a rawn bia a, min biak ve ka ring deuh thut a, ka phone charge chu ka hre chhuak a, room-ah ka lût ta nghâl a.



Min rawn be lo chiang. Rilru hnual ru deuh chuan ka khumah chuan ka țhu a, ka thaw huai a.



Dawhkàna parcel chu ka melh a, ka lo la dah țha pek lo a nih hi. Thovin ka puin min leisak sneakers mawi zet ka la chhuak a, ka han bun chhin a, ka tâwk chiah.



Ka inhmeh viauin ka hria. Dârthlalangah chuan ka inen a, ka'n kal kual vêl a, bun a nuam kher asin. A mawi si, a rawng leh a pian hrim hrim chu a nù hnâp ka ti, ka inhmeh ka ti bawk.



Ka phone chu a rawn ri ta, phûr zet hian ka ban vat, screen-a hming lo lang ka hmuh erawh chuan ka phùrna a reh deuh rawih rawihin ka hria.



"Hello?"



"Lo lèn i phal em?" LMa tak hi chu aw!



"I va ho tak! I duh phawt chuan lo lêng rawh."



"Aw le, ka lêng rei lutuk lo ang."



A rawn lêng ta ngei. Pu ber chuan a lo hriat ve tawh avàngin a lo be ve nghal bawrh bawrh a, a zia viau e.



Princess-i chuan LMa en kel kawl chung hian," Au Novi bialpa i ni em?" a ti a.



Rang zetin LMa chu ka en a, ani pawh chuan min lo en ve chiah.



"Ni...lo ve, a țhianpa... ka nia," tiin Princess-i chu a en leh ta a, a țawng bah deuh hlek chuan ka nuih a tiza, a hamhaih ve thut a ni ngei ang.



"Ngatinge i nih loh? Au Novi chu a hmelțha sia?" a ti leh a.



"Amahin min duh lo va."



Âtei leh pu ber chu an lo nui deuh țha a, kei pawh ka zak ve deuh hlek nain ka nuih a za ve tho.



"Naute, i zâwt ril mah mah a ni, mu tawh zâwk ila?" tiin Âtei chuan a sâwm ta zaih a.



"Aw le, Âpa mangțha ka duh aw."



"Lutuk!"



Room lama an inzui luh hnu chuan pu ber chuan," Kei pawh ka'n mu ang e, hlim deuhin lo inkàwm rawh u," a ti a, a tho ta nghal a.



LMa chuan," Ka pu, a la hma e, la meng ve rih rawh," a ti ve tak nain pu ber chuan," Ka lo hnawk palh ang e," nui var var chung hian a ti a, room-ah chuan a lût ta nghal a.



Kan pahnih chauha kan awm hnu chuan LMa chuan," Hetah hian i awm leh reng rih dâwn em ni?" a ti a.



"Ka awm rih chu a nih hi."



"Engati nge nuam lo i ti em ni a?"



"Ti hran lo ve."



Min en chuan a nui var var a," Kan in bulah in ruak ka hria asin, a tâwk reuh ngawt ang!" a ti leh a.



"Ka lo ngaihtuah dawn nia."



"Luah hrang leh tawh la, heta lo lèn chu a inthlahrunawm duh e."



Ngawi vang vangin LMa chu ka en a, a thil sawi hi a dik ve chiah chu ka ti. Ani tân mai ni lo, ka tân ngei pawh hian a ni ve tho.



A léng rei lutuk bîk lo ve, ka pu a awm lo tih a hre ve tlat a, haw hma viau kha chu a tum lo sa.



A chhuah dâwnah chuan," Sunday lèn kha aw, i lo dìl theihnghilh ang e," a ti a, kei chuan," Theihnghilh lo ve, ka lo dîl ang," ka ti ve a.



Lèn an phal loh viauna tùr a awm hran lo, min ngaihtuah vàng zâwk a nia. Ka pu pawhin huaisen taka awm tùrin min duh a nih kha, anni hlauva tlànchhiat leh invêng renga awm hi ka ning tawh lutuk. Ka nun pângngai takin ka hman theih loh phah a, nun râlți rêng rênga hman ka ning hluah hluah tawh, thil tisualtu zâwk chu ni ila thuhran. An pawi ka sawi lo va, ka pawi an sawi zâwk a ni si, ka nun an tihchhiat vek hi.



Ka saruak thlalâk an neih vàng hian min vaua an thuhnuaia dah theih rengah min ngai a nih dâwn hi. Mite pawhin an nei ve tho alawm, an duh vàng rênga an lâksakte pawh an awm a, kei ve thung kha, ka chauh ém vàngin ka harh thei lo a nih kha. Bâkah, hrài ruih ka ni țhìn bawk a, ka che thei ngai lo a nih kha.



Ka rilru ka siam sauh sauh a, tunah chuan ka hlau tawh bîk lo ang. Ka thlalâk tidarhtu hi anni bâk an ni lo, an thil tih ngei a ni tih ka hre tho bawk a, a bul ber chu an ni tho tho. An thuhnuaia ka awm lai khân hlauhna thlarauvin min man bet tlat a, Police an nih miau avàng khân engmah ti thei lovah ka inngai a nih kha.



Tunah chuan eng thil pawh ti se, ka tuar ngawt ngawt tawh bîk lo ang. Mizoram police tam zâwk hi anni pahnih ang lo hi an tam lutuk ang, thu dik țan ngam leh thu dik vànga sum tam tak pawh la duh lo an tam ang. Mi sual awmnaah pawh hian mi țha pawh hi an lo awm ve châwk a nia.



Ka pu hrilh buai lovin chinfel dàn ka zawng ve tawh ang, ka pu hi mi buai tak a ni a, ka tihbuai loh pawh hian a buai tâwk ém ém. Tunah phei chuan min hmu peih lovin phone-ah takngial pawh min be duh lo a nia, min rawn phone-a chanchin min zawh ka rin ve tehlul nèn.



Ka thil ngaihtuah vàng chuan ka muhìl har kher mai. Ka nu ka ngaihtuah chhuak a, a thihcham pawh a lo hnai ta hle tih ka hre chhuak zawk, hun hi a va kal chak tehlul ém! A thihcham vawi khatnaah pawh a thlàn tlawh chu sawi loh,  pangpâr pawh ka dah thei dâwn lo chu a ni si a, tumahin an tlawh dâwn lo tihna a ni.



Krismas a lo thleng ang a, mi dang chuan an chhûngte thlàn chu mawi tak leh felfai tak takin an chei leh ngei ang; ka nu thlàn ve erawh chu a chul riap ang a, enkawltu tùr a fanu lah ka awm hla si, ka mitthla uar uar a, mi chuan min dem ngawt ang. Ka mittui chu ka hru tâwk a, thil țûl lo ngaihtuah ka duh lo, ka hma hun a thim zâwnga ka thlìr hi duhtâwk teh ang.



Tûkțhuan ei laiin Sunday-a lèn chhuah chu ka dîl a, Âtei chuan maktih hmel deuh hian min en há a.



"A tihchi dâwn em ni? A him ang maw?"



"Ka țhiante nèn a ni tho a, him lohna tùr a awm dâwn em ni? Bâkah, hmun danga kan lèn ka ring lo, LMate inah a ni deuh mai ang," ka ti a.



"Christopher-a hi a lo haw hman ang em le?" Pu ber chuan a lo ti thung a.



"Hm, ka hre lo le, a kalna leh a thang chin tùr hi a sawi ngai si lo va, tunah pawh hian ka rin aiin a thang rei tawh a," Âtei chuan a ti barh barh a.



Chutah," LMate inah a nih chuan ka ngaihtuah lo che a, hmun dangah erawh kal lo thei la chu ka ti khawp mai," a ti leh a.



"Aw le, min ngaihtuahnaah ka lâwm e."



Ka pu kha chuan ka țhiante, ka bula mite pawh ring lo tùr khân min chah ngun viau țhìn a nih kha; mahse, an sualna awm miau lo chu rinhlelh ringawt theih an ni bîk lo. Rilru tak taka kawm ve pawh ka duh hlawm alawm, a rûk tê hian ka hrang ngawih ngawih bîk a, hrehawm ka ti alawm.



Dàwrah pawh lèn hun tùr chu kan sawiho leh a, țhiante an phûr a, an sawi 'hot' thiam bawk sia, ka châk ve zual sawt.



Mary chuan," Kawppuite hruai awih ti ila?" a ti a, Feli chuan," Loh theih nâng, LMa pawhin a bike-in Novi a phur ang a, kan inkawpkim chiah dâwn alawm," a lo ti sar sar a, a hmel ațang chuan a phûr tawh tih a hriat mai.



Kei chuan," Khawiah nge kan lèn dâwn a?" ka lo ti a, LMate inah kan lêng khâwm ni tùrah ka lo ngai a.



"Ah, kan lêng kual ang chu le. Hun âwl i neih theih hun lai a ni ve a, âm taka hmangin hlim takin kan hmang ve ang chu. Mahse, lènna tùr hi a vâng thei e, Lunglei ka ninna chhan ber pawh lènvahna tùr hmun awm lo lutuk hi a ni," a ti barh barh a.



Mary chuan," Zahngai, zahngai," a lo ti a, kan nui leh rih a.



Inrinni a lo thleng a, ka pu chu a lo la haw lo. A chhuahna hi a pawimawh viau a nih dáwn hi, min rawn phone lo va, a buai hle a ni ngei ang. U Melo-i a va hmu leh pawh a ni maithei asin. Keiin va tihbuai ka duh bawk si lo, a reh vawng vawng a ni tawp mai.



Sunday chawhnuah chuan kan lêng ta ngei a, bike-in kan inphur kual a, hmun hrang hrangah kan kal.  Ka la kal ngai lohna hmun a nih hlawm avàngin ka tân chuan hmun thar vek niin nuam ka ti. Ka rilru pawh a hlim a, hlim takin țhiante nèn kan nui tlâng a, nuam ka ti tak zet.



Feli bialpa Valpuia nuteite huanah, Mêlte ramah kan kal a, a hmun a nuam tawp. Phùl hmun a ni a, thei kung chi hrang hrang a ding țhuau bawk a.



Phùlah chuan țhuin ei tùr kan kente chu kan ei a, mipa lamin in tùr an lo keng bawk a. Valpuia chuan beer bûr khat chu ka lama rawn vawrhin," Kha, in ve rawh," a ti a, kan in tùrin a lo keng niin.



Lo dawng chatin,"Ka in ngai lo," ka ti sap a, beer bûr chu ka en vang vang a, Misuala'n min in luihtîr lai kha ka mitthla chuai chuai a.



"In rawh, engmah tham a ni lo, i rui lo ang."



Mary leh Feli pawh chuan an lo dawm ve niin. Mipaho pawh chuan an lo dawm far tawh a, ka hawi kual chu min lo nuih sâng hlawm a.



"Ka in lo mai ang," tiin Valpuia chu ka pe a, ani pawh chuan min tilui bîk lo. Eng eng emaw an sawi a, an nui dar dar a, kei pawh za vak lo chuan ka lo țhen ve sak sak a.



"A nuam ve asin, i rui dâwn pawh a ni si lo va."



LMa chu enin, mi dang a pair ve vea țhua innghèng chialte chu ka en leh a, nuam an ti hle tih a hriat theih mai.



"Ka in loh hian nuam ka ti zâwkin ka ring."



"A țha alawm, kei pawh ka in ngai bîk vak lo nain țhiante nèn hi chuan ka in ve tho, pà lo bîk leh inti-eng emaw bîk nih hi ka duh lo va," a ti leh a.



"Inla-eng emaw bîkin min hmu tihna em ni?" tiin ka zâwt ve ta ngat a.



A nui mai a," Hmu nâng, nang hi chu i dang bîk tih ka hre daih tawh alawm. Chu vànga țhian atân pawh sâwm che ka ni nghe nghe a, ka hmuh dàn che chu nula fel leh thianghlim, țawng ve mai mai lo leh insûm thei tak angin, a dik chiah pawh ka ring," a ti a. 'Thianghlim' tih a sawi lai chuan ka lo îp zawk, min hre chiang ngat se chuan, a sawi hauh lo ang.



"Nupui atâna ka duh chî tak i ni bawk."  A thil in chu a ruih ka ring chiah lo va, a mit erawh a sen ve deuh chuan ka hria.



"I mi faknaah ka lâwm e; mahse, i rin dàn erawh a dik hauh lo a nia, min hriat chian loh vàng mai mai a nih kha," ka ti ve thung a.



"Ka ti tak tak, ka kàwm rei ve tawh che alawm. Hmeichhia hi ka kàwm rei peih ngai hauh lo, nang erawh chu i danglam, tùn thlengin ka la zui char char che hi."



A nuih avàng chuan ka nui ve ringawt. Țhiante pahnih lam chu ka sn phei a, an lo inhnìmhnai dùn khawp mai a, kan awm ve a nih tih pawh an hriat hmel loh.



Haw tlai ka duh loh avàngin haw ka rawt har lo. An lo 'aw' ve thuai a, ka lâwm angreng. Mi inah ka awm tih an hria a, min hre thiam hi ka lâwm.



Zanriah ei lai chuan pu ber chuan," A nuam bawk em? Mahse, in lêng rei lo riauin ka hria," a ti a.



"Rei ve e, a nuam lutuk. Ka kal ngai lohna hmun hlîr a nia, nuam ka ti lutuk ringawt," ka ti a.



"Nuam i ti chu a țhat hlauh chu. Engmah i tâwk lo bawk a, i lêng ngai lo bawk si a, chhuah zeuh hi chu a pawi hran lo," Âtei chuan a lo ti ve a.



Engthâwl takin khumah a vâng zâwng chuan ka mu dang a, ka intleuh zo tawh bawk sia, mut chiah ka hmabâk tawh.



Message a lo thleng. Ka pu a ni maithei asin.



*Vawiin kha chu nuam i ti bawk maw? Nuam i ti rei emaw chu, i lo thlîr dâwn nia. Ka ta i nih kha, i ni reng bawk ang*



Misuala țawngkam chiah chiah! Engtin nge ka number hi a neih theih le! Mak ka ti.



Min hmu ru vek, min zui rù tihna a ni bawk. Ka awmna pawh hi a hre ngei dâwn tihna a ni, engtin nge ka tih tâk ang le?



Ka phone a rawn ri chiah chu ka phu nasa kher mai, ka phone thlauh chu ka chalah tak a tla lehnghal a, ka tuai vat vat.



Ka pu. Ka puin min lo phone. Ka thin a phu nghal dap dap mai, min rawn phone har ka ti viau tawh a ni.



"Hello?"



"Vawiinah i țhiante nèn in lêng chhhuak tih min hrilh miah suh."



Teh nghal ringawt chuan.  Engtin nge maw a lo hriat ni? Âteite'n an hrilh pawh a ni thei tho.



"Chhuak lo tùr chein ka hrilh che kha."



"Pawi a thleng chuang hlei nem."



"Tumah ring lo tùrin ka hrilh bawk che a."



"Mahse, ka țhiante hi an fel ém asin, tumah ka chungah chutianga sual duh an awm lo ang," tiin ka țang ve tlat.



"Engmah thleng thei lo a awm lo. I tân vek a nih hi, i himna tùra sawi ka ni a-"



"Ka chunga i țhatnaah ka lâwm ngawih ngawih a, engtikah mah ka rùl zo ngai dâwn lo che; mahse, tunah chuan tlànchhiat reng hi ka ning tawh, ka ning ngawih ngawih. Bihrûk hi ka kham lutuk tawh," ka ti chhuak ta phiar phiar a, tunah chuan ka hnê ngawih ngawih tawh, sawi chhuah ka duh ngai lêm lo, ka pu bulah hlauh phei chuan.



A ngawi vang vang a, kei pawh ka ngawi ve tho. A thaw ri hawk ka hre leh a.



"A țha alawm, i duh dàn dánin i awm thei."



A tàwp ta hmak. Hrilhhai zetin ka phone chu ka melh a, kan inbiak dàn chu a mak tak zet, engati nge a thinrim nghal ém ém ni? Biak ka châk tehlul nèn, a dik lo vêl vek.



Message a lo thleng leh a, ka pu a nih ka ring leh thut thut.



Ni lo chiang.



*Ka ta i ni a, i ni reng bawk ang. Ka zawng chhuak ang che ka tih kha i la hria maw?*



Hria. Ka hre lutuk. A duh leh min rawn zawng chhuakin min man leh teh se, a hma ang kha chu ka ni tawh bîk lo ang, tu emaw zawk zawk chuan damdawi in kan pan ngei a ngai  tawh ang, ka kut chu ka hûm ruh sauh sauh a.



Engmah a thleng hran lo. Ka pu a rawn haw a, kan inbe mang lo. A chhuak leh a, chutiang chuan hun kan hmang. Krismas hi ral se, kumtharah in luah tùr thar ka zawng ang. Ka hmaa harsatna hi keimah ngeiin ka tàwn a ngai, mi dang thlazàr hnuaiah, an puih ngaiin ka awm reng thei lo ang.



Krismas a lo thleng a, ka pute chhûngkua pawhin kim takin Krismas an hmang. Kei pawh a langah chuan hlim hmel ka pû, ka thinlung erawh a rûm vawng vawng. Ka nu thihcham Dec 29 a lo inher chhuah phei chuan ka nu hlîr ka ngaihtuahnaah a awm a, ka hlim lo takzet. A thlànah ka kal thei lo va, pangpár ka dah thei hek lo. Ka rilruin ka țawngțai reng ringawt, tumahin ka rilru leh thinlung hi min hriatthiampui phâk dâwn si lo, hlim takin hun an hmang a, an hlim nui rîte chu ngaihthlâk hrehawm ka ti lek lek zâwk.



Kumthar nî chuan kan inkhâwm a, mi zawng zawng chu an hlim vek ni hian ka hria. Kei erawh ka ngaihtuahna ka lo kàwm leh veng veng zêl, in ațanga chhuah dìl leh tak chu ka huphurh a, rilru a kam țûn bawk.



*I awmna chhûngkuate'n harsatna an tawh i duh loh chuan kha in ațang khân inthiar chhuak rang ang che*



Message hi number hrang hrang ațangin ka dawng.



*Hun i nei rei tawh lo*



*Tûn thla ni 10 thleng hun ka pe ang che*



Tunah hi chuan ka hlau tawh lo, ka ning hluah hluah tawh. Min vau reng mai hi ka ning a, ka pu chhûngkuain harsatna keimah vànga an tâwk tùr phei chu ka duh hauh lo.



Zan khat chu zanriah ei laiin in ațanga chhuah ka duh thu chu ka sawi a, nuam lo erawh ka tiru tak zet; mahse, ni 10 a ni țêp tawh. Keimah vànga buaina an hmachhawn ve tùr hi ka duh lo. Ka duh ngai lo ang.



Pu ber chuan," Novi, engtizia teh thut nge?" a ti a.



"A, hetia awm reng chu a dik lo, bâkah, eng thil mah a thlen tawh bîk loh hi, ka ngaihtuahawm lo ang," ka ti a.



Ka pu erawh a ngawi kur a, min rawn en zawk tih hre mah ila hre lo ang hmakin ka awm. Engmah a sawi lo, ei tùr chu a ei mawlh mawlh ringawt.



"Nia, an reh rei ta riau. An tàwp ve dâwn a niang," Âtei chuan a lo ti a.



"I thu thu a ni nain chhuak lo tùr che chuan ka la duh fan che," pu ber chuan a ti leh a.



"Ka chhuak ve leh phawt ang a, harsatna a lo awm a nih leh ka lo tibuai leh mai ang che u," nui hak chung hian ka ti a, ka nuih erawh a za hlawl lo.



"Nia, keini bâk chhûngte i nei hlei nem, a hmingin i chhuak ve mai maiah i ngai dâwn nia."



Ka room-ah a rawn lût a, min melh kur mai a, a lang hlauhawm lek lek. A lu a buk leh deuh tawh a, a mit hnuai a val phei ruih bawk nèn, hmuh nuam tak chu a ni lo.



"I chhuah duh chhan hi?"



"Ka tibuai rei tawh che u."



"Thil dang vàng a ni em?"



"Eng thil dang-"



"Heta i awm chuan i free tak tak thei lo va..."



Hm, chutiang vàngah chuan a ngai maw?! A țha e, a țha vek.



"Ka awm rei tawh alawm."



"Chhuanlam siam pawh i thiam lo chu a nih kha, min bum tum suh."



Ka bum a ngai si a ni. An chhûngkaw him nán. Eng thil pawh Misuala leh ka pahrawn khán an ti duh ang chu, ka chhuah chuan an chungah eng thil pawi mah a thleng lo ang.



"Chhuah hi a țha."



"Min lo haw àwm hle mai."



Makti zetin ka pu chu ka en a, ka pu hi ka haw ngai lo, chutianga min ngai thei chu mak ka ti!



"In luah tùr chu i hre tawh em?" Leh teh daih chuan.



"Hre lo."



"A hmaa mi kha a țha reng lo'm ni? A him tho bawk a." Ka chungah lâwm lo viauin min puh chhe viau mah se, min ngaihtuah tho tih ka hria.



"Țha e, bungrua a la awm vek bawk a."



"Ka lo sawi ang e."



A chhuak dâwn emaw ka tih hnuah chuan a rawn lêt leh a, chiang zeta min enin," Thil thleng a awm lo tak tak maw?" chiang kêk kâwk hian a ti thûm leh dût a.



A mit taka ena dâwt sawi chu a har khawp ang le.



"Ka sawi tawh kha," tiin ka hawi sawn ta nghal a.



"Dâwt i sawi lo maw?"



Ka lu ka bu ringawt.



"A țhat chu, fîmkhur tho a ngai a nia," tiin muangchângin a chhuak ta a.



A chhuah hnuah chuan ka maimichhîng vang vang a, dâwt ka hrilh kha a ngai tlat a ni. A buaina ka belhchhah tam tawh si a, belhchhah ka duh tawh lo, a chhûngte dang lakah pawh. Dâwt ka hrilh tih a hriat chhuah hunah chuan min ring tawh kher lo maithei; mahse, an chungah harsatna a thlen loh phawt chuan, a țha a ni mai.



Ka phone a rawn ri.



*Ni 3 chauh hun i nei tawh*



Ka hria. Ka kham lutuk. Ka pu bulah khân ka thinrimna leh ka inkhawngaihna rilru kha lan chhuahtîr lo tùrin ka insûm hrãm hrâm a, a pângngai thei ang berin ka awm a nih kha. Tunah chuan ka peih tawh lo, ka mittui lo tling kuang kuang pawh chu ka hru peih lo, nakinah chuan mittui tla tùr pawh hi ka nei lo maithei asin.




*MI DANG ȚHATNA HMU THEI TÙR CHUAN I CHHÛNGRIL KHA A ȚHAT VE A NGAI. MI DANG ȚHATNA I HMUH THEIH LOH CHHAN CHU I HMUH ANG KHA I CHHÛNGAH A AWM VE TLAT VÀNG A NI*